ပဲခူး၊ စက်တင်ဘာ ၂၇၊ ၂၀၂၅။

ပဲခူးတိုင်း၊ ပဲခူးမြို့၊ ဥဿာမြို့သစ်၊ ၉ ရပ်ကွက်က ရေနုတ်မြောင်းထဲမှာ ဘူးခွံဆင်းကောက်သူ အမျိုးသမီး ရေနစ်သေဆုံးသွားတယ်လို့ ကူညီကယ်ဆယ်ရေးလုပ်ဆောင်ပေးခဲ့သူတွေဆီက သိရပါတယ်။

သေဆုံးသူက အသက် ၂၉ နှစ်အရွယ် မသင်္ကြန်မိုးဆိုသူဖြစ်ပြီး စက်တင်ဘာ ၂၆ ရက်နေ့လယ် ၁ နာရီခန့်မှာ တူမဖြစ်သူနဲ့အတူ ပလုံကောက်ထွက်ချိန် ရေအနက် ၄ ပေကျော် ရေမြောင်းထဲမှာ ရေနစ် သေဆုံးသွားတယ်လို့ ဆိုပါတယ်။

“ရေကတော့ သူအရပ်နဲ့တောင်လည်ပင်းလောက်ရှိတာ။ ကလေးနေမကောင်းလို့ ဘူးခွံသွားကောက် တာ။ အလောင်းက ၁ နာရီအတွင်းတွေ့တာ။ သူ့တူမလေးနဲ့သွားတော့ သူရေနစ်နေတာကို လူကြီးတွေကို လာပြန်ခေါ်တာ။ ကလေးက လှမ်းဆွဲသေးတယ်။ မမှီတော့လို့”လို့ ကူညီပေးခဲ့သူတဦးက ပြောပါတယ်။

ရေနစ်သေဆုံးသွားသူ အမျိုးသမီးအလောင်းကိုတော့ ဒေသခံတွေက ၁ နာရီအတွင်း ရှာဖွေတွေ့ရှိခဲ့ပြီးနောက် ပဲခူးဆေးရုံကိုပို့ပေးခဲ့ရတယ်လို့ ဆိုပါတယ်။

ရေနစ်သေဆုံးသူ အမျိုးသမီးဟာ ဥဿာမြို့သစ်၊ ရပ်ကွက် ၈ နေသူဖြစ်ပြီး အမျိုးသားဖြစ်သူကလည်း ၂၀၂၄ အတွင်း ကလေးမီးဖွားပြီးချိန်မှာ စွန့်ပစ်သွားတာလို့သိရပါတယ်။

လက်ရှိနေမကောင်းဖြစ်နေတဲ့ ကလေးငယ်က အသက် ၂ နှစ်ဝန်းကျင်အရွယ် သားယောကျာ်းလေးဖြစ်ပြီး တုပ်ကွေးမိပြီးနေမကောင်းဖြစ်နေတာကြောင့်ဆေးခန်းပြဖို့ ငွေကြေးလိုအပ်နေတာလို့ ကူညီပေးခဲ့သူတဦးက ပြောပါတယ်။

ရေနစ်သေဆုံးသွားတဲ့ အမျိုးသမီးရဲ့နာရေးအတွက်နဲ့ကလေးဆေးကုသဖို့ မြို့ခံပရဟိတတွေက ကူညီဆောင်ရွက်ပေးနေပြီး စက်တင်ဘာ ၂၈ ရက်မှာ သင်္ဂြိုဟ်သွားမယ်လို့ ဆိုပါတယ်။

ဩဂုတ် ၄ ရက်ကလည်း ပဲခူးမြို့၊ သွန်းဘုရားရပ်ကွက်၊ သွန်းဘုရားလမ်းရှိ ကြခတ်ဝိုင်း စာသင်တိုက် မှ သက်တော် ၁၃ နှစ်အရွယ် ကိုရင်နန္ဒအပါအဝင် ၆ ပါးဟာ မြစ်အတွင်းရေဆင်းကူးရာမှ ကိုရင်နန္ဒဟာ ရေစီးနဲ့အတူ မျောပါသေဆုံးသွားတယ်လို့ သိရပါတယ်။

သတင်း – ကျော်ကြီး၊ စာတည်း – လင်း

ပဲခူး၊ စက်တင်ဘာ ၂၁၊ ၂၀၂၅။

ပဲခူးတိုင်း၊ ပဲခူးမြို့နယ်၊ တဲကြီးကုန်းကျေးရွာအနီး မြို့ရှောင်လမ်းပေါ်မှာ ၆ ဘီးကားက လမ်းလုပ်သားတွေကို ဝင်တိုက်မိပြီး ၁ ဦးသေ ၂ ဦးဒဏ်ရာရတယ်လို့ ဒေသခံတွေဆီက သိရပါတယ်။

စက်တင်ဘာ ၂၀ ရက် ညနေ ၃ နာရီကျော်ခန့်မှာ ပဲခူးမြို့နေ ယာဉ်မောင်းဦးကျော်သူနဲ့ အမျိုးသား ၇ ဦးလိုက်ပါလာတဲ့ HINO RANGER ၆ ဘီးကားဟာ မိုင်တိုင်အမှတ် ၃၆/၁ နဲ့ ၃၆/၂ အကြား တံတား အမှတ် ၄/၈ အရောက်မှာ ရွှေသံလွင်ကုမ္ပဏီက လမ်းလုပ်သားတွေကိုဝင်တိုက်မိခဲ့တာလို့ ဆိုပါတယ်။

“မြို့ရှောင်လမ်းမှာ လမ်းပြင်နေတယ်။ ကားက စလစ်ဖြစ်ပြီးတော့ ထိုးချသွားတာ။ ကလေး ၂ ယောက် ထိသွားတယ်။ မျက်နှာ၊ လက်တွေ၊ ပေါင်တွေ ထိတဲ့သူထိကုန်တယ်”လို့ ကူညီဆောင်ရွက်ပေးခဲ့သူတဦးက ပြောပါတယ်။

ယာဥ်တိုက်မှုကြောင့် လမ်းလုပ်သားတွေဖြစ်တဲ့ အသက် ၂၀ ကျော်အရွယ် မိုးကိုကို၊ အာကာနဲ့ ယာဥ်ပေါ်ပါ အမျိုးသား ၁ ဦးစုစုပေါင်း ၃ ဦးထိခိုက်ဒဏ်ရာရသွားကာ ထိခိုက်ဒဏ်ရာရသူတွေကို ပဲခူးဆေးရုံ ပို့ဆောင်ဆေးကုသနေချိန် မိုးကိုကိုမှာ သေဆုံးသွားတယ်လို့ သိရပါတယ်။

ကားက လမ်းလုပ်သားတွေကိုတိုက်မိပြီးနောက် တံတားအနီးက ရေမြောင်းထဲကိုထိုးကျသွားပြီး ယာဥ်မောင်းဖြစ်သူ ဦးကျော်သူကိုတော့ ပဲခူးရဲစခန်းမှာ လူသေမှု ရာဇသတ်ကြီးပုဒ်မ ၃၀၄ နဲ့အမှုဖွင့်အရေးယူထားတယ်လို့ ဆိုပါတယ်။

ဩဂုတ် ၁၇ ရက်ကလည်း ပဲခူးမြို့နယ်အပိုင် ရန်ကုန်-မန္တလေး အမြန်လမ်းပေါ်မှာ ကုန်တင်ယာဥ် ၂ စီးတိုက်မိပြီး အမျိုးသား ၂ ဦးသေဆုံးခဲ့တယ်လို့ သိရပါတယ်။

စာတည်း – လင်း

မိတ္ထီလာ၊ စက်တင်ဘာ ၁၉၊ ၂၀၂၅။

မန္တလေးတိုင်း၊ မိတ္ထီလာမြို့မှာ လောင်းကစားရှုံးကြွေးဆပ်ဖို့ သူငယ်ချင်းဖြစ်သူကိုသတ်ပြီး ငွေလုယူသွားတဲ့ အမျိုးသား ၂ ဦးကို စက်တင်ဘာ ၁၇ ရက်မှာ ဖမ်းမိခဲ့တယ်လို့ မြို့ခံတွေထံက သိရပါတယ်။

စက်တင်ဘာ ၁၅ ရက် မနက်ပိုင်းက မိတ္ထီလာမြို့၊ နန်းတော်ကုန်းရပ်ကွက်နယ်မြေ၊ မြောက်ကန်စောင်း၊ ကလေးကစားကွင်းအနီးမှာ အသက် ၃၀ နှစ်အရွယ် အမည်မသိအမျိုးသား ၁ ဦး သေဆုံးနေတဲ့ ရုပ်အလောင်းတွေ့ရှိတာနဲ့ပတ်သက်ပြီး မြို့တွင်း CCTV မှတ်တမ်းတွေနဲ့ မြေပြင်သတင်းစုံစမ်းချက်တွေအရ သံသယရှိသူ အမျိုးသား ၂ ဦးကို ရဲကဖမ်းဆီးစစ်ဆေးရာက သတ်ဖြတ်ခဲ့ကြောင်း ဝန်ခံခဲ့ကြတာလို့ ဆိုပါတယ်။

ဖမ်းဆီးခံရသူ ၂ ဦးဟာ မကွေးတိုင်း၊ နတ်မောက်မြို့နယ်၊ ရွာတော်ကျေးရွာနေ ဇော်လှိုင်းနဲ့ ဇာနည်အောင်တို့ဖြစ်ပြီး သေဆုံးသူ စမ်းကုန်းရွာသား ကိုဇင်မင်းထက်နဲ့အတူ မန္တလေးမြို့ကို ဝက်ရောင်းပြီးအပြန် မိတ္ထီလာမြို့တည်းခိုခန်းတခုမှာ ဝင်ရောက်တည်းခိုချိန် သေဆုံးသူမှာပါတဲ့ ငွေတွေကို လုယူလိုတာကြောင့် သတ်ဖြတ်ခဲ့တာဖြစ်ကြောင်း ဝန်ခံထွက်ဆိုထားတာပါ။

” သူတို့အချင်းချင်းဘဲ။ ၃ ယောက်အတူသွားပြီး ကျန်တဲ့ ၂ ယောက်ကသတ်တာ။ တည်းခိုခန်းမှာ တည်းပြီး သတ်တဲ့ကောင်က တရွာတည်းသားကို ငါတော့ပိုက်ဆံလိုနေပြီး ကူညီအုန်းဆိုပြီးတော့၊ အဲ့နှစ်ယောက်က တရွာတည်းသား။ သေတဲ့တယောက်က နောက်တရွာက။ သတ်တဲ့ ဇော်လှိုင်းဆိုတဲ့ ကောင်လေးက စလော့ ဂိမ်းတွေဆော့တာ။ ငွေသိန်း(ကျပ်) ၃၀၀၊ ၄၀၀ လောက်ရှုံးထားတာ။ အဲ့ဒါကြောင့် ငွေလိုချင်လို့ လုပ်တာ”လို့ ဖြစ်စဥ်ကိုသိထားတဲ့ မိတ္ထီလာဒေသခံတဦးက ပြောပါတယ်။

စက်တင်ဘာ ၁၄ ရက် မနက်ပိုင်းမှာ သေဆုံးသူနဲ့ကျူးလွန်သူ ၂ ဦး တို့ဟာ နတ်မောက်ကနေ မန္တလေးမြို့ကို သေဆုံးသူ ဇင်မင်းထက် ပိုင်ဆိုင်တဲ့ ဝက်တွေကို သွားရောက်ရောင်းချခဲ့ပြီးနောက် နတ်မောက်မြို့ကိုပြန်လာချိန် အဲ့ဒီနေ့ညပိုင်းမှာ မိတ္ထီလာမြို့သစ်ရှိ ဟိုတယ်တခုမှာညအိပ်တည်းခိုချိန် သတ်ဖြတ်ခဲ့ပြီး သေဆုံးသူမှာ ပါလာတဲ့ ငွေကျပ် သိန်း ၄၇၀ ကို ယူဆောာင်ခဲ့တယ်လို့ သိရပါတယ်။

” ဟိုတယ်မှာပဲသတ်တာ။ တယောက်ကခေါင်းအုံးနဲ့ဖိပေးတယ်။ ဇာနည်အောင်က။ ဇော်လှိုင်းက ဓားနဲ့ ထိုးတယ်။ ဟိုတယ်ကလူလာနည်းတဲ့ဟိုတယ်။ အလောင်းကို နှစ်ယောက်ထမ်းပြီး ကားခေါင်းခန်းထဲထည့် မနက်အရောက် ပြန်ရမှာဆိုပြီးပြောပြီးထွက်လာကြတာ။ မန်နေဂျာကလည်း သတိမထားမိလိုက်တာမျိုး ဖြစ်တယ်”လို့ အထက်ပါမြို့ခံက ဆက်ပြောပါတယ်။

သတ်ဖြတ်ပြီးနောက် စက်တင်ဘာ ၁၅ ရက် မနက် ၄ နာရီကျော်မှာ ရုပ်အလောင်းကို ကားနဲ့သယ်ပြီး နန်းတော်ကုန်းရပ်ကွက်အပိုင်ထဲမှာ လာရောက်စွန့်ပစ်ခဲ့တာလို့ ဆိုပါတယ်။

လူသတ်လုယက်မှုကျူးလွန်သူ ၂ ဦးကို ရာဇသတ်ကြီးပုဒ်မ-၃ဝ၂/၃၉၄/၁၁၄ နဲ့ မိတ္ထီလာမြို့နယ်၊ အမှတ် ၂ နယ်မြေရဲစခန်းက အမှုဖွင့်ဖမ်းဆီးထားတယ်လို့ သိရပါတယ်။

စာတည်း – လင်း

မိတ္ထီလာ၊ စက်တင်ဘာ ၁၅၊ ၂၀၂၅။

မန္တလေးတိုင်း၊ မိတ္ထီလာမြို့၊ နန်းတော်ကုန်းရပ်ကွက်နယ်မြေ၊ မြောက်ကန်စောင်း၊ ကလေးကစားကွင်းအနီးမှာ အသတ်ခံထားရတဲ့အမျိုးသားအလောင်းတလောင်းတွေ့ရှိခဲ့တယ်လို့ ဒေသခံတွေဆီက သိရပါတယ်။

စက်တင်ဘာ ၁၅ ရက် မနက် ၆ နာရီကျော်မှာ စောင်အနီနဲ့ထုပ်ပြီး ဝမ်းဗိုက်ထိုးသွင်းဒဏ်ရာ၊ လက်ပြတ်ရှ ဒဏ်ရာတွေနဲ့သေဆုံးနေတဲ့ အမျိုးသားအလောင်းတလောင်းကို လမ်းသွားလမ်းလာတွေက တွေ့ခဲ့ကြတယ်လို့ဆိုပါတယ်။

“သေပြီးမှ လာပစ်သွားတဲ့သဘော။ ညာဘက်ဝမ်းဗိုက်အောက်မှာ ထိုးသွင်းဒဏ်ရာတချက်၊ လက်ပြတ်ရှ ဒဏ်ရာတချက်တွေ့ရတယ်။ လုပ်ကြံသတ်ဖြတ်ပြီးမှ လာပစ်သွားတာဖြစ်နိုင်တယ်”လို့ ဒေသခံတဦးက ပြောပါတယ်။

သေဆုံးသူဟာ အသက် ၃၀ အရွယ်အမျိုးသားဖြစ်ပြီး နန်းတော်ကုန်းရပ်ကွက်မှာနေထိုင်သူမဟုတ်ဘူးလို့ ဆိုပါတယ်။

သေဆုံးသူနဲ့ပတ်သက်တဲ့ အချက်အလက်တွေနဲ့ ဘယ်လိုအသတ်ခံခဲ့ရလဲဆိုတာသိရဖို့ ရဲဘက်က ဆက်လက်စုံစမ်းနေပြီး အလောင်းကိုတော့ မိတ္ထီလာပြည်သူ့ဆေးရုံကို ပို့ဆောင်ပေးထားတယ်လို့ သိရပါတယ်။

သြဂုတ် ၁၂ ရက်မနက်ပိုင်းမှာလည်း မိတ္ထီလာမြို့ သူနာပြုသင်တန်းကျောင်းက အသက် ၂၀ အရွယ် ကျောင်းသူ ၁ ဦးကို ၎င်းရဲ့အဆောင်အိမ်သာထဲမှာ သေဆုံးလျှက်တွေ့ခဲ့ရတဲ့ဖြစ်စဥ် ရှိခဲ့ပါသေးတယ်။

စာတည်း – လင်း

မိတ္ထီလာ၊ စက်တင်ဘာ ၁၂၊ ၂၀၂၅။

မန္တလေးတိုင်း၊ မိတ္ထီလာမြို့၊ ရတနာမာန်အောင်ရပ်ကွက်၊ နယ်မြေ ၅ ရှိ လက်ဖက်ရည်ဆိုင်မှာ မုန့်အကြော်ဆရာ ၂ ဦး စကားများရန်ဖြစ်ရာက ဓားထိုးမှုဖြစ်ပြီး ၁ ဦးသေဆုံးသွားတယ်လို့ ဒေသခံတွေဆီက သိရပါတယ်။

စက်တင်ဘာ ၁၁ ရက်နေ့လယ် ၂ နာရီခန့်မှာ မိဘမေတ္တာလက်ဖက်ရည်ဆိုင်မှာ မုန့်လုပ်သူ အသက် ၁၇ နှစ်အရွယ် မောင်ထွေး (ခ) ပျော်ဘွယ်နဲ့ အသက် ၃၇ နှစ်အရွယ် မောင်လင်း(ခ)အလီ တို့ စကားများရန်ဖြစ်ပြီး မောင်ထွေးကို အလီက ကြက်သွန်လှီးတဲ့ဓားနဲ့ထိုးခဲ့တာလို့ဆိုပါတယ်။

“ဆိုင်ဝန်ထမ်းအချင်းချင်းဖြစ်ကြတာ။ အလုပ်လုပ်ရင်းနဲ့စကားများကြတာ။ ဖြစ်စဥ်အစဆုံးကတော့ ကျနော်တို့လည်း ဖြစ်ပြီးမှရောက်တော့ သေချာမသိရဘူး။ သူတို့အချင်းချင်း မုန့်ဗန်းလုရင်း ဖြစ်ကြတာလို့တော့ သိရတယ်”လို့ ဒေသခံတဦးကပြောပါတယ်။

ဓားထိုးမှုဖြစ်တာကြောင့် မောင်ထွေး(ခ)ပျော်ဘွယ်မှာ ဝဲပုခုံးညှပ်ရိုးကြားထိုးသွင်းဒဏ်ရာ၊ ယာဘက် ရင်အုံပွန်းခြစ်ဒဏ်ရာ‌တွေရရှိခဲ့ပြီး မိတ္ထီလာပြည်သူ့ဆေးရုံကို ပို့ဆောင်ရာ ဆေးရုံအရောက်မှာ သေဆုံးသွားတာလို့ ဆိုပါတယ်။

ဓားနဲ့ထိုးသူ မောင်လင်း(ခ)အလီကိုတော့ ရဲကဖမ်းဆီးပြီး မိတ္ထီလာ မြို့မရဲစခန်းမှာချုပ်နှောင်ထားတယ်လို့ သိရပါတယ်။

စာတည်း – လင်း

ပဲခူး၊ စက်တင်ဘာ ၉၊ ၂၀၂၅။

ပဲခူးမြို့၊ ဥဿာမြို့သစ် ၇ ရပ်ကွက် ရန်ကုန်-မန္တလေးလမ်းမကြီးဘေးရှိ “ပွင့်” ကွမ်းယာပစ္စည်းနဲ့အအေးမျိုးစုံဆိုင် ဓားပြတိုက်ခံရလို့ ကျပ်သိန်းရာချီပါသွားပြီး ဓားပြတွေကို KTV မှာ ညတွင်းချင်းပြန်မိတယ်လို့ မြို့ခံတွေထံက သိရပါတယ်။

စက်တင်ဘာ ၈ ရက် ယမန်နေ့ည ၇ နာရီကျော်မှာ ဒေါ်တင်မာချို ပိုင်တဲ့ “ပွင့်” ကွမ်းယာပစ္စည်းနှင့် အအေးမျိုးစုံဆိုင်ကို လူငယ်အမျိုးသား ၃ ဦးက ဝင်ရောက် လာပြီး ဆိုင်ရှင်ရဲ့သား ၂ ဦးကို ဓားနဲ့ထောက်ကာ ဓားပြတိုက်သွားခဲ့တာလို့ ဆိုပါတယ်။

” သူ့လူဟောင်းတွေဘဲ ပြန်တိုက်တာ။ “ပွင့်” က တရုတ်ဘုံကျောင်းရှေ့က။ သူက အိမ်ဆိုင်ဆိုတော့ အိမ်မှာတိုက်သွားတာ။ ၃ ဦးဝင်တိုက်တာ။ ပိုက်ဆံတော်တော်များများပါသွားတယ်။ ပြန်ရသွားပြီလေ အကုန်လုံး။ သူတို့တွေ့လိုက်တာကိုး။ မိုးထက်ဆီဆိုင်ခေါင်းရင်းက KTV မှာပြန်မိတာ”လို့ ဖြစ်စဥ်ကိုသိထားတဲ့မြို့ခံတဦးက မြေလတ်အသံကို ပြောပါတယ်။

ဓားပြတိုက်သူတွေဟာ “ပွင့်”ဆိုင်က ငွေကျပ်သိန်း ၂၃၀၊ ရွှေထည်လက်ဝတ်ရတနာအများအပြားနဲ့ ဖုန်း ၂ လုံးကို ယူဆောင်သွားပြီး ဓားပြတိုက်သူတွေအနက် “ပွင့်” ဆိုင်ဝန်ထမ်းဟောင်းတဦးပါဝင်နေတာကြောင့် စစ်ကော်မရှင်တပ်နဲ့ရဲတွေကလိုက်လံရှာဖွေရာ ည ၁၀ နာရီကျော်မှာ ဥဿာမြို့သစ်ရှိ FIVE STAR KTV မှာ ပစ္စည်းတွေနဲ့အတူ ပြန်လည်ဖမ်းမိခဲ့တယ်လို့ ဆိုပါတယ်။

“ပွင့်” ဆိုင်ကို ဓားပြတိုက်ခဲ့တဲ့ ဘုရားကြီးမြို့နေသူ အသက် ၁၉ နှစ် လမင်း(ခ)ကိုငယ် (ဆိုင်ဝန်ထမ်းဟောင်း)နဲ့ အသက် ၂၃ နှစ် ဇင်ကို (ခ)ကိုဇင်၊ အသက် ၂၂ အရွယ် နိုင်မင်းထွန်း ပဲခူးမြို့နေသူတို့ ၃ ဦးကို ဖမ်းဆီးမိခဲ့တာဖြစ်ပြီး ၎င်းတို့ကို ပဲခူးမြို့ အမှတ် ၃ ရဲစခန်းမှာ ဖမ်းဆီးထိန်းသိမ်းထားတယ်လို့ သိရပါတယ်။

မေ ၂၀ ရက်ကလည်း မဇင်းရပ်ကွက်၊ မဟာစေတီ ၃ လမ်းနေ အသက် ၁၃ နှစ်အရွယ် မောင်သက်မင်းနိုင်ကို တရပ်ကွက်တည်းအတူနေ အမျိုးသား ၂ ဦးကို ဖမ်းဆီးသတ်ဖြတ်ပြီး မိဘတွေထံ ငွေတောင်းယူမှုဖြစ်ပွားခဲ့သေးတယ်လို့ သိရပါတယ်။

စာတည်း – ဟိန်းစံ

မြတ်၊ ကျော်ကြီး

မြစ်ငယ်၊ စက်တင်ဘာ ၁၊ ၂၀၂၅။

မန္တလေးမြို့၊ အမရပူရမြို့နယ်၊ ကျောက်စိမ်းဘုရားအနီးက စားသောက်ဆိုင်ကို ဆီဘောက်ဆာကား ၁ စီး ဝင်တိုက်မိပြီး မီးလောင်ကာ ပြည်သူ ၃ ဦး သေဆုံးခဲ့တယ်လို့ လူမှုကူညီရေးအသင်းတွေဆီက သိရပါတယ်။

စက်တင်ဘာ ၁ ရက် ဒီနေ့မနက် ၆ နာရီ ၄၅ မိနစ်မှာ စစ်ကိုင်း-မြစ်ငယ်ကားလမ်းဘေးက “ကောင်းကောင်းနန်းတော် စားဥယျာဉ်” စားသောက်ဆိုင်ကို ဆီဘောက်ဆာကားဝင်တိုက်မိပြီး မီးလောင်ခဲ့တာလို့ ဆိုပါတယ်။

“ဆိုင်ကယ်ကိုရှောင်ရင်း စားသောက်ဆိုင်ကိုဝင်တိုက်မိတာ။ မနက်စာစားချိန်ဆိုတော့ လူစည်နေတဲ့အချိန်ဖြစ်တာ။ ၃ ဦးသေပြီးဒဏ်ရာရတဲ့သူများတယ်။ သေတဲ့သူတွေက စားသုံးသူလား ဝန်ထမ်းလားမသိရသေးဘူး”လို့ လူမှုကူညီရေးအသင်းတာဝန်ရှိသူတဦးက ပြောပါတယ်။

မီးလောင်မှုကြောင့် ဆီဘောက်ဆာကားရော စားသောက်ဆိုင်ပါ ပျက်စီးမှုတွေရှိခဲ့ပြီး မြို့နယ်မီးသတ်၊ အရန်မီးသတ်နဲ့လူမှုကူညီရေးအသင်းတွေက ဝိုင်းဝန်းကူညီမီးငြှိမ်းသတ်နေတယ်လို့သိရကာ သေဆုံးသူတွေနဲ့ပတ်သက်တဲ့အချက်အလက်တွေကိုတော့ စိစစ်နေတယ်လို့ နောက်ထပ် ကူညီဆောင်ရွက်ပေးနေသူတဦးကပြောပါတယ်။

“ဆီဘောက်ဆာက ဆိုင်ကိုဝင်တိုက်တာ။ ဘယ်လိုဖြစ်တာတော့မသိဘူး။ မီးတွေလောင်တာ။ လူရုပ်တွေတောင်မှန်းလို့မရသေးဘူး။ အကုန်လုံးက မဲတူးနေတာ။ ကျား၊ မ ခွဲမရသေးဘူး။ “လို့ ကူညီဆောင်ရွက်ပေးနေသူတဦးကပြောပါတယ်။

ဆီဘောက်ဆာကားတိုက်တဲ့အချိန်ပေါက်ကွဲပြီး တပြိုင်ထဲမီးလောင်ခဲ့တာဖြစ်ပြီး ‌‌‌‌‌‌ယာဉ်မောင်းကို ဖမ်းမိထားတယ်လို့ သိရပါတယ်။

မုံရွာ၊ ဩဂုတ် ၂၉၊ ၂၀၂၅။

စစ်ကိုင်းတိုင်း၊ မုံရွာမြို့၊ သလ္လာဝတီဆိပ်ကမ်းမှာ ကုန်တင်မော်တော် ၁ စီး ဓားပြတိုက်ခံရကာ ကျပ်သိန်း ၆၀၀ ကျော်ဆုံးရှုံးသွားတယ်လို့ မုံရွာမြို့နယ်ပြည်သူ့ကာကွယ်ရေးအဖွဲ့ တာဝန်ရှိသူတွေဆီက သိရပါတယ်။

ဩဂုတ် ၂၇ ရက်ည ၈ နာရီမှာ “မုံရွာနိုင်လူချစ်” မော်တော်ရေယာဥ်အသင်းဝင်တွေထဲက ကုန်တင်မော်တော်တစီးဟာ ဆိပ်ကမ်းမှာရပ်နားထားစဥ် လက်နက်ကိုင် အမျိုးသား ၃ ဦးက မော်တော်ပိုင်ရှင်ကို ဓားပြတိုက်ခဲ့တာလို့ ဆိုပါတယ်။

“မော်တော်ပိုင်ရှင်ဆီက တိုက်သွားတာ။ ပိုင်ရှင်က ညအိပ်တာ။ အခုချိန်ထိတော့မမိသေးဘူး။ တိုက်ခံရတာက သလ္လာဝတီလှည်းဆိပ်ရဲကင်းနားရပ်ထားတဲ့မော်တော်ပါ။ အဲ့ပတ်ချာလည်မှာလည်း မော်တော်တွေရပ်ထားတာရှိတာဘဲ။ အဓိက ဒီကောင်တွေတခုခုအတွင်းလူပါလို့ ပိုက်ဆံရှိတာသိလို့ တိုက်သွားတဲ့သဘောပဲ”လို့ မုံရွာမြို့နယ်ပကဖ ပြန်ကြားရေးတာဝန်ခံကပြောပါတယ်။

ဓားပြတိုက်ခံရလို့ မော်တော်ပိုင်ရှင်ဆီက ရွေထည်နဲ့ငွေ ကာလတန်ဖိုး ကျပ်သိန်း ၆၀၀ ကျော်ပါသွားတယ်လို့ သိရပါတယ်။

ဓါးပြတိုက်ခံရတဲ့ ကုန်တင်မော်တော်ရပ်ထားတဲ့နေရာနဲ့ မီတာ ၁၀၀ ခန့်အကွာမှာ သလ္လာဝတီ လှည်းဆိပ်ရဲကင်းရှိပြီး ဓါးပြတိုက်သူတွေကိုတော့ ဩဂုတ် ၂၉ ရက် ဒီကနေ့အထိ ဖမ်းမိတာမျိုးမရှိသေးဘူး လို့ဆိုပါတယ်။

ပြီးခဲ့တဲ့နှစ်၊ စက်တင်ဘာ ၂၆ ရက်ကလည်း မုံရွာမြို့၊ မြဝတီရပ်ကွက်၊ မေတ္တာလမ်းသွယ် ၁ ရှိ နဝရတ်ရွှေဆိုင်အိမ် ဓားပြတိုက်ခံရပြီး ကျပ်သိန်းတသောင်းကျော်ဖိုး ရွှေထည်ပစ္စည်းတွေ ဆုံးရှုံးခဲ့ပါသေးတယ်။

စာတည်း – လင်း

ပခုက္ကူ၊ ဩဂုတ် ၂၆၊ ၂၀၂၅။

မကွေးတိုင်း၊ ပခုက္ကူမြို့မှာ နေအိမ်တွင်းဝင်ရောက်နေတဲ့ အဆိပ်ပြင်းမြွေကိုက်ခံရတာကြောင့် သက်ကြီးအမျိုးသမီး ၁ ဦး ဆေးရုံပို့ဆောင်ကုသနေရတယ်လို့ မြိုခံတွေထံက သိရပါတယ်။

ပခုက္ကူမြို့ အမှတ် ၃ ရပ်ကွက်၊ ၉ လမ်းမှာနေထိုင်တဲ့ အသက် ၆၀ အရွယ်အမျိုးသမီးဟာ ဩဂုတ် ၂၆ ရက် ဒီကနေ့ နေ့လယ် ၁ နာရီခန့်မှာ နေအိမ်အတွင်းမှာရှိနေချိန် အိမ်အတွင်းရောက်ရှိနေတဲ့အဆိပ်ပြင်းမြွေက ဝဲဘက်ခြေထောက်ကိုကိုက်ခဲ့တာလို့ ဆိုပါတယ်။

” သူ့အိမ်မှာနေရင်းတန်းလန်းနဲ့ကို ကိုက်ခံရတာ။ ဘယ်လိုပုံစံကိုက်ခံရလည်းတော့မသိဘူး။ မြွေကတော့ သူတို့အိမ်အောက်က မြေအောက်ခန်းလေးထဲကို ဝင်သွားတော့ အဲ့နေရာကနေ တွေ့တာ” လို့ ဒေသခံတဦးကပြောပါတယ်။

အဆိပ်ပြင်းမြွေကိုက်ခံရတာကြောင့် သက်ကြီးအမျိုးသမီးမှာ ဝဲဘက်ခြေမမြွေကိုက်ဒဏ်ရာရရှိပြီး ပခုက္ကူမြို့ဆေးရုံကိုပို့ဆောင် ဆေးကုသမှုခံယူနေတယ်လို့ သိရပါတယ်။

အမျိုးသမီးကို ကိုက်ခဲ့တဲ့ အဆိပ်ပြင်းမြွေကို ဖမ်းယူရရှိခဲ့ပြီး လုံးပတ် ၁ လက်မခန့်၊ အရှည် ၁ ပေကျော်ရှိ မန္တလေးအဆိပ်မှုတ်မြွေဟောက်အမျိုးအစားဖြစ်ကာ ပခုက္ကူမြို့ပေါ်ရပ်ကွက်နေအိမ်တွေမှာမကြာခဏဆိုသလို မြွေပွေး၊ မြွေဟောက်တွေ တွေ့ရပြီး ၁ လမှာ အနည်းဆုံး ၂ ကြိမ်ကနေ ၃ ကြိမ်အထိ သွားရောက်ဖမ်းယူပေးနေရတယ်လို့ ပခုက္ကူမြို့လူမှုကယ်ဆယ်ရေးလုပ်ဆောင်ပေးနေသူ တချို့ထံက သိရပါတယ်။

ပြီးခဲ့တဲ့နှစ် နိုဝင်ဘာ ၂၄ ရက်ကလည်း ပခုက္ကူမြို့၊ အမှတ် ၁ ရပ်ကွက်၊ ကျောက်စေတီလမ်းမှာ နေအိမ်တခုမှာ အိမ်သာအသုံးပြုနေတဲ့ အထက်တန်းကျောင်းသူတဦးကို အိမ်သာထဲဝင်ရောက်နေတဲ့ မြွေဟောက်ကိုက်ခဲ့တာကြောင့် အသက်သေဆုံးမှုဖြစ်ပွားခဲ့ပါသေးတယ်။

စာတည်း – ဟိန်းစံ