Author

ဟိန်းစံ

ပေါ်တာဆွဲခံရတဲ့ ဗိုလ်ချုပ် (သရော်စာ)

by ဟိန်းစံ ၁၁ လ အကြာက

written by ဟိန်းစံ

မြေလတ်အသံ၊ ဩဂုတ် ၁၄၊ ၂၀၂၅။

“ ဒုံး “နေပြည်တော်၊ စစ်ရုံးရှိ စစ်ဆင်ရေးအစည်းအဝေးခန်းမဆောင်ကြီးအတွင်း ဒေါပွနေသော ခေါင်းဆောင်ကြီးတယောက် စားပွဲခုံကို လက်သီးနဲ့ ခပ်ပြင်းပြင်းတချက် ထုချလိုက်သည်။

“ ပြော၊ မင်းတို့ ပြောကြစမ်း ။ ဒီလောက် စစ်ကြောင်းလိုက်၊ တပ်ရင်းလိုက် ပြုတ်လိုက်၊ သေလိုက်။ ၁ ခါလည်း မဟုတ်၊ ၂ ခါလည်း မဟုတ် ။ ကုန်းလမ်းလည်း ကုန်းလမ်း မလို့၊ ရေလမ်းလည်း ရေလမ်းမလို့ သင်္ဘောတွေလည်း မြုပ်။ မင်းတို့ စစ်ကို ဘယ်လို တိုက်နေကြသလဲ “ ဟု ဆူပူကြိမ်းမောင်းသံနှင့်အတူ လက်ထဲရှိ စစ်ဆင်ရေးအစီရင်ခံစာဖိုင်ကို ခေါင်းဆောင်ကြီး လွှင့်ပစ်လိုက်သည်။

အကြီးအကျယ်ပေါက်ကွဲနေသည့် ခေါင်းဆောင်ကြီး၏ ဆူပူကြိမ်းမောင်းသံကြီးက ၎င်း၏ အရပ်အမောင်းနှင့်ပင် မလိုက်။

အကြောင်းမှာ အစည်းအဝေးစစ်ဆင်ရေးတင်ပြချက်များတွင် တိုင်းရင်းသားတပ်ဖွဲ့များ၊ PDF တပ်ဖွဲ့များကို ခေါင်းဆောင်ကြီးများ၏တပ်များ နေရာအနှံ့ထပ်မံရှုံးနိမ့်နေပြီး အကျအဆုံးများနေခြင်းကြောင့်။ ခေါင်းဆောင်ကြီးများမှာ အရှုံးနှင့်အသားကျနေပြီးဖြစ်သော်လည်း ယခုတကြိမ်တွင် လုံးဝဖြေမဆည်နိုင်။

စစ်အာဏာသိမ်းပြီး ၄ နှစ်ကျော်အတွင်း နိုင်ငံအနှံ့စစ်ဆင်ရေးများတွင် တိုက်တိုင်းရှုံး၊ တိုင်းစစ်ဌာနချုပ်များအထိ ကျဆုံး၊ လက်အောက်တိုင်းမှူးနဲ့ စစ်ဗိုလ်ချုပ်တွေအပါအဝင် တပ်သားအများအပြား သေသူကသေ၊ အဖမ်းခံရသူကခံရ တပ်ပျက်လုနီးပါးဖြစ်နေ၍ မူလကပင် ခေါင်းဆောင်ကြီးတွင် စိတ်ဒဏ်ရာအခံ အများအပြားနှင့်။

သို့သော် ခေါင်းဆောင်ကြီးပီပီ ဒေါသထွက်နေ၍အလုပ်မဖြစ်ဆိုကာ စိတ်ကိုလျှော့ချလိုက်ပြီး

“ ခု ငါတို့ ရွေးကောက်ပွဲနီးနေပြီ။ ငါတို့ကို ဆန့်ကျင်တဲ့မြို့တွေကိုလည်း စစ်အုပ်ချုပ်ရေးကြေညာထားပြီ။ ရန်သူတွေကို ပြန်တိုက်မှရမယ်။ စစ်အောင်နိုင်ရေးဗျူဟာတွေ တင်ပြကြ” ဟု ခပ်ပြတ်ပြတ် ပြောလိုက်သည်။

အစည်းအဝေးခန်းမတွင်းရှိနေသည့် စစ်ဗိုလ်ချုပ်များ ခေါင်းကလေးများကျုံ့ဝင်သွားပြီး အားလုံးငြိမ်သက်နေကြသည်။

ထိုအချိန်တွင် ကလိမ်ကကျစ်အရာ၌ ဧတဒဂ်ဘွဲ့ရရှိထားသူ ဗိုလ်ချုပ်ကြီးတဦးက မဝံ့မရဲဖြင့် ၎င်းမှာ စစ်အောင်နိုင်ရေးနှင့်ပတ်သက်ပြီး ဗေဒင်သွားရောက် မေးမြန်းခဲ့ရာ သေချာပေါက်အောင်မြင်နိုင်မည့် ယတြာကြီးတခုရရှိခဲ့ကြောင်း ခေါင်းဆောင်ကြီးထံ တင်ပြသည်။

စကားဆုံးသည်နှင့်တပြိုင်နက် ဗေဒင်ယတြာများတွင် အထူးယုံကြည်ကိုးစားသူ ခေါင်းဆောင်ကြီးတယောက် မျက်လုံးများဝင်းခနဲ တောက်ပသွားသည်။

သို့သော် အမူအရာမပျက် “ အေး ၊ ဆက်ပြော”

ခွင့်ပြုချက်ရပြီးနောက် ဧတဒဂ်ပိုင်ရှင်ဗိုလ်ချုပ်ကြီးက “ ယခုတကျော့ပြန်စစ်ဆင်ရေးမှာ အင်္ဂလိပ်ခေတ်နဲ့ ဂျပန်ခေတ်မှာ စစ်တိုက်တော်ခဲ့တဲ့ စစ်နည်းဗျူဟာကျွမ်းကျင်ခဲ့တဲ့ တပ်မတော်ဖခင်ကြီး ဗိုလ်ချုပ်အောင်ဆန်းရဲ့ရုပ်ထုတွေကို ရှေ့တန်းစစ်မြေပြင်တွေမှာ စိုက်ထူပြီး ရန်သူကို ပြန်တိုက်မှာပါ “ သူ့ရဲ့ အစီအမံကို ပြောသည်။

“ ဘာ “ ခေါင်းဆောင်ကြီး၏ အာမေဍိတ်သံကြီး အစည်းအဝေးခန်းတွင်း လွှမ်းမိုးသွားသည်။

အခြားစစ်ဗိုလ်ချုပ်ကြီးများလည်း တဦးနှင့်တဦး ခိုးကြည့်ပြီး မျက်လုံးများအကြည့်ချင်း ဆုံလျက်။

ခေါင်းဆောင်ကြီးတယောက် ဆိုဖာခုံကို နောက်ကျောမှီချလိုက်ပြီး လက်ကိုပိုက်လျက် မျက်လုံးလေးမှေးကာ ၂ မိနစ်ခန့် ငြိမ်သက်သွားသည်။ ထို့နောက် အပြုံးစစလေးဖြင့် မျက်လုံးပြန်ဖွင့်လာသည်။

“ အားလုံး နားထောင်ကြ “

“ အဲ့ဒီယတြာအစီအမံ အင်မတန်ကောင်းတယ် ။ ငါတို့ ဘယ်လို ဆက်လုပ်ကြမယ်ဆိုတာ အစီအမံကို အသေးစိတ် ဝိုင်းပြီး ဆွေးနွေးတင်ပြကြ “ ဟု ခေါင်း ဆောင်ကြီးပြောဆိုလိုက်မှ တင်ပြသည့်ဗိုလ်ချုပ်ကြီး စိတ်သက်သာရာ ရသွား၏။

စစ်ဗိုလ်ချုပ်များအကြားတွင်လည်း တီးတိုးဆွေးနွေးချက်တွေထွက်ပေါ်လာပြီး သူ့ထက်ငါ ဆွေးနွေးချက်များ အသီးသီးရှိနေကြသည်။

မျက်နှာမဲမဲဖြင့် ဗိုလ်ချုပ်တဦးမှ ယင်းကဲ့သို့ ဗိုလ်ချုပ်ရုပ်ထုများ အသစ်သွန်းလုပ်ကာ ရှေ့တန်းသို့ ပို့ဆောင်မည်ဆိုပါက မည်သို့မျှအချိန်မမီနိုင် ဟု သုံးသပ်သည်။

စင်စစ် လက်တွေ့တွင်လည်း မည်သို့မျှအချိန်မလောက်။ အဘယ်ကြောင့်ဆိုသော် ၎င်းတို့၏ စစ်ရှုံးနယ်မြေများသည် အလွန်များပြားကျယ်ပြန့်သည့် အတွက် ရုပ်ထုအများအပြားထုလုပ်ရလျှင် ခေါင်းဆောင်ကြီး၏ ရည်မှန်းချက်များ နှောင့်နှေးနိုင်သောကြောင့်ပင်။

“ တပ်ချုပ်ကြီး ခင်ဗျာ့၊ စစ်ဆင်ရေးသို့ပို့ဆောင်မည့် ဗိုလ်ချုပ်ရုပ်ထုများအား ယခုမှစတင်၍ အသစ်သွန်းလုပ်ပါက အချိန်ကြာမြင့်နိုင်ကြောင်း။ စစ်ဆင်ရေးရည် မှန်းချက်များအတွက် အချိန်လုံလောက်နိုင်မည် မဟုတ်ကြောင်း “ အထက်ပါဗိုလ်ချုပ်က သူ၏အတွေးကို ချက်ချင်း တင်ပြလိုက်သည်။

“ အေး၊ အဲ့ဒါဆို ဘယ်လိုလုပ်မလဲ “ ခေါင်းဆောင်ကြီး ပြန်မေးသည်။

အထက်ပါဗိုလ်ချုပ်က ဆက်လက်ပြီး “ ၄င်းတို့ ထိန်းချုပ်ထားသည့်မြို့နယ်များမှ ဗိုလ်ချုပ်ရုပ်ထုများအား ဖြိုချယူဆောင်၍ ပို့ဆောင်မည်ဆိုပါက ညတွင်းချင်းပင် ကိစ္စပြီးစီးနိုင်ကြောင်း “ ပြောသည်။

အကြံပြုချက်ကို ခေါင်းဆောင်ကြီး တယောက်ချက်ချင်းသဘောတူလိုက်ပြီး

“ ဟုတ်ပြီ အဲ့ဒါဆို ဘယ်မြို့က ရုပ်ထုကိုစပြီး ဖြုတ်သင့်သလဲ “ ခေါင်းဆောင်ကြီး၏ မေးခွန်းက ထပ်ရှိလာပြန်သည်။

ခေတ္တစဥ်းစားပြီးနောက် ခေါင်းဆောင်ကြီးမှ အားလုံးနားထောင်ကြ ။ ယခုတခါတွင် ခေါင်းဆောင်ကြီး ၎င်းကိုယ်တိုင်စဥ်းစားဆုံးဖြတ်ခြင်း ဖြစ်သည်။

ခေါင်းဆောင်ကြီးက “ ၎င်းတို့အနေဖြင့် တပ်ရင်းလိုက် ၊စစ်ကြောင်းလိုက် “ ပြုတ်” နေသည့် ဖြစ်စဥ်များ နောင်တွင်မရှိစေရေး ယတြာဓာတ်ရိုက်ဓာတ်ဆင်အနေဖြင့် “ ပြုတ်” ဆိုသည့် စကားလုံးကို ဖယ်ရှားနိုင်ရန် “ ပ” အက္ခရာနှင့်စတင်သည့် မြို့များမှ ဗိုလ်ချုပ်ရုပ်ထုများကို စတင်ဖယ်ရှားယူဆောင်ပြီး ပို့ဆောင်ကြ ” ဟု ညွှန်ကြားကာ အစည်းအဝေးကို ရုတ်သိမ်းလိုက်သည်။

ထို့နောက် ခေါင်းဆောင်ကြီးများ၏ ညွှန်ကြားချက်အရ ကနဦးစျေးဦးပေါက်အနေဖြင့် နေပြည်တော်နှင့်အနီးဆုံး၊ အမြန်ဆုံးဖြုတ်လို့ရမည့် ပုဗ္ပသီရိမြို့၊ ညစျေးအနီးပန်းခြံရှိ ဗိုလ်ချုပ်ရုပ်ထုကို မိုးထဲရေထဲမှာပင် တက်ညီလက်ညီ စတင်ဖြုတ်ယူလိုက်သည်။ ၎င်းကို ပုလဲမြို့စစ်ဆင်ရေးကို ပို့ဆောင်မည်ဟု စစ်ဗိုလ်ချုပ်များ လျာထားသည်။

နေပြည်တော်က ဗိုလ်ချုပ်ရုပ်ထုကြီး ဖြုတ်ယူခံရသည်ဟု သတင်းများဖော်ပြခံရသောကြောင့် ဝိုင်းဝန်းဆဲဆိုခံနေရသဖြင့် မေ့မေ့လျော့လျော့ဖြစ်အောင် ခေါင်းဆောင်ကြီးများ ခေတ္တရပ်လိုက်သည်။ သို့သော် စစ်ဆင်ရေးများမှာ အရေးကြီးနေပြီ။ နောက်ထပ် ရုပ်ထုတခုကို အမြန်ရွေးချယ်ရမည်ဖြစ်သည်။ နောက်ထပ်ပစ်မှတ်က ပဲခူးမြို့ ဗိုလ်ချုပ်ရုပ်ထု ။

မြို့လယ်ခေါင်လူစည်ကားရာဖြစ်၍ ညအမှောင်ထုကိုအားယူကာ စစ်သားများ ပဲခူးမြို့တွင်ကို ဖောကားကြီးဖြင့် တရွေ့ရွေ့ဝင်ရောက်လာသည်။ ည ၉ နာရီတွင် ပဲခူးမြို့ကို လျှပ်စစ်မီးဖြတ်တောက်လိုက်သည်။ “ ၃ နာရီအချိန်ရမယ် အပြီးလုပ်” ဗိုလ်တဦး၏ အမိန့်သံ။ ည ၁၂ နာရီခန့်တွင် ပဲခူးမြို့ မြင်းစီးရုပ်ထုက မြင်းရုပ်ထုရော ဗိုလ်ချုပ်ရုပ်ထုပါ ဖြုတ်ယူနိုင်ခဲ့သည်။ ဒုတိယအော်ပရေးရှင်း အောင်မြင်ပြီ။ ထို့နောက် လျှပ်စစ်မီး ပြန်လွှတ်ပေးလိုက်သည်။ ဗိုလ်ချုပ်ရုပ်နှင့်မြင်းရုပ် မရှိတော့သည်မှလွဲ၍ ကျန်တာအားလုံး ပိပိရိရိ ။

ရက်သတ္တပတ်ခန့်ကြာပြီးနောက် လူစည်ကားရာ ပြည်မြို့လယ်ခေါင်အဝိုင်းပတ်ရှိ မြင်းရုပ်ထုကြီးပေါ်က ဗိုလ်ချုပ်အောင်ဆန်း ရုတ်တရက် အသက်ဝင်လာကာ မြို့တွင်းရပ်ကွက်နေအိမ်များသို့ သွားရောက်ပြီး သူ့ကို ဝှက်ထားပေးဖို့ တအိမ်တက်ဆင်း အကူအညီ တောင်းခံနေသည်။

၎င်းတည်ထောင်ထားသည့်စစ်တပ်၏ လက်ရှိခေါင်းဆောင်ကြီးများက ညသန်းခေါင် မီးဖြတ်ပြီး မြို့လယ်ခေါင်ရှိ သူ့ရုပ်ထုများအား ပေါ်တာဆွဲနေသည်ဟု သတင်းများကြားပြီးနောက် ရုပ်ထုအဖြစ်နှင့် မြင်းပေါ် မနေရဲတော့ဘဲ ယခုလို ထွက်ပြေးခြင်းဖြစ်သည်။

ရပ်ကွက်နေပြည်သူများက အကူအညီလာတောင်းသည့် ဗိုလ်ချုပ်အား “ ဗိုလ်ချုပ် ၊ ဗိုလ်ချုပ် ဘာလို့ မြင်းပေါ် ကနေဆင်းပြီး လာပုန်းနေတာလဲ” ဟု မေးရာ “ ငါလည်း နှစ်အကြာကြီး မြင်းပေါ်ကမဆင်းရတာ ညောင်းလာလို့ အဲ မဟုတ်ဘူး ဒကစ က ပေါ်တာလာဆွဲမှာ ကြောက်လို့“ ဟု ဗိုလ်ချုပ် ပြန်ဖြေသည်။

သို့သော် ပြည်သူများမှ “ ပြီးခဲ့တဲ့လ ၁၉ ရက် ဗိုလ်ချုပ်တို့ကျဆုံးခဲ့တဲ့ အာဇာနည်နေ့ကမှ ခေါင်းဆောင်ကြီးက ဗိုလ်ချုပ် အောင်ဆန်း ဟာ တပ်မတော်ရဲ့ ဖခင်ကြီးဖြစ်ကြောင်း၊ ဗိုလ်ချုပ်ရဲ့အမွေအနှစ်တွေကို စနစ်တကျနဲ့ ထိန်းသိမ်းဖို့လိုကြောင်း” ပြောဆိုခဲ့တယ်ဆိုကာ ဗိုလ်ချုပ်ကို စောဒကတက်သည်။

စစ်ခေါင်းဆောင်ကြီးများ၏ ရှေ့တမျိုး ကွယ်ရာတမျိုး၊ အပြောတမျိုး အလုပ်တမျိုး အမျိုးမျိုးလုပ်ဆောင်လေ့ရှိသည်ကို မေ့လျော့နေသော ပြည်သူများ၏ စောဒကတက်မှုကို ဗိုလ်ချုပ်မဖြေရှင်းတော့။

ဆက်လက်ပြီး စိတ်ဘဝင်မကျသေးသည့် ပြည်သူများက “ စစ်တပ်က လူငယ်တွေကိုသာ ပေါ်တာဆွဲတာ ဖြစ်ကြောင်း၊ ဗိုလ်ချုပ်တို့လို လူကြီးတွေကို ပေါ်တာမဆွဲတာမလို့ ကြောက်စရာမလိုကြောင်း ” ဗိုလ်ချုပ်ကို ပြော၏။

စစ်ခေါင်းဆောင်ကြီးများ၏ စစ်ဆင်ရေးယတြာများကို သိရှိထားသည့် ဗိုလ်ချုပ်က ၎င်းကို ပေါ်တာဆွဲကာ ရှေ့တန်းမှာ စစ်တိုက်ခိုင်းမည့် အစီအမံကို ပြည်သူများထံ ရှင်းပြသည်။

ဗိုလ်ချုပ်ရှင်းပြချက်အား အနည်းငယ်မကျေနပ်သေးသည့် မြို့ခံတချို့က“ မြန်မာပြည်မှာ ဗိုလ်ချုပ်ရုပ်ထုရှိတဲ့ မြို့တွေ အများကြီးရှိသေးကြောင်း၊ ဗိုလ်ချုပ်က ဘာကြောင့် ပြေးနေရသနည်း “ ဟု ထပ်မေးသည်။

ဗိုလ်ချုပ်က “ သူ၏ နောင်လာ၊နောက်သား ခေါင်းဆောင်ကြီးများ၏ယတြာအရ “ပ” အက္ခရာနဲ့ စတဲ့ မြို့တွေက ရုပ်ထုတွေကို ရွေးချယ်ပေါ် တာဆွဲနေတာဖြစ် ကြောင်း၊ ပုပ္ဗသီရိနဲ့ ပဲခူးကရုပ်ထုတွေတော့ အဆွဲခံရလိုက်ရပြီဖြစ်ကြောင်း၊ ပြီးရင် “ ပြည်”ကို လှည့်လာနိုင်ကြောင်း “ရှင်းပြသည့်အခါမှ ပြည်သူများ လက်ခံသွားသည်။

ဗိုလ်ချုပ်စိုးရိမ်ချက်ကို နားလည်သွားသည့် ပြည်သူများက “ ဟာ ဒီလိုဆို ဗိုလ်ချုပ် ကျနော်တို့လည်း လက်မခံရဲဘူး၊ နောက်ပြီး မြို့တွင်းထဲမှာတင် ပုန်းတာ မလုံခြုံနိုင်ဘူး၊ တခြားမြို့ကို ပြေးတာကောင်းမယ်” ဟု ဝိုင်းဝန်းအကြံပြုသည်။

ထိုအကြံပြုချက်ကို ဗိုလ်ချုပ်လက်ခံလိုက်သည်။ သို့သော် သတင်းလုံခြုံရေးအရ ဘယ်မြို့ကို ပြေးမည်ဆိုသည်ကို မပြော။

ဗိုလ်ချုပ် ပြည်မြို့မှ ထွက်ခွာရန်ပြင်ဆင်နေချိန် ပြည်နှင့် မလှမ်းမကမ်းရှိ ပေါက်ခေါင်းမြို့က ဗိုလ်ချုပ်ရုပ်ထု ပြည်မြို့ကို ရောက်ရှိလာသည်ကို တွေ့ရှိ၍ မေးမြန်းရာ ၎င်းကဲ့သို့ပင် ပေါ်တာကြောက်၍ ထွက်ပြေးလာခြင်းဖြစ်ကြောင်း ရှင်းပြသည်။

အဖော်ရသွားသော ပြည်မြို့ဗိုလ်ချုပ်က ဝမ်းသာအားရဖြင့် ပေါက်ခေါင်းဗိုလ်ချုပ် လက်ကိုဆွဲ၍ ပြည်ဘူတာသို့သွားကာ ရထားစီးပြီး ပြည်မြို့မှ စတင်ထွက်ခွာလာသည်။ ဗိုလ်ချုပ် ၂ ဦးစလုံး စိတ်ထဲမှာတော့ စိုးရိမ်စိတ်အပြည့်ဖြင့်။

သို့သော် မထင်မှတ်ထားသည်နှင့်ကြုံလိုက်ရသည် ။ ၂ ဦးစလုံး စိုးရိမ်နေသည့် အတိုင်းပင် ဖြစ်လာသည်။

ဖြစ်စဥ်မှာ ဖြုတ်ယူလာသည့် ပေါင်းတည်မြို့ကဗိုလ်ချုပ်ရုပ်ထုကို စစ်ကော်မရှင်တပ်များက နေပြည်တော်သို့ပို့ဆောင်ရန် ပေါင်းတည်ဘူတာသို့ရောက်ရှိလာချိန် ၎င်းတို့ ၂ ဦးကိုပါတွေ့ရှိ၍ ပေါ်တာဆွဲဖမ်းဆီးခံလိုက်ရပြီး ပေါင်းတည်ဗိုလ်ချုပ်နှင့်အတူ စစ်ခေါင်းဆောင်ကြီးများရှိရာ နေပြည်တော်သို့ရောပြီး ပို့ဆောင်ခံလိုက်ရပါတော့သည်။

၁၁ လ အကြာက 1 comment 287 views

ကစထမှူးဆင်းမတိုက်ရဲတဲ့ ရခိုင်စစ်မြေပြင် (ရုပ်သံဆောင်းပါး)

by ဟိန်းစံ ၁၁ လ အကြာက

written by ဟိန်းစံ

မြေလတ်အသံ၊ ဇူလိုင် ၃၁၊ ၂၀၂၅။

ညီနောင်မဟာမိတ် ၃ ဖွဲ့ဖြစ်တဲ့ မြန်မာအမျိုးသားဒီမိုကရေစီမဟာမိတ်တပ်(ကိုးကန့်) MNDAA၊ တအာဝ်းအမျိုးသားလွတ်မြောက်ရေးတပ် TNLA၊ အာရက္ခတပ်တော် AA နဲ့ ပူးပေါင်းတပ်ဖွဲ့တွေရဲ့ ၂၀၂၃ အောက်တိုဘာလမှာ စတင်ခဲ့တဲ့ ၁၀၂၇ စစ်ဆင်ရေးတွေမှာ စစ်ကောင်စီတပ်တိုင်းစစ်ဌာနချုပ် ၁၄ ခုအနက် လားရှိုးအခြေစိုက် အရှေ့မြောက်တိုင်းစစ်ဌာနချုပ် (ရမခ) နဲ့ အမ်းမြို့အခြေစိုက် အနောက်ပိုင်းတိုင်းစစ်ဌာနချုပ် (နပခ) တို့ဟာ ၂၀၂၄ အတွင်း ၃ လသာခြားကာ ရှေ့ဆင့်နောက်ဆင့် ကျရှုံးခဲ့ပါတယ်။

အဲ့ဒီကျရှုံးမှုတွေမှာ ရမခတိုင်းမှူးအပါ စစ်တိုင်းမှူး၊ ဒုတိုင်းမှူး၊ တိုင်းဦးစီးချုပ်၊ ဒကစမှူး၊ တပ်မမှူး၊ စကခမှူး ရာထူးရယူထားသူ ဗိုလ်ချုပ်၊ ဗိုလ်မှူးချုပ် ၃၀ နီးပါးအပါ စစ်ကောင်စီတပ်အရာရှိကြီးအများအပြား သေဆုံး၊ ပျောက်ဆုံးတာနဲ့ စစ်သုံ့ပန်းအဖြစ်အရှင် ဖမ်းဆီးခံရမှုအများအပြားရှိခဲ့ပါတယ်။

၂၀၂၄ ဩဂုတ်လမှာ ရမခ ကျရှုံးခဲ့ပေမယ့် တရုတ်နိုင်ငံရဲ့ဖိအားတွေကြောင့် အခုနှစ်ဧပြီလမှာ လားရှိုးမြို့နဲ့ ရမခစစ်ဌာနချုပ်ကို ကျည်တချက်မဖောက်ရဘဲ စစ်ကောင်စီလက်ထဲ ကိုးကန့်တပ်တွေ ပြန်ပေးခဲ့ရပါတယ်။ လားရှိုးနဲ့ရမခကိုပြန်ရပြီးနောက် စစ်ကောင်စီတပ်က သိမ်းပိုက်ခံထားရတဲ့ ရှမ်းမြောက်ဒေသမြို့တွေကို ပြန်လည်ရယူနိုင်ဖို့ ကြိုးစားလာခဲ့ရာ ရမခနယ်မြေ အစွန်ဖျားဆုံးမြို့ဖြစ်တဲ့ နောင်ချိုမြို့ကို ဇူလိုင်လအတွင်းမှာ တော်လှန်ရေးတပ်ဖွဲ့တွေလက်ထဲက ပြန်လည်ရယူနိုင်ခဲ့ပါတယ်။

အဲ့ဒီနောင်ချိုတိုက်ပွဲတွေမှာ နေပြည်တော်စစ်ရုံးချုပ်က စစ်ဆင်ရေးအထူးအဖွဲ့မှူး ခေါ် ကစထမှူး ဒုတိယ ဗိုလ်ချုပ်ကြီး နိုင်နိုင်ဦး အနီးကပ်စစ်မြေပြင်အထိ လိုက်ပါကွပ်ကဲတာကြောင့် အောင်ပွဲတွေရရှိတာလို့ စစ်တပ်ထောက်ခံသူတွေအကြား အဲ့ဒီကစထမှူးကို တခုတ်တရ ဘုန်းတော်ဘွဲ့ ရေးသားနေကြတာကိုလည်း တွေ့ရပါတယ်။

ဒါပေမယ့် ရမခနဲ့ ၃ လသာခြားပြီးကျရှုံးခဲ့တဲ့ အမ်းမြို့ နပခနဲ့ ရခိုင်ပြည်နယ်မှာတော့ စစ်ကောင်စီတပ်က စစ်ရေးအရ ဆက်လက်အရေးနိမ့်နေပေမယ့် ရှမ်းမြောက်ဒေသမှာ တိုက်ခိုက်နေသလို နေပြည်တော်က စစ်ဗိုလ်ချုပ်ကြီးတွေတဦးမှ စစ်မြေပြင်ဆင်းတိုက်တာမတွေ့ရတဲ့ အခြေအနေတွေကို တင်ဆက်ပေးထားပါတယ်။

၁၁ လ အကြာက 0 comments 11 views

ဆောင်းပါး အတွေးအမြင်

ကစထမှူး ဆင်းမတိုက်ရဲတဲ့ ရခိုင်စစ်မြေပြင် (အတွေးအမြင်)

by ဟိန်းစံ ၁၁ လ အကြာက

written by ဟိန်းစံ

မြေလတ်အသံ၊ ဇူလိုင် ၂၈၊ ၂၀၂၅။

ဒရုန်းနဲ့ဗုံးချဖို့ Controller Screen ကြည့်ပြီး နေရာရှာနေတဲ့ စစ်တက္ကသိုလ်ဘက်တံဆိပ်ပါ စစ်ကောင်စီတပ်သား ၁ ဦးနဲ့ အမြောက်တပ်ဖွဲ့ဘက်တံဆိပ်ပါ ဗိုလ်ကြီး ၁ ဦးရဲ့ အနောက်မှာ ဒုတိယဗိုလ်ချုပ်ကြီး ၁ ဦး ကြပ်မတ်ကွပ်ကဲနေတဲ့ဓာတ်ပုံဟာ ပြီးခဲ့တဲ့ရက်သတ္တပတ်အတွင်း လူမှုကွန်ယက်မှာပျံ့နှံ့လာခဲ့ပြီး စစ်တပ်ထောက်ခံသူတွေအကြားမှာလည်း တခုတ်တရ ချီးကျူးရေးသားဖော်ပြနေကြပါတယ်။

ဓာတ်ပုံပါဗိုလ်ချုပ်ကြီးဟာ စစ်ကောင်စီတပ်ရဲ့အဆင့်မြင့်ဆုံးဌာနချုပ်ဖြစ်တဲ့ နေပြည်တော်၊ ကာကွယ်ရေးဦးစီးချုပ်ရုံး(ကြည်း) စစ်ဆင်ရေးဌာန၊ အမှတ် ၂ စစ်ဆင်ရေးအထူးအဖွဲ့(ကစထ ၂)မှူး ဒုတိယဗိုလ်ချုပ်ကြီး နိုင်နိုင်ဦး ပါ ။

ကြည်းတပ် စစ်အင်္ဂါစဥ်အရ ကာကွယ်ရေးဦးစီးချုပ်ရုံး(ကြည်း)မှာ စစ်ခေါင်းဆောင် ၂ ဦး၊ ညှိနှိုင်းကွပ်ကဲရေးမှူး(ကြည်း၊ရေ၊လေ)လို့ခေါ်တဲ့ ညှိ/ကွပ်နဲ့ စစ်ဦးစီးအရာရှိချုပ် (ကြည်း) ရာထူးတွေပြီးရင် ကစထမှူးတွေဟာ ကြည်းတပ်နံပါတ် ၅ ဒုတိယဗိုလ်ချုပ်ကြီးတွေပါ။ နေပြည်တော် စစ်ရုံးချုပ်မှာ ကစထ ၁ ကနေ ၆ အထိ ရှိပြီး နိုင်ငံတဝှမ်းက စစ်တိုင်း ၁၄ ခုကို ကစထ ၆ ခု က ခွဲပြီး ကွပ်ကဲတာဖြစ်ပါတယ်။

ဒုတိယဗိုလ်ချုပ်ကြီး နိုင်နိုင်ဦး ဟာ စစ်တက္ကသိုလ်အပတ်စဥ် ၃၅ က ဖြစ်ပြီး ၁၀၂၇ စစ်ဆင်ရေးပထမလှိုင်းကာလ၊ လောက်ကိုင်ဒေသအပါ ရှမ်းပြည်နယ်မြောက်ပိုင်းက မြို့ နယ်အများအပြားကို လက်လွှတ်ရချိန်မှာ ရှမ်းမြောက်ကိုတာဝန်ယူရတဲ့ အရှေ့မြောက်တိုင်းစစ်ဌာနချုပ်(ရမခ)ရဲ့ စစ်ရှုံးတိုင်းမှူးပါ။ အဲ့ဒီလို ရှမ်းမြောက်မှာ စစ်ရှုံးခဲ့ပေမယ့် သူ့ကို စစ်ခေါင်းဆောင်က ၂၀၂၄ ဖေဖော်ဝါရီလမှာ ကစထမှူးအဖြစ် ရာထူးတိုးပေးပြီး နေပြည်တော်ကို ခေါ်ဆောင်ခဲ့တာပါ။

ပြီးခဲ့တဲ့ဇူလိုင်တတိယအပတ်ထဲမှာ တအာဝ်းအမျိုးသားလွတ်မြောက်ရေးတပ်- TNLA ပူးပေါင်းတပ်ဖွဲ့တွေ ထိန်းချုပ်ထားတဲ့ နောင်ချိုမြို့ကို စစ်ကောင်စီက ပြန်လည်သိမ်းယူနိုင်ခဲ့ပြီးနောက် တောင်ခမ်းမှသည် နောင်ချိုမြို့အထိ ကစထမှူးဦးစီးပြီး အနီးကပ်တိုက်ပွဲဝင်ခဲ့တာကြောင့် ရယူခဲ့နိုင်တာဖြစ်ကြောင်း စစ်တပ်ထောက်ခံသူတွေအကြား ဝေဝေဆာဆာ အောင်ပွဲခံရေးသားရာမှာ အဲ့ဒီဓာတ်ပုံကို အမြဲလိုတွဲဖက် ဖော်ပြကြတာပါ။

အမှတ် ၂ စစ်ဆင်ရေးအထူးအဖွဲ့(ကစထ ၂)ဟာ ရှမ်းပြည်နယ်အတွင်း တိုင်းစစ်ဌာနချုပ် ၄ ခု ဖြစ်တဲ့ လားရှိုးအခြေစိုက် အရှေ့မြောက်တိုင်းစစ်ဌာနချုပ်(ရမခ)၊ တောင်ကြီးအခြေစိုက် အရှေ့ပိုင်းတိုင်းစစ်ဌာနချုပ်(ရပခ)၊ ကျိုင်းတုံအခြေစိုက် တြိဂံဒေသတိုင်းစစ်ဌာနချုပ်(တသခ)နဲ့ ခိုလမ်အခြေစိုက် အရှေ့အလယ်ပိုင်းတိုင်းစစ်ဌာနချုပ်(ရလခ) နယ်မြေစစ်ဆင်ရေးတွေကို တိုင်းမှူးတွေရဲ့ အထက်ကနေကွပ်ကဲရတာဖြစ်ပြီး လိုအပ်ချက်အရ နေပြည်တော်က ကစထမှူးတွေဟာ အနီးဆုံးတိုင်းစစ်ဌာနချုပ်ကိုလာရောက်ပြီး စစ်ဆင်ရေးတွေကို ညွှန်ကြားလေ့ရှိပေမယ့် စစ်မြေပြင်အထိဆင်းပြီး ကွပ်ကဲမှုတွေလုပ်ဆောင်တာ စစ်ကောင်စီသက်တမ်းတလျှောက် မရှိခဲ့ပါဘူး။

ပြီးခဲ့တဲ့ ၂၀၂၄ အတွင်း ကရင်ပြည်နယ်စစ်ဆင်ရေးတွေမှာ အောင်ဇေယျစစ်ကြောင်း စတင်ထိုးစစ်ဆင်ချိန် ဒုတပ်ချုပ် ဒုဗိုလ်ချုပ်မှူးကြီး စိုးဝင်း ကိုယ်တိုင် ဦးစီးတယ်လို့ပြောဆိုချက်တွေရှိပေမယ့် မော်လမြိုင်အခြေစိုက် အရှေ့တောင်တိုင်းစစ်ဌာနချုပ်(ရတခ)မှာသာ ကစထ ၄ မှူး ဒုတိယဗိုလ်ချုပ်ကြီး ညွန့်ဝင်းဆွေနဲ့အတူ ရက်အနည်းငယ်နေထိုင်ကွပ်ကဲသွားတာလောက်ကိုသာ စစ်ကောင်စီသတင်းရုပ်သံတွေမှာ တွေ့ရပါတယ်။

အလားတူ နွေဦးတော်လှန်ရေးအစောပိုင်း ၂၀၂၁ နှစ်ကုန်နဲ့ ၂၀၂၂ ကာလတွေမှာ အနောက်မြောက်တိုင်းစစ်ဌာနချုပ်(နမခ)နယ်မြေ စစ်ကိုင်းတိုင်းနဲ့ ချင်းပြည်နယ်က ပြည်သူ့ကာကွယ်ရေးတပ်ဖွဲ့တွေကို နှိမ်နင်းဖို့ဆိုကာ အလောင်းမင်းတရားစစ်ဆင်ရေးအမည်နဲ့ မြေပြင်အင်အားအများအပြားသုံးပြီး တိုက်ခိုက်ရာမှာ အဲ့ဒီကာလက ကစထ ၆ မှူးနဲ့ ရဲချုပ်တာဝန်ယူထားသူ ဒုတိယဗိုလ်ချုပ်ကြီး သန်းလှိုင်က မုံရွာ(နမခ)ကနေ ကွပ်ကဲခဲ့တာဖြစ်ပါတယ်။ စစ်ဆင်ရေးတွေမအောင်မြင်တာကြောင့် ၂၀၂၂ ထဲမှာပဲ ဒုတိယဗိုလ်ချုပ်ကြီး သန်းလှိုင် ကို စစ်ကောင်စီက အနားပေးခဲ့ပါတယ်။

၁၀၂၇ စစ်ဆင်ရေးဒုတိယလှိုင်း လားရှိုးရမခနဲ့အတူ ရှမ်းမြောက်ဒေသအများစုကို ညီနောင်မဟာမိတ် MNDAA နဲ့ TNLA ပူးပေါင်းတပ်တွေ သိမ်းပိုက်ပြီးနောက်ပိုင်း ပြင်ဦးလွင်မြို့အနီးအထိ တိုက်ပွဲတွေရောက်ရှိလာခဲ့လို့ ပြင်ဦးလွင်နဲ့ နောင်ချိုအကြား တောင်ခမ်းဒေသမှာ နှစ်ဖက်တိုက်ပွဲတွေ အပြင်းအထန်ဆက်လက်ဖြစ်ပွားခဲ့တာဖြစ်ပါတယ်။

ပြီးခဲ့တဲ့ ဧပြီလနောက်ဆုံးအပတ်က အရှေ့မြောက်တိုင်းစစ်ဌာနချုပ်နဲ့ လားရှိုးမြို့ကို တရုတ်အကူအညီနဲ့ ပြန်လည်ထိန်းချုပ်နိုင်ခဲ့တဲ့ စစ်ကောင်စီတပ်က ၎င်းတို့ရဲ့ဒုတိယခြေလှမ်းအဖြစ် တော်လှန်ရေးတပ်တွေသိမ်းပိုက်ထားတဲ့မြို့တွေအနက် ရမခနယ်မြေရဲ့ အစွန်ဖျားဆုံးမြို့ဖြစ်တဲ့ နောင်ချိုကိုပြန်ရဖို့ ကစထမှူးကို ဦးစီးခိုင်းပြီး အပြင်းအထန် ထိုးစစ်ဆင်စေခဲ့တာပါ။

အဲ့ဒီရက်သတ္တပတ်ထဲမှာပဲ ကစထမှူး ဒုတိယဗိုလ်ချုပ်ကြီး နိုင်နိုင်ဦး ဦးစီးတဲ့ စစ်ကောင်စီတပ်ဖွဲ့တွေ နောင်ချိုမြို့ကို ပြန်လည်ထိန်းချုပ်နိုင်ခဲ့ပြီးနောက် ဒုစစ်ခေါင်းဆောင် ဒုတိယဗိုလ်ချုပ်မှူးကြီး စိုးဝင်း ရောက်လာပြီး တိုက်ပွဲမှာ ပါဝင်ခဲ့တဲ့ စစ်ကောင်စီတပ်သားတွေကို အဆင့်/ရာထူးတွေ တိုးမြှင့်ပေးခဲ့ပါတယ်။

ကစထ ၂ လက်အောက် ရပခ စစ်ဆင်ရေးနယ်မြေဖြစ်တဲ့ ရှမ်းပြည်နယ်(တောင်ပိုင်း)၊ မိုးဗြဲမြို့ကိုလည်း စစ်ကောင်စီတပ်က နောင်ချိုမြို့နဲ့ရှေ့ဆင့်နောက်ဆင့် ထိန်းချုပ်နိုင်ခဲ့ပြီး မိုးဗြဲမြို့ကို ဒုဗိုလ်ချုပ်ကြီး နိုင်နိုင်ဦး ဇူလိုင်တတိယအပတ်ထဲမှာသွားရောက်ခဲ့ကြောင်း စစ်ကောင်စီသတင်းရုပ်သံတွေမှာ ဖော်ပြထားတာတွေ့ရပေမယ့် မိုးဗြဲတိုက်ပွဲတွေကို နောင်ချိုလိုတော့ အနီးကပ်ကွပ်ကဲခဲ့ဟန် မတူပါဘူး။

နောင်ချိုမြို့ဟာ စစ်တပ်မြို့လို့ခေါ်ဆိုရတဲ့အထိ စစ်ကောင်စီတပ်ရင်းနဲ့အင်အားအများအပြားရှိတဲ့ ပြင်ဦးလွင်မြိုနဲ့ ကပ်လျက်တည်ရှိနေတာဖြစ်သလို ပြင်ဦးလွင်မြို့ဟာ အလယ်ပိုင်းတိုင်းစစ်ဌာနချုပ်(လပခ) လက်အောက်မှာ ရှိတာကြောင့် လပခနဲ့ ရမခ ထိစပ်နေတဲ့မြို့နယ်တွေလည်း ဖြစ်ပါတယ်။

စစ်တက္ကသိုလ် ၂ ခု၊ အခြားလေ့ကျင့်ရေးသင်တန်းကျောင်းနဲ့ တပ်ရင်း/တပ်ဖွဲ့အများအပြား အခြေစိုက်ထားတဲ့ ပြင်ဦးလွင်မှာ တပ်နယ်မှူးတာဝန်ကို စစ်တက္ကသိုလ်ကျောင်းအုပ်ကြီးက တွဲဖက်ယူထားပြီး စစ်တက္ကသိုလ် ဒုကျောင်းအုပ်ကြီး၊ စစ်နည်းပညာတက္ကသိုလ်(တနတ)ကျောင်းအုပ်ကြီး၊ အမှတ် ၁ ကုတင် ၇၀၀ စစ်ဆေးရုံအုပ် စတဲ့ ဗိုလ်မှူးချုပ်အဆင့်တွေအပါ စစ်အင်အားအများအပြားကိုကွပ်ကဲရကာ တပ်နယ်မှူးက လပခတိုင်းမှူးနဲ့တန်းတူ ဗိုလ်ချုပ်အဆင့်ပါ။

အဲ့ဒီလို စစ်အင်အားသောင်းချီရှိပြီး လက်နက်၊ခဲယမ်းတောင့်တင်းတဲ့အပြင် မြေပြင်၊ဝေဟင်ကနေပါ စစ်ကူ၊ ပစ်ကူပေးနိုင်တဲ့ ပြင်ဦးလွင်မြို့ကိုနောက်ခံထားကာ နောင်ချိုဒေသကို ပြန်လည်တိုက်ခိုက်ရတာဟာ ဒုတိယဗိုလ်ချုပ်ကြီး နိုင်နိုင်ဦးအတွက် သက်တောင့်သက်သာရှိခဲ့ပြီး အုပ်ချုပ်ထောက်ပံ့မှုကောင်းကောင်းမွန်မွန်ရခဲ့ပါတယ်။

ဒါ့ကြောင့်လည်း နောင်ချိုမြို့ကို ပြန်လည်ရယူနိုင်ခဲ့တာဖြစ်ကြောင်း CDM တပ်မတော်သားတွေက သုံးသပ်ပါတယ်။

ဒါပေမယ့်စစ်ကောင်စီ နောက်ထပ်ကျရှုံးထားတဲ့တိုင်းစစ်ဌာနချုပ်တခုဖြစ်တဲ့ အမ်းမြို့၊ အနောက်ပိုင်းတိုင်းစစ်ဌာနချုပ်(နပခ)နဲ့ ရခိုင်စစ်မျက်နှာမှာတော့ စစ်ခေါင်းဆောင်တွေကို မတွေ့ရဘဲ ငြိမ်သက်နေပါတယ်။

အမ်းအခြေစိုက် အနောက်ပိုင်းတိုင်းစစ်ဌာနချုပ်(နပခ)နဲ့ ရခိုင်ပြည်နယ်က စစ်ဆင်ရေးတွေကို အမှတ် ၃ စစ်ဆင်ရေးအထူးအဖွဲ့ (ကစထ ၃) က တာဝန်ယူရကာ ကစထမှူးက ဒုတိယဗိုလ်ချုပ်ကြီး တေဇကျော် ပါ။ ကစထ ၃ က အမ်း နပခ နဲ့ ပဲခူးတိုင်း၊ တောင်ငူအခြေစိုက် တောင်ပိုင်းတိုင်းစစ်ဌာနချုပ် တပခ ကို ကွပ်ကဲရတာပါ။

နပခတိုင်းစစ်ဌာနချုပ်နဲ့ အမ်းမြို့ပေါ်တပ်ရင်းအားလုံးကို အာရက္ခတပ်တော်-AA က ပြီးခဲ့တဲ့ ၂၀၂၄ နှစ်ကုန်ပိုင်းမှာ တိုက်ခိုက်သိမ်းပိုက်ခဲ့ပြီး အဲ့ဒီနပခကိုသိမ်းပိုက်ခဲ့တဲ့တိုက်ပွဲတွေမှာ နပခ ဒုတိုင်းမှူး ဗိုလ်မှူးချုပ် သောင်းထွန်းနဲ့ တိုင်းဦးစီးချုပ် ဗိုလ်မှူးချုပ် ကျော်ကျော်သန်းအပါ စစ်ကောင်စီတပ်အရာရှိကြီးအများအပြား စစ်သုံ့ပန်း အဖြစ် ဖမ်းဆီးခံခဲ့ရပါတယ်။

လက်ရှိရခိုင်ပြည်နယ်မှာ ဒေသကွပ်ကဲမှုစစ်ဌာနချုပ်(ဒကစ)အခြေစိုက်ထားတဲ့ စစ်တွေ၊ တရုတ်စီမံကိန်းတွေနဲ့ ရေတပ်စခန်းဌာနချုပ်တည်ရှိတဲ့ ကျောက်ဖြူနဲ့မာန်အောင်မြို့တွေကိုသာ စစ်ကောင်စီက ထိန်းချုပ်ထားနိုင်ပြီး ကျောက်ဖြူမြို့နဲ့ ဓညဝတီရေတပ်စခန်းတွေအနီးမှာလည်း တိုက်ပွဲတွေဆက်ဖြစ်နေတာပါ။

နပခတိုင်းစစ်ဌာနချုပ်ကျရှုံးခဲ့တာအပြင် ရခိုင်ပြည်နယ် မြို့ ၃ ခုသာ ထိန်းချုပ်နိုင်တော့တဲ့ စစ်ကောင်စီဟာ နပခ ကျရှုံးပြီး ၇ လကျော်ကြာလာတဲ့အထိ ရခိုင်ပြည်နယ်စစ်ဆင်ရေးတွေမှာ ပြန်လည်ခေါင်းထောင်လာနိုင်တာမျိုးမရှိပါဘူး။

ဒါ့အပြင် ရခိုင်ပြည်နယ်ကိုဝင်တဲ့ ပန်းတောင်း-တောင်ကုတ်လမ်းနဲ့ အမ်း-ပဒါန်းလမ်းပိုင်းတွေမှာ ရခိုင်နဲ့ ပဲခူးတိုင်း၊ မကွေးတိုင်းအစပ် စစ်ကောင်စီစခန်းတွေကို အာရက္ခတပ်တော်-AA က သိမ်းပိုက်ထားတဲ့အပြင် ပန်းတောင်းနယ်နဲ့ ငဖဲနယ်အတွင်းက စစ်ကောင်စီစခန်းတွေကို ဆက်လက်တိုက်ခိုက်နေတာကြောင့် အဲ့ဒီနယ်မြေတွေအထိ တိုက်ပွဲတွေဖြစ်ပွားနေတာပါ။

ရခိုင်ပြည်နယ်ရဲ့လက်ကျန် ၃ မြို့ထဲက စစ်တွေမြို့ဟာ ဒေသကွပ်ကဲမှုစစ်ဌာနချုပ်(ဒကစ) တည်ရှိတဲ့ စစ်တပ်တပ်ရင်းတွေအများဆုံးကျန်ရှိတဲ့မြို့ဖြစ်ပြီး စစ်ခေါင်းဆောင်တွေက အဲ့ဒီစစ်တွေမြို့ကနေ ကစထမှူးတဦး ဦးစီးပြီး ရခိုင်ပြည်နယ်ကို ပြန်လည်ထိုးစစ်ဆင်လာမလား စောင့်ကြည့်ရမှာပါ။

ရမခနဲ့ ရှမ်းမြောက်ဒေသကို ကျရှုံးခဲ့သလိုမျိုး နပခနဲ့ရခိုင်ပြည်နယ်ကို ကျရှုံးနေတဲ့စစ်ကောင်စီတပ်က ခေါင်းဆောင်တွေဟာ ရခိုင်ပြည်နယ်ကိုတော့ သက်ဆိုင်ရာ ကစထမှူးအပါ တခြားစစ်ခေါင်းဆောင်တွေနဲ့ လက်ရှိအထိ ပြန်လည်ဦးဆောင်တိုက်ခိုက်လာတာမျိုး မတွေ့ရတဲ့အပေါ် ရခိုင်ပြည်နယ်စစ်ဆင်ရေးတွေမှာ တာဝန်ထမ်းဆောင်ခဲ့တဲ့ CDM တပ်မတော်သား ဗိုလ်ကြီး ဇင်ယော်က အခုလိုပြောပါတယ်။

“ နောင်ချိုက ပြင်ဦးလွင်အခံနဲ့ ပြန်တိုက်တာဆိုတော့ သူတို့နယ်မြေအရ အသာစီးရနေသေးတာကြောင့် အောက်ခြေကိုလည်း မိုတီ (စိတ်ဓာတ်မြှင့်ပေး) ပေးတဲ့အနေနဲ့ နိုင်နိုင်ဦးကို ထုတ်သုံးပြီး တိုက်တာပေါ့။ သာမန်အခြေအနေမှာတောင် ရခိုင်ကို ကစထမှူးက လာခဲတယ်။ ရခိုင်မှာတိုက်ပွဲတွေမဖြစ်ခင် မင်းအောင်လှိုင် ခရီးစဥ်လောက်ရှိမှ လာတာ။ အခုလို အခြေအနေမှာ ကစထမှူးဆင်းတိုက်ခိုင်းလို့ သူပါ အဖမ်းခံရတာ ဖြစ်ဖြစ်၊ သေတာဖြစ်ဖြစ်ဆို ဗိုလ်ချုပ်ကြီးအဆင့်အထိ စံချိန်တင်သွားရင် ၂ ခါအရှက်ကွဲမှာစိုးလို့” လို့ သူက သုံးသပ်ပြောပါတယ်။

ဒါ့အပြင် ရခိုင်ပြည်နယ်ရဲ့လက်ရှိ ပထဝီမြေပြင်အခြေအနေအရရော စစ်ရေးအခြေအနေအရပါ လက်ကျန်မြို့တွေ ဆက်လက်မဆုံးရှုံးစေရေးကိုသာ အာရုံစိုက်နေရပြီး ထိုးစစ်ပြန်လည်စတင်နိုင်မယ့် အခြေအနေမရှိဘူးလို့ CDM ဗိုလ်ကြီး ဇင်ယော်က ပြောပါတယ်။

၂၀၂၃ အောက်တိုဘာလက စတင်ခဲ့တဲ့ ၁၀၂၇ စစ်ဆင်ရေး ရှမ်းမြောက်၊ မန္တလေးနဲ့ ရခိုင်ဒေသတိုက်ပွဲတွေမှာ စစ်ကောင်စီတပ်ရဲ့ စစ်တိုင်းမှူး၊ ဒုတိုင်းမှူး၊ တိုင်းဦးစီးချုပ် ၊ ဒကစမှူး၊ တပ်မမှူး၊ စကခမှူး တာဝန်ယူထားသူ ဗိုလ်ချုပ်၊ ဗိုလ်မှူးချုပ်အဆင့်တွေ သေဆုံး၊ ပျောက်ဆုံးနဲ့ စစ်သုံ့ပန်းအဖြစ်ဖမ်းဆီးခံရမှု ၂၇ ဦးရှိခဲ့ပြီး စစ်ရှုံးတာကြောင့် စစ်ခေါင်းဆောင်တွေရဲ့စစ်ခုံရုံးတင် ထောင်ဒဏ်နဲ့သေဒဏ်တွေချမှတ်ခံရတဲ့ ဗျူဟာမှူး၊တပ်မမှူးတွေလည်း အများအပြားရှိခဲ့တယ်လို့ မြန်မာ့စစ်ဘက်ရေးရာနဲ့လုံခြုံရေးဆိုင်ရာ လေ့လာရေးအဖွဲ့ – MDSI စာရင်းတွေအရ သိရပါတယ်။

၁၁ လ အကြာက 0 comments 219 views

သတင်း

စစ်ဆေးရေးဂိတ်တွေမှာ ဆော့ဖ်ဝဲလ်အသုံးပြုပြီး စစ်ပြေး၊ရဲပြေးတွေကို စီမံချက်နဲ့ ဖမ်းဆီးနေ

by ဟိန်းစံ ၁ နှစ် အကြာက

written by ဟိန်းစံ

မြေလတ်အသံ၊ မတ် ၁၃၊ ၂၀၂၅။

ပဲခူးတိုင်းအတွင်းက စစ်ကောင်စီစစ်ဆေးရေးဂိတ်တွေမှာ မှတ်ပုံတင်နံပါတ်၊ နာမည်ကို ဆော့ဖ်ဝဲလ်မှာ ရိုက်ထည့်ပြီး စစ်ကောင်စီတပ်နဲ့ ရဲတပ်ဖွဲ့ကို စွန့်ခွာထွက်ပြေးလာတဲ့ စစ်ပြေး၊ ရဲပြေးတွေကို ရှာဖွေဖမ်းဆီးနေတယ်လို့ ပဲခူးတိုင်းရဲတပ်ဖွဲ့သတင်းရင်းမြစ်တွေထံက သိရပါတယ်။

မတ်လဒုတိယပတ်အတွင်းကစတင်ကာ အထက်ပါအတိုင်းဖမ်းဆီးနေတာဖြစ်ပြီး ဆော့ဖ်ဝဲလ်အသုံးပြုဖမ်းဆီးဖို့ စစ်ကောင်စီတပ်နဲ့ရဲပူးပေါင်းတပ်ဖွဲ့တွေ ထပ်မံပို့ဆောင်ထားတယ်လို့ ဆိုပါတယ်။

“ အဲ့ဒီလိုဖမ်းဆီးဖို့ စစ်ဆေးရေးဂိတ်တွေမှာTablet နဲ့ ဂိတ်ကြီးရင် ၃/၄ ယောက်၊ ဂိတ်သေးရင် ၁ ယောက် အဲ့ဒီလို သပ်သပ်ချပေးထားတယ်။ စစ်ပြေး၊ ရဲပြေး အရမ်းများလာလို့ အဲ့ဒီလိုလုပ်တာ။ အရင်လိုမှတ်ပုံတင်ကအလုပ်အကိုင်နေရာမှာ ကျောင်းသားတို့၊ ကုန်သည်တို့ ပြောင်းထားလည်း မရတော့ဘူး၊ လူပုံစံအနေအထားကြည့်ပြီး အဲ့ဆော့ဖ်ဝဲလ်ထဲကို မှတ်ပုံတင်က နာမည်၊ နံပါတ်ရိုက်ထည့်လိုက်တာနဲ့ စစ်ပြေး၊ရဲပြေးဆိုရင် အချက်အလက် အကုန်ပေါ်တယ်။” လို့ ပဲခူးတိုင်းရဲတပ်ဖွဲ့သတင်းရင်းမြစ်က မြေလတ်အသံကို ပြောပါတယ်။

မှတ်ပုံတင်စစ်ဆေးတဲ့ ဆော့ဖ်ဝဲလ်အပြင် စစ်ကောင်စီက ထပ်မံထုတ်ပေးထားတဲ့ စမတ်ကတ်တွေကနေတဆင့်လည်း ဖမ်းဆီးခံရမှုတွေရှိတယ်လို့ ဆိုပါတယ်။

အဆိုပါဆော့ဝဲလ်အသုံးပြုဖမ်းဆီးမှုတွေစတင်ခဲ့တဲ့ မတ်လဒုတိယပတ်အတွင်းမှာတင် ပဲခူးတိုင်းအတွင်းက စစ်ဆေးရေးဂိတ်တွေမှာ ရဲပြေး၊ စစ်ပြေးတွေ အများအပြား ဖမ်းဆီးခံထားရတယ်လို့ သိရပါတယ်။

စစ်ကောင်စီတပ်ကိုစွန့်ခွာလာတဲ့ စစ်ကောင်စီတပ်ဖွဲ့နဲ့ရဲတပ်ဖွဲ့ဝင်တွေအနေနဲ့ ပြန်လည်ဖမ်းဆီးခံရပါက ရှေ့တန်းစစ်မြေပြင်တွေကို ပို့ဆောင်ခံရနိုင်တာကြောင့် စစ်ကောင်စီစိုးမိုးနယ်မြေတွေမှာ မနေကြဖို့ CDM တပ်မတော်သား ဗိုလ်ကြီး ဇင်ယော်က အကြံပြုပါတယ်။

“ မြန်မာပြည်တွင်း စစ်ကောင်စီစိုးမိုးနယ်မြေတွေမှာဆိုရင်တော့ တဂိတ်မဟုတ်တဂိတ်မှာ ပြန်ဖမ်းခံရဖို့များတယ်။ စစ်ဆေးရေးဂိတ်တွေကို ရှောင်နိုင်တဲ့လမ်းတွေကို ရွေးပြီးသွားနိုင်မှ အဆင်ပြေမယ်။” လို့ သူက ပြောပါတယ်။

၁ နှစ် အကြာက 0 comments 48 views

ရုပ်သံ သတင်း

ရွှေစက်တော်ဘုရားဖူးနည်းလို့ စစ်ကောင်စီက စရိတ်ငြိမ်းနေ့စားခနဲ့လူစုပြီး လိုက်ပို့၊ Non -CDM တွေကိုလည်း အလှည့်ကျသွားခိုင်း (ရုပ်/သံ)

by ဟိန်းစံ ၁ နှစ် အကြာက

written by ဟိန်းစံ

ဟိန်းစံ၊ ဒိန်းဂျား

မင်းဘူး ၊ မတ် ၂၂ ၊ ၂၀၂၅ ။

မကွေးတိုင်း၊ မင်းဘူးမြို့နယ်၊ မန်းရွှေစက်တော်ဘုရားပွဲကို စရိတ်ငြိမ်းပို့ဆောင်ပေးမယ်ဆိုကာ မကွေးမြို့ပေါ်ရပ်ကွက်တွေမှာ အုပ်ချုပ်ရေးမှူးတွေက လူလိုက်စုနေပြီး စစ်ကောင်စီလက်အောက်တာဝန်ထမ်းဆောင်ဆဲ Non-CDM နဲ့မိသားစုဝင်တွေကိုလည်း ရွှေစက်တော်ကို အလှည့်ကျသွားရောက်ဖို့ ညွှန်ကြားထားတယ်လို့ မြို့ခံတွေနဲ့ Non-CDM အသိုင်းအဝိုင်းထံက သိရပါတယ်။

မတ် ၁၉ ရက်ကစတင်ကာ ချမ်းမြေ့သာယာ၊ သိင်္ဂါ၊ မြိုဟောင်းရပ်ကွက်တွေအပါအဝင် မကွေးမြို့ပေါ်ရပ်ကွက်တချို့မှာ ရွှေစက်တော်ကိုသွားရောက်ဖို့ ကားခအခမဲ့၊ နေထိုင်စားသောက်စရိတ်ငြိမ်းပို့ဆောင်ပေးမယ့်အပြင် နေ့စားခပါပေးဆောင်မယ်ဆိုကာ ပြောဆိုစည်းရုံးနေတာလို့ ဆိုပါတယ်။

ရပ်ကွက်တွေထဲမှာ လွန်ခဲ့တဲ့ ၂ ရက် ၃ ရက်ကတည်းက လူတွေကို လိုက်စည်းရုံးကာ ကားနဲ့လည်းလိုက်ပို့ပေးမယ်၊ စရိတ်စကလည်း ၅ ထောင်ပေးမယ်ဆိုပြီး ရွှေစက်တော်ကိုအတင်းခေါ်နေပြီး လွန်ခဲ့တဲ့ ၂ ရက်က တဖွဲ့သွားတယ်လို့ မကွေးမြို့ခံအမျိုးသားတဦးက မြေလတ်အသံကို ပြောပါတယ်။

ဒါ့အပြင် မင်းဘူးနဲ့မကွေးခရိုင်ထဲက စစ်ကောင်စီလက်အောက်တာဝန်ထမ်းဆောင်ဆဲ Non-CDM ဝန်ထမ်းတွေနဲ့မိသားစုဝင်တွေကို စနေ၊တနင်္ဂတွေရုံးပိတ်ရက်တွေမှာ ရွှေစက်တော်ကို အလှည့်ကျသွားရောက်ဖို့ မကွေးတိုင်းစစ်ကောင်စီဝန်ကြီးချုပ်က ညွှန်ကြားထားတယ်လို့ သိရပါတယ်။

အလှည့်ကျသွားဖို့ညွှန်ကြားထားကာ အခုတပတ်မှာတေ့ မင်းဘူးက Non-CDM တွေအလှည့်ဖြစ်ပြီး မကွေးအလှည့် မရောက်သေးဘူးလို့ မကွေးမြို့က Non-CDM ဝန်ထမ်းတဦးကလည်း ပြောပါတယ်။

မန်းရွှေစက်တော်ဘုရားပွဲကို ဘုရားဖူးလာရောက်သူ သိသိသာသာနည်းပါးနေပြီး ယခင်က ၁ ရက်တည်းခိုခ သိန်းနဲ့ချီပေးဆောင်ရတဲ့ တည်းကျောင်းခတွေဟာ လာရောက်သူမရှိလို့ ၁ ရက် ၁၀,၀၀၀ ကျပ်ဝန်းကျင်အထိ လျှော့ချထားတယ်လို့ သိရပါတယ်။

မန်းရွှေစက်တော်ဘုရားပွဲဟာ မင်းဘူးနဲ့ငဖဲမြို့နယ်အစပ် ပုသိမ်-မုံရွာလမ်းအနောက်ဘက်ခြမ်းမှာတည်ရှိတာဖြစ်ကာ ဘုရားပွဲကိုလာရောက်ရာ ပုသိမ်-မုံရွာလမ်းပိုင်းနဲ့ စလင်း၊ ပွင့်ဖြူ မြို့နယ်တွေမှာ တိုက်ပွဲတွေဖြစ်ပွားနေသလို ငဖဲမြိုနယ်၊ အမ်း-ပဒါန်းလမ်းပိုင်းမှာလည်း တိုက်ပွဲတွေဖြစ်ပွားနေတာပါ။

ဒါ့အပြင် စစ်ကောင်စီက ပုသိမ်-မုံရွာလမ်းပိုင်းကို အသုံးပြုပြီး ရခိုင်ရိုးမနဲ့ ဒေသတွင်း စစ်ကောင်စီတပ်စခန်းတွေကို လူ၊လက်နက်၊ခဲယမ်းအင်အားဖြည့်တင်းတာနဲ့ ခရီးသွားကားတွေကို ပေါ်တာဆွဲဖမ်းဆီးတာတွေလုပ်ဆောင်နေတာကြောင့် အဆိုပါလမ်းပိုင်းမှာ နေရာ၊ အချိန်မရွေး တိုက်ပွဲတွေဖြစ်ပေါ်လာနိုင်လို့ သတိထားအသုံးပြုဖို့ အထက်မင်းလှပြည်သူ့ကာကွယ်ရေးတပ်ဖွဲ့က ဇန်နဝါရီလအတွင်းက သတိပေးထုတ်ပြန်ထားပါတယ်။

လက်ရှိမှာ မကွေးကနေ ရွှေစက်တော်ကိုသွားနေတာ တချို့ရှိကြောင်း၊ ဆယ်တန်းစာမေးပွဲဖြေနေတဲ့ကာလဖြစ်တာကြောင့် မြို့ပေါ် KTV တွေအကုန် ပိတ်ထားရလို့ KTVတွေတခုပြီးတခု သူတို့ရဲ့ဝန်ထမ်းတွေကို လိုက်ပို့ပေးနေပေမယ့် တခြားသူတွေတော့ ဘယ်သူမှမသွားကြလို့ ဒီနှစ်က ရွှေစက်တော်မကြုံစဖူးပဲလို့ နောက်ထပ်မကွေးမြို့ခံတဦးက မှတ်ချက်ပြုပါတယ်။

မန်းရွှေစက်တော်ဘုရားပွဲကို နှစ်စဥ်တပို့တွဲလဆန်း ၅ ရက်(ဖေဖော်ဝါရီပထမပတ်)ကနေ မြန်မာနှစ်ဆန်း ၁ ရက်နေ့(ဧပြီလ ၁၇ ရက်)အထိ ၃ လခန့် ကျင်းပတာဖြစ်ပြီး စစ်အာဏာသိမ်းပြီးနောက် ယခုနှစ် ၂၀၂၅ ဘုရားပွဲကာလဟာ လူလာရောက်မှုသိသိသာသာနည်းပါးနေတယ်လို့ သိရပါတယ်။

တည်းဖြတ် – M

၁ နှစ် အကြာက 0 comments 10 views

သတင်း

⁨လာရောက်သူနည်းပါးနေတဲ့ရွှေစက်တော်ကို စရိတ်ငြိမ်း၊ နေ့စားခပေးပို့ပေးမယ်ဆိုကာ စစ်ကောင်စီကစည်းရုံးနေပြီး Non-CDM တွေကိုလည်း အလှည့်ကျသွားဖို့ ညွှန်ကြား

by ဟိန်းစံ ၁ နှစ် အကြာက

written by ဟိန်းစံ

ဟိန်းစံ၊ ဒိန်းဂျား

မင်းဘူး၊ မတ် ၂၂၊ ၂၀၂၅။

“ လူတွေကို လိုက်စည်းရုံးတာ၊ တဦးကိုအခကြေးငွေလည်းပေးမယ်၊ ကားနဲ့လည်း လိုက်ပို့ပေးမယ်၊ စရိတ်စကလည်း ၅ ထောင်ပေးမယ်ဆိုပြီး ရွှေစက်တော်ကို အတင်းခေါ်တာ။ ရပ်ကွက်တွေထဲကတော့ လွန်ခဲ့တဲ့ ၂ ရက် ၃ ရက်ကတည်းက ခေါ်နေတာ၊ လွန်ခဲ့တဲ့ ၂ ရက်ကလည်း တသုတ်သွားတယ်။” လို့ မကွေးမြို့ခံအမျိုးသားတဦးက မြေလတ်အသံကို ပြောပါတယ်။

“ ခုတပတ်က မင်းဘူးကအဖွဲ့(Non-CDM)တွေအလှည့်ပေါ့။ မကွေးအလှည့်တော့ မရောက်သေးဘူး ။ အလှည့်ကျသွားဖို့ညွှန်ကြားထားတယ်။” လို့ မကွေးမြို့က Non-CDM ဝန်ထမ်းတဦးက ပြောပါတယ်။

“ ဒီနှစ်က ရွှေစက်တော်မကြုံစဖူးပဲ။ ခု မကွေးကနေ (ရွှေစက်တော်ကို) သွားနေတာ တချို့တော့ရှိတယ်၊ ဆယ်တန်းစာမေးပွဲဖြေနေတဲ့ကာလဆိုတော့ မြို့ပေါ် KTV တွေအကုန် ပိတ်ထားရတာ။ KTVတွေကတော့ တခုပြီးတခု ဝန်ထမ်းတွေကို လိုက်ပို့ပေးနေတာရှိတယ်။ ကျန်တာတော့ ဘယ်သူမှမသွားကြဘူး” နောက်ထပ်မကွေးမြို့ခံတဦးက ပြောပါတယ်။

၁ နှစ် အကြာက 0 comments 1 views

သတင်း

ပေါက်မှာ PDFတပ်ဖွဲ့ဝင်မင်္ဂလာဆောင် လေယာဥ်ဗုံးကြဲခံရလို့ လူ ၂၃ ဦးထက်မနည်း သေဆုံးပြီး ၁၀ ဦးကျော် ဒဏ်ရာရ

by ဟိန်းစံ ၁ နှစ် အကြာက

written by ဟိန်းစံ

ပေါက်၊ ဖေဖော်ဝါရီ ၂၅၊ ၂၀၂၅။

ဒိန်းဂျား ၊ ဟိန်းစံ

မကွေးတိုင်း၊ ပေါက်မြို့နယ်အပိုင် ပေါက်နဲ့မြိုင်အစပ်ရှိ ဆုံကုန်းရွာဘုန်းကြီးကျောင်းမှာ ပြုလုပ်တဲ့ မြိုင်ပကဖတပ်ဖွဲ့ဝင် ၁ ဦးရဲ့မင်္ဂလာဆောင် လေယာဥ်ဗုံးကြဲခံရလို့ လူ ၂၃ ဦးထက်မနည်းသေဆုံးပြီး ၁၀ ဦးကျော် ဒဏ်ရာရရှိခဲ့တယ်လို့ ဒေသခံတွေနဲ့ ကာကွယ်ရေးတပ်ဖွဲ့ဝင်တွေထံက သိရပါတယ်။

အဆိုပါဘုန်းကြီးကျောင်းကို ဖေဖော်ဝါရီ ၂၅ ရက် ဒီကနေ့ မနက် ၁၀ နာရီခန့်မှာ တိုက်လေယာဥ်နဲ့ ပေါင် ၃၀၀ ဗုံး ၁ လုံး ၊ ၁၀ နာရီခွဲခန့်မှာ တိုက်လေယာဥ်ပါ ရော့ကတ်ဒုံး ၄ လုံးနဲ့ ၂ ကြိမ် ဗုံးကြဲပစ်ခတ်တိုက်ခိုက်ခဲ့တာလို့ မြိုင်မြို့နယ်PDFတာဝန်ခံ ဗိုလ်လက်ယာက ပြောပါတယ်။

မြေပြင်အခြေအနေကို သိရှိထားတဲ့ မြိုင်မြို့ခံတဦးကလည်း ဗုံးကြဲတိုက်ခိုက်ခံရတာကြောင့် မင်္ဂလာဆောင်ပွဲမှာရှိနေတဲ့ လူ ၂၃ ဦးအထိ သေဆုံးထားပြီး ၁၀ ဦးကျော် ဒဏ်ရာရထားတယ် လို့ပြောပါတယ်။

“ လောလောဆယ် သေဆုံး ၂၃ ဦးရှိပြီ “ လို့ ၎င်းက ပြောပါတယ်။

လက်ရှိမှာ သေဆုံးနဲ့ဒဏ်ရာရသူတွေကို ကောက်ယူကာ ဆေးရုံပို့တာတွေ လုပ်ဆောင်နေဆဲဖြစ်လို့ သေဆုံးသူတွေဟာ ဘယ်သူဘယ်ဝါတွေဆိုတာတော့ မသိရသေးဘူးလို့ ဆိုပါတယ်။

လေကြောင်းဗုံးကြဲခံရတဲ့နေရာဟာ မြိုင်နဲ့ပေါက်နယ်အစပ်ရှိ ရေနံမှော်တွေအနီးကကျေးရွာဖြစ်ပြီး စစ်ကောင်စီက ဒေသအချို့မှာ နိုင်ငံပိုင်သယံဇာတပစ္စည်းတွေ တူးဖော်သုံးစွဲနေမှုကို လိုအပ်သလိုတိုက်ဖျက်မယ်လို့ ၎င်းတို့ထိန်းချုပ်မီဒီယာတွေကနေတဆင့် ဖေဖော်ဝါရီ ၂၀ ရက်မှာ ထုတ်ပြန်လာပြီးတဲ့နောက် ရေနံမှော်အနီးကျေးရွာတွေကို လေကြောင်းတိုက်ခိုက်မှုပြုလုပ်လာတာလည်း ဖြစ်ပါတယ်။

၁ နှစ် အကြာက 0 comments 4 views

မှုခင်း သတင်း

ကျောင်းသား ၅၀ နီးပါးအထိ လိင်ပိုင်းဆိုင်ရာကျူးလွန်ခဲ့ကြောင်း ဝန်ခံထားတဲ့ ယာယီကျောင်းအုပ်ကို ရဲက ပုဒ်မ ၃၇၇ နဲ့အမှုဖွင့်

by ဟိန်းစံ ၁ နှစ် အကြာက

written by ဟိန်းစံ

ပဲခူး၊ ဖေဖော်ဝါရီ ၁၆၊ ၂၀၂၅။

ကျော်ကြီး၊ ဟိန်းစံ

ပဲခူးမြို့နယ်၊ မုက္ကလရွာအခြေခံပညာအလယ်တန်းကျောင်းခွဲ ယာယီကျောင်းအုပ်ကြီးဟာ မူလတန်းနဲ့ အလယ်တန်းကျောင်းသား ၄၈ ဦးကို အဓမ္မပြုကျင့်မှုအပါ လိင်ပိုင်းဆိုင်ရာကျူးလွန်ခဲ့ကြောင်း ဝန်ခံထွက်ဆိုထားတယ်လို့ ဒေသခံတွေနဲ့ ပဲခူးရဲတပ်ဖွဲ့နဲ့နီးစပ်သူတွေထံက သိရပါတယ်။

ပြီးခဲ့တဲ့ ဇန်နဝါရီနောက်ဆုံးပတ်အတွင်းက မုက္ကလကျေးရွာအလကကျောင်းခွဲမှာ တက်ရောက်နေတဲ့ အသက် ၁၁ နှစ်အရွယ် ၄ တန်းကျောင်းသား ၁ ဦး အနေအထိုင်မမှန်တာကြောင့် မိဘတွေကခေါ်ယူမေးမြန်းခဲ့ရာက ယာယီကျောင်းအုပ်ဖြစ်သူရဲ့အဓမ္မပြုကျင့်ခံရကြောင်းသိရှိရပြီး ဆက်လက်စစ်ဆေးရာ ၁ နှစ်အတွင်း အသက် ၇ နှစ်မှ ၁၅ နှစ် အကြားရှိ ကျောင်းသား ၁၇ ဦးကို အဓမ္မပြုကျင့်ခဲ့ကြောင်း ပေါ်ပေါက်ခဲ့တာပါ။

အဲ့ဒီနောက် ကျေးရွာအုပ်ချုပ်ရေးအဖွဲ့ဝင်တွေနဲ့ ကျောင်းတာဝန်ရှိသူတွေက ထပ်မံစစ်ဆေးကြချိန်မှာ အဓမ္မပြုကျင့်ခံရမှုအပါ လိင်ပိုင်းဆိုင်ရာကျူးလွန်ခံရသူ ကျောင်းသား ၄၈ ဦးထိရှိခဲ့ကာ ကျောင်းအုပ်ဆရာကို ထပ်မံစစ်ဆေးချိန်မှာလည်း မှန်ကန်ကြောင်းဝန်ခံထွက်ဆိုခဲ့တယ်လို့ သိရပါတယ်။

“ ကျနော်တို့ သိထားတာက အဓမ္မမှုမြောက်တာက ၁၇ ယောက်ပေါ့။ ကျန်တဲ့ကျောင်းသားတွေကတော့ တခြားနည်းလမ်းတွေနဲ့ ကျူးလွန်ခံရတာ။” လို့ ပဲခူးရဲတပ်ဖွဲ့နဲ့နီးစပ်သူတဦးက မြေလတ်အသံကို ပြောပါတယ်။

ကျူးလွန်သူ မုက္ကလရွာအလကခွဲ ယာယီကျောင်းအုပ်ကြီး အသက် ၂၉ နှစ်အရွယ် ဦးသက်ဇော်အောင် ကို ပဲခူးရဲတပ်ဖွဲ့က ဓမ္မတာနဲ့ဆန့်ကျင်သောကာမစပ်ယှက်မှု ပုဒ်မ ၃၇၇ နဲ့အမှုဖွင့်ထားပြီး မြို့မရဲစခန်းမှာ ချုပ်နှောင်ထားတယ်လို့ ၎င်းက ဆိုပါတယ်။

ပုဒ်မ ၃၇၇ အရ မိမိအလိုလျောက် ဓမ္မတာနဲ့ဆန့်ကျင့်သောကာမစပ်ယှက်မှုကိုပြုရင် ထောင်တသက်တကျွန်းအထိ အမြင့်ဆုံးပြစ်ဒဏ်ချမှတ်နိုင်တယ်လို့ ပြဌာန်းထားပါတယ်။

၁ နှစ် အကြာက 0 comments 3 views

Newer Posts

Older Posts

2 July 2026 6:24 PM

ဟိန်းစံ

ဟိန်းစံ

ပေါ်တာဆွဲခံရတဲ့ ဗိုလ်ချုပ် (သရော်စာ)

ကစထမှူးဆင်းမတိုက်ရဲတဲ့ ရခိုင်စစ်မြေပြင် (ရုပ်သံဆောင်းပါး)

ကစထမှူး ဆင်းမတိုက်ရဲတဲ့ ရခိုင်စစ်မြေပြင် (အတွေးအမြင်)

စစ်ဆေးရေးဂိတ်တွေမှာ ဆော့ဖ်ဝဲလ်အသုံးပြုပြီး စစ်ပြေး၊ရဲပြေးတွေကို စီမံချက်နဲ့ ဖမ်းဆီးနေ

ပေါက်မှာ PDFတပ်ဖွဲ့ဝင်မင်္ဂလာဆောင် လေယာဥ်ဗုံးကြဲခံရလို့ လူ ၂၃ ဦးထက်မနည်း သေဆုံးပြီး ၁၀ ဦးကျော် ဒဏ်ရာရ

MYAELATT

ATHAN

သတင်း

ဆောင်းပါး

အထူးကဏ္ဍ