စစ်ကောင်စီ

မတ္တရာ၊ ဇန်နဝါရီ ၂၄၊ ၂၀၂၃။

မတ္တရာမြို့နယ်မှာ လူဦးရေစာရင်းလိုက်ကောက်နေတဲ့အဖွဲ့နဲ့ စစ်ကောင်စီတပ်ဖွဲ့ဝင်တွေကို ဇန်နဝါရီလ ၂၃ ရက်က ဒရုန်းအသုံးပြုကာ ဗုံးကြဲတိုက်ခိုက်ခဲ့တယ်လို့ Unicorn ပြောက်ကျားတပ်ဖွဲ့ ဆီက သိရပါတယ်။

မတ္တရာမြို့နယ်၊ ဟင်္သာကုန်းကျေးရွာမှာ မနေ့ကမနက် ၁၁ နာရီလောက်က လူဦးရေစာရင်းလိုက်ကောက်နေချိန်မှာ ဒရုန်း ၄ စီးနဲ့ ဗုံးသီးချတိုက်ခိုက်ခဲ့တာလို့ ဆိုပါတယ်။

“ပြည်သူတွေသတင်းပေးလို့ သွားရောက်တိုက်ခိုက်ခဲ့တာပါ စစ်ကောင်စီတပ်ဖွဲ့ဝင် ၂၀ လောက်နဲ့ကျန်တာ လဝကဖြစ်မယ် ဘယ်အဖွဲ့တွေလည်းတော့ မသိရဘူး သူတို့လာတိုင်းအဲဒီဘုန်းကြီးကျောင်းကိုလာတယ် ဘုန်းကြီးကကျောင်းမှာမနေတော့ဘူး”လို့ Unicorn ပြောက်ကျားတပ်ဖွဲ့ဝင်တဦးက ပြောပါတယ်။

ဒရုန်း၄စီးနဲ့ ဗုံး ၇ လုံးကြဲခဲ့ရာမှာ ၅ လုံးပေါက်ကွဲခဲ့ပြီး ထိခိုက်မှုအသေးစိတ်ကို မသိရပေမယ့် မဟာမိတ်တပ်ဖွဲ့တွေ ထိခိုက်မှုမရှိ ဆုတ်ခွာနိုင်ခဲ့တယ်လို့ သူကဆက်ပြောပါတယ်။

အဲဒီစစ်ဆင်မှုမှာ ဗိုလ်ကောင်းကင်၏ တော်လှန်ရေးအင်အားစု၊ ADRF (Madaya)၊ SKY HERO (Madaya)၊ A B R F – Madaya၊ ဒေါင်းစစ်သည် (Madaya)၊ နတ်ဆိုး‌မြေအောက်တော်လှန်ရေးတပ်ဖွဲ့၊Unicorn Guerrilla Force တို့ပူးပေါင်းခဲ့ကြတာလို့ သိရပါတယ်။

ပြီးခဲ့တဲ့ဇန်နဝါရီလ ၁၂ ရက်ကလည်း Unicorn ပြောက်ကျားတပ်ဖွဲ့ဟာ မတ္တရာမြို့နယ် သုံးဆယ်ပေးကျေးရွာမှာ တပ်ဆွဲထားတဲ့စစ်တပ်က စစ်ရှောင်နေတဲ့ဇီးကျွန်းကျေးရွာကပြည်သူ့နေအိမ်ကပစ္စည်းတွေကို ဝင်ရောက်ယူငင်နေတာကြောင့်ဒရုန်းနဲ့ဗုံးသီးချကာတိုက်ခိုက်ခဲ့ပါသေးတယ်။

စစ်ကိုင်း၊ ဇန်နဝါရီ ၂၄၊ ၂၀၂၃။

စစ်ကိုင်းတိုင်း၊ ယင်းမာပင်မြို့နယ်က ကျေးရွာ ၅ ရွာကို စစ်ကောင်စီတပ်သားတွေက ဇန်နဝါရီလ ၂၃ ရက်မနေ့ကနေ့လယ်ပိုင်းမှာ ဆက်တိုက်မီးရှို့ခဲ့တဲ့အပြင် ရွာသားတဦးကိုလည်း သတ်သွားတယ်လို့ သိရပါတယ်။

ကျောက်မှော်ရွာ၊ ကျောက်ကုန်းရွာ၊ အင်းဖက်ရွာ၊ ကြက်လျှာနဲ့ ပန်းတိမ်ပြင်ရွာတွေက နေအိမ်တွေကို မီးရှို့ခဲ့တာဖြစ်ပြီး သံပရာပင်ရိုးတဲတိုက်က အသက် ၃၀ နှစ်အရွယ် ကိုနေထွန်းဆိုသူကိုပါ သတ်ပြီး ဦးခေါင်းနဲ့လက်တဖက်ကို ဖြတ်သွားတယ်လို့ ယင်းမာပင်မြောက်ခြမ်းသပိတ်အင်အားစုမှ တာဝန်ရှိသူတဦးက ပြောပါတယ်။

“ကိုနေထွန်းကို ဇန်နဝါရီ ၂၃ ရက်မနေ့က သတ်သွားတာပါ။ အလောင်းကိုတော့ အင်ဖျားရွာမှာ တွေ့တာ။ ဒီနေ့ပဲ သဂြိုဟ်ပြီးပါပြီ။ မီးလောင်တဲ့အိမ်ခြေစာရင်းတော့ မသိရသေးဘူး။ ရွာသားတွေလည်း ရွာထဲအကုန်မဝင်ကြသေးဘူး” လို့ ပြောပါတယ်။

ဒါ့အပြင် အင်းဖျားရွာက အမျိုးသား ၂ ဦးနဲ့ စုန်းချောင်းရွာက အမျိုးသား ၂ ဦးကိုလည်း ဖမ်းဆီး ခေါ်ဆောင်သွားတယ်လို့ သူကဆက်ပြောပါတယ်။

အဲဒီစစ်အုပ်စုဟာ ဇန်နဝါရီလ ၁၉ ရက်ကတည်းက ချင်းတွင်းမြစ်ကြောင်းတလျှောက်စုန်ဆင်းလာကာ ကျောက်မှော်ရွာမှာ ၄ ရက်ကြာ တပ်စွဲခဲ့တာဖြစ်ပြီး၊ လက်ရှိမှာ စစ်ကြောင်းဘယ်ကို ဦးတည်နေတယ်ဆိုတာ မသိရှိရသေးပဲ မြစ်ကမ်းဘေးတလျောက်မှာရှိတဲ့ သံဘို၊ ကျောက်မှော်နဲ့ စေသူရွာ ဒေသခံတွေကတော့ ပုန်းရှောင်နေကြရတယ်လို့ သိရပါတယ်။

စစ်ကိုင်း၊ ဇန်နဝါရီ ၂၄၊ ၂၀၂၃။

စစ်ကိုင်းတိုင်း၊ ယင်းမာပင်မြို့နယ်၊ ဘန့်ဘွေးရွာမှာ အထိုင်ချနေတဲ့ စစ်အုပ်စုရဲ့ ဖမ်းဆီးခံရသူ ၂ ဦးဟာ ယနေ့ ဇန်နဝါရီလ ၂၄ ရက်အထိမိသားစုနဲ့ အဆက်အသွယ်ပြတ်တောက်နေတယ်လို့ ဒေသခံတဦးက ပြောပါတယ်။

ပြီးခဲ့တဲ့ ဇန်နဝါရီလ ၁၇ ရက်ကဖမ်းဆီးခံရတဲ့ ဘန့်ဘွေးရွာသားအသက် ၂၅ နှစ်အရွယ်ကိုခင်မောင်ဌေးနဲ့ တူဖြစ်သူအသက် ၁၆ နှစ်အရွယ်မောင်နိုင်လင်းအောင်တို့ ၂ ဦးဖြစ်တယ်လို့ ဆိုပါတယ်။

“သူတို့နှစ်ဦးက ဘာအဆက်အသွယ်မှမရဘူး စုံစမ်းလို့လည်းမရဘူး၊ မရှိလောက်တော့ဘူးလို့တော့ထင်တယ်။ သူတို့နဲ့အတူအဖမ်းခံရတဲ့သူတွေကတော့ တချို့ရိုက်နှက်ခံရ ဖုန်းတွေသိမ်းတာလုပ်ပြီး အဲဒီနေ့ပဲပြန်လွှတ်ပေးလိုက်တယ်” လို့ ဘန့်ဘွေးရွာသားတဦးက ပြောပါတယ်။

သူတို့နှစ်ဦးဟာဘန့်ဘွေးရွာကို ကွင်းရှောင်ဖောက်ထားတဲ့လမ်းမှာ အခြားခရီးသွားပြည်သူ ၃၀ ဦးခန့်နဲ့အတူဖမ်းဆီးခံခဲ့ရတာလို့ သိရပါတယ်။

ဘန့်ဘွေးရွာဟာ အိမ်ခြေ ၃၅၀ ခန့်ရှိပြီး ပြီးခဲ့တဲ့နှစ် ဇွန်လကတည်းက စစ်တပ်ကအင်အား ၈၀ လောက်နဲ့တပ်ဝင်စွဲကာ နေအိမ် ၂၀ လုံးကိုဝင်ရောက်မီးရိူ့ပြီး အသက်၂၀အရွယ် မမာကြည်ဆိုသူအမျိုးသမီးတဦးကို ပစ်သတ်ပြီးချိန်ကစလို့ စစ်တပ်နဲ့ပူးပေါင်းတဲ့အိမ်ခြေ ၁၀ ကျော်ကလွဲပြီး ကျန်အိမ်ထောင်စု ၃၄၀ ကပြည်သူ ၁၅၀၀ လောက်ဟာ တောစပ်တွေမှာ သွားရောက်နေထိုင်နေကြရတာပါ။

ဘန့်ဘွေးကျေးရွာအတွင်း စစ်တပ်ကဝင်ရောက်တပ်စွဲထားတဲ့ တနှစ်ခွဲတာကာလအတွင်း ခုခံတိုက်ပွဲဝင်ရင်း အသက် ၂၅ နှစ်အရွယ် ပကဖအဖွဲ့ဝင်ကျေးရွာသား ၃ ဦးလည်း ကျဆုံးခဲ့သေးတယ်လို့ ဝင်္ကပါပြောက်ကျားတပ်ဖွဲ့ခေါင်းဆောင်တဦးဆီက သိရပါတယ်။

ပဲခူး၊ ဇန်နဝါရီ ၂၄၊ ၂၀၂၃။

ပဲခူးတိုင်းဒေသကြီးအတွင်းက မြို့နယ်တွေမှာ လိုင်စင်မဲ့မော်တော်ဆိုင်ကယ်တွေကို လိုင်စင်လုပ်ပေးမယ့် အစီအစဥ်ကို စစ်ကောင်စီလက်အောက်ခံ ကညနက ရက်အကန့်သတ်မရှိ ရွေ့ဆိုင်းလိုက်တယ်လို့ သိရပါတယ်။

ဆိုင်ကယ်လိုင်စင်လုပ်ပေးနေချိန် ကညန ဝန်ထမ်းတွေအနေနဲ့ PDF တွေရဲ့ တိုက်ခိုက်တာကို ခံရမှာကိုစိုးရိမ်တာကြောင့် လုံခြုံရေးအစီအစဥ်တွေ ပြန်လည်ရေးဆွဲပြီးမှ ပြန်လည်လုပ်ပေးဖို့ စီစဥ်နေတာဖြစ်တယ်လို့ ပဲခူး ကညနနဲ့ နီးစပ်သူတဦးက ပြောပါတယ်။

“မနေ့က လုပ်ပေးမယ်ဆိုပြီး လိုင်စင်လုပ်မယ့် လူတွေတောင် လာစောင့်နေကြတာ။ ပြီးတော့ နေ့ခင်း ၁၁ နာရီလောက်မှာ မလုပ်ပေးတော့ဘူးဆိုပြီး ချက်ချင်းဖြစ်သွားတယ်။ တန်းစီနေတဲ့သူတွေတောင်ပြန်သွားရတယ်။ ဘယ်သူမှကို မလုပ်လိုက်ရဘူး။ ပြီးတော့ ရက်အကန့်အသတ်မရှိရွေ့လိုက်တယ်လို့ သိရတယ်”လို့ပြောပါတယ်။

ပဲခူးတိုင်းအတွင်း လိုင်စင်မဲ့ဆိုင်ကယ်သိန်းချီရှိရာ စစ်ကောင်စီက ပြည်သူလူထုထံကနေ လိုင်စင်လုပ်ပေးပြီး ငွေသန်းထောင်ချီရှာရန် ပြင်ဆင်နေတာလို့ ဆိုပါတယ်။

ဇန်နဝါရီလ ၂၃ ရက်ကစတင်ပြီး ပဲခူးတိုင်းဒေသကြီးအတွင်းရှိ ခရိုင်တွေဖြစ်တဲ့ ပဲခူး၊ တောင်ငူ၊ သာယာဝတီ၊ ပြည်ခရိုင် ကညနရုံးတွေမှာ လိုင်စင်မဲ့မော်တော်ဆိုင်ကယ်တွေကို ပဲခူးဒေသလိုင်စင်လုပ်ပေးဖို့ ကညန ဘက်က ကြေညာခဲ့တာဖြစ်ပါတယ်။

ဆိုင်ကယ်လိုင်စင်ပြုလုပ်မယ်ဆိုပါက ၁ စီးလျှင် ကညနကြေး ၃၀၀၀၀ ကျပ်နဲ့ အခွန်ကြေးအပါအဝင် ဆိုင်ကယ် အမျိုးအစားနဲ့ထုတ်လုပ်တဲ့ခုနှစ်အလိုက် ကျပ် ၁ သိန်းအထက်ကနေ ကျပ် ၅ သိန်းကျော်ထိ ကုန်ကျနိုင်မှာဖြစ်တယ်လို့ သိရပါတယ်။

စစ်ကောင်စီက ပဲခူးတိုင်းထဲကမြို့နယ်တွေမှာ မော်တော်ဆိုင်ကယ်လိုင်စင်၊ ယာဉ်မောင်းလိုင်စင်၊ ဘတ်မှန်၊ ဆိုင်ကယ်စီးဦးထုပ်နဲ့ အခြားအရာတွေကိုစစ်ဆေးကာ ဆိုင်ကယ်သိမ်းတာ၊ လူဖမ်းတာတွေနဲ့ ငွေတောင်းတာတွေကြောင့် ဒေသခံတွေဟာ သွားလာရေးနဲ့စားဝတ်နေရေးအတွက် အခက်ခဲဖြစ်နေရတယ်လို့ ဆိုပါတယ်။

စစ်တပ်ဟာ အာဏာသိမ်းပြီးနောက်ပိုင်း ၂၀၂၁ ခုနှစ် စက်တင်ဘာလမှာလည်း တနိုင်ငံလုံးအတိုင်းအတာနဲ့ လိုင်စင်မဲ့မော်တော်ဆိုင်ကယ်တွေကို လိုင်စင်လုပ်ပေးခဲ့ပြီး ကျပ်သန်းပေါင်းများစွာ အခွန်ငွေရရှိခဲ့သေးတာပါ။

မကွေး၊ ဇန်နဝါရီ ၂၄၊ ၂၀၂၃။

မကွေးတိုင်း၊ ရေစကြိုမြို့နယ်၊ သဲတောကျေးရွာကို စစ်ကောင်စီတပ်တွေကစီးနင်းဝင်ရောက်ပြီး ဘုန်းကြီးကျောင်းထဲကပစ္စည်းတွေကို ဖျက်ဆီးသွားတဲ့အပြင် နေအိမ်တွေထဲကပစ္စည်းအချို့ကိုလည်း ယူသွားတယ်လို့ သိရပါတယ်။

အင်အား ၃၀ ဝန်းကျင်ပါတဲ့ စစ်ကောင်စီတပ်တွေဟာ ဇန်နဝါရီလ ၂၃ ရက်မနေ့ကညနေ ၄ နာရီလောက်မှာ သဲတောရွာကိုရောက်ရှိလာပြီး ရွာထဲကိုမဝင်ခင်မှာ လက်နက်ငယ်တွေ၊ ၄၀ မမ လက်ပစ်ဗုံးတွေနဲ့ပစ်ခတ်ခဲ့တယ်လို့ Southern Yesagyo PDF ဗိုလ်အောင်မောင်းက ပြောပါတယ်။

“ရွာကလူတွေကတော့ သေနတ်ဖောက်သံတွေကြားတော့ ကြောက်လန့်ပြီးထွက်ပြေးကြတယ်၊ ပြည်သူတွေ ထွက်ပြေးကြတဲ့အခါ စစ်အုပ်စုကရွာထဲဝင်ပြီး ပြည်သူပိုင်ပစ္စည်းတွေကို ဖျက်ဆီးကြတယ်၊ ရွာထဲက ဆိုင်ကယ် ၄ စီး၊ ဝက် ၁ ကောင်ပါသွားတယ်။ ပြည်သူတယောက်အိမ်က ရွှေ ၅ ကျပ်သားလည်းပါသွားတယ်၊ ဘုန်းကြီးကျောင်းက သာသနာပိုင်ပစ္စည်းတွေ ရိုက်ခွဲသွားတယ်၊ သူတို့မလိုချင်တဲ့ ဆိုင်ကယ်တွေကို သေနတ်‌တွေနဲ့ပစ်ပြီး ဖျက်ဆီးသွားတယ်” လို့ ပြောပါတယ်။

ခုလိုဝင်ရောက်လာတာဟာ ကျောက်လှေခါးရွာမှာအခြေစိုက်နေတဲ့ စစ်သားတွေနဲ့ ဆင်ချောင်းရွာက ပျူစောထီးတွေဖြစ်တယ်လို့ ဆိုပါတယ်။

သဲတောရွာမှာအိမ်ခြေ ၅၀၀ ကျော်နဲ့ လူဦးရေ ၃ ထောင်ဝန်းကျင်ရှိပြီး ၂၅၀၀ ကျော်က အရင်လတွေကတည်းက ရွာကနေ ထွက်ပြေးတိမ်ရှောင်နေရသလို ကျန်တဲ့ရွာသားတွေကတော့ မနေ့ကမှ ထွက်ပြေးတိမ်းရှောင်သွားကြရတာလို့ သိရပါတယ်။

မကွေး၊ ဇန်နဝါရီ ၂၄၊ ၂၀၂၃။

မကွေးတိုင်း၊ ပခုက္ကူမြို့မှ Well-2 ရေနံမြေစခန်းကို စစ်ကောင်စီရိက္ခာပို့ယာဉ်တန်းရဲ့ ရှေ့ပြေးခြေလျင်တပ်သားတွေကို ကိုင်းတောမရဲစခန်းနဲ့ Well-2 ရေနံမြေစခန်းအကြား ဒေသခံကာကွယ်ရေးတပ်တွေက မိုင်း ၁၅ လုံးဆွဲတိုက်ခိုက်ခဲ့ရာ စစ်သား ၂၀ ဦးသေဆုံးခဲ့တယ်လို့ သိရပါတယ်။

ခြေလျင်အင်အား ၅၀ ကျော်ပါတဲ့ စစ်ကောင်စီတပ်တွေကို မြိုင်မြို့နယ်၊ ကိုင်းတောမရဲစခန်းနဲ့ Well-2 ရေနံမြေစခန်းအကြား ဇန်နဝါရီလ ၂၃ ရက်၊ ညနေ ၃ နာရီဝန်းကျင်မှာ မိုင်းဆွဲတိုက်ခိုက်ခဲ့တာလို့ ပြည်သူ့ကာကွယ်ရေးတပ်ဖွဲ့-မြိုင်မြို့နယ် ဗိုလ်လက်ယာက ပြောပါတယ်။

“သူတို့ဖြန့်ထွက်လာတာမှာ ကျနော်တို့ဆင်ထားတဲ့မိုင်းတွေအပေါ်အရောက်မှာ ဆွဲလိုက်တာ၊ သေဆုံး ၂၀ လောက်ရှိတယ်၊ မိုင်းထိလို့ ဖောကား‌ ၃ စီးလောက်နဲ့ လာသယ်သွားတယ်၊ ပခုက္ကူ တပ်မ ၁၀၁ ထဲက ဖောကား ၆ စီးနဲ့ထွက်လာတဲ့ စစ်သားတွေ” လို့ ဗိုလ်လက်ယာက ပြောပါတယ်။

အဲဒီတိုက်ခိုက်မှုကို ပြည်သူ့ကာကွယ်ရေးတပ်ဖွဲ့-မြိုင်မြို့နယ် တပ်ခွဲ-၁၊ တပ်ခွဲ -၄( စင်္ကြာ) ၊ မုန်တိုင်းတပ်ဖွဲ့ နဲ့ MUGDF တပ်ဖွဲ့တို့ပူးပေါင်းလုပ်ဆောင်ခဲ့တယ်လို့ဆို့ပါတယ်။

ပြီးခဲ့တဲ့ ဇန်နဝါရီလ ၂၂ ရက်ကလည်း မြိုင်မြို့နယ်၊ တွင်းမကျေးရွာအနား ကင်းပုန်းဝပ်နေတဲ့ စစ်အုပ်စုကို ပြည်သူ့ကာကွယ်ရေးတပ်ဖွဲ့ – မြိုင်မြို့နယ်အဖွဲ့က Drone နဲ့ ဗုံးကြဲခဲ့ရာ စစ်သား ၂ ဦး ဒဏ်ရာရခဲ့တယ်လို့ သိရပါတယ်။

စစ်ကိုင်း၊ ဇန်နဝါရီ ၂၄၊ ၂၀၂၃။

စစ်ကိုင်းတိုင်း၊ ဆာလင်းကြီးမြို့နယ်အတွင်းက စစ်ကောင်စီတပ်တွေမီးရှို့ခဲ့တဲ့ကျေးရွာ ၃ ရွာကဒေသခံတွေကို ဇန်နဝါရီလ ၂၃ ရက်မနေ့ကညနေပိုင်းမှာ မီးဖိုဆောင်သုံးပစ္စည်းတွေနဲ့အဝတ်အထည်တွေလှူဒါန်းခဲ့တယ်လို့ သိရပါတယ်။

အညာပစ်တိုင်းထောင်လေးများအဖွဲ့၊ ဓားမဆိုင်းဗိုလ်စွမ်းနဲ့ Dhamma Worker Group Singapore) တို့ပူးပေါင်းကာ မီးဘေးသင့်နေအိမ် ၈၇ အိမ်ကိုတအိမ်လျှင် ဒန်အိုးနဲ့ ဒယ်အိုး ၁လုံးစီ၊ ဇလုံ ၂ လုံး၊ဇွန်း ၃ ချောင်း၊ ကြွေအုပ် ၁ လုံး၊ ဆန်၂ ပြည်၊ ဆီ ၅၀ ကျပ်သားနဲ့ အ၀တ်အထည်အချို့ကို လှူဒါန်းခဲ့တာလို့သိရပါတယ်။

စစ်ကိုင်း၊ ဇန်နဝါရီ ၁၈၊ ၂၀၂၃။

စစ်ကိုင်းမြို့နယ်၊ မင်းကွန်းတိုက်နယ်၊ ထုံးဘိုရွာကို ဇန်နဝါရီ ၁၇ ရက်နေ့မှာ တပ်စွဲဖို့လာတဲ့ စစ်ကောင်စီတွေ တိုက်ခိုက်ခံရလို့ တပ်မစွဲခဲ့ရတာကြောင့် ပြည်သူ ၁ ဦးကိုသတ်ပြီး နေအိမ်တွေကို မီးရှို့သွားခဲ့တယ်လို့ သိရပါတယ်။

အင်အား ၁၀၀ ခန့်ရှိတဲ့စစ်ကောင်စီတပ်သားတွေက အိမ်ခြေ ၅၀၀ ခန့်ရှိတဲ့ ထုံးဘိုရွာကို ပစ်ခတ်ဝင်လာချိန် ကာကွယ်ရေးတပ်ဖွဲ့တွေက ခုခံပြန်တိုက်ခဲ့တာကြောင့် ကျေးရွာသားတွေ ထွက်ပြေးချိန်ရခဲ့ပေမယ့် ဘုန်းကြီးကျောင်းကို ဆွမ်းဂျိုင့်ပို့ဖို့သွားနေသူ ၁ ဦးကို သတ်ပြီး ဘုန်းကြီးကျောင်းအပါအဝင် လူနေအိမ် ၁၀ လုံးကျော်မီးရှို့ ထွက်သွားတယ်လို့ မတ္တရာမြို့နယ်နဂါးနီပြောက်ကျားတပ်ဖွဲ့ တာဝန်ခံကိုသားငယ် ကပြောပါတယ်။

“ရွာမှာ ပကဖ တွေပြောက်ကျားတပ်‌ဖွဲ့တွေရှိတော့ လမ်းအတိုင်းမလာပဲ တောထဲကနေ အလစ်၀င်ပြီး ပစ်၀င်၀င်လာပါတယ်ဗျ။ ဒါကိုကျနော်တို့တွေက လက်နက်ငယ်တွေ၊လက်နက်ကြီးတွေနဲ့တိုက်ခိုက်ခဲ့တယ်။ မနက်ကနေညနေအထိတိုက်ခိုက်ခဲ့လို့ စကစတွေရွာမှာ မနေနိုင်ခဲ့ဘဲပြန်ထွက်သွားခဲ့တယ်။ ကျနော်တို့က ရွာမှာရှင်းလင်းရေးတွေလုပ်နိုင်ခဲ့တယ်” လို့ဆိုပါတယ်။

အသတ်ခံရသူမှာ အသက် ၄၀ ကျော်အရွယ် အမျိုးသားဖြစ်ပြီး စစ်ကောင်စီတွေကသူ့ကို ပစ်သတ်ပြီး ဘုန်းကြီးကျောင်းဆောင်တွေနဲ့အတူ မီးရှို့ထားခဲ့ကြတာဖြစ်တယ်လို့ ကိုသားငယ်က ဆက်ပြောပါတယ်။

“သူတို့သတ်သွားတာက ခြေတွေလက်တွေအရင်ဖြတ်ပြီးမှ မီးရှို့သတ်တယ်လို့ ယူဆရပါတယ်ဗျ။ ဘုန်းကြီးကျောင်းကို ဆွမ်းဂျိုင့်ပို့သွားတဲ့လူပါ သူကဆိုင်ကယ်နဲ့ပါဗျ။ သူ့ဆိုင်ကယ်နေရာကနေ မီးရှို့တဲ့နေရာကို ဝါယာကြိုးနဲ့ချည်ပီးဆွဲသွား‌ပါတယ် ‌သွေးတွေက အတန်းလိုက်ကြီးဗျ ပြီးမှ ဘုန်းကြီးကျောင်းကိုရော မီးရှို့ပစ်ခဲ့တာပါ” လို့ ဆိုပါတယ်။

ဒီစစ်ကောင်စီတွေက ကျေးရွာထဲမှာတပ်စွဲဖို့လာခဲ့တဲ့ ရည်ရွယ်ချက်က မင်းကွန်းမှာ ဘုရားထီးတင်ပွဲကို စစ်ကောင်စီအကြီးကဲတွေလာရောက်မှာဖြစ်လို့ နယ်မြေရှင်းလင်းတဲ့သဘောနဲ့ ဝင်ရောက်လာခဲ့ကြတာဖြစ်ပြီး ကာကွယ်ရေးပူးပေါင်းတပ်ဖွဲ့တွေက ရွာမှာတပ်မစွဲနိုင်အောင် ပြန်လည်ခုံခံတိုက်ခိုက်ခဲ့တာ ဖြစ်တယ်လို့သိရပါတယ်။