လေကြောင်းတိုက်ခိုက်

စလင်း၊ မတ် ၂၁၊ ၂၀၂၅။

မကွေးတိုင်း၊ စလင်းမြို့နယ်၊ ကင်မွန်းချုံကျေးရွာအုပ်စု၊ ကင်မွန်းချုံရွာက ဘုန်းကြီးကျောင်းကို စစ်ကောင်စီတပ်က လေကြောင်းကနေ ဗုံးကြဲတိုက်ခိုက်ခဲ့လို့ အမျိုးသား ၁ ဦး သေဆုံးပြီး ကိုယ်ဝန်ဆောင်မိခင် ၁ ဦးနဲ့ ကပ္ပိယ ၂ ဦး ဒဏ်ရာရခဲ့တယ်လို့ စလင်းမြို့ခံတွေဆီက သိရပါတယ်။

မတ် ၂၀ ရက် ကင်းမွန်းချုံရွာဝန်းကျင်မှာ လေယာဉ်တွေ သုံးလေးခေါက်ပျံဝဲနေခဲ့ပြီး ညနေ ၄ နာရီ ၂၃ မိနစ်မှာ ပျံသန်းလာတဲ့ လေယာဉ် ၂ စီးထဲက ၁ စီးဟာ ဗုံးကြဲချသွားတာဖြစ်တယ်လို့ စလင်းမြို့ခံတဦးကပြောပါတယ်။

“ဂျက်ဖိုက်တာနဲ့ ၃ လုံးကြဲသွားတာ ကင်မွန်းချုံဘုန်းကြီးကျောင်းကို ကြဲသွားတာ။ ဘုန်းကြီးကျောင်းကတော့ တော်တော်လေးစုတ်ပြတ်သွားတယ်။ ကျောင်းရှေ့ဇရပ်နားမှာနေတဲ့ အမျိုးသားက ရေနွေးသွားထည့်တာလို့ပြောတယ်။ အသက် ၅၇ နှစ်၊ အဲ့ ၁ ယောက် သေဆုံးတယ်။ ကျောင်းအောက်မှာနေတဲ့ ကပ္ပိယကြီး ၂ ယောက် ဒဏ်ရာရတယ်။ ဘုန်းကြီးကျောင်းနဲ့ မလှမ်းမကမ်းမှာရှိတဲ့ အိမ် ၁ အိမ်က ကိုယ်ဝန်ဆောင်အမျိုးသမီး ၁ ယောက် ထိတယ်။” လို့ စလင်းမြို့ခံအမျိုးသမီးတဦးက ပြောပါတယ်။

ဒဏ်ရာရရှိသူ ကပ္ပိယ ၂ ဦးဟာ အသက် ၅၀ အရွယ်ခန့်ရှိကြပြီး ကိုယ်ဝန်ဆောင်အမျိုးသမီးကတော့ အသက် ၃၀ အရွယ်ရှိကာ ကိုယ်ဝန် ၇ လရှိပြီလို့ ဆိုပါတယ်။

ကင်မွန်းချုံကျေးရွာဟာ ၂၀၂၂ မတ်လ ၂၈ ရက်နေ့ကတည်း ငလှိုင်တွင်းရေနံမြေမှာ အထိုင်ချထားတဲ့ စလင်းမြို့အခြေစိုက် စစ်ကောင်စီတပ်ဖွဲ့ဝင်တွေက နေအိမ်တွေကို မီးရှို့ခဲ့တာကြောင့် ဆောဘက်ကိုပြောင်းပြီးတော့ စစ်ရှောင်စခန်းတခုအနေနဲ့ နေခဲ့ကြသူတွေဖြစ်ပြီး မကြာခင်ကမှ ကျေးရွာအတွင်းမှာ ပြန်လည်နေထိုင်ကြသူတွေဖြစ်ပါတယ်။

လက်ရှိအချိန်မှာတော့ အိမ်ထောင်စု ၁၅၇ စု လူဦးရေ ၅၅၀ ကျော်ရှိ ကင်းမွန်းချုံရွာ ဒေသခံပြည်သူတွေဟာ လေကြောင်းတိုက်ခိုက်မှုကြောင့် တရွာလုံးထွက်ပြေးတိမ်းရှောင်နေကြတယ်လို့ သိရပါတယ်။

စာတည်း – ကိုချမ်း

ကနီ၊ မတ် ၁၉၊ ၂၀၂၅။

စစ်ကိုင်းတိုင်း၊ ကနီမြို့နယ်၊ အုမ္မနဲ့ယင်းကျေးရွာကြားမှာ လေကြောင်းတိုက်ခိုက်ခံရလို့ အမျိုးသမီး ၂ ဦးဒဏ်ရာရတယ်လို့ ကနီမြို့နယ်ပကဖထံက သိရပါတယ်။

မတ် ၁၈ ရက် မနက် ၁၁ နာရီ မိနစ် ၂၀ ခန့်မှာ အဆိုပါကျေးရွာ ၂ ရွာကြားက လမ်းနဲ့ယာခင်းတွေကို စစ်ကောင်စီတပ်ဖွဲ့ဝင်တွေဘက်က ဂျက်ဖိုက်တာ ၂ စီးနဲ့ လေကြောင်းတိုက်ခိုက်မှု ၂ ကြိမ်ပြုလုပ်ခဲ့တယ်လို့ ဆိုပါတယ်။

“မထင်မှတ်လည်း လာကြဲတာပေါ့။ စစ်ရေးလှုပ်ရှားမှု ဘာမှလည်းမရှိဘူး။ တောသွားလမ်းတွေမှာ ကျတာ။ လှည်းနဲ့သွားနေချိန် ထိတာ။ ရော့ကက်တွေနဲ့ ပစ်ခတ်သွားတာ။”လို့ ကနီမြို့နယ်ပကဖတာဝန်ခံက ပြောပါတယ်။

တိုက်ပွဲဖြစ်ပွါးတာမရှိဘဲ စစ်ကောင်စီတပ်က လေကြောင်းကနေတိုက်ခိုက်ခဲ့တာကြောင့် ကုန်းသာကျေးရွာနေ အသက် ၂၀ ကျော်အရွယ် မယဥ်ယဥ်ဌေးမှာ ဘယ်လက်မောင်း၊ ဘယ်ဦးခေါင်း၊ နားရွက်နဲ့ ယင်းကျေးရွာနေ အသက် ၃၂ နှစ်အရွယ် မခင်လှိုင်ဝင်းမှာ ဝမ်းဗိုက်နဲ့ဦးခေါင်းတွေမှာ ထိခိုက်ဒဏ်ရာရခဲ့ပြီး လှည်း ၁ စီးပျက်စီးသွားသလို နွား ၂ ကောင်လည်း ထိခိုက်ဒဏ်ရာရသွားတယ်လို့ သိရပါတယ်။

မတ် ၁၀ ရက်ကလည်း ကနီမြို့နယ်၊ ချင်းတွင်းမြစ်ကမ်းဘေးက နတ်ကြီးရွာကိုတိုက်လေယာဉ်နဲ့ ဗုံးကြဲခံရလို့ ၁ ဦး သေဆုံး ၁ ဦး ဒဏ်ရာရတယ်လို့ သိရပါတယ်။

စာတည်း – ကိုချမ်း

ကလေး၊ ဖေဖော်ဝါရီ ၂၀၊ ၂၀၂၅။

တော်လှန်ရေးအင်အားစုတွေထိန်းချုပ်ထားတဲ့ ကလေးမြို့နယ်တောင်ပိုင်းက ဆေးရုံ ၁ ခုကို စစ်ကောင်စီက ဖေဖော်ဝါရီ ၁၃ ရက်မှာ လေကြောင်းတိုက်ခိုက်ခဲ့တယ်လို့ People’s Healthcare Network (Kalay) က သတင်းထုတ်ပြန်ပါတယ်။

Golden Valley Revolution Hospital – ရွှေတောင်ကြားတော်လှန်ရေးဆေးရုံကို နံနက် ၁၀ နာရီခွဲမှာ တိုက်ခိုက်ခံရတာဖြစ်ပြီး People’s Healthcare Network (Kalay) ရဲ့ ကျန်းမာရေးစေတနာ့ဝန်ထမ်း ၅ ဦး ထိခိုက်ဒဏ်ရာအနည်းငယ်ရရှိခဲ့တယ်လို့ ထုတ်ပြန်ချက်မှာ ဖော်ပြပါတယ်။

အဆိုပါ လေကြောင်းတိုက်ခိုက်ခံရမှု ဖြစ်ရပ်အသေးစိတ်ကိုတော့ မြေလတ်အသံက စုံစမ်းနေဆဲဖြစ်ပါတယ်။

ကလေးမြို့နယ်က CDM ကျန်းမာရေးဝန်ထမ်းတွေက People’s Healthcare Network – Kalay ကို ၂၀၂၂ နှစ်စပိုင်းမှာ ထူထောင်ပြီး မြို့နယ်တောင်ပိုင်းမှာ ၁၂ ကုတင်ဆံ့ ဆေးရုံ ၁ ခု၊ မြောက်ပိုင်းမှာ ဆေးရုံ ၁ ခုနဲ့ ကျန်းမာရေးစင်တာ ၆ ခုဖွင့်ကာ ဒေသခံတွေကို ဆေးကုသမှုပေးနေတယ်လို့ ကျန်းမာရေးဝန်ထမ်းတွေက ပြောပါတယ်။

၂၀၂၃ နိုဝင်ဘာ ၉ ရက်မှာလည်း ကလေးမြို့နယ်တောင်ပိုင်းက မြောက်စည်းရွာတိုက်ပွဲအတွင်းမှာ စစ်ကောင်စီရဲ့ လက်နက်ကြီးနဲ့ လေကြောင်းတိုက်ခိုက်မှုကြောင့် ကျေးလက်ဆေးခန်းတခုလုံး ပျက်စီးသွားခဲ့ပါတယ်။

စစ်ရေးနဲ့မဆိုင်တဲ့ကဏ္ဍတွေ အကြမ်းဖက်တိုက်ခိုက်ခံရမှုကို စောင့်ကြည့်စာရင်းပြုစုနေတဲ့ Insecurity Insight ဝက်ဘက်ဆိုဒ်ပါ အချက်အလက်တွေအရ ၂၀၂၁ စစ်အာဏာသိမ်းတဲ့ ဖေဖော်ဝါရီ ၁ ရက်ကနေ ဒီနေ့အထိ နိုင်ငံအနှံ့က ကျန်းမာရေးအဆောက်အအုံတွေ ၃၅၅ ကြိမ် တိုက်ခိုက်ခံရပြီး အသတ်ခံရတဲ့ ကျန်းမာရေးလုပ်သား ၁၃၅ ယောက်ရှိပါတယ်။

၂၀၂၃ ကစလို့ စစ်ကိုင်းတိုင်းအတွင်းက စစ်ကောင်စီတပ်နဲ့ တော်လှန်ရေးတပ်ဖွဲ့တွေကြားတိုက်ပွဲတွေအတွင်း ကျန်းမာရေးကဏ္ဍထိခိုက်ခံရမှု သိသိသာသာများလာတယ်လို့ Insecurity Insight ရဲ့ အစီရင်ခံစာက ဆိုပါတယ်။

ကျန်းမာရေးကဏ္ဍတိုက်ခိုက်ခံရမှုအကြိမ်ရေ စုစုပေါင်းမှာ ၁,၅၈၄ ကြိမ်ရှိပြီး အကြိမ်ရေ ၁,၁၀၉ ကို စစ်ကောင်စီတပ်နဲ့ ရဲက ကျူးလွန်ခဲ့တယ်လို့ အဆိုပါ ဝက်ဘက်ဆိုဒ်ရဲ့ စာရင်းမှာ တွေ့ရပါတယ်။

စစ်ကိုင်း၊ ဖေဖော်ဝါရီ ၁၉၊ ၂၀၂၅။

စစ်ကိုင်းတိုင်း၊ ကနီမြို့နယ်နဲ့ ချောင်းဦးမြို့နယ်မှာ စစ်ကောင်စီတပ်ဖွဲ့ဝင်တွေက စက်တပ်လေထီးနဲ့ဗုံးကြဲတာ၊ လက်နက်ကြီးနဲ့ ပစ်ခတ်တာတွေ လုပ်ခဲ့ပြီး အရပ်သားပြည်သူ ၇ ဦးသေဆုံးကာ ဒဏ်ရာရရှိသူ ၂၀ ဝန်းကျင်ရှိတယ်လို့ ဒေသခံတွေဆီက သိရပါတယ်။

ဖေဖော်ဝါရီ ၁၈ ရက် မနေ့ နေ့လယ်ပိုင်းမှာ မုံရွာနမခကနေ တက်လာတဲ့ စက်တပ်လေထီးနဲ့ ကနီမြို့နယ်၊ ချောင်းမကျေးရွာကို ဗုံး ၂ လုံးကြဲချခဲ့ပြီး ပြည်သူ ၃ ဦး ပွဲချင်းပြီးသေဆုံးကာ ဆေးကုသနေရင်း ၂ ဦး ထပ်မံသေဆုံးခဲ့တာကြောင့် စုစုပေါင်း ၅ ဦးသေဆုံးခဲ့တယ်လို့ ဆိုပါတယ်။

အဆိုပါ ဗုံးကြဲတိုက်ခိုက်မှုအတွင်း ကိုနေမင်းဝင်း၊ ကိုဟန်ကိုကို၊ ကိုချစ်ဦး၊ ဒေါ်မြတ်ဌေးနဲ့ အချက်အလက်စုံစမ်းဆဲ အမျိုးသား ၁ ဦးတို့ သေဆုံးခဲ့ကာ ၁၅ ယောက်ကျော် ဒဏ်ရာရရှိထားပြီး သေဆုံးသူတွေထဲမှာ အသက် ၁၇ နှစ်အရွယ် လူငယ် ၁ ဦးလည်း ပါဝင်တယ်လို့ သိရပါတယ်။

“ထိတာ တော်တော်များတယ်၊ ဘော်လန်ဒီယာဆရာမ ၁ ယောက်လည်း တကိုယ်လုံးအနှံ့ ဒဏ်ရာရတယ်။ G 11 ကျောင်းသား ၁ ယောက်တော့ (သေဆုံးတာ) သေချာတယ်။”လို့ ကနီဒေသခံ အမျိုးသမီးတဦးက ပြောပါတယ်။

ဒါ့အပြင် အဲ့ဒီနေ့ ညနေ ၆ နာရီဝန်းကျင်မှာလည်း ချောင်းဦးမြို့နယ်၊ မြပုလဲဂိတ်မှာရှိတဲ့ စစ်ကောင်စီတပ်ဖွဲ့ဝင်တွေက လက်နက်ကြီးနဲ့ပစ်ခတ်လို့ ကျီကုန်းကျေးရွာက ပြည်သူ ၂ ဦး ထိမှန်သေဆုံးခဲ့ပြီး အသက် ၅ နှစ်အရွယ် ကလေးငယ် ၁ ဦးအပါအဝင် ၃ ဦး ဒဏ်ရာရခဲ့တယ်လို့ ဆိုပါတယ်။

ပြီးခဲ့တဲ့ ဖေဖော်ဝါရီ ၁၂ ရက်ကနေ ၁၄ ရက်အထိ ၃ ရက်တာအတွင်း ကလေးမြို့နယ်၊ မုံရွာမြို့နယ်နဲ့ ချောင်းဦးမြို့နယ်မှာ စစ်ကောင်စီတပ်ဖွဲ့ဝင်တွေရဲ့ လေကြောင်းတိုက်ခိုက်မှုတွေကြောင့် ကလေးငယ် ၆ ဦးအပါ အရပ်သား ပြည်သူ ၁၅ ဦး သေဆုံးခဲ့တယ်လို့ သိရပါတယ်။

ပဲခူး၊ ဖေဖော်ဝါရီ ၁၄၊ ၂၀၂၅။

ပဲခူး၊ ရန်ကုန်နဲ့ မွန်ဒေသတွေက တော်လှန်ရေးအင်အားစုတွေပါဝင်ပြုလုပ်တဲ့ အစည်းအဝေးနေရာ လေယာဉ်နဲ့ဗုံးကြဲခံရလို့ ၃ ဦးကျဆုံးခဲ့ပြီး ၅ ဦးဒဏ်ရာရခဲ့တယ်လို့ အစည်းအဝေးတက်ရောက်ခဲ့သူ အဖွဲ့ဝင်တွေထံက သိရပါတယ်။

မွန်ပြည်နယ်၊ ကျိုက်ထိုနယ်၊ ပိန္နဲကုန်းကျေးရွာအတွင်း ပဲခူးတိုင်းနဲ့ KNU တပ်မဟာ ၁ လက်အောက် တော်လှန်ရေးအင်အားစုတွေ အစည်းအဝေးပြုလုပ်နေချိန် ဖေဖော်ဝါရီ ၁၃ ရက် မနေ့မနက် ၁၁ နာရီခန့်မှာ စစ်ကောင်စီတပ်က ဗုံး ၄ လုံးကြဲချ တိုက်ခိုက်ခဲ့တာလို့ ဆိုပါတယ်။

“ကျနော်တို့ ဒီဘက်က အဖွဲ့တွေအစည်းအဝေးလုပ်နေချိန်မှာ ပေါင် ၂၀၀ နဲ့လာချသွားတာ၊ စုစုပေါင်း ၄ လုံး။ ၃ မိနစ် ၄ မိနစ်လောက်ခြားလာချတာ။ တစီးပြီးတစီးလှည့်ပြီးချတာ။ စခန်းပတ်လည်ကိုကျတာ။” လို့ အစည်းအဝေးတက်ရောက်ခဲ့သူ ကာကွယ်ရေးတပ်ဖွဲ့ဝင်တဦးက မြေလတ်အသံကို ပြောပါတယ်။

ဗုံးကြဲတိုက်ခိုက်ခံရလို့ အစည်းအဝေးတက်ရောက်ခဲ့သူတွေအနက် ဒိုက်ဦးပကဖ အဖွဲ့ဝင် ၁ ဦး၊ ခရမ်းပကဖ အဖွဲ့ဝင် ၂ ဦး စုစုပေါင်း ၃ ဦး ဗုံးစထိမှန် ကျဆုံးခဲ့ပြီး နောက်ထပ် ၅ ဦး ထိခိုက်ဒဏ်ရာရသွားသလို ကျေးရွာဘုန်းကြီးကျောင်းနဲ့ နေအိမ် ၂ လုံးပျက်စီးသွားခဲ့တယ်လို့ သိရပါတယ်။

ကျဆုံးတပ်ဖွဲ့ဝင်တွေရဲ့ အသေးစိတ်အချက်အလက်တွေနဲ့ပတ်သက်ပြီး လုံခြုံရေးအခြေအနေအရ ထုတ်ဖော်ပြောလို့မရနိုင်သေးဘူးလို့ ၎င်းက ဆိုပါတယ်။

ကျိုက်ထိုနယ်ထဲမှာ တော်လှန်ရေးတပ်ဖွဲ့ဝင်တွေ ပြုလုပ်တဲ့အစည်းအဝေး လေကြောင်းကဗုံးကြဲတိုက်ခိုက်ခံရလို့ ကာကွယ်ရေးတပ်ဖွဲ့ဝင်တချို့ကျဆုံးမှုရှိခဲ့ကြောင်း ကျိုက်ထိုနယ်အတွင်းလှုပ်ရှားနေတဲ့ နောက်ထပ် PDF တပ်ဖွဲ့ဝင်တဦးကလည်း အတည်ပြုပါတယ်။

အစည်းအဝေးလုပ်နေချိန် လေကြောင်းကနေ လာရောက်ဗုံးလာကြဲတိုက်ခိုက်သွားတာဟာ အစည်းအဝေးလုပ်မယ့်သတင်း ပေါက်ကြားတာကြောင့်ဖြစ်နိုင်တယ်လို့ အစည်းအဝေးတက်ရောက်ခဲ့သူ တပ်ဖွဲ့ဝင်က သုံးသပ်ပြောပါတယ်။

လေကြောင်းကနေဗုံးကြဲပြီးနောက် နာရီဝက်ခန့်အကြာမှာ သိမ်ဇရပ်အခြေစိုက် ခမရ ၂၀၇ နဲ့ အမတ ၃၁၀ တပ်တွေကနေ ဒရုန်းတွေတက်လာပြီး ပိန္နဲကုန်းကျေးရွာအနီးတဝိုက်ကို ဗုံးသီး ၆ လုံးခန့် ထပ်မံကြဲချခဲ့ပေမယ့် ဒရုန်းဗုံးတိုက်ခိုက်မှုမှာတော့ လူထိခိုက်တာမရှိဘူးလို့ သိရပါတယ်။

ယမန်နေ့ညနေ ၄ နာရီခန့်မှာပဲ ကျိုက်ထိုမြို့နယ်၊ ကော်ကပ်ကျေးရွာကို စစ်ကောင်စီတပ်က တိုက်လေယာဉ် ၁ စီးနဲ့ ပေါင် ၅၀၀ ဗုံးတလုံးကြဲချခဲ့ရာ ကျေးရွာစာသင်ကျောင်း ၁ ကျောင်း ပျက်စီးခဲ့သေးတယ်လို့ ဆိုပါတယ်။

စာတည်း – ဟိန်းစံ

စစ်ကိုင်း၊ ဖေဖော်ဝါရီ ၇၊ ၂၀၂၅။

စစ်ကိုင်းတိုင်း၊ ကနီမြို့နယ်၊ ဆူးလေကုန်းရွာကို စစ်ကောင်စီတပ်ဖွဲ့ဝင်တွေက စက်တပ်လေထီးနဲ့ ဗုံးချတိုက်ခိုက်ခဲ့တာကြောင့် ဒေသခံအမျိုးသား ၁ ဦးသေဆုံးပြီး ၁ ဦးဒဏ်ရာရခဲ့တယ်လို့ ဒေသခံတွေဆီက သိရပါတယ်။

ဖေဖော်ဝါရီ ၇ ရက် မနက် ၁ နာရီလောက်မှာ မုံရွာအခြေစိုက် အနောက်မြောက်တိုင်းစစ်ဌာနချုပ်ဘက်က တက်လာတဲ့ စက်တပ်လေထီး ၁ စီးက ဗုံးသီး ၆ လုံးကြဲချခဲ့တယ်လို့ဆိုပါတယ်။

“ဗုံးက ရွာကဘုန်းကြီးကျောင်းနဲ့ လူနေအိမ် ၁ လုံးပေါ်ကျတယ်။ ဗုံးကျတဲ့နေအိမ်က သေဆုံးထိခိုက်တာ ရှိတယ်။ ဗုံးအပိုင်းအစ ဒလက် ၃ ခုလည်း သိမ်းမိထားတာရှိတယ်။”လို့ ဒေသခံတဦးက ပြောပါတယ်။

ဒီတိုက်ခိုက်မှုကြောင့် ကျေးရွာထဲက အသက် ၃၀ ကျော်အမျိုးသား ၁ ဦးသေဆုံးခဲ့ပြီး တအိမ်တည်းနေ နောက်ထပ်အမျိုးသား ၁ ဦးလည်း ဒဏ်ရာပြင်းထန်ရခဲ့ကာ နေအိမ်လည်းပျက်စီးခဲ့တယ်လို့ ဆိုပါတယ်။

ဒါ့အပြင် ကျေးရွာဘုန်းကြီးကျောင်း အဆောက်အဦတွေလည်းပျက်စီးပြီး ကျောင်းဝန်းအတွင်းရှိ ကား ၂ စီးလည်း ပျက်စီးခဲ့တယ်လို့သိရပါတယ်။

အိမ်ခြေ ၁,၀၀၀ နီးပါး၊ လူဦးရေ ၅၀၀၀ ခန့်ရှိတဲ့ ဆူးလေကုန်းကျေးရွာဟာ ယခုလိုဗုံးချခံရတာက ပထမဆုံးအကြိမ်ဖြစ်တယ်လို့ အထက်ပါဒေသခံကပြောပါတယ်။

ပြီးခဲ့တဲ့နှစ် ဒီဇင်ဘာ ၁၆ ရက်ကလည်း ကနီမြို့နယ်၊ ကျောက်လှေကားကျေးရွာကို စစ်ကောင်စီတပ်ဖွဲ့ဝင်တွေက လေကြောင်းကနေ ဗုံးကြဲတိုက်ခိုက်ခဲ့တာကြောင့် အသက် ၁၁ နှစ်ကနေ ၁၈ နှစ်ကြား ကျောင်းသား ၃ ဦးအပါအဝင် စုစုပေါင်းဒေသခံ ၅ ဦးသေဆုံးပြီး ၉ ဦးဒဏ်ရာရခဲ့ပါသေးတယ်။

စာတည်း – လင်း

ကျော်ကြီး၊ နန်းခမ်း။

မန္တလေး၊ ဇန်နဝါရီ ၂၆၊ ၂၀၂၅။

မန္တလေးတိုင်း၊ မြင်းခြံမြို့နယ်၊ ဆင်းဂွတ်ကျေးရွာကို စစ်ကောင်စီက လေကြောင်းကနေဗုံးကြဲပစ်ခတ်ခဲ့တာကြောင့် ကာကွယ်ရေးတပ်ဖွဲ့ဝင်တွေနဲ့ပြည်သူ စုစုပေါင်း ၂၀ ဦးဝန်းကျင် သေဆုံးခဲ့တယ်လို့ ဒေသခံကာကွယ်ရေးတပ်ဖွဲ့ဝင်တွေဆီက သိရပါတယ်။

ဇန်နဝါရီ ၂၆ ရက်မနက် ၇ နာရီကျော်မှ တိုက်လေယာဉ် ၁ စီး၊ ရဟတ်ယာဥ် ၁ စီးနဲ့ ဗုံးကြဲပြီး ပစ်ခတ်တာတွေလုပ်ခဲ့တာလို့ဆိုပါတယ်။

“ခုလောလောဆယ် အမိန့်ပြန်တမ်းလုပ်နေရတော့ လောလောဆယ်အသေးစိတ်ဖြေပေးဖို့ ခက်သေးတယ်။ ဗုံးတွေက စခန်းအရှေ့ထဲကိုကျတာ။ ရပ်ကျေးပကဖ စခန်းထဲကို ကျတာပါ။ လောလောဆယ် ၁၈ ဦးကျတာတော့ အတည်ပြုထားနိုင်သေးတယ်။”လို့ လေကြောင်းတိုက်ခိုက်ခံရတဲ့ နေရာအနီးမှာရှိနေတဲ့ ကာကွယ်ရေးတပ်ဖွဲ့ဝင်တဦးက ပြောပါတယ်။

ဗုံးကြဲပစ်ခတ်ခံရလို့ ဆင်းဂွတ်ကျေးရွာ ရပ်ကျေးပြည်သူ့ကာကွယ်ရေးအဖွဲ့ဝင်တွေအပါအဝင် ကာကွယ်ရေးတပ်ဖွဲ့ဝင် ၁၁ ဦး၊ ပြည်သူ ၇ ဦး သေဆုံးထားပြီး ဒဏ်ရာရပြည်သူ ၁ ဦးအပြင် ကာကွယ်ရေးတပ်ဖွဲ့ဝင်တွေထဲကလည်း ထိခိုက်သူတွေရှိတယ်လို့ သိရပါတယ်။

“ကျေးရွာစာသင်ကျောင်းထဲမှာ ရွာကလူတွေနဲ့ အစည်းအဝေးလုပ်အပြီးမှာ ဖြစ်တာ။ ဆင်းဂွတ်ပကဖက တယောက်နဲ့ စာသင်ကျောင်းဖွင့်ပွဲတခုဆုံသေးတယ်။ မနက်ကျလေယာ​​ဉ်ပစ်တယ်ဆိုတော့ သူ့ဆီ ဖုန်းဆက်လိုက်တာ ဖုန်းကိုင်တယ်။ သူကပြေးလွှားဖို့ အော်နေတယ်။ နောက်နာရီဝက်လောက်နေတော့ သူလည်းသေသွားတယ်။ သူက အဲ့ရွာကခေါင်းဆောင်။ အဲ့ထဲမှာ မြောင်ကရဲဘော်လည်း တယောက်ပါတယ်။ အချို့ဆို လွင့်ပြီးအပင်ပေါ်မှာတင်နေတာတွေလည်း ရှိတယ်။ အဲ့ဒါတွေကျ ဘယ်သူဘယ်ဝါမှန်းမသိရသေးဘူး။”လို့ CDSOM အဖွဲ့မှ ကိုနွေဦးကပြောပါတယ်။

ဒီလေကြောင်းတိုက်ခိုက်မှုအတွင်း ထိခိုက်သေဆုံးမှုတွေနဲ့ပတ်သက်တဲ့ နောက်ဆက်တွဲ အခြေအနေတွေကိုတော့ မြေလတ်အသံက ဆက်လက်စုံစမ်းနေပါတယ်။

သေဆုံးသူတွေရဲ့နာရေးကိုပြုလုပ်နိုင်ဖို့အတွက် ကျန်ရှိကာကွယ်ရေးအဖွဲ့ဝင်တွေက လုပ်ဆောင်နေပြီး ဒဏ်ရာရသူတွေကို ဆေးကုသနိုင်ဖို့လည်းလုပ်ဆောင်နေကြတယ်လို့ သိရပါတယ်။

စာတည်း – လင်း

မြေလတ်အသံ၊ ဇန်နဝါရီ ၁၇၊ ၂၀၂၅။

တော်လှန်ရေးတပ်ဖွဲ့တွေ ထိန်းချုပ်ထားတဲ့ ခမ်းပါတ်မြို့နဲ့ ကနန်ရွာကို စစ်ကောင်စီက ဇန်နဝါရီ ၁၆ ရက် ညက လေကြောင်းတိုက်ခိုက်ခဲ့တာကြောင့် အသက် ၂ နှစ်အရွယ်ကလေးအပါအဝင် ၂ ဦးသေဆုံးပြီး ၈ ဦးဒဏ်ရာရကာ လူနေအိမ် ၂၀ ကျော်ပျက်စီးခဲ့တယ်လို့ သိရပါတယ်။

စစ်ကောင်စီက တံတားဦးလေတပ်ကနေ ခမ်းပါတ်မြို့ အမှတ် ၁ ရပ်ကွက်နဲ့ ကနန်ရွာ ဘုန်းကြီးကျောင်းကို ည ၈ နာရီခွဲအချိန်မှာ ‌လေကြောင်း ၃ ကြိမ် တိုက်ခိုက်ခဲ့တာလို့ဆိုပါတယ်။

စစ်တပ်ရဲ့ လေကြောင်းတိုက်ခိုက်မှုကြောင့် ခမ်းပါတ်မြို့အမှတ် ၁ ရပ်ကွက်မှာ နေထိုင်တဲ့ ပလဖ ရဲဘော် ၁ ဦးနဲ့ အသက် ၂ နှစ် အရွယ် ကလေးငယ် ၁ ဦး သေဆုံးခဲ့ပါတယ်။

ဒါ့အပြင် ကနန်ရွာက ဘုန်းကြီး ၁ ပါးနဲ့ ခမ်းပါတ်မြို့က ပလဖရဲဘော် ၂ ဦးအပါအဝင် ဒေသခံပြည်သူ ၇ ဦး ထိခိုက်ဒဏ်ရာရရှိခဲ့တယ်လို့ ခမ်းပါတ်မြို့မှာ နေထိုင်တဲ့ဒေသခံ အမျိုးသားတဦးက ပြောပါတယ်။

လက်ရှိမှာ ထိခိုက်ဒဏ်ရာရရှိတဲ့ ဒေသခံနဲ့ ရဲဘော်တွေဟာ နီးစပ်ရာဆေးရုံတွေမှာ ဆေးကုသမှုခံယူနေရတယ်လို့ သူက ဆက်ပြောပါတယ်။

ပြီးခဲ့တဲ့ရက်ပိုင်းက NUG ဝန်ကြီးတချို့က စစ်ကိုင်းတိုင်းမှာ ရုံးထိုင်မယ်လို့ မီဒီယာတွေမှာ ပြောဆိုပြီးနောက်ပိုင်း ဒေသကာကွယ်ရေးတပ်တွေ သိမ်းပိုက်ထားတဲ့ ခမ်းပါတ်မြို့ကို စစ်ကောင်စီက လေကြောင်းကနေ ဗုံးကြဲတိုက်ခိုက်ခဲ့တာပါ။

အခုလိုလေကြောင်းက ဗုံးကြဲခံရပြီးနောက်မှာတော့ ခမ်းပါတ်မြို့အပါအဝင် ကနန်ရွာ၊ ဘုတ်ကန်ရွာက ဒေသခံတချို့ ထွက်ပြေးတိမ်းရှောင်နေကြရတယ်လို့ သိရပါတယ်။

၂၀၂၄ ဇန်နဝါရီ ၇ ရက်တုန်းကလည်း ခမ်းပတ်မြို့အနီးက ကနန်ကျေးရွာကို စစ်ကောင်စီက A5 လေယာဉ် အမျိုးအစားနဲ့ ဗုံး ၅ လုံးကျော် ကြဲချတိုက်ခိုက်ခဲ့ရာ ကျေးရွာအနောက်ပိုင်း စာသင်ကျောင်းနဲ့ ဘုရားကျောင်းအနီး ကျရောက်ပေါက်ကွဲပြီး ကလေး ၄ ဦးအပါအဝင် အရပ်သားပြည်သူ စုစုပေါင်း ၁၆ ဦး အစုလိုက်အပြုံလိုက် သေဆုံးခဲ့ပါသေးတယ်။

ခမ်းပါတ်မြို့ကို ၂၀၂၃ နိုဝင်ဘာ ၅ ရက်က ဒေသကာကွယ်ရေးပူးပေါင်း‌တပ်တွေက တိုက်ခိုက်သိမ်းပိုက်ခဲ့ပြီးနောက် NUG ရဲ့ အုပ်ချုပ်ရေးယန္တရားလည်ပတ်နေတာ ဖြစ်ပါတယ်။

စစ်အာဏာသိမ်းချိန်ကစပြီး ၂၀၂၄ ဇန်နဝါရီ ၁၆ ရက်အထိ စစ်ကောင်စီကြောင့် အရပ်သား ၆,၁၈၂ ဦး သေဆုံးထားကြောင်း နိုင်ငံရေးအကျဉ်းသားများကူညီစောင့်ရှောက်ရေးအသင်း AAPP ရဲ့စာရင်းပြုစုချက်အရ သိရပါတယ်။

သတင်း – ကိုစည်သူ၊ စာတည်း – လင်းဇေ