စစ်ကိုင်း

စစ်ကိုင်း၊ ဇန်နဝါရီ ၁၉၊ ၂၀၂၅။

စစ်ကိုင်းတိုင်း၊ မုံရွာမြို့အခြေစိုက်၊ အနောက်မြောက်တိုင်းစစ်ဌာနချုပ်(နမခ)က စစ်မှုထမ်းအပတ်စဉ် ၅ သင်တန်းဆင်းတပ်သား ၄ ဦး လက်နက်တွေနဲ့အတူ ဘက်ပြောင်းခိုလှုံလာတယ်လို့ ယင်းမာပင်အခြေစိုက် Union Liberation Front-ULF စစ်ကြောင်းက ဇန်နဝါရီ ၁၉ ရက် ဒီကနေ့မှာ သတင်းထုတ်ပြန်ပါတယ်။

ဘက်ပြောင်းခိုလှုံလာသူတွေဟာ နမခဌာနချုပ်အတွင်း လုံခြုံရေးတာဝန်ကျနေတဲ့ တပ်မ ၇၇ လက်အောက်ခံ အင်းတကော်မြို့အခြေစိုက် ခမရ ၁၀၅ တပ်ရင်းက တပ်သား ကျော်ကျော်ဖြိုး၊ ကျော်မျိုးထွန်း၊ စက်ပိုင်ထွန်း (ခ) ရဲရင့်ပိုင်၊ အေးချမ်းဖြိုးတို့ဖြစ်ပြီး ဇန်နဝါရီ ၁၈ ရက် မနက် ၅ နာရီမှာ နမခကနေ အရပ်ဝတ်တွေနဲ့ထွက်ပြေးလာပြီးနောက် လိုင်းကားတွေစီးနင်းကာ ယင်းမာပင်နယ်ထဲကို ရောက်လာခဲ့ကြတာလို့ဆိုပါတယ်။

” သူတို့မှာပါတဲ့ လက်နက်နဲ့ပစ္စည်းတွေကိုတော့ လုံခြုံတဲ့တနေရာမှာဝှက်ခဲ့တာ။ ကျနော်တို့ ဘက်ထွက်လာတဲ့အချိန်မှာ စစ်ကြောင်းကကင်းလှည့်တဲ့ ရဲဘော်တွေနဲ့တွေ့ပြီး အလင်းဝင်ချင်ကြောင်းပြောပြလို့ လက်နက်လည်း ဘယ်မှာဝှက်ထားဆိုတာပြောလို့ သွားယူခဲ့တယ်။”လို့ ULF ပြန်ကြားရေးတာဝန်ခံက ပြောပါတယ်။

နမခကနေ ယမန်နေ့မနက်အစောပိုင်းက ထွက်ပြေးလာပြီး နေ့လယ်ပိုင်းမှာ ယင်းမာပင်မြို့နယ် လမ်းပိုင်းတနေရာမှာ ကာကွယ်ရေးအဖွဲ့ဝင်တွေနဲ့ဆုံကာ ခိုလှုံနိုင်ခဲ့တာဖြစ်ပြီး နမခကနေ မထွက်ခွာခင်မှာ လက်နက်တွေကို ကြိုတင်ဖွက်ထားနိုင်ခဲ့တာလို့ သိရပါတယ်။

ဘက်ပြောင်းလာသူတွေဟာ ဧရာဝတီတိုင်းဇာတိ ၃ ဦး၊ ရန်ကုန်တိုင်း၊ လှိုင်သာယာမြို့က ၁ ဦး ဖြစ်ပြီး ၎င်းတို့ ၄ ဦးစလုံးဟာ စစ်ကောင်စီရဲ့စစ်မှုထမ်းဥပဒေနဲ့ သင်တန်းအပတ်စဥ် ၅ အတွက် အတင်းအဓမ္မ စစ်သားစုဆောင်းခံရသူတွေဖြစ်ကာ ၎င်းတို့ဖြစ်စဥ်တွေနဲ့ပတ်သက်ပြီး လတ်တလောမေးမြန်းနေဆဲဖြစ်တယ်လို့ ဆိုပါတယ်။

အဆိုပါ စစ်သား ၄ ဦးထံကနေ သေနတ် ၄ လက်၊ ကျည်ဘောက် ၁၃ ခု၊ ကျည် ၇၀၀ ကျော် ပါလာခဲ့လို့ ULF စစ်ကြောင်းက ၁ ဦးကို ငွေကျပ်သိန်း ၃၀ စီ ချီးမြှင့်ပေးအပ်ခဲ့တယ်လို့ သိရပါတယ်။

လက်ရှိမှာတော့ ဘယ်ပြောင်းခိုလှုံလာသူ ၄ ဦးရဲ့ စားဝတ်နေရေးအတွက်စီစဥ်ပေးထားပြီး လွတ်လပ်စွာနေထိုင်ခွင့်ပေးထားကာ နောက်ပိုင်းမှာ မိသားစု၊ ဆွေမျိုးတွေနဲ့တွေ့ဆုံခွင့်ရဖို့ စီစ​ဉ်ပေးသွားမယ်လို့ ဆိုပါတယ်။

ဇန်နဝါရီ ၇ ရက်ကလည်း မြိုင်မြို့နယ်၊ ကျောက်ရစ်ရဲစခန်းက လုပ်သက် ၄ နှစ်ကျော်ရှိ ရဲတပ်သား အေးမင်းထွန်းဆိုသူ ULF စစ်ကြောင်းထံ ဆက်သွယ်ပြီးမှ လက်နက်မဲ့ဘက်ပြောင်း ခိုလှုံလာခဲ့ကာ၂၀၂၄ ဇန်နဝါရီကနေ ၂၀၂၅ ဇန်နဝါရီအထိ ၁ နှစ်တာအတွင်း ၎င်းတို့စစ်ကြောင်းထံ ဘက်ပြောင်းခိုလှုံလာတဲ့ စစ်ကောင်စီတပ်သား ၆ ဦးနဲ့ရဲ ၁ ဦးရှိတယ်လို့ ပြန်ကြားရေးတာဝန်ခံထံက သိရပါတယ်။

စာတည်း – ဟိန်းစံ။

စစ်ကိုင်း၊ ဇန်နဝါရီ ၁၉၊ ၂၀၂၅။

စစ်ကိုင်းတိုင်း၊ ၀က်လက်မြို့မှာ ဇန်နဝါရီလဆန်းပိုင်းက စတင်ဖြစ်ပွားတဲ့တိုက်ပွဲတွေကြောင့် ဝက်လက်မြို့လမ်းပိုင်းတွေ ပိတ်ထားရလို့ ကုန်စည်စီးဆင်းမှုပြတ်တောက်ကာ စားသုံးကုန်ပစ္စည်း‌၊ ဆေးဝါးနဲ့ စက်သုံးဆီတွေ ရှားပါးပြတ်လပ်နေတယ်လို့ ဝက်လက်မြို့ခံတွေထံက သိရပါတယ်။

၀က်လက်မြို့နယ်အတွင်း စစ်ကြောင်းထိုးလာတဲ့ စစ်ကောင်စီတပ်နဲ့ ဒေသတော်လှန်ရေးပူးပေါင်းတပ်ဖွဲ့တွေ တိုက်ပွဲဖြစ်ပွားခဲ့တဲ့ ဇန်နဝါရီ ၄ ရက်ကနေစပြီး မြို့အ၀င်အထွက်လမ်းတွေကို ပြည်သူ့ကာကွယ်ရေးတပ်တွေဘက်က ယာယီအသုံးပြုခွင့် ပိတ်ထားတာဖြစ်ပါတယ်။

ဝက်လက်မြို့ အဝင်အထွက်လမ်းတွေကို အခုလိုပိတ်ဆို့ထားတာကြောင့် မြို့တွင်းမှာ ကုန်ပစ္စည်းတွေပြတ်လပ်လာပြီး ကုန်ဈေးနှုန်းဟာလည်း အရင်ကရှိနေတဲ့ ဈေးနှုန်းထက် ထက်ဝက်ခန့်ဈေးတက်လာတယ်လို့ မြို့ခံတွေက ပြောပါတယ်။

“ဆန် ၁ ပြည် ၇ ထောင်ကျော်တယ်။ ဆီက ၁ ပိဿာ ၁၈,၀၀၀၊ ကြက် ၁ တလုံး ၈၀၀၊ ဓာတ်ဆီက ၁ လီတာ ၁ သောင်း၊ ကွမ်းက ၁ရွက်ကို ၃၀၀ နှုန်းဖြစ်နေပြီ၊ အကုန်ငတ်နေပြီ။” လို့ ဝက်လက်မြို့ခံတဦးက ပြောပါတယ်။

လမ်းပိတ်ထားလို့ အနီးအနားရွာတွေက ဈေးသည်တွေ လာမရောင်းတဲ့အတွက် ဟင်းသီးဟင်းရွက်၊ အသားငါးတွေ ၀ယ်မရတော့ဘဲ မြို့တွင်းမှာရှိတဲ့ဈေးဆိုင်တွေလည်း ရောင်းစရာကုန်ပစ္စည်းမရှိလို့ ပိတ်ထားကြတယ်လို့ ပြောပါတယ်။

“ဈေးထဲ ဘောလုံးကန်လို့ ရတယ်” လို့ ဝက်လက်မြို့ခံတဦးက ဆိုပါတယ်။

ယခုလက်ရှိမှာ ဝက်လက်မြို့နယ်အတွင်းတိုက်ပွဲတွေဖြစ်ပွားတာ မရှိတော့ပေမယ့် မြို့နယ်အတွင်းအ၀င်အထွက်လမ်းပိုင်းတွေကို ဆက်လက်ပိတ်ထားသေးပြီး ပြန်ဖွင့်မယ့်အချိန်ကိုတော့ မသိရသေးဘူးလို့ ဒေသခံတွေက ပြောပါတယ်။

၂၀၂၃ တုန်းကလည်း ပြည်သူ့ကာကွယ်ရေးတပ်တွေဘက်က ၀က်လက်မြို့အ၀င်အထွက်လမ်းတွေကို ၂၂ ရက်တိတိ ပိတ်ထားခဲ့လို့ အခုလို ကုန်ပစ္စည်းပြတ်လပ်မှုတွေ ကြုံခဲ့ရသေးတယ်လို့ ၀က်လက်မြို့ခံတွေဆီကနေ သိရပါတယ်။

၂၀၁၄ သန်းခေါင်စာရင်းအရ ဝက်လက်မြို့လူဦးရေဟာ ၁၀,၀၀၀ ကျော်ရှိပါတယ်။ လက်ရှိ စစ်အာဏာသိမ်းပြီးတဲ့နောက် ဝက်လက်မြို့လူဦးရေဟာ မူလရှိတဲ့လူဦးရေရဲ့ တဝက်ခန့်သာရှိတော့တယ်လို့ ဒေသခံတွေက ပြောပါတယ်။

ဇန်နဝါရီ ၅ ရက် တနေ့တည်းမှာ ရွှေဘိုမြို့၊ အမှတ် ၈ စစ်အခြေခံလေ့ကျင့်ရေးတပ်ရင်းကနေ ထွက်လာတဲ့ စစ်ကောင်စီစစ်ကြောင်းကို ဝက်လက်မြို့နယ်၊ မှတ်ထိကျေးရွာနဲ့ မင်းကုန်းကျေးရွာကြားမှာ တော်လှန်ရေး တပ်ဖွဲ့တွေက တိုက်ခိုက်ခဲ့ရာ စစ်ကောင်စီတပ်ဖွဲ့ဝင် ၄၇ ဦးသေဆုံးပြီး ၆ ဦးဖမ်းဆီးရမိခဲ့ပါတယ်။

အလားတူ စစ်ကိုင်းတိုင်း၊ ဆားတောင်မြို့ကထွက်လာပြီး ဝက်လက်မြို့နယ်၊ အုန္နဲဘုတ်ရွာကို စီးနင်းတပ်စွဲနေတဲ့ စစ်ကောင်စီတပ်မ ၃၃ လက်အောက် စစ်သားတွေကို ဝင်ရောက်တိုက်ခိုက်ခဲ့ရာ စစ်ကောင်စီတပ်ဖွဲ့ဝင် ၂၀ ဦးကျော်သေဆုံး၊ ၃ ဦး အရှင်ဖမ်းမိထားကာ MA 1 သေနတ် ၅ လက်၊ မြေမြှုပ်မိုင်း ၄ လုံး၊ ရှေ့ထွက်မိုင်း ၁ လုံး၊ ၆၀ မမ ဗုံးသီး ၃ လုံး၊ Jammer စက် ၁ လုံးနဲ့ ခဲယမ်းပစ္စည်းအချို့ကိုလည်း သိမ်းဆည်းရရှိခဲ့ပါတယ်။

သတင်း – လကျာ်၊ စာတည်း – လင်းဇေ

■ ၁ ညအတွင်း တော်လှန်ရေးပူးပေါင်းတပ်တွေ သိမ်းပိုက်ထားတဲ့ မြို့ ၂ မြို့ လေကြောင်းကြဲခံရ

မြေလတ်အသံ၊ ဇန်နဝါရီ ၁၇၊ ၂၀၂၅။

KIA နဲ့ PDF ပူးပေါင်းတပ်ဖွဲ့တွေ ထိန်းချုပ်ထားတဲ့ စစ်ကိုင်းတိုင်းအရှေ့ဘက် မော်လူးမြို့နယ်ကို စစ်ကောင်စီက လေကြောင်းနဲ့ ဗုံး ၂ ကြိမ် ကြဲခဲ့တာကြောင့် အရပ်သား ၃ ဦး သေဆုံးခဲ့တယ်လို့ ဒေသခံတွေဆီက သိရပါတယ်။

ဇန်နဝါရီ ၁၆ ရက် မနေ့ ည ၁၂ နာရီဝန်းကျင်က မော်လူးမြို့နယ် ဟင်းနုရွာ စည်ပင်ရုံးနဲ့ မော်လူးမြို့ထဲက မြမာလာရပ်ကို တံတားဦးလေဆိပ်ကတက်လာတဲ့ MiG-29 ဂျက်ဖိုက်တာနဲ့ ဗုံးကြဲခဲ့တာလို့ ဆိုပါတယ်။

သေဆုံးသူတွေဟာ ကားဆရာ ၁ ဦး၊ အမျိုးသမီး ၁ ဦးနဲ့ အသက်ကြီးပိုင်း အမျိုးသား ၁ ဦးတို့ ဖြစ်တယ်လို့ မော်လူးဒေသခံတဦးက ပြောပါတယ်။

“ဟင်းနုမှာက ၂ ယောက်၊ မြမာလာရပ်မှာက ၁ ယောက်၊ အသက်ခပ်ကြီးကြီး ၁ ယောက်က နှလုံးဖောက်ပြီး သေသွားတယ် ထင်တယ်။”လို့ သူကဆိုပါတယ်။

လူဦးရေ ၇,၀၀၀ ကျော်နေထိုင်တဲ့ မော်လူးမြို့ဟာ ရွှေဘို-မြစ်ကြီးနားကားလမ်းဘေးမှာ တည်ရှိပြီး ၂၀၂၃ ဒီဇင်ဘာ ၁၃ ရက်မှာ တော်လှန်ရေးပူးပေါင်းတပ်တွေက မြို့ကို သိမ်းပိုက်ကာ ဒီဇင်ဘာ ၂၀ ရက် ဝန်းကျင်မှာ အမျိုးသားညီညွတ်ရေးအစိုးရ NUG ရဲ့ ပြည်သူ့အုပ်ချုပ်ရေး စတင်လည်ပတ်ခဲ့တဲ့ မြို့ ဖြစ်ပါတယ်။

မနေ့ ည ၈ နာရီခွဲဝန်းကျင်ကလည်း တော်လှန်ရေးပူးပေါင်းတပ်တွေ ထိန်းချုပ်ထားတဲ့ ခမ်းပတ်မြို့ကို လေကြောင်းနဲ့ ဗုံး ၃ ကြိမ် ကြဲခဲ့တာကြောင့် အနည်းဆုံး အရပ်သား ၃ ဦးထက်မနည်း သေဆုံးခဲ့ပါတယ်။

သေဆုံးသူတွေရဲ့ အချက်အလက် အသေးစိတ်ကတော့ မြေလတ်အသံက ဆက်လက်စုံစမ်းနေဆဲ ဖြစ်ပါတယ်။

အမျိုးသားညီညွတ်ရေးအစိုးရ NUG က ၂၀၂၅ မှာ စစ်ကိုင်းတိုင်းအတွင်း အစိုးရရုံးထိုင်မယ်လို့ ထုတ်ပြောပြီးနောက် တော်လှန်ရေးအင်အားစု တာဝန်ရှိသူတချို့က လုံခြုံရေးအန္တရာယ်ရှိနိုင်တယ်လို့ သတိပေးထောက်ပြမှုတွေလည်း ရှိနေပါတယ်။

စာတည်း – ဟယ်ရီ

မြေလတ်အသံ၊ ဇန်နဝါရီ ၁၆၊ ၂၀၂၅။

မြေလတ်အသံရဲ့စာရင်းအရ ပြီးခဲ့တဲ့ ၂ ပတ်အတွင်း စစ်ကိုင်းတိုင်းနဲ့ မကွေးတိုင်းထဲမှာ စစ်ကောင်စီတပ်ဖွဲ့ဝင်တွေနဲ့ ပျူစောထီးပူးပေါင်းအဖွဲ့တွေက မီးရှို့ဖျက်ဆီးခဲ့လို့ ဒေသခံနေအိမ်ပေါင်း ၁၁၀ ကျော် မီးလောင်ပျက်စီးခဲ့ပါတယ်။

၂၀၂၄ ဒီဇင်ဘာ ၃၁ ရက်ကနေ ၂၀၂၅ ဇန်နဝါရီ ၁၄ ရက်အထိ စစ်ကိုင်းတိုင်းက ကန့်ဘလူ၊ မုံရွာ၊ ယင်းမာပင်၊ ဝက်လက်၊ ဒီပဲယင်းမြို့နယ်တွေနဲ့ မကွေးတိုင်းက မင်းဘူးနဲ့ ချောက်မြို့နယ်တွေမှာ မီးရှို့ဖျက်ဆီးခံခဲ့ရတာဖြစ်ပါတယ်။

စစ်ကိုင်းတိုင်း၊ ကန့်ဘလူမြို့နယ်၊ ရွှေဘို-မြစ်ကြီးနားဗျူဟာလမ်းပေါ် ဇီးကုန်း-မလည်လမ်းဆုံရှိ နေအိမ်တွေကို စစ်ကောင်စီတပ်ဖွဲ့ဝင်တွေနဲ့ ပျူစောထီးတွေက ဒီဇင်ဘာ ၃၁ ရက်ညနေပိုင်းမှာ ၁ ကြိမ်၊ ဇန်နဝါရီ ၁ ရက် နေ့လယ်ပိုင်းမှာ ၁ ကြိမ် ၂ ရက်ဆက်တိုက်မီးရှို့ခဲ့ရာ နေအိမ် ၂၀ ဝန်းကျင်မီးလောင်ပျက်စီးခဲ့တယ်လို့ ကန့်ဘလူနယ်ခံတဦးက ပြောပါတယ်။

ဇန်နဝါရီ ၂ ရက်ည ၈ နာရီလောက်မှာလည်း မုံရွာမြို့ပေါ်ကနေ အင်အား ၁၀၀ ဝန်းကျင်နဲ့ထွက်လာတဲ့ စစ်ကောင်စီတပ်ဖွဲ့ဝင်တွေက စစ်ကိုင်းတိုင်း၊ မုံရွာမြို့နယ်၊ ကံမရွာထဲကိုဝင်ရောက်လာပြီးနောက် ည ၁၁ နာရီလောက်မှာ နေအိမ်တွေကိုစတင်မီးရှို့ခဲ့ရာ နေအိမ် ၂၃ လုံး မီးလောင်ပျက်စီးခဲ့တယ်လို့ ဒေသခံအမျိုးသမီးတဦးက ပြောပါတယ်။

“တရွာလုံးပတ်ပတ်လည် ပိတ်ထားတယ်။ တံခါးပေါက်တွေကို ခြေထောက်နဲ့ကန်ပြီးတော့ ခုချက်ချင်း ထွက်ဆိုပြီးတော့ ဖွင့်ခိုင်းတယ်။ ထွက်ပြေးတဲ့သူတွေကိုလည်း အကုန်ဖမ်းတယ်။ နောက်ပိုင်း သောက်စားပြီးတော့ (မီး)ရှို့ရှို့ဆိုပြီး ရှို့ကြတော့တာပဲ။” လို့ သူက မြေလတ်အသံကို ဖြေဆိုခဲ့ပါတယ်။

အလားတူ အင်အား ၇၀ ဝန်းကျင်ပါ စစ်ကိုင်းမြို့ တပ်မ ၃၃ လက်အောက်ခံစစ်ကြောင်းကလည်း ဇန်နဝါရီ ၄ ရက်မှာ ဝက်လက်မြို့နယ်တောင်ပိုင်းကို ဝင်ရောက်လာပြီး အုန္နဲဘုတ်ကျေးရွာက အိမ်တွေကို မီးရှို့ဖျက်ဆီးခဲ့ရာ နေအိမ် ၂၆ လုံးပျက်စီးခဲ့တယ်လို့ စစ်ကိုင်းတိုင်း၊ ဝက်လက်မြို့နယ် လူ့အခွင့်အရေးတာဝန်ခံက အတည်ပြု ဖြေဆိုထားပါတယ်။

ဒါ့အပြင် စစ်ကိုင်းတိုင်း၊ ယင်းမာပင်မြို့နဲ့ ၁ မိုင်ခန့်အကွာက မြို့သစ်ကျေးရွာကိုလည်း အင်အား ၃၀ ပါတဲ့ စစ်ကောင်စီတပ်ဖွဲ့ဝင်တွေက ဇန်နဝါရီ ၅ ရက်မနက် ၁၀ နာရီလောက်မှာ ဝင်ရောက်မီးရှို့ခဲ့တာကြောင့် နေအိမ် ၂ လုံး၊ စပါးနဲ့ နွားစာ သိုလှောင်အိမ် ၄ လုံးနဲ့ လယ်ယာသုံးပစ္စည်းတွေ မီးလောင်ဆုံးရှုံးပြီး နွား ၁ ကောင်လည်း ဒဏ်ရာရရှိခဲ့ပါတယ်လို့ နေအိမ်မီးရှို့ခံခဲ့ရတဲ့ အမျိုးသမီးတဦးက ပြောပါတယ်။

မကွေးတိုင်း၊ မင်းဘူးမြို့နယ်၊ ရွှေစက်တော်အနီးက အိုးပြင်မဲရွာကိုလည်း ဇန်နဝါရီ ၁၁ ရက်မနက်ပိုင်းမှာ အင်အား ၁၅၀ ဝန်းကျင်ပါ စစ်ကောင်စီတပ်ဖွဲ့ဝင်တွေက မီးဝင်ရှို့တဲ့အတွက် နေအိမ် ၃၅ လုံး ပျက်စီးခဲ့ပါတယ်လို့ မင်းဘူးမြို့မှဒေသခံတဦးက ပြောပါတယ်။

ဒါ့အပြင် စစ်ကိုင်းတိုင်း၊ ကန့်ဘလူမြို့နယ်၊ ပင့်သာတိုက်နယ်ထဲက အိမ်ခြေ ၂၀၀ ဝန်းကျင်ရှိတဲ့ ပင့်သာ (တည်ပင်)ကျေးရွာကိုလည်း ဇန်နဝါရီ ၁၁ ရက်ညနေပိုင်းမှာ အင်အား ၁၀၀ ကျော်ပါတဲ့ စစ်ကောင်စီ စစ်ကြောင်းက ဝင်ရောက်မီးရှို့ခဲ့ပြီး အင်းမရွာနဲ့ ဖလားရရွာတို့ကိုလည်း ဇန်နဝါရီ ၁၃ ရက်မှာမီးရှို့ဖျက်ဆီးခဲ့တယ်လို့ ကျွန်းလှ ကန့်ဘလူ တက်ကြွလှုပ်ရှားသူများအဖွဲ့ – ကန့်ဘလူခရိုင်မှ တာဝန်ရှိသူအမျိုးသမီးတဦးက ပြောပါတယ်။

အဆိုပါကျေးရွာ ၂ ရွာက မီးလောင်ပျက်စီးတဲ့ အိမ်ခြေအရေအတွက်ကိုတော့ မသိရသေးပါဘူး။

အလားတူ ဇန်နဝါရီ ၁၃ ရက်မှာပဲ ဒီပဲယင်း၊ မြို့မရပ်ကွက်မှာရှိတဲ့ နေအိမ် ၁ အိမ်ကို စစ်ကောင်စီတပ်ဖွဲ့ဝင်တွေက မီးရှို့ဖျက်းဆီးခဲ့ပြီးနောက် တော်လှန်ရေးတပ်ဖွဲ့တွေနဲ့ ထိတွေ့ပစ်ခတ်မှုတွေဖြစ်ခဲ့တယ်လို့ Freedom Revolution Force(FRF) အဖွဲ့ဝင်တဦးက ပြောပါတယ်။

ဇန်နဝါရီ ၁၄ ရက်မနက်ပိုင်းမှာတော့ ချောက်မြို့နယ်၊ ဆည်ကန်ကျေးရွာက နေအိမ် ၃ လုံးကို စစ်ကောင်စီတပ်သားတွေက မီးရှို့ဖျက်ဆီးခဲ့တယ်လို့ ချောက်မြို့ ဒေသခံတဦးက ပြောပါတယ်။

စစ်အာဏာသိမ်းပြီးနောက် ၃ နှစ်ကျော်ကာလအတွင်း မီးရှို့ဖျက်ဆီးမှုတွေကြောင့် နိုင်ငံတဝှမ်း အရပ်သားနေအိမ် ၁ သိန်းကျော် (၁၀၆,၄၀၉) ပျက်စီးခဲ့တယ်လို့ Data for Myanmar ရဲ့၂၀၂၄ စက်တင်ဘာလအစီရင်ခံစာမှာ ဖော်ပြထားပါတယ်။

အဲ့ဒီထဲမှာ စစ်ကိုင်းတိုင်းက နေအိမ်ပေါင်း ၇၃,၉၇၄ လုံးပျက်စီးဆုံးရှုံးခဲ့ပြီး တနိုင်ငံလုံးမီးရှို့ဖျက်ဆီးခံရတဲ့ အရပ်သားနေအိမ် စုစုပေါင်းရဲ့ ၆၉ ရာခိုင်နှုန်းကျော်ရှိကာ မကွေးတိုင်း၊ မန္တလေးတိုင်း၊ ရခိုင်ပြည်၊ ချင်းပြည်နဲ့ တနင်္သာရီတိုင်းတို့မှာ နေအိမ်ပေါင်း ၂၉,၆၉၆ ပျက်စီးခဲ့တယ်လို့ အစီရင်ခံစာမှာ ဖော်ပြထားပါတယ်။

စစ်ကိုင်း၊ ဇန်နဝါရီ ၁၅၊ ၂၀၂၅။

စစ်ကိုင်းတိုင်း၊ ပင်လည်ဘူးမြို့သိမ်းတိုက်ပွဲမှာ ပါဝင်ခဲ့ကြတဲ့ PDF အပတ်စဉ် (၄) အထူးတိုက်ခိုက်ရေးတပ်ဖွဲ့ကို ဇန်နဝါရီ ၁၂ ရက်မှာ လက်နက်တပ်ဆင်ပေးခဲ့တယ်လို့ အမျိုးသားညီညွတ်ရေးအစိုးရ NUG ရဲ့ အမှတ် (၁) စစ်ဒေသက ထုတ်ပြန်ပါတယ်။

အပတ်စဉ် (၄) အထူးတိုက်ခိုက်ရေးတပ်ဖွဲ့ဟာ ပင်လည်ဘူးမြို့သိမ်းတိုက်ပွဲတွင် ရွပ်ရွပ်ချွံချွံ တိုက်ပွဲဝင်ခဲ့ကြတဲ့ တပ်ဖွဲ့ဖြစ်ပြီး အမှတ် (၁) စစ်ဒေသ ကွပ်ကဲမှုအောက်ရှိ စစ်ကိုင်းတိုင်း၊ မကွေးတိုင်း၊ မန္တလေးတိုင်းအတွင်းက တပ်ဖွဲ့ဝင်တွေ ပါဝင်တယ်လို့ ထုတ်ပြန်ချက်မှာ ဖော်ပြပါတယ်။

ပင်လည်ဘူးမြို့သိမ်းစစ်ဆင်ရေးကို ၂၀၂၄ ဩဂုတ်မှာ ကချင်လွတ်မြောက်ရေးတပ် (KIA) နဲ့ PDF ပူးပေါင်းတပ်တွေ စတင်ခဲ့တာတာဖြစ်ပြီး စစ်ကောင်စီတပ်က ဗုံးသီး ၅,၀၀၀ ကျော် လေယာဉ်နဲ့ ကြဲချတဲ့ကြားက ၂ လနီးပါးအကြာမှာ သိမ်းပိုက်နိုင်ခဲ့တာဖြစ်တယ်လို့ အမျိုးသားညီညွတ်ရေးအစိုးရရဲ့ ကာကွယ်ရေးဝန်ကြီးဌာနက ၂၀၂၄ အောက်တိုဘာမှာ သတင်းထုတ်ပြန်ခဲ့ပါတယ်။

တိုက်ပွဲအတွင်း စစ်ကောင်စီတပ်ဖွဲ့ဝင် ၇၀ ဦးသေဆုံး၊ စစ်သုံ့ပန်း ၁၀၂ ဦးကို PDF ပူးပေါင်းတပ်တွေက ဖမ်းဆီးရမိခဲ့ပြီး လက်နက်ချသူ ၄၈ ဦးရှိတယ်လို့ အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာန ရဲ့ ထုတ်ပြန်ချက်အရ သိရပါတယ်။

တိုက်ပွဲပြီးတဲ့နောက် စစ်ကောင်စီတပ်ဆီကနေ လက်နက်ကြီး၊ လက်နက်ငယ်မျိုးစုံ ၄၀၀ ကျော်ရခဲ့တယ်လို့လည်း အမျိုးသားညီညွတ်ရေးအစိုးရက ဓာတ်ပုံတွေနဲ့တကွ ထုတ်ပြန်ခဲ့ပါတယ်။

ဓာတ်ပုံ – အမျိုးသားညီညွတ်ရေးအစိုးရ အမှတ် ၁ စစ်ဒေသ ဖေ့စ်ဘွခ်စာမျက်နှာ။

စာတည်း – ဟယ်ရီ

စစ်ကိုင်း၊ ဇန်နဝါရီ ၁၄၊ ၂၀၂၅။

စစ်ကိုင်းတိုင်း၊ ရွှေဘိုမြို့၊ ရွှေဘိုအကျဥ်းထောင်မှ လွတ်ရက်စေ့ပြီးလွတ်လာတဲ့ နိုင်ငံရေးအကျဥ်းသားတွေကို ရဲတပ်ဖွဲ့ဝင်တွေကထပ်မံဖမ်းဆီးပြီးချုပ်နှောင်ထားတယ်လို့ မြန်မာနိုင်ငံလုံးဆိုင်ရာနိုင်ငံရေးအကျဉ်းသားများကွန်ရက် – PPNM ဆီက သိရပါတယ်။

၂၀၂၄ အောက်တိုဘာ ကနေ ၂၀၂၅ ဇန်နဝါရီ ပထမပတ်အတွင်း ထောင်ကလွတ်လာတဲ့ နိုင်ငံရေးအကျဥ်းသား ၁၅ ဦး ထပ်မံဖမ်းဆီးခံရတာဖြစ်ပြီး အများစုမှာအမျိုးသားတွေဖြစ်တယ်လို့ ဆိုပါတယ်။

“ထောင်ကလွတ်ရက်စေ့တဲ့အချိန်မှာ ထောင်ဗူးဝအထွက်ကနေပဲ မြို့မရဲစခန်းက လာရောက် ခေါ်ဆောင်တာပါ။ ပြီးတော့ဘာပုဒ်မမှ မတပ်ပဲနဲ့ကို ဖမ်းဆီးထိန်းသိမ်းထားတာ” လို့ မြန်မာနိုင်ငံလုံးဆိုင်ရာနိုင်ငံရေးအကျဉ်းသားများကွန်ရက် – PPNM မှ ဦးဆောင်ကော်မတီဝင် ကိုသိုက်ထွန်းဦးက ပြောပါတယ်။

ဖမ်းဆီးခံထားရတဲ့ နိုင်ကျဥ်းတွေကို ရွှေဘိုမြို့မရဲစခန်းနဲ့ စခန်းအနီးရှိ စစ်ကောင်စီတပ်ဖွဲ့ဝင်တွေ ဝင်ရောက်တပ်စွဲထားတဲ့ မှန်သာဘုန်းကြီးကျောင်းအတွင်းမှာ အသီးသီး ချုပ်နှောင်ထားတာလို့ သူကဆက်ပြောပါတယ်။

“ငွေကြေးတတ်နိုင်တဲ့တချို့ကတော့ ငွေကြေးနဲ့ စကစနဲ့ ရဲအရာရှိတွေကိုပေးပြီးမှ ခေါ်ထုတ်နိုင်တာမျိုး ရှိတယ်”လို့ ကိုသိုက်ထွန်းဦးက ပြောပါတယ်။

ပြန်လည်ဖမ်းဆီးခံရသူတွေကို မိသားစုဝင်တွေနဲ့ အဆက်အသွယ်ဖြတ်ထားပြီး အခုလိုအ‌ခြေအနေတွေဟာ လွတ်ရက်စေ့ပေမယ့်လည်း လွတ်လပ်စွာသွားလာခွင့်ကို ပေါ်ပေါ်တင်တင်ချိုးဖောက်ခံနေရတာဖြစ်တယ်လို့ ကိုသိုက်ထွန်းဦးက ဆိုပါတယ်။

အခုလို ဥပဒေမဲ့ ဆက်လက်ဖမ်းဆီးထားနိုင်မှုတွေမဖြစ်ပေါ်ရန် ထိထိရောက်ရောက် တားဆီးပေးနိုင်တဲ့ အခြေအနေတွေရှိမနေတဲ့အတွက် တတ်စွမ်းတဲ့အဖွဲ့အစည်းတွေအနေနဲ့ တားဆီးရှုံ့ချတာနဲ့ အရေးယူတာတွေကို ထိထိရောက်ရောက်လုပ်ဆောင်ပေးဖို့ကိုလည်း PPNM ရဲ့ထုတ်ပြန်ချက်မှာ ရေးသားထားပါတယ်။

စစ်အာဏာသိမ်းချိန်ကနေ ၂၀၂၅ ဇန်နဝါရီ ၁၃ ရက်အထိ ဖမ်းဆီးခံရသူ စုစုပေါင်း ၂၈,၂၀၂ ဦးရှိပြီး အဲ့ဒီထဲမှာ ၂၁,၄၉၃ ဦးက ထိန်းသိမ်းခံထားရဆဲဖြစ်တယ်လို့ နိုင်ငံရေးအကျဥ်းသားများ ကူညီစောင့်ရှောက်ရေးအသင်း – AAPP က ထုတ်ပြန်ထားပါတယ်။

စာတည်း – လင်း