ရေစကြို

ရေစကြို၊ အောက်တိုဘာ ၁၇၊ ၂၀၂၆။

မကွေးတိုင်း၊ ရေစကြိုမြို့နယ်၊ သစ်ကြီးတောရွာနဲ့ ပိတ်သင်းကပ်ရွာတွေက စတားလင့်ဆိုင်နဲ့ ဇရပ်ဗုံးကြဲခံရပြီး ပြည်သူ ၁၂ ဦးသေဆုံးတယ်လို့ ရေစကြိုမြို့နယ်ပကဖ တာဝန်ရှိသူတွေဆီက သိရပါတယ်။

အောက်တိုဘာ ၁၆ ရက် နေ့လယ် ၂ နာရီကျော်ကစတင်ပြီး အသေခံဒရုန်း ၂ စီးနဲ့ သစ်ကောက်ဆိပ်ရွာကို တိုက်ခိုက်ပြီးနောက် ၂ နာရီ ၁၅ မိနစ်မှာ Mi 35 ၁ စီး၊ ဂျက်ဖိုက်တာ ၂ စီးတို့နဲ့ သစ်ကြီးတောနဲ့ ပိတ်သင်းကပ်ရွာတွေကို ဗုံးကြဲတဲ့အပြင် ရော့ကတ်တွေနဲ့ပါပစ်ခတ်ခဲ့တာလို့ ဆိုပါတယ်။

“မနေ့က အကုန်ပတ်ပစ်တာ။ သေတာက သစ်ကြီးတောက များတယ် ၁၁ ယောက်။ ပိတ်သင်းကပ်က ၁ ယောက်။ သစ်ကြီးတောက စတားလင့်ဆိုင်နားကျတာ။ ပေါင်ဗုံး ၁ လုံးကျတာ။ ပိတ်သင်းကပ်မှာကျ နွားကျောင်းပြီး ပြန်လာတဲ့ အမျိုးသားက ဇရပ်မှာနားနေချိန် လာကြဲတဲ့အချိန်နဲ့ဆုံပြီးသေတာ”လို့ ရေစကြိုမြို့နယ်ပကဖ ပြန်ကြားရေးတာဝန်ခံကပြောပါတယ်။

ဗုံးကြဲပစ်ခတ်မှုအတွင်း ပိတ်သင်းကပ်ရွာက အသက် ၄၀ ကျော်အရွယ် အမျိုးသား ၁ ဦး၊ သစ်ကြီးတောကျေးရွာက အသက် ၇ လအရွယ် ကလေးငယ် ၁ ဦး၊ အသက် ၁၀ နှစ်အရွယ် ၁ ဦး၊ အသက် ၃၀ ကနေ ၅၀ ကြား အမျိုးသား ၄ ဦး၊ အမျိုးသမီး ၅ သေဆုံးတယ်လို့ဆိုပါတယ်။

သေဆုံးသူတွေထဲမှာ ကလေး ၂ ဦး၊ အမျိုးသား ၃ ဦးနဲ့ အမျိုးသမီး ၂ ဦးအလောင်းသာ ပြန်ရပြီး ကျန်အလောင်းတွေက တစစီဖြစ်ကုန်တာကြောင့် လိုက်လံစုဆောင်းနေရတယ်လို့ ဆိုပါတယ်။

ဒါ့အပြင် ပြည်သူနေအိမ် ၄ လုံးထက်မနည်းလည်းပျက်စီးပြီး ကျေးရွာ ၂ ရွာက ပြည်သူတွေ ဘေးလွတ်ရာကို ထွက်ပြေးတိမ်းရှောင်နေကြရတယ်လို့ သိရပါတယ်။

အောက်တိုဘာလ ၈ ရက်ကလည်း မင်းတုန်းမြို့နယ်က ချင်းနစ်ကျေးရွာကို စက်တပ်လေထီးနဲ့ ဗုံးကြဲခံရလို့ ပြည်သူ ၂ ဦးသေဆုံးပြီး ၃ ဦးဒဏ်ရာရတယ်လို့ သိရပါတယ်။

ရေစကြို၊ ဇွန် ၉၊ ၂၀၂၆။

မကွေးတိုင်း၊ ရေစကြိုမြို့၊ အမှတ် ၄ ရပ်ကွက်မှာ အုပ်ချုပ်ရေးမှူး သားအဖ ပစ်ခတ်ခံရပြီး သေဆုံးခဲ့တယ်လို့ ရေစကြိုမြို့နယ်ပကဖဆီက သိရပါတယ်။

ပစ်သတ်ခံရသူတွေဟာ အသက် ၅၀ အရွယ်အုပ်ချုပ်ရေးမှူး လွင်မျိုးအောင် (ခ) ငလွင် နဲ့ သားဖြစ်သူ အသက် ၂၀ ကျော်အရွယ် ပျူစောထီးရဲမာန်တို့ဖြစ်ပြီး ဇွန်လ ၈ ရက်ည ၁၀ နာရီကျော်မှာ ပစ်ခတ်ခဲ့တာလို့ ဆိုပါတယ်။

“သူ့အိမ်ကို ဝင်ပြီးဖမ်းတာ။ ဖမ်းတဲ့အချိန်မှာ အသာတကြည်အဖမ်းမခံဘဲ ထွက်ပြေးတာ။ အဲ့တော့ နေရာမှာတင် တခါတည်းရှင်းခဲ့လိုက်တာ။ သူတို့အိမ်က လမ်းဘေး။ ညသွားဖမ်းရတာဆိုတော့ သူတို့လည်းအလန့်တကြားထွက်ပြေးတာ။ ဒါပေမယ့်မလွတ်ပါဘူး။ လမ်းပေါ်မှာတင် ၁ ယောက် ၂ ချက်ပစ်ခဲ့တယ်”လို့ ရေစကြိုမြို့နယ်ပကဖ သတင်းတာဝန်ခံက ပြောပါတယ်။

ပစ်ခတ်ခံရလို့ အုပ်ချုပ်ရေးမှူးသားအဖမှာ နေရာတင်သေဆုံးပြီး သူတို့ဆီကနေ ဖုန်း ၂ လုံးကိုလည်း သိမ်းယူနိုင်ခဲ့တယ်လို့ ဆိုပါတယ်။

အုပ်ချုပ်ရေးမှူး လွင်မျိုးအောင် (ခ) ငလွင်ဟာ အမှတ် ၄ ရပ်ကွက်နဲ့ အမှတ် ၆ ရပ်ကွက်တွေအတွင်း စစ်ကော်မရှင်တွေအတွက် စစ်မှုထမ်းပေါ်တာဆွဲရာမှာပါဝင်တာ၊ ငွေကြေးတောင်းယူတာတွေ လုပ်တဲ့အပြင် သားဖြစ်သူမှာလည်း ပြည်သူစစ်သင်တန်းဆင်း လက်နက်ကိုင်ပျူစောထီး ၁ ဦးဖြစ်ပြီး ပြည်သူ့စစ်အဖွဲ့တွေနဲ့အတူ ဒေသခံတွေအပေါ် အုပ်စုဖွဲ့အနိုင်ကျင့်တာကြောင့် ပစ်ခတ်ခဲ့တာလို့ ဆိုပါတယ်။

ပစ်ခတ်မှုဖြစ်ပြီးနောက် စစ်ကော်မရှင်အဖွဲ့တွေက လာရောက်စစ်ဆေးပြီးအလောင်းတွေကို ကောက်ယူသွားတယ်လို့ ဆိုပါတယ်။

ဧပြီ ၃၀ ရက်ကလည်း ရေစကြိုမြို့နယ်၊ တောင်အိုကျေးရွာ ပခုက္ကူ-ရေစကြိုလမ်းပေါ်မှာ စစ်ကော်မရှင်အဖွဲ့တွေ ကြားဖြတ်တိုက်ခံရပြီး ၇ ဦးသေဆုံးကာ ပစ်ခတ်မှုအတွင်း ပြည်သူ ၁ ဦးလည်း သေဆုံးခဲ့တယ်လို့ သိရပါတယ်။

စာတည်း – လင်း

ရေစကြို၊ ဧပြီ ၂၇၊ ၂၀၂၆။

မကွေးတိုင်း၊ ရေစကြိုမြို့နယ်၊ ငသရော်ကျေးရွာမှာ စစ်ကော်မရှင်တပ်ကဒရုန်းဗုံးကြဲလို့ ၈ နှစ်အရွယ် ကိုရင်အပါအဝင် ၃ ဦးသေဆုံးဆယ်လို့ ရေစကြိုမြို့နယ်ပကဖ ပြန်ကြားရေးတာဝန်ရှိသူဆီက သိရပါတယ်။

ဧပြီ ၂၅ ရက် ညနေ ၄ နာရီခန့်မှာ ငသရော်ရွာနဲ့ ၁ မိုင်ကျော်အကွာ မင်းရွာပျူစောထီးစခန်းမှာ တပ်စွဲထားတဲ့ စစ်ကော်မရှင်အဖွဲ့တွေက ဒရုန်းနဲ့ကျေးရွာထဲကို ဗုံး ၂ လုံးကြဲချတိုက်ခိုက်ခဲ့ရာ ဒေသခံတွေ ထိခိုက်သေဆုံးတဲ့အပြင် လက်ဖက်ရည်ဆိုင်လည်းပျက်စီးခဲ့တယ်လို့ ဆိုပါတယ်။

“ရွာမြောက်ဖျားက လက်ဖက်ရည်ဆိုင်ကို ကျတာ။ စတားလင့်လည်းဖွင့်တယ်။ ကလေးတွေက အဲ့မှာလိုင်းသုံးနေကြတာနေမှာ”လို့ ရေစကြိုမြို့နယ်ပကဖ ပြန်ကြားရေးတာဝန်ရှိသူက ပြောပါတယ်။

ဗုံးထိမှန်တာကြောင့် အသက် ၈ နှစ်အရွယ် ကိုရင် ၁ ပါး၊ အသက် ၁၅ နှစ်အရွယ် လူငယ် ၂ ဦး စုစုပေါင်း ၃ ဦးသေဆုံးခဲ့ပြီး အသက် ၁၅ နှစ်ကနေ ၄၀ ကြား အမျိုးသား ၅ ဦးလည်း ထိခိုက်ဒဏ်ရာရကာ အားလုံးကို နီးစပ်ရာဆေးရုံကိုပို့ဆောင်ထားတယ်လို့ ဆိုပါတယ်။

ဖေဖော်ဝါရီ ၁၂ ရက်ကလည်း ပခုက္ကူ တပ်မ ၁၀၁ မှ တက်လာတဲ့ စက်တပ်လေထီးက ရေစကြိုမြို့နယ်၊ ချင်းယားကုန်းကျေးရွာကို ဗုံးကြဲတိုက်ခိုက်ခဲ့တာကြောင့် ပြည်သူ ၂ ဦးသေဆုံးကာ ၂ ဦး ထိခိုက်ဒဏ်ရာ ရရှိခဲ့သေးတယ်လို့ သိရပါတယ်။

စာတည်း – လင်း

ရေစကြို၊ ဖေဖော်ဝါရီ ၁၂၊ ၂၀၂၆။

မကွေးတိုင်း၊ ရေစကြိုမြို့နယ်၊ ကံမတောကျေးရွာအနီးက ရေစကြိုပကဖစခန်း ၁ ခု စီးနင်းမီးရှို့ခံရတယ်လို့ ပကဖတာဝန်ရှိသူတွေထံက သိရပါတယ်။

ဖေဖော်ဝါရီ ၁၀ ရက် မနက် ၅ နာရီခန့်မှာ တပ်မ ၉၉ ကထွက်လာတဲ့ အင်အား ၂၅၀ ပါ စစ်ကြောင်းဟာ ကျေးရွာအပြင်ဘက်ရှိ ပကဖတပ်ခွဲစခန်းကို ဝင်ရောက်စီးနင်းမီးရှို့ခဲ့တာလို့ ဆိုပါတယ်။

” ရွာကိုရောက်ပြီးနေပြီးမှ တပ်ခွဲစခန်းကိုတွေ့ပြီး မီးရှို့တာ။ ထိတွေ့တိုက်ပွဲတော့မရှိဘူး။ သူတို့(စကစ) စခန်းကို မီးရှို့ချိန် မိုင်းဆွဲလိုက်တာရှိသေးတယ်။ သူတို့အင်အားများလို့ ကျနော်တို့ဘက်က ဆုတ်ပေးလိုက်ရတာ”လို့ ရေစကြိုပကဖ တာဝန်ရှိသူတဦးကပြောပါတယ်။

စစ်ကော်မရှင်စစ်ကြောင် စီးနင်းခံရလို့ စခန်းအတွင်းရှိ ဆိုင်ကယ် ၃ စီး၊ ဆိုလာ၊ ယူနီဖောင်း၊ မိုင်းတွေနဲ့ စစ်သုံးဆက်စပ်ပစ္စည်းအချို့ ကာလတန်ဖိုး ကျပ်သိန်း ၁၀၀ ကျော် သိမ်းဆည်းခံလိုက်ရတယ်လို့ ဆိုပါ တယ်။

အဆိုပါစစ်ကြောင်းဟာ စခန်းကိုစီးနင်းပြီးနောက် တပ်ဖွဲ့ဝင်တွေနေထိုင်တဲ့ တဲ၊ ဆိုင်ကယ်၊ ဆိုလာတွေနဲ့ယူနီဖောင်းတွေကို မီးရှို့ဖျက်ဆီးခဲ့ပြီး ကျေးရွာထဲမှာပင် ညအိပ်နေထိုင်ကာ ဖေဖော်ဝါရီ ၁၁ ရက်မနက် ၈ နာရီလောက်မှာ မြိုင်မြို့နယ်ဘက်ကို ဆက်လက်ထွက်ခွာသွားတယ်လို့ ဆိုပါတယ်။

ပြီးခဲ့တဲ့နှစ် စက်တင်ဘာ ၂၀ ရက်ကလည်း ပေါက်မြို့နယ်က စွန်ဆိပ်ကုန်းကျေးရွာနဲ့ သံပုရာအိုင်ကျေးရွာက ဒေသကာကွယ်ရေးစခန်း ၂ ခုကို စစ်ကော်မရှင်တပ်တွေဝင်ရောက်စီးနင်းမီးရှို့ခဲ့လို့ ကျပ်သိန်းထောင်ချီ ပျက်စီးဆုံးရှုံးခဲ့ပါသေးတယ်။

မြေလတ်အသံ၊ ဇန်နဝါရီ ၂၄၊ ၂၀၂၆။

မကွေးတိုင်း၊ မြိုင်မြို့နယ်နဲ့ ရေစကြိုမြို့နယ်အတွင်းမှာ ဇန်နဝါရီ ၁၉ ရက်ကနေ ၂၄ ရက်အတွင်း စစ်ကော်မရှင်တပ်ဖွဲ့ဝင်တွေက စစ်ကြောင်းထိုးကာ ဒေသခံတွေရဲ့ပစ္စည်းတွေကိုသယ်ယူနေတယ်လို့ ဒေသခံတွေဆီက သိရပါတယ်။

ဇန်နဝါရီ ၁၉ ရက်မှာ ရေစကြိုမြို့နယ်ရှိ ဖူလုံ ခလရ ၂၅၆၊ ၂၅၇၊ ၂၅၈ ကစစ်ကော်မရှင်တပ်တွေက မြိုင်မြို့နယ်၊ လင်းကတောနယ်မြေရဲစခန်းကို လာရောက်ပြီးနောက် ဒေသခံတွေရဲ့ ရိက္ခာပစ္စည်းတွေကို သိမ်းယူနေတာလို့ ဆိုပါတယ်။

“ရိက္ခာဖြည့်ဖို့က အဓိကနဲ့ လူအချိန်းအပြောင်းလည်း ဖြစ်နိုင်တယ်၊ ဖူလုံကလာတဲ့ စစ်ကြောင်းက ရိက္ခာလာရှာပေးတာဗျ၊ အရင်အခေါက်တွေတော့ ဖူလုံက စစ်ကြောင်းနဲ့ (လင်းကတော)စခန်းဖက်က စစ်သားတွေနဲ့က မပေါင်းဘူး၊ တနေရာစီနေတာ များတယ်။”လို့ ဒေသခံတဦးက ပြောပါတယ်။

ဇန်နဝါရီ ၁၉ ရက်မှာ ဖူလုံ ခလရ ၂၅၆၊၂၅၇၊၂၅၈ ကနေ အင်အား ၁၀၀ ကျော်နဲ့ စတင်ထွက်လာပြီး နောက် ဇန်နဝါရီ ၂၀ ရက်မှာ ရေစကြိုမြို့နယ်၊ သဲပုံရွာမှာညအိပ်ပြီး ဇန်နဝါရီ ၂၂ ရက်မှာ လင်းကတောနယ်မြေရဲစခန်းထဲကို ဝင်ရောက်လာတာလို့ ဆိုပါတယ်။

အဲ့ဒီနောက် ဇန်နဝါရီ ၂၂ ရက် မနက် ၆ နာရီခန့်ကစလို့ လင်းကတောနယ်မြေရဲစခန်းရှိ စစ်ကော်မရှင်တပ်တွေနဲ့ပူးပေါင်းကာ စုစုပေါင်းအင်အား ၁၂၀ နဲ့ ရေစကြိုမြို့နယ်၊ နိပဆေးတောရွာကို ဝင်ကာ ဒေသခံပစ္စည်းတွေကို သိမ်းယူပြီး ည ၈ နာရီခွဲမှာ ရဲစခန်းထဲကိုပြန်ဝင်ခဲ့တယ်လို့ အထက်ပါဒေသခံကပြောပါတယ်။

ဒါ့အပြင် ဇန်နဝါရီ ၂၃ ရက်ည ၈ နာရီခွဲခန့်မှာ လင်းကတောနယ်မြေရဲစခန်းကနေ ထပ်မံ စစ်ကြောင်းထိုးလာပြီး ဒီကနေ့ ဇန်နဝါရီ ၂၄ ရက်မနက် ၇ နာရီမှာလည်း မြိုင်မြို့နယ်၊ တဲကြီးရွာကိုဝင်ပြီး ရွာခံတွေ စစ်ဘေးရှောင်နေချိန် ရိက္ခာပစ္စည်းတွေကို သယ်ယူနေတယ်လို့ သိရပါတယ်။

“လင်းကတော **ခြံကနေ မနေ့ည ၈ နာရီလောက်က အရှေ့ဖက်ကိုထွက်သွားတဲ့ **စစ်ကြောင်းက ဒီနေ့မနက် ၇ နာရီကျော်က တဲကြီးရွာကိုဝင်သွားပြီး ပြည်သူပိုင်ပစ္စည်းတွေကိုမွှေနှောက်နေပြီး ကြက်တွေလည်း ခိုးယူပြီး ချက်ပြုတ်စားသောက်နေကြတယ်။” လို့ ဒေသခံတဦးက ပြောပါတယ်။

စစ်ကြောင်းကြောင့် ရေစကြိုမြို့နယ်က နိပဆေးတောရွာ၊ ခံစပ်တော၊ တောင်ဦး၊ ရွာထောင်၊ ကုက္ကိုစု၊ ဥယျာဉ်ရွာနဲ့ မြိုင်မြို့နယ်၊ တဲကြီးရွာတွေက ဒေသခံထောင်နဲ့ချီ ထွက်ပြေးတိမ်းရှောင်နေကြရတယ်လို့ ဆိုပါတယ်။

လက်ရှိမှာ စစ်ကြောင်းက မြိုင်မြို့နယ်၊ တဲကြီးရွာကိုရောက်နေပြီး နောက်ထပ်ရွာတွေကို ဝင်ရောက်မွှေနှောက်နိုင်မယ့် အခြေအနေတွေရှိနေတယ်လို့ ဒေသခံတဦးကပြောပါတယ်။

စာတည်း – လင်း

ရေစကြို၊ ဒီဇင်ဘာ ၅၊ ၂၀၂၅။

မကွေးတိုင်း၊ ရေစကြိုမြို့နယ်၊ ဖူလုံရွာမှာ ဘိလိယက်ထိုးနေတဲ့ ခလရ ၂၅၇ ကတပ်ရေးဗိုလ်ကြီးကို ဒီဇင်ဘာ ၃ ရက်ညနေပိုင်းမှာ ပစ်သတ်ခဲ့တယ်လို့ ရေစကြိုမြို့နယ်ပြည်သူ့ကာကွယ်ရေးအဖွဲ့ဆီက သိရပါတယ်။

ပစ်ခတ်ခံရသူဟာ ခလရ ၂၅၇ တပ်ရင်းမှ အသက် ၃၅ အရွယ် တပ်ရေးဗိုလ်ကြီးသက်နိုင်ဦး (ခ) A2 ကို ညနေ ၄ နာရီလောက်မှာ ရေစကြိုပကဖတပ်ဖွဲ့ဝင်တွေက ဖမ်းဆီးခေါ်ဆောင်သွားချိန် လမ်းမှာပစ်ခတ်ခဲ့တာ လို့ ဆိုပါတယ်။

“ဖူလုံကျေးရွာထဲက ဘီလီယက်ခုံမှာ ကျနော်တို့ သွားပြီးဖမ်းခဲ့တာ၊ တပ်ရေးဗိုလ်ကြီး သက်နိုင်ဦး (ခ) A2 ပေါ့၊ ဖမ်းဆီးတဲ့အချိန်မှာ အသာတကြည်ပဲ ဖမ်းဆီးခဲ့တယ်၊ ခေါ်ဆောင်လာတဲ့အချိန်လမ်းမှာ ဒီကောင်က ကျနော်တို့ရဲဘော်လက်ထဲက ဂန်း (Gun) ကိုဆွဲလုပြီး ပြန်ခုခံတာ၊ ကျနော်တို့ရဲဘော်တွေက နေရာမှာတင် ရှင်းလင်းခဲ့ရတယ်”လို့ ရေစကြိုမြို့နယ်ပြည်သူ့ကာကွယ်ရေးတပ်ရဲ့ သတင်းနဲ့ပြန်ကြားရေးတာဝန်ခံက ပြောပါတယ်။

ဗိုလ်ကြီးသက်နိုင် အကြောင်းကို ကြိုတင်ထောက်လှမ်းပြီးမှ ဖမ်းဆီးခဲ့တာဖြစ်ပြီး သူ့ဆီကနေ ဆိုင်ကယ် ၁ စီး၊ ဖုန်း ၃ လုံး၊ ငွေသား ၃ သိန်း၊ မှတ်ပုံတင် ၂ ခုတို့ကို သိမ်းဆည်းရမိခဲ့တယ်လို့လည်း ဆိုပါတယ်။

“ကျနော်တို့ ဒီကောင့်အကြောင်းကို ကြိုတင်ထောက်လှမ်းထားတာတွေရှိတယ်၊ အဲ့ဒီထောက်လှမ်းချက်နဲ့ ‌ကျနော်တို့ စောင့်ကြည့်ပြီးတော့ အလုပ်လုပ်ခဲ့ရတာ၊ သူရဲ့အလောင်းကိုတော့ ပစ်ခတ်ခဲ့တဲ့လမ်းပေါ်မှာပဲ ပစ်ထားခဲ့တာ၊ ည ၈ နာရီလောက်မှာ တပ်ထဲကနေ ကားနဲ့လာပြီးကောက်သွားတယ်”လို့ သူက ဆက်ပြောပါတယ်။

ပြီးခဲ့တဲ့ နိုဝင်ဘာ ၂၅ ရက်နဲ့ ၂၇ ရက်ကလည်း ခလရ ၂၅၆၊ ခလရ ၂၅၇၊ ခလရ ၂၅၈ တပ်က အင်အား ၁၂၀ ပါစစ်ကြောင်းကို ရေစကြိုပြည်သူ့ကာကွယ်ရေးတပ်ဖွဲ့က တိုက်ခိုက်ခဲ့ရာ ၃ ပွင့်ဗိုလ် ၁ ဦးနဲ့ စစ်ကော်မရှင် တပ်သား ၂ ဦးသေဆုံးခဲ့ပါသေးတယ်။

စာတည်း – လင်း