မြေလတ်အသံ၊ ဇူလိုင် ၁၅၊ ၂၀၂၅။

ပဲခူးတိုင်း၊ ကျောက်ကြီးမြို့နယ်အတွင်း စစ်ကောင်စီတပ်သား ၁ ဦးကို လက်နက်ခဲယမ်းတချို့နဲ့အတူ အရှင်ဖမ်းဆီးရရှိခဲ့တယ်လို့ ဖာပွန်ခရိုင် တပ်ရင်း ၁ က ဒီကနေ့ ဇူလိုင် ၁၅ ရက်မှာ သတင်းထုတ်ပြန်ပါတယ်။

ဖမ်းဆီးခံရသူဟာ ကျောက်ကြီးနယ်မြေအတွင်း တိုက်ခိုက်ရေးဝင်ရောက်နေတဲ့ အမှတ် ၂၀ စစ်ဆင်ရေးကွပ်ကဲမှုဌာနချုပ်(စကခ၂၀) လက်အောက် အသက် ၃၀ ကျော်ရှိ စစ်ကောင်စီတပ်သား ၁ ဦးဖြစ်ပြီး ကာကွယ်ရေးတပ်ဖွဲ့တွေဘက်က နယ်မြေလုံခြုံရေးအတွက် တိုက်ကင်းပတ်နေစဉ် ဇူလိုင် ၁၀ ရက်မှာ ဖမ်းမိခဲ့တာလို့ ဆိုပါတယ်။

အဆိုပါစစ်ကောင်စီတပ်သားဟာ ဇွန် ၂၆ ရက်က စစ်ကောင်စီတပ်တွေနဲ့ တော်လှန်ရေးအင်အားစုတွေအကြား ဖြစ်ပွားခဲ့တဲ့ စစ်တောင်းမြစ်ဝှမ်းစစ်ဆင်ရေးတိုက်ပွဲတွေအတွင်း ပိတ်မိကျန်ခဲ့သူဖြစ်ကာ ၎င်းကို ၁၀ ရက်ကျော်အကြာမှာ MA သေနတ် ၁ လက်၊ ကျည်ဘောက် ၃ ခု၊ ကျည်ဆံတချို့နဲ့အတူ ဖမ်းမိခဲ့တာဖြစ်ကြောင်း ဖော်ပြပါတယ်။

ဇွန် ၂၆ ရက်က စစ်တောင်းမြစ်ဝှမ်းစစ်ဆင်ရေးအဖြစ် ကျောက်ကြီးမြို့နယ်အတွင်းရှိ စစ်ကောင်စီတပ်စခန်းတွေကို ကရင်အမျိုးသားလွတ်မြောက်ရေးတပ် KNLA နဲ့ ပြည်သူ့ကာကွယ်ရေးတပ်မတော် PDF ပူးပေါင်းတပ်ဖွဲ့တွေက တိုက်ခိုက်ခဲ့ပြီး တိုက်ပွဲတွေအတွင်း စစ်ကောင်စီတပ်ဖွဲ့ဝင် ၇ ဦးထက်မနည်းသေဆုံး၊ ၂၂ ဦး စစ်သုံ့ပန်းအဖြစ် ဖမ်းဆီးရရှိခဲ့ကာ လက်နက်ခဲယမ်းမျိုးစုံအများအပြား သိမ်းဆည်းရရှိခဲ့တယ်လို့သိရပါတယ်။

ဒါ့အပြင် စစ်ကိုင်းတိုင်း၊ မုံရွာမြို့အခြေစိုက် အနောက်မြောက်တိုင်းစစ်ဌာနချုပ်(နမခ)မှ စစ်ကောင်စီတပ်သား ၃ ဦး ဘက်ပြောင်းခိုလှုံလာတယ်လို့ မုံရွာမြို့နယ်ပကဖထံက သိရပါတယ်။

နမခမှာတာဝန်ကျနေတဲ့ အသက် ၂၀ နဲ့ ၃၀ ကြားအရွယ် စစ်ကောင်စီတပ်သား ၃ ဦးဟာ မုံရွာမြို့နယ် ပြည်သူ့ကာကွယ်ရေးအဖွဲ့၊ တိုက်နယ် ၂ ပကဖ တိုက်ရေးအဖွဲ့နဲ့ ချိတ်ဆက်ပြီး ဇူလိုင် ၁၃ ရက်က လက်နက်မဲ့ခိုလှုံလာခဲ့တာလို့ ဆိုပါတယ်။

” ၂ ယောက်ကတော့ စစ်မှုထမ်းသက်က လပိုင်းပဲရှိသေးတာဗျ။ နောက် ၁ ယောက်ကတော့ ၁ နှစ်ကျော်ပြီဗျ” လို့ မုံရွာမြို့နယ်ပကဖတာဝန်ရှိသူကပြောပါတယ်။

ဘက်ပြောင်းလာသူတပ်သား ၃ ဦးမှာ စစ်ကောင်စီတပ်ကကျူးလွန်ထားတဲ့ စစ်ရာဇဝတ်မှုတွေနဲ့ပတ်သက်မှုမရှိတာကြောင့် ၎င်းတို့ကိုကောင်းမွန်စွာစောင့်ရှောက်ထားပြီး ၎င်းတို့ဆန္ဒရှိတဲ့အတိုင်း လုပ်ဆောင်ပေးနိုင်ဖို့ ကြိုးစားဆောင်ရွက်ပေးနေတယ်လို့ သူကဆိုပါတယ်။

ပြီးခဲ့တဲ့ဇူလိုင် ၃ ရက်မှာလည်း နမခမှ စစ်ကောင်စီတပ်သား ၄ ဦး လက်နက်ငယ် ၃ လက် ကျည်ဘောက် ၈ ခုနဲ့ ပကဖထံ ဘက်ပြောင်းခိုလှုံလာခဲ့တာကြောင့် ၎င်းတို့ကို ငွေကျပ်သိန်း ၁၅၀ ဆုချီးမြှင့်ခဲ့တယ်လို့ သိရပါတယ်။

စာတည်း – ဟိန်းစံ

ငဖဲ၊ ဇူလိုင် ၁၄၊ ၂၀၂၅။

မကွေးတိုင်း၊ ငဖဲမြို့နယ်၊ နတ်ရေကန် ကာကင်းစခန်းကုန်းက စစ်ကောင်စီတပ်သား ၁ ဦး လက်နက်၊ ခဲယမ်းတွေနဲ့ ဘက်ပြောင်းခိုလှုံလာတယ်လို့ အမှတ် ၁ စစ်ဒေသ ပြည်သူ့ကာကွယ်ရေး တပ်မတော် သရက်ခရိုင် အမှတ် ၄ တပ်ရင်း သတင်းနဲ့ ပြန်ကြားရေးတာဝန်ခံ ကိုမြတ်က ပြောပါတယ်။

ဘက်ပြောင်းခိုလှုံလာသူဟာ အသက် ၂၄ နှစ်အရွယ်တပ်သားကိုမောင်ဖြစ်ပြီး ဇူလိုင်ဒုတိယပတ်အတွင်း နတ်ရေကန်ကာကင်းစခန်းရောက်ရှိလာကာ ကင်းကျနေစဥ် ဇူလိုင် ၁၃ ရက်မှာ ကာကွယ်ရေး တပ်ဖွဲ့တွေဆီထွက်ပြေးခိုလှုံလာတာလို့ဆိုပါတယ်။

“သူကတော့ မတရားစစ်မှုထမ်းဖို့အတွက်ပေါ်တာဆွဲခံရတာ၊ အဲ့အတွက်ကို ဒါ သူအခွင့်အရေးရတဲ့အခါ ပြန်ပြီးတော့လူထုဘက်ကိုကူးပြောင်းလာတာပေါ့။ လက်ရှိ သူကတော့ကျနော်တို့အဖွဲ့ထဲမှာ ရှိနေပြီးတော့ စစ်ကောင်စီကို သူနိုင်တဲ့အားနဲ့ ဆက်လက်တွန်းလှန်မယ် တော်လှန်မယ်ပေါ့” လို့ သတင်းနဲ့ပြန်ကြားရေးတာဝန်ခံ ကိုမြတ်ကပြောပါတယ်။

သရက်မြို့နယ်ဇာတိဖြစ်သူကိုမောင်ဟာ အခုအနှစ်မေလက သရက်မြို့မှာသွားလာနေရင်း စစ်ကောင်စီတပ်တွေရဲ့ ပေါ်တာဆွဲဖမ်းဆီးခံရပြီးနောက် ရှမ်းပြည်နယ်တောင်ပိုင်း၊ ကျိုင်းတောင်းမြို့အခြေစိုက် အမှတ် ၃ တပ်မတော်တန်းမြင့်လေ့ကျင့်ရေးကျောင်းမှာ စစ်မှုထမ်းသင်တန်း ၂ လခွဲတက်ရောက်ခဲ့ပြီး နတ်ရေကန် ကာကင်းစခန်းကိုရောက်ရှိလာတာလို့ ဆိုပါတယ်။

သူနဲ့အတူ MA1 ၁ လက်၊ MA ကျည်ဘောက် ၃ ခု၊ 5.56 ကျည် ၁၀၀ တောင့်၊ အီကွေ့မန့် ၁ ခု ပါဝင်လာတာကြောင့် ကျပ်သိန်း ၃၀ ချီးမြှင့်ထားတယ်လို့ ကိုမြတ်ကဆက်ပြောပါတယ်။

၂၀၂၁၊ စစ်အာဏာသိမ်းချိန်ကနေ ၂၀၂၅၊ ဇူလိုင်အထိ သရက်ခရိုင် အမှတ် ၄ တပ်ရင်းဆီကို ဘက်ပြောင်းခိုလှုံလာသူ စုစုပေါင်း ၃ ဦးရှိပြီလို့ သိရပါတယ်။

စာတည်း – လင်း

ငဖဲ၊ ဇူလိုင် ၈၊ ၂၀၂၅။

မကွေးတိုင်း၊ ငဖဲမြို့နယ်အစပ် ရခိုင်ရိုးမပေါ်ရှိ နတ်ရေကန်တောင်ဗျူကုန်း၊ ရေဒါထိန်းချုပ်ရေးပင်မစခန်းကနေ ထွက်ပြေးလာတဲ့ စစ်ကောင်စီတပ်ဖွဲ့ဝင် ၂ ဦးကို လက်နက်ခဲယမ်းတချို့နဲ့ အရှင်ဖမ်းမိထားတယ်လို့ မင်းဘူးခရိုင်အတွင်းစစ်ရေးလှုပ်ရှားနေတဲ့ ပြည်သူ့လွတ်လပ်ရေးတပ်တော် – PIA အဖွဲ့ကနေ သိရပါတယ်။

ငဖဲ-ပဒါန်းလမ်းပိုင်းနံဘေးရှိ အဆိုပါတပ်စခန်း စစ်ကောင်စီတပ်သား ၂ ဦးဟာ လက်နက်တချို့ယူဆောင်ထွက်ပြေးလာစဥ် ဇွန် ၃၀ ရက် နေ့လယ်ပိုင်းမှာ PIA ရဲ့ ကင်းလှည့်တပ်ဖွဲ့ဝင်တွေနဲ့တွေ့ရှိပြီး ဖမ်းဆီးခံခဲ့ရတာလို့ ဆိုပါတယ်။

“ အခုလက်ရှိကတော့ သူတို့ကို စစ်ဆေးနေပါသေးတယ်။ အဲ့ဘက်မှာက ရာသီဥတုရောနယ်မြေရော ကြမ်းပါတယ်၊ တိုက်ပွဲလည်းဆက်တိုက်ပြင်းထန်နေတော့ စိတ်ပိုင်းဆိုင်ရာအရ ထွက်ပြေးလာကြတာပါ။ ၁ ယောက်ကတော့ စစ်တပ်ထဲရောက်တာ ၂ နှစ်ရှိပြီ ၁ ယောက်ကတော့ ၁ နှစ်ဘဲရှိသေးတယ်”လို့ ပြည်သူ့လွတ်လပ်ရေးတပ်တော် PIA အဖွဲ့ရဲ့ ပြန်ကြားရေးတာဝန်ခံက မြေလတ်အသံကို ပြောပါတယ်။

ထွက်ပြေးလာတဲ့ စစ်ကောင်စီတပ်ဖွဲ့ဝင် ၂ ဦးထံကနေ MA-1 ၁ လက်၊ MA-3 ၁ လက်၊ ကျည်ဘောက် ၇ ခု၊ ၅.၅၆ မမ ကျည် ၂၈၀ တောင့်၊ အီနာဂါဗုံးသီး ၄ လုံး၊ လက်ပစ်ဗုံး ၃ လုံး၊ စစ်ဦးထုပ် ၁ လုံးနဲ့ ကျည်ကာ အင်္ကျီ ၁ ခု သိမ်းဆည်းရရှိခဲ့တယ်လို့ သိရပါတယ်။

ဖမ်းဆီးမိခဲ့တဲ့ စစ်ကောင်စီတပ်ဖွဲ့ဝင် ၂ ဦးဟာ စစ်ကောင်စီတပ်သား ၁ ဦးနဲ့ စစ်မှုထမ်းသင်တန်းဆင်း ၁ ဦးဖြစ်ပြီး ရမည်းသင်း အမှတ် ၃ စစ်အခြေခံလေ့ကျင့်ရေးသင်တန်းကျောင်းဆင်းတွေဖြစ်ပြီး စစ်မှုထမ်းဖို့ အဓမ္မဖမ်းဆီးခံထားရသူတွေဖြစ်တယ်လို့ သူကဆက်ပြောပါတယ်။

လက်နက်နဲ့အတူ အရှင်ဖမ်းဆီးမိခဲ့တဲ့ စစ်ကောင်စီတပ်သား ၂ ဦးကို စစ်သုံ့ပန်း ဥပဒေနဲ့အညီလုံခြုံစွာထိန်းသိမ်းထားပြီး သူတို့ရဲ့ အချက်အလက်အသေးစိတ်ကိုတော့ စစ်ဆေးမေးမြန်းနေဆဲဖြစ်တယ်လို့ ဆိုပါတယ်။

စစ်ကောင်စီရဲ့ စစ်တပ်သားအဖြစ် စစ်မှုထမ်းဖို့ အဓမ္မ စုဆောင်းခံရသူတွေအနေနဲ့ ပြည်သူ့လွတ်လပ်ရေးတပ်တော် PIA၊ PIO တို့ကို ဆက်သွယ်ချိတ်ဆက်ပြီး ပြန်လည်ဝင်ရောက်နိုင်ကြောင်း ထုတ်ပြန်ချက်မှာ ရေးသားထားပါတယ်။

စာတည်း – ဟိန်းစံ

ဒိန်းဂျား၊ အောင်စိုး

မြေလတ်အသံ၊ ဇူလိုင် ၃၊ ၂၀၂၅။

စစ်ကိုင်းတိုင်း၊ မုံရွာအခြေစိုက် နမခ နဲ့ မကွေးတိုင်း၊ BPI မြင်းမွေးမြူရေးတပ်တို့မှ စစ်ကောင်စီတပ်ဖွဲ့ဝင်တွေ ဇူလိုင် ၂ ရက်နဲ့ ၃ ရက်မှာ ဘက်ပြောင်းခိုလှုံလာကြတယ်လို့ သက်ဆိုင်ရာတော်လှန်ရေး တပ်ဖွဲ့ဝင်တွေဆီက သိရပါတယ်။

မုံရွာမြို့အခြေစိုက် အနောက်ပိုင်းတိုင်းစစ်ဌာနချုပ်-နမခ ကစစ်ကောင်စီတပ်ဖွဲ့ဝင် ၄ ဦး လက်နက်တွေနဲ့အတူ ဘက်ပြောင်းခိုလှုံလာခဲ့တယ်လို့ ဇူလိုင် ၃ ရက်ဒီနေ့မှာ မုံရွာမြို့နယ်ပြည်သူ့ ကာကွယ်ရေးအဖွဲ့က ထုတ်ပြန်ပါတယ်။

ဘက်ပြောင်းလာသူ ၄ ဦးမှာ အသက် ၃၀ ကျော်အရွယ်ရှိပြီး သူတို့ဟာ ၂၀၂၄ အတွင်း လူစားထိုး ပေါ်တာဆွဲခံရပြီးနောက်မှာ စစ်တပ်ထဲကိုရောက်ရှိခဲ့ကြတာလို့ ဆိုပါတယ်။

“သူတို့က ပစတွေဗျ။ ပေါ်တာအစားထိုး ပါလာကြရတာ။ စစ်သက်ကတော့ တနှစ်မပြည့်သေးဘူးဗျ”လို့ မုံရွာမြို့နယ်ပြည်သူ့ကာကွယ်ရေးအဖွဲ့မှတာဝန်ရှိသူတဦးက ပြောပါတယ်။

အဆိုပါ ၄ ဦးအနက် ၁ ဦးမှာ သေနတ်ပါမလာပေမယ့် ကျန် ၃ ဦးမှာတော့ MA-3 ၂ လက်၊ MA-1 ၁ လက်၊ ကျည်ဘောက် ၈ ခု ပါရှိလာခဲ့တာကြောင့် ဆုချီးမြှင့်ပေးဖို့ပြင်ဆင်ထားတယ်လို့ သူက ဆိုပါတယ်။

လက်ရှိမှာ တော်လှန်ရေးမှာဝင်ပြီး ပြန်တိုက်ချင်တဲ့သူရှိသလို နေရပ်ကို ပြန်ချင်တဲ့သူလည်းရှိတာကြောင့် မြို့ နယ်ပကဖအနေနဲ့ ၎င်းတို့ဖြစ်ချင်တဲ့ ဆန္ဒအတိုင်း အတတ်နိုင်ဆုံး လုပ်ဆောင်ပေးမှာဖြစ်တယ်လို့ အထက်ပါတာဝန်ရှိသူကပြောပါတယ်။

ပြီးခဲ့တဲ့မေ ၂၇ ရက်ကလည်း နမခ က စစ်ကောင်စီတပ်သား ၂ ဦးဟာ MA-1သေနတ် ၂ လက် နဲ့အတူ CDM တွေကိုကူညီထောက်ပံ့ပေးနေ တဲ့ ဒို့အရေးချန်နယ်ဆီကို ဘက်ပြောင်းလာခဲ့သေးတယ်လို့ သိရပါတယ်။

ဒါ့အပြင် မကွေးတိုင်း၊ ပခုက္ကူမြို့နယ်ရှိ BPI မြင်းမွေးမြူရေးတပ်မှ စစ်ကောင်စီတပ်ဖွဲ့ဝင် ၁ ဦး ဇူလိုင် ၂ ရက်နေ့လယ် ၁ နာရီလောက်မှာ လက်နက်နဲ့အတူ ဘက်ပြောင်းခိုလှုံလာတယ်လို့ ပခုက္ကူမြို့နယ် နယ်မြေ ၁ ပကဖ ဆီကသိရပါတယ်။

ဘက်ပြောင်းခိုလှုံလာသူဟာ အသက် ၂၉ နှစ်အရွယ် စစ်ကောင်စီတပ်သား မိုးစက်ဖြစ်ပြီး MA 1 အမျိုးအစား သေနတ် ၁ လက်၊ ကျည်ဘောက် ၃ ခု၊ ကျည် ၁၃၅ တောင့်တို့နဲ့အတူလည်း ပါလာတာကြောင့် ဆုငွေ သိန်း ၅၀ ချီးမြှင့်ခဲ့တယ်လို့ ဆိုပါတယ်။

“ကျနော်တို့နဲ့ ချိတ်ဆက်ပြီးမှ ဝင်လာတာ၊ ကျနော်တို့ကလည်း ကြိုပေးရတဲ့ အပိုင်းတော့ရှိတာပေါ့၊ ကျနော်တို့နယ်မြေထဲအထိတော့ သူဟာသူလာတာ၊ သူအလင်းဝင်ရတဲ့အကြောင်းကတော့ စစ်ကောင်စီတပ်ထဲမှာ မနေချင်တော့လို့ ပြောတယ်၊ တပ်ထဲမှာ အပြင်တွေလည်း မထွက်ရဘူးပြောတယ်၊ လွတ်လပ်မှုလည်းမရှိဘူးလို့ ပြောတယ်၊” လို့ ပခုက္ကူမြို့နယ် နယ်မြေ ၁ ပကဖ တာဝန်ခံက ပြောပါတယ်။

လက်ရှိမှာ တပ်ရင်းမှာထိန်းသိမ်းထားပြီး ဆက်လက်စုံစမ်းမှုတွေလုပ်နေတယ်လို့လည်း ဆိုပါတယ်။

“သူကတော့ လွတ်မြောက်နယ်မြေတနေရာမှာ သွားပြီးလုပ်ကိုင်စားသောက်မယ်တော့ ပြောတယ်၊ အခုလောလောဆယ်တော့ ကျနော်တို့ဆီမှာ ထိန်းသိမ်းထားတယ်”လို့ သူက ဆက်ပြောပါတယ်။

၂၀၂၁ စစ်အာဏာသိမ်းချိန်ကနေ အခုနှစ် ဇူလိုင် ၂ ရက်အထိ ပခုက္ကူမြို့နယ် နယ်မြေ ၁ ပကဖ ဆီကို ဘက်ပြောင်းခိုလှုံလာသူ ၃ ဦးရှိပြီး အောင်သာရွာက ပျူစောထီး ၁ ဦးနဲ့ BPI မြင်းမွေးမြူရေးတပ်ထဲက တပ်သား ၂ ဦးဖြစ်တယ်လို့ သိရပါတယ်။

စာတည်း – လင်း

မြေလတ်အသံ၊ ဇူလိုင် ၁၊ ၂၀၂၅။

မကွေးတိုင်း၊ ငဖဲမြို့နယ်အပိုင် ရခိုင်ရိုးမပေါ်က အမ်း-ပဒါန်းလမ်းရှိ နတ်ရေကန်တောင်စခန်းကနေ ထွက်ပြေးလာတဲ့ စစ်ကောင်စီ တပ်သား ၁ ဦးကို ဇွန် ၂၇ ရက်နေ့မှာ ဖမ်းဆီးရမိခဲ့တယ်လို့ မင်းဘူးခရိုင်အမှတ်( ၆)တပ်ရင်းထံက သိရပါတယ်။

စစ်ကောင်စီတပ်သားအသက် ၃၀ ကျော်အရွယ်ကိုယ်ပိုင်အမှတ် (တ-၅၉ ××××)ဟာ နောက်ထပ် တပ်သား ၄ ဦးနဲ့အတူ တိုက်ပွဲအတွင်းကနေ ထွက်ပြေးလာခဲ့ကြပြီးနောက် မင်းဘူးမြို့နယ်တနေရာအရောက်မှာ သူ ၁ ဦးထဲကို တော်လှန်‌ရေးတပ်တွေ ဖမ်းဆီးရမိခဲ့တာလို့ သိရပါတယ်။

” ၄ ယောက်အတူတူပြေးလာကြတာတဲ့။ လမ်းမှာ လမ်းတွေကွဲသွားကြပြီးတော့ တယောက်တနေရာစီဖြစ်သွားကြတယ်လို့ပြောတယ်။ သူ(စကစတပ်သား)ပြေးလာတဲ့လမ်းမှာ သတင်းပေးတွေရှိတော့ ဒီအတိုင်းစောင့်ပြီးဖမ်းလိုက်တာပါပဲ”လို့ မင်းဘူးခရိုင်အမှတ်( ၆)တပ်ရင်းက တာဝန်ရှိသူက ပြောပါတယ်။

အဆိုပါစစ်ကောင်စီတပ်သားဟာ တပ်မ ၉၉ လက်အောက်ခံ တောင်တွင်းကြီးမြို့နယ်ထဲရှိ တပ်ရင်းတခုကဖြစ်ပြီး လက်ရှိမှာ ၎င်းကို စစ်ရာဇဝတ်မှုကျူးလွန်ခဲ့တာရှိ၊ မရှိကို စစ်ဆေးမေးမြန်းနေဆဲဖြစ်တယ်လို့ဆိုပါတယ်။

“စစ်ရာဝတ်မှုကျူးလွန်တာမရှိရင်​တော့ သူ့မိသားစုဆီပြန်ရ​အောင်လုပ်ပေးပါမယ်”လို့ အထက်ပါတာဝန်ရှိသူက ပြောပါ တယ်။

အလားတူ ဇွန် ၈ ရက်နေ့ကနေ ဇွန် ၁၂ရက်နေ့အတွင်းမှာ နတ်ရေကန်တောင်စခန်းကနေ ထွက်ပြေးလာတဲ့ စစ်ကောင်စီတပ်သား ၂၃ ဦးကို ချင်းကာကွယ်ရေးတပ် – အရှို ( CDF – Asho )က ငဖဲမြို့နယ်မှာ ဖမ်းဆီးရမိပြီး ထိန်းသိမ်းထားတယ်လို့ သိရ ပါတယ်။

ပြီးခဲ့တဲ့ ဇွန် ၃ ရက်နေ့မှာ အာရက္ခတပ်တော်(AA)နဲ့ပူးပေါင်းတပ်တွေက အမြောက်နဲ့ လေကြောင်းရန် ကာကွယ်ရေးစခန်းရှိရာ နတ်ရေကန်တောင် ဗျူဟာကုန်းရဲ့အဓိကကျတဲ့ တာဝါတိုင်ကာကင်းစခန်းကို အပြီး သတ်သိမ်းပိုက်လိုက်ပြီးနောက် နတ်ရေကန်စခန်းကို ဆက်လက်ထိုးစစ်ဆင်တိုက်ခိုက်နေတယ်လို့ သိရပါတယ်။

စာတည်း – မြတ်

ပခုက္ကူ၊ ဇွန် ၂၆၊ ၂၀၂၅။

မကွေးတိုင်း၊ ပခုက္ကူအခြေစိုက် တပ်မ ၁၀၁ က စစ်ကောင်စီတပ်သား ၃ ဦး ဇွန် ၂၄ ရက်မှာ ဘက်ပြောင်းခိုလှုံလာတယ်လို့ Burma Revolution Rangers ဆီက သိရပါတယ်။

အသက် ၃၂ နှစ်အရွယ် တပ်သားလှမျိုးထွန်း၊ ၃၀ နှစ်အရွယ် တပ်သားငြိမ်းသူအောင်၊ အသက် ၃၀ နှစ်အရွယ် တပ်သားချမ်းမြေ့အောင်တို့ကို ပခုက္ကူ တပ်မ ၁၀၁ တပ်အနီးကို Burma Revolution Rangers တပ်ဖွဲ့ဝင်တွေက သွားရောက်ခေါ်ဆောင်ခဲ့တာလို့ ဆိုပါတယ်။

“သူတို့ကို သွားထုတ်တာကတော့ ခက်ခဲတာပေါ့၊ စစ်တပ်အနားထိသွားထုတ်ရတာဆိုတော့ သူတို့ ကင်းပုန်းဝပ်နေတာတွေကော ဘန်ကာထဲက စောင့်နေတာမျိုးတွေရှိတော့ အခက်အခဲကတော့ ရှိတယ်၊”လို့ Burma Revolution Rangers မှ တပ်ဖွဲ့ဝင်ဒီမိုက ပြောပါတယ်။

တပ်သားလှမျိုးထွန်းနဲ့ တပ်သားငြိမ်းသူအောင်ဟာ မုံရွာမြို့မှာဖမ်းဆီးခံရပြီး တပ်သားချမ်းမြေ့အောင် ကလည်း မန္တလေးမှာအလုပ်သွားရင်း ပေါ်တာဆွဲ ဖမ်းဆီးခံရပြီးနောက် အမှတ် ၇ စစ်မြေပြင်ဆေးတပ်ရင်း (မဆရ ၇) မုံရွာ ကတဆင့် အမှတ် ၁ အရာခံနှင့်အကြပ်ကြီးသင်ကျောင်း (ရကသ ၁) ဗထူးတပ်ကိုရောက်ရှိကာ စစ်သင်တန်း ၃ လတက်ရောက်ခဲ့ကြရသူတွေဖြစ်တယ်လို့ ဆိုပါတယ်။

၃ ဦးစလုံးဟာ အခုနှစ်မတ်လမှာဖမ်းဆီးခံခဲ့ရတာဖြစ်ပြီး တပ်မ ၁၀၁ ကိုပို့ဆောင်ခံရတာကလည်း ရက်ပိုင်းပဲရှိသေးတယ်လို့ တပ်ဖွဲ့ဝင်ဒီမိုက ပြောပါတယ်။

တပ်သားလှမျိုးထွန်းနဲ့ငြိမ်းသူအောင်ကိုတော့ မုံရွာမြို့ကိုပြန်ပို့ဆောင်ပေးခဲ့ပြီး တပ်သားချမ်းမြေ့အောင် ကိုတော့ မိသားစုတွေနဲ့ဆက်သွယ်နေဆဲဖြစ်တာကြောင့် ကာကွယ်ရေးတပ်ဖွဲ့ဝင်တွေရဲ့စခန်းမှာပဲ နေထိုင်ခိုင်းထားတယ်လို့ ဆိုပါတယ်။

၂၀၂၁ စစ်အာဏာသိမ်းချိန်ကနေ အခုနှစ် ဇွန် ၂၆ ရက်အထိ Burma Revolution Rangers ဆီကို ပေါ်တာဆွဲခံရပြီး ဘက်ပြောင်းခိုလှုံလာသူ စုစုပေါင်း ၇ ဦး ရှိပြီး လက်နက်ပါလာသူက ၂ ဦးလို့ အဲ့ဒီအဖွဲ့ဆီကသိရပါတယ်။

စာတည်း – လင်း

နတ်တလင်း၊ မေ ၂၃၊ ၂၀၂၅။

ပဲခူးတိုင်း၊ နတ်တလင်းမြို့နယ်ကိုရောက်ရှိနေတဲ့ စစ်ကောင်စီစစ်ကြောင်းတခုက စစ်ကောင်စီတပ်သား ၂ ဦး မေ ၁၉ ရက်မနက် ၇ နာရီ ကျော်မှာ လက်နက်နဲ့အတူအလင်းဝင်ရောက်လာခဲ့တယ်လို့ သာယာဝတီခရိုင် အမှတ် (၁) တပ်ရင်း၊ ၃၈၀၁ က မေ ၂၃ ရက်ဒီကနေ့မှာသတင်းထုတ်ပြန်ပါတယ်။

ဘက်ပြောင်းလာသူတွေဟာ အသက် ၃၀ ကျော်အရွယ် နိုင်ဝေလင်းနဲ့ ရာဇာမင်းတို့ဖြစ်ပြီး သူတို့တွေဟာ မေ ၁၂ ရက်မှာ နတ်တလင်းမြို့နယ်၊ ပျဥ်ပုံကျေးရွာက ပျူစောထီးစခန်းကို စစ်ကောင်စီစစ်ကြောင်းနဲ့အတူ ရောက်ရှိလာတာလို့ ဆိုပါတယ်။

“တပ်သားနှစ်ယောက်က ကျနော်တို့ကိုတိုက်ရိုက်ချိတ်ဆက်တာမရှိဘူး။ သူတို့ဘာသာသူတို့ လက်နက်တွေယူလာပြီးတော့ ကျနော်တို့နယ်မြေထဲကိုပြေးလာတယ်။ ပြည်သူနဲ့တွေ့တယ်။ ပြည်သူက တဆင့် ကျနော်တို့နဲ့ချိတ်ဆက်ခိုင်းတယ်။ အဲ့တာကနေ ချိတ်ဆက်ဝင်ရောက်လာပါတယ်”လို့ သာယာဝတီခရိုင်အမှတ် (၁) တပ်ရင်း၊ ၃၈၀၁ မှ တာဝန်ရှိသူတဦးကပြောပါတယ်။

အဆိုပါစစ်ကောင်စီတပ်သား ၂ ဦးဟာ ဧရာဝတီတိုင်း၊ ရေကြည်မြို့နယ်နဲ့ ကျုံပျော်မြို့နယ်တွေကဖြစ်ပြီး စစ်မှုထမ်းအတွက်ဖမ်းဆီးခံခဲ့ရာနေ စစ်ကောင်စီတပ်သားဖြစ်လာသူတွေပါ။

သူတို့နဲ့အတူ MA 1 သေနတ် ၂ လက်၊ လက်ပစ်ဗုံး ၁ လုံး၊ စကားပြောစက် ၁ လုံး၊ ကျည်ဘောက် ၆ ခုတို့ပါလာပြီး သူတို့အနေနဲ့ သာယာဝတီခရိုင် အမှတ်(၁)တပ်ရင်းမှာနေပြီး စစ်အာဏာရှင်စနစ် အပြီးတိုင် ချုပ်ငြိမ်းရေးအတွက် ပြန်လည်တိုက်ပွဲဝင်မယ်လို့လည်း ပြောဆိုထားကြောင်း အထက်ပါတာဝန်ရှိသူက ဆက်ပြောပါတယ်။

စာတည်း – လင်း