ဆော၊ ဇွန် ၆ ၊၂၀၂၅။

မကွေးတိုင်း၊ ဆောမြို့နယ်၊ ညောင်ကန်ကျေးရွာကို စစ်ကောင်စီတပ်က လေကြောင်းကနေ ဗုံးကြဲတိုက်ခိုက်ခဲ့တာကြောင့် အမျိုးသား ၃ ဦးသေဆုံး၊ ၆ ဦး ဒဏ်ရာရခဲ့တယ်လို့ ဒေသခံတွေဆီက သိရပါတယ်။

ဇွန် ၅ ရက် နေ့လယ် ၂ နာရီခန့်မှာ ညောင်ကန်ကျေးရွာက ရခိုင်ပြည်နယ်ကိုထွက်ခွာမယ့် ကုန်တင်ကားတွေရပ်နားထားတဲ့နေအိမ်ကို တိုက်ခိုက်ရေးလေယာဥ် ၁ စီးနဲ့ ဗုံး ၁ လုံးကြဲချခဲ့ရာ နေအိမ်ပေါ်ကျရောက်ပေါက်ကွဲခဲ့တယ်လို့ ဆိုပါတယ်။

” (ကုန်တင်)ကားတွေထားတဲ့ အိမ်ပေါ်တည့်တည့်ကြီးကိုကျတာ။ အဲ့ဒီအိမ်မှာကကုန်သည်တွေပဲ စုနေကြတာ။ ရခိုင်ကိုထွက်မယ့်ကားတွေ”လို့ ဆောမြို့ခံတဦးက မြေလတ်အသံကို ပြောပါတယ်။

လေယာဥ်ဗုံးကြောင့် (အမည်စိစစ်ဆဲ) ရခိုင်ကုန်သည်အမျိုးသား ၁ ဦး၊ ကုန်ကားမောင်းနှင်သူ ကိုဝင်းစိုး၊ ကုန်တင်ကုန်ချလုပ်သား ကိုကျော်သက် တို့ ၃ ဦးနေရာမှာ သေဆုံးခဲ့ကြကာ နောက်ထပ်အမျိုးသား ၆ ဦး ဒဏ်ရာရရှိခဲ့ပြီး အဲ့ဒီထဲက ၅ ဦးမှာ ဒဏ်ရာပြင်းထန်တယ်လို့ သိရပါတယ်။

ဒါ့အပြင် ဗုံးပေါက်ကွဲမှုကြောင့် နေအိမ်ဝန်းအတွင်းရှိ ကုန်ပစ္စည်းတွေတင်ဆောင်တဲ့ ၆ ဘီးကား ၂ စီးနဲ့ ဂျက်ပလူးအမျိုးအစား ကား ၁ စီး မီးလောင်ပျက်စီးခဲ့သလို နေအိမ်ပါပြိုကျပျက်စီးခဲ့တယ်လို့ အထက်ပါအမျိုးသားက ဆိုပါတယ်။

သေဆုံး ရခိုင်ကုန်သည်အမျိုးသားရဲ့ ရုပ်အလောင်းကို အခင်းဖြစ်နေရာကနေ ရခိုင်ပြည်နယ်ကို သယ်ယူသွားတယ်လို့ သူက ဆိုပါတယ်။

ပြီးခဲ့တဲ့မေ ၁ ရက်ကလည်း အညာကတင်းကျေးရွာကို စစ်ကောင်စီတပ်က လေကြောင်းကနေ ဗုံးကြဲတိုက် ခိုက်ခဲ့တာကြောင့် ၈ နှစ်အရွယ်ကလေး ၁ ဦးအပါ အမျိုးသမီး ၄ ဦးသေဆုံးခဲ့တယ်လို့ သိရပါတယ်။

စာတည်း – ဟိန်းစံ

စလင်း၊ ဇွန် ၃၊ ၂၀၂၅။

မကွေးတိုင်း၊ စလင်းမြို့နယ်၊ ဆွယ်တည်ရွာသစ်နဲ့ ဆွယ်တည်ရွာမကျေးရွာတွေက စာသင်ကျောင်းတွေ လေယာဥ်နဲ့ဗုံးကြဲတိုက်ခိုက်ခံရပြီး အမျိုးသား ၁ ဦး သေဆုံးကာ အမျိုးသမီး ၁ ဦးထိခိုက်ဒဏ်ရာရရှိခဲ့တယ်လို့ ဒေသခံတွေဆီက သိရပါတယ်။

ဇွန် ၃ ရက် ဒီကနေ့ နေ့လယ် ၁၁ နာရီ ၃၄ မိနစ်လောက်မှာ ဆွယ်တော်ရွာမ စာသင်ကျောင်းကို ဗုံး ၁ လုံး၊ နေ့လယ် ၁၁ နာရီ ၃၅ မိနစ်မှာ ဆွယ်တည်ရွာသစ်စာသင်ကျောင်းကို ဗုံး ၁ လုံး ကြဲချတိုက်ခိုက်သွားတာဖြစ်ပြီး စာသင်ကျောင်းနဲ့ အနီးနားနေအိမ်တွေပေါ်ကျရောက်ပေါက်ကွဲခဲ့တယ်လို့ ဆိုပါတယ်။

“ စာသင်ကျောင်းတွေမှာ စာသင်ကြားနေတာမရှိပါဘူးရှင့်။ ဆွယ်တည်ရွာသစ်နဲ့ ဆွယ်တည်ရွာမက ကပ်နေတဲ့အတွက် ၁ မိနစ်အတွင်းမှာချတာပါ၊ ပေါင်(ဗုံးအမျိုးအစား)ကတော့ ဘယ်လောက်လည်း မသိဘူး၊ အသံကတော့တော်တော်ပြင်းပါတယ်။ လယ်ထဲကနေ မြက်ရိတ်ပြန်လာတဲ့ ဇနီးမောင်နှံ ၂ ဦးထိပါတယ်၊ အမျိုးသမီးကတော့ မြောင်းထဲက ပေါင်း(ဘောင်) အောက်မှာ ခိုလိုက်တဲ့အတွက် ဒဏ်ရာအနည်းငယ်ရပြီးတော့ အမျိုးသားကတော့ သေဆုံးပါတယ်” လို့ စလင်းမြို့ခံအမျိုးသမီးတဦးက မြေလတ်အသံကို ပြောပါတယ်။

ဗုံးပေါက်ကွဲမှုကြောင့် ဆွယ်တည်ရွာမကျေးရွာနေ အသက် ၃၀ နှစ်ဝန်းကျင်ရှိအမျိုးသားသေဆုံးခဲ့ပြီး ၎င်းရဲ့ဇနီးဖြစ်သူ အမျိုးသမီးမှာ ထိခိုက်ဒဏ်ရာရရှိခဲ့ကာ ဆွယ်တည်ရွာသစ် စာသင်ကျောင်းဆောင်တခုလုံး ပျက်စီးခဲ့တယ်လို့ သိရပါတယ်။

လေကြောင်းတိုက်ခံရမှုကြောင့် အိမ်ခြေ ၁၃၅၊ လူဦးရေ ၆၀၀ ကျော်ရှိ ဆွယ်တည်ရွာမ နဲ့ အိမ်ခြေ ၆၀၊ လူဦးရေ ၂၅၀ ရှိ ဆွယ်တည်ရွာသစ်က ဒေသခံတွေဟာ ဘေးလွတ်ရာကိုတိမ်းရှောင်နေကြတယ်လို့ သိရပါတယ်။

စာတည်း – ဟိန်းစံ

မြေလတ်အသံ၊ ဇွန် ၂၊ ၂၀၂၅။

မကွေးတိုင်း၊ ပခုက္ကူအခြေစိုက်တပ်မ ၁၀၁ ကနေ လက်နက်၊ ရိက္ခာနဲ့ စစ်အင်အားရာကျော် တင်ဆောင်လာတဲ့ယာဥ်တန်းဟာ ဇွန် ၁ ရက်ကစပြီးပခုက္ကူမြို့ကထွက်လာတယ်လို့ မြေပြင်အခြေအနေကို သိရှိတဲ့ဒေသခံတွေဆီကသိရပါတယ်။

စစ်ကောင်စီတပ်ဖွဲ့ဝင် ၄၀၀ ဝန်းကျင်လိုက်ပါလာတဲ့ စစ်ကားနဲ့ပြည်သူပိုင်ကား ၁၂၆ စီးဟာ နေ့လယ် ၂ နာရီကျော်မှာစတင်ထွက်ခွာလာတာဖြစ်ပြီး ပေါက်မြို့နယ်နဲ့ မြိုင်မြို့နယ်ရှိ ပျူစောထီးအထိုင်စခန်းတွေဆီကိုသွားနေတာလို့ ဆိုပါတယ်။

ကားတန်းလာရာလမ်းတလျောက်မှာ စစ်ကောင်စီဘက်ကကင်းပုန်းတွေချထားတယ်လို့လည်း မြေပြင်အခြေအနေကိုသိရှိထားသူဖြစ်တဲ့ မြိုင်ဒေါင်းမင်းက ပြောပါတယ်။

“ကားတန်းက ပခုက္ကူ-ပေါက်လမ်းမအတိုင်းထွက်လာတာဗျ။ လမ်းတလျောက်ကိုတော့ ကင်းပုန်းတွေ ချထားတယ်။ စကစ အင်အားများတော့ တော်လှန်ရေးအဖွဲ့တွေက မိုင်းခွဲတိုက်လိုက်တာ အနည်းအကျဥ်းလောက်ပဲလုပ်နိုင်တယ်ဗျ” လို့ သူကဆိုပါတယ်။

ဇွန် ၂ ရက်ဒီနေ့လယ် ၂ နာရီကျော်မှာတော့ အထက်ပါစစ်ယာဥ်တန်းဟာ ပခုက္ကူမြို့နယ်၊ ကန်တော်စံပြကျေးရွာအနောက်ဘက်ရှိ စစ်ကောင်စီတပ်ဂိတ်မှာပဲ ရောက်ရှိနေတယ်လို့ မြိုင်ဒေါင်းမင်းကဆိုပါတယ်။

စစ်ယာဥ်တန်းလာတဲ့လမ်းတလျောက်မှာ တော်လှန်ရေးတပ်တွေဘက်က မိုင်းဆွဲတိုက်ခိုက်တာတွေရှိသလို စစ်ကောင်စီဂိတ်တွေမှာ နားရင်းသွားတဲ့အတွက် အဆိုပါစစ်ကြောင်းဟာ လမ်းမှာပဲ အချိန်ကြာမြင့်နေတယ်လို့ ဆိုပါတယ်။

လက်ရှိအချိန်ထိစစ်ကြောင်းထိုးတာမျိုးမရှိသေးဘဲ စစ်ရေးအခြေအနေလည်းငြိမ်သက်နေတယ်လို့ သူကဆက်ပြောပါတယ်။

အဆိုပါယာဥ်တန်းထွက်ခွာလာတဲ့ ဇွန် ၁ ရက်ကစလို့ ပခုက္ကူ-ပေါက်-မြိုင်အစပ်ကားလမ်း နံဘေးမှာရှိတဲ့ ပခုက္ကူမြို့နယ်က ကံရက်ကြီးရွာ၊ ကံရက်ကလေးရွာ၊ ရွာသာယာရွာ၊ ညောင်ပင်လှ၊ ကန်တော်ရွာ၊ မြိုင်မြို့နယ်က ကံမြင့်ကုန်းရွာနဲ့ ပေါက်မြို့နယ်ရှိ ရေပြာနဲ့ ရွှေလံရွာက ဒေသခံတွေလည်းရွာကတိမ်းရှောင်နေကြတယ်လို့ သိရပါတယ်။

စာတည်း – လင်း

ဖမ်းခံရသူတွေက Non CDM နဲ့မိသားစုတွေလို့ စစ်ကောင်စီတယ်လီဂရမ်တွေမှာဖော်ပြ

မြေလတ်အသံ၊ မေ ၂၉၊ ၂၀၂၅။

မကွေးတိုင်း၊ စေတုတ္တရာမြို့နယ်၊ ပွင့်တောက်ရွာအနီး မုန်းချောင်းစက်လှေဆိပ်မှာ လူ ၈ ဦးကို လက်နက်ကိုင်ဆောင်ထားသူတွေက ဖမ်းဆီးခေါ်ဆောင်သွားကြောင်း ဒေသခံတွေထံက သိရပါတယ်။

ဖမ်းဆီးခံရသူတွေဟာ ပျူစောထီးအားကောင်းတဲ့လက်ပံကျင်းကျေးရွာမှာနေထိုင်တဲ့ အမျိုးသမီး ၅ ဦး၊ အမျိုးသား ၃ ဦးဖြစ်ပြီး အထက်ပါကျေးရွာစက်လှေဆိပ်ကနေ စေတုတ္တရာမြို့ကို သွားရောက်ဖို့ စက်လှေစောင့်ဆိုင်းနေစဥ် မေ ၂၅ ရက် မနက်ပိုင်းက ဖမ်းဆီးခံခဲ့ရတာလို့ ဆိုပါတယ်။

“ လက်ပံကျင်းကျေးရွာကမို့လို့ကို ဖမ်းထားတဲ့သဘောပါ ” လို့ ဖြစ်စဥ်ကိုသိရှိထားတဲ့ စေတုတ္တရာဒေသခံတဦးက မြေလတ်အသံကို ပြောပါတယ်။

လက်ပံကျင်းရွာဟာ စေတုတ္တရာမြို့နယ်တွင်း ပျူစောထီးအားအကောင်းဆုံးရွာတခုဖြစ်ပြီး ကျေးရွာအတွင်းမှာ စစ်ကောင်စီတပ်အင်အား ၅၀ ခန့်အပါ ပျူစောထီးနဲ့ စစ်ကောင်စီတပ်ဖွဲ့ ၁၀၀ ကျော်ဝန်းကျင် အထိုင်ချတပ်စွဲထားတယ်လို့ သိရပါတယ်။

“ လက်ပံကျင်းဆိုရင် ပျူပေါ့၊ လုံးကြီးရွာကို မီးရှို့တာတွေ၊ တခြားရွာတွေကကျွဲတွေ၊ နွားတွေသတ်တာတွေကစ နာမည်ကြီးပါတယ်” လို့ အထက်ပါဒေသခံက ပြောပါတယ်။

လက်ပံကျင်းရွာဟာ ပျူစောထီးအားကောင်းတဲ့ရွာဖြစ်တဲ့အလျောက် အနီးနားကျေးရွာတွေက ဒေသခံအမျိုးသားတွေကို ပျူစောထီးတပ်ဖွဲ့ဝင်တွေအဖြစ် စစ်သင်တန်းပေးနေပြီး ၎င်းရွာနဲ့အနီးတဝိုက်ရှိ လုံးကြီးရွာ၊ ဘူးရွာတွေကို မကြာခဏမီးရှို့တာ ကျေးရွာတွင်းတိရစ္ဆာန်တွေနဲ့ပစ္စည်းတွေကို ယူဆောင်တာတွေ လုပ်ဆောင်လေ့ရှိတယ်လို့ သိရပါတယ်။

အဆိုပါ ဖြစ်စဥ်နဲ့ပတ်သက်ပြီး စစ်ကောင်စီသတင်းထုတ်ပြန်ရေးတယ်လီဂရမ်ချန်နယ် News Of Myanmar မှာ ဖမ်းဆီးခံရသူတွေဟာ စေတုတ္တရာမြို့နယ်အတွင်းက စစ်ကောင်စီလက်အောက်ပညာရေးဝန်ထမ်းတွေနဲ့မိသားစုဝင်တွေဖြစ်ပြီး PDF တပ်ဖွဲ့က ဖမ်းဆီးသွားတာဖြစ်တယ်လို့ ဖော်ပြပါတယ်။

“ မကွေးတိုင်းဒေသကြီး၊ စေတုတ္တရာမြို့နယ်၊ လက်ပံကျင်းကျေးရွာနေသူများဖြစ်ကြသည့် ရေသောင်ကျေးရွာ၊ အခြေခံပညာအထက်တန်းကျောင်းခွဲမှ အထက်တန်းပြဆရာမဖြစ်သူ ဒေါ်ဖြိုးဝေမြင့် (၃၀) နှစ်နှင့်တောင်ဟန်ဒေါက်ကျေးရွာ၊ အခြေခံပညာမူလတန်းကျောင်းမှ လက်ထောက်မူလတန်းပြဆရာမ ဖြစ်သူ ဒေါ်ချိုသဇင်ဦး (၂၆) နှစ်တို့ ၂ ဦးသည် စေတုတ္တရာမြို့နယ်ပညာရေးမှူးရုံးသို့ လည်းကောင်း၊ မကွေးပညာရေးကောလိပ်မှ ပထမနှစ်ကျောင်းသား ဇော်ဇော်အောင် (၂၀) နှစ်၊ တတိယနှစ်ကျောင်းသူ မနွေးနွေးလှိုင် (၂၁) နှစ်နှင့် မခင်မိုးဝေ (၂၀) နှစ်၊ ပခုက္ကူပညာရေးကောလိပ်မှ ဒုတိယနှစ်ကျောင်းသူ မခင်စုစုလှိုင် (၂၀) နှစ်၊ မခင်မိုးဝေ၏ဖခင် ဦးလှမိုး (၄၈) နှစ်၊ မနွေးနွေးလှိုင်၏ဖခင် ဦးသန်းထွန်း (၅၆) နှစ်တို့ ၆ ဦးသည် ၎င်းတို့သက်ဆိုင်ရာ ပညာရေးကောလိပ်များသို့လည်းကောင်း၊ ဒေါ်ပပဝင်း (၂၉) နှစ်သည် ရန်ကုန်မြို့သို့လည်းကောင်း အသီးသီးသွားရောက်ရန် ပွင့်တောက်ကျေးရွာရှိ စက်လှေဆိပ်ကမ်း၌ စက်လှေအား စောင့်ဆိုင်းနေစဉ် PDF အကြမ်းဖက်သမားများ ရောက်လာပြီး ၎င်းတို့ ၉ ဦးအား ပွင့်တောက်ကျေးရွာ၏မြောက်ဘက် ၃ မိုင်ခန့်အကွာရှိ မကြီးကျေးရွာဘက်သို့ ဖမ်းဆီးခေါ် ဆောင်သွားကြောင်းသိရသည်” လို့ News Of Myanmar က ဖော်ပြပါတယ်။

ဖမ်းဆီးခံရသူတွေနဲ့ ပတ်သက်ပြီး အသေးစိတ်မသိရသေးဘဲ အဆိုပါဖမ်းဆီးမှုနဲ့ပတ်သက်ပြီး သက်ဆိုင်ရာဒေသတွင်းတပ်ဖွဲ့တွေဘက်က သတင်းထုတ်ပြန်တာမတွေ့ရသေးသလို မေးမြန်းနိုင်ဖို့ ဆက်သွယ်ပေးမယ့် အဆက်အသွယ်မရသေးပါဘူး။

စာတည်း – ဟိန်းစံ

မကွေး၊ မေ ၂၇၊ ၂၀၂၅။

မကွေးအကျဥ်းထောင်မှာ နိုင်ငံရေးအကျဥ်းသား ၂ ဦး သေနတ်ပစ်ခံရပြီးသေဆုံးခဲ့အပြင် နောက်ထပ် နိုင်/ကျဥ်း ၂၀၀ ကျော်ကိုလည်း တိုက်ပိတ်ထားတယ်လို့ မေ ၂၇ ရက်မှာ မြန်မာနိုင်ငံလုံးဆိုင်ရာ နိုင်ငံရေးအကျဥ်းသားများကွန်ရက် – PPNM က ထုတ်ပြန်ပါတယ်။

ပြီးခဲ့တဲ့ဧပြီ ၁၃ ရက်ညနေ ၆ နာရီအချိန်က ထောင်ပြင်ပမှာ စစ်ကောင်စီတပ်နဲ့ တော်လှန်တပ်ဖွဲ့တွေ တိုက်ပွဲဖြစ်ပွားခဲ့ပြီးနောက် ထောင်အာဏာပိုင်တွေနဲ့ နိုင်ငံရေးအကျဥ်းသားတွေကြား အချင်းများပြီး နှစ်ဘက်ထိတွေ့မှုဖြစ်ပွားချိန် အာဏာပိုင်တွေကသေနတ်နဲ့ပစ်ခတ်ခဲ့ရာ နိုင်/ကျဥ်း စောရွှေအောင် အပါအဝင် ၂ ဦးသေဆုံးခဲ့ပြီး ဦးဝင်းဝင်းနဲ့ ကိုဖြိုးအပါအဝင် ၂၀၀ ဦးကျော်ကိုလည်း မေ ၂၇ ရက်ဒီနေ့အထိ တိုက်ပိတ်ဒဏ်ခတ်ထားတာလို့ ဆိုပါတယ်။

“သေဆုံးမှုအပေါ် ကျူးလွန်ခဲ့တဲ့သူတွေကို အခုအချိန်ထိ အရေးယူမှုမရှိသေးဘူး။ နောက်ဆက်တွဲအနေနဲ့ ဒီလိုမျိုးဖြစ်စဥ်မှာ ပါဝင်ခဲ့တယ်လို့ သူတို့သတ်မှတ်ထားတဲ့သူတွေကို ခေါ်ယူစစ်ဆေးမေးမြန်းတာ၊ တိုက်ပိတ်အပြစ်ဒဏ်ပေးတာ”လို့ PPNM ဦးဆောင်ကော်မတီဝင် ကိုသိုက်ထွန်းဦးက ပြောပါတယ်။

ဒါ့အပြင် အခန်း ၁ ခန်းမှာ ၃ ဦးကနေ ၇ ဦးလောက်ထိ တိုက်ပိတ်ပြီး ပြစ်ဒဏ်ပေးတာတွေလည်းရှိတယ်လို့ သူကဆက်ပြောပါတယ်။

“အဲလိုအခန်းတွေမှာ လူ ၃ ယောက်ကနေ ၅ ယောက်လောက်ထိတိုက်ပိတ်လို့ရတယ်။ တကယ်တော့ လူ ၃ယောက်လာက်ဆိုရင် ကျပ်ကျပ်ညပ်ညပ်ဖြစ်နေပေမယ့် တိုက်ပိတ်ပြစ်ဒဏ်ပေးတဲ့အခါမှာ တခန်းကို ၃ ဦး ကနေ ၅ ဦးအထိ အခန်းတခန်းတည်းမှာ ပိတ်လှောင်ထားတာရှိတယ်။ပြီးတော့ တခန်းမှာ ၅ ဦးကနေ ၇ ဦးအထိလည်း တိုက်ပိတ်လေ့ရှိပါတယ်”လို့ သူကဆိုပါတယ်။

ထောင်အာဏာပိုင်တွေက အဆိုပါတိုက်ပွဲဖြစ်ပွားတဲ့ကိစ္စမှာ နိုင်ငံရေးအကျဉ်းသားတွေပါဝင်ကြောင်း စွပ်စွဲပြီး နိုင်ငံရေးအကျဉ်းသား ၄၀၀ ကျော်ကို မြေမြင်ပေါ်မှာ ဝမ်းလျားမှောက်ခိုင်းကာ ရိုက်နှက်ခဲ့တာကြောင့် နိုင်/ကျဥ်းတွေမှာ ခါး၊ ခြေထောက်နဲ့ တင်ပါးတွေမှာ ရိုက်နှက်ခံရတဲ့ ဒဏ်ရာတွေနဲ့ သေနတ်ဒဏ်ရာတွေရရှိခဲ့ကြတယ်လို့ ကိုသိုက်ထွန်းဦးကဆိုပါတယ်။

ဒါ့အပြင် သေနတ်ပစ်ပြီး ရိုက်နှက်မှုပြုလုပ်မှုကြောင့် ဒဏ်ရာရရှိခဲ့တဲ့ နိုင်/ကျဥ်းတွေကို တိုက်ပိတ်ထားတဲ့အပြင် ဆေးကုသခွင့်၊ မိသားစုဝင်တွေက ထောင်ဝင်စာတွေ့ခွင့်၊ ထောင်ဝင်စာပါဆယ်ပို့ခွင့်တို့ကိုပါ တပြိုင်နက် ပိတ်ပင်ခဲ့တယ်လို့ ကိုသိုက်ထွန်းဦးက ဆက်ပြောပါတယ်။

မကွေးထောင်ပြင်ပတိုက်ပွဲဖြစ်စဉ်ဖြစ်ပွားခဲ့တဲ့ ဧပြီ ၁၃ ရက်ကစတင်ပြီး မေ ၂၇ ရက်လက်ရှိအချိန်အထိ အကျဉ်းထောင်ရှိ နိုင်ငံရေးအကျဉ်းသားတွေမှာ ရေသန့်တွေမရရှိဘဲ သောက်ရေတွေကိုသာ ဈေးကြီးပေးဝယ်နေကြရကာ အခန်းတွင်းမှ အိမ်သာရေတွေနဲ့သာ ရေချိုးနေကြရတယ်လို့ PPNM ရဲ့ ထုတ်ပြန်ချက်မှာဖော်ပြပါတယ်။

မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက် – PPNM အနေနဲ့ အထက်ပါဖြစ်စဥ်ကို စုံစမ်းမှုများပြုလုပ်ကာ ကျူးလွန်သူတွေကို ဖော်ထုတ်သွားမှာဖြစ်ပြီး၊ အရေးယူမှုတွေကိုလည်း လူ့အခွင့်အရေးအဖွဲ့အစည်းတွေနဲ့ ပူးပေါင်းဆောင်ရွက်သွားမှာဖြစ်တယ်လို့ အသိပေးလိုက်ပါတယ်။

စာတည်း – လင်း