မြေလတ်အသံ၊ အောက်တိုဘာ ၁၀၊ ၂၀၂၅။
မြေလတ်ဒေသကသတင်းတွေကို တင်ဆက်ပေးနေတဲ့ မြေလတ်အသံသတင်းဌာနရဲ့ တနေ့တာသတင်း အစီအစဉ်ဖြစ်ပါတယ်။
စတဲ့သတင်းတွေကို တင်ဆက်ထားပါတယ်။
ချောင်းဦး၊ အောက်တိုဘာ ၁၀၊ ၂၀၂၅။
စစ်ကိုင်းတိုင်း၊ ချောင်းဦးမြို့နဲ့ မန္တလေးတိုင်း၊ မြို့သာမြို့မှာ စစ်ကော်မရှင်တပ်တွေတိုက်ခိုက်ခံရပြီး ၆ ဦးသေဆုံးကာ လက်နက်ခဲယမ်းတွေလည်းသိမ်းဆည်းနိုင်ခဲ့တယ်လို့ ဒေသခံတော်လှန်ရေးတပ်တွေဆီက သိရပါတယ်။
စစ်ကိုင်းအခြေစိုက် တပ်မ ၃၃ ကလာတဲ့ယာဥ်တန်းကိုလုံခြုံရေးယူတဲ့ စစ်ကော်မရှင်တပ်ဖွဲ့တွေကို ချောင်းဦးမြို့ အနီးမှာစောင့်ကြိုတိုက်ခိုက်ပြီး လက်နက်ခဲယမ်းတွေသိမ်းဆည်းခဲ့တယ်လို့ Chaung U People’s Defence Force ဆီက သိရပါတယ်။
အောက်တိုဘာ ၁၀ ရက် ဒီမနက် ၇ နာရီ ၁၀ မိနစ်ဝန်းကျင်မှာတိုက်ခိုက်ခဲ့တာဖြစ်ပြီး တိုက်ပွဲအတွင်း စစ်ကော်မရှင်တပ်ဖွဲ့ဝင် ၃ ဦးသေဆုံးခဲ့ပြီး အလောင်းတွေလည်းရရှိခဲ့တယ်လို့ ဆိုပါတယ်။
“ပုံမှန်ကတော့ လောင်စာ၊ ရိက္ခာ၊ ဆေးဝါး၊ လက်နက်ခဲယမ်းသယ်လာတဲ့ ယာဉ်တန်းတွေ လာလေ့ရှိတယ်၊ အဲ့ဒီယာဉ်တန်းတွေ လာလို့ရှိရင်သူတို့ဘက်က လုံခြုံရေးယူပေးလေ့ရှိတယ်၊ အခုဟာက စစ်ကိုင်းတပ်မ ၃၃ ကထွက်လာတဲ့ ယာဉ်တန်းတွေကို လုံခြုံရေးယူတာကို ကျနော်တို့ဘက်က အသင့်စောင့်ကြိုတိုက်ခိုက်တာ၊ သူတို့ဘက်တံဆိပ်မပါလို့ ဘယ်တပ်ကလို့ မသိရဘူး၊ ထွက်လာတာကတော့ ချောင်းဦးမြို့ထဲက ထွက်လာတာ”လို့ Chaung U People’s Defence Force သတင်းနဲ့ ပြန်ကြားရေးတာဝန်ခံက ပြောပါတယ်။
တိုက်ခိုက်ပြီးနောက် BA 63 ၃ လက်၊ 9 မမ ကျည် ၄၉၄ တောင့်၊ 7.62 ကျည် ၆၅၂ တောင့် ကျည်ကာ ဦးထုပ် ၃ လုံး၊ BA 63 ကျည်ဘောက် ၁၀ ခု၊ BA 94 ကျည်ဘောက် ၃ ခု၊ လက်ပစ်ဗုံး ၁ လုံး၊ လက်ဖုန်း ၄ လုံးနဲ့ ဆိုင်ကယ် ၄ စီး သိမ်းဆည်းခဲ့တယ်လို့ ဆိုပါတယ်။
ဒီတိုက်ခိုက်မှုကို ချောင်းဦးမြို့နယ် ပကဖ တိုက်ခိုက်ရေးတပ် CHU PDF နဲ့ Special Force 11(LPDF) တို့က ပူးပေါင်းလုပ်ဆောင်ခဲ့တာဖြစ်ပြီး တိုက်ခိုက်တဲ့နေရာဟာ စစ်ကော်မရှင်တပ်တွေစိုးမိုးတဲ့ နယ်မြေဖြစ်တာကြောင့် အမြန်ပြန်ဆုတ်ခွာလာရတယ်လို့ အထက်ပါသတင်းနဲ့ပြန်ကြားရေးတာဝန်ခံက ပြောပါတယ်။
ဒါ့အပြင် မန္တလေးတိုင်း၊ မြို့သာမြို့၊ မြို့သာရဲစခန်းကနေ မြို့သာဈေးထောင့်မှာ လမ်းသွားပြည်သူတွေကို ဆက်ကြေးကောက်နေတဲ့ စစ်ကော်မရှင်တပ် အောက်တိုဘာ ၈ ရက် ညနေ ၄ နာရီလောက်မှာ တိုက်ခိုက်ရာ ၃ ဦးသေဆုံးကာ ၂ ဦးထိခိုက်ဒဏ်ရာရခဲ့တယ်လို့ Special Task Force Nagazun ဆီက သိရပါတယ်။
မြို့သာဈေးထောင့်မှာ အင်အား ၅ ဦးနဲ့ ဆက်ကြေး ကောက်နေတဲ့ စစ်ကော်မရှင်တပ်ဖွဲ့ဝင်တွေကို မီတာ ၁၀၀ ဝန်းကျင်လောက်ကနေတိုက်ခိုက်ရာ တိုက်ခိုက်ချိန် မိနစ် ၂၀ ကြာမြင့်ခဲ့တယ်လို့ ဆိုပါတယ်။
“မြို့သာစခန်းကနေ မြို့သာစျေးထောင့်လာတာက ၁၀ ဦးလာတာ၊ ဆက်ကြေးကောက် စစ်ဆေးတာက ၅ ဦးပါ၊ ထိခိုက်သေဆုံးတာက ၃ ဦးပါ၊ ဒဏ်ရာရတာ ၂ ဦးပါ၊ စစ်သားလား၊ ရဲလားတော့ အတိကျ မသိပါဘူး၊ **အင်းအားတိုးပြီး ရက်ကွက်တွေထဲမှာ ကင်းပုန်ထိုးထားတယ်”လို့ Special Task Force Nagazun တာဝန်ရှိသူတဦးက ပြောပါတယ်။
အဲ့ဒီစစ်ကော်မရှင်တပ်တွေဟာ မြို့သာရဲစခန်းအရှေ့ဘက်ရှိ ဆေးရုံအနီးမှာလည်း ဆက်ကြေးကောက်လေ့ရှိပြီး တိုက်ခိုက်ခံရပြီးနောက် ပိုက်ဆံမကောက်တော့ဘူးလို့ သူကဆက်ပြောပါတယ်။
ပြီးခဲ့တဲ့ ဩဂုတ် ၃ ရက်ကလည်း မြင်းခြံမြို့နယ်ကနေ ငါန်းမြာကြီးရဲစခန်းကို ရိက္ခာပို့ရင်း တပ်ချိန်းပြောင်းရန်လာတဲ့ ကား ၅ စီးနဲ့ အင်အား ၁၄၀ ခန့်ပါတဲ့ စစ်ကြောင်းကို Special Task Force Nagazun က တံတားဦးနဲ့ ဆီမီးခုံလမ်းပိုင်းမှာ ကြားဖြတ်တိုက်ခိုက်ခဲ့ပါသေးတယ်။
စာတည်း – လင်း
ချောင်းဦး၊ အောက်တိုဘာ ၁၀၊ ၂၀၂၅။
စစ်ကိုင်းတိုင်း၊ ချောင်းဦးမြို့နယ်၊ ဘုံတိုရွာလေကြောင်းတိုက်ခိုက်မှုအတွင်း ထိခိုက်ဒဏ်ရာရခဲ့သူတွေအတွက် ဆေးကုသဖို့လိုအပ်နေပြီး ဆေးဝါးနဲ့ရိက္ခာထောက်ပံ့ပေးခဲ့တယ်လို့ စစ်ကိုင်းပြည်သူဖေးမကူကွန်ရက်ဆီက သိရပါတယ်။
တိုက်ခိုက်ခံရပြီးနောက် စစ်ကိုင်းပြည်သူဖေးမကူကွန်ရက် အရေးပေါ်ကုသမှုနဲ့ ဆေးဝါးလိုအပ်ချက်တွေ ဖြည့်တင်းပေးခဲ့ကာ အောက်တိုဘာ ၉ ရက်မှာ ကျပ် ၂၂၅ သိန်းကျော်တန်ဖိုးရှိ ဆေးဝါးနဲ့ ရိက္ခာတွေ ကူညီပေးခဲ့တယ်လို့ အထက်ပါတာဝန်ရှိသူကပြောပါတယ်။
“ငွေကျပ်အားဖြင့် ၂၂၅ သိန်းကျော်ဖိုးပေါ့ဗျာ၊ ကျနော်တို့ လှူခဲ့တယ်၊ အဓိကကတော့ ဆေးဝါးတွေပါတယ်၊ နောက် ဝှီးလ်ချဲတို့ပေါ့ဗျာ၊ နောက် ထိုးဆေး၊ စားဆေး၊ ဆေးထိုးအပ်တို့၊ ဆလိုင်းပိုက်တို့ပေါ့နော်၊ အဲ့ဒီလိုမျိုးတွေ ဆေးဘက်ဆိုင်ရာ Medical tools တွေပေါ့၊ Medical tools တွေပါတယ်၊ နောက်ခါ ဆေးကုသနေတဲ့ ဆေးအဖွဲ့တွေနဲ့ ဆေးရုံတက်လူနာတွေကို စားသောက်နိုင်ဖို့အတွက် ဆန်တွေပါတယ်ပေါ့၊ ရိက္ခာပေါ့ဗျာ။” လို့ စစ်ကိုင်းပြည်သူဖေးမကူကွန်ရက် တာဝန်ရှိသူတဦးက ပြောပါတယ်။
အောက်တိုဘာ ၆ ရက် (သီတင်းကျွတ်လပြည့်နေ့) ည ၈ နာရီခန့်မှာ ချောင်းဦးမြို့နယ်၊ ဘုံတိုကျေးရွာအနီး ဒေသတွင်းသပိတ်အဖွဲ့တွေနဲ့ ပြည်သူတွေစုပေါင်းပြီး ဆီမီးသပိတ် ပြုလုပ်နေချိန် မုံရွာနမခက တက်လာတဲ့ ပါရာမော်တာက ၁၂၀ မမ ဗုံးသီး ၂ လုံးကြဲချခဲ့ရာ သပိတ်ပြုလုပ်နေတဲ့လူအုပ်ကြားထဲပေါက်ကွဲပြီး ထိခိုက် သေဆုံးသူများခဲ့တာပါ။
အဆိုပါတိုက်ခိုက်ခံရမှုမှာ သပိတ်ဦးဆောင်သူတွေအပါအဝင် ပြည်သူ ၂၄ ဦးသေဆုံးကာ ၄၆ ဦး ဒဏ်ရာရခဲ့တယ်လို့ ဒေသတွင်းမှတ်တမ်းတွေအရသိရပြီး မှတ်တမ်းမယူထားနိုင်တဲ့ အရေအတွက် အချို့လည်း ရှိနေနိုင်သေးတယ်လို့ စစ်ကိုင်းပြည်သူဖေးမကူကွန်ရက်တာဝန်ရှိသူတဦးက မြေလတ်အသံကို ပြောပါတယ်။
ထိခိုက်ဒဏ်ရာရသူတွေအတွက် ကုသပေးနေတဲ့ ဆေးရုံနဲ့ ဆေးအဖွဲ့တွေမှာ သွေး၊ ဆေးဝါး၊ ဆေးဘက်ဆိုင်ရာပစ္စည်းတွေနဲ့ ကုသပေးနိုင်တဲ့ပညာရှင်တွေ လိုအပ်နေဆဲဖြစ်တယ်လို့ သိရပါတယ်။
ဆေးဝါးနဲ့ လုံလောက်တဲ့ကုသမှုတွေပေးနိုင်ဖို့ ဒေသတွင်းအဖွဲ့အစည်းအသီးသီးက ကြိုးပမ်းနေကြပေမယ့် လိုအပ်နေတာတွေကို အချိန်မီမဖြည့်ဆည်းနိုင်ရင် မလိုအပ်ဘဲလူသေဆုံးမှုတွေ ထပ်ကြုံလာရနိုင်တယ်လို့ အထက်ပါတာဝန်ရှိသူတဦးက သုံးသပ်ပါတယ်။
“အပ်နဲ့ထွင်းရမယ့်ဟာ ပေါက်ဆိန်နဲ့ပေါက်ရတာမျိုး ဖြစ်လာနိုင်တာပေါ့၊ ပြီးတော့ မသေဆုံးသင့်ဘဲ သေဆုံးရတာမျိုးတွေ၊ ဒဏ်ရာပိုဆိုးသွားတာမျိုးတွေပေါ့နော်၊ ဒီလိုအခြေအနေမျိုးတွေ ရှိနိုင်ပါတယ်၊ အဆိုးဆုံးကတော့ စစ်ကိုင်းတိုင်းမှာ ဆေးဝါးအပါအဝင်ပေါ့၊ အဓိကကတော့ဆေးဝါးနဲ့ ဆေးဘက်ဆိုင်ရာ ပစ္စည်းတွေက သယ်ယူလို့မရနိုင်အောင် အကြမ်းဖက်စစ်တပ်က ဖြတ်လေးဖြတ် ဖြတ်ထားတာပေါ့နော်။” လို့ အထက်ပါတာဝန်ရှိသူက ပြောပါတယ်။
၂၀၂၁၊ စစ်အာဏာသိမ်းချိန်ကနေ ၂၀၂၅၊ အောက်တိုဘာ ၉ ရက်အထိ စစ်ကော်မရှင်တပ်နဲ့ လက်အောက်ခံအဖွဲ့အစည်းတွေကြောင့် သေဆုံးခဲ့ရတဲ့ ပြည်သူစုစုပေါင်း ၇,၃၆၀ ဦးရှိပြီလို့ နိုင်ငံရေးအကျဉ်းသားများ ကူညီစောင့်ရှောက်ရေးအသင်း – AAPPက ထုတ်ပြန်ပါတယ်။
စာတည်း – လင်း
နွားထိုးကြီး၊ အောက်တိုဘာ ၁၀၊ ၂၀၂၅။
မန္တလေးတိုင်း၊ နွားထိုးကြီးမြို့နယ်၊ မကျီးကုန်းကျေးရွာဘုန်းကြီးကျောင်းဗုံးကြဲခံရမှုမှာ ဗုံးစထိမှန်ဒဏ်ရာနဲ့ဆေးကုသနေတဲ့ အသက် ၅ နှစ်အရွယ်မိန်းကလေးတဦး ထပ်မံသေဆုံးခဲ့တယ်လို့ ဒေသခံတွေထံက သိရပါတယ်။
သေဆုံးသူဟာ ဗုံးစထိမှန်ဒဏ်ရာနဲ့ မန္တလေးမြို့ဆေးရုံကြီးမှာ ဆေးကုသနေတဲ့ အသက် ၅ နှစ်အရွယ် မမိုးသူဇာဖြစ်ပြီး အောက်တိုဘာ ၉ ရက်မနေ့က ရရှိဒဏ်ရာတွေနဲ့သေဆုံးသွားခဲ့တာလို့ ဆိုပါတယ်။
” ဆုံးတာကတော့ မနေ့ကဆုံးတာ။ အလောင်းကတော့ ဒီဘက်ပြန်သယ်လာပြီး။ နာရေးလည်း အဲ့နေ့ကဘဲ လုပ်လိုက်ကြတာ။ ကျန်သူတွေကတော့သက်သာတယ်လို့ ပြောတယ်။ သူကရင်အုပ်ရဲ့အောက်နားလေးမှာ မှန်ထားတာ”လို့ မိသားစုနဲ့နီးစပ်တဲ့ဒေသခံတဦးက မြေလတ်အသံကို ပြောပါတယ်။
မကျီးကုန်းကျေးရွာဘုန်းကြီးကျောင်းကို အောက်တိုဘာ ၈ ရက် မနက်ပိုင်းမှာ စစ်ကော်မရှင်တပ်က တိုက်လေယာဉ်နဲ့ဗုံးကြဲချခဲ့တာကြောင့် စစ်ရှောင်မိသားစုတွေယာယီခိုလှုံနေထိုင်နေတဲ့အဆောင်ပေါ် ကျရောက်ပေါက်ကွဲခဲ့ပြီး ကနဦးမှာ အသက် ၄၅ နှစ်ရှိ ဒေါ်ကြင်သေဆုံးခဲ့လို့ လက်ရှိမှာ သေဆုံးသူ ၂ ဦးရှိလာတာပါ။
ဗုံးကြဲခံရမှုအတွင်း ဘုန်းကြီး ၁ ပါးနဲ့ လူ ၁၁ ဦး ဒဏ်ရာရရှိခဲ့ကာ အဲ့ဒီထဲက သက်တော် ၃၃ နှစ် ဥူးရေဝရ၊ အသက် ၁၄နှစ် မောင်စည်သူအောင်၊ အသက် ၂၄ နှစ် မဖြူဖြူ၊ အသက် ၁၄ နှစ် မဖြူနှင်းဖွေးနဲ့ အသက် ၅ နှစ် မမိုးသူဇာတို့ကို မန္တလေးဆေးရုံကို ပို့ဆောင်ကုသခဲ့ရပြီး မမိုးသူဇာက ယမန်နေ့မှာ ကွယ်လွန်ခဲ့ကာ ကျန်သူတွေက ဆက်လက်ကုသမှုခံယူနေရတာပါ။
အောက်တိုဘာ ၁၀ ရက် အထိလည်း မကျီးကုန်းကျေးရွာနဲ့ ၂ မိုင်ခန့်အကွာ စည်ပင်နဲ့သူဌေးကုန်းကျေးရွာတွေအနီးမှာ ပစ်ခတ်မှုတွေရှိနေပြီး လက်နက်ကြီးပစ်ခတ်သံတွေကြောင့် အိမ်ခြေ ၁၅၀ ကျော် လူဦးရေ ၅၀၀ ခန့်ရှိတဲ့ မကျီးကုန်းရွာခံတွေဟာ နီးစပ်ရာတောတိုက်တွေမှာ ထွက်ပြေးတိမ်းရှောင်နေကြရတယ်လို့ သိရပါတယ်။
စက်တင်ဘာ ၉ ရက်ကလည်း နွားထိုးကြီးမြို့နယ်၊ မကျီးကုန်းရွာကို စစ်ကော်မရှင်တပ်ဘက်က စက်တပ်လေထီးနဲ့ ဗုံးချခဲ့လို့ ပြည်သူ ၅ ဦးဒဏ်ရာရတယ်လို့ သိရပါတယ်။
စာတည်း – ဟိန်းစံ
မြေလတ်အသံ၊ အောက်တိုဘာ ၁၀၊ ၂၀၂၅။
တော်လှန်ရေးတပ်တွေ သိမ်းပိုက်ထိန်းချုပ်ထားတဲ့ စစ်ကိုင်းတိုင်း၊ ဗန်းမောက်မြို့ကို ပြန်လည်ထိုးစစ်ဆင်လာတဲ့ ရှမ်းနီအမျိုးသားတပ်-SNA နဲ့ စစ်ကော်မရှင်ပူးပေါင်းတပ်တွေ မြို့နဲ့ ၁ မိုင်အကွာကို ရောက်ရှိလာနေပြီလို့ ဒေသခံစစ်ရေးသတင်းရင်းမြစ်တွေဆီက သိရပါတယ်။
မြို့ကိုစွန့်ခွာသွားပြီးနောက် စက်တင်ဘာ ၂၇ ရက်က စတင်ကာ SNAပူးပေါင်းတပ်တွေက အင်အား ၂၀၀ နီးပါးနဲ့ ဗန်းမောက်မြို့နဲ့အနီးက တော်လှန်ရေးပူးပေါင်းတပ်တွေထိန်းချုပ်ထားတဲ့နေရာတွေကို ထိုးစစ်ဆင်တိုက်ခိုက်ခဲ့ရာ အောက်တိုဘာ ၁၀ ရက် ဒီကနေ့နေ့လယ်အထိ တိုက်ပွဲတွေဆက်တိုက်ပြင်းထန်နေတယ်လို့ ဆိုပါတယ်။
” ကြောင်လည်ရွာနားမှာ မနေ့ကလည်း တိုက်ပွဲဖြစ်တယ်။ ဒီနေ့လည်း ဖြစ်နေတယ်။ အဲ့ရွာကကိုယ့်ဘက်က ထိန်းချုပ်ထားတာ။ အခုလည်း ထိန်းထားတုန်းပဲ။ လက်နက်ကြီး၊ ဒရုန်းတွေတော်တော်ကိုသုံးပြီး ပစ်နေတာ SNA ဘက်က” လို့ မြေပြင်အခြေအနေကိုသိရှိတဲ့တော်လှန်ရေးတပ်ဖွဲ့ဝင်တဦးက မြေလတ်အသံကို ပြောပါတယ်။
လက်ရှိတိုက်ပွဲပြင်းထန်နေတဲ့ ကြောင်လည်ရွာဟာ ဗန်းမောက်မြို့နဲ့ ၁မိုင်ကျော်အကွာမှာရှိပြီး SNA ပူး ပေါင်းတပ်တွေရဲ့တကျော့ပြန်ထိုးစစ်ကာလ ၁၄ ရက်တာအတွင်း ဗန်းမောက်မြို့အနီးက တော်လှန်ရေးပူးပေါင်းတပ်တွေထိန်းချုပ်ထားတဲ့ ညောင်သာယာ၊ ခမိုး၊ အလယ်ရွာ၊ ရွှေကျောင်း၊ ခိုပြင်၊ ကံရွာတွေကို ပြန်လည်လက်လွှတ်ခဲ့ရတယ်လို့ သိရပါတယ်။
” လေယာဥ်၊ ဒရုန်း၊ လက်နက်ကြီးပစ်ကူတွေကို မခံနိုင်လို့ ဆုတ်ပေးလိုက်ရတာ”လို့ သူကဆက်ပြောပါတယ်။
စက်တင်ဘာ ၁၅ ရက်ကစတင်ကာ SNAနဲ့စစ်ကော်မရှင်ပူးပေါင်းတပ်တွေထိန်းချုပ်ထားတဲ့ ဗန်းမောက်မြို့ကို ကချင်လွတ်မြောက်ရေးတပ်-KIA၊ ပြည်သူ့ကာ ကွယ်ရေးတပ်ဖွဲ့-PDF ပူးပေါင်းတပ်ဖွဲ့တွေက မြို့သိမ်းတိုက်ပွဲဖော်ဆောင်ခဲ့ရာ ၆ ရက်အကြာ စက်တင်ဘာ ၂၁ ရက်မှာ စစ်ကော်မရှင်တပ်တွေ ဗန်းမောက်ကနေ ဆုတ်ခွာထွက်ပြေးသွားတာကြောင့် မြို့ကိုအလုံးစုံသိမ်းပိုက်ထိန်းချုပ်နိုင်ခဲ့တာပါ။
ဆုတ်ခွာသွားတဲ့ SNAပူးပေါင်းတပ်တွေဟာ အင်အားပြန်လည်စုဖွဲ့ပြီး စက်တင်ဘာ ၂၇ ရက်ကစတင်ကာ လက်ရှိအထိ တော်လှန်ရေးတပ်ဖွဲ့တွေထိန်းချုပ်ထားတဲ့နေရာတွေကို ပြန်လည်ထိုးစစ်ဆင်တိုက်ခိုက်လာတာလည်း ဖြစ်ပါတယ်။
ဗန်းမောက်မြို့နဲ့အနီးတဝိုက်စစ်ကော်မရှင်တပ်စခန်းတွေမှာ ရှမ်းနီအမျိုးသားတပ်-SNAရဲ့ဗျူဟာမှူး ရဉ်ထွန်း ဦးစီးတဲ့ တပ်မဟာ ၆၁၄ နဲ့ ၉၇၂၊ ရှေ့တန်းတပ်မ ၇၇ လက်အောက်တပ်တွေ၊ ရဲတပ်ဖွဲ့၊ ပျူစောထီးပူးပေါင်းအင်အား ၄၀၀ ခန့်က စုဖွဲ့တိုက်ခိုက်နေတာလည်း ဖြစ်ပါတယ်။
ဗန်းမောက်မြို့သိမ်းတိုက်ပွဲအတွင်း SNA ဗိုလ်အဆင့် ၁ ဦးအပါ စစ်တပ်ဘက်တော်သား ၆ ဦးသေဆုံးခဲ့ပြီး လက်နက်ငယ် ၅ လက်၊ ကျည်မျိုးစုံ ၁၃,၀၀၀ ကျော် ၊ ၁၂၀ မမ ဗုံးသီးအပါ ဗုံးသီးမျိုးစုံအလုံး ၃၀၀ ကျော် ၊ နင်းမိုင်း ၃လုံး၊ တိုက်မိုင်းမျိုးစုံ ၂၀ လုံး၊ ဖိုက်ဘာမိုင်း ၇လုံး၊ ကျည်အိမ်မျိုးစုံ ၂၉ ခုနဲ့အခြားဆက်စပ်ပစ္စည်းတွေသိမ်းဆည်းရရှိခဲ့တယ်လို့ အမှတ် ၁ စစ်ဒေသက ဖော်ပြထားပါတယ်။
စာတည်း – ဟိန်းစံ
ပေါင်းတလည်၊ အောက်တိုဘာ ၁၀၊ ၂၀၂၅ ။
ပဲခူးတိုင်းအနောက်ခြမ်း၊ ပြည်ခရိုင်၊ ပေါင်းတလည်မြို့မှာ ကျေးရွာလုံခြုံရေးနှင့်အကြမ်းဖက်နှိမ်နင်းရေး(လုံကြမ်း)နဲ့ ပြည်သူ့စစ်(ပျူစောထီး) ခေါင်းဆောင်တဦး ပစ်ခတ်ခံရပြီးသေဆုံးတယ်လို့ ပြည်ခရိုင်တပ်ရင်း ၂ က အောက်တိုဘာ ၁၀ ရက် ဒီကနေ့မှာ သတင်းထုတ်ပြန်ပါတယ်။
သေဆုံးသူမှာ အသက် ၆၀ နှစ်ခန့်ရှိ ခွေးရဲချင်းရုပ်ကုန်းကျေးရွာ လုံ/ကြမ်းနဲ့ပြည်သူ့စစ်ခေါင်းဆောင် ဦးလှမြင့် ဖြစ်ပြီး အောက်တိုဘာ ၆ ရက် မနက် ၁၀ နာရီခန့်မှာ သူနေထိုင်ရာ ခွေးရဲချင်းရုပ်ကုန်းရွာကနေ တဦးတည်းဆိုင်ကယ်နဲ့ထွက်လာချိန် ဝန်တင်ဆိပ်ကျေးရွာအနီးမှာ ပစ်ခတ်ခဲ့တာလို့ ဆိုပါတယ်။
” ဆေးကုလာရင်း မိတာ။ သူသွားတဲ့အချိန် သတင်းရလို့ပါ။ သူဖမ်းမိပြီးခေါ်သွားတဲ့အချိန်လမ်းမှာပြေးလို့ ပစ်ခတ်ခဲ့တယ်။ လိုက်လံဖမ်းဆီးပစ်ခတ်တဲ့အခါမှာ သေသွားတာ” လို့ ပြည်ခရိုင်တပ်ရင်း ၂ သတင်းနဲ့ပြန်ကြားရေးတာဝန်ခံ Red Star က ပြောပါတယ်။
ပစ်ခတ်ခံရလို့ ဦးလှမြင့်မှာ ဦးခေါင်းကျည်ထိဒဏ်ရာနဲ့နေရာမှာသေဆုံးသွားပြီး ၎င်းထံကနေ ဂတ်စ်အသုံးပြုပစ်ခတ်တဲ့ ပစ္စတိုသေနတ် ၁ လက်၊ ဆိုင်ကယ် ၁ စီး၊ ဖုန်း ၁ လုံးသိမ်းဆည်းရမိခဲ့တယ်လို့ ဆိုပါတယ်။
ဦးလှမြင့်ဟာ စစ်ကော်မရှင်လက်အောက် ကျေးရွာပြည်သူ့စစ်ခေါင်းဆောင်၊ ကျေးရွာပြည်သူ့လုံခြုံရေးနှင့်အကြမ်းဖက်နှိမ်နင်းရေးခေါင်းဆောင်တဦးဖြစ်သလို ဒေသတွင်းမှာ ပြည်သူ့စစ်(ပျူစောထီး)အင်အားစုဆောင်းတာ၊ လူငယ်တွေရဲ့အချက်အလက်တွေစုဆောင်းပြီး ပေါင်းတလည်ရဲစခန်းနဲ့စစ်ကော်မရှင်တပ်ဖွဲ့ဝင်တွေထံ ပေးပို့တာ၊ လူငယ်တွေကို စစ်မှုထမ်းဖို့ ပေါ်တာဆွဲတာတွေပြုလုပ်နေသူဖြစ်လို့ ပစ်ခတ်ရှင်းလင်းခဲ့တာလို့ ဆိုပါတယ်။
စစ်အာဏာသိမ်းပြီးနောက် ၂၀၂၄ ကစတင်ကာ စစ်ကော်မရှင်တပ်က စစ်မှုထမ်းဟောင်း၊ ရဲမှုထမ်းဟောင်းတွေ၊ ၎င်းတို့ကိုထောက်ခံသူတွေ၊ ကြံ့ခိုင်ရေးပါတီဝင်တွေနဲ့ ရပ်ကွက်၊ကျေးရွာ၊ မြို့နယ်အဆင့်အလိုက် ပြည်သူ့လုံခြုံရေးနှင့်အကြမ်းဖက်နှိမ်းနင်းရေးအဖွဲ့ ဖွဲ့စည်းကာ စစ်ကော်မရှင်တပ်၊ ရဲ၊ ပျူစောထီးတပ်ဖွဲ့တွေနဲ့ ပူးပေါင်းဆောင်ရွက်နေကြတာပါ။
သိမ်းဆည်းရမိ ဦးလှမြင့်လက်ကိုင်ဖုန်းကနေ ပေါင်းတလည်နဲ့ဝက်ထီးကန်နယ်မြေက ရပ်ကွက်၊ ကျေးရွာပြည်သူ့စစ်စာရင်းတွေရရှိထားပြီး စစ်ကော်မရှင်ထောက်တိုင်တွေနဲ့ စစ်ကော်မရှင်လုပ်မဲ့ရွေးကောက်ပွဲအတွက် ပူးပေါင်းဆောင်ရွက်သူတွေကို စုံစမ်းပြီးထိရောက်စွာအရေးယူသွားမယ်လို့ ဆိုပါတယ်။
စက်တင်ဘာ ၁၁ ရက်ကလည်း ပဲခူးတိုင်းအနောက်ခြမ်း၊ ပေါင်းတည်မြို့နယ်၊ ပန်းသင်းပင်ကျေးရွာမှာ ပျူစောထီးတပ်ဖွဲ့ဝင် ၁ ဦး လယ်ခင်းထဲအသွား ပစ်သတ်ခံရလို့ သေဆုံးသွားတယ်လို့ သိရပါတယ်။
စာတည်း – ဟိန်းစံ
မြေလတ်အသံ၊ အောက်တိုဘာ ၁၀၊ ၂၀၂၅။
မိုးရွာသွန်းခဲ့မှုကြောင့် စစ်ကိုင်းတိုင်း၊ အင်းတော်မြို့နယ်၊ နမီးချောင်းရေမြင့်တက်ခဲ့ရာ ပေ ၃၀၀ အရှည်ရှိတဲ့ သစ်သား တံတား ၂ စင်း ရေထဲမျှောပါသွားခဲ့တယ်လို့ ဒေသခံတွေဆီက သိရပါတယ်။
အဆိုပါတံတား ၂ စင်းဟာ နမီးချောင်းကို ဖြတ်ထိုးထားတဲ့ ကွင်းငို့ရွာတံတားနဲ့ ၄ မိုင်အကွာရှိ လေဘိုရွာတံတားတို့ ဖြစ်ကြပြီး အောက်တိုဘာ ၈ ရက်မှာ တံတားကိုယ်ထည်တခုလုံးဟာရေထဲမျှောပါသွားခဲ့တာလို့ဆိုပါတယ်။
“အင်းတော်တနယ်လုံးမိုးများတယ်။ နမီးချောင်းဖျားမှာ မိုးများတော့ရေတိုးပြီးဆင်းလာတယ်။ အမှိုက်တွေ၊ ဒိုက်တွေ ညိပြီးရေစောင့်လို့ပါသွားတာပါ။ ကွင်းငို့တံတားက ဒုတိယပါတာ။ လေဘိုတံတားက ပထမပါတာ” လို့ အင်းတော်ဒေသခံအမျိုးသားတဦးက ပြောပါတယ်။
အဆိုပါတံတား ၂ စင်းဟာ ကျေးရွာချင်းဆက်လမ်းမပေါ်မှာတည်ရှိတာကြောင့် ကုန်းခါး၊ နောင်ကွတ်ညောင်ပင်ဆိပ်၊ လေဘို၊ နမီး၊ ကွင်းငို့၊ နားဖာ၊ နားမကြိုင်း၊ ငေါ်တုန်းစီစတဲ့ ကျေးရွာတွေအတွက် တရွာနဲ့တရွာစျေးရောင်းဝယ်ရေးနဲ့ သွားလာရေးအခက်အခဲ ဖြစ်နေကြတယ်လို့ အထက် ပါအမျိုးသားက ဆိုပါတယ်။
လက်ရှိမှာ ဒေသခံတွေအနေနဲ့ တရွာနဲ့တရွာသွားလာမှုပြုလုပ်ဖို့ လှေတွေမရှိတာကြောင့် နမီးချောင်းကိုရေကူးပြီး သွားလာနေကြရတယ်လို့ ဒေသခံတွေကပြောပါတယ်။
အောက်တိုဘာ ၉ ရက်မနက်ပိုင်းကစတင်ပြီး အောက်တိုဘာ ၁၀ ရက်ဒီကနေ့အထိ မိုးရွာ သွန်မှုရပ်တန့်သွားခဲ့တာကြောင့် ရေထဲမျှောပါသွားတဲ့ အထက်ပါတံတား ၂ စင်းကို ဒေသခံကျေးရွာသားတွေကဆယ်ယူနေကြပြီး ပြန်လည်ပြင်ဆင်တာတော့မရှိသေးဘူးလို့ သူကဆိုပါတယ်။
ကွင်းငို့တံတားဟာ ပြီးခဲ့တဲ့ ၂၀၁၈ ရေကြီးမှုမှာ ၁ ကြိမ်ပျက်စီးခဲ့တာကြောင် NLD အစိုးရက ချပေးတဲ့ ဒေသဖွံ့ဖြိုးရေးရံပုံငွေနဲ့ ရွာသားတွေဆီကထည့်ဝင်တဲ့အလှူငွေတွေပေါင်းကာ တံတားတိုင်ကို အုတ်တိုင်လုပ်ပြီး ပြန်လည်ဆောက်လုပ်ထားခဲ့တာလို့ ဒေသခံတွေဆီက သိရပါတယ်။
စာတည်း – လင်း
မြေလတ်အသံ၊အောက်တိုဘာ ၁၀၊ ၂၀၂၅။
စစ်ကိုင်းတိုင်းအထက်ပိုင်း၊ မော်လိုက်မြို့နယ်အတွင်းက စစ်ကော်မရှင်တပ်စခန်း ၆ ခုကို ၂ လအတွင်း သိမ်းပိုက်ရရှိခဲ့တယ်လို့ မော်လိုက်ဒေသကာကွယ်ရေးတပ်ဖွဲ့တွေစုပေါင်းဖွဲ့စည်းထားတဲ့ မော်လိုက်တော်လှန်ရေးအင်အားစုက အောက်တိုဘာ ၉ ရက်မှာ ထုတ်ပြန်ပါတယ်။
ပြီးခဲ့တဲ့ ဩဂုတ်နဲ့ စက်တင်ဘာလတွေအတွင်းမှာ စစ်ကော်မရှင်တပ်နဲ့ပျူစောထီးတပ်ဖွဲ့တွေ ပူးပေါင်းအထိုင်ချတပ်စွဲနေတဲ့ ထော်သာ၊ တောင်းအင်၊ ညောင်ဝန်း၊ နောင်ပိန်း၊ အော်ဇီးခုံ၊ နားပင်ရွာစခန်းတွေကို သိမ်းပိုက်ရရှိခဲ့တာဖြစ်ပြီး ထော်သာရွာစခန်းသိမ်းတိုက်ပွဲမှာ စစ်ကော်မရှင်တပ်ဖွဲ့ဝင် ၆ ဦးနဲ့ ထွက်ပြေးသွားတဲ့ပျူစောထီးတွေရဲ့မိသားစုဝင် စုစုပေါင်း ၂၀၀ နီးပါးကို ဖမ်းမိခဲ့တယ်လို့ ဆိုပါတယ်။
“သိမ်းပိုက်ထားတဲ့ စစ်ကော်မရှင်တပ်စခန်း ၆ခုရဲ့တိုက်ပွဲအခြေအနေအသေးစိတ်တွေကို အမှတ် ၁ စစ်ဒေသက ဆက်လက်ထုတ်ပြန်သွားမှာဖြစ်တယ်”လို့ မော်လိုက်တော်လှန်ရေးအင်အားစု တာဝန်ရှိသူတဦးက မြေလတ်အသံကို ပြောပါတယ်။
“သိမ်းငှက်စစ်ဆင်ရေး” လို့အမည်ပေးထားတဲ့ အဲ့ဒီတိုက်ခိုက်မှုမှာ စစ်ကော်မရှင်တပ်စခန်း ၆ ခုအထိသိမ်းပိုက်ရရှိခဲ့ပြီး စခန်း ၆ ခုအနက် ထော်သာရွာစခန်းဟာ ပျူစောထီးအားကောင်းတဲ့စခန်းဖြစ်ကာ ခမရ ၃၆၆၊ ရှေ့တန်းတပ်မ ၈၈ လက်အောက်တပ်ရင်းတွေနဲ့ ရွာခံပျူစောထီးတွေ ပူးပေါင်းတပ်စွဲနေတာလို့ ဆိုပါတယ်။
ထော်သာပျူစောထီးစခန်းသိမ်းတိုက်ပွဲအတွင်း ပျူစောထီးခေါင်းဆောင် အဲပန်အပါ ပျူစောထီးမိသားစုဝင် ၁၉၀ ဦးကို ဖမ်းဆီးနိုင်ခဲ့သလို ၆၀ မမ စိန်ပြောင်း၊ RPG အပါအဝင် လက်နက်မျိုးစုံ ၂၃ လက်၊ ခဲယမ်းနဲ့ ငွေကျပ် သိန်း ၁၅၀ ကျော်ကို သိမ်းဆည်းရရှိခဲ့တယ်လို့ အမှတ် ၁ စစ်ဒေသက သြဂုတ် ၂၁ ရက်မှာထုတ်ပြန်ပါတယ်။
ဒါ့အပြင် စခန်းအတွင်းက စစ်ကော်မရှင်တပ်သားအလောင်း ၃လောင်း ရရှိခဲ့ပြီး စစ်သားနဲ့ပျူစောထီး ၉ ဦးထိခိုက်ဒဏ်ရာရရရှိခဲ့ကာ ပျူစောထီး ၂၀ ဦးခန့် ထွက်ပြေးလွတ်မြောက်ခဲ့တယ်လို့ အမှတ်-၁ စစ်ဒေသ ထုတ်ပြန်ချက်မှာဖော်ပြပါတယ်။
သိမ်းငှက်စစ်ဆင်ရေးစခန်းသိမ်းတိုက်ပွဲတွေကို မော်လိုက်ခရိုင်တပ်ရင်း ၁၊၂၊ ၃၊ ၄ မော်လိုက်နဲ့ဖောင်းပြင်မြို့နယ်ပြည်သူ့ကာကွယ်ရေးတပ်ဖွဲ့(ပကဖ)၊ ပြည်သူ့လုံခြုံရေးတပ်ဖွဲ့ (ပလဖ)၊ ခရိုင်ကွပ်ကဲရေးရုံးတိုက်ခိုက်ရေးအဖွဲ့တို့က ပူးပေါင်းဖော်ဆောင်ခဲ့တာလို့သိရပါတယ်။
မြေလတ်အသံ၊ အောက်တိုဘာ ၉၊ ၂၀၂၅။
မြေလတ်ဒေသကသတင်းတွေကို တင်ဆက်ပေးနေတဲ့ မြေလတ်အသံသတင်းဌာနရဲ့ တနေ့တာသတင်း အစီအစဉ်ဖြစ်ပါတယ်။
စတဲ့သတင်းတွေကို တင်ဆက်ထားပါတယ်။
မြေလတ်အသံ၊ အောက်တိုဘာ ၉၊ ၂၀၂၅။
ပြည်သူ့ရှေ့ဆောင်ပါတီ PPP ကနေ ရွေးကောက်ပွဲဝင်ရောက်ဖို့ တာဝန်ထမ်းဆောင်ဆဲ စစ်တပ်အရာရှိတချို့ကို စစ်ကော်မရှင်တပ်ထံ တောင်းခံခဲ့ပေမယ့် မရခဲ့ဘူးလို့ အဲ့ဒီပါတီဥက္ကဌ ဒေါ်သက်သက်ခိုင်က ပြောဆိုလိုက်ပါတယ်။
ယမန်နေ့ အောက်တိုဘာ ၈ ရက်က ရန်ကုန်မြို့မှာပြုလုပ်တဲ့ PPP ပါတီရဲ့ သတင်းစာရှင်းလင်းပွဲမှာ ပါတီဥက္ကဌ ဒေါ်သက်သက်ခိုင် က အခုလို ပြောဆိုခဲ့တာပါ။
စစ်ကော်မရှင်က လာမယ့် ဒီဇင်ဘာလမှာပြုလုပ်မယ့်ရွေးကောက်ပွဲမှာ PPP ပါတီကနေ ကိုယ်စားလှယ်အဖြစ် ဝင်ရောက်ယှဥ်ပြိုင်နိုင်ဖို့ အလယ်အလတ်အဆင့်ရှိတပ်လူငယ်အရာရှိ ၈ ဦးကို စစ်ကော်မရှင်တပ်ထံ တောင်းခံခဲ့တယ်လို့ သူက ဆိုပါတယ်။
” ကျမတို့ပါတီကို လာချင်တဲ့ တပ်မတော်သားအလယ်အလတ်အပိုင်းတွေရှိပါတယ်။ လူငယ်ပိုင်းတွေ ရှိပါတယ်။ ကျမလည်း ၈ ယောက်တော့ တောင်းလိုက်ပါတယ်။ by name နဲ့ တောင်းလိုက်တာပါ။ တောင်းလိုက်တော့ မပေးပါဘူးရှင့်။ အဲ့တာကတော့ ဒါ အရှင်းဆုံးအဖြေပါပဲ။ ဒါအမှန်အတိုင်းပါပဲ။ ကျမ တပ်မတော်သား ၈ ယောက်ကိုတောင်းတယ် ကာယကံရှင်တွေရဲ့ ဆန္ဒလည်းရှိတယ်။ သို့ သော်လည်း ကျမတို့ပါတီကို တပ်မတော်က မပေးပါဘူး” လို့ ဒေါ်သက်သက်ခိုင်က ပြောပါတယ်။
စစ်ကော်မရှင်ရဲ့ ရွေးကောက်ပွဲမှာ ဝင်ရောက်ယှဥ်ပြိုင်ဖို့ စစ်ကော်မရှင်တပ်က ၎င်းတို့နဲ့ နီးစပ်တဲ့ ကြံ့ ခိုင်ရေးနဲ့ဖွံ့ဖြိုးရေးပါတီ(ပြည်ခိုင်ဖြိုး)နဲ့ တိုင်းရင်းသားစည်းလုံးညီညွတ်ရေးပါတီ(တစည) ပါတီတွေကို ထိပ်ပိုင်းဗိုလ်ချုပ်ကြီးတွေအပါအဝင် ရာနဲ့ချီတဲ့စစ်ကော်မရှင်တပ်ဖွဲ့ဝင် ပြီးခဲ့တဲ့စက်တင်ဘာလကုန်ပိုင်းက အရပ်ဝတ်လဲ ပို့ဆောင်ခဲ့တယ်လို့ တပ်တွင်းသတင်းတွေနဲ့ သုံးသပ်ချက်တွေကို ဖော်ပြနေတဲ့ CDM တပ်မတော်သား ဗိုလ်ကြီး ဇင်ယော် က ရေးပါတယ်။
အဲ့ဒီလို ရွေးကောက်ပွဲအတွက် ပါတီ ၂ ခုကို တပ်အရာရှိတွေ အရပ်ဝတ်လဲပို့ဆောင်ခဲ့တာတွေရှိနေလို့ PPP အနေနဲ့ စစ်တပ်လူငယ်အရာရှိတချို့ကို တောင်းခံခဲ့ပေမယ့် မရရှိခဲ့တာလို့ ဆိုပါတယ်။
စစ်အာဏာသိမ်းပြီးတဲ့နောက် PPP ဥက္ကဌ ဒေါ်သက်သက်ခိုင် ဟာ စစ်ကော်မရှင်လက်အောက် ဟိုတယ်ခရီးနဲ့ လူကယ်ပြန်ဌာနဝန်ကြီးတွေအဖြစ် တာဝန်ယူခဲ့တာကြောင့် ပြည်သူအများရဲ့ ဝေဖန်မှုခံခဲ့ရပြီး လက်ရှိ ၎င်းဦးဆောင်တဲ့ PPP ပါတီဟာ စစ်ကော်မရှင်ပြုလုပ်မယ့် ရွေးကောက်ပွဲမှာလည်း တနိုင်ငံလုံးအတိုင်းအတာအနေနဲ့ ဝင်ရောက်ယှဥ်ပြိုင်မယ်လို့လည်း ထုတ်ပြန်ထားပါတယ်။