မြေလတ်အသံ၊ စက်တင်ဘာ ၂၀၊ ၂၀၂၆။

UFC 331 ပွဲစဉ်ရဲ့ ခေါင်ပွဲဖြစ်တဲ့ Flyweight ချန်ပီယံကာကွယ်ပွဲမှာ ချန်ပီယံ ဂျော့ရှ်ဝါဗန်နဲ့ ချန်ပီယံဟောင်း ပန်တိုဂျာတို့ ယှဉ်ပြိုင်ခဲ့ရာ ၅ ချီအထိ ယှဉ်ပြိုင်ခဲ့ရပြီး ဂျော့ရှ်ဝါဗန်က အမှတ်ပေးဒိုင်တွေရဲ့အဆုံးအဖြတ်နဲ့ အနိုင်ရရှိခဲ့ပါတယ်။

ချန်ပီယံဟောင်း ပန်တိုဂျာကို ပြီးခဲ့တဲ့ ၂၀၂၅ ခုနှစ် ဒီဇင်ဘာ ၇ ရက် UFC 323 ပွဲစဉ်မှာ အနိုင်ယူပြီး ချန်ပီယံဖြစ်လာခဲ့တဲ့ ဂျော့ရှ်ဝါဗန်က နောက်ထပ်တကြိမ် မကျေပွဲပြန်လည်တွေ့ဆုံရာမှာလည်း ထပ်မံအနိုင်ယူခဲ့ပြီး ချန်ပီယံခါးပတ်ကို ကာကွယ်နိုင်ခဲ့တာဖြစ်ပါတယ်။

ဂျော့ရှ်ဝါဗန်ဟာ ချန်ပီယံဖြစ်ပြီးတဲ့နောက် တက်ဆူရိုတိုင်ရာကို UFC 328 မှာ တကြိမ် ချန်ပီယံဟောင်း ပန်တိုဂျာကို ယခု UFC 331 မှာတကြိမ် စုစုပေါင်း နှစ်ကြိမ် ချန်ပီယံခါးပတ်ကာကွယ်ထားခဲ့ပြီပဲ ဖြစ်ပါတယ်။

မြေလတ်အသံ

ဂျော့ရှ်ဝါဗန် #ပန်တိုဂျာ #UFC331 #MMA

မြေလတ်အသံ၊ ဇွန် ၂၉၊ ၂၀၂၅။

UFC 317 ဖလိုင်းဝိတ်တန်းပွဲမှာ ဖလိုင်းဝိတ်အဆင့် ၁ နေရာက ဘရန်ဒန်ရွိုင်ဗယ်ကို မြန်မာပြည်ဖွား ချင်းဖိုက်တာ ဂျော့ရှုဝါဗန်က အမှတ်နဲ့ အနိုင်ရရှိခဲ့ပါတယ်။

ဒီပွဲမှာ အဆင့် ၁ နေရာက ဘရန်ဒန်ရွိုင်ဗယ်နဲ့ အဆင့် ၆ နေရာက မာနယ်ကပ်တို့ တွေ့ဆုံရမယ့်တွဲဆိုင်းဖြစ်ပေမယ့် မာနယ်ကပ် နုတ်ထွက်သွားလို့ ဗန်က လူစားထိုးဝင်ရောက်ထိုးသတ်ခဲ့တာဖြစ်ပြီး UFC 316 မှာလည်း ဘရူနိုဆေးလ်ဗားကို အလဲထိုးနဲ့ အနိုင်ယူခဲ့တဲ့ ဗန်အတွက် ပြင်ဆင်ချိန် နည်းခဲ့တာဖြစ်ပါတယ်။

ပွဲအတွက် ပြင်ဆင်ချိန် ၃ ပတ်သာ ရခဲ့တဲ့ ဗန်က ဘရန်ဒန်ရွိုင်ဗယ်ကို အခုလို အမှတ်နဲ့ အနိုင်ရရှိခဲ့တာဖြစ်ပြီးတော့ ဒီနိုင်ပွဲကြောင့် ချန်ပီယံခါးပတ်စိန်ခေါ်ခွင့်ရမယ့် အခွင့်အရေးလည်း ရှိလာပြီ ဖြစ်ပါတယ်။

မြန်မာပြည်ဖွား ချင်းလူငယ်ဖိုက်တာ ဂျော့ရှုဝါဗန်ဟာ အသက် ၂၃ နှစ်သာရှိသေးတာဖြစ်ပြီး UFC မှာ ၉ ပွဲ ကစားထားပြီး ၈ ပွဲနိုင် ၁ ပွဲရှုံးရလဒ် ရရှိထားကာ လက်ရှိမှာတော့ ၅ ပွဲဆက်အနိုင်ရလဒ်ကို ရယူထားနိုင်ခဲ့ပြီလည်း ဖြစ်ပါတယ်။

မြေလတ်အသံ၊ ဇွန် ၁၀၊ ၂၀၂၅။

ဇွန် ၂၈ ရက်မှာကျင်းပမယ့် UFC 317 မှာ ဘရန်ဒန်ရိုဗာနဲ့ ထိုးသတ်သွားမှာလို့ ဂျော့ရှုဝါဗန်က သူ့ရဲ့ တွစ်တာစာမျက်နှာမှာ ဖော်ပြလာပါတယ်။

UFC 317 မှာ ဖလိုင်းဝိတ် အဆင့် ၁ နေရာက ဘရန်ဒန်ရိုဗာနဲ့ အဆင့် ၆ နေရာက မာနယ်ကပ်တို့ ထိုးသတ်ရမှာဖြစ်ပေမယ့် မာနယ်ကပ် ဒဏ်ရာကြောင့်နုတ်ထွက်သွားလို့ ဂျော့ရှုဝါဗန်က လူစားဝင် ထိုးသတ်သွားမှာ ဖြစ်ပါတယ်။

အမေရိကန်နိုင်ငံသား အသက် ၃၂ နှစ်အရွယ် ဘရန်ဒန်ရိုဗာက ဖလိုင်းဝိတ်ချန်ပီယံ အလက်ဇန်ဒရီ ပန်တိုဟာ နဲ့ UFC 296 မှာ ခါးပတ်လုခဲ့ဖူးပြီး အမှတ်နဲ့ရှုံးနိမ့်ထားကာ UFC မှာ ၁၀ ပွဲကစား ၇ ပွဲနိုင် ၃ ပွဲ ရှုံးနိမ့်ထားပါတယ်။

မြန်မာပြည်ဖွား ချင်းလူငယ်ဖိုက်တာ ဂျော့ရှုဝါဗန်ကတော့ ပြီးခဲ့တဲ့ ဇွန် ၇ ရက် UFC 316 မှာ ဖလိုင်းဝိတ် အဆင့် ၁၂ က ဘရူနိုဆေးလ်ဗားကို အလဲထိုးနဲ့ အနိုင်ရရှိခဲ့ပြီး ၄ ပွဲဆက် အနိုင်ရယူထားကာ UFC မှာ ၈ ပွဲကစား ၇ ပွဲနိုင် ၁ ပွဲရှုံး မှတ်တမ်းရရှိထားပါတယ်။

နောက်ဆုံး ၄ ပွဲဆက်တိုက် UFC Number Events ရှေ့ထွက်တွဲဆိုင်း(Prelims Card)တွေမှာပဲ ထိုးသတ်ခဲ့ရတဲ့ ဂျော့ရှုဝါဗန်အနေနဲ့ လာမယ် UFC 317 ပွဲစဉ်မှာတော့ ခေါင်တွဲဆိုင်း(Main Card)မှာ ပါဝင်ထိုးသတ်ခွင့်ရတော့မှာလည်း ဖြစ်ပါတယ်။

အရပ် ၅ ပေ ၉ လက်မရှိပြီး ဂျော့ရှုဝါဗန်ထက် အရပ် ၄ လက်မအသာ လက်တံအရှည် ၃ လက်မသာတဲ့ ဝါရင့်ဖိုက်တာ ဘရန်ဒန်ရိုဗာကို ပြိုင်ပွဲကျင်းပဖို့ ၁၈ ရက်အလိုမှ လူစားဝင်ကစားရတဲ့ဗန်အတွက် စိန်ခေါ်မှုကြီးမားနေပေမယ့် ဒီစိန်ခေါ်မှုကို ကျော်ဖြတ်နိုင်ခဲ့ရင် ချန်ပီယံခါးပတ်စိန်ခေါ်ဖို့ အခွင့်အရေးရရှိလာနိုင်မှာလည်း ဖြစ်ပါတယ်။

ဂျော့ရှုဝါဗန်အနေနဲ့ ၂၀၂၄ ဇူလိုင် ၁၃ ရက်က ချားလ်ဂျွန်ဆင်နဲ့ ထိုးသတ်ခဲ့တဲ့ပွဲကနေ အခုလာမယ့် ဘရန်ဒန်ရိုဗာနဲ့ ထိုးသတ်မယ့်ပွဲအထိဆိုရင် ၁ နှစ်အတွင်း ၆ ပွဲအထိ ထိုးသတ်ခဲ့တဲ့မှတ်တမ်းလည်း ရရှိသွားမှာဖြစ်ပြီး ပျမ်းမျှအားဖြင့် ၂ လ ၁ ပွဲနှုန်း ထိုးသတ်ခဲ့တာဖြစ်ပါတယ်။

UFC ဖလိုင်းဝိတ်တန်း (၁၁၅-၁၂၅ပေါင်) မှာ လက်ရှိအဆင့် ၁၄ နေရာက ဂျော့ရှုဝါဗန်အနေနဲ့ အဆင့် ၁၂ က ဘရူနိုဆေးလ်ဗားကို အလဲထိုးအနိုင်ယူထားခဲ့ပေမယ့် UFC အနေနဲ့ အဓိကပြိုင်ပွဲကြီးတွေအပြီး ၂ ပတ်အတွင်းမှသာ အဆင့်သတ်မှတ်ချက်အပြောင်းအလဲပြုလုပ်လေ့ရှိတာကြောင့် အဆင့်အပြောင်းအလဲပြုလုပ်ပြီးပါက ဗန်အနေနဲ့ လက်ရှိအဆင့်ကနေ အဆင့် ၁၀ လောက်ထိ ရောက်ရှိနိုင်မယ်လို့ ပရိသတ်တွေက ခန့်မှန်းနေကြတာလည်း ဖြစ်ပါတယ်။

UFC 317 ကို လာမယ့် ဇွန် ၂၈ ရက် ဒေသစံတော်ချိန် ည ၇ နာရီ (မြန်မာစံတော်ချိန် ဇွန် ၂၉ ရက် မနက်ပိုင်း) အမေရိကန်၊ နီးဗားဒါးပြည်နယ် လက်ဗီးဂက်စ်မြို့ T-Mobile Arena မှာ ကျင်းပသွားမှာဖြစ်ပါတယ်။