စစ်ကောင်စီတပ်သား

မြိုင်၊ ဧပြီ ၁၀၊ ၂၀၂၃။

မကွေးတိုင်း၊ မြိုင်မြို့နယ်၊ ညောင်အုပ်ရွာကို စစ်ကောင်စီတပ်သားတွေက ဧပြီလ ၉ ရက်မှာ မီးရှို့ဖျက်စီးခဲ့ပြီး၊ စိတ်ကျန်းမာရေးချို့တဲ့သူ တဦးကိုလည်း သေနတ်နဲ့ပစ်သတ်ခဲ့တယ်လို့ သိရပါတယ်။

မုံရွာအခြေစိုက် အနောက်မြောက်တိုင်းစစ်ဌာနချုပ်က စစ်သားအင်အား ၄၀ ကျော်ဟာ မနေ့ည ၇ နာရီလောက်မှာ ညောင်အုပ်ရွာကိုဝင်ရောက် မီးရှို့ခဲ့ပြီးနောက် အဲ့ဒီရွာကိုရောက်နေတဲ့ သဲကြီးရွာက စိတ်ကျန်းမာရေးချို့တဲ့သူ အသက် ၃၉ နှစ်အရွယ် ကိုအောင်ဇော်လင်းကိုပါ သေနတ်နဲ့ပစ်သတ်ခဲ့တာလို့ Pnlhoenix Ranger PDFရဲ့ တပ်ဖွဲ့ဝင်တဦးက ပြောပါတယ်။

“ဘာတိုက်ပွဲမှမရှိပဲ တမင်သက်သက်လာပြီး မီးရှို့သွားတာ။ အိမ်ခြေတရာလောက်ရှိတာကို ၃ ပုံ ၁ ပုံလောက်ပါသွားတယ်။ ပထမဆုံးမီးရှို့ခံရတာပဲ။ သဲကြီးရွာက စိတ်မနှံ့တဲ့ အကိုတယောက်ကိုလည်း ညောင်အုပ်ရွာမှာပဲ ဦးခေါင်းတေ့ပစ်သွားတာ”လို့ ပြောပါတယ်။

အဲ့ဒီစစ်ကောင်စီတပ်သားတွေကို ရဟက်ယာဥ် ၄ စီးနဲ့ ညောင်အုပ်ရွာအနီးမှာ လာချခဲ့တာဖြစ်ပြီး၊ ရွာကိုမီးရှီု့ပြီးချိန် ည ၁၂ နာရီလောက်မှာတော့ ရဟက်ယာဥ်တွေနဲ့ပဲ ပြန်ခေါ်သွားတယ်လို့ Pnlhoenix Ranger PDFရဲ့ တပ်ဖွဲ့ဝင်တဦးက ပြောပါတယ်။

ခုလိုမီးရှို့လို့ ညောင်အုပ်ရွာက နေအိမ် ၂၉ လုံးမီးလောင်ပျက်စီးပြီး၊ လက်ရှိမှာ ဒေသခံ ၁၅၀ လောက်က နွားလှည်းတွေပေါ်မှာ ယာယီအမိုးမိုးကာ နေထိုင်နေကြသလို အချို့ကလည်း ကျေးရွာစာသင်ကျောင်းထဲမှာ နေထိုင်နေရတယ်လို့ ဆိုပါတယ်။

ပြီးခဲ့တဲ့ဧပြီလ ၈ ရက်ကလည်း မြိုင်မြို့နယ်တောင်ပိုင်း၊ အိုင်းမ(အနောက်)ရွာကို စစ်တပ်ကမီးရှို့ခဲ့လို့ နေအိမ် ၁၈ လုံးမီးလောင်ပျက်စီးခဲ့ရပါသေးတယ်။

မကွေး၊ ဧပြီ ၃၊ ၂၀၂၃။

မကွေးတိုင်း၊ ဂန့်ဂေါမြို့နယ်၊ ကန်ရွာ နယ်မြေခံရဲစခန်းသိမ်းတိုက်ပွဲမှာ စခန်းရဲ့အဆောက်အဦးတွေကို မီးရှို့နိုင်ခဲ့ပြီး စစ်ကောင်စီတပ်သား ၄၅ ဦး သေဆုံးခဲ့သလို PDF ဘက်ကလည်း ရဲဘော် ၂ ဦး သေဆုံးခဲ့တယ်လို့ သိရပါတယ်။

စစ်ကောင်စီနဲ့ရဲအင်အား ၁၀၀ ကျော်ရှိတဲ့ အဲဒီရဲစခန်းကို မတ်လ ၃၁ ရက်မနက်ပိုင်းကစလို့ ကာကွယ်ရေးပူးပေါင်းတပ်ဖွဲ့တွေက ဝင်ရောက်တိုက်ခိုက်ခဲ့တာဖြစ်ပြီး၊ တိုက်ပွဲအတွင်း စစ်ကောင်းစီဘက်က လေယာဥ်နဲ့ ၇ ကြိမ်အထိ ပစ်ခတ်ခဲ့လို့ အဲဒီနေ့နေ့လည် ၂ နာရီကျော်မှာ ပြန်လည်ဆုတ်ခွာခဲ့ရတယ်လို့ ဂန့်ဂေါခရိုင်အမှတ် (၁) တပ်ရင်းမှ သတင်းနဲ့ပြန်ကြားရေးတာဝန်ခံ ကိုစတီဗင်က ပြောပါတယ်။

“ကျနော်တို့ပြန်ဆုတ်လာတဲ့အချိန်မှာ ရဲစခန်းရဲ့ ၇၅ ရာခိုင်နှုန်းအထိ မီးရှို့ဖျက်ဆီးနိုင်ခဲ့တယ်။ သေဆုံးနေတဲ့ စကစအလောင်း ၄၅ လောင်းကို တွေ့ခဲ့ရတယ်။ ၁၀ ကောင်လောက်ဒဏ်ရာရသွားတယ်။ လက်နက်တွေပါ ရရှိခဲ့တယ်။ ဒီတိုက်ပွဲမှာ လေယာဥ်နဲ့ပစ်ခတ်တာ၊ စစ်ကူချပေးတာတွေကြောင့် ပြန်ဆုတ်ခဲ့ရတယ်။ စခန်းတခုလုံးကိုတော့ မသိမ်းနိုင်ခဲ့ဘူး” လို့ ဆိုပါတယ်။

ရဲစခန်းမှပြန်ဆုတ်ခွာလာချိန် စစ်ကောင်စီတပ်သားတွေရဲ့ G3 (၄) လက်၊ G4 (၁) လက်၊ G3 မောင်းတုံး(၁)ခု၊ ကျည်ဘောက် (၄)ခု၊ လက်ပစ်ဗုံး(၂)လုံး၊ စကားပြောစက် (၂) လုံး၊ ဖုန်း (၇) လုံး၊ Laptop (၁) လုံး၊ ဓား (၁) လက်၊ ငွေ (၆၀၈၀၀) ကျပ်နဲ့ အခြားအသုံးအဆောင်ပစ္စည်းတွေ အများအပြား သိမ်းဆည်းရမိခဲ့တယ်လို့ ကိုစတီဗင်က ပြောပါတယ်။

“လေကြောင်းနဲ့တိုက်ခိုက်ခံနေရတဲ့ကြားက ကျနော်တို့တွေ နောက်မဆုတ်ဘဲနဲ့ စခန်းထဲကို ဝင်တိုက်နိုင်ခဲ့တယ်။ အကြီးစားဘန်ကာတခုနဲ့ အဆောက်အအုံတွေ မီးရှို့နိုင်ခဲ့တယ်။ စကစ လေယာဥ်သုံးတာ ဒီတိုက်ပွဲလောက် တခုမှာမှမရှိဘူးလို့ ထင်တယ်။ စခန်းကိုမသိမ်းနိုင်ခဲ့တာကလည်း သတင်းတွေပေါက်ကြားသွားတာလည်း ပါတယ်ပေါ့” လို့ ဆိုပါတယ်။

ဒါ့အပြင် PDF တွေဘက်ကလည်း တိုက်ပွဲအတွင်း ရဲဘော် ၂ ဦး သေဆုံးခဲ့သလို နောက်ထပ် ရဲဘော် ၉ ဦးမှာလည်း ထိခိုက်ဒဏ်ရာရရှိခဲ့တယ်လို့ ဆိုပါတယ်။

ဒီတိုက်ခိုက်မှုကိုတော့ ဂန့်ဂေါခရိုင် အမှတ် ၁၊ ၇၊ ၁၁၊ ၁၂၊ ၁၄၊ ၁၉၊ ABSDF၊ HYPER UAV FORCE၊ ပကဖ ရဲဘော်တွေက ပူးပေါင်းလုပ်ဆောင်ခဲ့တာလို့ သိရပါတယ်။

စာတည်း – 007

စစ်ကိုင်း၊ ဧပြီ ၃၊ ၂၀၂၃။

စစ်ကိုင်းအခြေစိုက် ဆားတောင်မိုးကြိုပြည်သူ့ကာကွယ်ရေးအဖွဲ့ဆီကို ပြီးခဲ့တဲ့မတ်လ ၃၁ ရက်မှာ စစ်ကောင်စီတပ်သားတဦး အလင်းဝင်ရောက်လာခဲ့တယ်လို့ သိရပါတယ်။

ရခိုင်ပြည်နယ်၊ ဂွမြို့အခြေစိုက် ခမရ ၅၆၃ က တပ်သားအောင်ကိုကိုဦး ၂၈ နှစ်ဖြစ်ပြီး သူနဲ့အတူ လက်နက်ခဲယမ်းတွေတော့ မပါလာခဲ့ဘူးလို့ ဆိုပါတယ်။

“ကျနော် စစ်ကိုင်းမြို့နယ်၊ ဆားတောင်မိုးကြိုးပြည်သူ့ကာကွယ်ရေးအဖွဲ့မှာ အလင်းဝင်တယ်။ ခု လွတ်မြောက်ရေးနယ်မြေကို ရောက်နေပါပြီ။ ကျနော့်ခံယူချက်က စစ်တပ်အောက်မှာ တာဝန်မထမ်းဆောင်ချင်လို့ လမ်းမှားမှန်းသိသိကြီးနဲ့ ဆက်မလျှောက်ချင်တော့လို့ပါ” လို့ ဆားတောင် မိုးကြိုးပြည်သူ့ကာကွယ်ရေးတပ်ဖွဲ့က မြေလတ်အသံကို ပေးပို့တဲ့ရုပ်သံဖိုင်မှာ တပ်သား အောင်ကိုကိုဦးက အတည်ပြုဖြေဆိုထားပါတယ်။

ဒါ့အပြင် ပြည်သူနဲ့တသားတည်းဖြစ်အောင် ခုလိုအလင်းဝင်ခဲ့တာဖြစ်ပြီး၊ ရှေ့ဆက်ပြီးတော့လည်း ပြည်သူနဲ့အတူ စစ်ကောင်စီကို တော်လှန်သွားမယ်လို့လည်း ဆိုထားပါတယ်။

လက်ရှိမှာ အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာန – MOD နဲ့ချိတ်ဆက်ထားဆဲဖြစ်တဲ့အတွက် တပ်သား အောင်ကိုကိုဦးကို ဆုငွေချီးမြှင့်နိုင်ခြင်း မရှိပေမယ့် ကောင်းမွန်စွာစောင့်ရှောက်ထားတယ်လို့ ဆားတောင်မိုးကြိုး ပြည်သူ့ကာကွယ်ရေးတပ်ဖွဲ့ သတင်းပြန်ကြားရေးတာဝန်ခံဆီက သိရပါတယ်။

စာတည်း – လင်း

မန္တလေး၊ မတ် ၂၇၊ ၂၀၂၃။

မန္တလေးမြို့၊ ဒေါ်အောင်ဆန်းစုကြည်လမ်း၊ ရတနာပုံခန်းမအနီးမှာ ဗုံးတလုံးကိုတွေ့ရှိပြီး လမ်းပိတ်ဖြုတ်နေချိန်မှာ နောက်ထပ်ကျန်ရှိတဲ့ ဗုံး ၂ လုံးပေါက်ကွဲလို့ စစ်ကောင်စီတပ်ဖွဲ့ဝင် ၂ ဦး သေဆုံးသွားတယ်လို့ သိရပါတယ်။

မတ်လ ၂၇ ရက်နေ့ ဒီနေ့ မနက် ၇ နာရီလောက်မှာ ရတနာပုံခန်းမအနီး မြနန္ဒာစစ်ဆင်ရေးအနေနဲ့ Banner ကိုချိတ်ဆွဲထားပြီး မြနန္ဒစစ်ဆင်ရေးအဖွဲ့က မိုင်းသုံးလုံး ထောင်ထားခဲ့ပါတယ်။

အဲဒီဗုံးသုံးလုံးထဲက တလုံးကို စစ်ကောင်စီတပ်ဖွဲ့တွေက တွေ့ရှိသွားပြီး ရှင်းလင်းရေးပြုလုပ်နေချိန် မနက် ၈ နာရီ ၄၀ မိနစ်လောက်မှာ မြနန္ဒစစ်ဆင်ရေးရဲဘော်တွေက ကျန်နေသေးတဲ့ ဒုတိယမိုင်းနဲ့ တတိယမိုင်းကို အဝေးထိန်းခလုတ်နဲ့ ဖောက်ခွဲခဲ့တယ်လို့ Voice Of Mandalay က ပြန်ကြားရေးတာဝန်ခံတဦးက ပြောပါတယ်။

“ဗုံးပေါက်ကွဲပြီတော့ လူနာတင်ယာဉ်နဲ့ လာတင်သွားတယ်။ သေတာတော့ ၂ ယောက်သေတယ်။ သေတာကို ဘယ်လိုသိရလဲဆိုတော့ ကျနော်တို့ မြေပြင်သတင်းပေးတွေဆီကနေ သိရတာပါ။ ထိခိုက်ဒဏ်ရာရတာတွေတော့ မကြားမိဘူး” လို့ ဆိုပါတယ်။

ဗုံးပေါက်ကွဲပြီးတဲ့နောက်မှာ စစ်ကောင်စီတပ်ဖွဲ့တွေက လက်နက်တွေနဲ့ ရမ်းသမ်းပစ်ခတ်ခဲ့ပေမယ့်လည်း မြနန္ဒစစ်ဆင်ရေးရဲဘော်တွေက အထိခိုက်မရှိ ပြန်လည်ဆုတ်ခွာနိုင်ခဲ့ကြတယ်လို့ ဆိုပါတယ်။

ပြီးခဲ့တဲ့ ၂၀၂၁ ခုနှစ် ဒီဇင်ဘာ ၂၅ ရက်နေ့ကလည်း အဲဒီ ရတနာပုံခန်းမအနီးမှာ ဗုံးပေါက်ကွဲမှုဖြစ်ပွားလို့ အမျိုးသမီးတဦး ထိခိုက်ဒဏ်ရာ ရရှိခဲ့ပါသေးတယ်။

မတ်လ ၁၄ ရက်နေ့ကလည်း မတ္တရာကလဝက ဒုဦးစီးလည်းဖြစ်သလို ပျူစောထီးစည်းရုံးရေးနဲ့ ထောက်ပို့လုပ်နေတဲ့ ဦးကျော်နိုင်ဦး ဆိုသူကို ဝရင်းတုတ်ရွာက တံတားထိပ်မှာ ကာကွယ်ရေးတပ်ဖွဲ့တွေက သေနတ်နဲ့ပစ်ခတ်ရှင်းလင်းခဲ့တယ်လို့ Voice Of Mandalay က ထုတ်ပြန်ထားပါတယ်။

စာတည်း – 007

မင်းကင်း၊ မတ် ၂၄၊ ၂၀၂၃။

စစ်ကိုင်းတိုင်း၊ မင်းကင်းမြို့နယ်၊ ပွင့်လျက်ကျေးရွာက နေအိမ် ၁၀ လုံးကို စစ်ကောင်စီတပ်သားတွေက မီးရှို့ဖျက်ဆီးခဲ့တဲ့အပြင် အဘိုးတဦးကိုပါ သတ်သွားခဲ့တယ်လို့ သိရပါတယ်။

အင်အား ၇၀ ကျော်ပါတဲ့ စစ်သားတွေဟာ မတ်လ ၂၂ ရက်မနက် ၇ နာရီဝန်းကျင်မှာ ပွင့်လျက်ကျေးရွာထဲကို ဝင်ရောက်လာပြီး နေအိမ်တွေကိုမီးရှို့ကာ၊ အိမ်ထဲပိတ်မိနေတဲ့ အသက် ၆၀ အရွယ် ဦးတင်ကိုပစ်သတ်ပြီး ရွာက ချက်ချင်းပြန်ထွက်သွားတယ်လို့ MinKin People’s Defence Force-Mkpdf-2မှ တာဝန်ရှိသူတဦးက ပြောပါတယ်။

“သူက ထွက်မပြေးနိုင်ခဲ့လို့ ကျန်ခဲ့တာပါ။ အလောင်းတွေ့ရတာက မနေ့က(မတ်လ ၂၃ ရက်)မှာ တွေ့ရတာ။ အလောင်းမှာ သေနတ်ဒဏ်ရာ ၃ ချက် တွေ့တယ်ဗျ။ အလောင်းကိုတော့ သူ့ရဲ့အိမ်ရှေ့က လမ်းမပေါ်မှာ တွေ့ခဲ့တာ” လို့ ဆိုပါတယ်။

နေအိမ်တွေကိုမီးရှို့ပြီး ဦးတင်ကိုပစ်သတ်သွားခဲ့တဲ့ စစ်ကောင်စီတပ်သားတွေဟာ မင်းကင်းမြို့ပေါ်ကို ရောက်ရှိနေတဲ့ ဒေသကွပ်ကဲမှုစစ်ဌာနချုပ်(ကလေး)မှ ဖြစ်ကြတယ်လို့ အထက်ပါတာဝန်ရှိသူက ပြောပါတယ်။

အိမ်ခြေ ၂၀၀ ကျော်ရှိတဲ့ ပွင့်လျက်ကျေးရွာမှာ မင်းကင်းမြို့နဲ့ မိုင်ဝက်လောက်ကွာဝေးပြီး ခုလို ရွာကိုဝင်ရောက်မီးရှို့တာ ပထမဆုံးအကြိမ် ဖြစ်တယ်လို့ သိရပါတယ်။

မတ်လ ၂၃ ရက်မှာလည်း အဆိုပါစစ်ကောင်စီတပ်သားတွေဟာ ခင်ဦးမြို့နယ်၊ မြကန်ကျေးရွာက လူနေအိမ်တလုံးကို မီးရှို့ပြီး ကျေးရွာမှာကျန်ရှိခဲ့တဲ့ အသက် ၆၅ နှစ်အရွယ် ဦးညိုတင်ကို ပစ်သတ်သွားခဲ့ပါသေးတယ်။

စာတည်း – လင်း

အင်းတော်၊ မတ် ၂၄၊ ၂၀၂၃။

စစ်ကိုင်းတိုင်း၊ အင်းတော်မြို့နယ်၊ မံဟဲကျေးရွာမှာ စစ်ကောင်စီတပ်သားတွေက ညဝင်အိပ်ပြီး ပြန်ထွက်သွားချိန်မှာ အမျိုးသား ၅ ဦးကို ဖမ်းဆီးသွားခဲ့တယ်လို့ သိရပါတယ်။

အင်အား ၁၀၀ ကျော်ပါတဲ့ PDF ယောင်ဆောင် စစ်ကြောင်းဟာ မတ်လ ၂၂ ရက် ညဘက်မှာ မံဟဲကျေးရွာကို ဝင်လာပြီး အမျိုးသားတွေကို ဖမ်းကာ ရွာဘုန်းကြီးကျောင်းထဲမှာ နှစ်ညအိပ်ပြီး မတ်လ ၂၄ ရက် ဒီမနက် ၂ နာရီမှာ ပြန်ထွက်သွားခဲ့တာဖြစ်တယ်လို့ ရွာသားတဦးရဲ့ပြောဆိုချက်ကို ကိုးကားပြီး Indaw Revolution-IRရဲ့ တာဝန်ရှိသူတဦးက ပြောပါတယ်။

“စကစတွေက ရွာထဲဝင်လာတဲ့အခါမှာ မိုးကာအလုံပိတ်ထားတဲ့ ကုန်ကား ၂ စီးနဲ့ပါ။ ရွာထဲရောက်တော့ ရွာကအမျိုးသားတွေအကုန်လုံးကို ဖမ်းဆီးပြီးတော့ ရိုက်နှက်တယ်။ စကစတွေ ပြန်ထွက်တဲ့အချိန်မှာတော့ အမျိုးသားတွေထဲက ငါးယောက်ကို ဖမ်းခေါ်သွားတာ” လို့ဆိုပါတယ်။

မံဟဲကျေးရွာမှာ အင်းတော်မြို့နဲ့ မိုင် ၂၀ ခန့် ကွာဝေးပြီး ကချင်ပြည်နယ်နဲ့ အင်းတော်မြို့နယ်စပ်မှာ တည်ရှိကာ အိမ်ခြေ ၁၀၀ ဝန်းကျင်ရှိတဲ့ ကျေးရွာတရွာ ဖြစ်ပါတယ်။

“ဒီရွာကို စကစတွေဝင်ရောက်ခဲ့တာက ဒလန်တွေ သတင်းပေးပို့ချက်အရလို့ သိထားရတယ်။ အဖမ်းခံရသူတွေရဲ့ ကိုယ်ရေးအချက်အလက်တွေကိုတော့ မသိရှိရသေးဘူး။ ဒါပေမဲ့လို့ အဖမ်းခံရသူတွေက ရွာခံသားတွေလို့ သိထားရတယ်” လို့ ဆိုပါတယ်။

လက်ရှိ မံဟဲကျေးရွာက ထွက်သွားတဲ့ စစ်ကြောင်းမှာ အင်းတော်မြို့ထဲကို ရောက်သွားခဲ့ပြီးဖြစ်ကာ သူတို့ဟာ PDF ဝတ်စုံတွေကို ဝင်ဆင်ထားကြတဲ့အတွက် ဘယ်တပ်မ၊ တပ်ရင်းကဆိုတာကို မသိရှိရဘူးလို့ အထက်ပါ တာဝန်ရှိသူက ဆိုပါတယ်။

ဒါ့အပြင် ပြီးခဲ့တဲ့မတ်လ ၁၅ ရက် ည ၉ နာရီကျော်ကလည်း အင်းတော်မြို့နယ်ထဲက ကြံ့ခိုင်ရေးပါတီကြီးစိုးတဲ့ တုံးလုံကျေးရွာက အသက် ၃၀ ကျော်အရွယ် ကိုအောင်ကောက်ကို စစ်ကောင်စီတပ်သားတွေက ဖမ်းဆီးရိုက်နှက်ခဲ့ကြသေးတယ်လို့ ဒေသခံတွေက ပြောပါတယ်။

စာတည်း – ဇို

ဆားလင်းကြီး၊ မတ် ၁၇၊ ၂၀၂၃။

စစ်ကိုင်းတိုင်း၊ ဆားလင်းကြီးမြို့နယ်၊ ဝဲကွဲရွာကနေအိမ်တွေကို စစ်ကောင်စီတပ်သားတွေက မီးရှို့သွားတဲ့အပြင်၊ ရွာသားတွေကိုလည်း လူသားဒိုင်းအဖြစ်ဖမ်းဆီးခေါ်ဆောင်သွားတယ်လို့ သိရပါတယ်။

မတ်လ ၁၇ ရက် ဒီမနက် ၆ နာရီလောက်မှာ အင်အား ၁၀၀ ကျော်ပါတဲ့ စစ်ကြောင်းက ရွာထဲကိုဝင်လာပြီး၊ မနက် ၁၁ နာရီလောက်မှာတော့ နေအိမ်တွေကိုမီးရှို့ခဲ့တဲ့အပြင် ဒေသခံရွာသား ၂၀ ဝန်းကျင်ကိုလည်း ဖမ်းဆီးသွားတယ်လို့ ဓါးမဆိုင်း ပြည်သူ့ကာကွယ်ရေးတပ်မတော်မှ တပ်ဖွဲ့ ခေါင်းဆောင် ကိုစွမ်းသူမောင်က ပြောပါတယ်။

“စစ်ကြောင်းက ခါတိုင်းဆို မနက် ၈ နာရီလောက်မှထွက်တာ။ အခုက မနက် ၆ နာရီလောက်မှာ ထွက်လာတော့ ရွာသားတွေ ပိတ်မိကုန်တာ။ ပိတ်မိတဲ့အထဲမှာ ကျနော်တို့ ရဲဘော်လေး တယောက်တောင် ပါသေးတယ်” လို့ ဆိုပါတယ်။

အိမ်ခြေ ၁၀၀ ဝန်းကျင်ရှိတဲ့ ဝဲကွဲရွာက နေအိမ် ၁၀ လုံးကျော်ကို စစ်အုပ်စုက မီးရှို့ဖျက်ဆီးသွားခဲ့ပြီး၊ နေ့လယ် ၁၂ နာရီလောက်မှာတော့ ဆားလင်းကြီးမြို့နယ် မြောက်ဘက်ခြမ်းကို ပြန်လည်ထွက်ခွာသွားခဲ့တယ်လို့ အထက်ပါ တာဝန်ရှိသူက ဆက်ပြောပါတယ်။

“မြောက်ဘက်ကနေ ပြန်ထွက်သွားပြီးတော့ PDF စခန်းတခုကို မီးရှို့သွားတယ်လို့လည်း ကြားရတယ်။ မုံရွာဘက်ကို စက်လှေနဲ့ကူးသွားပြီး ဓားစားခံတွေကိုလည်း ခေါ်သွားပါတယ်” လို့ ဆိုပါတယ်။

လက်ရှိမှာတော့ ရွာသားတချို့က ကျေးရွာထဲကို ပြန်လည်ဝင်ရောက်နေပြီး မီးလောင်သွားတဲ့နေအိမ်တွေကို မီးငြိမ်းသတ်နေကြတယ်လို့လည်း သိရပါတယ်။

ဝဲကွဲကျေးရွာကို စစ်အုပ်စုက မကြာခဏ ဝင်ရောက်လေ့ရှိပေမယ့် ဒီနေ့မှ ပထမအကြိမ် မီးရှို့ဖျက်ဆီးခဲ့တာလည်း ဖြစ်ပါတယ်။

စာတည်း – လင်း

မုံရွာ၊ မတ် ၁၆၊ ၂၀၂၃။

စစ်ကိုင်းတိုင်း၊ မုံရွာမြို့နယ်ထဲက ထနောင်းတောရွာကို မတ်လ ၁၅ ရက် မနေ့ကမနက် ၅ နာရီလောက်က စစ်ကောင်စီတပ်သားတွေ မီးဝင်ရှို့လို့ အိမ်ခြေ ၆၀ ကျော် မီးလောင်ခဲ့တဲ့အပြင် သက်ကြီးပိုင်း အဖိုး ၂ ဦးနဲ့ အဖွား ၁ ဦး သေဆုံးခဲ့ပါတယ်။

အိမ်ခြေ ၂၅၀ ကျော်ရှိတဲ့ အဲ့ဒီရွာကို အင်အား ၃၀ နီးပါးရှိတဲ့ စစ်ကောင်စီတပ်သားတွေ ရုတ်တရက် သေနတ်တွေ ပစ်ဖောက် ရောက်လာခဲ့လို့ ဒေသခံတွေ ချက်ချင်းထွက်ပြေးခဲ့ရတယ်လို့ ဒေသခံတဦးက ဆိုပါတယ်။

“ရွာအရှေ့ကနေ သေနတ်ဖောက်ပီး ဝင်လာကြတာ။ ဘာပစ္စည်းမှကို မသယ်လာနိုင်ခဲ့ဘူး။ အမတယောက်ဆိုရင်လည်း ကလေးတယောက်က စစ်သားတွေဝင်လာပြီပြောမှ ချက်ချင်း ထွက်ပြေးရတာဆိုတော့ ဘာတခုမှပါမလာဘူး” လို့ ဆိုပါတယ်။

အဲ့ဒီနောက် စစ်ကောင်စီတပ်သားတွေက ရွာထဲမှာရှိတဲ့ နေအိမ်တွေကို မီးရှို့ခဲ့တာကြောင့် အိမ်ခြေ ၆၀ ကျော် မီးလောင်ဆုံးရှုံးခဲ့သလို အသက် ၈၀ အရွယ် အဖွားတဦးနဲ့ ၆၀ ကျော် အရွယ် အဘိုး ၂ ဦး သေဆုံးခဲ့တယ်လို့ ဆိုပါတယ်။

“တဦးက မီးထဲပါသွားတာ။ နှစ်ဦးက အိမ်သာထဲကိုထည့်ပြီး မီးရှို့သွားတယ်” လို့ ဒေသခံတဦးက ပြောပါတယ်။

နေအိမ်တွေ မီးရှို့ခံလိုက်ရတဲ့ ဒေသခံတွေဟာ နီးစပ်ရာကျေးရွာတွေမှာပဲ ထွက်းပြေးခိုလုံခဲ့ရပြီး ရွာထဲပြန်မဝင်ရဲခဲ့ကြဘူးလို့ ဆိုပါတယ်။ အဲ့ဒီအပြင် မီးရှို့ပြီးထွက်သွားတဲ့ စစ်သားတွေက ညောင်ပင်စောက်တာဝါတိုင်ဘက်ကနေ သေနတ်တွေနဲ့ ရမ်းသမ်းပစ်ခတ်ခဲ့သေးတယ်လို့ ပြောပါတယ်။

၂၀၂၂ ခုနှစ် စက်တင်ဘာလ ၂၇ ရက်ကလည်း စစ်ကောင်စီတပ်သားတွေဟာ ထနောင်းတောမြောက်ရွာ နေအိမ် ၄ လုံး ထနောင်းတောတောင်ရွာ နေအိမ် ၃ အိမ်ကိုလည်း မီးရှို့ ဖျက်ဆီးခဲ့သေးတယ်လို့ သိရပါတယ်။