■ နတ်တလင်းမှာလည်း လေယာဥ်နဲ့ဗုံးကြဲသွား

ပေါက်ခေါင်း၊ ဩဂုတ် ၆၊ ၂၀၂၆။

ပဲခူးတိုင်းအနောက်ခြမ်း၊ ပေါက်ခေါင်းမြို့နယ်မှာ စစ်ကောင်စီတပ်က ဒရုန်းနဲ့ ဗုံးသီးချတိုက်ခိုက်ခဲ့လို့ ပြည်သူ့ကာကွယ်ရေးရဲဘော် ၃ ဦး ဒဏ်ရာရရှိခဲ့သလို နတ်တလင်းမြို့နယ်မှာလည်း လေကြောင်းကနေ တိုက်ခိုက်ခံခဲ့ရတယ်လို့ ဒေသခံပြည်သူ့ကာကွယ်ရေးတပ်ဖွဲ့ဝင်တွေဆီက သိရပါတယ်။

သြဂုတ်လ ၅ ရက် မွန်းတည်ချိန်ခန့်က ပေါက်ခေါင်းမြို့နယ်မှာ စစ်ကောင်စီတပ်က ဒရုန်းအသုံးပြုတိုက်ခိုက်ခဲ့တာဖြစ်ပြီး နတ်တလင်းမြို့နယ်မှာတော့ ဂျက်ဖိုက်တာနဲ့ တိုက်ခိုက်ခဲ့တာဖြစ်တယ်လို့ သိရပါတယ်။

ပေါက်ခေါင်းမြို့နယ်အတွင်း ဒရုန်းနဲ့တိုက်ခိုက်ရာမှာ ပေါင်းတည်ပကဖ က ရဲဘော်တဦး၊ တပ်ရင်း ၃၆၀၁ က ရဲဘော်တဦးနဲ့ တပ်ရင်း ၃၆ဝ၂ က ရဲဘော်တဦး ပေါင်း ၃ ဦး ဒဏ်ရာရရှိခဲ့ပြီး နတ်တလင်းမြို့နယ်က တိုက်ခိုက်မှုအခြေအနေကိုတော့ မသိရသေးဘူးလို့ ဆိုပါတယ်။

“ရဲဘော်တွေက ဆိုင်ကယ်နဲ့ သွားနေတာကို အပေါ်ကနေ ဒရုန်းနဲ့ ဗုံးသီးလိုက်ချတာ၊ ပြီးတော့ နောက်ကနေလိုက်ပစ်လို့ လူလွတ်ရုံး ပြေးခဲ့ရတာ။ စီးလာတဲ့ဆိုင်ကယ်တော့ မယူနိုင်တော့ ဘူးပေါ့” လို့ အခြေနေကို သိရှိသူ ပြည်သူ့ကာကွယ်ရေး ရဲဘော်တဦးက ပြောပါတယ်။

နတ်တလင်းမြို့နယ်က ပဲခူးရိုးမပေါ်တနေရာကို ဗုံးကြဲတိုက်ခိုက်တာကိုတော့ ဆက်သွယ်ရေး အခက်အခဲကြောင့် အသေးစိတ်ကို မသိရသေးဘူးလို့ နတ်တလင်းဒေသခံ ပြည်သူ့ကာကွယ်ရေး ရဲဘော်တဦးက ပြောပါတယ်။

နတ်တလင်းမြို့နယ်အတွင်း လေယာဉ်နဲ့ဗုံးကြဲတိုက်ခိုက်မှုကိုတော့ မြေလတ်အသံက သီးခြားအတည်ပြုဖို့ ကြိုးစားနေပါတယ်။

တချိန်တည်းဆိုသလိုပင် ပဲခူးတိုင်းအနောက်ခြမ်းက သာယာဝတီခရိုင် ကြို့ပင်ကောက်မြို့နယ် ရုံးချောင်းအုပ်စု အင်တိုင်းကုန်းရွာက နေအိမ်တွေပေါ်ကို စစ်ကောင်စီတပ်က Y-12 လေယာဉ်နဲ့ ဗုံးကြဲတိုက်ခိုက်ခဲ့လို့ တနှစ်သားအရွယ်ကလေးငယ်တဦးအပါ ပြည်သူ ၆ ဦး ဒဏ်ရာရခဲ့ပါတယ်။

အလားတူ ပြီးခဲ့တဲ့ ဩဂုတ်လ ၂ ရက်ကလည်း ကြို့ပင်ကောက်မြို့နယ်နဲ့ နယ်မြေထိစပ်နေတဲ့ အုတ်ဖိုမြို့နယ်က ပဲခူးရိုးမတနေရာကို စစ်ကောင်စီတပ်က ဂျက်ဖိုက်တာနဲ့ ဗုံးကြဲတိုက်ခိုက်ခဲ့လို့ တော်လှန်ရေးတပ်ဖွဲ့တွေရဲ့စခန်းတခုပျက်စီးခဲ့သလို ပြည်သူ့ကာကွယ်ရေးရဲဘော် ၂ ဦးလည်း ဒဏ်ရာရခဲ့ပါသေးတယ်။

သာယာဝတီ၊ ဩဂုတ် ၅၊ ၂၀၂၆။

ပဲခူးတိုင်းအနောက်ခြမ်း၊ သာယာဝတီမြို့နယ်က လက်ပစ်ဗုံးကိုင် အုပ်ချုပ်ရေးမှူးနဲ့ ရာအိမ်မှူးကို သြဂုတ်လ ၅ ရက် ဒီကနေ့မနက် ၂ နာရီလောက်က သေနတ်နဲ့ ပစ်သတ်ခံရတယ်လို့ သာယာဝတီမြို့နယ် ပြည်သူ့ကာကွယ်ရေးတပ်ဖွဲ့ဝင်တဥဦးထံက သိရပါတယ်။

သာယာဝတီမြို့နယ် ကျောက်တွင်းကျေးရွာအုပ်စု၊ မင်းလမ်းရွာက အုပ်ချုပ်ရေးမှူးတဖြစ်လဲ ပြည်ခိုင်ဖြိုးပါတီ ရပ်ကျေးဥက္ကဌ ဦးမြင့်ကြိုင်နဲ့ ရာအိမ်မှူးကိုကျော်အောင်တို့ကို ပစ်သတ်ခံခဲ့ရတာလို့ ပြောပါတယ်။

အုပ်ချုပ်ရေးမှူးဦးမြင့်ကြိုင်ကို သူရဲ့နေအိမ်မှာပဲ သေနတ်နဲ့ ပစ်သတ်ခဲ့ပြီး၊ ရာအိမ်မှူးကိုကျော်အောင်ကိုတော့ ဖမ်းဆီးလာစဉ် ထွက်ပြေးဖို့ကြိုးစားတာကြောင့် လမ်းမှာပစ်သတ်ခဲ့ရတာလို့ ဆိုပါတယ်။

“ကိုမြင့်ကြိုင်ကတော့ ခေါင်းကိုပစ်ခဲ့တာပါ။ ကျော်အောင်ကတော့ ရင်ပတ်ကို။ ကိုမြင့်ကြိုင်ဆီက လက်ပစ်ဗုံး ၂ လုံး သိမ်းလို့ ရခဲ့တယ်” လို့ သာယာဝတီဂဠုန်တပ်ဖွဲ့ မြေပြင်စစ်ရေး ဒုတာဝန်ခံ ရဲဘော်ကျော်ကြီးက ပြောပါတယ်။

အသတ်ခံရတဲ့ အုပ်ချုပ်ရေးမှူးနဲ့ ရာအိမ်မှူးတို့ဟာ စစ်မှုထမ်းစုဆောင်းရာမှာ ဦးဆောင်သူတွေဖြစ်ပြီး၊ စစ်ကောင်စီရဲ့ အမာခံထောက်တိုင်တွေ ဖြစ်သလို၊ သာယာဝတီနယ်မှာ စစ်ကြောင်းထိုးလာတဲ့ စစ်သားတွေကို သူတို့နေအိမ်တွေမှာ ဧည့်ခံတည်းခိုကြပြီး ရာအိမ်မှူးအိမ်မှာ ကင်းပုန်းဝပ်လေ့ရှိတယ်လို့ သူက ဆက်ပြောပါတယ်။

ပြီးခဲ့တဲ့ ဇူလိုင် ၂၇ ရက်မနက် ၁၀ နာရီခွဲကလည်း ပဲခူးတိုင်းအနောက်ခြမ်း၊ ပေါက်ခေါင်းမြို့နယ် တောင်လယ်အုပ်စု အောင်ချမ်းသာရွာသစ်နေ ခလရ ၅၃ တပ်က စစ်မှုထမ်းဟောင်း ကိုအောင်ကိုဝင်း ကိုလည်း တော်လှန်ရေးတပ်သားတွေက သူရဲ့နေအိမ်မှာ သေနတ်နဲ့ သွားရောက်ပစ်သတ်ခဲ့တယ်လို့ သိရပါတယ်။

မြေလတ်အသံ၊ ဩဂုတ် ၃၊ ၂၀၂၆။

ဒေါ်အောင်ဆန်းစုကြည်ကို အပြည်ပြည်ဆိုင်ရာ ကြက်ခြေနီကော်မတီ (ICRC) မှ မြန်မာ နိုင်ငံဆိုင်ရာ ဌာ‌နေကိုယ်စားလှယ် Mr. Arnaude de Baqque နဲ့ ဩဂုတ်လ ၃ ရက်နေ့ ဒီကနေ့ မနက်ပိုင်းမှာ တွေ့ဆုံခဲ့တယ်လို့ စစ်ကောင်စီ ပြန်ကြားရေးဌာနက ဓာတ်ပုံတချို့နဲ့ ထုတ်ပြန်ထားပါတယ်။

■ သေဆုံးသူတွေထဲမှာ တပ်ထောက်ခံသူ အမျိုးသမီးပါပြီး၊ ဘီးလင်း က.ပ.စဗိုလ်ကြီးအောင်ကိုဝင်း မိသားစုရဲ့ အိမ်လည်း မီးရှို့ဖျက်ဆီးခံရ

ကြို့ပင်ကောက်၊ သြဂုတ် ၁၊ ၂၀၂၆။

ပဲခူးတိုင်းအနောက်ခြမ်း၊ ကြို့ပင်ကောက်မြို့နယ်ထဲမှာ ဇူလိုင်လအတွင်း စစ်ကောင်စီတပ်ရဲ့ လက်ချက်နဲ့ ပြည်သူ ၃ ဦးသေဆုံးကာ၊ လူငယ် ၂ ဦးဖမ်းဆီးခံထားရပြီး၊ ခရစ်ယာန်ဘုရားကျောင်းတကျောင်းနဲ့ နေအိမ် ၆၀ ကျော် ပျက်စီးဆုံးရှုံးခဲ့တယ်လို့ ဒေသခံတွေဆီက သိရပါတယ်။

ပြီးခဲ့တဲ့ ဇူလိုင်လ ၈ ရက်နေ့ ကနေ ၃၁ ရက်နေ့အတွင်း သတ်ဖြတ်၊ ဖမ်းဆီး၊ မီးရှို့ဖျက်ဆီးခံခဲ့ရတာဖြစ်ပြီး၊ သေဆုံးသူတွေမှာ အမျိုးသား ၂ ဦးနဲ့ အမျိုးသမီး ၁ ဦးတို့ဖြစ်တယ်လို့ သိရပါတယ်။

ဒါ့အပြင် အမျိုးသမီး ၁ ဦးလည်း ဒဏ်ရာရခဲ့ပြီး၊ အမျိုးသားလူငယ် ၂ ဦးဖမ်းဆီးခံရကာ၊ ပြည်သူ့တွေရဲ့ နေအိမ်တွေနဲ့ ဘာသာရေးအဆောက်အဦးတွေ မီးရှို့ဖျက်ဆီးခံခဲ့ရသလို လက်နက်ကြီးထိမှန်လို့ ပျက်စီးခဲ့တာတွေလည်း ပါဝင်တယ်လို့ ဆိုပါတယ်။

“လက်ရှိအခြေနေက အနီတွေ၊ အစိမ်းတွေရွေးနေတာ မဟုတ်တဲ့အတွက် အာဏာရှင်က သူ့လုပ်ရိုးလုပ်စဉ်အတိုင်း လုပ်မှာပါ။ ကျေးရွာက အိမ်တွေက ကန်ဦးရွာက ခင်ယူပါလွင်ဆိုတဲ့ အမျိုးသမီး(စစ်တပ်)လော်ဘီ လုပ်လိုက်မှ မီးထဲပါသွားတာဆိုတော့ အမြင်က ရှင်းပါတယ်”လို့ စစ်ရှောင်တွေကို ကူညီပေးနေသူတဦးက ပြောပါတယ်။

ဒါ့အပြင် စစ်တပ်ပစ်တဲ့ လက်နက်ကြီးကြောင့် သေဆုံးသူ အမျိုးသမီးဟာ စစ်တပ်ထောက်ခံသူတဦးဖြစ်သလို မီးရိူ့ခံရတဲ့ နေအိမ်ထဲမှာလည်း ဘီးလင်း က.ပ.စ ကဗိုလ်ကြီးအောင်ကိုဝင်းမိသားစုရဲ့ နေအိမ်လည်း ပါဝင်တယ်လို့ သူက ဆက်ပြောပါတယ်။

ဖမ်းဆီးခံရသူ လူငယ် ၂ ဦးဟာ ကြို့ပင်ကောက်မြို့နယ် ကံဦးရွာကဖြစ်ပြီး၊ ဇူလိုင် ၂၅ ရက်က မျှစ်ချိုးပြီးပြန်လာချိန် စစ်အုပ်စုက ဖမ်းဆီးခဲ့တာလို့ ဆိုပါတယ်။

အလားတူ ပြီးခဲ့တဲ့ ဇူလိုင်လ ၂၃ ရက်နေ့ကလည်း ကြို့ပင်ကောက်မြို့နယ်၊ အလယ်ကုန်းနယ်မြေ ရဲကင်းစခန်းကနေ စစ်ကောင်စီတပ်က ပစ်လိုက်တဲ့ လက်နက်ကြီးကြောင့် နေအိမ်တွေမှာနေထိုင်ကြတဲ့ ရုံးချောင်းရွာက စစ်တပ်ထောက်ခံသူ အသက် ၃၇ နှစ်အရွယ် ဒေါ်မိုးသီတာဟာ လက်နက်​ကြီးကျည် ထိမှန်သေဆုံးခဲ့သလို အဲဒီရွာက အသက် ၃၈ နှစ်ရွယ် ဒေါ်ဝင်းဝင်းခိုင်လည်း ခြေထောက်ကို ထိမှန်လို့ ဒဏ်ရာရခဲ့တယ်လို့ ပြောပါတယ်။

ဇူလိုင် ၁၉ ရက်ကလည်း မြို့ကိုင်းရွာက လေဖြတ်ဝေဒနာသည် အသက် ၆၇ နှစ်အရွယ် ဦးစိန်ရွှေကို နေအိမ်နဲ့အတူ မီးရှို့သတ်ခဲ့ပြီး၊ ဇူလိုင် ၈ ရက်မှာ လယ်ထဲကပြန်လာတဲ့ ကျခတ္တန်းကြီးရွာက အသက် ၅၈ နှစ် အရွယ် ဦးကြည်စိုး ကို အကြောင်းမဲ့ ပစ်သတ်ခဲ့တယ်လို့ သိရပါတယ်။

လက်နက်ကြီးထိမှန်လို့ နေအိမ်အဆောက်အဥိီးတွေ ပျက်စီးတာအပြင် အဲဒီရက်တွေအတွင်း စစ်ကြောင်းထိုးတဲ့ လမ်းကြောင်းတလျှောက်က ကျေးရွာတွေကို မီးရိူ့ခဲ့လို့ မြို့ကိုင်းရွာက အိမ် ၃၀၊ ချောင်းဂွရွာက ၁၆ အိမ်နဲ့ ကွက်သစ်ရွာက ၁၈ အိမ်အပါ စုစုပေါင်းအိမ်ခြေ ၆၀ ကျော် ပျက်စီးဆုံးရှုံးခဲ့ရသလို၊ အဲ့ဒီအိမ်တွေထဲမှာ စစ်တပ်ကို အခိုင်အမာထောက်ခံသူတွေရဲ့ နေအိမ်တွေလည်းပါဝင်တယ်လို့ ပြောပါတယ်။

ဒါအပြင် စစ်ကောင်စီတပ်ရဲ့ ဖမ်းဆီးရိုက်နှက်စစ်ဆေးခံရတဲ့ ပြည်သူ အနည်းဆုံး ၅ ဦးထက်မနည်းရှိခဲ့တယ်လို့လည်း ပြောပါတယ်။

စစ်အုပ်စုဟာ ယမန်နေ့ညက ဘော်ဘင်ရွာဘက်ကနေ၊ ဆည်တော်ဦးရွာဘက်ကို လက်နက်ငယ်တွေနဲ့ အဆက်မပြတ် ခြောက်လှန့်ပစ်ခတ်ခဲ့ပြီး၊ သြဂုတ်လ ၁ ရက်နေ့ ဒီကနေ့မနက်ပိုင်းမှာတော့ အင်အား ၈၀ ဦးလောက်နဲ့ ညောင်ပင်သာရွာ ဘုန်းကြီးကျောင်းနဲ့ သခွပ်ပင်၊ ရုံးချောင်းရွာတွေကို လှည့်လည်နေတယ် ဆိုပါတယ်။

စစ်အုပ်စုဟာ ကြို့ပင်ကောက်မြို့အရှေ့ဘက်က အလည်ကုန်းနယ်မြေရဲစခန်းမှာ တပ်အထိုင်ချထားသလို အခုလ ဒုတိယပတ်အတွင်းကစတင်ပြီး စစ်ကြောင်းထိုးနေတဲ့အပြင်၊ လက်နက်ကြီးတွေ၊ ဒရုန်းတွေနဲ့လည်း အဆက်မပြတ်တိုက်ခိုက်နေလို့ ကျခတ္တန်းကြီးရွာ၊ မင်းဝ၊ မြို့ကိုင်း၊ သခွပ်ပင်၊ ချောင်းဂွ၊ ညောင်ပင်သာ၊ ကွက်သစ်၊ ရင်းတိုက်ကွင်း၊ ဥယျာဉ်ကြီး နဲ့ ရုံးချောင်းသင်ခရိုင်ရွာတွေက ဒေသခံ သောင်းဂဏန်းလောက်ဟာ ဒီနေ့အထိ စစ်ရှောင်နေရဆဲလို့ သိရပါတယ်။

■ အုပ်ချုပ်ရေးအဖွဲ့ဝင်တွေရဲ့ ဆွေမျိုးတွေကို ချန်လှပ်ထားလို့ ဒေသခံတွေ မကျေနပ်

ပန်းတောင်း၊ ဇူလိုင် ၃၀၊ ၂၀၂၆။

ပဲခူးတိုင်းအနောက်ခြမ်း၊ ပြည်ခရိုင်၊ ပန်းတောင်းမြို့နယ်မှာ စစ်ကောင်စီလက်အောက်ခံ အုပ်ချုပ်ရေးအဖွဲ့ဝင်တွေက ပြည်သူတွေဆီက စစ်မှုထမ်းကြေးပေးထားသော်လည်း ပြည်ပရောက်နေသူတွေကို ပြန်ခေါ်ခိုင်းသလို သတ်မှတ်ထားတဲ့ အသက်ကျော်လွန်သူတွေကိုပါ စစ်မှုထမ်းရန် စာရင်းကောက်ယူနေပြီး၊ အုပ်ချုပ်ရေးပိုင်းက ဆွေမျိုးတွေကို စာရင်းထဲမပါတဲ့အတွက် ဒေသခံတွေက ကျေနပ်မှုမရှိဘူးလို့ သိရပါတယ်။

ပန်းတောင်းမြို့နယ်၊ တုံကင်းအုပ်စုမှာ အခုလ တတိယပတ်က ရပ်ကျေးအုပ်ချုပ်ရေး အဖွဲ့ဝင်တွေ၊ ရဲ၊ လဝကနဲ့ စစ်သားတွေက လိုက်လံစာရင်း ကောက်ခံခဲ့တာဖြစ်တယ်လို့ ဒေသခံတဦးက ပြောပါတယ်။

“စစ်မှုမထမ်းကြေး သိန်း ၁၀၀ ပေးလိုက်ရတာ ဆယ်ရက်ကျော်ပဲ ရှိသေးတယ်။ စစ်မှုထမ်းစာရင်း လိုက်ကောက်နေတာမှာ အသက် ၃၇ နှစ်အရွယ်တွေလည်း စာရင်းပါတယ်။ နိုင်ငံခြားသွားသူတွေလည်း ပြန်ခေါ်ပေးဖို့ အုပ်ချုပ်ရေးပိုင်းက ပြောတယ်။ အိမ်တွေကိုလည်း ဓါတ်ပုံရိုက်တယ်။ ကျန်ခဲ့တဲ့မိဘတွေနဲ့ ဇနီးမယားတွေကိုလည်း လက်မှတ်တွေ ထိုးခိုင်းတယ်” လို့ ဒေသခံတဦးက ပြောပါတယ်။

သတ်မှတ်ထားတဲ့ အသက်ကျော်လွန်သူတွေကိုပါ စစ်မှုထမ်းစာရင်းထပ်မံကောက်ယူပေမယ့် အုပ်ချုပ်ရေးအဖွဲ့ဝင်တွေရဲ့ တူနဲ့ သားတွေကိုတော့ ချန်လှပ်ထားတဲ့အတွက် စာရင်းကောက်ယူသူတွေနဲ့ ဒေသခံတွေ စကားများ ရန်ဖြစ်တာတွေလည်း ရှိတယ်လို့ သူက ဆက်ပြောပါတယ်။

တုံကင်းအုပ်စုဟာ စစ်မှုထမ်းစတင်စုဆောင်းချိန်ကစလို့ လစဥ်ဆိုသလို စစ်မှုထမ်းကြေး စုဆောင်းပေးခဲ့သော်လည်း ပြီးခဲ့တဲ့တလကျော်က စစ်မှုကြေးမပေးတဲ့အတွက် အဲဒီအုပ်စု ရွာထောင်ရွာက လူငယ်တဦးကို စစ်အုပ်စုက လာဖမ်းသွားတဲ့အတွက် ကျပ် သိန်း ၁၃၀ နဲ့ ပြန်ရွေးခဲ့ရတယ်လို့ ဆိုပါတယ်။

“ပန်းတောင်းမှာ စစ်မှုထမ်းဖမ်းနေတာက တော်တော်ကြမ်းတော့ တိမ်းရှောင်တဲ့လူငယ်တွေလည်းများတယ် လူငယ်ယောင်္ကျားလေးတွေ မြို့မှာ သိပ်မတွေ့ရတော့ဘူး၊ ရေသန့်လည်ပို့တာတောင် အမျိုးသမီးတွေဖြစ်နေပြီ။ စစ်မှုထမ်းအတွက်ဆိုပြီး သန်းခေါင်စာရင်းနဲ့ လိုက်နေတယ်” လို့ ဥသျှစ်ပင်မြို့ခံတဦးက ပြောပါတယ်။

စစ်အုပ်စုဟာ ပြည့်သူ့စစ်မှုထမ်းဥပဒေကို ၂၀၂၄ ခုနှစ် ဖေဖေါ်ဝါရီ ၁၀ ရက်က စတင်အသက်သွင်းကာ သတ်မှတ်ထားတဲ့ အသက်အရွယ်တွေမှာ အမျိုးသားဖြစ်ပါက အသက် ၁၈ နှစ်ကနေ ၃၅ နှစ်အတွင်းဖြစ်ပြီး၊ အမျိုးသမီးဖြစ်ပါက ၁၈ နှစ် ၂၇ အတွင်းရှိ လူငယ်တွေကို စစ်မှုထမ်းစေခဲ့တာဖြစ်ပါတယ်။

အဲဒီနောက် လူငယ်တွေကို နည်းလမ်းမျိုးစုံနဲ့ ဖမ်းဆီးခေါ်ဆောင်ကာ ၂၀၂၄ နှစ် ဧပြီလမှစပြီး တပတ်လျှင် သင်တန်းသား ၅,၀၀၀ ဦးနဲ့ စစ်သင်တန်းပေးလျှက်ရှိရာ အခုအခါ သင်တန်းအမှတ်စဥ် ၂၆ ကို ရောက်ရှိပြီဖြစ်ပါတယ်။