မြိုင်၊ စက်တင်ဘာ ၂၅၊ ၂၀၂၅။

မကွေးတိုင်း၊ မြိုင်မြို့နယ်၊ နှောပင်ရွာကိုဝင်ရောက်လာတဲ့ စစ်ကော်မရှင်စစ်ကြောင်းက ဗုံးကြဲ ပစ်ခတ်တာတွေကြောင့် စစ်ရှောင်အမျိုးသား ၂ ဦးသေဆုံးခဲ့တယ်လို့ ဒေသခံတွေဆီက သိရပါတယ်။

စက်တင်ဘာ ၂၄ ရက် မနက် ၈ နာရီခန့်မှာ ပခုက္ကူမြို့နယ်၊ အင်ပင်ရွာကထွက်လာတဲ့ အင်အား ၂၀၀ ခန့်ပါစစ်ကြောင်းက နှောပင်ရွာဘုန်းကြီးကျောင်းကိုဝင်ရောက်လာပြီးနောက် ရွာအနီးကိုဒရုန်းနဲ့ဗုံးကြဲ တိုက်ခိုက်ချိန် နှောပင်ရွာသား အသက် ၃၀ အရွယ်အမျိုးသားကို ထိမှန်သေဆုံးခဲ့တယ်လို့ ဆိုပါတယ်။

“သူကရွာထဲကနေ ရွာပြင်ထွက်တဲ့အချိန်လို့ ပြောလို့ရတာပေါ့။ ရွာထဲကနေရှောင်လိုက် ပြန်ထွက်လိုက် တော်တော်များများတော့ရှောင်တယ်ဗျာ။ ခဏတဖြုတ်ပြန်ဝင်တဲ့အချိန်မှာဖြစ်သွားတာ ရေအိုးစင်မှာ ခဏနားတဲ့အချိန်မှာ ချခံလိုက်ရတာ” လို့ ဒေသခံ ကိုမြိုင်ဒေါင်းမင်းကပြောပါတယ်။

အိမ်ခြေ ၅၀၀နီးပါး၊ လူဦးရေ ၃,၀၀၀ ဝန်းကျင်ရှိတဲ့နှောပင်ရွာက ဒေသခံတွေဟာ စက်တင်ဘာ ၂၂ ရက် ကင်းရွာဘက်ကိုစစ်ကြောင်းစဝင်ချိန်ကတည်းက ရွာကတိမ်းရှောင်နေကြတာဖြစ်ပြီး အထက်ပါ သေဆုံးသူကတော့ ရွာကိုခေတ္တပြန်ဝင်လာချိန်မှာ ဒရုန်းဗုံးထိ သေဆုံးခဲ့တာလို့ ဆိုပါတယ်။

ဒါ့အပြင် စစ်ကော်မရှင်တပ်ဘက်က ညပိုင်းအထိလက်နက်ကြီးတွေနဲ့ပစ်ခတ်နေတာကြောင့် အလောင်းကောက်ဖို့ခက်ခဲခဲ့ပြီး မနေ့ကညပိုင်းမှ ဒေသခံတချို့ကကောက်ယူခဲ့တယ်လို့ ဆိုပါတယ်။

စစ်ကြောင်းထွက်သွားပြီးနောက် တော်လှန်ရေးတပ်ဖွဲ့ဝင်တွေနယ်မြေရှင်းလင်းရေးလုပ်ချိန် စက်တင်ဘာ ၂၅ ရက် ဒီနေ့လယ် ၁၂ နာရီ ဝန်းကျင်မှာလည်း ရွာအနီးက မြေပဲခင်းထဲမှာ ပစ်သတ်ခံထားရတဲ့ နှောပင်ရွာသား ၁ ဦးရဲ့ အလောင်းကိုတွေ့ရှိခဲ့တယ်လို့ ဆိုပါတယ်။

“ရွာမြောက်ဘက်မြေပဲခင်းထဲမှာတွေ့တာလို့ပြောတယ်။ ၃၁ ဝန်းကျင် စကားမပြောတတ်တဲ့ အမျိုးသား ၁ ဦး၊ စစ်ကောင်စီကနေ သတ်ပစ်ခဲ့တယ်။ အလောင်းကလည်း ရှင်းလင်းရေးလုပ်ပြီး ကောက်ပြီးပြီ” လို့ ဒေသခံကိုမြိုင်ဒေါင်းမင်းက ပြောပါတယ်။

အဲ့ဒီစစ်ကြောင်းဟာ စက်တင်ဘာ ၂၂ ရက်ကစတင်ကာ မြိုင်မြို့နယ်ထဲကိုဝင်ရောက်လာတာဖြစ်ပြီး လက်ရှိမှာ နှောပင်ရွာကနေ အရှေ့တောင်ဘက် ကင်းရွာဘက်ဆီကို ပြန်လည်ထွက်ခွာနေတယ်လို့ ကိုမြိုင်ဒေါင်းမင်းက ပြောပါတယ်။

စစ်ကြောင်းကြောင့် နှောပင်ရွာအပါအဝင် မြိုင်မြို့နယ်ထဲက ကျောက်ဖူး၊ ဝက်ကျ၊ နှောပင်၊ ကင်းရွာနဲ့ ရေစကြိုမြို့နယ်၊ ကွမ်းသီးကန်ရွာ၊ ပခုက္ကူမြို့နယ်၊ မြောက်လူးကန်၊ မကျီးကန်၊ ကိုင်းရွာအပါ ကျေးရွာ ၁၁ ကျော်က ဒေသခံ ၈,၀၀၀ ကျော်လည်း ထွက်ပြေးတိမ်းရှောင်နေကြရပြီး လက်ရှိမှာ မိုးဆက်တိုက် ရွာနေတာကြောင့် နေထိုင်ရေးအခက်တွေ့နေတယ်လို့ ဆိုပါတယ်။

“မိုးကတော့အဆက်မပျက်ရွာနေတာပဲ၊ တောထဲရှောင်နေတဲ့သူတော်တော်များများမိတယ်၊ နှောပင်တို့ရွာတွေက မိုးထဲရေထဲအိပ်ကြရတာများတယ်၊ မနက်ခင်းက ရာသီဥတုက အုံ့နေတုန်းပဲ မိုးကာမရှိတဲ့သူတွေကျ ပေါင်းနေကြတာပေါ့။ မရှိလည်း တရွာတည်းသားချင်းတွေဆိုတော့ အဆင်ပြေအောင်နေကြရတာပေါ့” လို့ ကိုမြိုင်ဒေါင်းမင်းက ဆက်ပြောပါတယ်။

ပြီးခဲ့တဲ့ စက်တင်ဘာ ၂၂ ရက် ညနေ ၅ နာရီကလည်း ပခုက္ကူအခြေစိုက် တပ်မ ၁၀၁ ဌာနချုပ်က ထွက်လာတဲ့ အထက်ပါအင်အား ၁၀၀ ကျော်ပါစစ်ကြောင်းဟာ ရေစကြိုမြို့နယ်၊ ကွမ်းသီးကန်ရွာအနီး တောတိုက်ကိုရောက်ရှိလာပြီး စစ်ရှောင်တဲအလုံး ၅၀ ကို မီးရှို့သွားတာလို့လည်း ဆိုပါတယ်။

သတင်း – ဟယ်သာ၊ စာတည်း – လင်း

ဒိန်းဂျား၊ ဟယ်သာ

ပခုက္ကူ၊ စက်တင်ဘာ ၂၃၊ ၂၀၂၅။

မကွေးတိုင်း၊ ပခုက္ကူ၊ မြိုင်နဲ့ ရေစကြိုမြို့နယ်တွေအစပ်ရှိ ကျေးရွာတွေကို စစ်ကြောင်းထိုးနေလို့ ကျေးရွာ ၁၁ လောက်က ဒေသခံ ၈,၀၀၀ နီးပါး စစ်ရှောင်ထွက်ပြေးနေရပြီး စစ်တပ်စစ်ကြောင်းက စစ်ဘေးရှောင်တဲ အလုံး ၅၀ ကို မီးရှို့ထားတယ်လို့ ဒေသခံတွေဆီက သိရပါတယ်။

စက်တင်ဘာ ၂၂ ရက် ယမန်နေ့ မနက် ၁၀ နာရီခွဲဝန်းကျင်မှာ ပခုက္ကူအခြေစိုက် တပ်မ ၁၀၁ ဌာနချုပ်က ထွက်လာတဲ့ အင်အား ၁၀၀ ကျော်ပါစစ်ကြောင်းဟာ ညနေ ၅ နာရီခန့်မှာ ရေစကြိုမြို့နယ်၊ ကွမ်းသီးကန်ရွာအနီးတောတိုက်ကို ရောက်ရှိလာပြီး စစ်ရှောင်တဲအလုံး ၅၀ ကို မီးရှို့သွားတာလို့ ဆိုပါတယ်။

” နေအိမ်ဆိုတာထက် စစ်ရှောင်စခန်းပုံစံမျိုးဆောက်ထားတဲ့ စစ်ရှောင်တဲတွေပါ၊ နေအိမ်ကနေပြီးတော့ စစ်ရှောင်ပြီး တောထဲမှာဆောက်ထားပြီး‌နေတဲ့ စစ်ရှောင်တဲတွေကို မီးရှို့သွားတာ၊ စစ်ရှောင်က တရွာလုံးနေတာ၊ ညနေဆို ကွမ်းသီးကန်ရွာတရွာလုံးက အဲ့ဒီဘက်ကို ရွှေ့နေကြတာ” လို့ ဒေသခံတဦးက မြေလတ်အသံကို ပြောပါတယ်။

ကွမ်းသီးကန်ရွာကို စစ်ကော်မရှင်တပ်က လက်နက်ကြီးတွေနဲ့မကြာခဏပစ်ခတ်တာကြောင့် ရွာခံတွေဟာ ကျေးရွာအနီးတောတိုက်တွေမှာ စစ်ရှောင်တဲတွေဆောက်လုပ်ကာ ညဘက်သွားရောက်အိပ်ကြတာဖြစ်ပြီး အဲ့ဒီတဲတွေကို မီးရှို့သွားခဲ့တာလို့ သိရပါတယ်။

အဲ့ဒီစစ်ကြောင်းဟာ စက်တင်ဘာ ၂၃ ရက် ဒီကနေ့မနက် ၈ နာရီခန့်မှာ မြို့နယ် ၃ ခုအစပ်ရွာတွေကို ဆက်လက်စစ်ကြောင်းထိုးနေပြီး လက်ရှိမှာ မြိုင်မြို့နယ်၊ ကင်းရွာအနီးကိုရောက်ရှိနေတယ်လို့သိရပါတယ်။

စစ်ကြောင်းကြောင့် ပခုက္ကူမြို့နယ် မြောက်လူးကန်၊ မကျီးကန်၊ ကိုင်းရွာ၊ မြိုင်မြို့နယ်က ကျောက်ဖူး၊ ဝက်ကျ၊ နှောပင်၊ ကင်းရွာနဲ့ ရေစကြိုမြို့နယ် ကွမ်းသီးကန်ရွာတွေအပါ ကျေးရွာ ၁၁ ရွာထက်မနည်းက ဒေသခံ ၈,၀၀၀ ခန့် နေရပ်စွန့်ခွာထွက်ပြေးနေရတယ်လို့ မြိုင်ဒေါင်းမင်းသတင်းမှန်ပြန်ကြားရေးတာဝန်ရှိက ပြောပါတယ်။

“ ကင်းရွာကတော့ရွာထဲကိုမနေကြတာကြာပြီ တောထဲကိုရှောင်နေကြတာ။ ရေစကြိုရယ် မြိုင်ရယ် ပခုက္ကူ အစပ်ဆိုရင် ၁၁ ရွာလောက်ရှောင်နေရတယ်” လို့ဆိုပါတယ်။

လက်ရှိမှာ အဲ့ဒီစစ်ကြောင်းဟာ မြိုင်မြို့နယ်၊ ကင်းရွာအနီးကနေ နှောကန်ရွာဘက်ကို ၁၂၀ မမ လက်နက်ကြီးတွေနဲ့ ပစ်ခတ်နေတယ်လို့ သိရပါတယ်။

စာတည်း – ဟိန်းစံ

ဆားလင်းကြီး၊ စက်တင်ဘာ ၁၆၊ ၂၀၂၅။

စစ်ကိုင်းတိုင်း၊ ဆားလင်ကြီးမြို့နယ်နဲ့ မကွေးတိုင်း၊ မြိုင်မြို့နယ်အတွင်းရှိ စစ်ဘေးရှောင်စခန်း ၂ ခုက ကလေးငယ်တွေကို မီးပုံးတွေလှူဒါန်းပေးခဲ့တယ်လို့ လက်ပံတောင်းတောင် ပင်မသပိတ်အဖွဲ့ဆီက သိရပါတယ်။

စစ်ဘေးရှောင်စခန်းတွေနေထိုင်နေကြရတဲ့ ကလေးငယ်အများစုမှာ သီတင်းကျွတ်ကာလမှာ ဆော့ကစားဖို့ မီးပုံတွေဝယ်နိုင်ဖို့ခက်ခဲတာကြောင့် ခဏတာပျော်ရွှင်ကြစေဖို့ ရည်ရွယ်ချက်နဲ့ ကလေးငယ် ၃၀၀ ကျော်အတွက် စက်တင်ဘာ ၁၅ ရက်မှာလှူဒါန်းပေးခဲ့တာလို့ ဆိုပါတယ်။

“စစ်ရှောင်နေရပ်စွန့်ခွာစခန်းတွေက ကလေးတွေမှာက မိသားစုက စားဝတ်နေရေးကြပ်တည်းနေရတဲ့ ကာလမှာကလေးတွေအတွက် ဒီလိုပစ္စည်းတွေဝယ် ပေးဖို့ဆိုတာ ခဲယဉ်းတယ်လေ။ ကလေးတွေက လိုချင်ပေမယ့်လည်းမတောင်းရဲကြဘူး။ သူတို့ရဲ့သတင်းကျွတ်အချိန်ခါသမယမှာ ဒီလိုမီးပုံးလေးတွေ ကိုင်ပြီးပျော်ချင်ကြမယ်၊ အဓိက သူတို့ရဲ့စိတ်ကလေးတွေ ခေတ္တခဏပျော်ပါစေဆိုတဲ့ရည်ရွယ်ချက်နဲ့ လှူပေးဖြစ်တာပါ“လို့ လက်ပံတောင်းတောင်ပင်မသပိတ်အဖွဲ့ဝင်တဦးက ပြောပါတယ်။

ဒါ့အပြင် မကွေးတိုင်းအတွင်း စစ်ရှောင်စခန်းတချို့က တာဝန်ခံတွေကလည်း လာရောက်လှူဒါန်းပေးဖို့ ဆက်သွယ်ပြောဆိုထားတွေရှိပြီး ပေါက်မြို့နယ်ရှိ စစ်ရှောင်စခန်းဘက်ကိုလည်းထပ်ပြီး လှူဒါန်းပေးချင်တယ်လို့ ဆိုပါတယ်။

“ပေါက်ဘက်က စစ်ရှောင်စခန်းက ကလေးလေးတွေဆီလည်း သွားပြီးလှူပေးချင်ပါသေးတယ်၊ ထပ်ပြီးတော့လှူဖို့ရှိတယ်၊ တချို့မကွေးထဲကစစ်ရှောင်စခန်းထဲက ကလေးလေးတွေလဲလိုချင်ကြောင်း တာဝန်ခံလေးတွေကနေတဆင့် ဆက်သွယ်တာလေးတွေရှိတယ်။ မဖြစ်ဖြစ်အောင်တော့ ရအောင်ပို့ပေးဖို့လေးတွေရှိပါသေးတယ်။” လို့ အထက်ပါအဖွဲ့ဝင်တဦးကဆက်ပြောပါတယ်။

အလှူရှင်တချို့ရဲ့အလှူငွေကိုမတည်ပြီး လိုအပ်တဲ့ငွေကိုအဖွဲ့ဘက်က စိုက်ထုတ်လှူဒါန်းခဲ့တာဖြစ်ပြီး ကျန်ရှိနေတဲ့ စစ်ရှောင်စခန်းတွေကိုလည်း ထပ်ပြီးလှူဒါန်းသွားဖို့ကြိုးစားမယ်လို့ ဆိုပါတယ်။

လက်ပံတောင်းတောင်ပင်မသပိတ်အဖွဲ့အနေနဲ့ ပြီးခဲ့တဲ့ ၂၀၂၄၊ သီတင်းကျွတ်ကာလတုန်းကလည်း အညာဒေသရှိ စစ်ရှောင်စခန်းက ကလေးငယ်တွေအတွက် မီးပုံးတွေလှူဒါန်းပေးခဲ့တာရှိပြီး ဒီနှစ်လှူဒါန်းတာက ဒုတိယအကြိမ်မြောက် ဖြစ်တယ်လို့ သိရပါတယ်။

စာတည်း – လင်း

ဘုတလင်၊ စက်တင်ဘာ ၁၅၊ ၂၀၂၅။

စစ်ကိုင်းတိုင်း၊ ဘုတလင်မြို့နယ် ရွာ ၅ ရွာက စစ်ဘေး၊ မီးဘေးသင့်ပြည်သူတွေကို အခြေခံစားသောက်ကုန်တွေ ထောက်ပံ့လှူဒါန်းခဲ့တယ်လို့ ဒေါင်းရာဇာပင်မသပိတ်လူမှုကူညီရေးအသင်း ဘုတလင်မြို့နယ်ဆီက သိရပါတယ်။

စစ်ကော်မရှင်စစ်ကြောင်းရဲ့မီးရှို့ခံထားရတဲ့ ရွှေတောင်၊ ပေါက်စိန်ပေါက်၊ ကံသာ၊ ထူးကြီး၊ ဇီးတောရွာတွေက အိမ်ထောင်စု ၇၀ အတွက် စက်တင်ဘာ ၁၃ ရက်မှာ ၁ အိမ်ထောင်ကို ကျပ် ၃၅,၀၀၀ ဖိုး ဆန်၊ ဆီ၊ ဆား၊ ကြက်သွန်တွေ ကျေးရွာတွေအထိသွားရောက် ထောက်ပံ့လှူဒါန်းခဲ့တာလို့ ဆိုပါတယ်။

” စစ်ကြောင်းဘယ်နေ့လာမှာလည်းဆိုပြီး ပြည်သူတွေအနေနဲ့တော့ ခေါင်းပြားအောင်မအိပ်ရပါဘူး၊ စိတ်ဒုက္ခတွေလည်း ရောက်ကြရတယ်၊ နောက်ပြီး ရာသီဥတုအခြေအနေကလည်း နေပူလိုက်၊ မိုးရွာလိုက်ဆိုတော့ ဖျားကြနာကြတယ်။ အဲ့လိုအခက်အခဲတွေတော့ ရှိပါတယ်” လို့ ဒေါင်းရာဇာပင်မသပိတ်လူမှုကူညီရေးအသင်း – ဘုတလင်အဖွဲ့ အတွင်းရေးမှူးက ပြောပါတယ်။

အထက်ပါကျေးရွာတွေကအိမ်ထောင်စုတွေဟာ ၂၀၂၄ စက်တင်ဘာလမှာ စစ်ကော်မရှင်တပ်က စစ်ကြောင်းထိုးမီးရှို့ခဲ့တာကြောင့် နေအိမ်တွေဆုံးရှုံးခဲ့ရတဲ့ စစ်ဘေး၊ မီးဘေးသင့်ခဲ့သူတွေဖြစ်တယ်လို့ သိရပါတယ်။

ဘုတလင်မြို့နယ်ကို စစ်ကော်မရှင်တပ်ဖွဲ့တွေရဲ့ မကြာခဏစစ်ကြောင်းထိုးဝင်ရောက်မှု မီးရှို့မှုတွေကြောင့် ဒေသခံတွေမှာ အရေးပေါ်စစ်ရှောင်နေရကာ အလုပ်မလုပ်နိုင်တာကြောင့် စားဝတ်နေရေး အခက်အခဲတွေရှိနေတယ်လို့ ဆိုပါတယ်။

ယင်းမာပင်၊ စက်တင်ဘာ ၁၀၊ ၂၀၂၅။

စစ်ကိုင်းတိုင်း၊ ယင်းမာပင်မြို့နယ်၊ နဘူတောရွာကို စစ်ကော်မရှင်တွေပစ်တဲ့လက်နက်ကြီး ကျရောက်ပေါက်ကွဲပြီး ဒေသခံအမျိုးသမီး ၂ ဦးသေဆုံးခဲ့တယ်လို့ ဒေသခံတွေဆီက သိရပါတယ်။

စက်တင်ဘာ ၉ ရက်မနေ့ကည ၁၀ နာရီခွဲလောက်မှာ စစ်ကော်မရှင်တပ်တွေကပစ်ခတ်ခဲ့တာကြောင့် အသက် ၅၅ နှစ်အရွယ် ဒေါ်ညွန့်ရီနဲ့ အသက် ၆၀ အရွယ်ဒေါ်သိန်းမြင့်တို့ ထိမှန်သေဆုံးပြီး နောက်ထပ် ဒေသခံ ၁၀ ဦးလည်းထိခိုက်ခဲ့တယ်လို့ ဆိုပါတယ်။

အဲ့ဒီစစ်ကော်မရှင်တပ်ဟာ စက်တင်ဘာ ၈ ရက် ညနေ ၅ နာရီလောက်မှာနဘူးတောရွာမှာဝင်ရောက်တပ်စွဲပြီး စက်တင်ဘာ ၉ ရက်နေ့လယ်ပိုင်းမှာ ရွာကထွက်သွားပြီးနောက် ည ၇ နာရီမှာရုတ်တရက် ပြန်ဝင်ရောက်လာပြီးနောက်မှာ ခုလိုပစ်ခတ်ခဲ့တာလို့ ဆိုပါတယ်။

“စစ်သားတွေက စက်တင်ဘာ ၉ ရက် မွန်းလွဲ ၂ နာရီလောက်မှာ ရွာထဲကထွက်သွားတယ်။ ရွာခံတွေလည်း စစ်သားတွေဘန့်ဘွေးရောက်သွားပြီအထင်နဲ့ ရွာထဲပြန်ဝင်ကြတယ်။ ည ၇ နာရီ ရုတ်တရက် ပြန်ဝင်လာတော့ ပြည်သူတွေမပြေးနိုင်မလွှားနိုင်မိတော့တာပဲ”လို့ ဒေသခံအမျိုးသားတဦးက မြေလတ်အသံကိုပြောပါတယ်။

ဒါ့အပြင် အဲ့ဒီနေ့မှာပဲရွာထဲကိုပြန်ဝင်လာချိန် ရွာခံ ၅၀ ဦးလောက်ကိုဖမ်းဆီးကာ ရွာထဲကပစ္စည်းတွေကို ဘန့်ဘွေးရွာကိုသယ်ခိုင်းပြီးနောက်မှ ပြန်လွှတ်ပေးလိုက်တယ်လို့ အထက်ပါဒေသခံကပြောပါတယ်။

လက်ရှိမှာတော့ အဆိုပါစစ်ကော်မရှင်တွေက ဘန့်ဘွေးရွာမှာ အင်အား ၁၀၀ ဝန်းကျင်၊ တရော်ကျင်း ရွာမှာ ၂၅၀ ခန့်နဲ့ ကနီမြို့နယ်၊ ချောင်းမရွာတို့ အင်အား ၁၅၀ ဖြန့်ပြီး တပ်စွဲထားတယ်လို့သိရပါတယ်။

အနောက်မြောက်တိုင်းစစ်ဌာနချုပ် နမခ ကနေ စက်တင်ဘာ ၃ ရက်ကစတင်ထွက်လာတဲ့ အင်အား ၅၀၀ ခန့်ပါတဲ့ အထက်ပါစစ်ကြောင်းဟာ ယင်းမာပင်နဲ့ကနီမြို့နယ်ကို စစ်ကြောင်း ၃ ကြောင်းခွဲထိုးနေခဲ့တာပါ။

နဘူးတောကျေးရွာကိုရောက်ရှိခဲ့တဲ့ စစ်ကြောင်းကလည်း စက်တင်ဘာ ၅ ရက်မှာ ကနီမြို့နယ် သင့်ဝင်ရွာနဲ့ ချောင်းမအရှေ့ရွာကို မီးရှို့ခဲ့ပြီး စက်တင်ဘာ ၈ ရက်မှာ ချောင်းမအနောက်ရွာကို ဆက်လက်မီးရှို့ခဲ့တာကြောင့် သင့်ဝင်ရွာက နေအိမ် ၇ လုံးမီးလောင်ဆုံးရှုံးထားတယ်လို့ ချောင်းမရွာခံ တဦးက မြေလတ်အသံကပြောဆိုထားပါတယ်။

စစ်ကြောင်းတွေကြောင့် ယင်းမာပင်နဲ့ကနီမြို့နယ် ကျေးရွာ ၈ ရွာထက်မနည်းက ဒေသခံ ၇,၀၀၀ နီးပါးဟာ စက်တင်ဘာ ၃ ရက်ကစတင်ကာ ထွက်ပြေးနေရပြီး စစ်ကော်မရှင်တပ်က စစ်ရှောင်တွေခိုလှုံတဲ့ နေရာတွေကိုပါ လက်နက်ကြီးနဲ့ လေကြောင်းကနေပစ်နေတာကြောင့်အခက်တွေ့နေတယ်လို့ သိရပါတယ်။

စာတည်း – လင်း