ဝေလင်း

ပြည်၊ ဧပြီ ၈၊ ၂၀၂၃။

ပဲခူးတိုင်းဒေသကြီး(အနောက်ပိုင်း)၊ ပြည်မြို့မှာ ရာဇဝတ်ပြစ်မှုနဲ့ ဖမ်းဆီးခံရသူ လူငယ်တွေကို စစ်တပ်ယူနီဖောင်း ဝတ်ပြီး ကင်းစောင့်ခိုင်းတာအပြင် စစ်တပ်ထဲဝင်ခိုင်းနေတယ်လို့ မြို့ခံတွေဆီက သိရပါတယ်။

ပြီးခဲ့တဲ့ မတ်လအတွင်းမှာ ယာဉ်စည်းကမ်း လမ်းစည်းကမ်းနဲ့ ဖမ်းဆီးခံရပြီး ငွေကြေးမတတ်နိုင်သူတွေကို အချုပ်သားတွေကို စစ်ယူနီဖောင်းဝတ်ခိုင်းပြီး ကျည်မပါသေနတ်နဲ့ ကင်းစောင့်ခိုင်းတာတွေ လုပ်ခဲ့တယ်လို့ ပြန်လည်လွတ်မြောက်လာသူတွေနဲ့ နီးစပ်သူတွေက ပြောပါတယ်။

“အချုပ်ထဲမှာ ပိုက်ဆံမတတ်နိုင်လို့ နောက်ကမလိုက်နိုင်တဲ့ လူငယ်တချို့ကို ကင်းစောင့်ခိုင်းတာ တပ်ယူနီဖောင်းနဲ့ သေနတ်ကိုင်ပြီး စောင့်ရတယ်တဲ့။ ကျည်ဆန်တော့ မပါဘူးပြောတယ်။ သူတို့မှာ အင်အားမရှိတာလား ကြောက်လို့လားတော့ မသိဘူး။ ကလေးတွေက နှစ်ရက်စောင့်ပေးခဲ့ရတယ် ပြောတယ်” လို့ မြို့ခံတဦးက ပြောပါတယ်။

ဒါ့အပြင် ရပ်ကွက်တွေထဲ ဆိုးသွမ်းလူငယ်တွေ ပစ္စည်းခိုးယူရာမှာမိတဲ့အတွက် ဖမ်းဆီးခဲ့ပေမယ့် တပ်ထဲဝင်ပါက လွတ်ပေးမယ်လို့ ပြောဆိုပြီး အိမ်တွေကို ပြန်လိုက်ပို့တာတွေ လုပ်ဆောင်နေတယ်လို့ မြို့ခံတွေဆီက သိရပါတယ်။

“လူငယ်တွေကတော့ ညပိုင်းမှောင်ရိပ်ခိုနဲ့ တခြားပစ္စည်းတွေလည်း ယူမိတာမျိုးရှိမှာပေါ့။ အဲ့ဒါကို ထောင်ချမခံချင်ရင် တပ်ထဲဝင် လွှတ်ပေးမယ်ဆိုပြီး ပြောပြီး အိမ်တွေကို လိုက်ပို့တာတွေ လုပ်နေတယ်လို့ ပြောကြတယ်” လို့ မြို့ခံတဦးက ပြောပါတယ်။

မူးယစ်ရမ်းကားနဲ့ မှောင်ရိပ်ခိုတွေကို သက်ဆိုင်ရာရပ်ကွက်အုပ်ချုပ်ရေးမှူးတွေက ဖမ်းဆီးပြီး ဒဏ်ငွေရိုက်တာ၊ ရိုက်နှက်ခြိမ်းခြောက်တာတွေ လုပ်ဆောင်နေသလို ညနက်အချိန် ပေါ်တာဆွဲမယ်ဆိုတဲ့ သတင်းတွေကြောင့် မြို့ပေါ်မနက်အစော ဈေးလာရောက်ရောင်းချရတဲ့ တောဈေးသယ် လူငယ်တွေလည်း စိုးရိမ်နေကြရတယ်လို့ ဆိုပါတယ်။

မကွေး၊ မတ် ၃၀၊ ၂၀၂၃။

မကွေးတိုင်းဒေသကြီး၊ သရက်ခရိုင်၊ ကံမမြို့နယ်ထဲက ကျေးရွာတွေမှာ ပေါင်ပုတ်လက်ပုတ်နဲ့ သွေးအန်တာတွေ ဖြစ်ပြီး အကောင် ၄၀၀ ခန့် သေဆုံးသွားပြီလို့ ဒေသခံတွေဆီက သိရပါတယ်။

မတ်လဆန်းကတည်းက ဖြစ်ပွားနေတာဖြစ်ပြီး လလယ်ပိုင်းမှာ အများအပြား ကူးစက်သေဆုံးခဲ့ကာ လက်ရှိ လနှောင်းပိုင်းအထိ သေဆုံးမှုက ရှိနေဆဲပဲလို့ ဒေသခံတွေက ပြောပါတယ်။

“မတ်လဆန်းကနေစတာ မတ်လလယ်မှာ အတော်ဖြစ်လိုက်တယ်။ သူက ဂရုစိုက်နိုင်မှ အဲလိုမဟုတ်ရင် ရောဂါရင့်သွားရင် ကုဖို့ခက်ရော၊ နွားက အစာစားလား စားမြုံ့ပြန်လား။ လွှတ်ထားရင်လည်း တချို့ကလိုက်ကြည့်နိုင်တယ် တချို့ကြတော့ လိုက်မကြည့်နိုင်ကြဘူးလေ၊ အဲမှာကူးလာတာပဲ။ အပူများလို့ ဖြစ်တယ်လို့ ဆိုပေမယ့် ခါတိုင်းနှစ်တွေလည်း ပူတာပဲ အဲလောက်မဖြစ်ဘူး” လို့ ရွာခံတဦးက ဆိုပါတယ်။

နွားတွေမှာ လက်နဲ့ပေါင်တွေမှာ ပုတ်တာ၊ ဆီးဝမ်းသွားတဲ့အခါမှာ သွေးပါလာတာ၊ ပါးစပ်ကပါ သွေးကျလာတာမျိုးတွေဖြစ်ပြီး လဲကျသေဆုံးတာလို့ ဆိုပါတယ်။

‘အဲလိုဖြစ်ပြီး နွားကြီးတွေဆို သုံးရက်လောက်ပဲ။ နွားကလေးတွေကတော့ တရက်နဲ့တမနက်။ ရွာထဲမှာလည်း အတော်ဖြစ်သွားတယ်။ အိမ်ကလည်း တကောင်သေတာပဲ။ သေတာတွေကိုတော့ စားလို့မရဘူး။ ရောဂါကူးမှာစိုးလို့ မြေမြှုပ်ပစ်ရတယ်။” လို့ ရွာခံအမျိုးသမီးတဦးက ပြောပါတယ်။

လက်ရှိမှာတော့ ပေပင်ကျေးရွာတရွာထဲ အကောင် ၂၀၀ ခန့် သေဆုံးခဲ့ရပြီး၊ စစ်စရံကျေးရွာမှာ အကောင် ၂၀ ခန့်နဲ့ အခြား မြစ်ကမ်းဘေးရွာတွေဖြစ်တဲ့ ဝဲကြီး၊ ထောက်မ၊ ကျွဲတလင်း၊ တောင်ပို့တရာ ရွာတွေအပြင် ကုန်းတွင်းပိုင်းရွာတွေဖြစ်တဲ့ သက်ကယ်မြောင်၊ ပယ်ကျ၊ ဂဒူးပြင်၊ ကျီးပင် ရွာတွေမှာပါ ဖြစ်နေတာလို့ ဒေသခံတွေဆီက သိရပါတယ်။

“ရွာတွေမှာ တိမွေးကုတွေ သိပ်မရှိဘူး။ သင်တန်းတက်ထားတဲ့ ဆရာတယောက်တော့ ရွာ လေးရွာမှာ တယောက်ရှိတယ်။ သူလည်းမနိုင်ဘူး။ သေချာ မပြောတတ်ဘူး။ သူ့ဆရာ ပြန်မေးနေရတာ။ ဌာနဆိုင်ရာကတော့ ဘယ်နားနေမှန်းကို မသိဘူး” လို့ ဒေသခံတဦးက ပြောပါတယ်။

အဲဒီဒေသတွေမှာ လက်ရှိ နွားတကောင်(ခိုင်းနွား) ပေါက်ဈေး ၁၀ သိန်းခန့်ရှိနေပြီး ရခိုင်ရိုးမကိုဖြတ်ကာ ပို့နေသည့် မှောင်ခိုလမ်းကြောင်းတွေကနေလည်း အရောင်းအဝယ် ဖြစ်နေတယ်လို့ သိရပါတယ်။

မြိုင်၊ မတ် ၂၁၊ ၂၀၂၃။

မကွေးတိုင်း၊ မြိုင်မြို့နယ်ထဲမှာ ယနေ့မတ်လ ၂၁ ရက်နေ့မှာ ကျရောက်တဲ့ ကမ္ဘာ့ကဗျာနေ့ကို နံနက် ၁၀ နာရီကနေ ၁၂ နာရီထိ လွတ်လပ်စွာ ကျင်းပခဲ့ကြတယ်လို့ သိရပါတယ်။

မြိုင်ဒေသဟာ လက်နက်ကိုင်ကဗျာဆရာ၊ လက်နက်ကိုင်ပန်းချီဆရာနဲ့ အခြား တော်လှန်သော အနုပညာရှင်များအားကောင်းသလို PDF တပ်ဖွဲ့ဝင်တွေအဖြစ်ကော တပ်ဖွဲ့ခေါင်းဆောင်နေရာတွေမှာပါ ပါဝင်နေကြတယ်လို့ ဆိုပါတယ်။

“ပြီးခဲ့တဲ့နှစ်မှာ ကျနော်တို့ မလုပ်နိုင်ခဲ့ဘူး။ အခြေချတာ နယ်မြေမစိုးမိုးသေးတာတွေကြောင့်ပါ။ ဒီနှစ်မှာတော့ ကျနော်တို့စိုးမိုးမှု အထိုက်အလျှောက်ရလို့ တော်လှန်ရေးအင်အားစုအားကောင်းလာလို့ လုပ်နိုင်ခဲ့တယ်။ လက်နက်ကိုင် ကဗျာဆရာတယောက်အနေနဲ့ဆိုရင်တော့ ကဗျာမရွတ်ရတာ လေးနှစ်လောက်ရှိပြီ။ အခုတော့ပျော်တာပေါ့” လို့ မြေလတ်ဒေသပြောက်ကျားတပ်ဖွဲ့ – MRG ရဲ့ တာဝန်ခံလည်းဖြစ်၊ ကဗျာဆရာလည်းဖြစ်သူ ကိုပြေဇော်က မြေလတ်အသံကို ပြောပါတယ်။

ကဗျာရွတ်ပွဲကို ကဗျာဆရာနဲ့ကဗျာချစ်သူတွေ ယင်းမာပင်ခရိုင်တပ်ရင်း-၁၀၊ ပုလဲမြို့နယ်တပ်ရင်း-၄ တပ်ရင်းမှူးများတက်ရောက်သလို တပ်ရင်း-၆ က ရဲဘော်တွေ ပကဖတွေနဲ့ ပအဖ ခေါင်းဆောင်တွေအပါအဝင် အင်အား ၅၀ ခန့် တက်ရောက်ခဲ့ကြတယ်လို့ ဆိုပါတယ်။

“ကဗျာဆရာတွေ ပြန်တွေ့ရတယ်။ သူတို့လုပ်နေကြတဲ့ အကြောင်းအရာတွေ ကျနော်တို့လုပ်နေကြတဲ့ အကြောင်းအရာတွေ ပြောကြတယ်။ တော်လှန်ရေးထဲမှာ စိတ်တူကိုယ်တူကဗျာဆရာတွေ ပြန်တွေ့ကြတယ်။ ကဗျာတွေ ရွတ်ကြပျော်ပါတယ်” လို့ ကိုပြေဇော်က ပြောပါတယ်။

ပြီးခဲ့တဲ့ ၂၀၂၂ ခုနှစ် ကမ္ဘာ့ကဗျာနေ့ကို မပြုလုပ်နိုင်ခဲ့ဘဲ ယခုကဗျာရွတ်ပွဲကိုတော့ မြေလတ်ဒေသပြောက်ကျားတပ်ဖွဲ့- MRG က ကမကထပြုလုပ်ပြီး ကဗျာမရွတ်ခင် ကျဆုံးရဲဘော်နဲ့ကဗျာဆရာတွေကို ငြိမ်သက်အလေးပြုတာ၊ တော်လှန်ကဗျာတွေကို ရွတ်ဖတ်တာတွေ ပြုလုပ်ခဲ့ကြတယ်လို့ သိရပါတယ်။

ပြည်၊ မတ် ၁၈၊ ၂၀၂၃။

ပဲခူးတိုင်း(အနောက်ခြမ်း)၊ ပြည်ခရိုင်အကျဉ်းထောင်တွင်း အထူးတရားရုံးကနေပြီး အကြမ်းဖက်မှု တိုက်ဖျက်ရေးဥပဒေတွေနဲ့ ဖမ်းဆီးတရားစွဲထားသူ ၆ ဦးကို ထောင်တသက်နဲ့ ထပ်တိုးနှစ်တွေအပါ တပေါင်းတည်းကျခံစေဖို့ အမိန့်ချလိုက်တယ်လို့ အကျဉ်းထောင်နဲ့ နီးစပ်သူများထံက သိရပါတယ်။

ပြီးခဲ့တဲ့ မတ်လ ၁၅ ရက်နေ့က အမိန့်ချမှတ်လိုက်တာဖြစ်ပြီး ကိုဇင်မျိုးဟိန်း(ခ)ဇေကြီး နဲ့ ကိုအောင်သက်ပိုင် တို့နှစ်ဦးကို အကြမ်းဖက်မှု တိုက်ဖျက်ရေးဥပဒေ ပုဒ်မ-၅၀(ဈ)၊ ၅၂(က) တို့ဖြင့် ထောင်တသက်နှင့်အပို ၇ နှစ်၊ ကိုတရုတ်ကြီး(ခ) သီရိဇော် နဲ့ ကိုရန်နောင်စိုး၊ ကိုကျော်ကိုကို တို့ကို ပုဒ်မ ၅၀(ဈ) နဲ့ ထောင်တသက်၊ ကိုထွန်းထွန်းလွင်ကို ပုဒ်မ ၅၂(က)နဲ့ ထောင် ၇ နှစ် အသီးသီး အမိန့်ချမှတ်ခဲ့တာလို့ သိရပါတယ်။

“သူတို့က ပေါက်ခေါင်းမြို့မှာ ဖမ်းဆီးခံရတာ။ ဖေါက်ခွဲမှုတခုမှာ လုပ်တဲ့သူကို မမိလို့ သူတို့ကို ဖမ်းတာလို့ သိရပါတယ်။ ပြီးခဲ့တဲ့ ဖေဖော်ဝါရီလ က ဖမ်းဆီးခံရတာပါ။ ကျောင်းဆရာတယောက် ပါတယ်လို့ ပြောတယ်။” လို့ မြို့ခံတဦးက ပြောပါတယ်။

အကြမ်းဖက်မှု တိုက်ဖျက်ရေးဥပဒေ ပုဒ်မ ၅၀(ဈ) မှာ အများပြည်သူပိုင် အဆောက်အဦးကို ဗုံးခွဲတိုက်ခိုက်တာ၊ အားပေးကူညီတာ၊ ကြံရာပါအဖြစ် ဆောင်ရွက်တာတွေကို စွဲဆိုတဲ့ပုဒ်မ ဖြစ်ပြီး အနည်ဆုံးထောင်ဒဏ် (၁၀) နှစ်မှ ထောင်တသက်အထိ အမိန့်ချမှတ်နိုင်တယ်လို့ ရှေ့နေတဦးက ပြောပါတယ်။

အလားတူ ပုဒ်မ ၅၂(က) မှာ အကြမ်းဖက်မှုအုပ်စုဖွဲ့စည်းရန် အကြမ်းဖက်အဖွဲ့အစည်းတခုခုသိလျှက်နဲ့ တာဝန်ပေး၍ လှုပ်ရှားစေရန် ဆောင်ရွက်မှုတွေ၊ အကြမ်းဖက်သူတွေလွတ်မြောက်ရန် သတင်းထိန်ချန်တာ၊ ဖွက်ထားတာ၊ အဆောက်အအုံသုံးပြုခွင့်ပေးတာ၊ ထောက်ပံ့ပြုလုပ်တာတွေကို စွဲဆိုတာဖြစ်ပြီး ထောင်ဒဏ်အနည်းဆုံး ၃ နှစ်မှ ၇ နှစ်ထိ ချမှတ်နိုင်တယ်လို့ ဆိုပါတယ်။

“သူတို့က အခုပုဒ်မ နှစ်ခုလုံး အမိန့်ချတာကိုကြည့်ရင် အမြင့်ဆုံးပြစ်ဒဏ်တွေကို အမိန့်ချတာပါ။ အခုကလည်း ပြဌာန်းချက်မှာပါတာကို ပြောတာပဲဖြစ်တယ်။ သူတို့က ဥပဒေကို တလွဲသုံးတာပေါ့။ ဖမ်းဆီးအမိန့်ချခံရသူတွေကို အကြမ်းဖက်သမားလို့ ပြောချင်တာမဟုတ်ပါဘူး” လို့ ရှေ့နေတဦးက ပြောပါတယ်။

အထူးတရားရုံးတွေအနေနဲ့ နောက်ပိုင်းကာလတွေမှာ မည်သည့် ပုဒ်မတွေကိုမဆို အမြင့်ဆုံးပြစ်ဒဏ်တွေကိုသာ ချမှတ်လေ့ရှိပြီး တရားစီရင်ရေးစနစ်ကို ကြိုးကိုင်ကာ ပြည်သူလူထုကို အကြောက်တရား ထည့်ပေးနေသည့်သဘောမျိုးဖြစ်သလို သက်ညှာပေးမှာမဟုတ်ဘူး ဆိုတဲ့ စစ်ကောင်စီရဲ့ သဘောထားကိုလည်း ထုတ်ပြရာရောက်နေတယ်လို့ သူကဆက်လက်ပြောပါတယ်။

လက်ရှိမှာလည်း အကျဉ်းထောင်တွေထဲက တချို့အကျဉ်းသားတွေဟာ ထောင်ဝင်စာတွေ့ခွင့်မရတာမျိုး ရှိနေပြီး အဆက်သွယ်မရသူတွေလည်းရှိနေလို့ ထောင်တွင်းခက်ခဲမှုတွေနဲ့ ရင်ဆိုင်နေရတယ်လို့ နိုင်ငံရေးအကျဉ်းသားဟောင်းတဦးက ပြောပါတယ်။

မြေလတ်အသံ၊ ဖေဖော်ဝါရီ ၂၄၊ ၂၀၂၃။

တရုတ်ဝယ်လက်တခုကိုသာ အားကိုးနေရတဲ့ ဇီးသီးလုပ်ငန်းတွေ အရောင်းအဝယ် အေးနေတယ်လို့ ဇီးသီးလုပ်ငန်းရှင်များဆီက သိရပါတယ်။

မြန်မာနိုင်ငံ မြေလတ်အညာဒေသက အဓိကထွက်တဲ့ ဇီးသီးခြောက်ခွဲခြမ်းထားတဲ့ ဇီးဆံကို တရုတ်နိုင်ငံကနေ အဓိက ဝယ်ယူနေတာဖြစ်ပြီး လက်ရှိမှာတော့ ဈေးနှိမ်ဝယ်ယူနေလို့ အရောင်းအဝယ် သိပ်မဖြစ်ဘူးလို့ ဆိုပါတယ်။

“တရုတ်က ဈေးချနေလို့ အဆံဈေး အေးနေတယ်။ ဈေးကွက်ကတော့ တရုတ်ဈေးကွက်တခုပဲ သူတို့က ဆေးထုတ်လုပ်တာလို့ ပြောတာပဲ။ အဆံကိုပဲ ဝယ်တာ။ ကျန်တဲ့ ဇီးသီး အကာအနှစ်တွေက ပြည်တွင်းမှာ ဇီးယိုလုပ်ငန်း လုပ်ကြတယ်။” လို့ ဆီးသီးပွဲရုံပိုင်ရှင် တဦးက ပြောပါတယ်။

လက်ရှိ ဇီးသီးဈေးမှာ အညာဒေသတွင် ၁ တင်း ၁၃၅၀၀ ထိပေါက်ဈေးရှိကာ ပဲခူးတိုင်းအတွင်း ၁ တင်း ၁၂၀၀၀ ထိပေါက်ဈေး ရှိနေပြီး အရောင်းအဝယ် အေးနေသေးတယ်လို့ သိရပါတယ်။

ဇီးသီးထွက်ရှိရာ အများစုမှာ အညာမကွေးတိုင်းနှင့် မန္တလေးတိုင်း၊ ပဲခူးတိုင်းတို့က အဓိကထွက်ရှိသလို ဧရာဝတီတိုင်းကလည်း အနည်းငယ်ထွက်ရှိတယ်လို့ ဆိုပါတယ်။

“ဇီးသီးက အဓိက အားထားရာ စိုက်ပျိုးသီးနှံ မဟုတ်ပေမယ့် သူက တဖက်တလမ်းကလည်း ဝင်ငွေရတဲ့ အလုပ်လုပ်ပါပဲ။ အိမ်မှာ တခြားလုပ်ငန်း မရှိသူတွေနဲ့ ကလေးတွေက တောင်ယာလိုက်ရင်း ကောက်ကြတယ်။ တချို့လည်း ဇီးသီးချိန်ဆို ဇီးခွဲစက် ဇီးပွဲရုံတွေမှာ အလုပ်ရကြတယ်။ ရာသီချိန်ကုန်ရင်တော့ တခြားအလုပ်ပြောင်းလုပ်ရတာပေါ့” ဟု မကွေးမြို့နယ်ထဲက အမျိုးသမီးတဦးက ပြောပါတယ်။

ဇီးသီးကို အမှည့်အခြောက်များသာ ဝယ်ယူပြီး ဇီးသီးရာသီချိန်မှာ ဒီဇင်ဘာလကုန်မှ မတ်လဆန်းချိန်ထိ ဖြစ်တယ်လို့ ဆိုပါတယ်။

ပဲခူး၊ ဖေဖော်ဝါရီ ၁၉၊ ၂၀၂၃။

ပဲခူးတိုင်းဒေသကြီး(အနောက်ပိုင်း)၊ အကျဉ်းထောင်တွေမှာ ဖမ်းဆီးခံရပြီးတရားရင်ဆိုင်နေရဆဲ နိုင်ငံရေးအကျဉ်းသားများ ရင်ဆိုင်နေရတဲ့အခြေအနေကို ရှေ့နေ့တဦးက ပြောဆိုလိုက်တာပါ။

နိုင်ငံရေးအမှုများ လိုက်ပါပေးလေ့ရှိတဲ့ ရှေ့နေများ ဖမ်းဆီးခံရတာ၊ ရှောင်တိမ်းနေရတာ၊ ခြိမ်းခြောက်ခံရတာတွေရှိလို့ တချို့ရှေ့နေတွေလည်း ပါဝါပြန်ရုပ်သွားတာတွေကြောင့် ဖမ်းဆီးခံရတဲ့နိုင်ငံရေးအကျဉ်းသားတွေဟာ တရားခွင်မှာရှေ့နေမပါဘဲ ရင်ဆိုင်နေရပြီး ခုခံချေပပိုင်ခွင့် မရှိတဲ့အခြေအနေကို ရောက်နေတာလို့ ရှေ့နေအသိုင်းအဝိုင်းဆီက သိရပါတယ်။

“အရင်ကလည်း နိုင်ငံရေးအမှုတွေမှာ လိုက်ပါသူနည်းတယ်။ အဲမှာအဖမ်းခံရတာတွေလည်းရှိ၊ ရှောင်တိမ်းနေရသူတွေလည်းရှိတော့ လိုက်ပေးတဲ့ရှေ့နေရှားလာတာ။ အခုကတော့ မရှိသလောက်ဆိုတော့ ထောင်တွင်းတရားရုံးတွေမှာ ရှေ့နေမပါဘဲ ရင်ဆိုင်နေရတဲ့ အခြေအနေတွေ ရှိလာတယ်။ ခုခံချေပပေးမယ့်သူမရှိဘူး။ စစ်ကောင်စီဘက်ကလည်း သူတို့ပြောချင်တာပြော ရေးမှတ်ထားတာပဲ လုပ်ချင်တာလုပ်ကြတာပါ” လို့ ရှေ့နေတဦးက ဆိုပါတယ်။

လက်ရှိအချိန်ကာလအတွင်း အစုအလိုက်အပြုံလိုက်ဖမ်းဆီးမှုနည်းပါးလာပေမယ့် ဖမ်းဆီးခံထားရတဲ့ နိုင်ငံရေးအကျဉ်းသားအချို့မှာ ထပ်တိုးအမှုတွေနဲ့ ရင်ဆိုင်နေရဆဲအမှုတွေရှိနေဆဲဖြစ်ပြီး လိုက်ပေးသူရှေ့နေတွေက ၁၅ သိန်းခန့်ကနေ သိန်း ၃၀ ခန့်အထိတောင်းကြတယ်လို့ သူကဆိုပါတယ်။

ဒါအပြင် “ကျနော်သိရသလောက်တော့ နိုင်ကျဉ်းတွေမှာ ထောင်ဝင်စာခက်ခဲရှားပါးလာတယ်။ တချို့လည်းနှစ်ကြာလာတော့ စီးပွားရေးမကောင်းလို့ လာပို့သူတွေနဲ့မျှစားကြတယ်။ တယောက်ဆို အခုထိ ဖမ်းဆီးထားပြီး အိမ်နဲ့အဆက်သွယ်မရလို့ ဘဝတူတွေက ကျွေးထားတာရှိတယ်။ ကျနော်ကိုယ်တိုင်ကြုံတွေ့ခဲ့ရတာ။” လို့ ပြည်အကျဉ်းထောင်ကနေ မကြာခင်ကလွတ်မြောက်လာတဲ့ နိုင်ငံရေးအကျဉ်းသားတဦးက ဆိုပါတယ်။

လွတ်မြောက်လာကြတဲ့ နိုင်ငံရေးအကျဉ်းသားတွေအနေနဲ့ နီးစပ်ရာလေးတွေ စုဆောင်းပြီး ထောင်ဝင်စာအဖြစ် စားစရာ၊ ဆေးဝါးတွေကို ပို့ပေးနေတဲ့ အလုပ်ကို လုပ်ဖြစ်နေတယ်လို့ သူကထပ်မံပြောပါတယ်။

ပြည်အကျဉ်းထောင်အတွင်း နောက်ပိုင်းတရားစွဲဆိုဖမ်းဆီးမှုများတွင် အကြမ်းဖက်တိုက်ဖျက်ရေးဥပဒေဖြင့်သာ တရားစွဲဆိုနေပြီး လိုက်ပါဆဲအမှုတွေပြီးပြတ်သွားတဲ့ ရှေ့နေတွေအနေနဲ့ အခြားနိုင်ကျဉ်းအမှုတွေကိုလိုက်ပါပေးဖို့ ရှောင်ရှားလာကြတယ်လို့ သိရပါတယ်။