သေဆုံး

ဖြူး၊ စက်တင်ဘာ ၂၊ ၂၀၂၅

ပဲခူးတိုင်း၊ ဖြူးမြို့နယ်၊ မြို့ချောင်းတံတားပေါ် လမ်းလျှောက်လာတဲ့ လူငယ်အမျိုးသား ၂ ဦးကို တံတားစောင့်စစ်ကော်မရှင်တပ်ဖွဲ့က သေနတ်နဲ့ပစ်ခတ်လို့ ၂ ဦးစလုံးသေဆုံးခဲ့တယ်လို့ ဒေသခံတွေထံက သိရပါတယ်။

သေဆုံးသူတွေဟာ အောင်စည်ယွန်းကျေးရွာနေ အသက် ၁၆ နှစ် မောင်ဟိန်းဝေစိုးနဲ့ အသက် ၁၈ နှစ် ကိုမျိုးဇော်အောင်တို့ဖြစ်ပြီး စက်တင်ဘာ ၁ ရက် ယမန်နေ့မနက် ၈ နာရီ မိနစ် ၃၀ ခန့်မှာ အောင်စည်ယွန်းရွာကနေ မြို့ချောင်းကျေးရွာကို သွားရောက်စဥ် တံတားပေါ်မှာ ပစ်ခတ်ခံခဲ့ရတာလို့ ဆိုပါတယ်။

“တံတားပေါ်ဖြတ်နေတုန်း ပစ်ခံရတာ။ ၁ ယောက်က တံတားပေါ်မှာဆုံးတယ်။ ၁ ယောက်က ရွာရောက်မှဆုံးတာ။ ခြေလျင်သွားကြတာ။ စကစဘက်က တံတားနားမှာ စခန်းလုပ်ထားတာရှိတယ်။ ၁ ယောက်ကအိမ်ကိုပြန်ပြေးရင်း ဆေးရုံပို့မမီဘဲ အိမ်မှာဆုံးသွားတာပါ” လို့ အောင်စည်ယွန်းရွာခံတဦးက မြေလတ်အသံကို ပြောပါတယ်။

မြို့ချောင်းတံတားစောင့် စစ်ကော်မရှင်တပ်ဖွဲ့က လူငယ် ၂ ဦး လမ်းလျှောက်လာတာကို မေးမြန်းတာမရှိဘဲ သေနတ်နဲ့ပစ်ခတ်ခဲ့တာကြောင့် မောင်ဟိန်းဝေစိုးမှာ ရင်ဘတ်ကျည်ထိဒဏ်ရာနဲ့နေရာမှာသေဆုံးသွားခဲ့ပြီး မောင်မျိုးဇော်အောင် ကတော့ ဝမ်းဗိုက်ကျည်ထိဒဏ်ရာနဲ့ နေအိမ်အရောက်မှာ သေဆုံးသွားတာလို့ သိရပါတယ်။

တံတားပေါ်မှာ သေဆုံးသွားတဲ့ ဟိန်းဝေစိုးအလောင်းကို စစ်ကော်မရှင်တပ်ဖွဲ့က ကောက်ယူသွားပြီး ဖြူးဆေးရုံကိုပို့ဆောင်ပြီးနောက်မှာ ​ယမန်နေ့ညပိုင်းမှာ အလောင်းကို သ​င်္ဂြိုဟ်လိုက်ကြတယ်လို့ ဖြူးဆေးရုံနဲ့နီးစပ်သူတွေထံက သိရပါတယ်။

အဆိုပါ မြို့ချောင်းတံတားပေါ်ကို ဒေသခံပြည်သူတွေက ပုံမှန်သွားလာနေကြတာဖြစ်ပြီး ပြီးခဲ့တဲ့ ဩဂုတ်လလယ်ပိုင်းကစတင်ကာ မြို့ချောင်းကျေးရွာမှာ ကင်းပုန်းဝပ်နေထိုင်လာတာကြောင့် မြို့ချောင်းတံတားအပေါ်မှာ ဒေသခံပြည်သူဖြတ်သန်းသွားလာမှု နည်းသွားတယ်လို့ သိရပါတယ်။

ပြီးခဲ့တဲ့ ဇွန် ၂၉ ရက်ကလည်း ဖြူးမြို့နယ်၊ ဝဲဒေါင့်ဝဲကြီးကျေးရွာတိုက်ပွဲမှာ KNLA ပူးပေါင်းတပ်တွေနဲ့ စစ်ကောင်စီတပ်တွေ တိုက်ပွဲဖြစ်ပွားခဲ့ပြီး စစ်တပ်ဘက်က လေယာဥ်နဲ့ဗုံးကြဲလို့ ပြည်သူ ၄ ဦးသေဆုံးကာ ၅၀ ကျော်ဒဏ်ရာရရှိခဲ့ပါတယ်။

နိုင်ငံရေးအကျဥ်းသားများကူညီစောင့်ရှောက်ရေးအဖွဲ့-AAPP ရဲ့ စက်တင်ဘာ ၁ ရက် ယမန်နေ့ စာရင်းတွေအရ စစ်အာဏာသိမ်းပြီးနောက် စစ်ကော်မရှင်တပ်ရဲ့ သတ်ဖြတ်မှုကြောင့် အရပ်သားသေဆုံးမှု ၇,၁၆၉ ဦး ရှိပြီဖြစ်တယ်လို့ ထုတ်ပြန်ထားပါတယ်။

စာတည်း – ဟိန်းစံ

ကနီ၊ ဩဂုတ် ၃၁၊ ၂၀၂၅။

စစ်ကိုင်းတိုင်း၊ ကနီမြို့နယ်၊ သမင်ခြံကျေးရွာကို စစ်တပ်က MiG 29 တိုက်ခိုက်ရေး လေယာဉ်နဲ့ ဗုံးကြဲခဲ့တာကြောင့် အမျိုးသမီး ၁ ဦး သေဆုံး ခဲ့တယ်လို့ ဒေသခံတွေဆီက သိရပါတယ်။

ဩဂုတ် ၃၁ ရက် ဒီနေ့လယ် ၂ နာရီခွဲဝန်းကျင်မှာ လေကြောင်းကနေ ဗုံးသီး ၂ လုံးကြဲချခဲ့ချိန် အသက် ၆၀ အရွယ် ဒေါ်ကြည်စိန်သေဆုံးပြီး အသက် ၇၀ အရွယ် အမျိုးသမီး ၁ ဦးထိခိုက်ခဲ့တယ်လို့ ဆိုပါတယ်။

“ထိခိုက်တာက ၂ ယောက် ဆိုပေမယ့် ၁ ယောက်ကတော့ အသက်ပေးလိုက်ရတာ၊ ဒီဗုံးကျင်းထဲ အသက်ကုန်သွားတာ၊ ငါ့လက်ပေါ်ကနေပြီးတော့ အသက်ကုန်သွားတာ။”လို့ သေဆုံးသူနဲ့ အတူပုန်းခိုခဲ့ရသူ အမျိုးသမီးက ပြောပါတယ်။

အဆိုပါ ပစ်ခတ်တိုက်ခိုက်မှုကြောင့် သမင်ခြံရွာရှိ ပြည်သူပိုင် နေအိမ် ၅ လုံးထက်မနည်း ပျက်စီးခဲ့ပြီး နွား ၁ ကောင် ဒဏ်ရာရကာ သိုလှောင်ထားတဲ့ တောင်သူထွက်ကုန်ပစ္စည်းအချို့ ဆုံးရှုံးခဲ့တယ်လို့ ဆိုပါတယ်။

အဆိုပါ လေကြောင်းတိုက်ခိုက်မှုကြောင့် ကနီမြို့နယ်၊ သမင်ခြံကျေးရွာက ပြည်သူအချို့ကတော့ ကြောက်လန့်ပြီး အခြားဒေသတွေမှာ ထွက်ပြေးတိမ်းရှောင်နေကြရပါတယ်။

ဦးခေါင်းထိမှန်ဒဏ်ရာရခဲ့တဲ့ အသက် ၇၀ အရွယ်အမျိုးသမီးကတော့ လက်ရှိမှာ ဆေးရုံကို ပို့ဆောင်ထားရပြီး အသက်အန္တရာယ် မစိုးရိမ်ရဘူးလို့ သမင်ခြံရွာခံတွေဆီက သိရပါတယ်။

“ထိခိုက်တာ ၁ ယောက်တည်း၊ အဘွားကြီး၊ ခေါင်းထိတာတဲ့၊ နောက်ထိတာ ဆေးခန်းမယ်တဲ့၊ သက်သာတယ်လို့တော့ ပြောသံကြားတယ်။”လို့ အထက်ပါအမျိုးသမီးက ပြောပါတယ်။

၂၀၂၁၊ စစ်အာဏာသိမ်းချိန်ကနေ ၂၀၂၅၊ ဩဂုတ် ၃၀ အထိ စစ်ကော်မရှင်တပ်ရဲ့ သတ်ဖြတ်မှုကြောင့် သေဆုံးခဲ့ရတဲ့ ပြည်သူပေါင်း ၇,၁၅၉ ဦး ရှိတယ်လို့ နိုင်ငံရေးအကျဉ်းသားများကူညီစောင့်ရှောက်ရေး အသင်း – AAPP ကထုတ်ပြန်ထားပါတယ်။

စာတည်း – လင်း

ရေစကြို၊ ဩဂုတ် ၃၁၊ ၂၀၂၅။

မကွေးတိုင်း၊ ရေစကြိုမြို့နယ်၊ ရေလယ်ကျွန်းဒေသ၊ ငတရော်ရွာကို စစ်ကော်မရှင်တပ်က လေကြောင်းကနေ ဗုံးကြဲတိုက်ခိုက်ခဲ့တာကြောင့် နေအိမ်ပျက်စီးပြီး အမျိုးသမီး ၃ ဦး သေဆုံးခဲ့တယ်လို့ ရေစကြိုမြို့ခံတွေ ဆီက သိရပါတယ်။

ဩဂုတ် ၃၁ ရက် ဒီနေ့လယ် ၁ နာရီခွဲဝန်းကျင်လောက်မှာ ဂျက်ဖိုက်တာနဲ့ ပေါင် ၃၀၀ ဗုံး‌တွေ ကြဲချတဲ့အပြင် ရော့ကတ်နဲ့ပါပစ်ခတ်တာကြောင့် နေအိမ် ၂ လုံးပျက်စီးပြီး ဒေသခံတွေသေဆုံးခဲ့ကြတာလို့ ဆိုပါတယ်။

“ပေါင် ၃၀၀ ဗုံးသီးတွေလည်း ကြဲချတယ်၊ သေဆုံးသွားတာတော့ ၃ ဦးရှိတယ်၊ ဒဏ်ရာရတဲ့သူတွေလည်းရှိတယ်၊ သေဆုံးတာက အမျိုးသမီး ၃ ဦးပါ၊ တိုက်ပွဲမရှိဘဲနဲ့ ဒီအတိုင်းလာကြဲသွားတာ၊ နေအိမ် ၂ လုံးလောက် ပျက်စီးသွားတယ်”လို့ ရေစကြိုမြို့ခံတဦးက ပြောပါတယ်။

ငတရော်ရွာဟာ အိမ်ခြေ ၁,၀၀၀ နဲ့ လူဦးရေ ၃,၀၀၀ ကျော်ရှိတဲ့ကျေးရွာတရွာဖြစ်ပြီး ခုလို လေကြောင်းကနေ တိုက်ခိုက်ခံရတာကြောင့် ဒေသခံတွေလည်းကြောက်လန့်ပြီး ထွက်ပြေးနေကြရတယ်လို့ သိရပါတယ်။

အခုနှစ်မေ ၁၉ ရက်မနက်ပိုင်းကလည်း အင်အား ၂၀၀ ဝန်းကျင်ပါစစ်ကြောင်းက ငတရော်ကျေးရွာကို စစ်ကြောင်းထိုးမီးရှို့ခဲ့တာကြောင့် နေအိမ်တွေပျက်စီးဆုံးရှုံးခဲ့ပါသေးတယ်။

စာတည်း – လင်း

ကျောက်တံခါး၊ ဩဂုတ် ၃၁၊ ၂၀၂၅။

ပဲခူးတိုင်း၊ ကျောက်တံခါးမြို့နယ်၊ ဇရပ်ခင်ကျေးရွာမှာ သားဖြစ်သူနာရေးအတွက် ဆွမ်းကပ်အလှူလုပ်ဖို့ ပြင်ဆင်နေတဲ့အိမ် လက်နက်ကြီးကျပြီး ဖခင်ဖြစ်သူအပါအဝင် ၂ ဦးသေဆုံးခဲ့တယ်လို့ ဒေသခံတွေဆီက သိရပါတယ်။

ဩဂုတ် ၂၉ ရက်ည ၇ နာရီမှာ ခမရ ၃၀၇ ကပစ်ခတ်တဲ့ လက်နက်ကြီးကျရောက် ပေါက်ကွဲခဲ့တာကြောင့် အသက် ၄၉ နှစ်အရွယ် ဦးဖိုးကျော်နဲ့ အိမ်နီးချင်းဖြစ်သူ အသက် ၄၄ နှစ်အရွယ် ဒေါ်ကြည်ကြည် တို့ သေဆုံးခဲ့တာပါ။

ဦးဖိုးကျော်ရဲ့သားဖြစ်သူ ကိုဇင်ကိုထက်ဟာ ထိုင်းနိုင်ငံ၊ ဘန်ကောက်ရှိ စက်ရုံ ၁ ခုမှာအလုပ်လုပ်နေရင်း ကျန်းမာရေးကြောင့် သြဂုတ် ၂၈ မှာသေဆုံးခဲ့တဲ့အတွက် အလောင်းကိုသူနေထိုင်တဲ့နေရာမှာ သင်္ဂြိုဟ်ပြီး မိသားစုက နေအိမ်မှာဆွမ်းကပ်တရားနာဖို့ ပြင်ဆင်နေကြချိန် ခုလိုလက်နက်ကြီး ကျရောက်ပေါက်ကွဲခဲ့တာ ဖြစ်ပါတယ်။

“ဆုံးတာက သူ့အဖေရယ် အိမ်နီးကပ်လျက် အန်တီကြီး ၁ ယောက်ရယ်။ သူကထိုင်းမှာဆုံးတာ။ ကျနော့်ညီတွေ အလုပ်လုပ်တဲ့စက်ရုံမှာ။ အဲ့ဒါကိုမိဘတွေက နာရေးလုပ်ခွင့် စစ်တပ်မှာတောင်းတယ်။ သူ့အတွက်နာရေးကို နယ်ကအိမ်မှာလုပ်ရင်း ဖြစ်တာ။”လို့ ဒေသခံတဦးက ပြောပါတယ်။

ဒါ့အပြင် နာရေးမှာဝိုင်းကူလုပ်ပေးနေတဲ့ အသက် ၄၀ နဲ့ ၅၀ ဝန်းကျင်အရွယ် အမျိုးသမီး ၄ ဦးလည်း ထိခိုက်ဒဏ်ရာရခဲ့သေးတယ်လို့ ဆိုပါတယ်။

လက်နက်ကြီးထိမှန်လို့သေဆုံးခဲ့တဲ့ ဦးဖိုးကျော်နဲ့ ဒေါ်ကြည်ကြည်တို့ရဲ့ နာရေးကိုတော့ ဩဂုတ် ၃၀ ရက်က ပဲနွယ်ကုန်းမြို့၊ ငမော့တော့သုသာန်မှာ သင်္ဂြိုဟ်လိုက်ကြတယ်လို့ သိရပါတယ်။

ဇန်နဝါရီ ၂၇ ရက်ညပိုင်းကလည်း ကျောက်တံခါးမြို့နယ်၊ နတ်တလင်းကျေးရွာမှာ စစ်ကောင်စီတပ်ဖွဲ့ဝင် တွေဘက်က ပစ်ခတ်တဲ့ လက်နက်ကြီးကျရောက်ပေါက်ကွဲပြီး အမျိုးသမီး ၁ ဦးသေဆုံးကာ ကလေး ၁ ဦးဒဏ်ရာရခဲ့သေးတယ်လို့ သိရပါတယ်။

စာတည်း – လင်း

မြေလတ်အသံ၊ သြဂုတ် ၃၀၊ ၂၀၂၅။

စစ်ကိုင်းတိုင်း၊ မြင်းမူမြို့နယ်နဲ့ မကွေးတိုင်း၊ မြိုင်နဲ့ ဆောမြို့နယ်အတွင်းကို စစ်ကော်မရှင်တပ်က သြဂုတ် ၃၀ ရက်ဒီကနေ့မှာ ဗုံးကြဲတိုက်ခိုက်ခဲ့တာကြောင့် ဒေသခံထိခိုက်သေဆုံးမှုတွေ ရှိခဲ့တယ်လို့ ဒေသခံတွေဆီက သိရပါတယ်။

မြင်းမူမြို့နယ်၊ ငါးကင်းမြောက်ရွာကို ဒီနေ့လယ် ၂ နာရီဝန်းကျင်မှာ စစ်ကော်မရှင်တပ်က ပါရာမော်တာ ၁ စီးနဲ့ဗုံးသီး ၂ လုံးကြဲချခဲ့ရာ အသက် ၃၀ အရွယ်နဲ့ ၅၀ အရွယ် အမျိုးသား ၂ ဦးသေဆုံးပြီး နောက်ထပ် ဒေသခံ ၁၀ ဦးလည်းထိခိုက်ဒဏ်ရာရခဲ့တယ်လို့ ဆိုပါတယ်။

“ရမ်းသမ်းပစ်တာ ၂ လုံးချသွားတာ။ ၁၂၀ မမ ထင်တယ်၊ ထိတာရောက ပြည်သူတွေချည်း။ စစ်ကြောင်းလည်းမရှိတော့ မရှောင်ဘူးဗျ အေးဆေးဖြစ်နေတာကိုလာချတာ”လို့ ဒေသခံတဦးကပြောပါတယ်။

ငါးကင်းမြောက်ကျေးရွာမှာ အိမ်ခြေ ၆၀၀ ကျော်ရှိပြီး ဗုံးကြဲတိုက်ခိုက်တာဟာ ဒီတကြိမ် ပထမဆုံးအကြိမ်ဖြစ်ပြီး ထိခိုက်ဒဏ်ရာရသူတွေနဲ့ပတ်သက်တဲ့အခြေအနေတွေကိုတော့ မြေလတ်အသံက ဆက်လက်စုံစမ်းနေပါတယ်။

အလားတူ မြိုင်မြို့နယ်၊ လယ်တီကျေးရွာကိုလည်း စစ်ကော်မရှင်တပ်က ဒီမနက် ၁၀ နာရီဝန်းကျင်မှာ ပါရာမော်တာ ၁ စီးနဲ့ ၂ ကြိမ် ဗုံးကြဲတိုက်ခိုက်ခဲ့တာကြောင့် အသက် ၆၀ အရွယ် အမျိုးသမီး ၁ ဦး မစိုးရိမ်ရဒဏ်ရာရခဲ့တယ်လို့ နောက်ထပ်ဒေသခံတဦးက ပြောပါတယ်။

“အသက်ကြီးပိုင်း အဖွားအို ၁ ဦးထိတာရှိပါတယ်၊ အိမ်မွေးတိရစ္ဆာန်တွေဖြစ်တဲ့ ဝက် ၁ ကောင်သေပြီး ၃ ကောင် ဒဏ်ရာပြင်းထန်ပါတယ်။ (အဖွားအိုက) မစိုးရိမ်ရဒဏ်ရာပါ။ ရွာအပြင်ပါ နေအိမ်နဲ့ဝေးပါတယ် အဖွားအို ထိတာက ကွဲတဲ့အစလာထိတာ”လို့ ဆိုပါတယ်။

ဒါ့အပြင် ဆောမြို့နယ်ထဲကိုလည်း ဒီမနက် ၁၀ နာရီဝန်းကျင်မှာ ဂျက်ဖိုက်တာ ၂ စီးနဲ့ ဗုံးကြဲတိုက်ခိုက်ခဲ့ပြီး ထိခိုက်သေဆုံးမှုတွေတော့ မရှိခဲ့ဘူးလို့ သိရပါတယ်။

သြဂုတ်လဆန်းပိုင်းကစလို့ စစ်ကော်မရှင်တပ်ဟာ စစ်ကိုင်း၊ မကွေးတိုင်းက ကျေးရွာတွေကို မြေပြင်အင်အားသုံးစစ်ကြောင်းထိုးတာအပြင် လေကြောင်းကနေပါဗုံးကြဲတိုက်ခိုက်မှုတွေကို ခပ်စိပ်စိပ် လုပ်ဆောင်လျှက်ရှိနေပြီး ဒေသခံတွေလည်း ထိခိုက်သေဆုံးမှုတွေရှိနေပါတယ်။

၂၀၂၁ စစ်အာဏာသိမ်းချိန်ကနေ ၂၀၂၅ သြဂုတ် ၂၉ ရက်ထိ စစ်ကော်မရှင်တပ်နဲ့ လက်အောက်ခံတွေကြောင့် သေဆုံးခဲ့ရတဲ့ပြည်သူစုစုပေါင်း ၇,၁၅၉ ဦးရှိတယ်လို့ နိုင်ငံရေး အကျဥ်းသားများ ကူညီစောင့်ရှောက်ရေးအသင်း – AAPP က ထုတ်ပြန်ထားပါတယ်။

စာတည်း – လင်း

နတ်မောက်၊ ဩဂုတ် ၃၀၊ ၂၀၂၅။

မကွေးတိုင်း၊ နတ်မောက်မြို့နယ်၊ ကံသာကျေးရွာ၊ စက်တောကျေးရွာ၊ ကျောက်အိုးကျေးရွာကြားရှိ ဒေသအခေါ် သနပ်ပေါက်ကျောတဲတိုက်တွေအတွင်းကို စက်တပ်လေထီးနဲ့ ဗုံးကြဲခံရလို့ အမျိုးသမီး ၁ ဦးသေဆုံးပြီး ဖခင်ဖြစ်သူဒဏ်ရာရတယ်လို့ နတ်မောက်မြို့နယ်ပြည်သူ့ကာကွယ်ရေးအဖွဲ့ တာဝန်ခံဆီက သိရပါတယ်။

ဩဂုတ် ၃၀ ရက်မနက် ၉ နာရီကျော်မှာ မိတ္ထီလာဘက်ကတက်လာတဲ့ စက်တပ်လေထီး ၄ စီးထဲက ၁ စီးက ဗုံး ၄ လုံးကြဲချခဲ့ချိန် သနပ်ပေါက်ကျောတဲတိုက်မှာနေထိုင်ပြီး စိုက်ပျိုးရေးလုပ်နေကြတဲ့ သားအဖ ၂ ဦးကို ဗုံးစထိမှန်ပြီး ထိခိုက်သေဆုံးခဲ့ကြတာပါ။

“ဖအေက လယ်ထဲတဲဘေးမှာ ငရုပ်ခင်းဆေးဖြန်းနေတာ။ သမီးဖြစ်သူက ပေါင်းပေါက်နေချိန်မှာ ထိတာ။ အဲ့နားကတော်လှန်ရေးအဖွဲ့လည်းမရှိဘူး။ တိုက်ပွဲဖြစ်တာမရှိဘူး။ စစ်ကြောင်းထိုးတာလည်း မရှိဘူး”လို့ နတ်မောက်မြို့နယ်ပကဖ တာဝန်ခံကပြောပါတယ်။

ဗုံးထိမှန်တာကြောင့် အသက် ၂၆ နှစ်အရွယ် မအေးမာစိုးမှာ ဦးခေါင်းနဲ့နံကြားဗုံးစမှန်ပြီးနေရာတင်သေဆုံးသွားသလို ဖခင်ဖြစ်သူ အသက် ၅၀ အရွယ် စောလင်းဆိုသူမှာလည်း နောက်ကျောပေါက် ဒဏ်ရာရသွားတယ်လို့ ဆိုပါတယ်။

ဒါ့အပြင် နွား ၁ ကောင်သေဆုံးပြီး သူတို့နေထိုင်တဲ့ တဲ ၁ လုံး ပျက်စီးသွားတယ်လို့သိရကာ ဦးစောလင်း ကိုတော့ နီးစပ်ရာဆေးခန်းကိုပို့ဆောင်ပြီး ဆေးကုသမှုပေးနေတယ်လို့ သိရပါတယ်။

ပြီးခဲ့တဲ့ ဩဂုတ် ၂၄ ရက်ညပိုင်းကလည်း နတ်မောက်မြို့နယ်၊ လဲ့ဘူးကျေးရွာကို စစ်ကော်မရှင်တပ်က လေကြောင်းကနေဗုံးကြဲခဲ့တာကြောင့် ကလေးငယ် ၂ ဦးအပါအဝင် ၅ ဦးသေဆုံးပြီး ၁၁ ဦး ဒဏ်ရာရခဲ့သေးတယ်လို့ သိရပါတယ်။

၂၀၂၁ စစ်အာဏာသိမ်းချိန်ကနေ ၂၀၂၅ သြဂုတ် ၂၉ ရက်ထိ စစ်ကော်မရှင်တပ်နဲ့ လက်အောက်ခံတွေကြောင့် သေဆုံးခဲ့ရတဲ့ပြည်သူစုစုပေါင်း ၇,၁၅၉ ဦးရှိတယ်လို့ နိုင်ငံရေးအကျဥ်းသားများ ကူညီစောင့်ရှောက်ရေးအသင်း – AAPP က ထုတ်ပြန်ထားပါတယ်။

စာတည်း – လင်း

ဝက်လက်၊ ဩဂုတ် ၂၈၊ ၂၀၂၅။

စစ်ကိုင်းတိုင်း၊ ဝက်လက်မြို့နယ်အရှေ့တောင်ခြမ်းက ရုံးပင်ကုန်းကျေးရွာကို စစ်ကော်မရှင်တပ်က လေကြောင်းကနေ ဗုံးကြဲတိုက်ခိုက်ခဲ့တာကြောင့် ဒေသခံ ၄ ဦး သေဆုံးပြီး ၆ ဦးဒဏ်ရာရခဲ့တယ်လို့ ဒေသခံတွေဆီကသိရပါတယ်။

ဩဂုတ် ၂၇ ရက် ယမန်နေ့ညနေ ၅ နာရီကျော်မှာ တိုက်လေယာဥ် ၁ စီးဟာ ရုံးပင်ကုန်းကျေးရွာကို ဗုံးကြဲချတိုက်ခိုက်ခဲ့ရာ ကျေးရွာ ရေကန်အနီး၊ ဆေးရုံနဲ့ နေအိမ်တွေပေါ်ကို ဗုံးကျရောက်ပေါက်ကွဲခဲ့တာလို့ ဆိုပါတယ်။

“လေယာဉ်နဲ့ မတ္တရာဘက်က ဟောင်ဝစ်ဇာတွေက တပြိုင်တည်းလိုလိုလာတာ။ လေယာဉ်ကလည်း ရော့ကတ်အကြီး၊ အသေးတွေနဲ့ပစ်တယ်။ ပြီးမှ စက်လတ်နဲ့ ကုတ်သွားတာ” လို့ ရုံးပင်ကုန်းရွာဒေသခံတဦးက ပြောပါတယ်။

လေကြောင်းကနေ ဗုံးကြဲခံရတာကြောင့် နေအိမ်အတွင်းရှိနေတဲ့ အသက် ၅၀ ကျော်အရွယ် ဒေါ်စန်း၊ ဆေးရုံမှာရှိနေတဲ့ အသက် ၄၅ နှစ် ဦးအောင်မြင့်စန်းနဲ့ နောက်ထပ်အမျိုးသား ၂ ဦး စုစုပေါင်း ၄ ဦး သေဆုံးပြီး ၆ ဦးဒဏ်ရာရခဲ့ကာ လေကြောင်းတိုက်ခိုက်ခံရတာကြောင့် ရွာခံတွေလည်း ဘေးလွတ်ရာတိမ်းရှောင်နေကြတယ်လို့ သိရပါတယ်။

ယခုလအတွင်း စစ်တပ်က ဝက်လက်မြို့နယ်ကို လေကြောင်းတိုက်ခိုက်မှုဆက်တိုက် ပြုလုပ်နေပြီး ဩဂုတ် ၁၁ ရက် ကလည်း အမှတ် ၃ ခရိုင်ချင်းဆက်လမ်း(ဗျူဟာလမ်း)ကို စစ်တပ်က လေကြောင်းတိုက်ခိုက်မှုပြုလုပ်ခဲ့လို့ ကားသမားတွေအပါအဝင်ပြည်သူ ၇ ဦး သေဆုံးကာ ၁၀ ဦးကျော်ဒဏ်ရာရခဲ့တယ်လို့ သိရပါတယ်။

စာတည်း – မြတ်

ရေစကြို၊ ဩဂုတ် ၂၇၊ ၂၀၂၅။

မကွေးတိုင်း၊ ရေစကြိုမြို့၊ အမှတ် (၇)၊ နှစ်ထောင်ပြည့်ရပ်ကွက်က အမျိုးသား ၁ ဦး စစ်ကော်မရှင်တပ်တွေရဲ့ ပစ်ခတ်တာကိုခံရပြီး သေဆုံးခဲ့တယ်လို့ ရေစကြိုမြို့ခံတွေဆီက သိရပါတယ်။

ဩဂုတ် ၂၆ ရက် ညနေ ၂ နာရီခွဲမှာ အဲ့ဒီရပ်ကွက်ရှိ ပန်းခြံထဲမှာတပ်စွဲနေတဲ့စစ်ကော်မရှင်တပ်တွေက ဆိုင်ကယ်စီးအမျိုးသား ၂ ဦးကို လိုက်လံပစ်ခတ်ချိန် ရပ်ကွက်တွင်းရှိ နေအိမ် ၁ အိမ်မှာ အဝတ်လှမ်းနေတဲ့ အသက် ၃၉ နှစ် အရွယ် ကိုဇော်ဇော်ဝင်းကို ထိမှန်ပြီးသေဆုံးခဲ့တာလို့ ဆိုပါတယ်။

“လူ ၂ ဦးက အရက်ဆိုင်ကပြန်လာတာ၊ ဦးထုပ်မဆောင်းဘူး၊ အရက်ကလည်း မူးနေတော့ မေ့မေ့ရော့ရော့နဲ့ သူတို့ရှေ့မှာ ဦးထုပ်မဆောင်းပဲနဲ့ ဆိုင်ကယ်စီးပြေးလို့ဆိုပြီး ဆိုင်ကယ်နဲ့ ၅ ဦးလောက်ကလိုက်ပစ်တာ၊ လိုက်ပစ်ရင်းနဲ့ အမှတ် (၇)၊ နှစ်ထောင်ပြည့်ရပ်၊ တိလောကဘကကျောင်းနဲ့ မျက်နှာချင်းဆိုင် အနောက်ဘက်အိမ်မှာရှိတဲ့ ရေချိုးပြီး အဝတ်လျှော်ပြီး၊ အဝတ်လှန်းနေတဲ့ အမျိုးသား ၁ ဦး (ကျည်ထိ) သေသွားတာ”လို့ ရေစကြိုမြို့ခံတဦးက ပြောပါတယ်။

ကိုဇော်ဇော်ဝင်းဟာ မြိုင်မြို့နယ်က ရေနံမှော်တခုမှာ အလုပ်လုပ်ကိုင်နေသူဖြစ်ပြီး နေအိမ်ကိုပြန်ရောက်ချိန် နာရီပိုင်းအတွင်းမှာတင် ခုလိုပစ်ခတ်ခံခဲ့ရတာဖြစ်သလို ပစ်ခတ်ခံရချင်းဆေးရုံကိုသွားပေမယ့် ဦးခေါင်းနဲ့ ခန္ဓာကိုယ် ကျည်ထိမှန် ဒဏ်ရာတွေနဲ့ ဆေးရုံမှာတင်သေသွားတာလို့ သိရပါတယ်။

“တကယ်တော့ သူက လူပျိုကြီးပါ၊ မိအိုဖအို လုပ်ကိုင်ကျွေးနေတာ၊ ရေနံမှော်ထဲက ပြန်ရောက်တာ ၁ နာရီကျော်ကျော်ပဲရှိသေးတယ်၊ ခဏနားပြီး အဝတ်လျှော် အဝတ်လှန်းနေတုန်းမှာ ဖြစ်သွားတာ၊ ရေစကြိုဆေးရုံပေါ်ရောက်သေးတယ်၊ အသက်ကယ်ဆေး ၂ လုံးထိုးတာကို မမှီလိုက်ဖူး၊ သေသွားတာ၊” လို့ ရေစကြိုမြို့ခံတဦးကပြောပါတယ်။

ကိုဇော်ဇော်ဝင်ရဲ့အလောင်းကိုတော့ သြဂုတ် ၂၇ ရက်ဒီညနေ ၃ နာရီဝန်းကျင်မှာ သင်္ဂြိုဟ်သွားမယ်လို့လည်း သိရပါတယ်။

ရေစကြိုမှာ ဆိုင်ကယ်စီးဦးထုပ် မဆောင်းတာ၊ ဆိုင်ကယ် ၂ ဦးစီးလာရင် ရပ်ခိုင်းပြီး မရပ်ပါက နောက်ကနေ လိုက်လံပစ်ခတ်လေ့ရှိတယ်လို့ သိရပါတယ်။

ပြီးခဲ့တဲ့ ၂၀၂၄၊ စက်တင်ဘာ ၁၅ ရက်ကလည်း ရေစကြို အမှတ် ၁ ထင်းတန်းရပ်ကွက်မှာ ဆိုင်ကယ်စီးလာတဲ့ လူငယ် ၂ ဦးကို စစ်ကော်မရှင်က ပစ်ခတ်လို့ သေဆုံးခဲ့ပါသေးတယ်။

စာတည်း – လင်း