ပြုလုပ်

ကလေး၊ ဧပြီ ၆၊ ၂၀၂၃။

စစ်ကိုင်းတိုင်း၊ ကလေးမြို့နယ်၊ ပျဉ်းတော်ဦးကျေးရွာအနီး နယ်မြေရှင်းလင်းရေးလုပ်ချိန် အသတ်ခံထားရတဲ့ အလောင်း ၃ လောင်း တွေ့ခဲ့ရပြီး အဲ့ဒီထဲမှာ PDF ရဲဘော်တဦးလည်း ပါဝင်တယ်လို့ သိရပါတယ်။

ဧပြီလ ၆ ရက် ဒီကနေ့မနက်ပိုင်းက တိုက်ပွဲတွေ ရပ်နားထားတဲ့အတွက် နယ်မြေခံကာကွယ်ရေးအဖွဲ့တွေက ရှင်းလင်းရေးဝင်ရောက်ခဲ့ရာ ပျဉ်းတော်ဦးနဲ့ နန်းစောင်းပုရွာကြားက လမ်းပိုင်းတနေရာမှာ တွေ့ခဲ့တာဖြစ်တာလို့ ကလေးဒေသခံတဦးက ဆိုပါတယ်။

“၂ ယောက်က ပြည်သူ၊ ၁ ယောက်က PDF၊ လူတွေပိတ်မိနေလို့သွားခေါ်တာကို သူပါအသတ်ခံလိုက်ရတာ။ ဝေဟင်ပစ်တဲ့နေ့က နှိပ်စက်ခံရပြီးမှ ပစ်သတ်ထားခဲ့တာ” လို့ ပြောပါတယ်။

အသက် ၃၀ ဝန်းကျင် နန်းချောင်းရွာသား ပြည်သူ ၂ ဦးနဲ့ ကလေးအခြေစိုက်တပ်ဖွဲ့တခုက ရဲဘော်တဦး ဖြစ်တယ်လို့ ကနဦးသိထားရပြီး မြေပြင်အခြေနေတွေကြောင့် ရဲဘော်နဲ့ပတ်သက်တဲ့ အသေးစိတ်အချက်လက်တွေတော့ မထုတ်ပြန်သေးဘူးလို့ သိရပါတယ်။

စစ်ကောင်စီက လေကြောင်းနဲ့ပစ်ခတ်တဲ့ ဧပြီလ ၂ ရက်နေ့က စစ်ကြောင်းနဲ့ထိပ်တိုက်တိုးပြီး အသတ်ခံရတာဖြစ်နိုင်တယ်လို့ ယူဆရပြီး၊ တွေ့ရှိချိန်မှာ အလောင်းတချို့က ပုတ်ပွပျက်စီးနေလို့ ဘယ်သူဘယ်ဝါဆိုတာ သိရဖို့ ကြန့်ကြာနေတယ်လို့လည်း ဆိုပါတယ်။

ကလေးမြို့မှာ မတ်လ ၃၀ ရက်ကနေ ဧပြီလ ၅ ရက်နေ့ထိ စစ်ကောင်စီနဲ့ နယ်မြေခံကာကွယ်ရေးအဖွဲ့ပေါင်းစုံ တိုက်ပွဲဖြစ်ပွားခဲ့ပြီး ၇ ရက်တာတိုက်ပွဲအတွင်း ရဲဘော် ၂ ဦး ကျည်ထိမှန်ကာ မစိုးရိမ်ရ ဒဏ်ရာရထားပြီး စစ်ကောင်စီဘက်ကလည်း သေဆုံးမှုတွေ ရှိခဲ့ပါသေးတယ်။

စာတည်း – လင်း

မြေလတ်အသံ၊ ဧပြီ ၄၊ ၂၀၂၃။

ပြည်သူ့တော်လှန်ရေးတပ်ဦး – PRF မှ ဗကသကျောင်းသားရဲဘော် ဝဿန် (၂၀) နှစ် ဟာ ဧပြီလ ၂ ရက်နေ့က စစ်ကောင်စီနဲ့တိုက်ပွဲမှာ ကျဆုံးခဲ့တာလို့ သိရပါတယ်။

ဝမ်းနည်းအထိမ်းအမှတ် အလေးပြုအခမ်းအနားကို ဧပြီလ ၄ ရက်ဒီနေ့မနက်က ပခုက္ကူလှုပ်ရှားမှုစစ်ဒေသမှာ ကျင်းပပြုလုပ်ခဲ့ပြီး ပြည်သူ့တော်လှန်ရေးတပ်ဦးက တာဝန်ရှိသူတွေ၊ မဟာမိတ်အဖွဲ့အစည်းတချို့နဲ့ ပခုက္ကူလှုပ်ရှားမှု စစ်ဒေသက ရဲဘော်တွေလည်း တက်ရောက်ခဲ့တယ်လို့ သိရပါတယ်။

ဝမ်းနည်းခြင်းအထိမ်းအမှတ်အနေနဲ့ တပ်ဦးအလံတော်တဝက်ချခြင်းနဲ့ သေနတ်ပစ်ဖောက်ခြင်းတို့ကို ပြုလုပ်ခဲ့တယ်လို့ ပြည်သူ့တော်လှန်ရေးတပ်ဦး – PRF ဗဟိုသတင်းနှင့်ပြန်ကြားရေးဌာန တာဝန်ခံ ရဲဘော်လွန်းညီက ပြောပါတယ်။

“ရဲဘော်ဝဿန်က ကျနော်တို့တပ်ဦးရဲ့ ပထမဆုံးကြွေလွင့်သွားတဲ့ ရဲဘော်ပါ။ ပြည်သူလူထုအကျိုးနဲ့ တပ်ရဲ့ အလုပ်တာဝန်တွေကို အသက်ပေးပြီးဆပ်ခဲ့လို့ ရဲဘော်ဝဿန်အတွက် အခုလို ဝမ်းနည်းခြင်းအထိမ်းအမှတ် အလေးပြုအခမ်းအနားကို ပြုလုပ်ခဲ့ကြတာပါ” လို့ ဆိုပါတယ်။

ကျန်ရှိနေသေးတဲ့ရဲဘော်တွေ အနေနဲ့လည်း ကြေကွဲဆုံးရှုံးမှုတွေကို ခွန်အားအဖြစ်ပြောင်းလဲပြီး အာဏာရှင်ကို ဆက်လက်တွန်းလှန်တိုက်ခိုက်သွားကြဖို့လည်း အဆိုပါအခမ်းအနားမှာ အဓိကမှာကြားခဲ့တယ်လို့ ပြန်ကြားရေးဌာနတာဝန်ခံ ရဲဘော်လွန်းညီက ဆက်ပြောပါတယ်။

“အဓိက ကတော့ ကျန်ရှိနေတဲ့ ရဲဘော်တွေအတွက်လည်းပါတာပေါ့။ ရဲဘော်တွေက သေဖော်သေဖက်၊ ညီအကိုအရင်းတွေလိုချစ်ကြတာရယ်၊ တိုက်ဖော်တိုက်ဖက်ရဲဘော်တွေလည်းဆိုတော့ ဒီလိုဆုံးရှုံးမှုဖြစ်တော့ ရဲဘော်တွေလည်း ဝမ်းနည်းနေကြတယ်။ ဝမ်းနည်းစိတ်ကို ခွန်းအားအဖြစ်ပြောင်းဖို့လည်း မှာကြားခဲ့တယ်” လို့ ဆိုပါတယ်။

ကျဆုံးသွားတဲ့ ရဲဘော်ဝဿန်ဟာ ပြီးခဲ့တဲ့ ၂၀၂၁ ခုနှစ်၊ စက်တင်ဘာ ၈ ရက်နေ့ကစပြီး ပခုက္ကူမြို့နယ် အခြေခံပညာရေးကျောင်းသားများသမဂ္ဂ (ဗကသများအဖွဲ့ချုပ်) ဒုဥက္ကဌအဖြစ် တာဝန်ထမ်းဆောင်ခဲ့သူပဲဖြစ်ပါတယ်။

ဒါ့အပြင် ပြည်သူ့တော်လှန်ရေးတပ်ဦး- PRF ရဲ့ပခုက္ကူလှုပ်ရှားစစ်ဒေသ နဲ့ ဝက်လက်လှုပ်ရှားစစ်ဒေသတွေမှာ တနှစ်ခွဲတဲ့အထိ တာဝန်ထမ်းဆောင်ခဲ့သူလည်း ဖြစ်ပါတယ်။

စာတည်း-007

စစ်ကိုင်း၊ ဧပြီ ၃၊ ၂၀၂၃။

စစ်ကိုင်းတိုင်းဒေသကြီး၊ ဆားလင်းကြီးမြို့နယ် အခြေစိုက်အဖွဲ့တခုဖြစ်တဲ့ Salingyi Border Task Force အဖွဲ့ဝင် ရဲဘော်တဦးရဲ့ (၂၇) နှစ်ပြည့် မွေးနေ့ကို တောတွင်းတနေရာမှာ ပြုလုပ်နိုင်ခဲ့တယ်လို့ သိရပါတယ်။

ချစ်သူကောင်မလေးက အဝေးကနေ ကိတ်မုန့်နဲ့လက်ဆောင်တွေပို့ပေးခဲ့ပြီး ယမန်နေ့ ဧပြီလ ၂ ရက်နေ့က စခန်းမှာရှိတဲ့ ရဲဘော်တွေနဲ့တူတူ မွေးနေ့ပွဲကျင်းပခဲ့တယ်လို့ သိရပါတယ်။

“သူ့ကောင်မလေးက အဝေးကနေ ချိတ်ဆက်ပြီး ကျနော်တို့ကို suprise လုပ်ပေးဖို့ တောင်းဆိုခဲ့တာ။ သူ့ကောင်မလေးပို့ပေးလိုက်တဲ့ suprise box နဲ့ မွေးနေ့ကိတ်ကို ရဲဘော်လေးတွေက သွားယူပေးထားပြီး suprise လုပ်ခဲ့ကြတာ။ အဝေးကဆိုတော့ ရောက်လာလိမ့်မယ် ထင်မထားဘူးလေ။ အံ့သြသွားပြီး မျက်ရည်တွေ ဝဲလာတော့တာပဲ” လို့ ရဲဘော်တဦးက ပြောပါတယ်။

တပ်ရင်းမှာ ပထမဆုံးပြုလုပ်ခဲ့တဲ့ မွေးနေ့ပွဲဖြစ်ပြီး အဖွဲ့အနေနဲ့ လက်နက်ခဲယမ်းပဲ အဓိကထားထုတ်နေရလို့ ကျွေးမွေးတာတော့ မလုပ်နိုင်ခဲ့ဘူးလို့ သိရပါတယ်။

စာတည်း – 007

စစ်ကိုင်း၊ မတ် ၂၈၊ ၂၀၂၃။

စစ်ကိုင်းတိုင်း၊ ကနီမြို့နယ်က ကျေးရွာတရွာမှာ ဒေသခံပြည်သူတွေနဲ့ တော်လှန်ရေးအင်အားစုအဖွဲ့တွေ ဦးဆောင်ပြီး မုံရွာလူထုသပိတ်တိုက်ပွဲမှာကျဆုံးခဲ့သူ မသဉ္ဇာဟိန်းအတွက် အောက်မေ့ဖွယ် ၂ နှစ်ပြည့်အခမ်းအနားကို မတ်လ ၂၈ ရက်ဒီနေ့မှာ ကျင်းပခဲ့ပါတယ်။

ဒီအခမ်းအနားကို ကနီမြို့နယ်ထဲက ဒေသခံပြည်သူ ၃၀၀ နီးပါးတက်ရောက်ခဲ့ပြီး၊ ကျဆုံးသွားတဲ့ ရဲဘော်သဉ္ဇာဟိန်းအပါအဝင် နွေဦးသူရဲကောင်းတွေကိုမမေ့ဖို့၊ အာဇာနည်စိတ်ဓာတ်မွေးမြူဖို့ ရည်ရွယ်ချက်နဲ့ ကျင်းပခဲ့တာလို့ ကနီမြို့နယ် နွေဦးတော်လှန်ရေးသပိတ်အင်အားစုမှ တာဝန်ရှိသူက ပြောပါတယ်။

“အခုလို အောက်မေ့ဖွယ်အခမ်းအနားလုပ်တာ ပထမအကြိမ်ပါ။ အရင်နှစ်က လုပ်ချင်ပေမယ့် နယ်မြေအနေအထားအရ မလုပ်ဖြစ်လိုက်ပါဘူး” လို့ ဆိုပါတယ်။

ဒီအခမ်းအနားပြီးတဲ့နောက်မှာတော့ ကနီမြို့နယ်ကျောင်းသားသမဂ္ဂအဖွဲ့ဝင်တွေက သမဂ္ဂစာကြည့်တိုက်တခုကို သဉ္ဇာဟိန်း ၂ နှစ်ပြည့်အောက်မေ့ဖွယ်အဖြစ် အခမ်းအနားပြုလုပ်တဲ့ရွာမှာပဲ ဖွင့်လှစ်ခဲ့ပါသေးတယ်။

မသဉ္ဇာဟိန်းဟာ ဒုတိယနှစ် သူနာပြုသင်တန်းကျောင်းသူတဦး ဖြစ်ပြီး၊ ၂၀၂၁ ခုနှစ် မတ်လ ၂၈ ရက်က မုံရွာမြို့၊ ရတနာပုံရပ်ကွက်မှာ စစ်တပ်နဲ့ရဲတပ်ဖွဲ့တွေရဲ့ ပစ်ခတ်မှုကြောင့် ထိခိုက်ဒဏ်ရာရသူတွေကို ဆေးကုသပေးနေရင်း သူ့ရဲ့နောက်စေ့ကို ကျည်ဆံထိမှန်ကာ ကျဆုံးခဲ့တာလည်း ဖြစ်ပါတယ်။

စာတည်း – လင်း

မကွေး၊ မတ် ၂၇၊ ၂၀၂၃။

မကွေးတိုင်း၊ ပခုက္ကူမြို့နယ်မှာ ပခုက္ကူလူထုတိုက်ပွဲကော်မတီဝင်တွေက ဦးဆောင်ပြီး မတ်လ ၂၇ ရက်ဒီကနေ့ကျရောက်တဲ့ ဖက်ဆစ်တော်လှန်ရေးနေ့မှာ သပိတ်စစ်ကြောင်းပြုလုပ်ခဲ့ကြပါတယ်။

အခုလို သပိတ်စစ်ကြောင်းပြုလုပ်ရတာဟာ နောင်မျိုးဆက်တွေသိရအောင် နဲ့ ပြည်သူတရပ်လုံးအနေနဲ့လည်း သွေးမအေးပဲ ရရာနည်းလမ်းနဲ့ ဆန့်ကျင်ဆန္ဒပြနေကြောင်းကို ပြသစေလိုတဲ့အတွက် လုပ်ဆောင်တာဖြစ်တယ်လို့ ပခုက္ကူလူထုတိုက်ပွဲကော်မတီမှ တာဝန်ရှိသူတဦးက ပြောပါတယ်။

“ပြည်သူတွေအနေနဲ့လည်း တယောက်ကိုတယောက် အပြစ်ပြော လက်ညိုးထိုးနေမဲ့အစား လက်သီးကျစ်ကျစ်ဆုတ်ပြီး အချင်းချင်းစည်းလုံးညီညွတ်စွာ ကိုယ်ဘာလုပ်ပေးနိုင်သလဲ ဆိုတဲ့ဘက်က ပါဝင်ပေးကြဖို့ကို ပြောချင်တယ်” လို့ ဆိုပါတယ်။

“ဖက်ဆစ်ရွေးကောက်ပွဲတိုက်ဖျက် ဖက်ဒရယ်ဒီမိုကရေစီ ပဠိညာဉ်ကိုင်စွဲချီတက်” “တရားမဝင်တဲ့ ရွေးကောက်ပွဲ လူထုအားနဲ့ တိုက်ဖျက်ကြ” စတဲ့စာတန်းပါ ဘန်နာတွေကိုကိုင်ဆောင်ပြီး သပိတ်ပြုလုပ်ခဲ့ကြတာလည်း ဖြစ်ပါတယ်။

ယင်းမာပင်၊ မတ် ၂၄၊ ၂၀၂၃။

စစ်ကိုင်းတိုင်း၊ ယင်းမာပင်နဲ့ ဆားလင်းကြီးမြို့နယ်ထဲမှာရှိတဲ့ ကျေးရွာပေါင်းစုံက သပိတ်စစ်ကြောင်းဟာ ရက်ပေါင်း ၇၄၅ ရက်မြောက်နေ့အဖြစ် မတ်လ ၂၄ ရက် ဒီနေ့မနက်ပိုင်းမှာ “ဖက်ဆစ်ရွေး ကောက်ပွဲတိုက်ဖျက်၊ ဖက်ဒရယ်ဒီမိုကရေစီပဋိညာဉ် ကိုင်စွဲချီတက်” စာသား‌တွေ ကိုင်‌ဆောင်ပြီး ချီတက်ခဲ့ကြပါတယ်။

“သပိတ်ကို ယင်းမာပင်မြို့နယ်ထဲမှာပြုလုပ်တာပါ။ သပိတ်က နေ့စဥ်လုပ်ပါတယ်။ ဒီနေ့မနက် သပိတ်ကိုတော့ နာရီဝက်လောက်ပဲလုပ်ဖြစ်တယ်” လို့ သပိတ်မှာ ပါဝင်သူတဦးက ပြောပါတယ်။

စာတည်း – ရင်ငြိမ်း

မကွေး၊ မတ် ၂၂၊ ၂၀၂၃။

မကွေးတိုင်း၊ မကွေးမြို့နယ်၊ ညောင်ကန်ရဲစခန်းနယ်မြေအပိုင် ကြာကန်ရွာအနီးမှာ စစ်ကောင်စီကိုလိုင်းကြေးပေးပြီး အပတ်စဥ် လောင်းကစားဝိုင်း ပြုလုပ်နေတယ်လို့ ဒေသခံတွေဆီက သိရပါတယ်။

ပြီးခဲ့တဲ့ ဖေဖေါ်ဝါရီလဆန်းပိုင်းလောက်က စတင်ကာ ကြာကန်ရွာက စစ်တပ်သတင်းပေးဆိုသူ ကိုနေလင်းနဲ့ တပည့်ဖြစ်သူ ကိုပိုင်တို့ဦးဆောင်ကာ အပတ်စဥ် တနင်္လာနဲ့အင်္ဂါနေ့တွေမှာ ပြုလုပ်နေတာလို့ ဒေသခံတဦးက ပြောပါတယ်။

“လိုင်းကြေးယူထားတော့ ဖမ်းမယ့်သူမရှိဘူး။ ရွာထဲမှာ ဒိုးဇက်ဆော့တာ ဇယ်တောက်ကစားတာကြတော့ ဖမ်းတယ်။ လောင်းကစားဝိုင်းကြောင့် ယာမြေပေါင်သူတွေ၊ နွားရောင်းသူတွေအထိ ရှိလာတယ်။ လုပ်ငန်းခွင်ဝင်ရင် မြေမရှိနွားမရှိဖြစ်ပြီ။ အခုဆိုသူခိုးသူဝှက်တောင် ရှိလာပြီ” လို့ ပြောပါတယ်။

ညောင်ကန်ရဲစခန်းနဲ့ မကွေးစစ်ကောင်စီတပ်ဖွဲ့ဝင်တို့ကို လိုင်းကြေးပေးကာ အပတ်စဥ်မနက် ၉ နာရီလောက်ကနေ ညနေအထိ ကြက်ဝိုင်း၊ ခြောက်ကောင်ခုံအပါအဝင် လောင်းကစားမျိုးစုံကို ပြုလုပ်နေတာဖြစ်ပြီး၊ ငွေပမာဏ ဘယ်လောက်ပေးရလဲဆိုတာကိုတော့ မသိရဘူးလို့ သူကဆက်ပြောပါတယ်။

အဲ့ဒီလောင်းကစားဝိုင်းကို အနီးဝန်ကျင်ကျေးရွာပေါင်း ၃၀ ကျော်က လူဦးရေ ၁၅၀ လောက် လာရောက်ကစားနေကြပြီး၊ အဲ့ဒီနေရာမှာ အအေးဆိုင်၊ ထမင်းဆိုင်နဲ့ ဘီယာရောင်းချသူတွေပါ ရှိတယ်လို့ ဆိုပါတယ်။

စစ်တပ်က အာဏာသိမ်းပြီးနောက်ပိုင်းမှာ နိုင်ငံတဝှမ်း လောင်းကစားဝိုင်းတွေကို သက်ဆိုင်ရာမြို့နယ်အလိုက် စစ်ကောင်စီလက်အောက်ခံတပ်ဖွဲ့ဝင်တွေက လိုင်းကြေးယူကာ ပိုမိုပြုလုပ်ခွင့်ပေးထားပြီး စစ်တပ်သတင်းပေးတွေကို မွေးမြူထားတာလို့လည်း ဒေသခံတဦးက သုံးသပ်ပြောဆိုပါတယ်။

ဒါ့အပြင် ပဲခူးတိုင်းအတွင်းက မြို့နယ်အချို့မှာလည်း အလားတူ လိုင်းကြေးပေးပြီး လောင်းကစားဝိုင်းတွေ ပြုလုပ်လျှက်ရှိရာ ပြီးခဲ့တဲ့ မတ်လ ၁၇ ရက်ကတော့ မိုးညိုမြို့နယ်၊ ရေကင်းနယ်မြေရဲစခန်း အနောက်ဘက် ၄ ဖာလုံအကွာမှာ ပြုလုပ်နေတဲ့ လောင်းကစားဝိုင်းကို မိုးညိုပြည်သူ့ကာကွယ်ရေးတပ်ဖွဲ့က လက်ပစ်ဗုံး ၂ လုံးနဲ့ ပစ်ခတ်သတိပေးခဲ့ပါသေးတယ်။

စာတည်း – လင်း

ဆားလင်းကြီး၊ မတ် ၁၅၊ ၂၀၂၃။

စစ်ကိုင်းတိုင်း၊ ဆားလင်းကြီးမြို့နယ်မှာ စစ်ကောင်စီတပ်တွေကို တိုက်ခိုက်ရင်း ကျဆုံးခဲ့တဲ့ National Revolutionary Guards က ရဲဘော်တဦးရဲ့ ကျဆုံးခြင်း တလပြည့် အထိမ်းအမှတ်အဖြစ် မတ်လ ၁၄ ရက် မနေ့ကမနက်ပိုင်းမှာ ဂူဗိမာန်သွင်းပြီး ဆွမ်းသွပ်တရားနာ အခမ်းအနားကို ပြုလုပ်ခဲ့တယ်လို့ သိရပါတယ်။

အသက် ၂၁ နှစ်အရွယ် ရဲဘော်မိုးမင်းထက် (ခ) ဖာလန်အတွက် မိခင်တပ်ရင်းက ရဲဘော်တွေနဲ့အတူ သူ့ရဲ့မွေးရပ်မြေမှာ ပြုလုပ်ပေးခဲ့ကြတာလို့ National Revolutionary Guards ဒုတပ်ရင်းမှူး ဗိုလ်သူရိန်က မြေလတ်အသံကို ပြောပါတယ်။

“ဈာပနပြုလုပ်တဲ့နေ့က ကျဆုံးရဲဘော်ရဲ့ မိသားစုဝင်တွေ လာပါတယ်။ တလပြည့်မှာတော့ မလာနိုင်ပါဘူး။ သူ့ရဲ့မိသားစုဝင်တွေရဲ့တောင်းဆိုချက်အရ သူ့ဇာတိမြေမှာလည်း တပ်ရင်းကနေ အကုန်အကျခံပြီးတော့ ဂူဗိမာန်လုပ်ပေးခဲ့သလို တပ်ရင်းမှာ ဂူဗိမာန်လုပ်ခဲ့ပါတယ်” လို့ ပြောပါတယ်။

ရဲဘော်မိုးမင်းထက်ဟာ ပြီးခဲ့တဲ့ဖေဖော်ဝါရီလ ၁၄ ရက်က ဆားလင်းကြီးမြို့နယ်အတွင်း စစ်ကောင်စီတပ်တွေကို တိုက်ခိုက်ရင်း ကျဆုံးခဲ့ရတာလည်း ဖြစ်ပါတယ်။

စာတည်း – လင်း