မြိုင်မြို့နယ်

မြိုင်၊ ဩဂုတ် ၄၊ ၂၀၂၆။

မကွေးတိုင်း၊ မြိုင်မြို့နယ်အတွင်း စစ်ကြောင်းထိုးနေတဲ့ စစ်ကောင်စီစစ်ကြောင်းက ပြည်သူနေအိမ် ၂၀၀ ကျော်အထိ မီးရှိူ့ဖျက်ဆီးထားတယ်လို့ အညာမြေအရပ်ဖက်လူမှုအဖွဲ့အစည်း-မြိုင်ရဲ့ ဩဂုတ်လ ၃ ရက်နေ့ထုတ်ပြန်ချ​က်အရ သိရပါတယ်။

ဇူလိုင်လ ၁၃ ရက်နေ့ကစတင်ပြီး ပေါက်မြို့နယ်ဘက်တဆင့် ဝင်လာတဲ့စစ်ကြောင်းက ဩဂုတ်လ ၃ ရက်နေ့ ရက် ၂၀ အတွင်းမှာ ကန်နက်ရွာက နေအိမ် ၃၁ လုံး၊ လက်ခုပ်ပင်ရွာက ၂၉ လုံး၊ ညောင်ကုန်းရွာက ၆ လုံး၊ ကိုင်းတောမရွာက ၂ လုံး၊ ထန်းငယ်တောရွာက ၄ လုံး၊ သင်းမရွာမှ ၄၀ ကျော်နဲ့ ဘောင်ဘက်ရွာက ၉၀ ကျော်ကို မီးရှို့ထားသလို ယာကြီးပြင်ရွာကိုလည်း မီးရှို့ထားပြီး အရေအတွက် စုံစမ်းနေဆဲလို့ ဆိုပါတယ်။

“မီးရှို့ခံထားရတဲ့ရွာတွေမှာ ပြည်သူတွေ အခုထိ ပြန်မဝင်နိုင်ကြသေးဘူး။ အခက်ခဲက အများကြီး။ အမိုးအကာအတွက် ပခုက္ကူဘက်ကနေ သွပ်တို့၊ သစ်တို့က ဝယ်ဖို့ မလွယ်ဘူး။ အရင်လို အခိုင်အခန့် ပြန်ဆောက်နိုင်ဖို့ မလွယ်ဘူး”လို့ အညာမြေအရပ်ဖက်လူမှုအဖွဲ့အစည်း-မြိုင်ရဲ့တာဝန်ခံက ပြောပါတယ်။

မီးရှို့ခံခဲ့ရတဲ့ နေအိမ်ပိုင်ရှင်ပြည်သူတွေအတွက်က အမိုးအကာအပြင် အခြေခံစားနပ်ရိက္ခာတွေ ပါလိုအပ်နေပြီး၊ ကျေးရွာထဲ ပြန်ဝင်ရောက်နေထိုင် ပါကလည်း နေအိမ်တွေ ပြန်ဆောက်နိုင်ဖို့ထက် တဲထိုးပြီးသာ နေရမယ့်အခြေနေမှာ ရှိနေတယ်လို့ ဆိုပါတယ်။

ဒေသခံ နေအိမ်တွေကိုမီးရှို့တဲ့ စစ်ကြောင်းဟာ အင်အား ၈၀၀ ကျော်နဲ့ ဇူလိုင်လ ၁၃ ရက်နေ့ကစတင်ပြီး၊ ပေါက်မြို့နယ်ဘက်ကနေ ဝင်လာကာ ကျေးရွာတွေကို စစ်ကြောင်းပတ်ထိုးနေသလို လူနေအိမ်တွေကို မီးရှို့ပြီး ဒေသခံပြည်သူတွေကို ဖမ်းဆီးသတ်ဖြတ်တာတွေလည်း ပြုလုပ်ထားပါတယ်။

အဆိုပါစစ်ကြောင်းဟာ ဩဂုတ်လ ၄ ရက်နေမှာတော့ ယာကြီးပြင်ကျေးရွာတဝိုက်မှာ တပ်စွဲထားတယ်လို့ သိရပါတယ်။

စစ်ကြောင်းဝင်လာလို့ မြိုင်မြို့နယ်ထဲက ကန်နက်၊ ညောင်းကုန်း၊ ကိုင်းတောမ၊ ထန်းငယ်တော၊ မြင်းကိုးသစ်ကျေးရွာအပါအဝင် ကျေးရွာပေါင်း ၁၀ ရွာကျော်က ပြည်သူ ၁၀၀၀၀ ခန့်စစ်ဘေးရှောင်နေကြရပါတယ်။

မြိုင်၊ ဇူလိုင် ၂၂၊ ၂၀၂၆။

မကွေးတိုင်း၊ မြိုင်မြို့နယ်၊ ဝက်ဖိုးကျေးရွာမှာ စစ်ကြောင်းထိုးနေတဲ့စစ်ကောင်စီတပ်ကရမ်းပစ်လိုက်တဲ့ လက်နက်ကြီးမှန်လို့ လင်မယား ၂ ဦးသေဆုံးခဲ့တယ်လို့ ဒေသကာကွယ်ရေးအဖွဲ့ဝင်တွေထံက သိရပါတယ်။

ဇူလိုင်လ ၂၂ ရက်နေ့မနက် ၇ နာရီခန့်က သင်းမကျေးရွာကိုရောက်နေတဲ့ စစ်ကောသ်စီစစ်ကြောင်းက ဝက်ဖိုးရွာဘက်ကို လက်နက်ကြီး ၃ လုံးထက်မနည်းပစ်ခတ်ခဲ့ရာမှာ လူနေအိမ်ပေါ်ကို ကျရောက်ပေါက်ကွဲခဲ့လို့ လင်မယား ၂ ဦး သေဆုံးရတာလို့ ပြောပါတယ်။

“ဒီမနက် သင်းမရွာကို မီးရှို့ပြီး အဲဒီကနေ ကျေးရွာတွေကို လက်နက်ကြီးတွေနဲ့လှမ်းပစ်တာ။ ဝက်ဖိုးရွာထဲကျတဲ့ လက်နက်ကြီးက နေအိမ်ဝင်းထဲကျပြီး အစမှန်ပြီး နေရာမှာတင် သေတာ”လို့ ဒေသကာကွယ်ရေးအဖွဲ့ဝင်တဦးက ပြောပါတယ်။

လက်နက်ကြီးထိမှန်တာကြောင့် အသက် ၄၀ ကျော်အရွယ် လင်မယား ၂ ဦးနေရာမှာတင် သေဆုံးပြီးနေအိမ်လည်းပျက်စီးသွားပါတယ်။

အဲဒီ့စစ်ကြောင်းဟာ ဇူလိုင်လ ၂၁ ရက်နေ့ညနေပိုင်းကတည်းက သင်းမရွာကိုရောက်ပြီးနောက် နေအိမ်တွေကို မီးရှိုခဲ့သလို ဒီကနေ့မနက်ပိုင်းမှာလည်း ကျေးရွာထဲက နေအိမ်တွေကို ထပ်မံမီးရှို့ခဲ့တာကြောင့် နေအိမ် ၂၀ လုံးထက်မနည်းပျက်စီးကာ အသေးစိတ်အချက်အလက်တွေတော့ နယ်မြေရှင်းလင်းရေး မလုပ်နိုင်သေးတာကြောင့် မသိရသေးဘူးလို့ဆိုပါတယ်။

အဆိုပါစစ်ကြောင်းဟာ ဇူလိုင်လ ၁၃ ရက်နေ့ကတည်းက ​ပေါက်နယ်ကနေတဆင့် မြိုင်နယ်ထဲကို စစ်ကြောင်းထိုးဝင်ရောက်လာတာဖြစ်ပြီး စစ်ကြောင်းထိုးလာတဲ့ လမ်းကြောင်းတလျှောက်ရှိ ကန်နက်၊ မြင်းကိုသစ်၊ ကိုင်းတောမ၊ ဝါးရင်းချိုင့်၊ ကွန်လပ်၊ ဘောတုံ၊ သံချောင်းရွာတွေက ပြည်သူ ၁၃ ဦးသတ်ဖြတ်ခဲ့တယ်လို့ အညာမြေအရပ်ဖက်လူမှုအဖွဲ့အစည်းရဲ့ထုတ်ပြန်ထားချက်အရ သိရပါတယ်။

မြိုင်၊ ဇူလိုင် ၁၆၊ ၂၀၂၆။

မကွေးတိုင်း၊ မြိုင်မြို့နယ်၊ ကန်နက်၊ ညောင်းကုန်း၊ ကိုင်းတောမ၊ ထန်းငယ်တောနဲ့ မြင်းကိုးသစ်ကျေးရွာတွေကို စစ်ကြောင်းထိုးနေတဲ့ စစ်ကောင်စီတပ်ဟာ ပြည်သူ ၄ ဦးကိုရက်စက်စွာသတ်ဖြတ်ခဲ့ပြီး နေအိမ် ၅၀ ကျော် မီးရှို့ခဲ့တယ်လို့ အညာမြေအရပ်ဖက်လူမှုအဖွဲ့အစည်း – မြိုင်ရဲ့ တာဝန်ရှိသူတွေထံက သိရပါတယ်။

ဇူလိုင်လ ၁၅ ရက်နေ့က စစ်ကောင်စီစစ်ကြောင်းဝင်ရောက်ခဲ့ပြီးနောက် အဆိုပါကျေးရွာတွေကို ဒေသခံတာဝန်ရှိသူတွေက နယ်မြေရှင်းလင်းရန်သွားရောက်စဥ်မှာ အလောင်းတွေနဲ့ မီးလောင်ပျက်ဆီးနေတဲ့ နေအိမ်တွေကို တွေ့ခဲ့ရတာလို့ ဆိုပါတယ်။

သတ်ဖြတ်ခံရသူ ၄ ဦးစလုံးမှာ အမျိုးသားတွေဖြစ်ပြီး၊ အသက် ၅၀ နဲ့ ၆၀ အရွယ် ကန်နက်ကျေးရွာသား ၂ ဦးမှာ ရွာမြောက်ဖက် တမိုင်အကွာခန့်က လခုပ်ပင်ကျေးရွာမြောက်ဖျားမှာ မြုပ်ထားတာဖြစ်ပြီး၊ သေချာမြေမမြုပ် ထားတာကြောင့် မြေပေါ် ပေါ်နေလို့ မြင်တွေ့ခဲ့ရတာလို့ ဆိုပါတယ်။

အလားတူ အသက် ၆၇ နှစ်အရွယ် မြင်းကိုးသစ်ဘုန်းကြီးကျောင်းအနီးမှာ မြင်းကိုးသစ်ရွာသားတဦးနဲ့ အုတ်တံတားအနီးမှာတော့ အသက် ၅၆ နှစ်အရွယ် ကိုင်းတောမရွာသားတဦးတို့ကို မြင်တွေ့ခဲ့ရတာ ဖြစ်ပါတယ်။

“မြင်းကိုးသစ် (ဘုန်ကြီးကျောင်းနား) က နံဘေးကို ဓားနဲ့ထိုးထားတာ။ ကိုင်းတောမ(ကျေးရွာ)က ခေါင်းကိုသေနတ်နဲ့ ပစ်ထားတာ။ ကန်နက်က နှစ်ယောက်က တနေရာတည်းမှာ သတ်ထားတယ်။ လက်ပြန်​ကြိုးတုပ်ထားပြီးတော့မှ တခေါက်ကြောတွေ ဖြတ်ထားတယ်။ လည်ပင်းလှီးထားတယ်။ ခန္ဓကိုယ်မှာနှိပ်စက်ထားတာ” လို့ အညာမြေအရပ်ဖက်လူမှုအဖွဲ့အစည်း – မြိုင်တာဝန်ရှိသူ ကိုထွေးက ပြောပါတယ်။

သတ်ဖြတ်ခံထားရသူတွေရဲ့အလောင်းတွေကိုတော့ နယ်မြေရှင်းလင်းရေးလုပ်ခဲ့တဲ့ အဖွဲ့တွေကပဲ နာရေးပြုလုပ်ပေးခဲ့ရတယ်လို့ ဆိုပါတယ်။

သတ်ဖြတ်ခံရသူတွေဟာ စစ်ကြောင်းဝင်လာလို့ ကျေးရွာတွေကနေ ထွက်ပြေးတိမ်းရှောင်နေရသူတွေဖြစ်ပြီး ကန်နက်ရွာသား ၂ ဦးက ဇူလိုင်လ ၁၃ ရက်နေက ကျေးရွာမှာမွေးထားတဲ့တိရစ္ဆာန်တွေကို အစာလာပြန်ကျွေးချိန် လက်ခုပ်ပင်အနီး တောထဲမှာ စစ်ကြောင်းနဲ့တိုးလို့ ဖမ်းဆီးခံရတာဖြစ်သလို မြင်းကိုးသစ်နဲ့ ကိုင်းတောမရွာခံတွေကတော့ ဇူလိုင်လ ၁၄ မှာ မြင်းကိုးသစ်ရွာနားမှာဖမ်းဆီးခံလိုက်ရတာလို့ ဆို​ပါတယ်။

စစ်ကြောင်းက မီးရှို့လို့ ကန်နက်ရွာက နေအိမ် ၁၀ လုံး၊ လက်ခုပ်ပင်ရွာက နေအိမ် ၃၀ လုံး၊ ညောင်ကုန်းရွာက ၆ လုံး၊ ကံကြီးတောက ၇ လုံး၊ ထန်းငယ်တောရွာက ၄ လုံး မီးရှို့ဖျက်ဆီးခံခဲ့ရတာ ဖြစ်ပါတယ်။

အဆိုပါစစ်ကြောင်းဟာ ဇူလိုင်လ ၁၆ ရက်နေ့မှာ ကျွဲတွင်းရွာဘက်ရောက်နေပြီး ရေနံမြေမှော်တွေဘက်ထဲကို စစ်ကြောင်းဆက်ထိုးနေပြီး၊ အင်အား ၈၀၀ ကျော်နဲ့ ဇူလိုင်လ ၁၃ ရက်နေ့ကစတင်ပြီး ပေါက်မြို့နယ်ဘက်ကနေ ဝင်လာတာဖြစ်တယ်လို့ ဆိုပါတယ်။

ဇူလိုင်လ ၂ ရက်နေ့က အဆိုပါစစ်ကြောင်းဟာ ပေါက်မြို့နယ်၊ ထောက်ရှာပင်ကျေးရွာက ပြည်သူနေအိမ် ၅၄ လုံးကို မီးရှို့ဖျက်စီးခဲ့သေးတယ်လို့ သိရပါတယ်။

စစ်ကြောင်းဝင်လာလို့ မြိုင်မြို့နယ်ထဲက ကန်နက်၊ ညောင်းကုန်း၊ ကိုင်းတောမ၊ ထန်းငယ်တော၊ မြင်းကိုးသစ်ကျေးရွာအပါအဝင် ကျေးရွာပေါင်း ၁၀ ရွာကျော်က ပြည်သူ ၁၀၀၀၀ ခန့်စစ်ဘေးရှောင်နေကြရပါတယ်။