စစ်ကောင်စီ

ယင်းမာပင်၊ မတ် ၂၊ ၂၀၂၃။

စစ်ကိုင်းတိုင်း၊ ယင်းမာပင်မြို့နယ်၊ ကုန်းရွာနဲ့ အင်တောရွာကို စစ်ကောင်စီတပ်တွေက စစ်ကြောင်းထိုးမီးရှို့ခဲ့ပြီး ဒေသခံအမျိုးသား ၃ ဦးကိုလည်း မီးရှို့သတ်ဖြတ်ခဲ့ပါတယ်။

မုံရွာအခြေစိုက် အနောက်မြောက်တိုင်းစစ်ဌာနချုပ် – နမခ က အင်အား ၁၃၀ ဝန်းကျင်ရှိတဲ့ စစ်ကြောင်းက ဖေဖော်ဝါရီလ ၂၈ ရက်ည ၇ နာရီဝန်းကျင်လောက်မှာ စစ်ကြောင်းထိုးမီးရှို့ခဲ့တာလို့ Bo Thurain-Yinmabin PDF တပ်ရင်းမှူး ဗိုလ်သူရိန်က ပြောပါတယ်။

“ကုန်းရွာက နေအိမ် ၈၀၀ ခန့်ရှိတာ။ စစ်ကောင်စီတပ်သားတွေက မီးရှို့တယ်။ ဖေဖော်ဝါရီလ ၂၈ ရက်နေ့ ညနေပိုင်း ၇ နာရီထိုးမှာ ရှို့ပြီး မတ်လ ၁ ရက် မနက်ပိုင်းမှာ ထပ်ရှို့တယ်။ အိမ်ခြေ ၈၀၀ ‌ခန့်ရှိတာ အိမ် ၇၀ လောက်ပဲ ကျန်တယ်” လို့ ပြောပါတယ်။

ကုန်းရွာသား အသက် ၆၀ နှစ်အရွယ် ဦးဆန်းလင်းနဲ့ ဦးအေးလွင် အသက် ၄၃ နှစ်တို့ကို စစ်သားတွေက ရွာထဲမှာပဲ ကြိုးနဲ့တုတ်ပြီး မီးရှို့သတ်ခဲ့တာလည်း ဖြစ်ပါတယ်။

ခုလို မီးရှို့သတ်ဖြတ်ခဲ့တဲ့ စစ်ကောင်စီတပ်တွေဟာ မတ်လ ၁ ရက် မနက် ၉ နာရီလောက်မှာတော့ ကုန်းရွာကနေ မီးရှို့ပြီးထွက်လာချိန် ကုန်းရွာနဲ့ စားတော်ပြင်ရွာကြားအရောက်မှာ ဒေသခံကာကွယ်ရေး မဟာမိတ်တပ်တွေရဲ့ တိုက်ခိုက်မှုကို ခံခဲ့ရပြီး နှစ်ဖက်ထိတွေ့မှုလည်း ဖြစ်ခဲ့တယ်လို့ သိရပါတယ်။

ဒီအပြန်အလှန်ပစ်ခတ်မှုက ၂ နာရီဝန်းကျင် ကြာခဲ့ပြီး တိုက်ပွဲအတွင်း စစ်သား ၅ ဦး သေဆုံးခဲ့တယ်လို့ တိုက်ခိုက်မှုမှာ ပါဝင်တဲ့ Dragon Brothers Task Force -DBTF တာဝန်ခံက မြေလတ်အသံကို အတည်ပြုဖြေဆိုထားပါတယ်။

အလားတူ ကုန်းရွာနဲ့ ၁ မိုင်သာသာဝေးတဲ့ အင်တိုင်ရွာကိုလည်း အဆိုပါစစ်ကြောင်းက ဖေဖော်ဝါရီလ ၂၇ ရက်နေ့လည် ၁ နာရီလောက်မှာ စစ်ကြောင်းထိုးမီးရှို့ခဲ့တဲ့အပြင် အသက် ၃၀ အရွယ် ရွာခံအမျိုးသားတဦးကိုပါ မီးရှို့သတ်ခဲ့တယ်လို့ သိရပြီး၊ ဒီဖြစ်စဥ်နဲ့ပတ်သက်တဲ့ နောက်ဆက်တွဲ အခြေအနေတွေကိုတော့ ဆက်လက်စုံစမ်းနေဆဲပါ။

စာတည်း – လင်း

ပဲခူး၊ မတ် ၁၊ ၂၀၂၃။

ပဲခူးမြို့၊ ရွှေမော်ဓော်ဘုရား တောင်ဘက်မုဒ် သနပ်ပင်လမ်းမကြီးဘေးမှာ စစ်ကောင်စီလက်အောက်ခံ တပ်ဖွဲ့ဝင်တွေဟာ အခုရက်ပိုင်း လိုင်စင်မဲ့ကား၊ ဆိုင်ကယ်တွေကို ဖမ်းဆီးပြီး ငွေကြေးတောင်းခံမှုတွေ ပိုမိုပြုလုပ်လာတယ်လို့ မြို့ခံတဦးဆီက သိရပါတယ်။

ရဲ၊ ယာဥ်ထိန်းရဲနဲ့ စစ်ကောင်စီတပ်ဖွဲ့တွေ ပေါင်းပြီး အင်အား ၂၀ နီးပါးနဲ့ ပဲခူးမြို့ပေါ်က ရွှေမော်ဓောဘုရား တောင်ဘက်မုဒ်မှာ ညနေ ၄ နာရီခွဲကနေ ၅ နာရီခွဲထိ ဖမ်းဆီးစစ်ဆေးမှုတွေ ပြုလုပ်လာတာ ၁ လနီးပါးရှိပြီ ဖြစ်တယ်လို့ ဆိုပါတယ်။

ဒါ့အပြင် ဖမ်းဆီးသူတွေထဲမှာ စစ်ကောင်စီအဖွဲ့တွေနဲ့အတူ ဆိုင်ကယ် ကယ်ရီသမား တချို့ကလည်း ပါဝင်ကူညီပေးတယ်လို့ ဖမ်းဆီးခံခဲ့ရသူတဦးက ပြောပါတယ်။

“မနေ့က အဖမ်းခံလိုက်ရတဲ့ ဆိုင်ကယ်တွေ စုစုပေါင်း ၂၅ စီးလောက် ရှိမယ်။ ဆန်အိတ်တင်ကား ၂ စီးလည်း အဖမ်းခံရတယ်။ ဖမ်းမိရင် ဆိုင်ကယ်နံပါတ်၊ လိပ်စာတွေ ပြောရမယ်။ အဖေနာမည်တွေ ပြောရတယ်။ ပြောပြီးရင် သူတို့က ချလန်ဖြတ်ပေးတယ်။ စာရင်းစာအုပ်မှာ လက်မှတ်ထိုးရတယ်။ ကျနော်တောင် အဲ့နေ့က တသောင်းပေးလိုက်ရတယ်” လို့ ဆိုပါတယ်။

ဖမ်းဆီးရမိထားတဲ့ ကား၊ ဆိုင်ကယ်တွေကို အနည်းဆုံး ငွေကျပ် တသောင်းကနေ ငွေကျပ် ၅ သိန်းအထိ တောင်းခံလေ့ရှိတယ်လို့လည်း အထက်ပါမြို့ခံက ပြောပါတယ်။

“ပိုက်ဆံက သူတို့ပါးစပ်ဖျားကနေ တောင်းသလောက် ပေးရတယ်။ ဖမ်းဆီးထားတဲ့ ဆိုင်ကယ်တွေ၊ ကားတွေဆို ဖမ်းမိတဲ့နေ့မှာပဲ အပြီးရွေးရတယ်။ နောက်ရက်တွေဆို သိပ့်မသေချာတော့ဘူး” လို့ ဆိုပါတယ်။

ပြီးခဲ့တဲ့ ဖေဖော်ဝါရီလ ၂၄ ရက်ကလည်း ပဲခူးမြို့၊ ရွှေမော်ဓောဘုရား အနောက်ဘက်မှာရှိတဲ့ သီရိဟံသာခန်းမဘေးကို ဖမ်းဆီးထိန်းသိမ်းထားတဲ့ မော်တော်ဆိုင်ကယ် ၁၀ စီးနီးပါးသယ်ဆောင်သွားပြီး အခုချိန်ထိ ပြန်လည်မရရှိသေးဘူးလို့ သိရပါတယ်။

စာတည်း – လင်း

ဆားလင်းကြီး၊ ဖေဖော်ဝါရီ ၂‌၇၊ ၂၀၂၃။

စစ်ကိုင်းတိုင်း၊ ဆားလင်းကြီးမြို့နယ်၊ မုံရွာ – ပုသိမ်လမ်းပိုင်းရှိ ၁၆ ကုတင်ဆေးရုံဟောင်းအနီးမှာ ကင်းပုန်းဝပ်ကာ လုံခြုံရေးယူနေတဲ့ စစ်သားတွေ မိုင်းဆွဲတိုက်ခိုက်ခံရတယ်လို့ သိရပါတယ်။

ဖေဖော်ဝါရီလ ၂၇ ရက် ဒီကနေ့မနက် ၇ နာရီလောက်မှာ ဒေသခံကာကွယ်ရေးတပ်တွေက မိုင်း ၈ လုံးနဲ့ တိုက်ခိုက်ခဲ့ရာ စစ်သား ၂ ဦး သေဆုံးပြီး၊ ၅ ဦး ထိခိုက်ဒဏ်ရာ ရခဲ့တယ်လို့ ယင်းမာပင်ခရိုင် တပ်ရင်း ၁၆၊ တပ်ခွဲ ၁ Brother Defense Force မှ ဗိုလ်နေလအောင်က မြေလတ်အသံကို ပြောပါတယ်။

“မုံရွာ-ပုသိမ် လမ်းတလျှောက်မှာ ကင်းပုန်းဝတ်နေကြတာ၊ အဲဒီကင်းပုန်းဝတ်တဲ့ စစ်သားတွေကို မိုင်းဆွဲတိုက်ခိုက်ခဲ့တယ်။ အဲဒီမှာ ၂ ယောက်ကတော့ ပွဲချင်းပြီး သေတယ်။ ၅ ယောက်ကတော့ တော်တော်လေး ပြင်းထန်ဒဏ်ရာရတယ်။ အဲဒါကို အတွင်းသတင်းပေး ဖရဲသီးက လှမ်းပို့တာ” လို့ ပြောပါတယ်။

အဲ့ဒီစစ်သားတွေဟာ မုံရွာအခြေစိုက် နမခ တပ်က စစ်သားတွေ ဖြစ်နိုင်တယ်လို့ ကာကွယ်ရေး ရဲဘော်တွေက ခန့်မှန်းထားပြီး၊ ထိခိုက်သေဆုံး စစ်သားတွေကိုတော့ ဆားလင်းကြီးနယ်ထဲက မိုင်းဆေးရုံကို သယ်သွားကြတယ်လို့ ဆိုပါတယ်။

အဲ့ဒီစစ်သားတွေဟာ ရိက္ခာသယ်တဲ့ကားတွေကို လုံခြုံရေးယူတဲ့အနေနဲ့ ကင်းပုန်းဝပ်နေကြတာ ဖြစ်ပြီး၊ လက်ရှိအချိန်ထိ အဲ့ဒီနေရာမှာ စစ်သားအချို့က ကင်းပုန်းဝပ်နေဆဲ ဖြစ်တယ်လို့ ဗိုလ်နေလအောင်က ဆက်ပြောပါတယ်။

ပြီးခဲ့တဲ့ ဖေဖော်ဝါရီလ ၁၉ ရက်ကလည်း ဆားလင်းကြီးမြို့နယ်နဲ့ ယင်းမာပင်မြို့နယ်အစပ် ကျောက်မျက်တောင်ပေါ်မှာ တပ်စွဲထားတဲ့ စစ်ကောင်စီစခန်းကို ယင်းမာပင်ခရိုင် တပ်ရင်း ၁၆ တပ်ခွဲ ၁ Brother Defense Force အဖွဲ့က ဝင်ရောက်စီးနင်း တိုက်ခိုက်ခဲ့ပါသေးတယ်။

ပေါက်၊ ဖေဖော်ဝါရီ ၂‌၆၊ ၂၀၂၃။

မကွေးတိုင်း၊ ပေါက်မြို့နယ်၊ သဖန်းချောက်ကျေးရွာကို စစ်ကောင်စီတပ်သားတွေ ဖေဖော် ဝါရီ၂၆ရက် ဒီနေ့ မနက်၈နာရီမှာ ဝင်ရောက်နေထိုင်ခဲ့ပြီးနောက် ရွာလုံးကျွတ်နီးပါးမွှေနှောက်ဖျက်စီးခံလိုက်ရတယ်လို့ သိရပါတယ်။

နေအိမ်တွေကို မွှေနှောက်ဖျက်စီးသွားတဲ့ စစ်ကောင်စီစစ်ကြောင်းဟာ ပျူအများစုနေတဲ့ ယာကြီးပြင်ရွာဘက်ကနေ အင်အား၈၀ ကျော်နဲ့ ရောက်ရှိလာခဲ့တာဖြစ်တယ်လို့ Successful Force – Pauk သတင်းနဲ့ပြန်ကြားရေးတာဝန်ခံ ကိုလိပ်ပြာက ပြောပါတယ်။

“အိမ်တိုင်းလိုလို မွှေနှောက်ခံထားရတာ။ ဝက်၊ ကြက်၊ ဆိတ်တွေကိုလည်း သတ်စားသွားတယ်။ ထမင်းချက်ပြုတ်စားသောက်သွားတာက ရွာလယ်ထဲက အိမ် ၆အိမ်လောက်မှာဗျ။” လို့ ဆိုပါတယ်။

ဒါ့အပြင် စစ်ကြောင်းဝင်လာချိန် မနက်က ဖမ်းဆီးခံလိုက်ရတဲ့ ဇီးဖြူကုန်းရွာသား နွားကျောင်းသား၂ဦးကိုလည်း ပြန်လွှတ်ခဲ့ပြီး လက်ရှိစစ်ကြောင်းဟာ သဖန်းချောက်ကျေးရွာနဲ့ ၁မိုင်ခန့်ဝေးတဲ့ ကျားပစ်ကန်ရွာကို ရောက်ရှိနေတယ်လို့ ကိုလိပ်ပြာက ပြောပါတယ်။

“သဖန်းချောက်ရွာက အိမ်ခြေ ၆၀ကျော်လောက်ရှိမယ်ဗျ။ အမျိုးသမီးတဦးက လမ်းကြောင်းမှာ သဖန်းချောက်ကျေးရွာကို မဝင်ခင် စစ်ကြောင်းနဲ့တိုးတယ်ဗျ။ သူ့ကို နွား ကျောင်းသား၂ယောက်နဲ့အတူ ဖမ်းပြီးတော့ ဝတ်ဆင်ထားတဲ့ရွှေထည်ပစ္စည်းတွေကိုယူသွားတယ်။ စစ်ကြောင်းက သူတို့၃ယောက်ကိုလွှတ်ပြီး ထွက်သွားတာ”လို့ ဆိုပါတယ်။

အဲ့ဒီစစ်ကြောင်းဟာ တိုက်ပွဲဖြစ်တာမရှိဘဲ တရွာဝင်တရွာထွက် သွားလာနေတာကြောင့် ပန်းတော်ကန်၊ သဖန်းချောက်၊ ဇီးဖြူကုန်း၊ ရေယာဥ်တောင်စု၊ မြောက်စုစတဲ့ ကျေးရွာ၅ရွာက ဒေသခံ ၁ထောင်ကျော်မှာ ဘေးလွတ်ရာကို ထွက်ပြေးနေကြရတာဖြစ်တယ်လို့သိရပါတယ်။