ကမ္မ၊ မေ ၁၈၊ ၂၀၂၅။

မကွေးတိုင်း၊ ကမ္မမြို့ပေါ်ရှိ ဂျိုးပျံရပ်ကွက်ကို မေ ၁၈ ရက် ဒီမနက် ၆ နာရီလောက်မှာ စစ်ကောင်စီတပ်ကဗုံကြဲခဲ့တာကြောင့် ကလေး ၁ ဦးအပါအဝင် ၂ ဦးဒဏ်ရာရခဲ့ပြီ အဆောက်အဦပျက်စီးမှုတွေရှိခဲ့တယ်လို့ အညာမြေအရပ်ဖက်အဖွဲ့အစည်း – မြိုင် ဆီကသိရပါတယ်။

တိုက်ပွဲဖြစ်တာမရှိဘဲ ဗုံး ၂ လုံးကြဲချခဲ့တာကြောင့် ဂျိုးပျံရပ်ကွက်ကဆေးခန်း ၁ ခုပေါ်ကျရောက် ပေါက်ကွဲပြီး အသက် ၁၂ နှစ်အရွယ်နဲ့ ၃၀ အရွယ်အမျိုးသား ၂ ဦးထိခိုက်ဒဏ်ရာရခဲ့တာပါ။

“ကြဲချတာကတော့ ဘာအကြောင်းမှမရှိဘူး။ တိုက်ပွဲဘာညာမရှိဘူး။ အစောကြီးရှိသေးတာ မိုးလင်းစပဲရှိသေးတာ။ ၂ လုံးချတာကို ပထမအလုံးပဲကွဲတာ။ ၁ လုံးက သစ်ပင်နဲ့ငြိပြီးမကွဲတာ။ ပေါင် ၅၀၀ တွေဖြစ်မယ်ဗျ။ ဗုံးသီးအစတွေက ပေ ၁ ထောင်လောက်အထိ အဝေးကြီးတွေထိလွင့်တယ်”လို့ အညာမြေအရပ်ဖက်အဖွဲအစည်းက တာဝန်ရှိသူတဦးကဆိုပါတယ်။

ဒါ့အပြင် ဗုံးစထိမှန်လို့ ဆေးခန်းလည်းပျက်စီးခဲ့ပြီး မပေါက်ကွဲသေးတဲ့ဗုံးကိုတော့ ဘယ်လိုဆက်ပြီးလုပ်ဆောင်မယ်ဆိုတာမသိရဘူးလို့ သူကပြောပါတယ်။

ယခုဗုံးကျရောက်ပေါက်ကွဲခဲ့တဲ့နေရာအနီးမှာယခင်က တော်လှန်ရေးတပ်ဖွဲ့တွေရဲ့ ဂိတ်စခန်း ၁ ခုရှိခဲ့ပေမယ့် အဲ့ဒီဂိတ်ကပြောင်းရွှေ့သွားတာကြာပြီလို့ ဆိုပါတယ်။

ပြီးခဲ့တဲ့မေ ၅ ရက်ကလည်း စစ်ကောင်စီတပ်က ကမ္မမြို့နဲ့ ၁ မိုင်ဝန်းကျင်ခန့်အကွာက စောင်ဇမ်းကုန်းရွာကိုလေကြောင်းနဲ့ ဗုံးကြဲတိုက်ခိုက်ခဲ့ရာ ကာကွယ်ရေးတပ်ဖွဲ့ဝင် ၉ ဦးကျဆုံးခဲ့တယ်လို့သိရပါတယ်။

စာတည်း – လင်း

ဝက်လက်၊ မေ ၁၁၊ ၂၀၂၅။

စစ်ကိုင်းတိုင်း၊ ဝက်လက်မြို့နယ်မှာ ၂ ရက်အတွင်း ကျေးရွာ ၅ ရွာ လေကြောင်းကနေဗုံးကြဲခံရပြီး ၈ ဦးသေဆုံးခဲ့တယ်လို့ ဒေသခံတွေနဲ့တိုက်နယ်ပကဖတာဝန်ရှိသူတွေထံက သိရပါတယ်။

မေ ၁၀ ရက် နေ့လယ် ၁ နာရီခန့်မှာ ရှိန်းမကားကျေးရွာကို ဂျက်ဖိုက်တာနဲ့ဗုံး ၁ လုံးကြဲချခဲ့ရာ ကျေးရွာအနောက်ဘက် ပြည့်ရှိန်းအောင်ဓာတ်ဆီဆိုင်နား ကျရောက်ပေါက်ကွဲခဲ့တယ်လို့ ရှိန်းမကားတိုက်နယ်တာဝန်ခံက ပြောပါတယ်။

“တိုက်ပွဲမဟုတ်ဘဲ ခရိုင်ချင်းဆက်လမ်း တောင်ဘက်က ပန့်ဆိုင်ကိုပစ်သွားတာ။ လူထိခိုက်တော့မရှိဘူး။ အဲ့နေရာက အန္တရာယ်ရှိတော့ ဆီမရောင်းခိုင်းထားဘူး။ ပြည်သူကလည်းမရှိတော့ ထိခိုက်မရှိဘူး။ ဆီဆိုင်နဲ့ လက်ဖက်ရည်ဆိုင်ဟောင်းလေး ပျက်စီးသွားတယ်”လို့ ရှိန်းမကားတိုက်နယ်တာဝန်ခံက ပြောပါတယ်။

ညနေ ၄ နာရီ မိနစ် ၃၀ ခန့်မှာတော့ ရွာတော်ကုန်းကျေးရွာထဲကို စစ်ကောင်စီဘက်က ပေါင် ၅၀၀ ဗုံးလို့ ယူဆရတဲ့ဗုံး ၂ လုံးကို ထပ်မံကြဲချတိုက်ခိုက်ခဲ့ရာ ကျေးရွာအရှေ့ဘက် နေအိမ်တွေပေါ်ကျရောက်ပေါက်ကွဲခဲ့တာလို့ သိရပါတယ်။

“ရွာထဲမှာ တော်လှန်ရေးအဖွဲ့မရှိဘူး။ ဘာမှမရှိဘူး။ ကဆုန်ညောင်ရေသွန်းပွဲကို အလှည့်တောင်လုပ်မှာ။ ၁ နာရီ ၂ နာရီလောက် စောသွားလို့။ မဟုတ်ရင် လူစုလူဝေးနဲ့ကဆုန်ညောင်ရေသွန်းပွဲတောင်လှည့်မယ့်အချိန်ပဲ။ ကျောင်းမှာလူစုမယ်လုပ်ခါနီးလေး ကြဲသွားတာ။ ညောင်ရေသွန်းပွဲလည်း မလုပ်ဖြစ်တော့ဘူး။”လို့ ကျေးရွာနဲ့နီးစပ်သူတဦးက ပြောပါတယ်။

စစ်ကောင်စီဘက်က ကြဲချတဲ့ဗုံးဟာ လူနေအိမ်တွေပေါ်ကျရောက်ပေါက်ကွဲပြီး ၁၄ နှစ်အရွယ် မောင်ကောင်းဆက်ပိုင်၊ ၃၃ နှစ်အရွယ် မဌေးသူဇာဦး၊ ၄၃ နှစ်အရွယ် မသဲစုမာ၊ ၄၅ နှစ်အရွယ် မမူယာနွယ်၊ ၄၇ နှစ်အရွယ် မသူဇာနွယ်၊ ၅၃ နှစ်အရွယ် ဒေါ်သင်းသင်းနွယ်၊ ၅၇ နှစ်အရွယ် ဒေါ်ခင်စန်းရီ၊ ၇၀ နှစ်အရွယ် ဒေါ်သန်းဌေးတို့ နေရာမှာပဲ သေဆုံးသွားပါတယ်။

ဒါ့အပြင် အသက် ၁၃ နှစ်ကနေ ၇၀ အရွယ်ကြားရှိ မခင်ရတနာ၊ မဆွေဆွေလဲ့၊ ဒေါ်ခင်စန်းဝင်း၊ ဒေါ်သင်းသင်းဦး၊ မဇင်မျိုးလှိုင်၊ မထွေးငယ်၊ ဒေါနုဝင်း၊ ဦးခင်မောင်သန်း၊ ဦးမြင့်လွင်၊ ဦးကျော်စိုးခိုင်၊ ဦးဝင်းမင်းသန့်တို့ ၁၁ ဦးဒဏ်ရာရသွားပြီး နေအိမ် ၈ လုံးပျက်စီးခဲ့ရပါတယ်။

သေဆုံးသူတွေက မီးလောင်ထားပြီး ဗုံးမှန်တဲ့ဒဏ်ရာတွေကြောင့် ရုပ်တောင်သေချာမပေါ်တော့လို့ နေ့တွင်းချင်း သင်္ဂြိုဟ်လိုက်ရတယ်လို့သိရပြီး သေဆုံးသူ ၈ ဦးစလုံးက မိသားစုဝင်တွေဖြစ်တယ်လို့ သိရပါတယ်။

မေ ၁၁ ရက် ဒီနေ့မနက် ၇ နာရီကျော်ခန့်မှာ တံတားဦးလေတပ်ကတက်လာတဲ့ ဂျက်ဖိုက်တာ ၁ စီးက ရွှေပန်းကုန်းကျေးရွာထဲကို ဗုံး ၂ လုံးကြဲချခဲ့ရာ ကျေးရွာစာသင်ကျောင်းအနီးကျရောက်ပေါက်ကွဲပြီး အသက် ၁၈ နှစ်ကျော်အရွယ် အမျိုးသမီး ၁ ဦး ဦးခေါင်းအစမှန်ဒဏ်ရာနဲ့ အသက် ၃၀ ကျော်အရွယ် အမျိုးသား ၁ ဦးတို့ဒဏ်ရာရကာ စာသင်ကျောင်းနဲ့နေအိမ် ၂ လုံးပျက်စီးခဲ့ပါတယ်။

မနက် ၁၀ နာရီခန့်မှာတော့ ဝက်လက်နယ်အရှေ့ခြမ်း သစ်ဆိမ့်ရွာကို တံတားဦးဘက်ကတက်လာတဲ့ ဂျက်ဖိုက်တာက ဗုံး ၁ လုံးကြဲချခဲ့ရာ ကျေးရွာအတွင်းကျရောက်ပေါက်ကွဲပြီး အမျိုးသား ၁ ဦးနဲ့အမျိုးသမီး ၁ ဦးဒဏ်ရာရကာ နွား ၃ ကောင်သေဆုံးခဲ့ပါတယ်။

မနက် ၁၁ နာရီကျော်ခန့်မှာတော့ မဲတောကုန်းကျေးရွာထဲကို လေကြောင်းကနေ ဗုံး ၁ လုံးကြဲချခဲ့ရာ ကျေးရွာဘုန်းကြီးကျောင်းအတွင်း ကျရောက်ပေါက်ကွဲခဲ့ပြီး ဘုန်းကြီးကျောင်းပျက်စီးကာ လူထိခိုက်တာတော့မရှိဘူးလို့ သိရပါတယ်။

စစ်ကောင်စီဘက်က လေကြောင်းကနေ ဗုံးကြဲနေတာကြောင့် ရွှေပန်းကုန်း၊ ရွာတော်ကုန်း၊ မဲတောကုန်း၊ သစ်ဆိမ့်ကျေးရွာအပါဝင် ကျေးရွာ ၆ ရွာက ဒေသခံ ၄,၀၀၀ ကျော် ဘေးလွတ်ရာနေရာတွေမှာ တိမ်းရှောင်နေကြရတယ်လို့ သိရပါတယ်။

စာတည်း – လင်း

ယင်းမာပင်၊ ဧပြီ ၂၄၊ ၂၀၂၅။

စစ်ကိုင်းတိုင်း၊ ကနီမြို့နယ်နဲ့ ယင်းမာပင်မြို့နယ်အစပ်ရှိ ကျေးရွာတွေကို စစ်ကောင်စီတပ်က ဧပြီ ၂၂ ရက်ကနေ ၂၄ ရက်ထိ လေကြောင်းတိုက်ခိုက်တာနဲ့ လက်နက်ကြီးပစ်ခတ်တာတွေလုပ်ခဲ့တယ်လို့ ဒေသခံတွေဆီက သိရပါတယ်။

ဧပြီ ၂၂ ရက်မှာ အနောက်မြောက်တိုင်းစစ်ဌာနချုပ်ကနေ ယင်းမာပင်မြို့နယ်၊ သံဘိုရွာကို လက်နက်ကြီးနဲ့ပစ်ခတ်ခဲ့တဲ့အပြင် စက်တပ်လေထီးနဲ့ တိုက်ခိုက်ခဲ့တာကြောင့် အမျိုးသမီး ၃ ဦး ပြင်းထန်ဒဏ်ရာ ရရှိခဲ့ပါတယ်။

“ကွမ်းခြံထဲမှာ အလုပ်လုပ်နေတဲ့ အမျိုးသမီး ၃ယောက်ကို လက်နတ်ကြီးအစတွေ မှန်သွားတယ်၊ အသက် ၅၀ ဝန်းကျင်အမျိုးသမီး ၁ ယောက်နဲ့ အသက် ၃၀ခန့်အမျိုးသမီး ၂ ယောက်ပေါ့၊ ၃၀ ခန့်အရွယ် အမျိုးသမီးတစ်ယောက်ကတော့ ဆီးခုံကိုထိသွားတယ်၊ ကျန်အမျိုးသမီး ၁ ယောက်ကတော့ ခြေသလုံးကို ထုတ်ချင်းပေါက်သွားတယ်၊ အသက် ၅၀ ဝန်းကျင်အမျိုးသမီးက ပေါင်ကိုမှန်သွားတယ်၊ သူလည်းထုတ်ချင်းပေါက်တာပဲ။” လို့ ရွာခံတဦးက ပြောပါတယ်။

အလားတူ ကနီမြို့နယ်၊ သမင်ခြံရွာနဲ့ အနီးတဝိုက်ကိုလည်း ဧပြီ ၂၂ ရက်မှာ ဒရုန်းနဲ့ ဗုံးကြဲခဲ့တာကြောင့် နေအိမ် ၁ လုံးပျက်စီးပြီး ခိုင်းနွား ၁ ကောင်ကို ထိမှန်ဒဏ်ရာရခဲ့ပါတယ်။

အခုလိုစစ်ကောင်စီရဲ့တိုက်ခိုက်မှုတွေ ဆက်တိုက်ဆိုသလိုရင်ဆိုင်နေရတာကြောင့် သက်ကြီးပိုင်းဒေသခံတွေလည်း ထိတ်လန့်နေကြရတယ်လို့ ကနီမြို့နယ်မှ ဒေသခံတဦးကပြောပါတယ်။

“လာပြီဆိုတဲ့ အသံကြားရင် ဗုံးခိုကျင်းထဲဝင်နေကြရတယ်၊ အဓိကကတော့ အသက်ကြီးရွယ်အိုတွေဆိုရင် တော်တော်ကို ထိတ်လန့်နေကြတယ်။ နောက်ဆက်တွဲအခြေအနေတော့ ဘယ်လိုလာမယ်မသိဘူး၊ ကျောင်းတွေကတော့ ပိတ်ထားတယ်၊ သုံးရက်ဆက် လာပစ်နေတာ နွား ၁ ကောင်ပဲထိတာ ကံကောင်းတာပဲ။” လို့ ကနီမြို့နယ်ကျေးရွာတရွာက ဒေသခံတဦးက ပြောပါတယ်။

ဒါ့အပြင် ဧပြီ ၂၃ နဲ့ ၂၄ ရက်မှာလည်း ကနီ၊ ယင်းမာပင်အစပ်က ကျေးရွာတွေအနီးကို စက်တပ်လေထီးနဲ့ လေကြောင်းတိုက်ခိုက်ခဲ့ပြီး ဒီတိုက်ခိုက်မှုမှာတော့ အထိအခိုက်မရှိဘူးလို့ သိရပါတယ်။

စစ်ကောင်စီဟာ ဧပြီ ၂ ရက်ကနေ ဧပြီ ၃၀ ရက်အထိ အပစ်ရပ်ကြောင်းကြေညာထားပေမယ့် စစ်ကိုင်း၊ မကွေးနဲ့ ပဲခူးတိုင်းတွင်းက ကျေးရွာတွေကို လေကြောင်းတိုက်ခိုက်မှုတွေ ခပ်စိပ်စိပ်လုပ်ဆောင်နေတာဖြစ်ပါတယ်။

အလာတူး ဧပြီ ၂၃ ရက် နေ့လယ်ပိုင်းမှာလည်း စစ်ကိုင်းတိုင်း၊ ဒီပဲယင်းမြိုနယ်၊ လက်လှုပ်တောင်ရွာက ဆေးပေးခန်းတဝိုက်ကို လေကြောင်းကနေတိုက်ခိုက်လို့ အမျိုးသမီး ၃ ဦးအပါ ၅ ဦးသေဆုံးခဲ့ပါသေးတယ်

သတင်း – ကျော်စွာ၊ စာတည်း – လင်း

ရေစကြို၊ ဧပြီ ၁၂၊ ၂၀၂၅။

မကွေးတိုင်း၊ ရေစကြိုမြို့နယ်၊ ရေလယ်ကျွန်းဒေသရှိ သာဂေါင်ကျေးရွာကို စစ်ကောင်စီတပ်က လေကြောင်းကနေဗုံးကြဲတိုက်ခိုက်ခဲ့တာကြောင့် ထိခိုက်ပျက်စီးမှုတွေရှိခဲ့တယ်လို့ ရေစကြိုမြို့နယ် ပြည်သူ့ကာကွယ်ရေးအဖွဲ့ဆီက သိရပါတယ်။

ဧပြီ ၁၂ ရက်ဒီနေ့မနက် ၁၀ နာရီလောက်မှာ မတ္ထီလာလေတပ်ဘက်ကလာတဲ့ ဂျက်ဖိုက်တာနဲ့ ဗုံး ၂ လုံးချ တိုက်ခိုက်ခဲ့တာလို့ဆိုပါတယ်။

“ပြည်သူအထိအခိုက် အသေအဆုံးတော့ မရှိခဲ့ဘူး၊ စာသင်ကျောင်းကို ပစ်မှတ်ထားပြီးတော့ ကြဲချ တိုက်ခိုက်သွားတာ၊ စာသင်ကျောင်းတော့ ပျက်ဆီးဆုံးရှုံးသွားတယ်။ ကျောင်းသားတွေနဲ့ ဆရာ၊ ဆရာမတွေကတော့ ကျောင်းပိတ်ရက်ဆိုတော့ ကျောင်းမှာမရှိဘူး၊” လို့ ရေစကြိုပြည်သူ့ကာကွယ်ရေး တပ်ဖွဲ့ သတင်းနဲ့ပြန်ကြားရေးတာဝန်ခံက ပြောပါတယ်။

တိုက်ခိုက်မှုကြောင့် စာသင်ကျောင်းနဲ့ ကျောင်းသုံးပရိဘောဂပစ္စည်းတွေပျက်သွားခဲ့ပြီး ပျက်စီးမှု အတိအကျကိုတော့ အတည်မပြုနိုင်သေးဘူးလို့ ဆိုပါတယ်။

သာဂေါင်ကျေးရွာကို ခုလိုဗုံးကြဲတိုက်ခိုက်ခံရတာ ၃ ကြိမ်မြောက်ဖြစ်ပြီး ပြီးခဲ့တဲ့ ဇန်နဝါရီလနဲ့ ဖေဖော်ဝါရီလထဲမှာလည်း စစ်ကောင်စီကဗုံးကြဲတိုက်ခိုက်ခဲ့သေးတယ်လို့ ဆိုပါတယ်။

ပြီးခဲ့တဲ့ ဇန်နဝါရီ ၁၆ ရက်မနက်အစောပိုင်းမှာ သာဂေါင်ကျေးရွာကို လေကြောင်းကနေ ပေါင် ၅၀၀ ဗုံး ၂ လုံး ကြဲချတိုက်ခိုက်ခဲ့တဲ့အတွက် အသက် ၁၆ နှစ်နဲ့ အသက် ၅၅ နှစ်အရွယ် အမျိုးသား ၂ ဦးတို့ သေဆုံးခဲ့ပါတယ်။

ဒါ့အပြင် ဖေဖော်ဝါရီ ၁၃ ရက် မနက်အစောပိုင်း ၂ နာရီခန့်မှာ ဂျက်ဖိုက်တာနဲ့ ဗုံးကြဲတိုက်ခိုက်ခဲ့တာကြောင့် ကျေးရွာအနီးကျရောက်ပေါက်ကွဲပြီး အမျိုးသား ၁ ဦးဒဏ်ရာရကာ နေအိမ်တွေထိမှန် ပျက်စီးခဲ့တယ်လို့ ဒေသခံတွေဆီကသိရပါတယ်။

စာတည်း – လင်း

ကောလင်း၊ ဧပြီ ၁၁၊ ၂၀၂၅။

စစ်ကိုင်းတိုင်း၊ ကောလင်းမြို့နယ်၊ လျှော်ဖြူကုန်းကျေးရွာကို ဧပြီ ၁၁ ရက် ဒီက‌နေ့ညနေပိုင်းမှာ စစ်ကောင်စီကဗုံးကြဲတိုက်ခိုက်ခဲ့တာကြောင့် ဒေသခံအမျိုးသမီး ၂ ဦးသေဆုံးခဲ့တယ်လို့ Kawlin People Defence Force – KLPDF ဆီက သိရပါတယ်။

ဒီနေ့ ညနေ ၃ နာရီခွဲမှာ တံတားဦးဘက်ကတက်လာတဲ့ ဂျက်ဖိုက်တာ ၁ စီးက လျှော်ဖြူကုန်းကျေးရွာကို ပေါင် ၅၀၀ ဗုံးသီး ၂ လုံး ကြဲချခဲ့တာလို့ ဆိုပါတယ်။

“အရပ်သားပြည်သူတွေရဲ့ အိမ်ပေါ်ကိုချသွားတာ၊ လေကြောင်းတိုက်ခိုက်မှုလုပ်သွားတာကြောင့် အမျိုးသမီး ၂ ဦးသေဆုံးသွားတယ်၊” လို့ People Defence Force – KLPDF တာဝန်ရှိသူတဦးက ပြောပါတယ်။

ဗုံးကြဲချိန် လျှော်ဖြူကုန်းကျေးရွာက ဒေါ်မည်းညိုနဲ့ ဒေါ်ဝင်းကြည်တို့သေဆုံးပြီး ဦးဇော်လွင် ဒဏ်ရာရခဲ့တာပါ။

ဒါ့အပြင် နေအိမ် ၂ လုံးနဲ့အသုံးအဆောင်ပစ္စည်းတွေ ပျက်စီးပြီး ဒေသခံတွေလည်းရွာက ရှောင်တိမ်းနေရတယ်လို့ ဆိုပါတယ်။

ပြီးခဲ့တဲ့ ဧပြီ ၁၀ ရက်ကလည်း ကောလင်းမြို့နယ်၊ အင်ပင်လှရွာစာသင်ကျောင်းနေရာနဲ့ ရွာထဲကို စစ်ကောင်စီတပ်ဖွဲ့ဝင်တွေက လေကြောင်းကနေ ဂျက်ဖိုက်တာနဲ့ ဗုံးကြဲချတာကြောင့် ၁၃ နှစ် ကလေးငယ် ၁ ဦးသေဆုံးပြီး ၆ ဦးဒဏ်ရာရခဲ့ပါသေးတယ်။

• စာတည်း – လင်း