ပဲခူး

ပဲခူး၊ မေ ၅၊ ၂၀၂၃။

ပဲခူးမြို့ပေါ်မှာ ယာဉ်ထိန်းရဲတွေနဲ့ပေါင်းပြီး ဆိုင်ကယ်ကူဖမ်းပေးနေတဲ့ အသက် ၅၅ နှစ်အရွယ် ဦးစိုးပိုင်ဟာ ဆိုင်ကယ်တိုက်မိပြီး ပွဲချင်းပြီး သေဆုံးသွားတယ်လို့ သိရပါတယ်။

အဲဒီ ဦးစိုးပိုင်ဟာ ယာဉ်ထိန်းရဲတွေနဲ့အတူ မေလ ၃ ရက်နေ့ ပဲခူးမြို့ပေါ်က နာရီစင်ရှေ့မှာ ကား၊ ဆိုင်ကယ်တွေကို ဝိုင်းဝန်းဖမ်းဆီးပေးနေတုန်း အမည်မသိ အမျိုးသား ၂ ဦးမောင်းနှင်လာတဲ့ဆိုင်ကယ်ရှေ့ပိတ်ရပ်ပြီး စစ်ဆေးဖို့လုပ်ချိန်မှာ ဆိုင်ကယ်အရှိန်မထိန်းနိုင်ပဲ ဝင်တိုက်မိလို့ ဦးခေါင်းထိမှန်ဒဏ်ရာနဲ့ နေရာမှာပွဲချင်းပြီးသေဆုံးသွားတယ်လို့ ပဲခူးမြို့ခံတဦးက ပြောပါတယ်။

“ဆိုင်ကယ်သမားက အဖမ်းမခံပဲ မောင်းပြေးတာ၊ အဲဒီလူက ဆိုင်ကယ်ရှေ့ ပိတ်ရပ်လိုက်တာ အဲတာကို အရှိန်ကအရမ်းပါနေတော့ တိုက်မိပြီ ဦးခေါင်းကွဲသွားတယ်။ သူက အဲလိုကူဖမ်းပေးနေတာကြာပြီ။ တချို့ကားသမားတွေ ကယ်ရီသမားတွေကအစ ကူဖမ်းပေးကြတာ။ သူတို့ကို ကူဖမ်းပေးရင် ပိုက်ဆံအချိုးကျပေးသလို၊ လုပ်ပိုင်ခွင့်တချို့ကိုလည်း ပေးတယ်လို့ကြားတယ်” လို့ ဆိုပါတယ်။

ဦးစိုးပိုင်ဟာ ပဲခူး၊ ရန်ကုန်၊ ညောင်လေးပင်ဘက်သွားနေတဲ့ လိုင်းကားတွေကိုပိုင်ဆိုင်သူတဦးဖြစ်ကာ ဘုရားစျေးမှာလည်း ချိုကြီးဆိုင်ကယ်အပိုပစ္စည်းဆိုင် ဖွင့်ထားသူဖြစ်တယ်လို့ မြို့ခံတွေဆီက သိရပါတယ်။

ဦးစိုးပိုင်ကို မေလ ၅ ရက်ဒီနေ့မနက် ၁၁ နာရီလောက်မှာ ဆင်ဖြူကွင်းသုဿန်မှာ သွားရောက် မီးသဂြိုလ်ပေးလိုက်ပြီလို့လည်း သိရပါတယ်။

ပြီးခဲ့တဲ့ဖေဖော်ဝါရီ ၂၄ ရက်ကလည်း ရွှေမော်ဓောဘုရားအနောက်ဘက်မှာရှိတဲ့ သီရိဟံသာခန်းမဘေးမှာ ဖမ်းဆီးထိန်းသိမ်းထားတဲ့ မော်တော်ဆိုင်ကယ် ၁၀ စီးနီးပါးကို ယာဥ်ထိန်းရဲတွေက သယ်ဆောင်သွားပြီး အခုချိန်ထိပြန်လည်မရရှိသေးဘူးလို့လည်း သိရပါတယ်။

ဒါ့အပြင် မတ်လ ၁ ရက်ကလည်း ပဲခူးမြို့၊ ရွှေမော်ဓော်ဘုရား တောင်ဘက်မုဒ် သနပ်ပင်လမ်းမကြီးဘေးမှာ ရဲ၊ ယာဉ်ထိန်းရဲနဲ့ စစ်ကောင်စီတပ်ဖွဲ့တွေပေါင်းပြီး အင်အား ၂၀ နီးပါးနဲ့ လိုင်စင်မဲ့ကား၊ ဆိုင်ကယ်တွေကို ဖမ်းဆီးပြီး ငွေကြေးတောင်းခံမှုတွေ ပြုလုပ်ခဲ့သေးတယ်လို့ မြို့ခံတွေက ဆိုပါတယ်။

စာတည်း – 007

ပဲခူး၊ မေ ၅၊ ၂၀၂၃။

NLD လက်ထက်ကချေးယူခဲ့တဲ့ သမဝါယမငွေကို ပြန်မဆပ်နိုင်သေးလို့ဆိုကာ ပဲခူးတိုင်းအနောက်ခြမ်း၊ သာယာဝတီခရိုင်၊ သာယာဝတီမြို့နယ်၊အသရော်ကျေးရွာက ဒေသခံတွေကို စစ်ကောင်စီအဖွဲ့ဝင်တွေက ဖမ်းဆီးသွားတယ်လို့ ဒေသခံတွေက ပြောပါတယ်။

မေလ ၅ ရက်ဒီနေ့လယ်ပိုင်းမှာ အသရော်ကျေးရွာက ဒေသခံတွေကို အသရော်နယ်ရဲစခန်းမှာ ခေါ်ယူစစ်ဆေးပြီးနောက် အမျိုးသမီး ၁၃ ဦးနဲ့ အမျိုးသား ၂ ဦးကို ထော်လာဂျီနဲ့ သာယာဝတီမြို့ပေါ်ကို ဖမ်းခေါ်သွားတာဖြစ်သလို အဲ့ဒီထဲမှာ မိခင်ဖြစ်သူနဲ့အတူ နို့စို့အရွယ်ကလေးငယ်တချို့လည်း ပါသွားခဲ့တယ်လို့ ဆိုပါတယ်။

စစ်ကောင်စီတပ်သား ၃ ဦး၊ ရဲ ၃ ဦး၊ သမဝါယမရုံးက အမျိုးသမီးတဦး၊ မြို့နယ်မှူးတို့က အသရော်ကျေးရွာကိုလာပြီး ချေးငွေ ၁ သိန်းဆိုရင် အတိုးနဲ့ ၆ သိန်းစီပြန်ဆပ်ရမယ်လို့ ပြောဆိုကာ မဆပ်နိုင်တဲ့သူတွေကိုဆိုရင် ဖမ်းဆီးရိုက်နှက်ကြတယ်လို့ တိမ်းရှောင်နေတဲ့ တောင်သူတဦးက ပြောပါတယ်။

“အခုက နိုင်ငံရေးအခြေအနေကမကောင်း၊ လူတွေကလည်း လုပ်ရကိုင်ရတာ အဆင်မပြေကြဘူးဗျ။ ကျနော်တို့ဆိုရင် ၂ သိန်းချေးထားတာ။ တချို့ဆိုရင် ၅ သိန်း၊ ၆ သိန်းချေးကြတာပေါ့။ အဲတာကို ရဲ၊ စကစတွေက တောင်းတာဗျ။ လူတွေကလည်း ၁ သိန်းရှိတသိန်းပေးကြတယ်။ ၅ သောင်းရှိရင် ငါးသောင်းပေးကြတယ်ဗျ။ ဒါကိုအကြွေးမရလို့ဆိုပြီး ဖမ်းတာ။ ဖမ်းရင်လည်း ရိုက်နှက်ကြတယ်။ ဒါကြောင့် ပြေးနေရတာ”လို့ ဆိုပါတယ်။

ဒီချေးငွေတွေကိုပြန်ဆပ်ဖို့ မေလ ၃ ရက်က စတင်တောင်းနေတာဖြစ်ပြီး၊ ဒီကနေ့မှ ဖမ်းဆီး ရိုက်နှက်တာတွေလုပ်ခဲ့ကာ၊ အဖမ်းခံရမှာကိုစိုရိမ်လို့ တိမ်းရှောင်နေရသူ စုစုပေါင်း ၅၀ ဝန်းကျင်ရှိတယ်လို့လည်း ဒေသခံတွေက ပြောပါတယ်။

အလားတူ မေလ ၃ ရက်မှာပဲ အင်းဝကျေးရွာက ကိုမျိုးမင်းဆိုသူမှာ ချေးငွေသိန်း ၅၀ ကို ဆပ်ဖို့သွားချိန် စစ်ကောင်စီနဲ့ ရဲတပ်သားတွေကဖမ်းဆီခဲ့တာကြောင့် မိသားစုတွေကပိုက်ဆံပေးပြီး ခေါ်ထုတ်ယူခဲ့ရတယ်လို့ သိရပါတယ်။

ပြီးခဲ့တဲ့ ၂၀၂၂ ခုနှစ် သြဂုတ်လ ၁၀ ရက်ကတော့ သမချေးငွေ အဓမ္မတောင်းတဲ့ မိုးညိုမြို့နယ် ကရင်ချောင်အုပ်စု တောရကုန်းရွာက မြို့နယ်သမဝါယမအလုပ်အမှုဆောင် ဦးမြင့်စိုးကို သာယာဝတီခရိုင်တပ်ရင်း ၃၈ဝ၂ တပ်ခွဲ ၄ နဲ့ မိုးညိုမြို့နယ် ပြည်သူ့ကာကွယ်ရေးတပ်ဖွဲ့က ဇေယျာသော်စစ်ဆင်ရေးအနေနဲ့ ပစ်ခတ်ခဲ့လို့ သေဆုံးခဲ့ပါတယ်။

စာတည်း – လင်း

ပဲခူး၊ မေ ၄၊ ၂၀၂၃။

ပဲခူးတိုင်းဒေသကြီး၊ ကျောက်ကြီးမြို့နယ်၊ တံခွန်တိုင်ကျေးရွာမှာ ဝပ်ရှော့ကနေ အိမ်ပြန်လာတဲ့ လူငယ်တဦးကို သေနတ်နဲ့ပစ်သတ်ခံခဲ့ရတယ်လို့ သိရပါတယ်။

မေလ ၃ ရက် ည ၇ နာရီခန့်မှာ ကျေးရွာကားဝပ်ရှော့မှာ အလုပ်လုပ်တဲ့ စောလေးလူထူး (ခ) ဖိုးခွားလေး (ခ) ဝဏ္ဏ ၂၃ နှစ်ဟာ နေအိမ်ကိုဆိုင်ကယ်နဲ့အပြန် တိုက်နယ်ဆေးရုံအနီးမှာ စစ်ကောင်စီတပ်သားတွေနဲ့ တိုးပြီး သေနတ်နဲ့ပစ်သတ်ခံခဲ့ရတာလည်း ဖြစ်ပါတယ်။

“စကစဘက်ကပစ်သတ်တာပါ သူ့တို့လမ်းကြောင်းထွက်လာတာကို ဆိုင်ကယ်မီးထွန်း မောင်းလာလို့ဆိုပြီး ဘလိုင်းပစ်သတ်ခံရတာပါ။ နတ်သံကွင်းကနေ ကျောက်ကြီးဘက်ကိုလာတဲ့ စစ်ကြောင်းကနေ ပစ်သွားတာပါ” လို့ ကျောက်ကြီး PDF. တပ်ရင်း ၉ တာဝန်ရှိသူက ပြောပါတယ်။

ခုလိုပစ်ခတ်ခံရတာကြောင့် ခါးဆစ်မှာ ကျည်ထိဒဏ်ရာရပြီး စိုးရိမ်ရလို့ နတ်သံကွင်းတိုက်နယ် ဆေးရုံကို တင်ပို့ကုသနေချိန်မှာ သေဆုံးသွားတာလို့ သိရပါတယ်။

“သူက ရွာမှာနေတာ စကားတောင် လေးလုံးကွဲအောင်ပြောတတ်တဲ့သူ မဟုတ်ဘူး။ အနေအေးတယ်။ စကစနဲ့ကော PDF တွေနဲ့ကော ပတ်သက်တဲ့သူမဟုတ်ဘူး။ ရွာထဲက ကားဝပ်ရှော့မှာ အလုပ်လုပ်တာ။ နောက်ကွယ်မှာကတော့ သူဘာလုပ်လဲဆိုတာတော့ မသိရဘူးပေါ့။ အပြင်ပန်းသိရသလောက်ကတော့ အေးဆေးနေတဲ့ ကလေးပါ”လို့ ဒေသခံတဦးက ပြောပါတယ်။

မေလ ၅ ရက်နေ့မနက်မှာတော့ သေဆုံးသူရဲ့အလောင်းကို မိသားစုတွေက နေအိမ်ကိုပြန်ယူလာပြီး နာရေးကိစ္စပြုလုပ်ဖို့ စီစဥ်နေတယ်လို့ ဆိုပါတယ်။

ဇန်နဝါရီလ ၂ ရက်နေ့ညပိုင်းကလည်း ကျောက်ကြီးမြို့နယ်၊ ကျောက်ခဲကြီးကျေးရွာက နာရေးအိမ်မှာ စစ်ကောင်စီကင်းလှည့်တဲ့အဖွဲ့ရောက်နေချိန် လက်နက်ကိုင်အဖွဲ့တခုက လာပစ်လို့ စစ်ကောင်စီနဲ့ပျူစောထီး၊ ဒေသခံပြည်သူတွေအပါအဝင် ၄ ဦးသေဆုံးကာ ၁၀ ဦးကျော် ဒဏ်ရာရခဲ့သေးတယ်လို့ သိရပါတယ်။

စာတည်း – လင်း

ပဲခူး၊ မေ ၃၊ ၂၀၂၃။

ပဲခူးတိုင်း(အနောက်ခြမ်း)၊ ပြည်ခရိုင်၊ ပန်းတောင်းမြို့နယ်ရှိ မီးသဂြိုလ်စက်က လုပ်ငန်းသုံးပစ္စည်းတချို့ မေလ ၁ ရက်နေ့က ခိုးယူခံခဲ့ရတယ်လို့ ဦးဆောင်ဆရာတော်ဆီက သိရပါတယ်။

ပန်းတောင်းမြို၊ ဖောင်းကံရပ်ကွက်မှာရှိတဲ့ မီးသင်္ဂြိုဟ်စက်ရဲ့အဖွင့်အပိတ်တံခါးက သံလက်ကိုင်ကွင်း ၂ ကွင်း၊ အလောင်းတွန်းလှည်းစင်က သံဒလိမ့်တုန်း(roller) ၁ ခု၊ အလောင်းသယ်စင်မှာတပ်ဆင်ထားတဲ့ သံဘီး ၂ ခု ခိုးယူခံခဲ့ရတယ်လို့ ဆရာတော်က မြေလတ်အသံကို ပြောပါတယ်။

“ဘယ်အချိန် ဖြုတ်ခိုးသွားမှန်းကို မသိဘူး။ ဒီပစ္စည်းတွေခိုးယူခံတော့ မီးသဂြိုလ်ရင်တံခါးကပိတ်မရတော့ မီးညွှန့်တွေက အပြင်ထွက်ကုန်တယ်။ အနံ့အသက်တွေလည်းအပြင်ကိုထွက်ကုန်တာ။ အနားကလုပ်ဆောင်ပေးနေရသူတွေရဲ့ ကျန်းမာရေးပါ ထိခိုက်နိုင်တာပေါ့” လို့ပြောပါတယ်။

ခိုးယူခံရတဲ့ပစ္စည်းတွေဟာ တန်ဖိုးအားဖြင့်မများပေမယ့် နာရေးလုပ်ငန်းတွေအတွက် စိတ်အနှောက်အယှက်ဖြစ်ရတယ်လို့ ဦးဆောင်ဆရာတော်က ဆက်ပြောပါတယ်။

အဲဒီမီးသဂြိုလ်စက်ဟာ ပန်းတောင်းမြို့ပေါ်ရပ်ကွက်တွေနဲ့ မြို့နဲ့အနီးတဝိုက်ရွာတွေအထိ နာရေးဖြစ်ပေါ်လာရင် အများဆုံးအသုံးပြုသင်္ဂြိုဟ်ကြတယ်လို့လည်း ဒေသခံတဦးကပြောပါတယ်။

အလားတူဖြစ်စဥ်မျိုး ပြီးခဲ့တဲ့နှစ် နှောင်းပိုင်းလောက်ကလည်း ပဲခူးတိုင်း၊အနောက်ခြမ်၊ းနတ်တလင်းမြို့ အနောက်ပေါက်ပင်သုဿာန်က မီးသဂြိုလ်ရာမှာအသုံးပြုတဲ့ သံတစို့တံတခုလည်းပျောက်ဆုံးခဲ့ရာ အလှူရှင်တဦးကအစားထိုးလှူဒါန်းခဲ့ရတယ်လို့ မြို့ခံတဦးဆီက သိရပါတယ်။

စာတည်း – ရင်ငြိမ်း

ပဲခူး၊ မေ ၃၊ ၂၀၂၃။

ပဲခူးတိုင်း(အနောက်ပိုင်း)၊ ပြည်အကျဉ်းထောင်ကနေ လွတ်ငြိမ်းချမ်းသာခွင့်နဲ့ လွှတ်ပေးခဲ့တဲ့ ဆရာအတတ်သင်ကျောင်းသား ၂ ဦးကို ပန်းတောင်းရဲစခန်းအချုပ်မှာ ပြန်လည် ဖမ်းဆီးချုပ်နှောင် ထားလိုက်တယ်လို့ နိုင်ငံရေးအသိုင်းအဝန်းက သိရပါတယ်။

ယနေ့ မေလ ၃ ရက် ကဆုန်လပြည့်နေမှာ တနိုင်ငံလုံးအတိုင်းအတာနဲ့ ၅၀၅-က နိုင်ငံရေးအကျဉ်းသားတွေကို လွတ်ပေးခဲ့ရာမှာ ပြည်မြို့အကျဉ်းထောင်ကနေ နိုင်ငံရေးအကျဉ်းသား/သူ ၅၃ ဦးကို လွတ်ပေးခဲ့ပေမယ့် ပြည်ပညာရေးဒီဂရီကောလိပ် ကျောင်းသားတွေဖြစ်တဲ့ ကိုမင်းခန့်ကျော်(၂၀ နှစ်)၊ နဲ့ ကိုရှိန်းဝေယံကျော် (၁၈ နှစ်) တို့ နှစ်ဦးကို ပြန်လည်ဖမ်းဆီးခဲ့တာလို့ သိရပါတယ်။

“သူတို့က ပညာရေးကောလိပ်က ကျောင်းဆရာပေါက်စလေးတွေပါ။ လွှတ်ပေးပြီးကာမှ ပန်းတောင်းစခန်းဘက်က ရဲတွေက ခေါ်ပြီး ခံဝန်နဲ့ပြတ်လွှတ်ပေးမယ်ပြောတယ်။ အခုတော့ မလွှတ်တော့ဘူး ပန်းတောင်းရဲအချုပ်မှာဖမ်းထားတယ်။ ပထမ ၅၀၅-က နဲ့အမိန့်ချပြီးသားကို ရဲတွေက ၅၀-ည နဲ့ ပြင်ဆင်ချက်တက်တယ်ဆိုလို့ မလွှတ်တော့ဘူး” လို့ နိုင်ငံရေးတက်ကြွလှုပ်ရှားသူတဦးက ပြောပါတယ်။

သူတို့နှစ်ဦးကို CDM ထောက်ပံ့မှုနဲ့ ၅၀-ည ပုဒ်မ နဲ့ စတင်တရားစွဲဆိုခဲ့ပေမယ့် တရားရုံးက ၅၀၅-က နဲ့ အမိန့်ချခဲ့တာကြောင့် လွတ်ငြိမ်းနဲ့ လွတ်ပြီး ဒေသကွပ်ကဲမှုစစ်ဌာနချုပ် ဘက်က ရဲတပ်ဖွဲ့ကို ပြင်ဆင်ချက် တက်ပြီး ထပ်မံအမှုဖွင့် ဖို့ ပြောဆိုခဲ့တာလို့ နိုင်ငံရေးအကျဉ်းသားဟောင်းတွေဆီက သိရပါတယ်။

“အခုသူတို့ကိုမလွတ်ပေးဘူး ပန်းတောင်းစခန်းအချုပ်မှာ ပြန်ဖမ်းထားတယ်။ သောကြာနေ့မှာ ထောင်ကိုပြန်ပို့မယ်လို့ပြောတယ်။ အခုအမှုကတော့ ထောင်ဒဏ် ၁၀ နှစ်လောက်ကျမယ်။ အခုထိတော့ အိမ်နဲ့အဆက်သွယ်မရကြသေးဘူးလို့ ပြောတယ်။” လို့ နိုင်ငံရေးအကျဉ်းသားဟောင်းတဦးက ပြောပါတယ်။

၂၀၂၁ ခုနှစ် နိုဝင်ဘာလမှာ ကိုရှိန်းဝေယံကျော်နဲ့ ၂၀၂၂ ခုနှစ် ဇန်နဝါရီလမှာတော့ ကိုမင်းခန့်ကျော် တို့ကို ပြည်အကျဉ်းထောင်ထဲကို ပို့ဆောင်ခဲ့တာလို့ သိရပါတယ်။

အလားတူ ကိုကျော်စွာမိုး ဆိုသူကိုလည်း လွတ်ငြိမ်းစာရင်းထဲမှာ ပါဝင်ခဲ့ပြီးကာမှ လွှတ်ခါနီး နံနက်မှာတော့ သံသယဖြင့် စာရင်းပြန်ဖျက်ပြီး ဆက်လက်ထိန်းသိမ်းထားခဲ့တယ်လို့ အကျဉ်းထောင်နဲ့ နီးစပ်သူတွေဆီက သိရပါတယ်။