အောင်စိုး၊ ဟယ်သာ

မြေလတ်အသံ၊ နိုဝင်ဘာ ၁၇၊ ၂၀၂၅။

မကွေးတိုင်း၊ မြိုင်မြို့နယ်အနောက်ခြမ်းနဲ့ ပေါက်မြို့နယ်မြောက်ခြမ်းကို စစ်ကော်မရှင်တပ်က နိုဝင်ဘာ ၁၇ ရက်ဒီမနက်ကစပြီး စစ်ကြောင်းထိုးနေတာကြောင့် ကျေးရွာ ၃၀ ကျော်က ဒေသခံတွေထွက်ပြေးနေကြရတယ်လို့ ဒေသခံတွေဆီက သိရပါတယ်။

မြိုင်မြို့နယ်အခြေစိုက် စက်မှု ၂ ကနေ အင်အား ၁၅၀ ခန့်ပါ စစ်ကော်မရှင်စစ်ကြောင်းက မြိုင်မြို့နယ် အနောက်ခြမ်းကတဆင့် ပေါက်မြို့နယ်ထဲကိုဝင်ရောက်နေပြီး နောက်ထပ်အင်အား ၁၀၀ ကျော်ပါ စစ်ကြောင်းကလည်း ပေါက်မြို့နယ်မြောက်ခြမ်းကို စစ်ကြောင်းထိုးနေတာလို့ ဆိုပါတယ်။

“မြိုင်စစ်ကြောင်းက ဒီကနေ့စထိုးတာ။ ပေါက်စစ်ကြောင်းကတော့ မနေ့က မြောက်ခြမ်းကိုစရောက်တာ။ ဒီမနက် ၁၀ နာရီကျော်မှာတော့ မြိုင်ကစစ်ကြောင်းက ပေါက်နယ်ကိုရောက်သွားတယ်။ ပေါက်နယ်၊ ချိုင်စောက်ရွာကိုပေါ့။ ပေါက်ကစစ်ကြောင်းနဲ့ပေါင်းပြီး စစ်ကြောင်းထိုးနေတာ”လို့ ပေါက်ဒေသခံတော်လှန်ရေးတပ်ဖွဲ့ဝင်တဦးက ပြောပါတယ်။

အခုလိုစစ်ကြောင်းထိုးနေတာကြောင့် မြိုင်မြို့နယ်အနောက်ခြမ်းက ကုန်းရွာ၊ ဆိတ်သာ၊ ဝါးရင်းချိုင်၊ ကျွဲတွင်း၊ တောင်ရိုးနဲ့ ပေါက်မြို့နယ်မြောက်ခြမ်းက ဆေးပင်ကြီး၊ ကမ္ဘားဖြူ၊ တဲကြီး၊ ကန်သစ်၊ ထန်းပေါက်ကုန်း အပါအဝင် ကျေးရွာ ၃၀ ကျော်က ဒေသခံ ၃ သောင်းနီးပါး ထွက်ပြေးနေကြရတယ်လို့ သိရပါတယ်။

“ကပစ ၂၄ က ထိုးတဲ့စစ်ကြောင်းက ပေါက်နယ်အနောက်ပိုင်းက ထန်းပင်ချောင်းရွာမှာ ဝင်ရောက်၊ ရွှေဘုံသာ ပျူရွာကထွက်လာတဲ့စစ်ကြောင်းကပေါက် ချိုင်စောက်(အောက်စု)မှာပဲ ဆက်လက်တည်ရှိတယ်၊ မြိုင်စက်မှု ကထွက်လာတဲ့ စစ်ကြောင်းက ပေါက်နယ် ကမ္ဘားဖြူရွာ၊ ကန်သစ်ရွာ၊ ထန်းပေါက်ကုန်း (ဒေသအခေါ် ချောင်းခြောက်တော) သုံးရွာကြားတောကြားထဲမှာ ရောက်နေပါတယ်”လို့ ပေါက်မြို့နယ်ဒေသခံတဦးက ဆိုပါတယ်။

လက်ရှိ ပေါက်မြို့နယ်အတွင်းမှာ တမခ ၁၀၁၊ ကပစ ၂၁ နဲ့ ကပစ ၂၄ က စစ်ကော်မရှင်တပ်တွေ ပူးပေါင်းထားတဲ့ စုစုပေါင်းစစ်ကြောင်း ၃ ကြောင်းရောက်ရှိနေတာလို့ သိရပါတယ်။

စစ်ကြောင်းကြောင့်တိမ်းရှောင်နေကြရတဲ့ စစ်ရှောင်ဒေသခံတွေမှာလည်း တောတွေထဲမှာ ခိုလှုံနေကြရတာကြောင့် စားနပ်ရိက္ခာ၊ ဆေးဝါး၊ အနွေးထည်တွေနဲ့ အမိုးအကာတွေလိုအပ်နေကြတယ်လို့ အညာမြေတပ်ပေါင်းစုမှတပ်ဖွဲ့ဝင်တဦးက ပြောပါတယ်။

“စစ်ရှောင်တွေရဲ့အခက်အခဲကတော့ သူတို့ရဲ့စားရေးသောက်ရေးဖြစ်တယ်။ ရက်ရှည်မဟုတ်သေးတဲ့အတွက် စားရေး၊ သောက်ရေးအကြီးကျယ်မဟုတ်သေးဘူးပေါ့။ အဓိကအခက်အခဲဆိုရင်တော့ တော၊ တောင်တွေထဲမှာ တိမ်းရှောင်ရတဲ့အတွက် စိတ်ပင်ပန်းမှု၊ စိတ်ဒဏ်ရာတွေကတော့ အကြီးမားဆုံး ပြဿနာပေါ့။ ဆောင်းတွင်းဖြစ်တဲ့အတွက် ရာသီဥတုဒဏ်ကိုကောင်းကောင်းခံရတာ ကလေးငယ်တွေ၊ သက်ကြီး ရွယ်အိုတွေ ထိခိုက်လွယ်အုပ်စုတွေမှာ အဓိကပြဿနာဖြစ်တာပေါ့နော်”လို့ ဆိုပါတယ်။

မြိုင် စက်မှု ၂ ကထွက်လာတဲ့စစ်ကြောင်းဟာ အောက်တိုဘာ တတိယပတ်လောက်ကစတင်ပြီး ပခုက္ကူမြို့နယ်နဲ့ မြိုင်မြို့နယ်က ကျေးရွာတွေကို စစ်ကြောင်းထိုးမီးရှို့ခဲ့ပြီး နိုဝင်ဘာ ၁၁ ရက်မှာ ပျူစောထီးအားကောင်းတဲ့ သရက်ကန်ရွာကတဆင့် မြိုင်စက်မှု ၂ ကိုလာချိန် ရွာတန်းရှည်ကျေးရွာအနီးမှာ ဒေသခံ ၅ ဦးကိုဖမ်းဆီးခဲ့ပါသေးတယ်။

အဲ့ဒီနောက် နိုဝင်ဘာ ၁၂ ရက်မနက်ပိုင်းမှာ မြိုင်အခြေစိုက် စက်မှု ၂ ကနေထွက်လာပြီးနောက် ၃ မိုင်အကွာ ဝက်ပုတ်ရွာအနီးမှာ ဖမ်းဆီးခံထားရသူတွေထဲက အသက် ၃၄ နှစ်အရွယ် မငယ်တာနဲ့ ၄၉ နှစ်အရွယ် ကိုကံစိန်တို့ကိုသတ်ကာ နေအိမ် ၂ လုံးကိုလည်း မီးရှို့ပြီး စက်မှု ၂ ကိုပြန်ဝင်ပြီးနောက် တခုတကြိမ်ပြန်လည် စစ်ကြောင်းထွက်လာတာလည်း ဖြစ်ပါတယ်။

စာတည်း – လင်း

မြေလတ်အသံ၊ နိုဝင်ဘာ ၁၀၊ ၂၀၂၅။

စစ်ကိုင်းတိုင်း၊ ဗန်းမောက်မြို့နဲ့ ဝက်လက်မြို့နယ်တို့မှာ စစ်ရေးအခြေအနေကြောင့် နေရပ်စွန့်ခွာ တိမ်းရှောင်နေကြရတဲ့ စစ်ရှောင်ပြည်သူ ၂၆,၀၀၀ ခန့်ဟာ စားနပ်ရိက္ခာနဲ့အနွေးထည်တွေ လိုအပ်နေကြတယ်လို့ ကူညီဆောင်ရွက်ပေးနေသူတွေဆီက သိရပါတယ်။

ဗန်းမောက်မြို့နယ်မှာ မြို့သိမ်းတိုက်ပွဲအတွင်းတိမ်းရှောင်နေကြသူတွေနဲ့ မြို့သိမ်းတိုက်ပွဲမဖြစ်မီကတည်းက တိမ်းရှောင်နေကြရတဲ့ စုစုပေါင်းလူဦးရေ ၆,၀၀၀ ခန့်တို့ဟာ စားနပ်ရိက္ခာအပြင် အနွေးအထည်တွေ အရေးပေါ်လိုအပ်လျှက်ရှိနေတယ်လို့ ဆိုပါတယ်။

“အရေးတကြီးလိုအပ်တာက အခုဆောင်းဝင်လာပြီဖြစ်တဲ့အတွက် အဝတ်အစားတို့ အနွေးအထည်တွေတို့ လိုအပ်နေပါတယ်။ စားဝတ်နေရေးပြေလည်ဖို့ကတော့ ပြင်ပ အဖွဲ့အစည်းတချို့ကလာကူညီတာရှိတယ်။ ဒေသတွင်းမှာရှိတဲ့ လူမူအဖွဲ့အစည်းတွေ၊ လုပ်ငန်းရှင်တွေကနေပြီးတော့ ကူညီတာမျိုးတွေလည်းရှိတဲ့အတွက် လတ်တလော စားဝတ်နေရေးကြတော့ပြေလည်တယ်။ အဓိကမပြေလည်မှာက အင်္ကျီအဝတ်အစားတို့ စောင်တို့ပေါ့”လို့ ကူညီပေးနေသူ အမျိုးသားတဦးကပြောပါတယ်။

အဆိုပါစစ်ရှောင်တွေအနေနဲ့ စစ်ဘေးနဲ့လွတ်ကင်းတဲ့ကျေးရွာတွေရဲ့ ဇရပ်၊ စာသင်ကျောင်း၊ ဘုန်းတော်ကြီးကျောင်းနဲ့ တောတွေထဲမှာ တဲထိုးပြီး ဖြစ်သလိုခိုလှုံနေကြရတာကြောင့် ကလေးတွေနဲ့ သက်ကြီးရွယ်အိုတွေအတွက် ဓာတ်ဆား၊ ဆေး၊ အိပ်ယာခင်းတွေလည်း လိုအပ်နေကြတယ်လို့ အထက်ပါအမျိုးသားက ဆိုပါတယ်။

အထက်ပါစစ်ရှောင် ၆,၀၀၀ ခန့်ဟာ ဗန်းမောက်မြို့ပေါ်ရှိ ရပ်ကွက် ၄ ခု၊ မြို့နဲ့ ၁၀ မိုင်ခန့်ကွာဝေးတဲ့ ကျေးရွာ ၂၅ ရွာက ဒေသခံပြည်သူတွေဖြစ်ကြတယ်လို့ သိရပါတယ်။

အလားတူ ဝက်လက်မြို့နယ်ကကျေးရွာတွေကို စစ်ကော်မရှင်တပ်က စစ်အင်အား ၃၀၀ ကျော်နဲ့ စစ်ကြောင်း ၃ ကြောင်းခွဲကာ စစ်ကြောင်းထိုးဝင်ရောက်ပြီး လူနေအိမ်တွေကို မီးရှို့နေတာကြောင့် ကျေးရွာ ၂၁ ရွာ မှ လူဦးရေ ၂၀,၀၀၀ နီးပါလာနေရပ်စွန့်ခွာ ထွက်ပြေးနေကြရတယ်လို့လည်း ကူညီပေးနေသူတွေက ဆိုပါတယ်။

“ပြည်သူတွေက ဘေးကင်းတဲ့နေရာလေးတွေမှာ တဲလေးတွေထိုးနေတာမျိုး တချို့က ဘုန်းကြီးကျောင်းတွေမှာ စုပြီးနေ‌နေရတယ်ဗျ။ ဆန်၊ ဆီတို့လို စားနပ်ရိက္ခာတွေအပြင် ဆောင်းရာသီ၀င်ပြီဆိုတော့ အမိုးအကာနဲ့ အနွေးအထည်တွေလည်း လိုအပ်လျက်ရှိနေပါတယ်ဗျ။ နောက်ပြီး ကျန်းမာရေးစောင့်ရှောက်မှုတွေလည်း လိုအပ်နေပါတယ်ခင်ဗျာ”လို့ ဝက်လက်မြို့နယ် လူထုသပိတ်တိုက်ပွဲဦးဆောင်ကော်မတီမှ တာဝန်ရှိသူက ပြောပါတယ်။

အဆိုပါအင်အား ၃၀၀ ကျော်ပါစစ်ကြောင်း ၃ ကြောင်းဟာ ဖြန့်ခွဲပြီး နိုဝင်ဘာ ၄ ရက်ကစတင်ကာ ဝက်လက်မြို့နယ်ရှိ ရွာသာကြီး၊ တံတားဦး၊ ထုံးဘို၊ မတာကုန်း၊ ရွာတော်တုန်း၊ မူးကြီး၊ စိုင်နိုင်လေးစတဲ့ ကျေးရွာကိုဝင်ရောက်ပြီး လူနေအိမ်တွေကိုပါ မီးရှို့ဖျက်ဆီးသလို နိုဝင်ဘာ ၁၀ ရက်ဒီကနေ့မှာတော့ လှတောကျေးရွာကို ဝင်ရောက်တပ်စွဲထားတယ်လို့ သိရပါတယ်။

စစ်ကြောင်းကြောင့် ဝက်လက်မြို့နယ်အနောက်ခြမ်းရှိ ရွာသာကြီး၊ ထုံးဘို၊ တံတားဦး၊ နှမ်းကြီးကုန်း၊ ရွှေဒါး၊ ရင်းမတော၊ ကက္ကိုလ်စု၊ ငှက်ပြောတော၊ တကောင်းတောင်၊ ကဒူး၊ ဥတည်ကုန်း၊ အုတ်ဖိုကုန်း၊ ကျီးကန် တောင်ရွာ၊ မြောက်ရွာ၊ တမာကုန်း၊ ရွာတော်ကုန်း၊ လှတော၊ လှည်းဦးကြီးကုန်းစတဲ့ ကျေးရွာတွေက ဒေသခံတွေတိမ်းရှောင်နေကြရတာပါ။

ပုံစာ – ဝက်လက်မြို့နယ်မှာ စစ်ဘေးရှောင်များ။

စာတည်း – လင်း

ဝက်လက်၊ နိုဝင်ဘာ ၇၊ ၂၀၂၅။

စစ်ကိုင်းတိုင်း၊ ဝက်လက်မြို့နယ်က ကျေးရွာ ၅ ရွာနဲ့ စစ်ဘေးရှောင်တဲတွေကို စစ်ကော်မရှင်တပ်က နိုဝင်ဘာ ၅ ရက်နဲ့ ၆ ရက်တွေမှာ ဆက်တိုက်မီးရှို့ခဲ့တယ်လို့ ဝက်လက်ဒေသခံတွေဆီက သိရပါတယ်။

နိုဝင်ဘာ ၅ ရက်မှာ တမာကုန်း၊ ရွာတော်ကုန်း၊ တံတားဦးနဲ့ ထုံးဘိုရွာတွေကို မီးရှို့ပြီး နိုဝင်ဘာ ၆ ရက်မှာတော့ (ဒေသအခေါ်)တံတားညီနောင်စစ်ရှောင်တဲတွေနဲ့ မူးကြီးရွာကို မီးရှို့ခံခဲ့ရတယ်လို့ ဒေသခံတဦးက ပြောပါတယ်။

“တမာကုန်း စရှို့တယ်၊ တမာကုန်းရှို့ပြီးတော့ ရွာတော်ကုန်း၊ ရွာတော်ကုန်းကနေ တံတားဦး၊ တံတားဦးကနေ ထုံးဘို ရှို့တယ်၊” လို့ ဒေသခံတဦးက မြေလတ်အသံကို ပြောပါတယ်။

ဒီမီးရှို့ခဲ့တဲ့ စစ်ကြောင်းဟာ နိုဝင်ဘာ ၅ ရက်မှာ ဆားတောင်ကနေ ရွာသာကြီးအထိုင်စခန်းကို ဖြည့်လာတဲ့အင်အားနဲ့ လှတောရွာအထိုင်စခန်းကထွက်လာတဲ့ အင်အားတို့ပေါင်းထားတဲ့ အင်အား ၅၀၀ ကျော်ပါ ပူးပေါင်းစစ်ကြောင်းဖြစ်တယ်လို့ ဆိုပါတယ်။

မီးရှို့ခံရတဲ့အိမ်ခြေအရေအတွက်နဲ့ ပျက်စီးဆုံးရှုံးမှုတွေကိုတော့ မြေလတ်အသံက ဆက်လက်စုံစမ်းနေပါတယ်။

လက်ရှိမှာ စစ်ကြောင်းကြောင့် အိမ်ခြေ ၂၀၀ ကနေ ၇၀၀ ကြားရှိတဲ့ စိုင်နိုင်ကြီး၊ စိုင်နိုင်လေး၊ တံတားဦး၊ သမကုန်း၊ တမာကုန်း၊ ရွာတော်ကုန်း၊ အုတ်နဲဘုတ်၊ ဆင်တဝဲအပါအဝင် ကျေးရွာပေါင်း ၂၀ ကျော်က ဒေသခံတွေသောင်းနဲ့ချီ စစ်ဘေးတိမ်းရှောင်နေရတယ်လို့ သိရပါတယ်။

နိူဝင်ဘာ ၂ ရက်ကလည်း ဝက်လက်မြို့နယ်၊ ရွာသာကြီးကျေးရွာကလာတဲ့ စစ်ကော်မရှင် စစ်ကြောင်းက မောက္ကဒီးကျေးရွာက ပြည်သူ ၄၀ ကျော်ကိုဖမ်းခဲ့ပါသေးတယ်။

စာတည်း – လင်း

ကလေး၊ နိုဝင်ဘာ ၃၊ ၂၀၂၅။

စစ်ကြောင်းထိုးမီးရှို့ခံနေရတဲ့ စစ်ကိုင်းတိုင်း၊ ကလေးမြို့နယ်က စစ်ဘေးရှောင်တွေ နေထိုင်ဖို့အခက်တွေ့နေပြီး အမိုးအကာ၊ စောင်နဲ့ ကျန်းမာရေးစောင့်ရှောက်မှုတွေအရေးပေါ်လိုအပ်နေတယ်လို့ စစ်ရှောင်ကူညီနေသူတွေဆီက သိရပါတယ်။

အောက်တိုဘာ ၂၄ ရက်ကစတင်ကာ နေ့စဥ်နီးပါးမိုးသည်းထန်စွာရွာသွန်းနေပြီး ရာသီဥတုကလည်း ပိုမိုအေးလာတာကြောင့် နေထိုင်ရေးခက်ခဲနေကြတဲ့အပြင် ဖျားနေသူတွေလည်းရှိနေတယ်လို့ ဆိုပါတယ်။

“မိုးတအားရွာတော့ ဖျားပြီးသားသူတွေတောင် နလန်မထူနိုင်သေးခင်ပေါ့ဗျာ။ အဓိကကတော့ စောင်လိုအပ်မှု အရေးပေါ်ဖြစ်လာတာပေါ့။ စစ်ရှောင်တဲ့ပြည်သူဟာ လူနေမှုသိပ်သည်းတဲ့အတွက်ကြောင့် လုံလုံလောက်လောက်မလုပ်ပေးနိုင်သေးတာ။ ကျန်းမာရေးစောင့်ရှောက်မှုကတော့ လက်လှမ်းမှီသလောက် လုပ်ပေးနေကြပါတယ်”လို့ကလေးမြို့လူထုတိုက်ပွဲ ဦးဆောင်ကော်မတီရဲ့ အဖွဲ့ဝင်တဦး ဆိုပါတယ်။

လမ်းတွေပျက်စီးတာကြောင့် သွားလာရေးအဆင်မပြေတာ၊ မိုးမလုံတဲ့နေရာတွေမှာ နေထိုင် နေကြရတာကြောင့် ဖျားနေသူတွေရှိနေတဲ့အတွက် မသန့်ရှင်းတဲ့ရေတွေကို သုံးစွဲ၊ သောက်သုံးနေကြရတာကြောင့် ယားနာရောဂါဖြစ်နေသူတွေလည်းရှိနေတယ်လို့ စစ်ရှောင်တွေကိုကူညီနေသူတဦးက ပြောပါတယ်။

ကလေးမြို့နယ်မြောက်ပိုင်းကျေးရွာတွေကို စက်တင်ဘာပထမအပတ်ကတည်းက အင်အား ၁,၅၀၀ ဝန်းကျင်နဲ့ဝင်ရောက်စစ်ကြောင်းထိုးနေတဲ့ စစ်ကော်မရှင်တပ်ဟာ အောက်တိုဘာ ၂၇ ရက်ကစလို့ ကလေးမြို့နယ်တောင်ပိုင်းရှိ ကျေးရွာတွေကိုလည်းစစ်ကြောင်းဝင်လာတဲ့အတွက် နှစ်ရှည်စစ်ရှောင်တွေလည်း ထပ်မံတိမ်းရှောင်နေကြရတယ်လို့ ဆိုပါတယ်။

လက်ရှိမှာကလေးမြို့နယ်တောင်ပိုင်းနဲ့မြောက်ပိုင်းရှိ ကျေးရွာ ၁၀၀ ကျော်က ဒေသခံ ၁ သိန်းကျော် စစ်ဘေးတိမ်းရှောင်နေရတယ်လို့ စစ်ရှောင်ကူညီနေသူတဦးက ပြောပါတယ်။

ဒါ့အပြင် အောက်တိုဘာ ၂၇ ရက်ကစလို့ ကျွန်းချောင်း၊ ထောက်ကြံ့၊ နတ်မြောင်း၊ နတ်ချောင်း၊ ဟားခါးလေးနဲ့ ခွေးကျင်ရွာတွေကို မီးရှို့ဖျက်ဆီးခဲ့ပြီး ပျက်စီးမှုတွေကိုတော့ အတည်မပြုနိုင်သေးဘူးလို့ ဆိုပါတယ်။

လက်ရှိမှာ စစ်ကြောင်းက ကလေးမြို့နယ် မြောက်ပိုင်းကကျေးရွာတွေနဲ့ တောင်ပိုင်းက ခွေကျင်၊ နတ်ချောင်း၊ နတ်မြောင်း၊ ထောက်ကြံ့ စတဲ့ရွာတွေမှာ ဖြန့်ပြီး တပ်စွဲနေကြကာ ဒေသခံကာကွယ်ရေးတပ်တွေနဲ့ နေ့စဉ်နီးပါးတိုက်ပွဲတွေဖြစ်နေတယ်လို့ ဒေသခံတွေဆီကသိရပါတယ်။

စာတည်း – လင်း

ကလေး၊ အောက်တိုဘာ ၂၂၊ ၂၀၂၅။

စစ်ကိုင်းတိုင်း၊ ကလေးမြို့နယ်မှာ စစ်ကော်မရှင်တပ်ကအင်အားသုံးစစ်ကြောင်းထိုးနေတဲ့အတွက် တိမ်းရှောင်နေကြရတဲ့စစ်ဘေးရှောင်တွေမှာ ဆေးဝါးနဲ့ရိက္ခာတွေလိုအပ်နေတယ်လို့ ကလေးမြို့ လူထုတိုက်ပွဲဦးဆောင်ကော်မတီရဲ့ အဖွဲ့ဝင်တဦးက ပြောပါတယ်။

အင်အား ၁,၅၀၀ ဝန်းကျင်ပါတဲ့စစ်ကော်မရှင်တပ်တွေက ကလေးမြို့နယ်အတွင်း စစ်ကြောင်းထိုးတာ၊ တော်လှန်ရေးတပ်တွေနဲ့ထိတွေ့တိုက်ပွဲတွေဖြစ်တာကြောင့် ဒေသခံတွေဟာ အောက်တိုဘာဒုတိယပတ်လောက်မှာ စတင်တိမ်းရှောင်ခဲ့ကြပြီး စစ်ရှောင်ကာလ ၂ ပတ်ကျော်ရှိလာချိန်မှာ အကူအညီတွေ လိုအပ်လာနေတာပါ။

“ပြေးလာတာက ဘာမှမပြင်ဆင်ပဲပြေးလိုက်ရတော့ ရှိတာလေးနဲ့ပါလာနိုင်သမျှနဲ့ ချက်ပြုတ် စားသောက်နေရတယ်။ သက်ကြီးရွယ်အိုမသန်စွမ်းတွေ၊ ကိုယ်ဝန်ဆောင်မိခင်တွေပါတယ်။ ရှောင်နေရတဲ့အချိန်မှာ ခြေလျင်နဲ့ပြေးတဲ့သူတွေရောရှိတယ်။ ကြားထဲမှာလည်းမိုးကမိထားတော့ အဖျားရောဂါတွေ အစုလိုက်အပြုံလိုက် အဖျားရောဂါတွေ တွေ့နေရတယ်။”လို့ ကလေးမြို့ လူထုတိုက်ပွဲဦးဆောင်ကော်မတီရဲ့ အဖွဲ့ဝင်တဦးကပြောပါတယ်။

အရေးပေါ်တိမ်းရှောင်လာကြရတာကြောင့် အသုံးအဆောင်နဲ့ စားနပ်ရိက္ခာအနည်းသာ ယူလာနိုင်ပြီး ပါလာတဲ့ရိက္ခာတွေကလည်း ပြတ်လပ်လုနီးပါးဖြစ်နေပြီး မိုးမိတဲ့ဒဏ်တွေကြောင့် လက်ရှိလက်လှမ်းမှီသလောက်နေရာတဝိုက်မှာတင် ဖျားနာနေသူဦးရေက ၁၀၀ နီးပါးလောက်ရှိနေတယ်လို့ အထက်အဖွဲ့ဝင်ကပြောပါတယ်။

ဖျားနာနေသူတွေအပြင် နောက်ထပ် သက်ကြီးရွယ်အို၊ ကိုယ်ဝန်ဆောင်တွေနဲ့ မသန်စွမ်းသူတွေအတွက်လည်း ကျန်းမာရေးစောင့်ရှောက်မှုအရေးပေါ်လိုအပ်နေတယ်လို့ ဆိုပါတယ်။

“အရေးပေါ်ကာလမှာ အခြေခံစားသောက်ကုန်နဲ့ ဆန်၊ ဆီ၊ ဆားလိုအပ်မှုဟာဆိုလို့ရှိရင် အင်မတန်မှ အရေးပေါ်ဖြစ်နေပါတယ်။ အခုလက်ရှိ ကလေးဒေသမှာဆိုရင် ရံဖန်ရံခါမိုးရွာတဲ့ အနေအထား ဖြစ်ပါတယ်။ စစ်ရှောင်အများစုဟာ မိုးရွာတဲ့ဒဏ်ကြောင့်ရော၊ ကာလဒေသနဲ့တိမ်းရှောင်တဲ့ ဒဏ်ကြောင့်ရော အရေးပေါ်ကျန်းမာရေးကူညီစောင့်ရှောက်မှုတွေလိုအပ်နေပါတယ်”လို့ သူက ပြောပါတယ်။

လက်ရှိမှာ ကံကြီး၊ ကံသာယာ၊ ၅၆ မိုင်၊ လက်ပံချောင်း၊ ပြည်တော်သာ၊ ပျဉ်းခုံကြီး၊ ပျဉ်းတောဦး၊ ရာဇဂြိုလ်၊ မြစိမ်း၊ မြလင်း၊ မောက်လင်း၊ လက်ပံချောင်း၊ ရန်မျိုးအောင်၊ နန်းစောင်းပု စတဲ့ကျေးရွာတွေအပါ ကလေးမြို့နယ်မြောက်ပိုင်းရှိကျေးရွာတွေက ဒေသခံ ၁၀,၀၀၀ ကျော် တိမ်းရှောင်နေကြရတာပါ။

အဆိုပါစစ်ကြောင်းဝင်ရောက်လာချိန်မှာ လေကြောင်းပစ်တာ၊ လက်နက်ကြီးပစ်ခတ်တာတွေကြောင့် ပြည်သူ ၁၅ ဦးထပ်မနည်းသေဆုံးခဲ့ပြီး စစ်ကြောင်းဝင်ရောက်ခဲ့တဲ့နေရာတွေမှာ အသတ်ခံရတဲ့ ပြည်သူ ၁၀ ဦးထပ်မနည်းရှိကာ ဖမ်းခံရသူတွေလည်းရာဂဏန်းရှိတယ်လို့ သူကဆက်ပြောပါတယ်။

ဒီအခြေအနေတွေနဲ့ပတ်သက်တဲ့နောက်ဆက်တွဲအခြေအနေတွေကိုတော့ မြေလတ်အသံက ဆက်လက်စုံစမ်းနေပါတယ်။

“နွေဦးတော်လှန်ရေးရဲ့အင်အားစုတွေအတွက်တော့ တော်တော်လေးများပြားတဲ့စစ်ကြောင်း ဖြစ်ပါတယ်။ သူတို့ဘက်ကနေပြီးတော့ စစ်ရေးကိုအင်အားအများအပြားနဲ့ သာလွန်အင်အားကို အသုံးပြုတဲ့အနေအထားပါပဲ၊ ပုံမှန်စစ်ကြောင်းဆိုရင် အင်အား ၃၀၀ နီးပါးလောက်ရှိတယ်”လို့ ဆိုပါတယ်။

လက်ရှိမှာ ကလေး-တမူးလမ်းမပေါ်ကရွာတွေမှာတပ်ဖြန့်ပြီး စစ်ကြောင်းထိုးနေကာ ဒေသတော်လှန်ရေးတပ်တွေနဲ့လည်း တိုက်ပွဲဖြစ်နေတယ်လို့ သိရပါတယ်။

စစ်ကော်မရှင်တပ်က ကလေး-တမူး အာရှကားလမ်းမကို အပြည့်အဝထိန်းချုပ်နိုင်ရေး ဇွန်လကစတင် စစ်ကြောင်းထိုး ထိုးစစ်ဆင်နေတာဖြစ်ပြီး ၃ လကျော်အကြာ လက်ရှိထိုးစစ်မှာ စစ်အင်အား ၁,၅၀၀ ခန့်ပါဝင်တာကြောင့် ကလေးမြို့နယ် မြောက်ပိုင်းက အမျိုးသားညီညွတ်ရေးအစိုးရ – NUG လက်အောက် PDF တပ်တွေသိမ်းပိုက်ထိန်းချုပ်ထားတဲ့ စခန်း ၅ ခုကို ပြန်လည်လက်လွှတ်ခဲ့ရတယ်လို့ မြေပြင်အခြေအနေကိုသိရှိသူတွေက ပြောပါတယ်။

စာတည်း – လင်း

ဆားလင်းကြီး၊ အောက်တိုဘာ ၁၉၊ ၂၀၂၅။

စစ်ကိုင်းတိုင်း၊ ဆားလင်းကြီးမြို့နယ်မှာ စစ်ကော်မရှင်တပ် စစ်ကြောင်းထိုးတာကြောင့် ကျေးရွာပေါင်း ၂၀ ထက်မနည်းက ဒေသခံထောင်နဲ့ချီ ထွက်ပြေးတိမ်းရှောင်နေရပြီး ထွက်ပြေးတိမ်းရှောင်စဉ် လက်နက်ငယ်နဲ့ ပစ်ခတ်ခံရတာကြောင့် ထိခိုက်မှုတွေလည်းရှိခဲ့တယ်လို့ ဒေသခံတွေဆီက သိရပါတယ်။

အဆိုပါ အင်အား ၁၅၀ ပါစစ်ကြောင်းဟာ မုံရွာ နမခကနေ ချင်းတွင်းမြစ်ကို အောက်တိုဘာ ၁၇ ရက်မှာ ကား ၄ စီးကိုတင်ဆောင်ကာ ဇက်နဲ့ဖြတ်ကူးပြီး ညောင်ပင်ကြီးကျေးရွာရဲစခန်းမှာ တညအိပ်တည်းခိုကာ အောက်တိုဘာ ၁၈ ရက်မနေ့က ညောင်ပင်ကြီး-ဆားလင်းကြီးလမ်းအတိုင်း စစ်ကြောင်းထိုးခဲ့တာလို့ သိရပါတယ်။

ဒါ့အပြင် စစ်ကြောင်းထိုးရင်းပစ်ခတ်ခဲ့တာကြောင့် စစ်ဘေးရှောင် အမျိုးသား ၁ ဦး နားရွက်ထိမှန်ဒဏ်ရာရခဲ့ကာ ဆားလင်းကြီး-ညောင်ပင်ကြီး လမ်းတလျောက် ကျေးရွာတွေက ပြည်သူပိုင် တန်ဖိုးကြီးပစ္စည်းတွေကိုလည်း ယူဆောင်နေတယ်လို့ ဒေသခံတွေဆီက သိရပါတယ်။

“(ထိခိုက်တာ) အမျိုးသားလို့ သိရတယ်၊ ဘယ်လိုထိသလဲတော့ မသိဘူး ထိတာကသေချာတယ်၊ နားရွက်လို့ သိရပါတယ်၊ ဖုန်းတွေလည်းပါသွားတယ် ပြည်သူတချို့ဆီက၊ လုတာမဟုတ်ပါဘူး၊ အိမ်ထဲ ခိုးယူတာပါ၊ အသေးစိတ်တော့ ပြောလို့မရသေးဘူးဗျ၊ ပစ္စည်းတွေပါတာ သေချာပါတယ်။” လို့ ဒေသခံတဦးက မြေလတ်အသံကို ပြောပါတယ်။

ညောင်ပင်ကြီး-ဆားလင်းကြီးလမ်းပိုင်းရှိ ရွှေလှေ၊ လက်ပံတောင်း၊ တောကျောင်း၊ တုံရွာ၊ လယ်တီနဲ့ ဆည်တည်းကျေးရွာတွေအပါအဝင် ကျေးရွာပေါင်း ၂၀ ကျော်က ဒေသခံတွေတိမ်းရှောင်နေကြရတာ ဖြစ်ပါတယ်။

အောက်တိုဘာ ၁၈ ရက်က စစ်ကြောင်းထိုးနေစဥ် တိုက်ပွဲဖြစ်တာမရှိဘဲ မုံရွာနမခကလာတဲ့ ပါရာမော်တာ ၂ စီးကလည်း ဖောင်းကတာကျေးရွာ အပါအဝင် နေရာတွေကို ဗုံးသီး ၁၀ လုံးခန့်ချပြီး တိုက်ခိုက်ခဲ့ကာ ထိခိုက်ပျက်စီးမှု အခြေအနေကိုတော့မသိကြရသေးဘူးလို့ ဆိုပါတယ်။

ဒါ့အပြင် ညောင်ပင်ကြီး-ဆားလင်းကြီးလမ်းပိုင်းက ဒေသခံအမျိုးသား ၂ ဦးလည်း လမ်းပြအဖြစ် ဖမ်းဆီးခေါ်ဆောင်ခံခဲ့ရပြီး စစ်ကြောင်းကတော့ မနေ့ညက ဆားလင်းမြို့နယ်၊ လယ်တီရွာနဲ့ ဆည်တည်းရွာတွေမှာ ညအိပ်ခဲ့ကာ ဒီမနက်ပိုင်းထိ ဆည်တည်းရွာဟောင်းတဝိုက်မှာ ရှိနေသေးတယ်လို့ သိရပါတယ်။

စစ်ကြောင်းကြောင့် အောက်တိုဘာ ၁၉ ရက် ဒီမနက်ပိုင်းကစလို့ ညောင်ပင်ကြီး-ဆားလင်းကြီးလမ်း၊ မုံရွာ-ပုသိမ်လမ်းနဲ့ ချင်းတွင်းမြစ်ကြောင်းလမ်းတွေကို အရေးပေါ်အခြေအနေမှအပ ဖြတ်သန်းသွားလာတာတွေမလုပ်ဖို့ ဆားလင်းကြီးမြို့နယ် ပြည်သူ့အုပ်ချုပ်ရေးအဖွဲ့က သတိပေးတားမြစ်ထားပါတယ်။

စာတည်း – လင်း

ညောင်ဦး၊ အောက်တိုဘာ ၁၁၊ ၂၀၂၅။

မန္တလေးတိုင်း၊ ညောင်ဦးမြို့နယ်ကို စစ်ကော်မရှင်တပ်တွေက စစ်ကြောင်း ၂ ကြောင်းနဲ့ထိုးနေတာကြောင့် ပြည်သူ ၈,၀၀၀ ကျော်ထွက်ပြေးနေရတယ်လို့ ဒေသကာကွယ်ရေးအဖွဲ့တာဝန်ရှိသူတွေထံက သိရပါတယ်။

အောက်တိုဘာ ၁၁ ရက်နေ့မနက် ၇ နာရီခန့်မှာ တောင်ဇင်းရဲစခန်းကနေ အင်အား ၁၀၀ ကျော်နဲ့ထွက်လာတဲ့ စစ်ကြောင်းက ကနီပေါက်ကျေးရွာဘက်ခြမ်း၊ ချောက်မြို့နယ်၊ အုံမြှားကြီးကျေးရွာကထွက်လာတဲ့ အင်အား ၁၀၀ ကျော်ပါစစ်ကြောင်းက မြောင်ကျေးရွာတကြောကို စစ်ကြောင်းထိုးနေတာလို့ ဆိုပါတယ်။

“တောင်ဇင်းကလာတဲ့စစ်ကြောင်းက ကန်နီပေါက်ရွာကို မီးရှို့နေတယ်။ ဘယ်နှအိမ်ပါမှန်းမသိသေးဘူး။ အဲ့စစ်ကြောင်းက ဂျိုးကန်ထဲမှာ။ အုံမြှားကြီးကလာတဲ့စစ်ကြောင်းက မြောင်မှာတပ်စွဲထားတယ်။ တိုက်ပွဲကြီးကြီးမားမားတော့ရှိမယ်။ တောင်ဘက်ကတော့ မိုင်းသံဘဲကြားတယ်။ တိုက်ပွဲသံမကြားဘူး”လို့ ဒေသကာကွယ်ရေးအဖွဲ့တာဝန်ရှိသူတဦးကပြောပါတယ်။

စစ်ကော်မရှင်စစ်ကြောင်းက မီးရှို့ခဲ့တဲ့ ကန်နီပေါက်ကျေးရွာက နေအိမ်တွေမီးလောင်ပျက်စီးမှုအခြေအနေကိုတော့ စစ်ကြောင်းကရှိနေသေးလို့ အတိအကျမသိရသေးဘူးလို့ဆိုပါတယ်။

စစ်ကြောင်းထိုးနေလို့ အိမ်ခြေ ၁၅၀ ကနေ ၂၀၀ ကြားရှိ ကန်နီပေါက်၊ ရွာလေး၊ ဂျိုးကန်၊ ကျောက်ပြင်ကန်၊ ကံကြီးကုန်း၊ သချင်းကန်၊ မကျီးကန်၊ ယာတောကြီးကျေးရွာဘက်ကခြမ်းက လူဦးရေ ၅,၀၀၀ ကျော်ပြေးနေရပါတယ်။

ဒါ့အပြင် အိမ်ခြေ ၁၀၀ ကနေ ၁၅၀ ကြားရှိ လက်ယာချောင်၊ မြေနီ၊ ထက်ရာကုန်း၊ ပြင်းချောင်း၊ လယ်ကန်၊ မြောင်၊ သံစက်တောကျေးရွာတွေက ဒေသခံ ၃,၀၀၀ ကျော်ထွက်ပြေးနေရပါတယ်။

ပြီးခဲ့တဲ့ ဩဂုတ် ၁ ရက်ကလည်း ညောင်ဦးမြို့နယ်၊ ကြအိုနဲ့စကားကျေးရွာကြားမှာ စစ်ကြောင်းထိုးနေတဲ့ စစ်ကောင်စီအဖွဲ့ ကြားဖြတ်တိုက်ခံရပြီး ၁၀ ဦး ခန့်ထိခိုက် ၁ ဦးသေဆုံးကာ စစ်ကြောင်းထိုးနေလို့ ကျေးရွာ ၁၀ ရွာက ပြည်သူထောင်ချီထွက်ပြေးတိမ်းရှောင်ခဲ့ရသေးတယ်လို့ သိရပါတယ်။

စာတည်း – လင်း

ပခုက္ကူ၊ အောက်တိုဘာ ၁၊ ၂၀၂၅။

မကွေးတိုင်း၊ ပခုက္ကူမြို့နယ်မှာ စစ်ကော်မရှင်တပ်က ၂ ရက်ဆက် စစ်ကြောင်းထိုးတဲ့အတွက် ဒေသခံ ၁ ထောင်ကျော် အရေးပေါ်တိမ်းရှောင်နေရပြီး ဖမ်းဆီးခံရသူတွေလည်းရှိနေတယ်လို့ ဒေသခံတွေဆီက သိရပါတယ်။

စက်တင်ဘာ ၃၀ ရက်နဲ့ အောက်တိုဘာ ၁ ရက်တို့မှာ အင်အား ၁၀၀ ကျော်ပါစစ်ကော်မရှင်တပ်တွေ စစ်ကြောင်းထိုးခဲ့တာကြောင့် ပြည့်အိုင်၊ အင်ကြင်းပင်၊ ချောင်းဦးတို၊ ရွာသာအေး၊ ရေမျက် စတဲ့ ကျေးရွာက ဒေသခံတွေစစ်ရှောင်နေကြရတာပါ။

“ပြည့်အိုင်ရွာထဲကို ညောင်ဂျစ်ပင်ကနေ ကား ၃ စီးဆင်းလာပြီးတော့ ၁ အိမ်ပြီး ၁ အိမ် ရိက္ခာတွေ လိုက်တောင်းတယ်၊ ယူတယ်။ သူတို့လိုချင်တာရှိရင်ယူသွားတယ်လို့ကြားတယ်”လို့ Red Giant အဖွဲ့ကဒေါင်းနီက ပြောပါတယ်။

ပခုက္ကူမြို့နယ်၊ ညောင်ဂျစ်ပင်ရွာမှာတပ်စွဲနေထိုင်နေတဲ့ အဲ့ဒီစစ်ကြောင်းဟာ စက်တင်ဘာ ၃၀ ရက်မနေ့က ညနေ ၃ နာရီခန့်မှာ ရေမျက်ရွာနဲ့ ပြည့်အိုင်ရွာတို့ကို စစ်ကြောင်းထိုးခဲ့တယ်လို့ ဆိုပါတယ်။

စစ်ကြောင်းထိုးစဥ် ဒေသခံ ၂ ဦးကိုဖမ်းဆီးကာ ညောင်ဂျစ်ပင်ရွာကို နေ့ချင်းပြန်ဝင်သွားခဲ့ပြီး ညပိုင်းမှာတော့ ဖမ်းထားသူတွေကို ပြန်လွှတ်လိုက်ကာ အောက်တိုဘာ ၁ ရက် ဒီမနက် ၁၀ နာရီလောက်မှာ ပြည့်အိုင်ရွာ၊ အင်ကြင်းပင်နဲ့ ချောင်းဦးတိုရွာတို့ကိုဝင်ရောက်လာခဲ့တာလို့ ဒေသခံတဦးကပြောပါတယ်။

ရုတ်တရက် စစ်ကြောင်းထိုးလာတဲ့အတွက် အဲ့ဒီကျေးရွာတွေက ဒေသခံ ၄ ဦးဖမ်းဆီးခံခဲ့ရကာ တချို့ပြန်လွတ်လာသူတွေလည်းရှိတယ်လို့သိရပေမယ့် ဒီအခြေအနေနဲ့ပတ်သက်ပြီး မြေလတ်အသံကသီးခြားအတည်မပြုနိုင်သေးပါဘူး။

“ပြည့်အိုင်၊ နောက်ကအင်ကြင်းပင်ရွာမှာလည်း ပြည်သူတွေဆီက ရိက္ခာတွေယူသွားတယ်။ ပြည်သူ တွေ ဖမ်းမိပါတယ်။ ၄ ယောက်လောက်ဖမ်းမိတယ်၊ ပြန်လွတ်တဲ့လူလည်းလွတ်တယ်။ ကားတွေနဲ့ ပါရောက်ပြီး ရိက္ခာတွေလာယူတယ်ထင်တာပဲ။ ပြည်သူတွေဆီကယူပြီး ကမ္မစခန်း ညောင်ဂျစ်ပင် ပျူရွာတို့ကို ရိက္ခာပို့တာပါဗျ”လို့ Red Giant အဖွဲ့မှ ကိုဒေါင်းနီကပြောပါတယ်။

စစ်ကြောင်းထိုးပြီးနောက် ကမ္မမြို့ဘက်ကို ထွက်ခွာသွားပြီး ကမ္မမြို့နဲ့အနီးတဝိုက်မှာ တပ်ဖြန့်ထားတယ်လို့ ဆိုပါတယ်။

“ညောင်ဂျစ်ပင်မှာရှိတဲ့အင်အားနဲ့အထိုင်လောက်ချန်ခဲ့ပြီး သူတို့စစ်ကြောင်းရယ်ပေါင်းပြီး ကမ္မမြို့နဲ့ နီးတဲ့ ရွာပတ်ချာလည်မှာဝင်တယ်။ အခုဆိုကမ္မမြို့မှာ နေရာယူထားပြီးနေရာတွေဖြန့်ထားတယ်။ ဆက်လက်ပြီးတော့ မလှုပ်ရှားသေးပါဘူး အခုချိန်ထိ”လို့ ကိုဒေါင်းနီကပြောပါတယ်။

အဲ့ဒီစစ်ကြောင်းဟာ စက်တင်ဘာ ၂၈ ရက်ကတည်းက ပခုက္ကူအခြေစိုက်တပ်မ ၁၀၁ က ထွက်လာပြီး ညောင်ဂျစ်ပင်ရွာမှာပျူစောထီးတွေနဲ့အတူတပ်စွဲနေခဲ့ပြီးနောက် ခုလို စစ်ကြောင်းထိုးခဲ့တာလို့ သိရပါတယ်။

စာတည်း – လင်း

ဘုရားစျေးဆိုင်တန်းက အမျိုးသမီးတွေကိုလည်း နှောင့်ယှက်မှုတွေလုပ်နေ

မုံရွာ၊ စက်တင်ဘာ ၂၇၊ ၂၀၂၅။

စစ်ကိုင်းတိုင်း၊ မုံရွာမြို့နယ်၊ မိုးညှင်းသမ္ဗုဒ္ဓေဘုရားထဲမှာတပ်စွဲထားတဲ့ စစ်ကော်မရှင်တပ်ကြောင့် ဘုရားဝန်းမှာတည်းခိုနေတဲ့ စစ်ဘေးရှောင်တွေထပ်မံတိမ်းရှောင်နေရပြီး ဘုရားအနီးစျေးဆိုင်တန်း ကအမျိုးသမီးတွေလည်းနှောင့်ယှက်မှုတွေခံနေရတယ်လို့ ဒေသခံတွေဆီကသိရပါတယ်။

တပ်စွဲထားတာ ရက်ရှည်လာတာနဲ့အမျှ ဘုရားဝန်းအတွင်း အဝင်အထွက်တင်းတင်းကျပ်ကျပ် စစ်ဆေးလာတာ၊ စျေးဆိုင်တန်းတွေဘက် ကင်းပတ်တယ်ဆိုကာ မူးပြီးအမျိုးသမီးစျေးသည်တွေကို နှောင့်ယှက်တာတွေ ပြုလုပ်နေတာကြောင့် ဘုရားဝန်းအတွင်း နေထိုင်သူတွေလုံခြုံမှုမရှိ ဖြစ်နေ တယ်လို့ ဒေသခံအမျိုးသမီးတဦးဆီက သိရပါတယ်။

“အဲ့ဒီထဲက ၃၊ ၄ ယောက်ကပေါ့နော်၊ အဲ့ဒီပတ်ချာလည်က စျေးဆိုင်တန်းက စျေးဆိုင်က အမျိုးသမီးတွေကို ရိသဲ့သဲ့လုပ်တယ်၊ အဲ့ဒီတော့ကျ အတွင်းထဲမှာနေတဲ့ သူတွေကလည်း မလုံခြုံတော့ဘူးဆိုပြီး တွေးတာပေါ့နော်။” လို့ အထက်ပါအမျိုးသမီးက ပြောပါတယ်။

စက်တင်ဘာ ၂၁ ရက်ကစပြီး စစ်ကော်မရှင်တပ်သား အင်အား ၃၀ ကျော်နဲ့ မိုးညှင်းသမ္ဗုဒ္ဓေ ဘုရားဝန်းထဲမှာစတင်တပ်စွဲခဲ့တာဖြစ်ပြီး ဆင်ကြီးနှစ်ကောင်အဝင်ပေါက်မှာ ဘန်ကာနဲ့ ကတုတ်ကျင်းတွေတူးပြီး အခိုင်အမာနေရာယူထားတယ်လို့ ဆိုပါတယ်။

တပ်စွဲထားတဲ့ စစ်ကော်မရှင်တပ်ဖွဲ့ဝင်တွေကို မိုးညှင်းသမ္ဗုဒ္ဓေဆရာတော်ကြီးက အကြမ်းဖက်မှုတွေ မပြုလုပ်ဖို့ တောင်းပန်ထားတာကြောင့် အစောပိုင်းရက်တွေမှာငြိမ်နေခဲ့ပေမယ့် အမျိုးသမီးဆောင်တွေ နဲ့ သီလရှင်အဆောင်တွေဘက်အထိ ကင်းပတ်တာမျိုးတွေရှိခဲ့တယ်လို့ ဒေသခံအမျိုးသမီးတဦးဆီက သိရပါတယ်။

စက်တင်ဘာ ၂၅ ရက်မှာတော့ ဆင်ကြီးနှစ်ကောင် အဝင်ပေါက်ကိုထွက်ပြီး စစ်ကော်မရှင်တပ်ဖွဲ့ဝင် တချို့ထွက်ကာ လမ်းသွားကုန်တင်ကားနဲ့ ဆိုဒ်တွဲတွေကို ငွေတောင်းခံတာမျိုးတွေ ပြုလုပ်နေတယ်လို့ အထက်ပါဒေသခံက ပြောပါတယ်။

“ဆင်ကြီးပေါက်ကနေထွက်ပြီး ကားတွေကို ပိုက်ဆံတောင်းတယ်၊ တခါ ကင်းပတ်တာဆိုပြီးတော့ ဘုရားရဲ့ အပြင်ဘက်မှာ စန္ဒသိင်္ဂီမယ်သီလကျောင်းဘက်လည်း ကင်းပတ်တယ်ဆိုပြီးတော့ ရောက်တယ်။”လို့ ဆိုပါတယ်။

အဆိုပါစစ်ကြောင်း ဘုရားဝန်းအတွင်း စတင်ဝင်ရောက်တဲ့ စက်တင်ဘာ ၂၁ ရက်ကတည်းက နှစ်နဲ့ ချီပြီးနေထိုင်လာတဲ့ ဘုရားဝန်းအတွင်း သက္ကယ်ကျင်း၊ ကျပိုင်၊ နဂါးတွင်း၊ ညောင်ဖြူပင် စတဲ့ ကျေးရွာတွေက စစ်ဘေးရှောင်တွေဟာ ထပ်မံတိမ်းရှောင်နေကြရတယ်လို့ အထက်ပါဒေသခံက ပြောပါတယ်။

လက်ရှိမှာတော့ စစ်ဆေးမှုတွေပိုမိုတင်းကျပ်လာကာ အမျိုးသမီးတွေကို နှောင့်ယှက်မှုပြုလုပ်လာတဲ့ စက်တင်ဘာ ၂၅ ရက်ကစလို့ ယခင်စစ်ဘေးရှောင် ၅၀၀ ကျော်နေထိုင်တဲ့ မိုးညှင်းသမ္ဗုဒ္ဓေဘုရားထဲမှာ သက်ကြီးပိုင်း စစ်ဘေးရှောင်ဦးရေဆယ်ဂဏန်းသာကျန်တော့တယ်လို့ သိရပါတယ်။

စာတည်း – လင်း