ညောင်ဦး

ညောင်ဦး၊ စက်တင်ဘာ ၂၆၊ ၂၀၂၆။

မန္တလေးတိုင်း၊ ညောင်ဦးမြို့နဲ့အနီးတဝိုက်ကျေးရွာတွေမှာ အုပ်ချုပ်ရေးမှူးတွေက စစ်မှုထမ်းပေါ်တာ မဆွဲဟုအာမခံပြီး တအိမ်ထောင်ကို စစ်မှုထမ်းကြေး ၃၀,၀၀၀ ကောက်ခံနေတယ်လို့ မြို့ခံတွေဆီက သိရပါတယ်။

အခုနှစ် ဇူလိုင်လကစတင်ပြီး ညောင်ဦးမြို့၊ ပုဂံမြို့၊ ပုဂံမြို့သစ်၊ တောင်ဇင်၊ မြင်းကပါ၊ ဝက်ကြီးအင်းအပါအဝင် ပုံဂံနဲ့ကပ်လျက်ကျေးရွာတွေထိ စစ်မှုထမ်းကြေးပေးဆောင်ရတယ်လို့ ဆိုပါတယ်။

“ဒီမှာက ပေါ်တာဆွဲစရာ လူငယ်တွေလည်းမရှိတော့ဘူး။ အိမ်ထောင်စုတခုကို ၃၀,၀၀၀ ပေးရတယ်။ လတိုင်းဆောင်နေတာ။ မြို့ပေါ်တွေမှာပေါ်တာမဆွဲဘူးလို့ သူတို့တာဝန်ယူပြီးသားလို့ပြောတယ်။ လုံးဝမဆွဲဘူးလို့လည်း ကြေညာတယ်။ အရင်ကတော့ မပေးရဘူး။ ခုပေးရတာဆို နှစ်လ ဒီလပါဆို သုံးလရှိပြီ”လို့ ပုဂံမြို့ခံတစ်ဦးက ပြောပါတယ်။

စစ်မှုထမ်းကြေးက အိမ်တိုင်းပေးနေရတာဖြစ်ပြီး ငွေကိုတော့ သက်ဆိုင်ရာ ရပ်ကွက်ကျေးရွာ အုပ်ချုပ်ရေးမှူးတွေက လကုန်တိုင်းကောက်ယူလေ့ရှိတယ်လို့ ဆိုပါတယ်။

စစ်မှုထမ်းကြေးပေးဆောင်ပြီးနောက်ပိုင်းမှာတော့ မြို့ပေါ်ရပ်ကွက်တွေမှာ စစ်မှုထမ်းအတွက် ပေါ်တာဆွဲတယ်ဆိုတဲ့ အသံတွေတော့ မကြားရတော့သလို လမ်းပိုင်းတွေပေါ်မှာ စစ်ဆေးမှုတွေလည်း နည်းသွားတယ်လို့ သိရပါတယ်။

စစ်မှုထမ်းကြေး မကောက်ခင်ကာလက စစ်တပ်နဲ့ပျုစောထီးအဖွဲ့တွေဟာ စစ်မှုထမ်းရဖို့ အလုပ်ရုံ၊ နေအိမ်နဲ့ လမ်းသွားလမ်းလာတွေပါမကျန် ပေါ်တာဆွဲဖမ်းဆီးနေတာကြောင့် မြို့ခံစစ်မှုထမ်း အသက်အရွယ်အကျုံးဝင်သူတွေဟာ ပြည်ပနိုင်ငံတွေကိုထွက်ပြေးတိမ်းရှောင်နေရတဲ့အထိဖြစ်နေတယ်လို့ သိရပါတယ်။

ဓါတ်ပုံ – စစ်ကောင်စီ

ညောင်ဦး၊ ဇူလိုင် ၁၆၊ ၂၀၂၆

မန္တလေးတိုင်း၊ ညောင်ဦးမြို့နဲ့ ပုဂံမြို့တွေမှာ စစ်မှုထမ်းပေါ်တာဆွဲတာတွေ များနေလို့ အမျိုးသားတွေ လုပ်ငန်းခွင်သွားလာဖို့တောင် အခက်ကြုံနေရတယ်လို့ မြို့ခံတွေထံက သိရပါတယ်။

ပြီးခဲ့တဲ့ ဇွန်လကစတင်ပြီး စစ်ကောင်စီနဲ့ ပျုစောထီးအဖွဲ့တွေဟာ စစ်မှုထမ်းအသက်အရွယ် အမျိုးသားတွေကို လုပ်ငန်းခွင်နဲ့ နေအိမ်တွေပေါ်အထိ လိုက်လံဖမ်းဆီး ပေါ်တာဆွဲနေသလို အိမ်စီးကားတွေနဲ့ မြို့ပတ်ပြီး လမ်းသွားလမ်းလာတွေကိုလည်း အတင်းအဓမ္မ ကားပေါ်ဆွဲတင်ပြီး ဖမ်းဆီးတာတွေ များလာတယ်လို့ ဒေသခံတွေက ပြောပါတယ်။

“ကျနော်အသိ ဝန်ထမ်းကောင်လေးဆို ပုဂံမြို့သစ် မိုးကုတ်ဝိပဿနာထိပ်မှာ ဆွဲခံရတယ်။ နောက်တယောက်ဆိုလည်း အိမ်ပေါ် အတင်းဝင်ဆွဲသွားတယ်။ အသိပန်းရံတဖွဲ့ဆို မြို့ထဲမှာ အုတ်တံတိုင်းခတ်နေချိန် ဆွဲခံရတာ။ တရက်ဆို အနည်းဆုံး နှစ်ယောက်၊ သုံးယောက်လောက်ပါတယ်။ အချို့ရက်ဆို အုပ်စုလိုက်ပါတယ်။”လို့ မြို့ခံတဦးက ပြောပါတယ်။

နယ်ခံတွေပေါ်တာဆွဲ ဖမ်းဆီးငွေညှစ်မှုတွေဟာ နေ့စဉ်နီးပါး ဖြစ်ပွါးနေပြီးတော့ တရက်ထက်တရက် အခြေအနေပိုမိုဆိုးရွားလာ​နေလို့ ငွေကြေးတတ်နိင်သူအချို့က သားသမီးတွေကို ပြည်ပနိုင်ငံနဲ့ ရန်ကုန်၊ မန္တလေးလို မြို့ကြီးတွေကို ပို့လိုက်တာများတာကြောင့် ငွေကြေးမတတ်နိုင်သူအချို့လောက်သာ ကျန်ရစ်တော့တယ်လို့ ဆိုပါတယ်။

“ပုဂံညောင်ဦးက ခရီးသွားကို မှီခိုပြီးရှာဖွေစားသောက်ရတာဆိုတော့ အခုလိုအခြေနေက စားဝတ်နေရေးကို အဆင်မပြေတော့ဘူး။ ကယ်ရီသမားတွေလည်း ထွက်မဆွဲရဲတော့ဘူး။ ရေသန့်ဘူးပို့တဲ့ လု​ပ်ငန်းတွေဆိုလည်း ယောင်္ကျားလေးတွေမရှိလို့ မိန်းကလေးတွေ ပို့နေရတယ်။ ပေါ်ပြူလာရေသန့်စက်ရုံကဆို အမျိုးသားတွေ အကုန်ဝင်ဆွဲခံရတာ ရှိတယ်။ အနည်းကျဥ်းပဲ ပြန်လွတ်တာ။”လို့ အထက်ပါအမျိုးသားက ဆက်ပြော​ပါတယ်။

စစ်မှုထမ်းပေါ်တာဆွဲတာ များလာလို့ ညောင်ဦးနဲ့ ပုဂံမြို့ပေါ်က အမျိုးသားတွေမှာ လုပ်ငန်းခွင်သွားလာဖို့ ခက်ခဲလာတာကြောင့် မိသားစုစားဝတ်နေရေး ကြပ်တည်းလာကြတယ်လို့ ဆို့ပါတယ်။

စစ်ကော်မရှင်ဘက်ကတော့ ပေါ်တာဆွဲရာမှာ ဘုရားဖူလာသူတွေကိုတော့ ဖမ်းဆီးတာမျိုးမရှိပဲ မြို့ခံတွေကိုသာ အဓိကထား ဖမ်းဆီးနေပြီး၊ ဖမ်းဆီးရမိသူတွေကိုလည်း ညောင်ဦးထွေအုပ်ရုံးမှာ တညထားပြီး ကျောက်ပန်တောင်း၊ မိတ္ထီလာဘက်ရှိ စစ်တပ်စခန်းတွေကိုပို့ပြီး စစ်သင်တန်းပေးတယ်လို့ ဆို​ပါတယ်။

ဖမ်းဆီးခံရသူတွေကို ပြန်ရွေးလိုပါက တဦးလျင် ကျပ်သိန်း ၂၀၀ မှ ၄၀၀ အထိတောင်းခံတာကြောင့် အများစုက ပြန်မရွေးနိင်ကြဘူးလို့ သိရပါတယ်။

ပုဂံညောင်ဦးမှာ ဇွန်လဆန်းမှ ဇူလိုင်လလယ်အထိ စစ်မှုထမ်းဖမ်းဆီးခံရသူ ၁၀၀ ကျော်ရှိနေပြီး အဲဒီအထဲမှာ မောင်မျိုးသက်ဝေ (ဇူလိုင်လ ၁၃ ရက်နေ့မှာချောင်းရိုးရပ်ကွက်၊ သူဌေးဂူဘုရားအနီး၊ ပန်းရံအလုပ်လုပ်နေစဉ် အိမ်စီးကားဖြင့် ဖမ်းဆီးခံရ)၊ မောင်စည်သူမောင် (ဇွန်လ ၄ ရက်နေ့မှာ ပဥ္စရူပ တည်းခိုခန်းအနီး၊ မိန်းလမ်းမပေါ် သွားလာနေစဉ် ဖမ်းဆီးခံရ)၊ မောင်​ပြည့်ဖြိုးမောင် (ခ) ကိုဖြိုး (ဇူလိုင်လ ၁၀ ရက်နေ့မှာ မဏိစည်သူစျေးကြီး၏ မြောက်ဖက်ရပ်ကွက်အတွင်းရှိ “ဗလီ“ အနီး ဖမ်းဆီးခေါ်ဆောင်ခံရ)နဲ့ မောင်ဟန်မင်းစိုး (ဇွန်လ ပထမအပတ်အတွင်း ပုဂံမြို့သစ်၊ မြို့အရှေ့ဘက် မိုးကုတ်ဝိပဿနာရိပ်သာရှေ့ ဖမ်းဆီးခေါ်ဆောင်ခံရ) တို့ ပါဝင်တယ်လို့သိရပါတယ်။

ညောင်ဦး၊ မေ ၂‌၉၊ ၂၀၂၆။

မန္တလေးတိုင်း၊ ညောင်ဦးမြို့နယ်၊ ငါ့သရောက်မြို့နယ်ထဲထိုးနေတဲ့ စစ်ကြောင်းကစစ်တပ်တပ်ဖွဲ့ဝင် ၁ ဦးကို လက်နက်ခဲယမ်းတွေနဲ့ အရှင်ဖမ်းမိခဲ့တယ်လို့ Earthquake People’s Defense Force က သတင်းထုတ်ပြန်ပါတယ်။

ဖမ်းဆီးခံရသူဟာ စစ်မှုထမ်းသင်တန်းအပတ်စဉ် ၁၆ ဆင်း တပ်သား မျိုးထက်ဇော် ဖြစ်ပြီး ရိက္ခာရှာထွက်လာစဥ် စစ်ကြောင်းနဲ့ကွဲထွက်လာပြီးနောက် တော်လှန်ရေးပူးပေါင်းတပ်ဖွဲ့တွေက ဖမ်းဆီးနိုင်ခဲ့တာလို့ ဆိုပါတယ်။

” ရိက္ခာရှာဖို့ထွက်လာတုန်း ကျွန်တော်တို့ ရှေ့တန်း‌ရဲဘော်တွေနဲ့ ထိပ်တိုက်တွေ့ပါဗျ။ တယောက်တည်း ကွဲထွက်လာတဲ့ပုံစံမျိုးပါဗျ။ ဖမ်းဆီးစဉ်မှာလည်း သူ့မှာပါတဲ့ ၆၀ မမ ဗုံးသီးကို စနက်တံဖြုတ်ပြီး ဒီတိုင်းလက်နဲ့လှမ်းပစ်တာပါ။ ရဲဘော်တွေဘက်လှမ်းထုတာမျိုးရှိတယ်ဗျ။ ကံကောင်းလို့ ဗုံးက ပေါက်တော့မသွားပါဘူး” လို့ Earthquake People’s Defense Force ရဲ့တာ၀န်ရှိသူက မြေလတ်အသံကိုပြောပါတယ်။

ဖမ်းဆီးရမိချိန်မှာ ၎င်းနဲ့အတူ MA1 သေနတ် ၁ လက်၊ ၅. ၅၆ မမ ကျည် ၁၀၀၊ ကျည်ဘောက် ၄ ခု၊ ၆၀ မမ ဗုံးသီး ၁ လုံးကိုလည်း သိမ်းဆည်းရရှိခဲ့တယ်လို့ ဆိုပါတယ်။

ဖမ်းဆီးမှုကို Earthquake People’s Defense Force၊ ပခုက္ကူခရိုင် Localတပ်ရင်း(PDLB)၊ 21Bagan-People Defense Force ၊ Bagan Garuda Force ၊ ဒေါင်းရင်သွေးပြောက်ကျားတပ်ဖွဲ့-DYTနဲ့ Badassess Burma Force တို့ကပူးပေါင်းလုပ်ဆောင်ခဲ့တာလို့ သိရပါတယ်။

” သူ့ရဲ့ပြစ်မှုတွေအပေါ်မူတည်ပြီး အရေးယူသင့်တာ အရေးယူသွားမှာပါဗျ။ စစ်သုံ့ပန်းတွေထားရှိတဲ့အတိုင်းပဲ ထားတာပါဗျ။ ကျနော်တို့ အဖွဲ့ဖွဲ့ပြီးကတည်းကဆိုရင် ၁၀ ယောက် (အရှင်ဖမ်းစီးရမိတဲ့စစ်သား)ဝန်းကျင်လောက် ရှိပြီဗျ။ သက်ဆိုင်ရာအဖွဲ့တွေကို လွှဲပေးလိုက်တာပါဗျ” လို့ အထက်ပါတာ၀န်ရှိသူက ပြောပါတယ်။

ပြီးခဲ့တဲ့ မေ ၂၄ ရက် မနက်ပိုင်းမှာ ငါ့သရောက်မြို့နယ်ထဲကို အင်အား ၃၀၀ ခန့်နဲ့ စစ်ကြောင်းထိုး၀င်ရောက်လာတဲ့ စစ်ကြောင်းတွေနဲ့ တော်လှန်ရေးတပ်ဖွဲ့တွေ ထိတွေ့တိုက်ပွဲ ၂ နာရီခန့်ဖြစ်ပွားခဲ့ပြီး ယခု ဖမ်းဆီးရမိခဲ့တဲ့ တပ်သား မျိုးဇော်ထက် ဟာ အဲ့ဒီစစ်တပ်စစ်ကြောင်းက ဖြစ်တယ်လို့ သိရပါတယ်။

ညောင်ဦး၊ နိုဝင်ဘာ ၃၀၊ ၂၀၂၅ ။

မန္တလေးတိုင်း၊ ညောင်ဦးမြို့၊ အမှတ် ၁ ရပ်ကွက်အုပ်ချုပ်ရေးမှူးနဲ့ဇနီးကို ဖမ်းဆီးထိန်းသိမ်းထားပြီး စစ်ဆေးနေတယ်လို့ ဖမ်းဆီးထားတဲ့ ညောင်ဦးအခြေစိုက် ဒေသကာကွယ်ရေးတပ်ဖွဲ့ရဲ့တာဝန်ရှိသူထံက သိရပါတယ်။

နိုဝင်ဘာလ ၂၇ ရက် နေ့လယ် ၁၂ နာရီခန့်မှာ အမှတ် ၁ ရပ်ကွက်၊ သီရိမင်္ဂလာရပ်နေ စစ်ကော်မရှင်လက်အောက် ညောင်ဦးမြို့ အမှတ် ၁ ရပ်ကွက်အုပ်ချုပ်ရေးမှူးဖြစ်တဲ့ အသက် ၄၀ နှစ်ဝန်းကျင်ရှိ ဦးဖိုးကျော် (ခ) ဦးထင်ကျော်ဝင်းနဲ့ ဇနီးဖြစ်သူ အသက် ၄၅ နှစ်အရွယ် ဒေါ်​ချောစုစုထွေးတို့ကို နေအိမ်မှာ ဝင်ရောက်ဖမ်းဆီးခဲ့တာလို့ ဆိုပါတယ်။

“လောလောဆယ် ဖမ်းဆီးထိန်းသိမ်းထားပြီး စစ်ဆေးနေဆဲပါ။ သူက စကစနဲ့ပူးပေါင်းပြီး ညောင်ဦးမြို့နယ်မှာ ပျုခေါင်းဆောင် အောင်ကျော်မြင့်ပြီးရင် အဆိုးဆုံး။ သူ့ပြစ်မှုတွေကတော့ အများကြီးပဲ။” လို့ ဖမ်းဆီးထားတဲ့ ဒေသကာကွယ်ရေးအဖွဲ့ရဲ့တာဝန်ခံက မြေလတ်အသံကို ပြောပါတယ်။

အဲ့ဒီအုပ်ချုပ်ရေးမှူးဟာ ညောင်ဦးမြို့နယ်နဲ့အနီးတဝိုက်မှာ စစ်မှုထမ်းအတွက် ပေါ်တာဆွဲဖမ်းဆီးတာမှာ စစ်ကော်မရှင်တပ်သားတွေနဲ့ပူးပေါင်းပြီး ဦးဆောင်ပါဝင်တာ၊ အိမ်ခြံမြေကွက်တွေကိုကျူးကျော်ဆိုပြီး ခြိမ်းခြောက်ငွေတောင်းတွေ လုပ်ဆောင်နေတာကြောင့် ဖမ်းဆီးစစ်ဆေးနေတာလို့ ဆိုပါတယ်။

စစ်ဆေးမှုပြီးဆုံးရင် သက်ဆိုင်ရာအဆင့်ဆင့်ကိုတင်ပြပြီး ထိရောက်စွာအရေးယူသွားမယ်လို့လည်း အထက်ပါတာဝန်ရှိသူထံက သိရပါတယ်။

ညောင်ဦးမြို့နယ်မှာ စစ်ကော်မရှင်လက်အောက်အုပ်ချုပ်ရေးမှူးတွေ မကြာခဏဆိုသလို ဖမ်းဆီးသတ်ဖြတ်ခံရမှုတွေရှိနေပြီး နိုဝင်ဘာ ၂၈ ရက်ကလည်း သစ်ထောင့်ကျေးရွာအုပ်ချုပ်ရေးမှူး ဦးမောင်သန်းဆိုသူ သေနတ်နဲ့ပစ်ခတ်ခံရပြီး သေဆုံးခဲ့တယ်လို့ သိရပါတယ်။

စာတည်း – ဟိန်းစံ

ညောင်ဦး၊ နိုဝင်ဘာ ၂၉၊ ၂၀၂၅။

မန္တလေးတိုင်း၊ ညောင်ဦးမြို့နယ်၊ ရွာသစ်ကုန်းကျေးရွာထိပ်မှာ အုပ်ချုပ်ရေးမှူးတဦးပစ်သတ်ခံရပြီး သေဆုံးသွားတယ်လို့ ပုဂံဘီလူးအဖွဲ့ဆီက သိရပါတယ်။

ပစ်သတ်ခံရသူက သစ်ထောင့်ကျေးရွာအုပ်ချုပ်ရေးမှူး အသက် ၆၅ နှစ်အရွယ် ဦးမောင်သန်း ဆိုသူဖြစ်ပြီး နိုဝင်ဘာ ၂၈ ရက် မနက် ၁၁ နာရီခန့်မှာ လက်ပံခြေပေါ်ကျေးရွာဘက်ကို ဆိုင်ကယ်နဲ့အသွား ပစ်ခတ်ရှင်းလင်းခဲ့တာလို့ ဆိုပါတယ်။

“ရွာသစ်ကုန်းတံတားနားလေးမှာ အကုန်လုံးပေါင်း ၆ ချက်ပစ်ခဲ့တာ။ အရင်အုပ်ကြီး ထွက်ပြေးသွားတော့ သူကတောင်ရွာ၊ မြောက်ရွာ နှစ်ရွာလုံးကိုအုပ်ချုပ်ပြီး စစ်မှုထမ်းကြေးကောက်ပြီး စစ်တပ်နဲ့ပေါင်းလုပ်စားနေတာ”လို့ ပုဂံဘီလူးအဖွဲ့တာဝန်ခံက ပြောပါတယ်။

၂၀၂၄ ခုနှစ်အတွင်း ယခင်သစ်တောင့်ရွာအုပ်ချုပ်ရေးမှူးက ရွာကထွက်ပြေးသွားပြီးနောက် ဦးမောင်သန်းက သစ်တောင့် တောင်ရွာရော မြောက်ရွာကိုပါအုပ်ချုပ်တဲ့ အုပ်ချုပ်ရေးမှူး ဖြစ်လာတာလို့ ဆိုပါတယ်။

သေနတ်နဲ့အနီးကပ်ပစ်ခံရလို့ အုပ်ချုပ်ရေးမှူး ဦးမောင်သန်းရဲ့ ပါးနဲ့ရင်ဘတ်မှာ ကျည်ထိဒဏ်ရာတွေနဲ့ နေရာမှာတင်သေဆုံးခဲ့ကာ ပစ်ခတ်မှုဖြစ်ပြီးနောက်မှာတော့ စစ်ကော်မရှင်အဖွဲ့တွေ လာရောက်စစ်ဆေးပြီး အလောင်းကိုကောက်ယူကာ ညောင်ဦးဆေးရုံကိုယူဆောင်သွားတယ်လို့ သိရပါတယ်။

အောက်တိုဘာ ၁၆ ရက်ကလည်း ညောင်ဦးမြို့နယ်၊ ထီးပုကျေးရွာမှာဘီယာဆိုင်ထိုင်နေတဲ့ အုပ်ကြီး ဦးသိန်းပို ပစ်ခတ်ခံရလို့သေဆုံးသွားတယ်လို့ သိရပါတယ်။

စာတည်း – လင်း

ညောင်ဦး၊ အောက်တိုဘာ ၁၇၊ ၂၀၂၅။

မန္တလေးတိုင်း၊ ညောင်ဦးမြို့နယ်၊ ထီးပုကျေးရွာမှာ ဘီယာဆိုင်ထိုင်နေတဲ့ အုပ်ချုပ်ရေးမှူး ပစ်ခတ်ခံရပြီးသေဆုံးသွားတယ်လို့ ဒေသကာကွယ်ရေးအဖွဲ့ဝင်တွေဆီက သိရပါတယ်။

ပစ်ခတ်ခံရသူဟာ အသက် ၅၀ ကျော်အရွယ်ရှိ ဦးသိန်းပိုဆိုသူဖြစ်ပြီး အောက်တိုဘာ ၁၆ ရက် ညနေ ၄ နာရီခန့်မှာ ကျေးရွာအတွင်းက ဘီယာဆိုင်မှာရှိနေချိန်ပစ်ခတ်ခံရကာ ခေါင်းကိုကျည်ထိမှန်သေဆုံးခဲ့တာလို့ ဆိုပါတယ်။

“ဘီယာဆိုင်မှာဖြစ်တာ။ ဆိုင်မှာတော့ လူများတယ်။ သူ့အဖော် နောက်လိုက်တယောက်ပါတယ်။ သူ့အဖော်တော့ လွတ်သွားတယ်။ အုပ်ကြီးက အပြင်ပြေးထွက်ချိန်မှာ ပစ်ခံရတာ”လို့ ဒေသကာကွယ်ရေးအဖွဲ့ဝင်တဦးက ပြောပါတယ်။

ဦးသိန်းပိုမှာ ပြည်သူစစ်မှုထမ်းဖမ်းဆီးတာ၊ ငွေကောက်ခံရာတွေမှာပါဝင်ပြီး PDF အဖွဲ့တွေက လိုက်ရှာနေတယ်ဆိုတဲ့ သတင်းကြောင့် ကျေးရွာကနေထွက်ပြေးပြီး မြို့မှာတိမ်းရှောင်နေထိုင်နေကာ ရွာပြန်ရောက်တာလပိုင်းသာရှိသေးတယ်လို့ သိရပါတယ်။

အဆိုပါပစ်ခတ်မှုကိုတော့ ဘယ်အဖွဲ့အစည်းက ပြုလုပ်တယ်ဆိုတာ သတင်းထုတ်ပြန်တာမရှိသေးဘဲ ပစ်ခတ်မှုဖြစ်ပြီးနောက်ပိုင်း စစ်ကော်မရှင်အဖွဲ့တွေလာရောက်စစ်ဆေးကာ အလောင်းကို ညောင်ဦးဆေးရုံကို သယ်သွားတယ်လို့ သိရပါတယ်။

ဇူလိုင် ၃၁ ရက်ကလည်း ညောင်ဦးမြို့နယ်၊ ငါးသရောက်မြို့၊ ဆည်ရွာနေ မူလတန်းပြဆရာမ ၁ ဦးဟာ စစ်ကောင်စီသတင်းပေးဒလန်လုပ်နေတယ်ဆိုပြီး ပစ်သတ်ခံရလို့ သေဆုံးသွားခဲ့တယ်လို့ သိရပါတယ်။

စာတည်း – လင်း

ညောင်ဦး၊ ဩဂုတ် ၂၄၊ ၂၀၂၅။

မန္တလေးတိုင်း၊ ညောင်ဦးမြို့နယ်၊ ကျောက်ပြင်ကန်ကျေးရွာမှာ လေကြောင်းကနေ ဗုံးကြဲပစ်ခတ်ခံရလို့ ကလေးငယ် ၁ ဦးအပါအဝင် ၂ ဦးသေဆုံးပြီး ၃ ဦးဒဏ်ရာရတယ်လို့ Black Eagle PDF-Bagan အဖွဲ့ဆီကသိရပါတယ်။

ဩဂုတ် ၂၃ ရက် မနေ့ညနေ ၃ နာရီ မိနစ် ၄၀ ခန့်မှာ စစ်ကော်မရှင်တပ်က Mi-35 ၃ စီးနဲ့ ပေါင် ၂၅၀ ဗုံးသီး ၂ လုံးကြဲချပြီး ပွိုင့်ဖိုက်တွေနဲ့ပစ်ခတ်သွားတာလို့ ဆိုပါတယ်။

“ဘုရားပျက်စီးတယ်။ ဘုရားတစောင်းပျက်စီးတယ်။ ရွာထဲက ကလေးငယ် ၁ ယောက်ထိတယ်။ လေယာဥ်သံကြားလို့ ပြေးနေတဲ့အချိန် ရဲဘော်က ဖြတ်သန်းသွားလာရင်း ကြဲတဲ့အချိန်လေယာဥ်သံကြားလို့ ရှုပ်နေတဲ့အချိန် ဖြတ်သန်းသွားလာရင်းထိတာ။ ကလေးက ဘုရားတစောင်းထဲမှာ ရှိနေတယ်။”လို့ Black Eagle PDF-Bagan တာဝန်ခံကပြောပါတယ်။

ကျောက်ပြင်ကန်ရွာကို ဗုံးကြဲပစ်ခတ်ကြဲချိန် ကျေးရွာအနီးမှာ တိုက်ပွဲဖြစ်တာမရှိဘဲ ဒီတိုက်ခိုက်မှုကြောင့် အသက် ၁၀ အရွယ် မောင်ထိန်လင်းအောင်နဲ့ Black Eagle PDF-Bagan အဖွဲ့ဝင် အသက် ၂၃ နှစ်အရွယ် ငဟိန်း ဆိုသူတို့ နေရာမှာတင်သေဆုံးခဲ့တယ်လို့ ဆိုပါတယ်။

ဒါ့အပြင် အသက် ၃၀ အရွယ် အမျိုးသား ၁ ဦးနဲ့ အသက် ၄၀ အရွယ် အမျိုးသမီး ၂ ဦးတို့ ဒဏ်ရာရသွားပြီး နီးစပ်ရာဆေးခန်းမှာ ဆေးကုသနေရသလို ဘုရားနဲ့ ဘုရားတစောင်း၊ နေအိမ် ၅ လုံးပျက်စီးသွားတယ်လို့ ဆိုပါတယ်။

ခုလိုတိုက်ခိုက်ခဲ့တာကြောင့် အိမ်ခြေ ၄၀၀ ကျော်ရှိတဲ့ ကျောက်ပြင်ကန်၊ စက၊ ဂျိုးကန်၊ ကံနီပေါက်ကျေးရွာတွေက ဒေသခံ ၅,၀၀၀ ကျော်လောက်ဘေးလွတ်ရာကိုတိမ်းရှောင်နေကြရတယ်လို့ သိရပါတယ်။

ဇူလိုင် ၂၈ ရက်ကလည်း ညောင်ဦးမြို့နယ်၊ ဂန့်ဂါကျေးရွာနဲ့ကျောက်ကန်ကျေးရွာကြားမှာ စစ်ကြောင်းကင်းထောက်သွားတဲ့ PDA တပ်ဖွဲ့ဝင် ၂ ဦးပစ်ခတ်ခံရလို့ သေဆုံးသွားတယ်လို့ သိရပါတယ်။

စာတည်း – လင်း