တောင်သာ၊ ဧပြီ ၂၈၊ ၂၀၂၅။

မန္တလေးတိုင်း၊ မြင်းခြံခရိုင်၊ တောင်သာမြို့မှာ လုံခြုံရေးစောင့်နေတဲ့ ရဲတပ်သား ၁ ဦး လက်နက်ခဲယမ်းတွေနဲ့ ဘက်ပြောင်းခိုလှုံလာတယ်လို့ Myingyan Black Tiger-MBT မြင်းခြံခရိုင်တပ်ရင်း ၉ ဆီက သိရပါတယ်။

အသက် ၂၇ နှစ်အရွယ် ရဲတပ်သားဟာ ရန်ကုန်တိုင်း၊ မှော်ဘီအခြေစိုက် ရဲတပ်ရင်း ၅ ကနေ တောင်သာမြို့က အထက စာသင်ကျောင်းကိုပြောင်းရွှေ့ပြီး လုံခြုံရေးစောင့်နေတဲ့အချိန် ဧပြီ ၂၆ ရက်မှာ တော်လှန်ရေးတပ်ဖွဲ့ဝင်တွေနဲ့ ချိတ်ဆက်ပြီး ခိုလှုံလာတာလို့ ဆိုပါတယ်။

“သူက သင်္ကြန်အပြီး နှစ်ဆန်း ၃ ရက်မှာ တောင်သာမြို့မှာ တာဝန်ကျတာ၊ ဧပြီ ၂၂ ရက်မှာ ကျနော်တို့ကို ဆက်သွယ်လာတယ်၊ ဧပြီ ၂၆ ရက်မှာ ကျနော်တို့ MBT တပ်ဖွဲ့ထံကို အလင်းဝင်ရောက်လာတာပါ၊ ကျနော်တို့ တောင်သာမြို့ပေါ်အထိ ဘေးအန္တရယ်ကင်းကင်းနဲ့ ခေါ်ဆောင်လာခဲ့နိုင်ပါတယ်။”လို့ Myingyan Black Tiger-MBT မြင်းခြံခရိုင်တပ်ရင်း ၉ ခေါင်းဆောင်ဗိုလ်မိုက်ခဲက ပြောပါတယ်။

စစ်တပ်ရဲ့လူမဆန်တဲ့ အကျင့်ပျက်ခြစားမှု၊ နှိပ်စက်ဖိနှိပ်တာတွေ၊ ပြည်သူအပေါ်ကျင့်သုံးနေတဲ့ စစ်တပ်ရဲ့ဆက်ဆံရေးတွေကို သဘောမကျတာကြောင့်ခုလို ဘက်ပြောင်းလာခဲ့တာလို့ ရဲတပ်သားပြောပြချက်ကို ကိုးကားပြီး ခေါင်းဆောင်ဗိုလ်မိုက်ခဲက ပြန်ပြောပါတယ်။

အဆိုပါရဲတပ်သားနဲ့အတူ အူဇီသေနက် ၁ လက်၊ ကျည်ဘောက် ၃ ခု၊ G3 ကျည် ၂ တောင့်၊ 9 မမ ကျည် ၂၀၀ အတူပါလာတဲ့အတွက် ကျပ် ၂၅ သိန်း ဆုချီးမြှင့်ပေးထားပြီး သူနေထိုင်ချင်တဲ့နေရာကို သူ့မိသားစုနဲ့ အတူလုံခြုံစွာပို့လိုက်ပြီလို့ ဆိုပါတယ်။

စစ်အာဏာသိမ်းချိန်ကနေ အခုနှစ် ဧပြီ ၂၈ ရက်အထိ Myingyan Black Tiger-MBT မြင်းခြံခရိုင်တပ်ရင်း ၉ ဆီကို ဘက်ပြောင်းခိုလှုံလာသူ ရဲတပ်သားနဲ့ စစ်ကောင်စီတပ်သား စုစုပေါင်း ၈ ဦးရှိပြီလို့ အဲ့ဒီအဖွဲ့ဆီကသိရပါတယ်။

စာတည်း – လင်း

စစ်ကိုင်း၊ ဧပြီ ၁၈၊ ၂၀၂၅။

စစ်ကိုင်းတိုင်း၊ စစ်ကိုင်းမြို့အခြေစိုက် တပ်မ ၃၃ က စစ်ကောင်စီ ဒုတပ်စိတ်မှူး ၁ ဦးနဲ့ တပ်သား ၁ ဦး ဧပြီ ၁၆ ရက် မနက်ပိုင်းမှာ တပ်ထဲကထွက်ပြေးပြီး ဘက်ပြောင်းခိုလှုံလာတယ်လို့ လျှပ်စီးတပ်ခွဲ မုံရွာခရိုင် အမှတ် ၁၂ တပ်ရင်း တပ်ခွဲ ၃ အဖွဲ့ဆီက သိရပါတယ်။

ဘက်ပြောင်းခိုလှုံလာသူတွေဟာ အသက် ၂၈ နှစ်အရွယ် ဒုတပ်စိတ်မှူး ဖြိုးသီဟနဲ့ ၃၆ နှစ်အရွယ် တပ်သား မောင်သက်တို့ဖြစ်ပြီး သူတို့ကို ဒေသခံကာကွယ်ရေးတပ်ဖွဲ့ဝင်တွေက သွားရောက်ခေါ်ဆောင်ခဲ့ရတာလို့ ဆိုပါတယ်။

“လမ်းမှာစစ်ကောင်စီကလည်း နောက်ကနေ ခရာတွေ တရစပ်မှုတ်ပြီးတော့ သူတို့နောက်ကို အတင်းလိုက်လာတာဖြစ်တဲ့အတွက် လက်နက်တွေသယ်ဆောင်နိုင်တာမရှိတာနဲ့ (သူတို့ယူလာတဲ့လက်နက်ကို) လမ်းတနေရာမှာ သိမ်းဆည်းထားခဲ့တယ်လို့ ပြောတယ်၊” လို့ လျှပ်စီးတပ်ခွဲ မုံရွာခရိုင် အမှတ် ၁၂ တပ်ရင်း တပ်ခွဲ ၃ သတင်းနဲ့ ပြန်ကြားရေး တာဝန်ခံက ပြောပါတယ်။

သူတို့ ၂ ဦးစလုံးဟာ ၂၀၂၄ နိုဝင်ဘာလက စစ်မှုထမ်းအတွက်ဖမ်းဆီးခံခဲ့ရပြီး ရန်ကုန်တိုင်း၊ တိုက်ကြီးမြို့နယ်ရှိ အမှတ်(၁)တန်းမြင့်လေ့ကျင့်ရေးကျောင်း(ဂျိုးဖြူ)မှာ စစ်သင်တန်း ၄ လ၊ ပဲခူးအခြေစိုက် တပ်မ ၇၇ မှာမွမ်းမံသင်တန်း ၁ လ တက်ခဲ့ရတယ်လို့ ဆိုပါတယ်။

သင်တန်းပြီးတဲ့နောက် စစ်ကိုင်းတိုင်း၊ ကသာမြို့နယ်အတွင်း စစ်ကြောင်းသွားခဲ့ရပြီး အဲ့ဒီကတဆင့် စစ်ကိုင်းအခြေစိုက် တပ်မ ၃၃ ကိုရောက်လာချိန်မှာ ဘက်ပြောင်းခိုလှုံဖို့ ကာကွယ်ရေးတပ်တွေကို ချိတ်ဆက်ခဲ့တာလို့ အထက်ပါသတင်းနဲ့ပြန်ကြားရေးတာဝန်ခံကပြောပါတယ်။

လက်ရှိမှာ သူတို့မိသားစုတွေဆီကို တပ်ဖွဲ့ဝင်တွေက ဧပြီ ၁၈ ရက်မှာ ပြန်လည်ပို့ဆောင်လိုက်တယ်လို့ ပြောပါတယ်။

လျှပ်စီးတပ်ခွဲ မုံရွာခရိုင် အမှတ် ၁၂ တပ်ရင်း တပ်ခွဲ ၃ အဖွဲ့ဟာ စစ်ကိုင်းတိုင်း၊ မုံရွာမြို့နယ်အခြေစိုက် တပ်ဖွဲ့တခုဖြစ်ပြီး အထက်ပါစစ်ကောင်စီတပ်ဖွဲ့ဝင် ၂ ဦးဟာ သူတို့ဆီ ပထမဦးဆုံး ဘက်ပြောင်းခိုလှုံလာတာလို့ သိရပါတယ်။

စာတည်း – လင်း

ကျောက်တံခါး၊ ဧပြီ ၁၁၊ ၂၀၂၅။

ပဲခူးတိုင်း၊ ကျောက်တံခါးမြို့နယ်၊ အုန်းနဲပင်ကျေးရွာရှိ စစ်ကောင်စီတပ်စခန်းက စစ်ကောင်စီတပ်သား ၁ ဦး ဧပြီ ၉ ရက် မှာဘက်ပြောင်းခိုလှုံခဲ့တယ်လို့ ပဲခူးခရိုင်၊ အမှတ် ၂ တပ်ရင်း၊ P2-3702 တပ်ဖွဲ့ဆီက သိရပါတယ်။

ပဲနွယ်ကုန်း-နတ်သံကွင်းလမ်းပေါ်ရှိ အုန်းနဲပင်ရွာစခန်းမှာတာဝန်ကျနေတဲ့ တိုက်ကြီးမြို့ဇာတိ အသက် ၃၉ နှစ်ရှိ စစ်ကောင်စီတပ်သားဟာ MA 1 ၁ လက်၊ ကျည်ဘောက် ၃ ခု၊ 5.56 ကျည် ၁၀၅ တောင့်နဲ့အတူ ဘက်ပြောင်းခိုလှုံလာတာလို့ ဆိုပါတယ်။

“ကျနော်တို့နဲ့ ကြိုတင်ချိတ်ဆက်တာမရှိဘူး။ ကင်းစောင့်တဲ့အချိန်မှာ လက်နက်ယူပြီးတော့ ထွက်ပြေးလာတာ။ သူစစ်မှုထမ်းတာက ၂ လလောက်ပဲရှိသေးတယ်။”လို့ ပဲခူးခရိုင်၊ အမှတ် ၂ တပ်ရင်း၊ P2-3702မှ တာဝန်ရှိသူတဦးက ပြောပါတယ်။

လက်နက်တွေပါလာတဲ့အတွက် အဆိုပါစစ်ကောင်စီတပ်သားကို ငွေကျပ် ၁၀ သိန်းချီးမြှင့်ခဲ့ပြီး NUG အစိုးရရဲ့ “ပြည့်သူရင်ခွင်”နဲ့ ချိတ်ဆက်ကာ လိုအပ်တာတွေကို ဆက်လက်ဆောင်ရွက်ပေးထားတယ်လို့ သူက ဆက်ပြောပါတယ်။

ပဲနွယ်ကုန်း၊ နတ်သံကွင်း၊ ကျောက်ကြီး စတဲ့နေရာတွေက နောက်ထပ်ဘက်ပြောင်းခိုလှုံလိုတဲ့ စစ်ကောင်စီတပ်သားတွေအနေနဲ့ ၎င်းတို့ ဆွေမျိုးသားချင်းတွေကတဆင့် ပဲခူးခရိုင်၊ အမှတ် ၂ တပ်ရင်း၊ P2-3702 Page ကနေ ချိတ်ဆက်နိုင်တယ်လို့ အထက်ပါတာဝန်ရှိသူက ဆိုပါတယ်။

P2 -3702 ဆီကို ၂၀၂၅ ဖေဖော်ဝါရီကနေ အခုဧပြီ ၁၁ ရက်အထိ လက်နက်နဲ့ဘက်ပြောင်းခိုလှုံလာတဲ့ စစ်ကောင်စီတပ်သား ၃ ဦးရှိပြီလို့ သိရပါတယ်။

အမျိုးသားညီညွတ်ရေးအစိုးရ – NUG၊ ကာကွယ်ရေးဝန်ကြီးဌာနရဲ့ ၂၀၂၄ ခုနှစ်၊ စစ်ရေးဖြစ်ပေါ် တိုးတက်မှုအခြေအနေ အစီရင်ခံစာအရ နိုင်ငံတဝန်းမှာ ပြီးခဲ့တဲ့ ၂၀၂၄ ခုနှစ် တနှစ်တာအတွင်း စစ်ကောင်စီတပ်သား ၄၂၅ ဦး၊ ရဲ ၁၄၂ ဦး ၊ စုစုပေါင်း ၅၆၇ ဦး အလင်းဝင်လာခဲ့တယ်လို့သိရပါတယ်။

စာတည်း – လင်း

မုံရွာ၊ ဧပြီ ၁၀၊ ၂၀၂၅။

စစ်ကိုင်းတိုင်း၊ မုံရွာမြို့က စစ်ကောင်စီလက်အောက်ခံ ဒုရဲအုပ် ၁ ဦး လက်နက်၊ ခဲယမ်းတွေနဲ့အတူ တော်လှန်ရေးတပ်ဖွဲ့တွေထံ ဘက်ပြောင်းခိုလှုံလာတယ်လို့ မုံရွာခရိုင်တပ်ရင်း ၂၅ ထံက သိရပါတယ်။

ဘက်ပြောင်းလာသူမှာ မုံရွာမြို့ အမှတ် ၂ ရဲစခန်းက ဒုရဲအုပ် အေးသန်းထွန်း ဖြစ်ပြီး မုံရွာခရိုင်တပ်ရင်း ၂၅ တပ်ခွဲ ၄ ကတဆင့် ချိတ်ဆက်ပြီးနောက် ဧပြီ ၇ ရက်မှာ ဝင်ရောက်ခိုလှုံလာခဲ့တာလို့ ဆိုပါတယ်။

“သူအရင်ထဲက ထွက်ချင်နေပြီး ချိတ်ဆက်ထားပြီးသားပါ ။ အခုကတော့ နယ်မြေအချိန်းပြောင်းနဲ့ အခွင့်ရေးရလို့ထွက်လာနိုင်တာ။” လို့ မုံရွာခရိုင်တပ်ရင်း ၂၅ တပ်ရင်းမှူး သံမဏိ က ပြောပါတယ် ။

၎င်းနဲ့ အတူ BA 63 (G3) မောင်းပြန်ရိုင်ဖယ်သေနတ် ၁ လက်၊ ကျည်ဘောက် ၂ ခု ၊ ၇.၆၂ မမ ကျည် ၄၉ တောင့်တို့ ယူဆောင်လာခဲ့နိုင်တာကြောင့် ဆုငွေ ကျပ် သိန်း ၃၀ ပေးအပ်ဖို့ ဆောင်ရွက်နေတယ်လို့ ဆိုပါတယ်။

မုံရွာခရိုင်တပ်ရင်း ၂၅ ထံ ဘက်ပြောင်းခိုလှုံလာသူ ၁၅ ထက်မနည်းရှိပြီဖြစ်ပြီး ယခုနှစ်ပထမသုံးလပတ်အတွင်းမှာပဲ လက်နက်ပါလာသူ ၂ ဦးနဲ့ လက်နက်မဲ့ ၄ ဦး ဝင်ရောက်လာခဲ့ကာ ၎င်းတို့ထံဘက်ပြောင်းခိုလှုံလာတဲ့မည်သူမဆိုကို စိတ်လုံခြုံမှုအပြည့်အဝရရှိအောင်ထားရှိပေးတယ်လို့ PDF တပ်ရင်းမှူးက ပြောပါတယ်။

သတင်း – ဟယ်သာ၊ စာတည်း – ဟိန်းစံ

ပခုက္ကူ၊ ဧပြီ ၉၊ ၂၀၂၅။

မကွေးတိုင်း၊ ပခုက္ကူခရိုင်၊ မြစ်ခြေမြို့၊ ကျွန်းချောင်းလျှပ်စစ်ဓါတ်အားပေးစက်ရုံမှာ တာဝန်ကျနေတဲ့ တပ်ကြပ် ၁ ဦး လက်နက်ခဲယမ်းတွေနဲ့ ဘက်ပြောင်းခိုလှုံလာတယ်လို့ Southern YSO PDF က ဧပြီ ၈ ရက်မှာ သတင်းထုတ်ပြန်လာပါတယ်။

အသက် ၃၇ နှစ်အရွယ် တပ်ကြပ်ဖြူလေးဟာ ကျွန်းချောင်းလျှပ်စစ်ဓါတ်အားပေးစက်ရုံမှာ ၁ နှစ်ကျော်ကြာ တာဝန်ထမ်းဆောင်ပြီးနောက် အခုနှစ် ဖေဖော်ဝါရီ ၂၅ ရက်မှာ တော်လှန်ရေးတပ်ဖွဲ့ဝင်တွေနဲ့ချိတ်ဆက်ပြီး ခိုလှုံလာတာလို့ ဆိုပါတယ်။

“ကျနော်တို့ဆီကို လက်နက်နဲ့အလင်းဝင်မယ်လို့ ဆက်သွယ်တာ။ မြစ်ခြေမြို့၊ ကျွန်းချောင်း လျှပ်စစ်ဓါတ်အားပေးစက်ရုံအနီးထိ သူ့ကိုသွားခေါ်ယူခဲ့တယ်။ ပြီးခဲ့တဲ့ ၂ လပိုင်း ၂၅ ရက် ကတည်းက အလင်းဝင်တာပါ၊ တပ်ထဲမှာ သူ့မိသားစုတွေ ကျန်ခဲ့တာကြောင့် အခုမှထုတ်ပြန်ရတာ။”လို့ Southern YSO PDF တာဝန်ခံ ဗိုလ်အောင်မောင်းက ပြောပါတယ်။

ပခုက္ကူမြို့အခြေစိုက် ခလရ ၂၅၉ တပ်ရင်းမှာ ၁၀ နှစ်တာဝန်ထမ်းဆောင်ခဲ့သူဖြစ်ပြီး တပ်အတွင်းနေထိုင်မှုမလွတ်လပ်တာ၊ ခွဲခြားဆက်ဆံခံရတာ၊ ပြည်သူအပေါ်ကျင့်သုံးနေတဲ့ စစ်တပ်ရဲ့ဆက်ဆံရေးတွေကို သဘောမကျတာကြောင့် ခုလို ဘက်ပြောင်းလာခဲ့တာလို့ တပ်ကြပ်ဖြူလေးပြောပြချက်ကို ကိုးကားပြီး ဗိုလ်အောင်မောင်းက ပြန်ပြောပါတယ်။

သူနဲ့အတူ MA 2 သေနက် ၁ လက်၊ ကျည်ဘောက် ၅ ခု၊ 5.56 ကျည် ၃၀၀၊ လက်ပစ်ဗုံး ၁ လုံးပါ အတူပါလာတဲ့အတွက် ကျပ်သိန်း ၄၀ ဆုချီးမြှင့်ပေးထားပြီး သူနေထိုင်ချင်တဲ့နေရာကို သူ့မိသားစုနဲ့ အတူ လုံခြုံစွာပို့လိုက်ပြီလို့ ဆိုပါတယ်။

စစ်အာဏာသိမ်းချိန်ကနေ အခုနှစ် ဇန်နဝါရီ ၇ ရက်အထိ Southern YSO PDF အဖွဲ့ဆီကို ဘက်ပြောင်းခိုလှုံလာသူ ရဲတပ်သားနဲ့ စစ်ကောင်စီတပ်သား စုစုပေါင်း ၃၀ ဦးကျော်ရှိပြီလို့ အဲ့ဒီအဖွဲ့ဆီကသိရပါတယ်။

သတင်း – ဒိန်းဂျား၊ စာတည်း -လင်း

မြေလတ်အသံ၊ ဧပြီ ၃၊၂၀၂၅။

စစ်ကိုင်းတိုင်းအခြေစိုက်၊ မုံရွာခရိုင်အမှတ် ၁ တပ်ရင်းဆီကို စစ်ကောင်စီဒုတပ်ကြပ် ၁ ဦးနဲ့ တပ်သား ၁ ဦး ဘက်ပြောင်းခိုလှုံလာတယ်လို့ ဧပြီ ၃ ရက်မှာ အဲ့ဒီတပ်ရင်းက သတင်းပြန်ပါတယ်။

တပ်မ ၆၆ လက်အောက်ခံ အမှတ် ၄ ခြေမြန်တပ်ရင်းက အသက် ၃၁ နှစ်အရွယ် ဒုတပ်ကြပ် ပိုင်ဦးကျော် နဲ့ အသက် ၂၀ အရွယ် တပ်သား မျိုးမင်းထွေးတို့ဟာ မုံရွာခရိုင်တပ်ရင်း ၁ ကတပ်ဖွဲ့ဝင် ၁ ဦးနဲ့ချိတ်ဆက်ပြီး ပြီးခဲ့တဲ့ ဖေဖော်ဝါရီ ၂၅ ရက်မှာ ဘက်ပြောင်းခိုလှုံလာခဲ့တာပါ။

“လက်ရှိမှာ တပ်ရင်းမှာပဲ တာဝန်ထမ်းဆောင်ဖို့တောင်းဆိုထားလို့ စီစဉ်နေပါတယ်။ တပ်ရင်းမှာပဲ လက်ရှိ ပူးပေါင်းနေပါတယ်။ တာဝန်ထမ်းခွင့်ရဖို့ သက်ဆိုင်ရာဌာနဆီကို စာတင်ထားပါတယ်။”လို့ မုံရွာခရိုင် အမှတ် ၁ တပ်ရင်းမှ ပြောရေးဆိုခွင့်ရှိသူက ပြောပါတယ်။

လက်ရှိမှာ ပိုင်ဦးကျော်နဲ့ မျိုးမင်းထွေးတို့က မုံရွာခရိုင်အမှတ် ၁ တပ်ရင်းမှာနေထိုင်ပြီး တပ်ရင်းရဲ့ တပ်သားအဖြစ် တပ်ဝင်ရက်စွဲရရှိဖို့ စောင့်ဆိုင်းနေကြတယ်လို့ဆိုပါတယ်။

“တပ်ဝင်ရက်စွဲဆိုတာက ကျနော်တို့တပ်ရင်းမှာစပြီးတော့ တာဝန်ထမ်းဆောင်တဲ့ရက်စွဲ၊ နေ့။ အဲ့ဒါကို သက်ဆိုင်ရာနဲ့ညှိပြီးတော့ လုပ်နေပါတယ်။ လက်ရှိကတပ်ရင်းမှာနေထိုင်တာ မှန်ပါတယ်။ ကျနော်တို့က တပ်သားစာရင်း၊ ရဲဘော်စာရင်းထဲမှာ ထည့်လို့မရသေးဘူး။”လို့ အထက်ပါတာဝန်ရှိသူက ပြောပါတယ်။

အမျိုးသားညီညွတ်ရေးအစိုးရ (NUG)၊ ကာကွယ်ရေးဝန်ကြီးဌာနရဲ့ ၂၀၂၄ ခုနှစ်၊ စစ်ရေးဖြစ်ပေါ် တိုးတက်မှုအခြေအနေ အစီရင်ခံစာအရ နိုင်ငံတဝန်းမှာ ပြီးခဲ့တဲ့ ၂၀၂၄ ခုနှစ်၊ ၁ နှစ်တာအတွင်း စစ်ကောင်စီတပ်သား ၄၂၅ ဦး၊ ရဲ ၁၄၂ ဦး စုစုပေါင်း ၅၆၇ ဦး ဘက်ပြောင်းခိုလှုံလာခဲ့တယ်လို့ သိရပါတယ်။

စာတည်း – လင်း

ရွှေဘို၊ မတ် ၂၇၊ ၂၀၂၅။

စစ်ကိုင်းတိုင်း၊ ရွှေဘိုမြို့နယ်၊ ဇီးဖြူကုန်းရွာမှာတာဝန်ကျနေတဲ့ ပျူစောထီးတပ်ဖွဲ့ဝင် ၁ ဦး လက်နက်၊ ခဲယမ်းတွေနဲ့အတူ ဘက်ပြောင်းခိုလှုံလာတယ်လို့ တောင်သူဦးကြီးများအဖွဲ့ – PDF ဆီက သိရပါတယ်။

ဘက်ပြောင်းခိုလှုံလာသူဟာ တည်သီးတောရွာဇာတိ အသက် ၂၉ နှစ်အရွယ် ပျူစောထီးတပ်ဖွဲ့ဝင် နိုင်လင်းဆိုသူဖြစ်ပြီး သူဟာ တည်သီးတောရွာကနေ ပျူစောထီးအထိုင်စခန်းရှိရာ ဇီးဖြူကုန်းရွာကို ပြောင်းရွှေ့တာဝန်ချထားခံရသူဖြစ်ကာ မတ် ၂၅ ရက်က ကာကွယ်ရေးတပ်ဖွဲ့နဲ့ ချိတ်ဆက်ခိုလှုံခဲ့တာလို့ ဆိုပါတယ်။

“သူက တည်သီးတော ပျူစောထီးခေါင်းဆောင် မောင်ဆန်းလက်အောက်မှာ နေထိုင်လုပ်ကိုင်ရတာ မကြိုက်လို့ ဝင်လာတာလို့ ပြောပါတယ်။ ရန်သူ့နယ်မြေ ဇီးဖြူကုန်းရွာအထိ သွားပြီး ခေါ်ထုတ်ရတာပါ။”လို့ တောင်သူဦးကြီးများအဖွဲ့ – PDF ပြန်ကြားရေးတာဝန်ခံကပြောပါတယ်။

ပျူစောထီးတပ်ဖွဲ့ဝင် နိုင်လင်းဟာ ကာဘိုင်သေနတ် ၁ လက်၊ ကျည်ဘောက် ၃ ခုနဲ့ ကျည် ၁၄၅ တောင့်ကို ယူဆောင်လာတာကြောင့် ငွေကျပ် သိန်း ၁၀ ချီးမြှင့်ခဲ့ပြီး လုံခြုံတဲ့နေရာမှာ ထားရှိတယ်လို့ ဆိုပါတယ်။

တောင်သူဦးကြီးများအဖွဲ့ – PDF အဖွဲ့ဟာ စစ်ကိုင်းတိုင်း၊ စစ်ကိုင်းဖက်ဒရယ်ယူနစ်ထဲမှာ အခြေစိုက်ထားတဲ့တပ်ဖွဲ့တခုဖြစ်ပြီး တောင်သူဦးကြီးများအဖွဲ့ဆီ ဘက်ပြောင်းခိုလှုံလာသူ ပျူစောထီးတပ်ဖွဲ့ဝင် ၄ ဦး ရှိပြီလို့ သိရပါတယ်။

စာတည်း – ကိုချမ်း

စစ်ကိုင်း၊ မတ် ၁၂၊ ၂၀၂၅။

စစ်ကိုင်းမြို့အခြေစိုက် တပ်မ ၃၃ က ဒုတပ်ကြပ် ၁ ဦးနဲ့ ပုလဲမြို့က စစ်ကောင်စီတပ်သား ၂ ဦးတို့ ဘက်ပြောင်းခိုလှုံလာတယ်လို့ မတ် ၁၂ ရက်ဒီနေ့မှာ ဗမာအမျိုးသားတော်လှန်ရေးတပ်မတော် (BNRA) ကထုတ် ပြန်ပါတယ်။

ဒုတပ်ကြပ် လှမင်းဟာ ဖေဖော်ဝါရီ ၂၇ ရက်မှာ MA1သေနတ် ၁ လက်နဲ့အတူ တပ်ဖွဲ့ဆီဝင်‌ရောက်လာတာဖြစ်ပြီး ပုလဲမြို့၊ ထွေအုပ်ရုံးမှာ တာဝန်ကျနေတဲ့ တပ်သား ဝေအောင်နဲ့ တပ်သား မျိုးကျော်တို့ကတော့ MA1 သေနတ် ၁လက်နဲ့အတူ မတ်လ ၆ ရက်မှာဘက်ပြောင်းခိုလှုံလာတာလို့ ဆိုပါတယ်။

“အလင်းဝင်လာတဲ့ ၃ ဦးက သူတို့နဲ့ဆက်စပ်တဲ့ အနေအထားတခုကနေမှ စကစယန္တရားထဲမှာ သူတို့ဆက်လက်ပြီး တာဝန်ထမ်းဆောင်ဖို့အတွက် ဆန္ဒမရှိတော့တဲ့အတွက်ကြောင့်မလို့ ပြည်သူ့ရင်ခွင်ကို ကျနော်တို့ဖက်ကတာဝန်ရှိသူတွေနဲ့ ဆင့်ကဲဆင့်ကဲချိတ်ဆက်ပြီးခါမှ ပူးပေါင်းလာခဲ့တာဖြစ်ပါတယ်။”လို့ BNRAမှ ဗဟိုသတင်းနဲ့ပြန်ကြားရေးတာဝန်ခံက ပြောပါတယ်။

စစ်ကောင်စီတပ်ဖွဲ့၀င် ၃ ဦးထဲမှ ပုလဲမြို့က ၂ ဦးမှာ အဓမ္မစုဆောင်းခံရတဲ့ ပြည်သူ့စစ်မှုထမ်းသင်တန်းဆင်း စစ်သားတွေ ဖြစ်ကြပါတယ်။

လက်နက်ပါလာတဲ့ ဒုတပ်ကြပ် လှမင်း နဲ့ တပ်သား မျိုးကျော်တို့ ၂ ဦးကို ငွေကျပ်သိန်း ၂၀ စီ ဆုချီးမြှင့်ကာ သွားလိုတဲ့ဘေးကင်းရာနေရာကို ပို့ဆောင်ပေးခဲ့ပြီးဖြစ်တယ်လို့ သူကဆိုပါတယ်။

ပြီးခဲ့တဲ့ဖေဖော်ဝါရီ ၁ ရက်ကနေ ၂၈ ရက် အထိ ၁ လတာအတွင်း အမျိုးသားညီညွတ်ရေးအစိုးရ (NUG) ထံကို စစ်ကောင်စီတပ်က ဗိုလ်မှူး ၁ ဦးအပါအဝင် တပ်သားနဲ့ ရဲ ၆၄ ဦး ဘက်ပြောင်းခိုလှုံလာတယ်လို့ မတ် ၄ ရက်မှာအမျိုးသားညီ ညွတ်ရေးအစိုးရရဲ့ကာကွယ်ရေးဝန်ကြီးဌာနက ထုတ်ပြန်ခဲ့ပါတယ်။

ဒါ့အပြင် အမျိုးသားညီညွတ်ရေးအစိုးရ(NUG)၊ ကာကွယ်ရေးဝန်ကြီးဌာနရဲ့ ၂၀၂၄ ခုနှစ်၊ စစ်ရေးဖြစ်ပေါ် တိုးတက်မှုအခြေအနေ အစီရင်ခံစာအရ နိုင်ငံတဝှမ်းမှာ ပြီးခဲ့တဲ့ ၂၀၂၄ ခုနှစ် တနှစ်တာအတွင်း စစ်ကောင်စီတပ်သား ၄၂၅ ဦး၊ ရဲ ၁၄၂ ဦး ၊ စုစုပေါင်း ၅၆၇ ဦး ဘက်ပြောင်းခိုလှုံလာခဲ့တယ်လို့သိရပါတယ်။

စာတည်း – လင်း

မြေလတ်အသံ၊ မတ် ၈၊ ၂၀၂၅။

မန္တလေးတိုင်း၊ မိတ္ထီလာအခြေစိုက်၊ ခြေမြန်တပ်မဌာနချုပ် တပ်မ ၉၉ မှာတာဝန်ကျနေတဲ့ စစ်ကောင်စီတပ်ဖွဲ့ဝင် ၁ ဦး လက်နက်ခဲယမ်းတွေနဲ့ ဘက်ပြောင်းခိုလှုံလာတယ်လို့ မင်းဘူးခရိုင် အမှတ် ၂ တပ်ရင်းဆီက သိရပါတယ်။

အသက် ၃၂ နှစ်အရွယ် စစ်ကောင်စီတပ်ဖွဲ့ဝင် ၁ ဦးက မတ်လ ၇ ရက်မှာ မင်းဘူးခရိုင် အမှတ် ၂ တပ်ရင်းဆီကို လက်နက်ခဲယမ်းတွေယူပြီး ဘက်ပြောင်းခိုလှုံလာတာလို့ ဆိုပါတယ်။

“အမည်ကတော့ သူ့လုံခြုံရေး သူ့မိသားစုအနေအထားကြောင့် ပြောလို့အဆင်မပြေလို့ပါ။ သူကတော့ တပ်ထဲမှာ မနေချင်တာပါပဲ၊ ပြည်သူ့ဘက်မှာနေချင်တယ်၊ ပြည်သူ့ဘက်ကို ခိုလှုံချင်တယ်။ ကျနော်တို့ တပ်ရင်းနဲ့ပူးပေါင်းပြီးတော့ ဆက်လက်လုပ်ဆောင်သွားမှာရှိပါတယ်”လို့ မင်းဘူးခရိုင် အမှတ် ၂ တပ်ရင်း တပ်ရင်းမှူး ဗိုလ်ဇာမဏီက ပြောပါတယ်။

အဆိုပါတပ်ဖွဲ့ဝင်အနေနဲ့ စစ်ကောင်စီကိုပြန်လည်တိုက်ခိုက်ဖို့ ဆန္ဒရှိတာကြောင့် တပ်ရင်းမှာပဲ ဆက်လက်တာဝန်ထမ်းဆောင်နိုင်ဖို့ စီစဉ်ပေးထားပေးထားတယ်လို့ ဆိုပါတယ်။

“ကျနော်တို့ သူ့ကို ရှေ့တန်းမှာပဲဖြစ်ဖြစ် နောက်တန်းမှာပဲဖြစ်ဖြစ် ထားဖို့တော့စီစဉ်ထားပါတယ်။ နောက်ပြီးတော့ ထောက်ပို့အပိုင်းတွေ ရုံး‌ပိုင်းဆိုင်ရာတွေ ဆေးဘက်ဆိုင်ရာတွေရှိတာကြောင့် သူတဖက်ဖက်မှာ ပါဝင်မှာ”လို့ တပ်ရင်းမှူးဗိုလ်ဇာမဏီက ပြောပါတယ်။

တပ်မ ၉၉ က တပ်သားတဦးဘက်ပြောင်းလာချိန်မှာ MA 1 ၁ လက်၊ ကျည် ၉၆ တောင့်၊ ကျည်ဘောက် ၃ ခု၊ ရေဗူး ၁ ဗူး၊ အီကွေ့မန့် ၁ ခု၊ အင်္ကျီ ၁ ထည်၊ စစ်ဖိနပ် ၁ ရံ တို့ကိုယူဆောင်လာနိုင်တာကြောင့် တပ်ရင်းအနေနဲ့ ဆုချီးမြှင့်ပေးခဲ့တယ်လို့ အထက်ပါတပ်ရင်းမှူးက ပြောပါတယ်။

အထက်ပါစစ်ကောင်စီတပ်သားဟာ မင်းဘူးမြို့နယ်အခြေစိုက် မင်းဘူးခရိုင် အမှတ် ၂ တပ်ရင်းအဖွဲ့ဆီကိုဘက်ပြောင်းခိုလှုံလာတဲ့ ပထမဆုံးသူဖြစ်တယ်လို့လည်း သိရပါတယ်။

စာတည်း – လင်း

ရေစကြို၊ မတ် ၇၊ ၂၀၂၅။

မကွေးတိုင်း၊ ရေစကြိုမြို့နယ် ခလရ ၂၅၈ တပ်မှာ တာဝန်ကျနေတဲ့ စစ်ကောင်စီတပ်ဖွဲ့ဝင် ၁ ဦး သေနတ် ၁ လက်ယူပြီး ဘက်ပြောင်းခိုလှုံလာတယ်လို့ ပြည်သူ့ကာကွယ်ရေးတပ်ဖွဲ့-ရေစကြိုမြို့နယ် အဖွဲ့ဆီက သိရပါတယ်။

ဘက်ပြောင်းခိုလှုံလာတဲ့စစ်ကောင်စီတပ်ဖွဲ့ဝင်ဟာ အသက် ၂၃ နှစ်အရွယ်ရဲရင့်အောင်ဆိုသူဖြစ်ကာ ပြည်သူ့ကာကွယ်ရေးတပ်ဖွဲ့ဝင်တွေနဲ့ချိတ်ဆက်ပြီး မတ် ၅ ရက်နေ့ ည ၉ နာရီအချိန်မှာ တာဝန်ကျနေတဲ့ ခလရ ၂၅၈ တပ်ကနေ လက်နက်ယူကာ ထွက်ပြေးလာတာလို့ သိရပါတယ်။

“သူ့ကို ၂၀၂၄ နိုဝင်ဘာလလောက်မှာ ဖမ်းဆီးခံခဲ့ရတာ။ အဲ့ဒီကတဲ့ကနေ သူ့ကို စစ်မှုထမ်းဖို့ သင်တန်းပို့လိုက်တာ သူက ဟိုပုံးမှာ သင်တန်း ၈ ပတ်အကြာ တက်ခဲ့ရတယ်။ ပြီးခဲ့တဲ့ လထဲမှာ ရေစကြို ခလရ ၂၅၈ တပ်ကိုရောက်တာပါ”လို့ ပြည်သူ့ကာကွယ်ရေးတပ်ဖွဲ့ – ရေစကြိုမြို့နယ် သတင်းနှင့်ပြန်ကြားရေးတာဝန်ခံက ပြောပါတယ်။

ဘက်ပြောင်းခိုလှုံလာသူရဲရင့်အောင်ဟာ စစ်ကိုင်းနယ်ထဲကဖြစ်ကာ စစ်ကိုင်းတံတားပေါ်မှာ စစ်ကောင်စီတပ်ရဲ့ ဖမ်းဆီးတာ၊ မှတ်ပုံတင်သိမ်းဆည်းတာခံရပြီး စစ်မှုထမ်းခဲ့ရတာလို့ သိရပါတယ်။

ရဲရင့်အောင်ထွက်ပြေးလာချိန်မှာ MA 1 ၁ လက်ပါယူဆောင်လာနိုင်တာကြောင့် ပြည်သူ့ကာကွယ်ရေးတပ်ဖွဲ့-ရေစကြိုမြို့နယ်အနေနဲ့ ကျပ်သိန်း ၃၀ ချီးမြှင့်ပေးခဲ့တယ်လို့ အထက်ပါတာဝန်ခံက ပြောပါတယ်။

မကွေးတိုင်း၊ ရေစကြိုမြို့နယ်အခြေစိုက် ပြည်သူ့ကာကွယ်ရေးတပ်ဖွဲ့-ရေစကြိုမြို့နယ်အဖွဲ့ဆီကို စစ်မှုထမ်းဥပ‌ဒေနဲ့အဖမ်းဆီးခံရပြီး တာဝန်ကျရာတပ်တွေကနေ ဘက်ပြောင်းခိုလှုံလာသူ စစ်ကောင်စီတပ်ဖွဲ့ဝင် ၇ ဦးနဲ့ ဖမ်းဆီးရမိသူ ၁ ဦးရှိတယ်လို့ သိရပါတယ်။

စာတည်း – ကိုချမ်း