စစ်ကောင်စီ

မကွေး၊ ဇန်နဝါရီ ၂၆၊ ၂၀၂၃။

မကွေးတိုင်းဒေသကြီး၊ ရေစကြိုမြို့နယ်မှာ စစ်ကောင်စီကရွေးကောက်ပွဲပြုလုပ်ဖို့ အိမ်ထောင်စုစာရင်းကောက်ယူနေပေမယ့် ကျေးရွာအများစုမှာ ​ကောက်ယူနိုင်တာမရှိသေးဘူးလို့ သိရပါတယ်။

ရေစကြိုမြို့နယ်ထဲက ကျေးရွာ ၇၅ ရာခိုင်နှုန်းကျော်ကို PDF ဘက်က နယ်မြေစိုးမိုးထားပြီး စစ်ကောင်စီခန့် အုပ်ချုပ်ရေးအဖွဲ့တွေမရှိတာကြောင့် ယနေ့အချိန်ထိအိမ်ထောင်စုစာရင်းလာကောက်ယူတာမရှိသေးဘူးလို့ ရေစကြိုမြို့နယ် ပကဖ တာဝန်ရှိသူကပြောပါတယ်။

“လက်ရှိအခြေနေပြောရရင် မြို့ပေါ်ရပ်ကွက်မှာတောင် အုပ်ချုပ်ရေးမှူးမရှိတဲ့ ရပ်ကွက်ရှိတယ်။ ရွာတွေမှာဆိုလဲ ပျူစောထီးရွာအနည်းငယ်လောက်ဘဲရှိတယ်။ သူတို့စိုးမိုးထားတဲ့ မြို့ပေါ်နဲ့ရွာအနည်းငယ်မှာသာ အိမ်ထောင်စုစာရင်းကောက်ယူနေတာရှိတယ်။ ဒါတောင်သူတို့အင်အား အပြည့်မရှိလို့ နေရာတိုင်းကို ပေါ်ပေါ်ထင်ထင်မသွားနိုင်ဘူး။ ကျန်ရွာတွေဘက်မှာတော့ ခုထိဘာအသံမှ မကြားသေးဘူး။”လို့ ပြောပါတယ်။

စစ်ကောင်စီဘက်က ရွေးကောက်ပွဲကိုမဖြစ်မနေလုပ်ဆောင်လာပါက ရတဲ့နည်းလမ်းကို အသုံးပြုပြီး တားဆီးသွားမှာဖြစ်တယ်လို့ ဆိုပါတယ်။

စစ်ကောင်စီဘက်က ရေစကြိုမြို့နယ်ထဲမှာ နယ်မြေအကုန် အိမ်ထောင်စုစာရင်းကောက်ယူနိုင်ခြင်းမရှိတာက စာရင်းကောက်မယ့်အဖွဲ့တွေကို လုံခြုံရေးအပြည့်အဝမပေးနိုင်တဲ့အပြင် ပြည်သူအများစုက စစ်ကောင်စီလုပ်မယ့်ရွေးကောက်ပွဲကို မထောက်ခံတာကြောင့်ဖြစ်တယ်လို့ ဆိုပါတယ်။

စစ်ကောင်စီဘက်က ရွေးကောက်ပွဲအတွက် အိမ်ထောင်စုစာရင်းကောက်ယူရာမှာ ၃ ပတ်ကျော်ကြာမြင့်လာပေမယ့် မြို့ပေါ်ရပ်ကွက်နဲ့အနီးအနား ပျူကျေးရွာအနည်းငယ်သာ ကောက်ယူနိုင်သေးတယ်လို့ သိရပါတယ်။

ရေစကြိုမြို့နယ်ထဲမှာ မြို့ပေါ်ရပ်ကွက် ၈ ရပ်ကွက်၊ ကျေးရွာအုပ်စု ၈၁ စု၊ ကျေးရွာပေါင်း၂၄၅ ရွာရှိပြီး လူဦးရေ ၃ သိန်းကျော်ရှိတယ်လို့ သိရပါတယ်။

စစ်ကိုင်း၊ ဇန်နဝါရီ ၂၆၊ ၂၀၂၃။

စစ်ကိုင်းတိုင်း၊ အင်းတော်မြို့နယ်၊ အောင်မင်္ဂလာရပ်ကွက်မှာရှိတဲ့ ဒေါ်သစ်ဆုံစားသောက်ဆိုင်က ပိုင်ရှင်လင်မယားကို PDF တွေနဲ့ ဆက်နွယ်နေတယ်ဆိုပြီး စစ်ကောင်စီက လာရောက်ဖမ်းဆီးသွားတယ်လို့ ဆိုပါတယ်။

ဇန်နဝါရီလ ၂‌၄ ရက်နေ့ မနက် ၉ နာရီလောက်က ဒေါ်သစ်ဆုံစားသောက်ဆိုင်မှာ ထမင်းဝယ်နေတဲ့ ဒလန်တဦးကို လက်နက်ကိုင်အဖွဲ့အစည်းတခုက ဝင်ရောက်ဖမ်းဆီးပြီး ခဏအကြာစစ်ကောင်စီဘက်ကရောက်လာကာ ဆိုင်ရှင်လင်မယားကို ဖမ်းသွားတာဖြစ်တယ်လို့ ဆိုပါတယ်။

“သူက(ဒလန်) မြို့နယ်မှူးအတွက် ထမင်းဝယ်ပြီးထမင်းဆိုင်ကအထွက်ကို လက်နက်ကိုင်အဖွဲ့စည်းကဖမ်းတာ၊ အဲ့နောက်မှာ စစ်ကောင်စီလက်အောက်ခံ ရဲတပ်ဖွဲ့တွေက ဆိုင်ကိုလာသောင်းကျန်းပြီး အဲ့ဆိုင်က လင်မယားကိုဖမ်းသွားတာ။” လို့ မျက်မြင်တွေ့ခဲ့တဲ့ ပြည်သူတဦးက ပြောပါတယ်။

အခုလက်ရှိ ဒေါ်သစ်ဆုံစားသောက်ဆိုင်ပိုင်ရှင် ဦးမြဝင်းနဲ့ ဇနီးဖြစ်သူ ဒေါ်သစ်ဆုံတို့ကို အင်းတော်ရဲစခန်းထဲမှာဖမ်းထားကာ PDF နဲ့ဆက်နွယ်တယ်ဆိုပြီး စွဲချက်တင်ဖို့လုပ်နေတယ်လို့ သိရပါတယ်။

ပြီးခဲ့တဲ့ ဇန်နဝါရီလ ၂၃ ရက်နေ့ မနက် ၇ နာရီလောက်ကလည်း အောင်မေတ္တာရပ်ကွက်မှာရှိတဲ့ သားချောစာရေးကိရိယာဆိုင်ပိုင်ရှင် ဦးချစ်ကိုကို(ခ)ဦးဖိုးစီကို NUG စာသင်ကျောင်းတွေကို စာရေးကိရိယာတွေလှူတန်းတယ်ဆိုပြီး ဖမ်းဆီးခဲ့ပါသေးတယ်။

မကွေး၊ ဇန်နဝါရီ ၂၅၊ ၂၀၂၃။

မကွေးတိုင်း၊ ပေါက်မြို့နယ်တောင်ပိုင်းက ဇင်းရွေးဂုံရွာနဲ့ ကျားပစ်ကန်ရွာကို စစ်ကောင်စီတပ်သားတွေက ဇန်နဝါရီလ ၂၅ ရက်တရက်တည်းမှာတင် စစ်ကြောင်းထိုးမီးရှို့ခဲ့တယ်လို့ သိရပါတယ်။

တပ်မ ၁၀၁နဲ့ ကပစ ၂၄ ကစစ်သားတွေပါဝင် အင်အား ၁၀၀ ဝန်းကျင်ရှိစစ်ကြောင်းဟာ ဒီနေ့လည် ၂ နာရီလောက်မှာ ဇင်းရွေးဂုံရွာကိုမီးရှို့ခဲ့ပြီးနောက် နေ့လည် ၃ နာရီကျော်လောက်မှာတော့ တမိုင်သာသာဝေးတဲ့ ကျားပစ်ကန်ရွာကို ထပ်မံမီးရှို့ခဲ့တာလို့ ပေါက်ဒေသခံတဦးက ပြောပါတယ်။

“ အခုချိန်ထိတော့ စခ တွေက ကျားပစ်ကန်ရွာထဲမှာ ရှိနေတုန်းပဲ။ အဲဒီရွာတွေက တရွာနဲ့တရွာ တမိုင်လောက်ပဲ ဝေးတယ်။ နေအိမ်ဘယ်လောက် မီးထဲပါသွားလဲဆိုတာတော့ မသိရသေးဘူး။ စစ်ကြောင်းနဲ့နီးတော့ ရွာနားကို ကပ်လို့မရဲဘူး” လို့ ပြောပါတယ်။

ခုလိုမီးရှို့တဲ့စစ်အုပ်စုထဲမှာ ဒီးဒုတ်ကွင်းကျေးရွာနဲ့ တပ်ကုန်းရွာက ပျူစောထီးတွေပါဝင်ပြီး လက်ရှိအချိန်ထိ မီးရှို့ခံရွာတွေအနီးမှာ စစ်ကောင်စီတပ်သားတွေရှိနေသေးတာကြောင့် အိမ်ခြေပျက်စီးမှုအခြေအနေကိုတော့ အတည်မပြုနိုင်သေးဘူးလို့ အထက်ပါဒေသခံက ဆိုပါတယ်။

ဒါ့အပြင် အဲ့ဒီစစ်ကြောင်းဟာ ဇန်နဝါရီလအတွင်း ဒါသီးခြောက်၊ ပြစ်တဲ၊ တဲတော်ယာတောင်စု၊ ပြည်သာရာနဲ့ စမ်းရေခုံရွာတွေအပါအဝင် ကျေးရွာ ၁၀ ရွာကျော်လောက်ကိုလည်း စစ်ကြောင်းထိုးမီးရှို့ခဲ့တယ်လို့ သိရပါတယ်။

စစ်တပ်ကအာဏာသိမ်းပြီးချိန်ကစလို့ လက်ရှိအချိန်ထိ ပေါက်မြို့နယ်တောင်ပိုင်းမှာမီးရှို့ခံရတဲ့ ရွာပေါင်း ၄၀ နီးပါးခန့်ရှိပြီး ဒေသခံ ၂ သောင်းခွဲကျော်လောက်လည်း နေရပ်စွန့်ခွာထွက်ပြေးနေကြရပါတယ်။

စစ်ကိုင်း၊ ဇန်နဝါရီ ၂၅၊ ၂၀၂၃။

စစ်ကိုင်းတိုင်း၊ ဝက်လက်မြို့နယ်၊ ပင်းဇင်းကျေးရွာကို စစ်ကောင်စီတပ်သားတွေက ဇန်နဝါရီ၂၄ ရက် မနေ့က မနက်ပိုင်းအချိန်ကနေ ညအချိန်အထိ မီးရှို့တဲ့အပြင် လူငယ်၃ဦးကိုပါ သတ်သွားခဲ့တယ်လို့ သိရပါတယ်။

စစ်ကောင်စီတပ်သားတွေ မီးရှို့ခဲ့တာကြောင့် အိမ်ခြေ၇၀၀ခန့်ရှိတဲ့ ပင်းဇင်းကျေးရွာမှာ နေအိမ်၆၀၀ခန့်ပြာကျ ပျက်စီးသွားခဲ့သလို အသတ်ခံလိုက်ရတဲ့ လူငယ်၃ဦးရဲ့ကိုယ်ရေးအကျဥ်းကို မသိရှိရသေးဘူးလို့ မြေပြင်ကင်းထောက်တဦးက ပြောပါတယ်။

“စကစတွေက ကောက်ရိုးနဲ့ ဓာတ်ဆီနဲ့လောင်းပြီးတော့ ရှို့တာ။ မနက်ကတည်းကနေ ညလုံး ပေါက်ရှို့တာ။ စကစတွေက ရွာထဲမှာညအိပ်ပြီးတော့ မနက်အချိန်မှထွက်သွားတယ်။လူငယ် သုံးယောက်ကိုလည်း မီးရှို့ထားတဲ့အလောင်းပဲ တွေ့ရတယ်။ဒီလူငယ်တွေက ဘယ်လိုအသတ်ခံလိုက်ရတယ်ဆိုတာတော့ မသိရဘူး”လို့ ဆိုပါတယ်။

ဒါ့အပြင် စစ်ကောင်စီတပ်သားတွေက ပင်းဇင်း ကျေးရွာကနေ မနက်ပိုင်းအချိန်ထွက်သွားပြီး မူးကြီးကျေးရွာကို မီးထပ်ရှို့နေတယ်လို့ဆိုပါတယ်။

“မူးကြီးရွာကို မီးရှို့တဲ့အချိန်မှာဘဲ PDFတွေနဲ့ တိုက်ပွဲဖြစ်နေကြတယ်။ အခုအချိန်မှာတော့ တိုက်ပွဲကငြိမ်သွားပြီ။ အခုလည်း စစ်ကြောင်းက မထွက်သေးဘူး”လို့ ကင်းထောက်ကပဲ ဆက်ပြောပါတယ်။

အလားတူ အဲ့ဒီ စစ်ကြောင်းမှာ ဇန်နဝါရီ၂၃ ရက်ကလည်း မကျီးတုံကျေးရွာကို မီးရှို့ဖျက်စီးခဲ့ပြီး ဒီစစ်ကြောင်းဟာ အင်အား၁၀၀ခန့်ရှိပြီး ရွှေဘိုမြို့နယ်ဘက်က ရောက်ရှိလာခဲ့တာဖြစ် တယ်လို့သိရပါတယ်။

စစ်ကောင်စီက အခုလို တရွာဝင်တရွာထွက်မီးရှို့နေတာကြောင့် မူးကြီး၊ ဝက်လက်၊ မကျီးတုံ၊ပင်းဇင်း၊ လှတော၊ ရွှေကျင်၊ ကျီးကံ၊ ရေထွက် ၊ဥယျာဥ်မစတဲ့ကျေးရွာတွေက ဒေသခံတွေအကုန်လုံး ထွက်ပြေးတိမ်းရှောင်နေကြရတယ်လို့သိရပါတယ်။

မန္တလေး၊ ဇန်နဝါရီ ၂၅၊ ၂၀၂၃။

မန္တလေးတိုင်း၊ မြို့သာမြို့ကနေ ငါန်းဇွန်မြို့ဘက်ကို အင်အားလာဖြည့်တဲ့ စစ်ကောင်စီတပ်သားတွေ ဇန်နဝါရီလ ၂၄ ရက်မနေ့ကမနက် ၁၀ နာရီလောက်မှာ မိုင်းဆွဲတိုက်ခိုက်ခံရပြီး စစ်သား ၃ ဦးသေဆုံးခဲ့တယ်လို့ သိရပါတယ်။

ဆိုင်ကယ် ၃ စီး၊ ကား ၁ စီးနဲ့လာတဲ့ စစ်သားအင်အား ၁၇ ဦးလောက်ကို ငါန်းဇွန်မြို့နယ်၊ တောင်လယ်တောရွာနဲ့ ရွာသာရွာအကြားမှာ မဟာမိတ်တပ်တွေက မိုင်း ၆ လုံးဆွဲတိုက်ခိုက်ခဲ့တာလို့ ဇာမဏီပြောက်ကျားတပ်ဖွဲ့တာဝန်ခံက ပြောပါတယ်။

“သူတို့အင်အားလာဖြည့်တဲ့ ထောက်ပို့ဆိုင်ကယ် ၃ စီးနဲ့ ကား ၁ စီး ကို မိုင်းဆွဲလိုက်တာ။ မနေ့ကပွဲချင်းပြီး အဲဒီအနားမှာ သေဆုံး ၃ ယောက်နဲ့ ကျန်တဲ့သူတွေက အသက်လုနေရတယ်။ ဒဏ်ရာရတဲ့သူတွေလည်း ရှိသေးတယ်။ မြို့သာမှာ အထိုင်ချနေတဲ့တပ်က စစ်သားတွေပါ။ မိုင်းဆွဲခံရပြီး မြို့သာဘက်ကိုပြန်သွားတယ်” လို့ ဆက်ပြောပါတယ်။

ဒီတိုက်ခိုက်မှုကို ဇာမဏီပြောက်ကျားတပ်ဖွဲ့(ငါန်းဇွန်)နဲ့ MN PDF Myitnge. မန္တလေးခရိုင်အမှတ် ၅ တပ်ရင်းတို့က ပူးပေါင်းလုပ်ဆောင်ခဲ့တယ်လို့လည်း ဆိုပါတယ်။

ပြီးခဲ့တဲ့ဇန်နဝါရီလ ၁၇ ရက်ကလည်း ငါန်းဇွန်မြို့နယ်၊ ဂျပန်ကျွန်းကနေအိမ်တွေကို မီးရှို့ပြီးထွက်လာတဲ့ စစ်ကောင်စီတပ်သားတွေကို သာကျင်းရွာနဲ့နတ်ကြီးရွာအကြားမှာ ဒေသခံမဟာမိတ်အဖွဲ့တွေက မိုင်းဆွဲတိုက်ခိုက်ခဲ့ရာ စစ်သား ၂၀ ထိခိုက်ဒဏ်ရာရခဲ့တယ်လို့ သိရပါတယ်။

စစ်ကိုင်း၊ ဇန်နဝါရီ ၂၅၊ ၂၀၂၃။

စစ်ကိုင်းတိုင်း၊ ကန့်ဘလူနယ်အခြေစိုက် ကန့်ဘလူ လင်းယုန်နီအဖွဲ့ဟာ တနှစ်ကျော်ကြာသည်အထိ လက်လုပ်သေနတ်တွေနဲ့သာ စစ်ကောင်စီတပ်တွေကိုတိုက်ခိုက်နေရတယ်လို့ တပ်ဖွဲ့တာဝန်ရှိသူက ပြောပါတယ်။

ပြီးခဲ့တဲ့နှစ်နိုဝင်ဘာလ ၆ ရက်မှာ ကန့်ဘလူမြို့နယ်၊ လွှဲဆိပ်ကျေးရွာက မိုင်တဲတာဝါတိုင်ကို မိုင်းဆွဲတိုက်ခိုက်ခဲ့တာနဲ့ စတင်ခဲ့တာလို့သိရပါတယ်။

“ဆန္ဒပြပွဲတွေ ရပ်နားပြီးကတည်းက လက်နက်ကိုင်တော်လှန်ရေးကို စတင်ခဲ့တာပါ။ အခုအချိန်အထိတော့ လက်လုပ်တတောင့်ထိုး၊ လက်နက်ကြီးမိုင်းတွေနဲ့သာ တိုက်ပွဲဝင်ခဲ့တာပါ။ မောင်းပြန်အစစ်သာရရင်တော့ ဒီထက်ပိုပြီး တိုက်ပွဲတွေဖော်ဆောင်နိုင်မှာဖြစ်တယ်လို့” လင်းယုန်နီကန့်ဘလူအဖွဲ့မှ ဗိုလ်လင်းယုန်ကပြောပါတယ်။

ပြည်သူလူထုရဲ့လှူဒါန်းမှုနဲ့ ရပ်တည်လာတာဖြစ်ပြီး၊ ဒီထက်ပိုပြီး အဖွဲ့အစည်းတခုခုက အကူအညီရပါက စစ်ဆင်ရေးတွေကို ပိုပြီးလုပ်နိုင်မှာဖြစ်တယ်လို့ သူကဆက်ပြောပါတယ်။

သူတို့အဖွဲ့ဟာ လက်နက်တွေမိုင်းတွေကို ကိုယ်တိုင်ထုတ်လုပ်ခဲ့တာဖြစ်ပြီး အဓိကအားဖြင့်မိုင်းတွေနဲ့သာ တိုက်ပွဲဖော်ဆောင်နေတာလို့ သိရပါတယ်။
ဒါ့အပြင် စတင်ဖွဲ့စည်းချိန်ကတည်းက အခုအချိန်ထိ ဆယ်နဲ့ချီတဲ့စစ်ဆင်ရေးတွေကိုလုပ်ခဲ့ပြီး၊ အခုနှစ်ဇန်နဝါရီလ ၁ ရက်ကနေ ၂၃ ရက်အတွင်းမှာလည်း စစ်တပ်ကြံစိုက်ခင်း ကွင်းအမှတ် − ၉ က စစ်ဆေးရေးဂိတ်နဲ့ ကန့်ဘလူမြို့နယ်က ပျူစောထီးအများစုနေထိုင်တဲ့ ယောရွာ၊ ငါတို့ရွာ၊ ဇာဒီရွာ၊ ချောင်းကန်ရွာ၊ နတ်အင်းရွာ၊ ညောင်းကိုင်းရွာ၊ စပါယ်နံ့သာရွာနဲ့ ညောင်ဇင်လေးရွာတို့ကို စုစုပေါင်း ၁၀ ကြိမ်တိုက်ခိုက်ခဲ့တယ်လို့ သိရပါတယ်။