ပဲခူး

ဝေါ၊ ဧပြီ ၁၁၊ ၂၀၂၃။

ပဲခူးတိုင်းဒေသကြီး၊ ဝေါမြို့နယ်အတွင်းက ရပ်ကွက်၊ ကျေးရွာတွေမှာ သင်္ကြန်ကာလအတွင်း နေအိမ်တွေမှာ ညအိပ်ဧည့်သည်လက်မခံဖို့ ဒေသခံတွေကို စစ်ကောင်စီဘက်ကဖိအားပေး ပြောဆိုနေတယ်လို့ သိရပါတယ်။

ပြီးခဲ့တဲ့ တပတ်လောက်ကစတင်ပြီး သက်ဆိုင်ရာ ရပ်ကွက်အုပ်ချုပ်ရေးမှူးတွေကနေ တဆင့် နေအိမ်တွေကို ညအိပ်ဧည့်သည်လက်မခံဖို့ လိုက်ပြောနေတာရှိပြီး စစ်ဆေးတွေ့ရှိပါက အရေးယူမယ်လို့ ပြောဆိုနေတာတွေရှိနေတယ်လို့ ဒေသခံတဦးက ပြောပါတယ်။

“ဒီကာလမှာ ဧည့်သည်လာရင် နေ့ခင်းဘက်တော့ ရတယ်။ ညအိပ်လက်မခံဖို့ ပြောနေတယ်။ စာထုတ်တာတော့ မဟုတ်ဘူး။ ပါးစပ်နဲ့ လိုက်သတိပေးခိုင်းတာပေါ့။ သူတို့ကတော့ PDF တွေ စိမ့်ပြီးဝင်လာမှာ ကြောက်ပြီးလုပ်တာလို့ မြင်တယ်။ ပျူတွေကိုလည်း ကိုးလုံးတတောင့်ထိုးတွေပေးပြီး ရဲတွေနဲ့ပူးပေါင်း စစ်ဆေးခိုင်းတွေလုပ်နေတယ်” လို့ ပြောပါတယ်။

သင်္ကြန်ကာလနေအိမ်တွေမှာ အိမ်ထောင်စုဇယားပါ မိသားစုဝင်တွေကိုသာ ညအိပ်လက်ခံရမှာဖြစ်ပြီး ကျန်သူတွေကို ညအိပ်လက်မခံရဘူးလို့ ဆိုပါတယ်။

လတ်တလောအခြေနေမှာ စစ်ကောင်စီဘက်က တပတ်မှာ ၂ ကြိမ် ဧည့်စာရင်းစစ်နေတာရှိပြီး စစ်ဆေးချိန်မှာ အိမ်ထောင်စုဇယားနဲ့လူဦးရေကို တိုက်ဆိုင်စစ်ဆေးတာတွေ လုပ်နေတယ်လို့ သိရပါတယ်။

ဒါ့အပြင် ကျေးရွာတွေမှာ ပျူစောထီးအဖွဲ့တွေနဲ့တွဲပြီး လူဝင်လူထွက်တွေကို စောင့်ကြည့်ဖို့ ဒေသခံမဟုတ်တဲ့ သူ ၂ ဦးကို ထားရှိ စောင့်ကြည့်ခိုင်းတာတွေ လုပ်နေတယ်လို့ ဆိုပါတယ်။

မြန်မာဓလေ့အရ သင်္ကြန်ကာလမှာ ရပ်ဝေးမှာရှိနေတဲ့ မိသားဝင်တွေဟာ နေအိမ်ကို ပြန်လာကြတာ၊ သက်ဆိုင်ရာဆွေမျိုးတွေဆီ အလည်အပတ်သွားတာတွေရှိနေပေမယ့် စစ်ကောင်စီဘက်က ပြည်သူတွေကို ဖိနှပ်ဖို့ နည်းမျိုးစုံနဲ့ လုပ်ဆောင်နေတယ်လို့ သိရပါတယ်။

စာတည်း – 007

ပဲခူး၊ ဧပြီ ၁၀၊ ၂၀၂၃။

ပဲခူးတိုင်း(အနောက်ခြမ်း)၊ ပြည်ခရိုင်၊ ပေါင်းတည်မြို့က စစ်ကောင်စီရဲ့ ဆောက်လုပ်ဆဲ သင်္ကြန်မဏ္ဍပ် ဗုံးခွဲခံလိုက်ရပြီးနောက် လမ်းကိုပိတ်လိုက်တယ်လို့ မြို့ခံတွေဆီက သိရပါတယ်။

အဲဒီ မဏ္ဍပ်ဟာ ယမန်နေ့ ဧပြီလ ၉ ရက်နေ့ နံနက်ပိုင်းက ဗုံးခွဲတိုက်ခိုက်ခံရပြီးနောက်ပိုင်း ယင်းနေ့ညနေပိုင်းမှာပဲ လမ်းကိုပိတ်လိုက်တာလို့ ဆိုပါတယ်။

“ဘယ်အချိန် လမ်းပိတ်မှန်းတောင် မသိဘူး။ ကြိုပြီးအသိပေးတာလည်း မရှိဘူး။ ပိတ်ချင်ရင် ပိတ်လိုက်တာပဲ။ စည်းမဲ့ကမ်းမဲ့ လုပ်နေတာ။ ထပ်ပြီးဗုံးခွဲခံရမှာ ကြောက်လို့လေ” လို့ မြို့ခံတဦးက ပြောပါတယ်။

ပေါင်းတည်မြို့ပေါ် စျေး ၂ ရပ်ကွက်က စစ်ကောင်စီသင်္ကြန်မဏ္ဍပ်ရှိတဲ့ ဘုရားကြီးလမ်းကို ဘယ်ရီဂိတ်တွေချပြီး လမ်းပိတ်ခဲ့တာဖြစ်ပြီး အဲဒီလမ်းမဟာ ပေါင်းတည်မြို့ရဲ့တောင်ဘက်နဲ့မြောက်ဘက်ကို အဓိကဆက်သွယ်ထားလမ်းဖြစ်လို့ ခရီးသွားလာသူတွေက ၄ လမ်းနဲ့ ၂ လမ်းတို့ကနေ ကွေ့ရှောင်သွားနေရတယ်လို့ ဆက်ပြောပါတယ်။

ခြေလျင်သွားလာခွင့်သာရပြီး ဆိုင်ကယ်နဲ့ ကားသွားလာခွင့်ကို ပိတ်ထားတာ​ကြောင့် အဲဒီလမ်းက စျေးဆိုင်တွေ စျေးရောင်းချရမှု နည်းပါးသွားတယ်လို့လည်း ဆိုပါတယ်။

ပေါင်းတည်မှာ စစ်ကောင်စီသင်္ကြန်မဏ္ဍပ် ဗုံးခွဲသတိပေးခံရတဲ့အတွက် မြို့ချင်းဆက်စပ်နေတဲ့ နတ်တလင်းစစ်ကောင်စီက မနေ့ညကစလို့ သင်္ကြန်မဏ္ဍပ်မှာ ရဲ ၆ ဦးကို ညအိပ်စောင့် ခိုင်းခဲ့သလို အနီးဝန်းကျင်မှာလည်း ကင်းပုန်းတွေ ချထားတယ်လို့ မြို့ခံတဦးဆီက သိရပါတယ်။

ပြီးခဲ့တဲ့နှစ်သင်္ကြန်ရက်မတိုင်မီကလည်း ပေါင်းတည်မြို့မဏ္ဍပ်အနီးနဲ့ မြို့ပေါ်ရပ်ကွက်တခုမှာ ဗုံးပေါက်ကွဲခဲ့သလို ဧပြီလ ၁၆ ရက် သင်္ကြန်အတက်နေ့ ညနေကလည်း မဏ္ဍပ်အနီးပေါက်ကွဲတဲ့ဗုံးကြောင့် ရေကစားလာတဲ့ အမျိုးသမီးတဦး သေဆုံးခဲ့ပါသေးတယ်။

စာတည်း – 007

နတ်တလင်း၊ ဧပြီ ၁၀၊ ၂၀၂၃။

ပဲခူးတိုင်းအနောက်ခြမ်း၊ သာယာဝတီခရိုင်၊ နတ်တလင်းမြို့မှာ သင်္ကြန်ပွဲကျင်းပဖို့အတွက် စစ်ကောင်စီက လောင်းကစားဒိုင်တွေနဲ့ လုပ်ငန်းရှင်တွေဆီကနေ ငွေကြေးတောင်းခံနေတယ်လို့ သိရပါတယ်။

ဧပြီလ ပထမအပတ်ကစတင်ကာ နတ်တလင်းမြို့က ဘောလုံးဒိုင်၊ ၂ လုံးဒိုင်နဲ့ ချဲဒိုင်တွေအပြင် လုပ်ငန်းရှင်တွေဆီကနေ စစ်ကောင်စီလက်အောက်ခံ ထွေအုပ်စာရေးတွေက တောင်းခံခဲ့တာလို့ မြို့နယ်ထွေအုပ်ရုံးနဲ့ နီးစပ်သူတဦးက ပြောပါတယ်။

“သင်္ကြန်မဏ္ဍပ်မှာ ကုန်မယ့်ငွေကို သက်ဆိုင်ရာထွေအုပ်စာရေးတွေက အုပ်ကြီးတွေဆီမှာ လောင်းကစားဒိုင်စာရင်းနဲ့ လုပ်ငန်းရှင်စာရင်းယူပြီး သူ့ရပ်ကွက်ကျေးရွာအလိုက် လိုက်တောင်းပေးရတာ” လို့ ပြောပါတယ်။

လောင်းကစားဒိုင်တွေကို အကြီးအသေးအလိုက် ကျပ် ၅ ထောင်ကနေ ကျပ်၂ သိန်းအထိတောင်းပြီး၊ ရွှေလုပ်ငန်းရှင်နဲ့ တခြားလုပ်ငန်းရှင်တွေကို ကျပ် ၂ သောင်းကနေ ကျပ် ၅ သိန်းအထိ တောင်းတယ်လို့ သူကဆက်ပြောပါတယ်။

လက်ရှိမှာတော့ နတ်တလင်းမြို့၊ ဇီးကုန်းကလေးရပ်ကွက်၊ ရန်ကုန်-ပြည်လမ်း ဘုရားကြီးရှေ့မှာ သင်္ကြန်မဏ္ဍပ် ဆောက်လုပ်ထားပြီး၊ ခုလို စစ်ကောင်စီက ကျင်းပမယ့် သင်္ကြန်ပွဲမှာ မြို့ခံပြည်သူတွေအနေနဲ့ စိတ်ဝင်စားမှုရှိမှာ မဟုတ်သလို စစ်တပ်ထောက်ခံသူတွေသာ ပါဝင်နိုင်တယ်လို့ နတ်တလင်း ဒေသခံတဦးက သုံးသပ်ပါတယ်။

“မနှစ်ကလည်း ရေကစားတာသိပ်မရှိဘူး။ အခုနှစ်လည်း ပြည်သူ လုံးဝ စိတ်မဝင်စားဘူး။ သင်္ကြန်သီချင်းတောင် ဖွင့်သံမကြားဘူး။ သင်္ကြန်အတွက်လည်း အစိမ်းနဲ့ဘောမ ဝန်ထမ်းတွေပဲ လုပ်မဲ့ကိုင်မဲ့သူရှိတယ်။ သာမန်ပြည်သူက သင်္ကြန်ရက်မထွက်ဖို့ များတယ်” လို့ ပြောပါတယ်။

နတ်တလင်းမြို့နယ် ပြည်သူ့ကာကွယ်ရေးတပ်ဖွဲ့ကလည်း စစ်ကောင်စီက ပြုလုပ်မယ့် သင်္ကြန်ပွဲတော်အပါအဝင် ဘယ်လိုပျော်ပွဲရွှင်ပွဲမဆို ဒေသခံပြည်သူတွေအနေနဲ့ မပါဝင်ကြဖို့ ပြီးခဲ့တဲ့ဧပြီလ ၆ ရက်က ထုတ်ပြန်တိုက်တွန်းထားပါတယ်။

ဒါ့အပြင် နတ်တလင်းမြို့နဲ့ မြို့ချင်းကပ်လျက် ပေါင်းတည်မြို့မှာလည်း စစ်ကောင်စီက သင်္ကြန်မှာ စည်ကားဖို့အတွက် မဏ္ဍပ်တွေဆောက်လုပ်လျှက်ရှိရာ၊ ဧပြီလ ၉ ရက်မနေ့က မနက် ၅ နာရီလောက်မှာတော့ ပေါင်းတည်မြို့၊ စျေး ၂ ရပ်ကွက်၊ ဘုရားကြီးလမ်းပေါ်က ဆောက်လုပ်ဆဲမဏ္ဍပ်ကို ပေါင်းတည်မြို့နယ် ပြည်သူ့ကာကွယ်ရေးတပ်ဖွဲ့ တပ်ရင်း-၃၆၀၁ တပ်ခွဲ – ၅ နွေဦးတပ်ဖွဲ့က ဗုံးခွဲသတိပေးခဲ့ပါသေးတယ်။

အုတ်ဖို၊ ဧပြီ ၁၀၊ ၂၀၂၃။

ပဲခူးတိုင်းအနောက်ခြမ်း၊ အုတ်ဖိုမြို့နယ်ထဲက လောင်းကစားဝိုင်းတွေကို ဆက်ပြီးမလုပ်ဖို့ မြေအောက်ပြောက်ကျားတပ်ဖွဲ့က ဧပြီလ ၉ ရက်မှာ ပထမဆုံးနဲ့နောက်ဆုံးအကြိမ် သတိပေးချက် ထုတ်ပြန်လိုက်ပါတယ်။

လောင်းကစားဝိုင်းတွေကို အုတ်ဖိုမြို့နယ်၊ ဂုံညှင်းတန်းအုပ်စု၊ ဂရံရွာနဲ့ ဒီးဒူးပင်အရှေ့ရွာမှာ လုပ်ဆောင်နေကာ၊ အဲ့ဒီလောင်းကစားဝိုင်းတွေကို ရှေ့ဆက်လုပ်ဆောင်ပါက ပစ်ခတ်တိုက်ခိုက်မှုတွေ လုပ်ဆောင်သွားမှာလို့ မြေအောက်ပြောက်ကျားတပ်ဖွဲ့မှ သတင်းတာဝန်ခံ ဗိုလ်တောက်တံ့က ပြောပါတယ်။

“ဖဲဝိုင်း ဂျင်ဝိုင်း ကြက်ဝိုင်းနဲ့ လောင်းကစားနည်း မျိုးစုံလုပ်နေတာ။ တပတ်လုံးလုပ်တာ။ ပြည်သူတွေရဲ့စီပွားရေးကို ထိခိုက်နစ်နာလို့ တားရတာပါ။ ဒါနောက်ဆုံးအကြိမ် သတိပေးတာ။ ပြည်သူတွေလည်း မသွားဖို့ ဝေးဝေးမှာနေဖို့ ပြောချင်တယ်။ ရပ်တန်းကမရပ်လို့ ပစ်ခတ်တိုက်ခိုက်တဲ့အခါ ပြည်သူတွေထိခဲ့ရင် ဖြေရှင်းမပေးနိုင်ဘူး” လို့ ပြောပါတယ်။

ဒါ့အပြင် လောင်းကစားဝိုင်းဒိုင်တွေက နယ်ခံပျူစောထီးတွေကတဆင့် စစ်ကောင်စီကို ဆက်ကြေးကောက်ပေးရပြီး၊ တနင်္လာနေ့ကနေ ကြာသပတေးနေ့အထိ ၁၆ သိန်း၊ သောကြာ-စနေ-တနင်္ဂနွေ သုံးရက်လုပ်ခွင့် ၁၆ သိန်းပေးရကာ စစ်ကောင်စီတပ်သားတွေကလည်း အရပ်ဝတ်၊ လက်နက်တွေကိုင်ပြီး လုံခြုံရေးယူပေးတယ်လို့ သိရပါတယ်။

အလားတူ စစ်တပ်က အာဏာသိမ်းပြီးနောက်ပိုင်းမှာ ပဲခူးတိုင်းအနောက်ခြမ်းက ပေါင်းတည်၊ နတ်တလင်း၊ မိုးညို စတဲ့မြို့နယ်တွေမှာလည်း စစ်ကောင်စီကို ဆက်ကြေးပေးကာ လောင်းကစားဝိုင်းတွေကို ပေါ်ပေါ်ထင်ထင်ပြုလုပ်လာနေသလို ကာကွယ်ရေးတပ်တွေဘက်ကလည်း သတိပေးတိုက်ခိုက်တာတွေကို လုပ်ဆောင်လျှက် ရှိနေပါတယ်။

ပြည်၊ ဧပြီ ၉၊ ၂၀၂၃။

ပဲခူးတိုင်း၊ ပြည်ခရိုင်၊ ပေါင်းတည်မြို့က ဆောက်လုပ်ဆဲသင်္ကြန်မဏ္ဍပ်ကို သတိပေးတဲ့အနေနဲ့ ဧပြီလ ၉ ရက်ဒီမနက်က ဗုံး ၁ လုံးဖေါက်ခွဲခဲ့တယ်လို့ ပေါင်းတည်မြို့နယ်ပြည်သူ့ကာကွယ်ရေးတပ်ဖွဲ့ တပ်ရင်း-၃၆၀၁ တပ်ခွဲ – ၅ နွေဦးတပ်ဖွဲ့ဝင်တဦးက ပြောပါတယ်။

ပေါင်းတည်မြို့၊ စျေး ၂ ရပ်ကွက် ဘုရားကြီးလမ်းပေါ်က စစ်ကောင်စီသင်္ကြန်မဏ္ဍပ်ကို ဒီနေ့မနက် ၅ နာရီက ဖောက်ခွဲခဲ့တာလို့ ဆိုပါတယ်။

“ပေါင်းတည်သင်္ကြန်မဏ္ဍပ်ကိုဗုံးခွဲတာဟုတ်ပါတယ်၊ ခုမနက် ၅ နာရီကပါ၊ ပြည်သူတွေထိခိုက်မှုမရှိအောင် မဏ္ဍပ်ကြမ်းခင်းပေါ်တင်ပြီးခွဲခဲ့တာပါ၊ ပျက်စီးမှုအနည်းအပါးပဲရှိမယ်၊ စစ်ကောင်စီနဲ့တပ်ဖွဲ့ဝင်တွေကို သတိပေးတဲ့အနေနဲ့ ဖောက်ခွဲခဲ့တာ” လို့ ပေါင်းတည်မြို့နယ်ပြည်သူ့ကာကွယ်ရေးတပ်ဖွဲ့ တပ်ရင်း – ၃၆၀၁ တပ်ခွဲ – ၅ နွေဦးတပ်ဖွဲ့ဝင်တဦးက ပြောပါတယ်။

ဗုံးပေါက်ကွဲသံကို တမြို့လုံးက ကျယ်လောင်စွာကြားရပြီး နေအိမ်တွေတောင် တုန်သွားတယ်လို့လည်း မြို့ခံတဦးက ပြောပါတယ်။

အဲဒီသင်္ကြန်မဏ္ဍပ်ဆောက်လုပ်ဖို့အတွက် စစ်ကောင်စီက မြို့နယ်အတွင်းရှိ နိုင်ငံပိုင်ကျွန်းသစ်ခိုးထုတ်သူတွေကို ထောက်ပံ့ခိုင်းစေပြီး၊ အခြားကုန်ကျငွေတွေအတွက် နယ်လှည့်လောင်းကစားဒိုင်တွေ၊ ၂ လုံး၊ ၃ လုံးနဲ့ ဘောလုံးဒိုင်တွေကို ထွေအုပ်၊ ရဲနဲ့ အုပ်ချုပ်ရေးမှူးတွေက မဲလက်မှတ်ရောင်းကာ ရံပုံငွေရှာဖွေတယ်လို့ အုပ်ချုပ်ရေးဌာနနဲ့နီးစပ်သူတဦးက ပြောပါတယ်။

ပေါင်းတည်မြို့ကို စစ်ကောင်စီက မာရှယ်လောကြေညာထားပေမယ့် ပြည်သူ့ကာကွယ်ရေးတပ်ဖွဲ့ဝင်တွေက မကြာခဏဆိုသလို တိုက်ခိုက်မှုတွေပြုလုပ်နေပြီး ဧပြီလ ၃ ရက်ညကလည်း တောင်ပို့လှအုပ်စု ကပြန်လာတဲ့ ရဲတွေကို မိုင်းဆွဲခဲ့ကြပါသေးတယ်။

ဒါ့အပြင် ပြီးခဲ့တဲ့နှစ်သင်္ကြန်အကြိုနေ့မတိုင်မီကလည်း မြို့ပေါ်ရပ်ကွက်တခုနဲ့ မဏ္ဍပ်အနီးမှာဗုံးပေါက်ကွဲခဲ့သလို မဏ္ဍပ်ပေါ်မှာ အရက်ထိုင်သောက်နေတဲ့ လုံခြုံရေးစစ်သားကိုလည်း လူငယ်အချို့ကအရက်ပုလင်းခွံနဲ့ပစ်ပေါက်ခဲ့ကြပြီး၊ ဧပြီလ ၁၆ ရက်(သင်္ကြန်အတက်နေ့)မှာတော့ မဏ္ဍပ်အနီး ဘုရားကြီးလမ်းနဲ့ ရန်ကုန်လမ်းထောင့်အလွန်မှာ ဗုံးပေါက်ကွဲခဲ့တဲ့အတွက် ရေကစားလာတဲ့ အမျိုးသမီးတဦး သေဆုံးခဲ့ပါသေးတယ်။

ပဲခူး၊ ဧပြီ ၈၊ ၂၀၂၃။

ပဲခူးတိုင်း၊ ဘုရားကြီးမြို့၊ ရန်ကုန်-မော်လမြိုင်လမ်းပိုင်းရှိ ဘုရားကြီးတိုးဂိတ်မှာ စစ်ကောင်စီစစ်ဆေးရေးအဖွဲ့တွေက ရန်ကုန်-မြဝတီ ကိုသွားလာနေကြတဲ့ မော်တော်ယာဉ်တွေဆီကနေ ဂိတ်ကြေးကို ကျပ်သိန်းချီတဲ့အထိ ကောက်ခံနေတယ်လို့ သိရပါတယ်။

မတ်လ ၂၅ ရက်မှစတင်ပြီး မြဝတီမြို့အနီးဝန်းကျင်မှာ တိုက်ပွဲတွေ ဆက်တိုက်ဖြစ်ပွားနေတဲ့အတွက် လုံခြုံရေးယူတာဆိုတဲ့အကြောင်းပြချက်နဲ့ ဂိတ်ထိုင်ကာ ငွေကြေးကောက်ခံနေတာဖြစ်ပြီး ကားအဝင်အထွက်များတဲ့ အချိန်တွေကိုရွေးကာ ကင်းစောင့်ကောက်ခံနေကြတာလို့ ရန်ကုန်-မြဝတီ ကုန်သွယ်ရေးလမ်းကြောင်းမှာ ခရီးသည်နဲ့ ကုန်ပစ္စည်းတွေကို သယ်ယူပေးနေတဲ့ အဌားယာဉ်မောင်းတဦးက ဆိုပါတယ်။

“ရန်ကုန်-မြဝတီသွားရင် ဂိတ်ကြေးအနေနဲ့ အသွား ၁၂၀၀၀၊ အပြန် ၁၂၀၀၀ ပေးရတယ်။ အခုနောက်ပိုင်း အသွား ၄၅၀၀၀၊ အပြန် တသိန်းနီးပါး ပေးနေရတဲ့အတွက် ကားသမားတွေအနေနဲ့ အခက်အခဲတွေကြုံနေရတယ်” လို့ သူကဆက်ရှင်းပြပါတယ်။

အစပိုင်းမှာ မြဝတီသွားမယ့်မော်တော်ယာဉ်တွေကို တစီး ၁၀၀၀ ကျပ်ကောက်နေရာမှ နောက်ပိုင်းတွင် ၅၀၀၀၊ ၁၀၀၀၀ အထိ တိုးမြှင့်ကောက်ခံရာက အခုလို အဆမတန်တိုးကောက်လာတာဖြစ်ပါတယ်။

စစ်ကောင်စီတပ်သားတွေက မော်တော်ယာဉ်တွေဆီကနေ အခုလိုကောက်ခံတာမျိုးတွေလုပ်သလို စစ်ကိုင်း၊ မကွေး၊ မန္တလေး၊ ရခိုင် စတဲ့ဒေသရဲ့ မှတ်ပုံတင်ကိုင်ဆောင်တဲ့သူတွေကိုလည်း ဒဏ်ကြေးရိုက်တယ်ဆိုပြီး ကျပ် ၁၀၀၀၀ အထိကောက်ခံတယ်လို့ အထက်ပါယာဉ်မောင်းက ဆိုပါတယ်။

“ယာဉ်ဂိတ်ကြေးကောက်တဲ့အပြင် အသက် ၁၈ နှစ်ကနေ ၃၀အတွင်း (မှတ်ပုံတင်)မလဲရသေးတဲ့ မှတ်ပုံတင်ကိုင်ဆောင်တဲ့သူတွေဆို ဒဏ်ကြေး ၅၀၀၀၊ ၅မျဉ်းစောင်း၊ ၈ မျဉ်းစောင်း၊ ၁၁မျဉ်းစောင်းကိုင်တဲ့သူတွေဆို ၁၀၀၀၀ အထိကောက်တယ်” လို့ သူက ဆက်ပြောပါတယ်။

ဂိတ်ကြေးကောက်ခံတဲ့အချိန်ကိုလည်း ကားအသွားလာများတဲ့ ညနေပိုင်းဆိုရောက်လာပြီး ညနေ ၅ နာရီကနေ ည ၁၂ နာရီ မော်လမြိုင်သွားတဲ့ လမ်းကြောဘက်မှာ တောင်းပြီး၊ မနက် ၄ နာရီကနေ ၆ နာရီထိကတော့ ရန်ကုန်ဘက်ဆင်းတဲ့ စုပေါင်းဂိတ်နားမှာ တောင်းတာတွေလုပ်တယ်လို့ ဆိုပါတယ်။

ဘုရားကြီးစစ်ဆေးရေးဂိတ်ဟာ ပြီးခဲ့တဲ့နှစ် ၂ လပိုင်းတုန်းက ဖျက်သိမ်းထားတဲ့ဂိတ် ဖြစ်ပေမယ့် အခုနှစ် မတ်လ ၂၇ရက်ကမှ အသစ်ပြန်ဖွင့်ပြီး ဘောနက်ကြီးအခြေစိုက် ခလရ ၅၉ကတပ်သားတွေဦးဆောင်ကာ ပြည်သူတွေဆီက ငွေကြေးအဆမတန်တောင်းနေတာဖြစ်တယ်လို့ သိရပါတယ်။

တောင်ငူ၊ ဧပြီ ၈၊ ၂၀၂၃။

ပဲခူးတိုင်းဒေသကြီး၊ တောင်ငူခရိုင်၊ ရေတာရှည်မြို့နယ်၊ ဆွာမြို့၊ အုန်းခြံရပ်ကွက်မှာရှိတဲ့ ရတနာအလင်းရောင်မိဘမဲ့ကျောင်းက ကလေးငယ် ၃၃၀ အတွက် အဟာရကုသိုလ်အလှူရှင်တွေ လိုအပ်နေတယ်လို့ သိရပါတယ်။

နေ့စဉ်ကျွေးမွေးနေရတာဖြစ်တဲ့အတွက် ရေရှည်ရပ်တည်ရေးမှာ အခက်ခဲများရှိနေပြီး အွန်လိုင်းကနေ လှူဒါန်းတာမျိုးတွေ ရှိနေပေမယ့် လုံလောက်မှုမရှိဘူးလို့ ယနေ့ မတ်လ ၈ ရက်နေ့မှာ ဦးဆောင်ဆရာတော်ဦးဇင်းဥူးကေတုက မြေလတ်အသံကို မိန့်ကြားပါတယ်။

“ဆန်တနေ့ကိုသုံးအိတ်လောက်ကုန်တယ်။ ဆန် ဆီ ဆား ကြက်သွန်နီ ငါးခြောက် ပဲ စတဲ့ကုန်ခြောက်တွေလည်း လိုအပ်ပါတယ်။ နေ့စဥ်နဲ့အမျှကျွေးမွေးနေရတော့ ရေရှည်ရပ်တည်ဖို့လုပ်ဆောင်နေရတယ်။ အွန်လိုင်းကနေလှူပေးတဲ့ အလှူရှင်တွေလည်း ရှိပါတယ်။ လုံလောက်တာမျိုးတော့ မရှိသေးပါဘူး။ အဲဒါကြောင့်ကလေးတွေအတွက် အာဟာရအလှူရှင်တွေ အထူးလိုအပ်နေတာပါ” လို့ ဆရာတော်က မိန့်ပါတယ်။

မိဘမဲ့ကလေးသီးသန့် ကျား/မ ၂၀၀ ကျော်ရှိပြီး တခြား စွန့်ပစ်တာ၊ လာရောက်အပ်နှံတာနဲ့ ဘုန်းတော်ကြီးသင်ပညာရေးကျောင်းသား၊ မသန်စွမ်းကလေးငယ်တွေလည်း ရှိနေတယ်လို့ သိရပါတယ်။

၂၀၁၆-၁၇ ခုနှစ်က နယ်မြေမအေးချမ်းတဲ့ ရှမ်း၊ ပလောင်၊ ရခိုင်တို့က တိုင်းရင်းသားကလေးငယ်တွေကိုလည်း ပညာသင်ပေးထားပြီး KG တန်းကနေတက္ကသိုလ်တက်တဲ့အရွယ်ထိ ကျွေးမွေးထားတယ်လို့ မိန့်ပါတယ်။

လက်ရှိအနေနဲ့ မိဘမဲ့ကလေးနဲ့ ၊ ဘုန်းတော်ကြီးသင်ပညာရေးကလေးဆိုပြီး ရှိကာ အဟာရအလှူရှင်များအနေနဲ့ နံနက်စာ -၂ သိန်းကျပ်၊ နေ့လယ်စာ – ၃ သိန်းကျပ်၊ ညနေစာ – ၁ သိန်း ၅ သောင်းကျပ်တို့ကို လှူဒါန်းနိုင်တယ်လို့ သိရပါတယ်။

ပြည်၊ ဧပြီ ၈၊ ၂၀၂၃။

ပဲခူးတိုင်းဒေသကြီး(အနောက်ပိုင်း)၊ ပြည်မြို့မှာ ရာဇဝတ်ပြစ်မှုနဲ့ ဖမ်းဆီးခံရသူ လူငယ်တွေကို စစ်တပ်ယူနီဖောင်း ဝတ်ပြီး ကင်းစောင့်ခိုင်းတာအပြင် စစ်တပ်ထဲဝင်ခိုင်းနေတယ်လို့ မြို့ခံတွေဆီက သိရပါတယ်။

ပြီးခဲ့တဲ့ မတ်လအတွင်းမှာ ယာဉ်စည်းကမ်း လမ်းစည်းကမ်းနဲ့ ဖမ်းဆီးခံရပြီး ငွေကြေးမတတ်နိုင်သူတွေကို အချုပ်သားတွေကို စစ်ယူနီဖောင်းဝတ်ခိုင်းပြီး ကျည်မပါသေနတ်နဲ့ ကင်းစောင့်ခိုင်းတာတွေ လုပ်ခဲ့တယ်လို့ ပြန်လည်လွတ်မြောက်လာသူတွေနဲ့ နီးစပ်သူတွေက ပြောပါတယ်။

“အချုပ်ထဲမှာ ပိုက်ဆံမတတ်နိုင်လို့ နောက်ကမလိုက်နိုင်တဲ့ လူငယ်တချို့ကို ကင်းစောင့်ခိုင်းတာ တပ်ယူနီဖောင်းနဲ့ သေနတ်ကိုင်ပြီး စောင့်ရတယ်တဲ့။ ကျည်ဆန်တော့ မပါဘူးပြောတယ်။ သူတို့မှာ အင်အားမရှိတာလား ကြောက်လို့လားတော့ မသိဘူး။ ကလေးတွေက နှစ်ရက်စောင့်ပေးခဲ့ရတယ် ပြောတယ်” လို့ မြို့ခံတဦးက ပြောပါတယ်။

ဒါ့အပြင် ရပ်ကွက်တွေထဲ ဆိုးသွမ်းလူငယ်တွေ ပစ္စည်းခိုးယူရာမှာမိတဲ့အတွက် ဖမ်းဆီးခဲ့ပေမယ့် တပ်ထဲဝင်ပါက လွတ်ပေးမယ်လို့ ပြောဆိုပြီး အိမ်တွေကို ပြန်လိုက်ပို့တာတွေ လုပ်ဆောင်နေတယ်လို့ မြို့ခံတွေဆီက သိရပါတယ်။

“လူငယ်တွေကတော့ ညပိုင်းမှောင်ရိပ်ခိုနဲ့ တခြားပစ္စည်းတွေလည်း ယူမိတာမျိုးရှိမှာပေါ့။ အဲ့ဒါကို ထောင်ချမခံချင်ရင် တပ်ထဲဝင် လွှတ်ပေးမယ်ဆိုပြီး ပြောပြီး အိမ်တွေကို လိုက်ပို့တာတွေ လုပ်နေတယ်လို့ ပြောကြတယ်” လို့ မြို့ခံတဦးက ပြောပါတယ်။

မူးယစ်ရမ်းကားနဲ့ မှောင်ရိပ်ခိုတွေကို သက်ဆိုင်ရာရပ်ကွက်အုပ်ချုပ်ရေးမှူးတွေက ဖမ်းဆီးပြီး ဒဏ်ငွေရိုက်တာ၊ ရိုက်နှက်ခြိမ်းခြောက်တာတွေ လုပ်ဆောင်နေသလို ညနက်အချိန် ပေါ်တာဆွဲမယ်ဆိုတဲ့ သတင်းတွေကြောင့် မြို့ပေါ်မနက်အစော ဈေးလာရောက်ရောင်းချရတဲ့ တောဈေးသယ် လူငယ်တွေလည်း စိုးရိမ်နေကြရတယ်လို့ ဆိုပါတယ်။