စစ်ကောင်စီတပ်သား

အင်းတော်၊ မတ် ၁၆၊ ၂၀၂၃။

စစ်ကိုင်းတိုင်း၊ အင်းတော်မြို့နယ်မှာ စစ်ကောင်စီတပ်သားတွေက ၎င်းတို့စစ်ကောင်စီတပ်ကို ထောက်ခံနေတဲ့ ကြံ့ခိုင်ရေးအမာခံရွာက ကျေးရွာသားတဦးကို မတ်လ ၁၄ ရက် ည ၉ နာရီကျော်မှာ ဖမ်းဆီးရိုက်နှက်ခဲ့ကြတယ်လို့ သိရပါတယ်။

ရိုက်နှက်ခံရသူဟာ အင်းတော်မြို့နယ်အတွင်းက ကြံ့ခိုင်ရေးပါတီကြီးစိုးတဲ့ တုံးလုံကျေးရွာက အသက် ၃၀ ကျော်အရွယ် ကိုအောင်ကောက် ဆိုသူဖြစ်ပြီး ရွာအနီးလမ်းမပေါ်မှာ ကျွဲပျောက်ရှာနေချိန် စစ်ကြောင်းနဲ့တွေ့ပြီး ရိုက်နှက်ခံလိုက်ရတာ ဖြစ်တယ်လို့ Indaw Revolution-IR မှ တာဝန်ရှိသူတဦးက မြေလတ်အသံကို ပြောပါတယ်။

“သူကျွဲပျောက်ရှာတာကို စစ်ကြောင်းနဲ့တွေ့လို့ တညလုံး ရိုက်နှက်ဖမ်းဆီးထားတာ။ သေတော့ မသေဘူး။ မနက်ကျ ပြန်ခေါ်လာယူဖို့ သူ့မိဘတွေကို ဖုန်းဆက်ပြောတယ်တဲ့။ အခုတော့ သူ့က ရွာကိုပြန်ရောက်နေပြီ။ ဒဏ်ရာတွေကတော့ သိပ်မပြင်းဘူး။ တုံးလုံရွာက စစ်တပ်ကိုထောက်ခံတဲ့ ရွာဖြစ်တယ်ဗျ။ ဒါကြောင့်မို့လို့ ပြန်လွှတ်ပေးတာ ထင်တယ်” လို့ ပြောပါတယ်။

ကိုအောင်ကောက်ကို ရိုက်နှက်ခဲ့တဲ့ စစ်ကောင်စီတပ်သားတွေဟာ ရိက္ခာတွေ တင်ဆောင်လာတဲ့ စစ်ကား ၄ စီးနဲ့ မိုးညှင်းဘက်ကနေ အင်းတော်မြို့ထဲကို လာချိန် မော်လူးနဲ့ နဘားကျေးရွာအကြား အရောက်မှာ မိုင်းဆွဲတိုက်ခိုက်ခံခဲ့ရသေးတယ်လို့ အထက်ပါတာဝန်ရှိသူက ပြောပါတယ်။

“ည ၉နာရီကျော်မှာပဲ မိုင်းဆွဲခံရတာဗျ။ စကစတွေရဲ့ ထိခိုက်သေဆုံးမှုကိုတော့ မသိရသေးဘူး။ ထိခိုက်သေဆုံးမှု ရှိနိုင်တယ်။ အောင်ကောက်က အဲ့ဒီအချိန်မှာ ကျွဲရှာနေတာ။ အဲဒီမှာတွေ့လို့ ဖမ်းဆီးရိုက်နှက်ခံခဲ့ရတာ။ ဒီကားတွေကတော့ မြို့ထဲက ရိက္ခာကုန်းတပ်ထဲကို ဝင်သွားကြပြီ” လို့ ဆိုပါတယ်။

အဆိုပါ စစ်ကား ၄ စီး တိုက်ခိုက်ခံရပြီးနောက် ကားပေါ်လိုက်ပါလာတဲ့ စစ်ကောင်စီတပ်သားတွေဟာ ကားလမ်းမတ‌လျှောက်ကို လက်နက်ကြီး၊ လက်နက်ငယ်တွေနဲ့ ပစ်ခတ်ခဲ့တာကြောင့် ကမ်းနီကျေးရွာက နေအိမ်တလုံးနဲ့ နန်းမကြိုင်ကျေးရွာက နေအိမ်တချို့ ပျက်စီးမှု ရှိခဲ့သေးတယ်လို့ သိရပါတယ်။

စာတည်း – ရင်ငြိမ်း

ပခုက္ကူ၊ မတ် ၁၅၊ ၂၀၂၃။

မကွေးတိုင်း၊ ပခုက္ကူမြို့နယ်မှာ မိမိကျေးရွာကို ပြန်လာကြတဲ့ ဒေသခံအမျိုးသား ၃ ဦးထဲမှ ၂ ဦးကို စစ်ကောင်စီတပ်သားတွေက ဖမ်းဆီးသွားတယ်လို့ ထွက်ပြေးလွတ်မြောက်လာသူက ပြောပါတယ်။

ဖမ်းဆီးခံရသူ ၂ ဦးမှာ အိုင်ကြီးကျေးရွာမှ ဦးညိုဝင်း ၅၃ နှစ်၊ ကိုအောင်အေး ၃၃ နှစ်တို့ဖြစ်ပြီး၊ သူတို့ဟာ မတ်လ ၁၅ ရက်ဒီမနက် ၁၀ နာရီလောက်မှာ ရွာကိုပြန်လာကြချိန် ရွာထဲမှာရောက်နေတဲ့ စစ်သားတွေက ဖမ်းဆီးသွားတာလို့ အထက်ပါအမျိုးသားက ပြောပါတယ်။

“ကျနော်တို့ ၃ ယောက်ကရွာထဲမှာ ပြန်နေလို့ရ၊မရဆိုတာကို ကြည့်ဖို့လာတာ။ အဲဒီအချိန်မှာ စကစတွေရွာထဲရောက်နေတာမသိဘူး။ ညိုဝင်းနဲ့အောင်အေးက ကျနော့်ရှေ့က ရွာထဲကိုဝင်တာ။ စကစတွေက ပုန်းနေရာကထွက်လို့ဖမ်းတာ။ သူတို့ဖမ်းတာမြင်တော့ ကျနော်ကထွက်ပြေးလာခဲ့တာ” လို့ ဆိုပါတယ်။

အဲ့ဒီစစ်ကောင်စီတပ်သားတွေဟာ အင်အား ၈၀ကျော်နဲ့ ဒီကနေ့မှာ ညောင်လှ၊ အိုင်ကြီး၊ ကံကြီးစု စတဲ့ကျေးရွာ ၃ ရွာကို ဝင်ရောက်မွှေနှောက်ခဲ့ကြခဲ့တယ်လို့ နောက်ထပ်ဒေသခံတဦးက ပြောပါတယ်။

“အဖမ်းခံရတဲ့၂ ယောက်က ဒီစစ်ကြောင်းနဲ့ တွေ့သွားတာထင်တယ်။ စကစတွေက နယ်မြေရှင်းလင်း ရေးလုပ်နေကြတာထင်တယ်။ အဲဒါကိုမသိလို့ ရွာထဲ ပြန်လာကြတာပေါ့။ ပြီးတော့ ဒီနေ့မှာတိုက်ပွဲဖြစ်မဖြစ်တော့မသိဘူး။ လက်နက်ကြီးပစ်ခတ်သံတွေ တော်တော်လည်း ကြားခဲ့ရတယ်” လို့ ဆိုပါတယ်။

ဒါ့အပြင် ဖမ်းဆီးသွားသူ ၂ ဦးကို စစ်ကောင်စီတပ်သားတွေက ဘယ်နေရာကိုခေါ်သွားလဲဆိုတာကို တိတိကျကျမသိရှိရပေမယ့် အဲ့ဒီစစ်အုပ်စုတပ်စွဲနေတဲ့ ကျွန်းချောင်းလျှပ်စစ်ဓာတ်အားပေးစက်ရုံနဲ့ BPIတပ် တို့ကို ခေါ်ဆောင်သွားတာဖြစ်နိုင်တယ်လို့လည်း ဒေသခံတွေကခန့်မှန်း ပြောဆိုနေကြပါတယ်။

ပြီးခဲ့တဲ့မတ်လ ၉ ရက်ကစတင်ပြီး ပခုက္ကူမြို့နယ်ကို အင်အား ၇၀ ကျော်ပါ စစ်ကြောင်းတခုဟာ ကျွန်းချောင်း EPC စက်ရုံအနီးကို စစ်ကြောင်းထိုး ရောက်လာခဲ့တာကြောင့် မြို့စိုးရွာ၊ ငှက်ပျောတောရွာ၊ သီရိလေးရွာ၊ ပေါက်တောရွာ၊ ကံကြီးစုရွာ၊ အိုင်ကြီးရွာ၊ ညောင်လှရွာ၊ ညောင်နီပင်ရွာ၊ သိမ်တော်ရွာနဲ့ ဆယ်လံရွာကဒေသခံပြည်သူ ၁ သောင်းကျော် ထွက်ပြေးတိမ်းရှောင်ခဲ့နေရတာလည်း ဖြစ်ပါတယ်။

စာတည်း – လင်း

ပခုက္ကူ၊ မတ် ၁၂၊ ၂၀၂၃။

မကွေးတိုင်း၊ ပခုက္ကူမြို့နယ်၊ မြို့စိုးကျေးရွာက စိတ်ဝေဒနာသည် အမျိုးသားတဦးကို မတ်လ ၁၀ ရက် နေ့လည်အချိန်မှာ စစ်ကောင်စီတပ်သားတွေက ဝိုင်းရိုက်ခဲ့လို့ ဒဏ်ရာပြင်းပြင်းထန်ထန် ရရှိသွားခဲ့တယ်လို့ သိရပါတယ်။

ရိုက်နှက်ခံရသူမှာ အသက် ၃၀ အရွယ်ရှိ ဦးအောင်ခိုင်ဖြစ်ပြီး၊ သူ့ကို စစ်ကောင်စီတပ်သား ၁၀ ဦးက သေနတ်ဒင်တွေနဲ့ ရိုက်နှက်ကြသလို ခြေထောက်တွေနဲ့လည်း ကန်ခဲ့ကြတယ်လို့ မျက်မြင်တွေရဲ့ပြောဆိုချက်ကို ကိုးကားပြီးတော့ အမည်မဖော်လိုတဲ့ ဒေသခံတဦးက ပြောပါတယ်။

“နေ့လည် တနာရီအချိန်လောက်မှာ သူကကျွန်းချောင်းစျေး အနောက်ဖက်က လမ်းဘေးကဇရပ်ပေါ်မှာ အိပ်နေတာ။ အဲဒီအချိန်မှာ စကစတွေက သူ့ကိုနိုးပြီးတော့ စစ်ဆေးတယ်။ အောင်ခိုင်က စိတ်မနှံ့တော့ ဘာတွေဖြေတယ်တော့ မသိဘူး။ အဲဒါကို စကစတွေက ဝိုင်းရိုက်တော့တာပဲ။ ပါးတွေ၊လက်တွေမှာ တော်တော်စုတ်ပြဲသွားတယ်” လို့ ဆိုပါတယ်။

ဦးအောင်ခိုင် ရိုက်နှက်ခံရပြီးနောက် စစ်ကောင်စီတပ်သားတွေ ထွက်သွားချိန် အနီးဝန်းကျင်မှ ဒေသခံတွေက ဝိုင်းဝန်းသယ်ယူပြီး ဆေးခန်းတခုကို ပို့လိုက်ကြတယ်လို့ သူကဆက်ပြောပါတယ်။

“လက်မှာတော်တော်လည်း စုတ်ပြဲသွားတယ်။ သူ့ကိုကုသပေးတဲ့ ဆေးမှူးပြောတာက လက်နှစ်ဖက်စလုံးကို ခြောက်ချက်လောက် ချုပ်ရမယ်တဲ့။ ဒါပေမဲ့ ဆေးခန်းမှာ ပစ္စည်းတွေ အစုံအလင်မရှိတော့ မချုပ်ဘဲ ကုသနေရတယ်တဲ့။ အသက်အန္တရာယ်ကတော့ မစိုးရိမ်ရတော့ဘူးလို့ ပြောတယ်” လို့ ဆိုပါတယ်။

ဦးအောင်ခိုင်ကို ဝိုင်းဝန်းရိုက်နှက်ခဲ့ကြတဲ့ စစ်ကောင်စီတပ်သားတွေဟာ ကျွန်းချောင်းလျှပ် စစ်ဓာတ်အားပေးစက်ရုံအနီးက အထကစာသင်ကျောင်းထဲမှာ တပ်စွဲနေကြတဲ့ အင်အား ၇၀ ကျော်ရှိတဲ့ စစ်ကြောင်းက ဖြစ်တယ်လို့ ဒေသခံတွေက ပြောပါတယ်။

အလားတူပြီးခဲ့တဲ့ ဖေဖော်ဝါရီ ၂၇ ရက်နေ့မှာလည်း ကျွန်းချောင်းလျှပ်စစ်ဓါတ်အားပေးစက်ရုံဝန်ထမ်း ကိုဟံဇော်လင်း ၂၅ နှစ်မှာ ပခုက္ကူမြို့ပေါ်ကို ဝန်ထမ်းလစာထုတ်ဖို့ သွားချိန် တိရစ္ဆာန်​မွေးမြူရေးနဲ့ လေ့ကျင့်ရေးအမှတ် (၁)တပ် စစ်ကောင်စီတပ်သားတွေက ဖမ်းဆီး ရိုက်နှက်ခဲ့တာကြောင့် ဒဏ်ရာပြင်းထန်ရရှိခဲ့ပါတယ်။

မြောင်၊ မတ် ၁၁၊ ၂၀၂၃။

စစ်ကိုင်းတိုင်း၊ မြောင်မြို့နယ်၊ ကင်းကျေးရွာထဲကို စစ်ကောင်စီတပ်သားတွေက မတ်လ ၁၁ ရက် ဒီမနက် ၆ နာရီလောက်မှာ ဝင်ရောက်လာကာ အမျိုးသားတဦးကို သေနတ်နဲ့ ပစ်သတ်သွားတဲ့အပြင် ရွာထဲက ပစ္စည်းတွေကိုလည်း ယူသွားခဲ့တယ်လို့ သိရပါတယ်။

ကျောက်ရစ်ရွာစခန်းက ထွက်လာတဲ့ အင်အား ၄၀ ဝန်းကျင်ပါ စစ်သားတွေဟာ ကင်းကျေးရွာထဲကို ဝင်ရောက်ချိန် အထက်ပါအမျိုးသားနဲ့ ထိပ်တိုက်တွေ့ပြီး ပစ်သတ်ခဲ့တာလို့ Myaung Union Army-003 အဖွဲ့မှ တာဝန်ရှိသူတဦးက ပြောပါတယ်။

“အင်အားကတော့ ၄၀ လောက်ပါတယ်။ ရွာထဲကို သေနတ်တွေ ပစ်ဖောက်ပြီးဝင်လာတာ။ အဲ့မှာ ပြည်သူတဦးက သူတို့နဲ့ ထိပ်တိုက်တွေ့လိုက်တော့ ပြေးတာပေါ့။ အဲ့မှာ လှမ်းပစ်လိုက်တာ ကျသွားတယ်။ သူတို့ဘက်ကလည်း ထွက်လာတုန်းက ၄၀ (အင်အား)၊ ပြန်ဝင်တော့ ၄၀ လုံး မဝင်နိုင်ဘူး” လို့ ပြောပါတယ်။

သေဆုံးသူဟာ မကွေးမြို့ကနေ ကင်းရွာမှာ အခြေချနေထိုင်နေတဲ့သူလို့သာ သိရပြီး၊ သူနဲ့ပတ်သက်တဲ့ အသေးစိတ်အချက်အလက်ကိုတော့ မသိရှိရသေးပေမယ့် အလောင်းကိုတော့ စစ်ကောင်စီတပ်တွေက ပစ်တဲ့နေရာမှာပဲ ထားခဲ့တယ်လို့ ဆိုပါတယ်။

အဲ့ဒီနောက် ရွာထဲက ပစ္စည်းတွေကိုပါ ယူလာတဲ့ အဆိုပါစစ်သားတွေကို မနက် ၇ နာရီလောက်မှာ ကျေးရွာ Local တပ်ပေါင်းစုတွေနဲ့ နယ်မြေခံတပ်ရင်းတပ်ဖွဲ့တွေက ကျောက်ရစ်စခန်းကို ပြန်တဲ့လမ်းပိုင်းမှာ မိုင်းဆွဲတိုက်ခိုက်ခဲ့ရာ စစ်သား ၃ ဦး ဒဏ်ရာရခဲ့တယ်လို့ Myaung Union Army-003 အဖွဲ့မှ တာဝန်ရှိသူတဦးက ပြောပါတယ်။

ကျောက်ရစ်စခန်းက စစ်သားတွေဟာ နယ်မြေစိုးမိုးမှုရဖို့အတွက် မကြာခဏဆိုသလို အနီးနားကျေးရွာတွေကို စစ်ကြောင်းထိုးကာ ဝင်ရောက်ဖျက်ဆီးလေ့ရှိသလို ကာကွယ်ရေးအဖွဲ့တွေက လက်နက်ကြီး၊ လက်နက်ငယ်တွေ အဲ့ဒီစခန်းကို တိုက်ခိုက်လေ့ရှိတယ်လို့ သိရပါတယ်။

မြင်းမူ၊ မတ် ၆၊ ၂၀၂၃။

စစ်ကိုင်းတိုင်း၊ မြင်းမူမြို့နယ်၊ လက္ကပင်ကျေးရွာကို စစ်ကောင်စီတပ်သားတွေက မတ်လ ၅ ရက်မနေ့ကမနက် ၅ နာရီခန့်ကတည်းက ဝင်ရောက်စီးနင်းပြီး ရွာထဲတပ်စွဲကာ ရွာခံပြည်သူ ၂၀၀ ၀န်းကျင်ကိုလည်း ဖမ်းဆီးထားတယ်လို့ သိရပါတယ်။

အင်အား ၁၀၀ ကျော်ရှိတဲ့ စစ်သားတွေဟာ ရွာရဲ့ဘုန်းတော်ကြီးကျောင်းထဲမှာ တပ်စွဲထားပြီး ဖမ်းဆီးထားတဲ့ အမျိုးသား၊အမျိုးသမီး ၂၀၀ ၀န်းကျင်ကို မတ်လ ၆ ရက် ဒီကနေ့ ညနေ ၄ နာရီကျော်အထိ ပြန်မလွှတ်သေးဘဲ ဖမ်းဆီးထားဆဲဖြစ်တယ်လို့ မြင်းမူအခြေစိုက် Knight Commanders PDF မှ တာဝန်ခံ ဘယ်သန်ကြီးက ပြောပါတယ်။

“ဒီရွာမှာက PDF လည်း မရှိဘူး။ ရွာခံတောင်သူ လယ်သမားတွေနဲ့ မီးရှို့ခံထားရတဲ့ တခြားရွာတွေက ပြည်သူတွေ လာနေကြတာ။ ဒီစကစတွေက တိုက်ပွဲမဖြစ်ဘဲ အကြောင်းမဲ့ဝင်လာပြီးတော့ ဖမ်းဆီးထားတာဗျ။ ဖမ်းခံထားရတဲ့ အထဲက အမျိုးသား ၃ ယောက်ကို သတ်ဖြတ်လိုက်ပြီလို့ သတင်းရတယ်။ မနေ့က သေနတ်ပစ်သံတွေ ကြားရတယ်။ ဒီနေ့နဲ့ဆို စကစတွေ ရွာထဲတပ်စွဲနေတာ ၂ ရက်ရှိပြီ” လို့ ဆိုပါတယ်။

အမျိုးသား ၃ ဦး အသက်ခံရတာနဲ့ပတ်သက်ပြီး မြေလတ်အသံက သီးခြားအတည်မပြုနိုင်သေးပါဘူး။

လက္ကပင်ကျေးရွာကို ဝင်ရောက်တပ်စွဲနေတဲ့ စစ်ကြောင်းဟာ မတ်လ ၂ ရက်က စစ်ကိုင်း မြို့နယ်၊ တာတိုင်ကျေးရွာက ရွာခံအမျိုးသား၊ အမျိုးသမီး ၁၆ ဦးကို သတ်ခဲ့တဲ့ စစ်ကြောင်းဖြစ်တယ်လို့ ဘယ်သန်ကြီးက ဆက်ပြောပါတယ်။

“ဒီစစ်ကြောင်းက တမခ ၉၉ လက်အောက်ခံ ခြေမြန်တပ်ရင်းတခုကလို့ သိထားရတယ်ဗျ။ ဒီစစ်ကြောင်းက တာတိုင်ကနေ မြင်းမူကိုဖြတ်၊ မြင်းမူကနေ အလ္လကပ္ပရွာကို ဝင်မီးရှို့တယ်။ ပြီးမှ အခုဒီရွာကို ရောက်နေတာ။ ပြီးတော့ ဒီကောင်တွေက စစ်ယူနီဖောင်းတွေ မဝတ်ဘူးဗျ။ PDF လိုလို၊ အရပ်သားလိုလို နေကြတာ” လို့ ဆိုပါတယ်။

လက္ကပင်ကျေးရွာမှာ အိမ်ခြေ ၃၀၀ ကျော်ရှိပြီး ရွာရဲ့ဘုန်းတော်ကြီးကျောင်းမှာ မီးရှို့ခံထားရတဲ့ တခြားကျေးရွာက ပြည်သူတွေလည်း လာရောက်ခိုလှုံနေတဲ့ ကျေးရွာတရွာလည်း ဖြစ်ပါတယ်။

စာတည်း – လင်း

မတ္တရာ၊ ဖေဖော်ဝါရီ ၂၈၊ ၂၀၂၃။

မန္တလေးတိုင်း၊ မတ္တရာမြို့နယ်ထဲမှာ ဖေဖော်ဝါရီလ ၁ လအတွင်း ဒရုန်းတိုက်ခိုက်မှု ၁၄ ကြိမ်ကြောင့် စစ်ကောင်စီတပ်သား ၈ ဦးထက်မနည်း သေဆုံးပြီး အများအပြား ဒဏ်ရာရတယ်လို့ နတ်ဆိုးမြေအောက်တော်လှန်ရေးတပ်ဖွဲ့ဆီက သိရပါတယ်။

ဖေဖော်ဝါရီလ ၁ ရက်ကနေ ၂၇ ရက်အထိ မတ္တရာမြို့နယ်ထဲက ကင်းကျေးရွာ၊ ရုန်းပင်ကျေးရွာ၊ အောင်ချမ်းသာကျေးရွာနဲ့၊ စိန်ပန်ကုန်းကျေးရွာတွေ အပါအဝင် စစ်ကောင်စီတပ်စွဲထားတဲ့နေရာတွေ၊ စစ်ကြောင်းတွေနဲ့ ဆက်ကြေးကောက်တဲ့နေရာတွေကို ဒရုန်းနဲ့တိုက်ခိုက်ခဲ့ရမှာ သေဆုံးခဲ့ကြတာလို့ နတ်ဆိုးမြေအောက်တော်လှန်ရေးတပ်ဖွဲ့ တာဝန်ခံ ဗိုလ်နတ်ဆိုးက ပြောပါတယ်။

“တိုက်ခဲ့တာကတော့ စကစ နေရာတော်တော်များများပါ။ အများဆုံးကတော့ စကစတွေက ဒေသခံတွေကို စစ်ဆေးငွေတောင်းတဲ့နေရာတွေပါ။ ဒီလိုတွေ ဒရုန်းနဲ့ တိုက်ခိုက်တဲ့နေရာမှာ အထူးသတိထားနေရတာက ပြည်သူတွေ ထိခိုက်မှာကိုပဲ။ စကစတွေက အမြဲလိုလို ပြည်သူတွေနဲ့ ရောနေတာဆိုတော့ လုပ်ရတဲ့အခက်ခဲ ရှိနေတာ” လို့ ပြောပါတယ်။

ပြည်သူတွေအနေနဲ့ စစ်ကောင်စီ နီးကပ်စွာ မနေဖို့၊ စစ်ရေး အသိသတိရှိကြဖို့၊ ဒရုန်းနဲ့တိုက်ခိုက်ချိန်မှာ ကုန်ကျစရိတ် အသင့်တင့်ရှိနေတာကြောင့် လုပ်ငန်းအောင်မြင်ဖို့ ဝိုင်းဝန်းကူညီပေးကြပါလို့ ဆိုပါတယ်။

ယခင်က စစ်ကောင်စီအဖွဲ့တွေကို တိုက်ခိုက်ချိန်မှာ မိုင်းဆွဲတာနဲ့ ချောင်းမြောင်းပစ်ခတ်တာတွေပဲ လုပ်နိုင်ခဲ့လို့ ဆုံးရှုံးနစ်နာရတာနဲ့ အချိန်ကုန် အလုပ်မဖြစ်တာရှိခဲ့ပြီး ဝေဟင်ကနေ ဒရုန်း အသုံးပြုတိုက်ခိုက်လာနိုင်လို့ ပိုပြီးထိရောက်တဲ့ အကျိုးကျေးဇူးတွေ ရလာတယ်လို့ သိရပါတယ်။

နတ်ဆိုးမြေအောက် တော်လှန်ရေးအဖွဲ့တွေအနေနဲ့ စစ်ကောင်စီကို တိုက်ခိုက်တဲ့နေရာမှာ အဖွဲ့တခုတည်းကပဲ တိုက်ခိုက်တာမျိုး ရှိသလို မိတ်ဖက်တော်လှန်ရေးအဖွဲ့တွေနဲ့ ပူးပေါင်းလုပ်ဆောင်တာတွေလည်း ရှိတယ်လို့ ဆိုပါတယ်။

လက်ရှိအချိန်မှာ မတ္တရာမြို့နယ်အတွင်း စစ်ကောင်စီဘက်က မြေပြင်တိုက်ခိုက်မှုတွေအပါအဝင် လေကြောင်းကနေ တိုက်ခိုက်တာကိုပါ ခံနေရလို့ စိုးရိမ်ကြောင့်ကြမှုတွေ ရှိနေတယ်လို့ သိရပါတယ်။

ဖေဖော်ဝါရီလ ၁ ရက်က မတ္တရာမြို့နယ်၊ ကင်းကျေးရွာမှာ တပ်စွဲထားတဲ့ စစ်ကောင်စီကင်းစခန်းနဲ့ ဟင်္သာကျေးရွာကို စစ်ကြောင်းထိုးလာတဲ့ စစ်ကောင်စီတပ်ကို ဒရုန်း ၅ စင်းနဲ့ ပထမဆုံးအကြိမ် တိုက်ခိုက်ခဲ့ရာ စစ်သား ၂ ဦးထက်မနည်း ထိခိုက်သေဆုံးခဲ့ပါတယ်။

ဖေဖော်ဝါရီလ ၂၅ ရက်မှာတော့ ရွာသာရွာကျေးရွာမှာ ဒေသခံပြည်သူတွေကို လိုက်ဖမ်းပြီး အပင်အောက်မှာ နားနေတဲ့ စစ်ကောင်စီအဖွဲ့ကို ဒီလအတွက် နောက်ဆုံးအကြိမ်အဖြစ် ဒရုန်းနဲ့ တိုက်ခိုက်ခဲ့တာလည်း ဖြစ်ပါတယ်။