မကွေး၊ ဇန်နဝါရီ ၁၃၊ ၂၀၂၅။

မကွေးတိုင်း၊ မင်းဘူးခရိုင်အတွင်း အခြေပြုလှုပ်ရှားနေတဲ့ ပြည်သူ့ကာကွယ်ရေးတပ်မတော် မင်းဘူးခရိုင်တပ်ရင်း ၅ က PDF တပ်ဖွဲ့ဝင် ၁ ဦး မိုင်းမတော်တဆဖြစ်ကာ ကျဆုံးသွားတယ်လို့ အဲ့ဒီတပ်ရင်းထံက သိရပါတယ်။

ကျဆုံးသူမှာ အသက် ၁၉ နှစ်အရွယ် တပ်ဖွဲ့ဝင် ဒေါင်းမင်းဖြစ်ပြီး ဇန်နဝါရီ ၁၁ ရက်မှာ လင်းဇင်းနဲ့ကံပြားရဲစခန်းကနေ စစ်ကြောင်း ၃ ကြောင်းဖြန့်ထိုးလာတဲ့ စစ်ကောင်စီတပ်ဖွဲ့တွေကို အုန်းတောရွာအနီး မိုင်းဆွဲတိုက်ခိုက်ဖို့ ပြင်ဆင်နေချိန် မိုင်းမတော်တဆဖြစ်ကာ ကျဆုံးခဲ့ရတာလို့ ဆိုပါတယ်။

“ ကျဆုံးသွားတဲ့ အသက် ၁၉ နှစ်အရွယ် တပ်ဖွဲ့ဝင်ဒေါင်းမင်းရဲ့ ဈာပနအခမ်းအနားကို ဇန်နဝါရီ ၁၂ ရက်မှာ မင်းဘူးခရိုင် အမှတ် ၅ တပ်ရင်းရဲ့ ထိန်းချုပ်ထားတဲ့ စလင်းမြို့နယ်အတွင်း မီးရှို့သင်္ဂြိုဟ်ခဲ့ပြီး အရိုးပြာကိုတော့ အိုးနဲ့ယူထားပြီး နောက်မှအုတ်ဂူလုပ်မှာ။”လို့ မင်းဘူးခရိုင် တပ်ရင်း ၅ သတင်းနဲ့ပြန်ကြားရေးတာဝန်ခံ JOKER က ပြောပါတယ်။

တပ်ဖွဲ့ဝင် မိုင်းသမား ဒေါင်းမင်းဟာ စလင်းမြို့ဇာတိဖြစ်ပြီး အမှတ် ၅ တပ်ရင်းရဲ့ ဒီဇင်ဘာလဖွင့်လှစ်တဲ့ အပတ်စဉ် ၉ သင်တန်းတက်ရောက်ကာ သင်တန်းဆင်းလာသူဖြစ်ကာ ၎င်းရဲ့ စျာပနအခမ်းအနားကို PDF တပ်ဖွဲ့ဝင် အင်အား ၁၀၀ ကျော် တက်ရောက်ခဲ့ကြတယ်လို့ သိရပါတယ်။

စာတည်း – ဟိန်းစံ

စစ်ကိုင်း၊ ဇွန် ၁၂၊ ၂၀၂၃။

စစ်ကောင်စီတပ်သားတွေရဲ့ ဖမ်းဆီးသတ်ဖြတ်တာကို ခံလိုက်ရတဲ့ စစ်ကိုင်းတိုင်း၊ ဆားလင်းကြီးမြို့နယ်၊ ပြည်သူ့ အုပ်ချုပ်ရေးအဖွဲ့ဝင် ဦးဗန့်ဂျီရဲ့ ရုပ်အလောင်းကို သွားယူချိန် မိုင်းထိမှန်ခဲ့တဲ့ PDF ရဲဘော်တဦးမှာ ခြေထောက်တဖက်ဖြတ်လိုက်ရတယ်လို့ သိရပါတယ်။

ခြေထောက်ဖြတ်လိုက်ရတဲ့ရဲဘော်မှာ ကျေးရွာကာကွယ်ရေးအဖွဲ့တခုမှ အသက် ၂၈ နှစ်အရွယ်ရှိ အမျိုးသားတဦးဖြစ်ပြီး၊ ဘယ်ဖက်ခြေထောက်ရဲ့ ဒူးအောက်ကနေ ဖြတ်ထုတ်လိုက်ရတာလို့ မြေပြင်မှ PDF ရဲဘော်တဦးက ပြောပါတယ်။

“လုံခြုံရေးအရ ရွာနာမည်နဲ့ သူ့ရဲ့နာမည်ကို ပြောလို့မရဘူး။ အခုကတော့ ခြေထောက်ဖြတ်လိုက်နိုင်လို့ အသက်အန္တရာယ်မစိုးရိမ်ရတော့ဘူး။ ကျေးလက်ဆေးခန်းတခုမှာ ဆေးကုသမှု ပေးထားတယ်”လို့ ဆိုပါတယ်။

စစ်ကောင်စီတပ်စွဲနေတဲ့ ညောင်ပင်ကြီးကျေးရွာအနီးက ထန်တောဆိပ်သစ်ကွင်းထဲမှာ စွန့်ပစ်ခံထားရတဲ့ ဦးဗန့်ဂျီရဲ့ ရုပ်အလောင်းကို ဇွန်လ ၁၁ ရက်မနက် ၈ နာရီ‌လောက်မှာ အထက်ပါရဲဘော်အပါအဝင် PDF အင်အား ၁၅ ဦးက သွားယူခဲ့ချိန် စစ်ကောင်စီထောင်ခဲ့တဲ့ မိုင်းတလုံးကို နင်းမိရာက ပေါက်ကွဲမှုဖြစ်ခဲ့တာလို့ အထက်ပါရဲဘော်က ပြောပါတယ်။

“မိုင်းကတော့ တလုံးတည်းပေါက်တာပါဗျ။ အလောင်းကောက်နေချိန်မှာ ပေါက်တာ။ ဒီရဲဘော်က နင်းမိတာဖြစ်လို့ ထိသွားတာပါ။ တခြားရဲဘော်တွေတော့ မထိမှန်ခဲ့ကြဘူး”လို့ ဆိုပါတယ်။

စစ်ကောင်စီတပ်သားတွေရဲ့ သတ်ဖြတ်တာကိုခံလိုက်ရသူ ဦးဗန့်ဂျီမှာ ဆားလင်းမြို့နယ်၊ ပြည်သူ့အုပ်ချုပ်ရေးအဖွဲ့ဝင်တဦးလည်း ဖြစ်သလို လက်ပံတောင်းတောင်ပင်မသပိတ်စစ်ကြောင်း ဦးဆောင်ကော်မတီဝင်အဖွဲ့ဝင်တဦးလည်း ဖြစ်ပါတယ်။

ဦးဗန့်ဂျီအပါအဝင် စစ်ကောင်စီလက်ချက်နဲ့ သေဆုံးခဲ့ရသူတွေအတွက် ဇွန်လ ၁၁ ရက် ည ၇ နာရီလောက်မှာလည်း ဖယောင်းတိုင်မီးတွေ ကိုင်ဆောင်ပြီး ဆုတောင်းသပိတ်တခုကို လက်ပံတောင်းတောင်ဒေသ ပင်မသပိတ် အပါအဝင် ဒေသခံကာကွယ်ရေးတပ်ဖွဲ့တွေက ဦးဆောင်ပြီး ပြည်သူတွေနဲ့အတူ ဆားလင်းကြီးမြို့နယ် တနေရာမှာ ပြုလုပ်ခဲ့ကြပါတယ်။

စာတည်း – လင်း

ဆားလင်းကြီး၊ မတ် ၁၈၊ ၂၀၂၃။

စစ်ကိုင်းတိုင်း၊ ဆားလင်းကြီးမြို့နယ်အခြေပြု ယင်းမာပင်ခရိုင် PDF တပ်ရင်း ၂၈ ဓားမဆိုင်းတပ်မတော် (D.M.S.A)က ဖွင့်လှစ်ထားတဲ့ ကိုယ်ထူကိုယ်ထဆေးပေးခန်းမှာ ဒဏ်ရာရလာတဲ့မည်သည့် ရဲဘော်ကိုမဆို အခမဲ့ဆေးကုသပေးတယ်လို့ ဆိုပါတယ်။

“ဘယ် PDF ရဲဘော်ပဲဖြစ်ဖြစ် ထိခိုက်ဒဏ်ရာရရင် လုံးဝအခမဲ့ကုပေးတယ်။ ထမင်းလည်း ကျွေးတယ်။ နေကောင်းပျောက်မှ ဆေးရုံကနေ ပေးဆင်းတယ်။ ဆေးခန်းအတွက်ကို တချို့က ငွေ ၁ ထောင်စ ၂ ထောင်စ ပြန်လှူသွားတာမျိုး ရှိတယ်။ တချို့ကလည်း အလှူငွေထည့် မသွားတာမျိုးလည်း ရှိတယ်” လို့ ဓားမဆိုင်းတပ်မတော် တပ်ရင်းမှူး ဗိုလ်စွမ်းသူမောင်က မြေလတ်အသံကို ပြောပါတယ်။

ကိုယ်ထူကိုယ်ထဆေးခန်းမှာ CDM သူနာပြုနဲ့ ဆေးဝါးကျွမ်းကျင် ဆရာ၊ ဆရာမ ၁၅ ဦးနဲ့ ဆေးကုသမှုပေးနေပြီး သူတို့တွေအတွက် တလကို ကျပ် ၁ သိန်း ထောက်ပံ့ပေးထားတယ်လို့ အဆိုပါ တပ်ရင်းမှူးက ဆက်ပြောပါတယ်။

“အနှိုင်းမဲ့ရင်ခွင်” လို့ အမည်ပေးထားတဲ့ ကိုယ်ထူကိုယ်ထဆေးခန်းကို မတ်လ ၅ ရက်နေ့ကစတင်ကာ ဓါးမဆိုင်းတပ်မတော် (D.M.S.A) တပ်ရင်းမှူး ဦးဆောင်ပြီးမှ ဖွင့်လှစ်ခဲ့တာဖြစ်ပြီး ဒီကနေ့အထိ လူနာပေါင်း ၁၀၀ ကျော်ကို ကုသမှုပေးနိုင်ခဲ့တယ်လို့ သိရပါတယ်။

အနှိုင်းမဲ့ရင်ခွင် ဆေးခန်းကနေ မတ်လ ၉ ရက်နဲ့ မတ်လ ၁၈ ရက် ဒီကနေ့မနက်ပိုင်းမှာ တလအတွင်း ကိုယ်ဝန်ဆောင်အမျိုးသမီး ၂ ဦးကို မီးဖွားပေးနိုင်ခဲ့ပြီး၊ ကိုယ်ထူကိုယ်ထဆေးခန်း ရေရှည်ဖွင့်လှစ်နိုင်ဖို့အတွက် ဆေးခန်းလာပြတဲ့ ဒေသခံတွေဆီကနေ ငွေကြေးအနည်းငယ်ကို ကောက်ခံသွားဖို့ စီစဉ်နေတယ်လို့လည်း အဖွဲ့ခေါင်းဆောင်က ပြောပါတယ်။

မန္တလေး၊ ဇန်နဝါရီ ၂၇၊ ၂၀၂၃။

မန္တလေးတိုင်း တံတားဦးမြို့နယ်က တံတားဦးလေတပ်ကို တိုက်ခိုက်ဖို့ စီစဥ်ထားပေမယ့် ဒလံသတင်းပေးမှုကြောင့် အစီအစဥ်ပျက်ခဲ့ရတဲ့အပြင် ရဲဘော်တဦးဒဏ်ရာရခဲ့ပြီး လက်နက်အချို့လည်း ဆုံးရှုံးခဲ့ရပါတယ်။

ပြီးခဲ့တဲ့ ဇန်နဝါရီ ၂၅ရက် ညပိုင်းမှာ တံတားဦး လေယာဉ်ကွင်းအနောက်ဖက် နွားထိုးကြီး – ပြင်စည်သွားလမ်းကနေ ပဲထိန်းဒုံးအမျိုးအစား ၇လုံးနဲ့ ပစ်ဖို့ပြင်ဆင်နေချိန်မှာ စစ်ကောင်စီကင်းအဖွဲ့က ပစ်လို့ ပြန်ဆုတ်ခဲ့ရတယ်လို့ အနက်ရောင်သေမင်း PDF ခေါင်းဆောင် ဗိုလ်နောင်လေးက ပြောပါတယ်။

အဲ့ဒီညမှာ အထူးကွန်မန်ဒို ရဲဘော် ၅ဦးက တိုက်ခိုက်ဖို့သွားခဲ့တာဖြစ်ပြီး ရဲဘော် Doe ဆိုသူက သေနတ်ဒဏ်ရာရခဲ့ပြီး ပဲထိန်းဒုံး ၇လုံးထားခဲ့လိုက်ရတယ်လို့ ဆိုပါတယ်။

“ထုံးဘိုရွာက ဒလန် လင်မယား ၂ ယောက်က အတိအကျသတင်းပေးခဲ့တာလို့ သိရတယ်။ ရဲဘော် Doe နဲ့အတူ မစ်ရှင်လုပ်ဖို့ အထူးကွန်မန်ဒို ၅ ယောက်ပါဝင်ခဲ့တယ် ။ ရဲဘော် Doe ဟာ ရန်သူနဲ့ အနီးကပ်ဖြစ်တော့ ပစ်ခတ်ခံလိုက်ရတာပါ ။ ကျန်တဲ့အဖွဲ့သားတွေက ရဲဘော် Doe ကိုကယ်ထုတ်နိုင်ခဲ့တယ်။” လို့ ပြောပါတယ်။

ရဲဘော် Doe ဟာ ဗိုက်နဲ့ လက်မောင်းသေနတ်ဒဏ်ရာအရှိန်ကြောင့် လက်ရှိအချိန်အထိ သတိလစ်နေဆဲဖြစ်တယ်လို့ ဆိုပါတယ်။

အခုပျက်သွားခဲ့တဲ့ တိုက်ခိုက်မှုအတွက် သူ့ရဲ့ ဒုတိယ အမွေဆိုင်ခြံကို ရောင်းလို့ရတဲ့ ငွေနဲ့ စီစဥ်ခဲ့တာဖြစ်ပေမယ့် သတင်းပေါက်ကြားပြီး တိုက်ခိုက်မှုပျက်ခဲ့ရတာဖြစ်တယ်လို့ ဗိုလ်နောင်လေးက ပြောပါတယ်။

“မစ်ရှင်လုပ်ဖို့ အဖွဲ့အစည်းနဲ့ ဆယ်လီကြီးတွေစီတင်ပြပါတယ်။ နည်းပညာ ပေးနိုင်တယ်ပြောတော့လဲ ဘယ်အဖွဲ့အစည်းကမှ လာရောက်ဆက်သွယ်ခြင်းမရှိခဲ့ပါဘူး။ ထုတ်လုပ်မှုလည်း မကမ်းလှမ်းခဲ့ပါဘူး နောက်ပြီး အလှူငွေကောက်ခံတော့လဲမရရှိပါဘူး။ ကြံရာမရလို့ ဒီခြံရောင်းပြီး ထုတ်လုပ်ခဲ့တာပါ ။ ခုလို ဆုံးရှုံးရတာ ကျနော် ရူးမတက်ဖြစ်ရပါတယ် ” လို့ဆိုပါတယ်။

အခုတခေါက်အပါအဝင် တိုက်ခိုက်မှု မစ်ရှင်ပျက်သွားခဲ့တာ ၆ကြိမ်ရှိခဲ့ပြီဖြစ်ကာ အရင်အကြိမ်တွေမှာတော့ ပုလင်းခွံ ဗူးခွံကောက်တဲ့ ပြည်သူတွေထိခိုက်မှာစိုးလို့ ဖျက်လိုက်ရတာတွေလည်းရှိခဲ့တယ်လို့ ဆိုပါတယ်။