ပေါက်

ပေါက်၊ ဩဂုတ် ၂၅၊ ၂၀၂၅။

မကွေးတိုင်း၊ ပေါက်မြို့နယ်အရှေ့ပိုင်း၊ ပေခုနှစ်ပင်ရွာကို ဩဂုတ် ၂၅ ရက် ဒီမနက် ၉ နာရီကျော်မှာ စစ်ကော်မရှင်စီစစ်ကြောင်းက ဝင်ရောက်မီးရှို့ပြီး တည်ပင်ကန်ရွာက အမျိုးသား ၁ ဦးကို ဖမ်းဆီးသွားတယ်လို့ ပေါက်မြို့ခံတွေဆီက သိရပါတယ်။

ကပစ ၂၄ တပ်ကနေ ပြန်ထွက်လာတဲ့ အင်အား ၂၀၀ ဝန်းကျင်ပါစစ်ကောင်စီစစ်ကြောင်းက အိမ်ခြေ ၁၀၀ ကျော်၊ အိမ်ထောင်စု ၉၀ စု၊ လူဦးရေ ၁,၀၀၀ ကျော်နေထိုင်တဲ့ ပေခုနှစ်ပင်ရွာကို မီးရှို့ဖျက်ဆီးခဲ့တဲ့ အတွက် နေအိမ် ၆ လုံးကျော်ပျက်စီးခဲ့တာလို့ ဆိုပါတယ်။

“နေအိမ် ၆ လုံးကျော် မီးရှို့ခံရတာ၊ ပြည်သူ ၁ ဦးကောဖမ်းသွားတယ်၊ ယာကြီးပြင်ရွာအနီးတဝိုက်ကပါ၊ တည်ပင်ကန်ရွာက အသက် ၄၀ ကျော် အမျိုးသား အဖမ်းခံရတာပါ၊ ရိက္ခာယာဉ်တန်းစစ်ကြောင်းနဲ့ ဒီးဒုတ်ကွင်းရွာက ပျူစောထီးတွေနဲ့ ပေါင်းပြီးရှို့တာ၊ ဒေသခံပြည်သူတွေက အရင်ကတည်းက တိမ်းရှောင်နေရတာ”လို့ ပေါက်မြို့ခံ ကိုလရောင်က ပြောပါတယ်။

အဲ့ဒီရိက္ခာယာဉ်တန်း ၁၀၇ စီး၊ အင်အား ၂၀၀ ပါ စစ်ကြောင်းနဲ့ ဒီးဒုတ်ကွင်းရွာက ပြည်သူ့စစ်တွေဟာ လက်ရှိအချိန်ထိ ပေါက်မြို့နယ်၊ တည်ပင်ကန်ရွာမှာရှိနေတယ်လို့ သိရပါတယ်။

ဩဂုတ် ၂၂ ရက် နေ့လယ် ၁၂ နာရီကျော်ကလည်း မိတ္ထီလာဘက်ကလာတဲ့ ဂျက်ဖိုက်တာ ၁ စီးဟာ ဆယ်ဝကျေးရွာကို လေကြောင်းကနေ ဗုံးကြဲခဲ့တာကြောင့် ကလေးငယ် ၁ ဦးအပါအဝင် ၂ ဦးသေဆုံးပြီး ၆ ဦးဒဏ်ရာရခဲ့ပါသေးတယ်။

စာတည်း – လင်း

ကျော်ကြီး ၊ ဒိန်းဂျား

ပေါက်၊ ဩဂုတ် ၂၃၊ ၂၀၂၅။

မကွေးတိုင်း၊ ပေါက်မြို့နယ်၊ ဆယ်ဝကျေးရွာမှာ စစ်ကော်မရှင်တပ်က လေကြောင်းကနေ ဗုံးကြဲခဲ့တာ ကြောင့် ကလေးငယ် ၁ ဦးအပါအဝင် ၂ ဦးသေဆုံးပြီး ၆ ဦးဒဏ်ရာရတယ်လို့ ရွာခံတွေဆီက သိရပါတယ်။

ဩဂုတ် ၂၂ ရက်နေ့လယ် ၁၂ နာရီကျော်မှာ မိတ္ထီလာဘက်ကလာတဲ့ ဂျက်ဖိုက်တာ ၁ စီးဟာ ဆယ်ဝကျေးရွာထဲကို ပထမအကြိမ် ဗုံးသီး ၃ လုံးကြဲချပြီး မိနစ်ပိုင်းအကြာမှာ နောက်ထပ် ၁ လုံးကြဲချခဲ့တယ်လို့ ဆိုပါတယ်။

“ဗုံးက ရွာထိပ်နဲ့ ရွာလယ်ဝန်းကျင်ကျတာ။ ရွာက ဟိုတလောကလည်း ယာဥ်တန်းစစ်ကြောင်းက မီးရှို့ ခံလိုက်ရသေးတာကို။ အဲ့တော့ အရပ်သားပြည်သူတွေက သူတို့အိမ်လေးတွေကို ပြန်ပြီးရှင်းလင်းရေးလုပ်နေတာ။ ရှင်းလင်းရေးလုပ်နေချိန်မှာပဲ ဂျက်ဖိုက်တာနဲ့လာလုပ်တာ။” လို့ ဆယ်ဝရွာခံတဦးက ပြောပါတယ်။

လေကြောင်းကနေ ဗုံးကြဲခံရတာကြောာင့် အသက် ၃၈ နှစ်အရွယ် ကိုမင်းအောင်ဆိုသူနေရာတင် သေဆုံးခဲ့ပြီး အသက် ၈ နှစ်အရွယ် မဖြိုးရတီငြိမ်းကတော့ ဆေးခန်းပို့ဆောင်ချိန်မှာ သေဆုံးခဲ့တယ်လို့ ဆိုပါတယ်။

ဒါ့အပြင် အသက် ၅၅ နှစ်အရွယ် ဒေါ်ဝင်း၊ ၄၅ နှစ်အရွယ် ကိုမျိုးဦး၊ ရန်ကုန်က အလည်လာသူ အသက် ၅၀ အရွယ် အမျိုးသမီး ၁ ဦး၊ ၅၀ နှစ်အရွယ် ဒေါ်ဌေးဌေးဝင်း၊ ဦးသန်းဇော်၊ အသက် ၂၅ နှစ်အရွယ် မအေးငြိမ်းတို့ ထိခိုက်ဒဏ်ရာရပြီး နွား ၂ ကောင်သေဆုံးကာ နေအိမ် ၇ လုံးပျက်စီးခဲ့ပါတယ်။

“တိုက်ပွဲဖြစ်ပွားခြင်းတော့ မရှိဘူး၊ သက်သက်မဲ့ အကြောင်းမဲ့ လာရောက်ကြဲချတာ၊ သူတို့ ဘာသတင်းရလဲ လမသိဘူး၊ အဲ့ဒီမှာပြည်သူတွေပဲရှိတာ၊ ၂ ဦးကတော့ ပွဲချင်းပြီးသေတယ်။” လို့ ပေါက်မြို့ခံ ကိုလရောင်က ပြောပါတယ်။

ဆယ်ဝရွာဟာ အိမ်ခြေ ၁၀၀ နဲ့ လူဦးရေ ၃၀၀ ဝန်းကျင်ရှိပြီး ခုလိုလေကြောင်းကနေတိုက်ခိုက်ခံရတာ ကြောင့် ဒေသခံတွေလည်းတိမ်းရှောင်နေကြတယ်လို့ သိရပါတယ်။

ပြီးခဲ့တဲ့ ဩဂုတ် ၂၁ ရက်ကလည်း မကွေးတိုင်း၊ ပေါက်မြို့နယ် အရှေ့ခြမ်းကို တံတားဦးလေတပ်ကနေ Y 12 နဲ့ ဗုံးကြဲတိုက်ခိုက်ခဲ့ပါသေးတယ်။

စာတည်း – လင်း

■ ကပစ ၂၄ တပ်မိသားစုတွေနဲ့ ပျူစောထီးရွာတွေကြိုဆိုကြပြီး မြို့တွင်း စစ်အင်အားဖြန့်ကျက်ထား

ပေါက်၊ ဩဂုတ် ၂၁၊ ၂၀၂၅။

မကွေးတိုင်း၊ ပေါက်မြို့ကို ပခုက္ကူအခြေစိုက် တပ်မ ၁၀၁ လက်အောက် တပ်အင်အားထောင်ကျော်ပါတဲ့ စစ်ယာဥ်တန်းတွေ ဝင်ရောက်လာပြီး မြို့အတွင်း ဖြန့်ကျက်တပ်စွဲထားတယ်လို့ အညာမြေတပ်ပေါင်းစုရဲ့ ပြန်ကြားရေးတာဝန်ခံ ကိုဘိုဘိုသန့်ဇင် ဆီက သိရပါတယ်။

ပခုက္ကူတပ်မ ၁၀၁ ကနေ ပြီးခဲ့တဲ့ မေ ၂၇ ရက်မှာစတင်ထွက်ခွာလာတဲ့ အဆိုပါစစ်ယာဥ်တန်းတွေဟာ ၄၃ မိုင်သာကွာဝေးတဲ့ ပေါက်မြို့ကိုရောက်ရှိဖို့ လမ်းပိုင်းမှာ ၃ လနီးပါးကြာမြင့်ခဲ့ပြီး သြဂုတ် ၁၉ နဲ့ ၂၀ ရက်တွေမှာ ဝင်ရောက်လာခဲ့တာလို့ ဆိုပါတယ်။

“ ပေါက်မြို့ထဲကိုပဲ ဖြန့်ကျက်ထားတာ။ ပေါက်မြို့ထဲမှာရှိမယ်၊ ဘောလုံးကွင်းထဲမှာရှိမယ်။ အဲ့နားတလျှောက်လုံးပေါ့။ ကပစ ၂၄ ထဲကို မရောက်သေးဘူး၊ (ကပစ ၂၄နဲ့) ပေါက်နဲ့က မိုင်အားဖြင့် ဂိတ်အထိပဲဆို ၄ မိုင်ဝေးတယ်” လို့ ကိုဘိုဘိုသန့်ဇင်က ပြောပါတယ်။

အဲ့ဒီစစ်အင်အားတွေဟာ အမှတ် ၂၄ ကာကွယ်ရေးပစ္စည်းစက်ရုံ(ကပစ ၂၄)ကို အင်အားဖြည့်တင်းပြီး ချင်းနဲ့ ရခိုင်ပြည်နယ် ယောဒေသတွေက ဝင်ရောက်လာနိုင်တဲ့ တော်လှန်ရေးတပ်တွေကို ကာကွယ်နိုင်ဖို့ ဖြစ်တယ်လို့ ၎င်းက ခန့်မှန်းပါတယ်။

ပေါက်မြို့နယ်အတွင်းကို စစ်ကြောင်းတွေဝင်ရောက်လာပြီး စစ်ကော်မရှင်တပ်ဖွဲ့ဝင်တွေကို မြို့ခံတွေက ကြိုဆိုနေကြကြောင်း စစ်တပ်ထောက်ခံတဲ့ တယ်လီဂရမ်တွေမှာလည်း အကျယ်တဝင့်ဖော်ပြနေကြတာပါ။

လာရောက်ကြိုဆိုသူတွေဟာ ကပစ ၂၄ က စစ်ကော်မရှင်တပ်ဖွဲ့ဝင်တွေနဲ့ မိသားစုဝင်တွေ၊ ပေါက်မြို့ ပျူစောထီးတပ်ဖွဲ့ဝင်တွေ အများစုက ကြိုဆိုကြတာလို့ ကပစတပ်သတင်းရင်းမြစ်နဲ့ တော်လှန်ရေးတပ်ဖွဲ့ဝင်တွေက ပြောပါတယ်။

“ ပေါက်မြို့ထဲက လာကြိုကြတာက အမှန်အတိုင်းပြောရရင် ပေါက်မြို့နယ်က ပျူစောထီးအားကောင်းတဲ့မြို့နယ်တခုလို့ ပြောလို့ရတာပေါ့။ အခုချိန်ထိလည်း ပေါက်မြို့နယ်ထဲကရွာတွေကို ကျနော်တို့ မြိုင်မြို့ နယ်ထဲက အပြီးအစီးသိမ်းပိုက်နိုင်တဲ့ ရွာဆိုတာ မရှိသလောက်ပဲ၊ ပေါက်မြို့ပေါ်မှာလည်း သူတို့ရဲ့ ပျူစောထီးတွေစစ်တပ်ထောက်ခံတဲ့ လူတွေရှိတယ်။ တချို့ပြည်သူတွေကတော့ သူတို့အတင်းအကြပ်ခေါ်လို့လည်း ပါကြတယ်”လို့ ကိုဘိုဘိုသန့်ဇင်က ပြောပါတယ်။

အဆိုပါစစ်ကြောင်း စထွက်လာချိန်ကစပြီး လမ်းတလျှောက် ပေါက်နဲ့ကမ္မ မြို့နယ်ရှိ ကျေးရွာပေါင်း ၅၀ က ဒေသခံတွေလည်း တိမ်းရှောင်နေကြရပြီး ရွာတွေကို မီးရှို့တာ၊ ပစ္စည်းယူတာ၊ ဖမ်းဆီးသတ်ဖြတ်တာတွေလည်းရှိခဲ့ကာ စာရင်းအတိအကျကိုတော့ အတည်မပြုနိုင်သေးဘူးလို့ ဆိုပါတယ်။

“အဲ့စစ်ကြောင်းကြောင့် စစ်ရှောင်တွေ ၃ လနီးနီးအတွင်းမှာ တလျှောက်လုံးကရွာတွေ ၅၀ ထက်မနည်း ရှောင်ခဲ့ရတယ်၊ အနီးစပ်ဆုံးပြောရရင် ကမ္မလိုမျိုး ပစ္စည်းတွေအယူခံရတယ်၊ အဖျက်အဆီး ခံရတယ်။ ဆုံးရှုံးမှုက မခန့်မှန်းနိုင်လောက်အောင်၊ ဓားစာခံအဖြစ် ဖမ်းစီးခေါ်ဆောင်ရင်းနဲ့ သတ်ဖြတ် ခံရတာရှိမယ်။ အရမ်းရှုပ်ထွေးနေတဲ့အခါမှာ စာရင်းအတိအကျ မကောက်နိုင်ဘူးပေါ့နော်။ ဖမ်းခံထားရတွေကလည်း ပြန်လွတ်မလာသေးဘူး“ လို့ သူကဆက်ပြောပါတယ်။

ဒါ့အပြင် စစ်ကြောင်းထိုးလာစဥ်အတွင်း အဲ့ဒီစစ်ကြောင်းထဲက ဘက်ပြောင်းခိုလှုံလာသူ ၁၀၀ ခန့်ရှိတယ်လို့လည်း မြိုင်မြို့နယ်ပြည့်သူ့ကာကွယ်ရေးတပ်ဖွဲ့က ဩဂုတ် ၁၆ ရက်မှာ ထုတ်ပြန်ထားပါတယ်။

အဆိုပါစစ်ကြောင်းဟာ ရှေ့ဆက်တိုးနိုင်ဖို့အတွက်လည်း ပေါက်မြို့နယ်တွင်းက ကျေးရွာတွေကို ဩဂုတ်လဆန်းပိုင်းကစလို့ နေစဉ်နီးပါး လက်နက်ကြီး၊ Y12၊ ပါရာမော်တာတွေနဲ့ အကြိမ်ရေ ၁၀၀ နီးပါး တိုက်ခိုက်ခဲ့တာကြောင့် ဒေသခံ ၁၀ ဦးထက်မနည်းသေဆုံးခဲ့တယ်လို့ ပေါက်မြို့နယ်လူသားစာနာမှ တာဝန်ရှိသူဦးက ပြောပါတယ်။

စာတည်း – လင်း

ဒေသခံရိက္ခာတွေနဲ့ပစ္စည်းတွေပါယူသွားလို့ ကျပ်သိန်း ၁၀၀ ကျော်ဆုံးရှုံးနိုင်ဟုဆို

ပေါက်၊ ဩဂုတ် ၁၄၊ ၂၀၂၅။

မကွေးတိုင်း၊ ပေါက်မြို့နယ်က ရွာ ၁၀ ရွာကျော်ကို စစ်ကောင်စီတပ်က သြဂုတ် ၁၃ ရက် မနေ့ကစစ်ကြောင်းထိုးမွှေနှောက်ပြီး ဒေသခံအမျိုးသားတွေကိုလည်းဖမ်းဆီးသွားတယ်လို့ ပေါက်မြို့ဒေသခံဆီက သိရပါတယ်။

ပခုက္ကူအခြေစိုက်တပ်မ ၁၀၁ ကနေ ရိက္ခာယာဥ်တန်း ၁၀၀ ကျော်၊ အင်အား ၂၀၀ ဝန်းကျင်ပါတဲ့ စစ်ကြောင်းက ဆယ်၀ရွာ၊ ထန်းတောကုန်းရွာ၊ ပျဥ်းချောင်းရွာ၊ အောက်ကျင်းရွာ၊ ဆင်သေရွာ၊ ကျွန်းပင်စုရွာ၊ ငမို့လေးရွာ၊ ငမို့ကြီးရွာ၊ ရွှေလှံရွာ၊ မြင်းခြံကုန်းရွာ၊ ရေပြာရွာ၊ ဘုရားတောင်ရွာ၊ မကျီးစင်ရွာ၊ ညောင်ပင်သာရွာ၊ ဆယ်ပင်းရွာ၊ ဇီးတောရွာ၊ လယ်ဘဲ့ရွာ၊ ကျူတောရွာ၊ နတ်ဦးယဉ်ရွာနဲ့ သမားတော်ရွာ တို့ကိုဝင်ရောက်ခဲ့တာလို့ ဆိုပါတယ်။

“ရေပြာရွာနားအနီးတဝိုက်က ကျေးရွာ ၁၀ ရွာကျော်က ပစ္စည်းတွေသယ်သွားတာ၊ ဆန်အိတ်တွေ၊ မြေပဲ‌အိတ်တွေ၊ စက်ပစ္စည်းတွေ သယ်သွားတာ၊ ဆယ်ဝရွာက ပစ္စည်းတွေတော့ သယ်မသွားဘူး၊ ရွာကိုတော့ ဝင်မွှေသွားတယ်၊ ချက်ပြုတ်ပြီးလည်း စားသောက်သွားကြတယ်၊” လို့ ပေါက်မြို့ခံတဦး ကပြောပါတယ်။

ဒါ့အပြင် စစ်ကြောင်းဝင်ချိန် ဘုရားတောင်ရွာက အသက် ၃၀ နဲ့ ၄၀ ကျော်အရွယ် အမျိုးသား ၇ ဦးကိုလည်း ဖမ်းဆီးသွားပြီး ဒီနေ့ထိပြန်မလွတ်သေးဘူးလို့ ဆိုပါတယ်။

“မနေ့က ဘုရားတောင်ရွာကို စစ်ကြောင်းဝင်တာ၊ ပြည်သူ ၇ ဦးကို ဖမ်းသွားတယ်၊ အခုထိ ပြန်မလွှတ်သေးပါဘူး၊ ဖမ်းသွားတာက အမျိုးသားတွေပါ၊ ရွာထဲမှာတွေ့တာနဲ့ ဖမ်းသွားတာ၊ ဘာကြောင့် ဖမ်းတာလည်းတော့ မသိဘူး” လို့ ပေါက်မြို့ခံ ကိုလရောင်က ပြောပါတယ်။

အဆိုပါစစ်ကြောင်းဟာ ကျေးရွာတွေထဲကိုဝင်ချိန်မှာ နေအိမ်တွေကပစ္စည်းတွေနဲ့ ရိက္ခာတွေကိုသယ်ယူသွားတာကြောင့် အနည်းဆုံး စုစုပေါင်းကျပ်သိန်း ၁၀၀ ဝန်းကျင်လောက်ဆုံးရှုံးနိုင်တယ်လို့လည်းဆိုပါတယ်။

တော်လှန်ရေးတပ်တွေက လမ်းပိုင်းတွေဖြတ်တောက်ထားတာကြောင့် ပေါက်မြို့နယ်ထဲက ပျူစောထီး အားကောင်းတဲ့ရွာတွေမှာလည်း ရိက္ခာပြတ်လပ်နေတာတွေရှိပြီး စစ်ကောင်စီဘက်က လေကြောင်းကနေပဲ ရိက္ခာပို့ပေးနေရတယ်လို့ ကိုလရောင်က ပြောပါတယ်။

ခုလိုစစ်ကြောင်းထိုးနေတာကြောင့် အထက်ပါကျေးရွာတွေက ဒေသခံ ၁ သောင်းကျော်လည်း ထွက်ပြေးတိမ်းရှောင်နေကြရတယ်လို့ ဆိုပါတယ်။

လက်ရှိမှာတော့ အဲ့ဒီစစ်ကြောင်းနဲ့ ရိက္ခာယာဉ်တန်း ၁၀၀ ကျော်ဟာ ပေါက်မြို့နယ်၊ ရေပြာတံတားအနီးမှာ ယာဉ်တန်းနဲ့အတူ တပ်ဖြန့်ထားပြီး မိုင်းရှင်းလင်းရေးတွေ လုပ်နေတယ်လို့ သိရပါတယ်။

ဒါ့အပြင် ပေါက်မြို့နယ်၊ တိုက်တောရိုးရွာကို သြဂုတ် ၁၄ ရက် ဒီမနက် ၈ နာရီလောက်မှာ စစ်ကောင်စီတပ်က မီးရှို့ဖျက်ဆီးခဲ့တယ်လို့ ပေါက်မြို့ခံတွေဆီက သိရပါတယ်။

ဆိပ်ဖြူမြို့နယ်၊ ရွှေဘိုးကျွန်းရွာအခြေစိုက် ကပစ ၂၂ က အင်အား ၁၈၀ ဝန်းကျင်ပါစစ်ကောင်စီ စစ်ကြောင်းဟာ သြဂုတ် ၁၃ ရက်မနေ့ကမနက်ပိုင်းမှာ စတင်စစ်ကြောင်းထိုးလာခဲ့ပြီး သပြေ တောတိုက်မှာညအိပ်တပ်စွဲပြီးနောက် ဒီမနက်ပိုင်းမှ တိုက်တောရိုးရွာကိုဝင်ပြီး မီးရှို့ခဲ့တာလို့ ဆိုပါတယ်။

“တိုက်တောရိုးရွာကလည်း ပေါက်နယ်တောင်ပိုင်း နယ်စပ်မှာရှိတာ၊ မနက် ၈ နာရီထိုးလောက်မှာ ရွာထဲဝင်ပြီး ပြည်သူနေအိမ်တွေကို မီးရှို့သွားတယ်၊ နေအိမ်တော့ အတိအကျမရသေးဘူး၊ ရွာကတော့ သေးသေးလေးပဲ၊ တရွာလုံးပေါင်းမှ အိမ်ခြေ ၃၀ လောက်ရှိတာ”လို့ ပေါက်မြို့ခံတဦးက ပြောပါတယ်။

စစ်ကြောင်းဝင်လာတဲ့ လမ်းတလျောက်မှာလည်း ချောင်းဆုံရွာက ကားသမား ၁ ဦးကို ရိုက်နှက်ဖမ်းဆီးခဲ့ပြီး ချောင်းဆုံရွာလမ်းစုံအရောက်မှ ပြန်လွှတ်ခဲ့တယ်လို့ ဆိုပါတယ်။

ဒါ့အပြင် ချောင်းဆုံရွာလမ်းစုံမှာ ကင်းပုန်းဝပ်တပ်စွဲနေချိန်မှာလည်း လက်နက်ကြီးတွေနဲ့ ပစ်ခတ်တဲ့အတွက် သပြေတောတိုက်ရှိ ဒေသခံနေအိမ်ပေါ်ကျကာ မီးလောင်ပြီး နွား ၁ ကောင်သေဆုံးကာ ၂ ကောင် ထိခိုက်ခဲ့တယ်လို့ သိရပါတယ်။

လက်ရှိမှာစစ်ကြောင်းက ကပစ ၂၂ တပ်ထဲကို ပြန်ဝင်သွားတယ်လို့ သိရကာ ပြီးခဲ့တဲ့ ဩဂုတ် ၁၀ ရက်က လည်း ပေါက်မြို့နယ်အတွင်းက ရွာ ၁၂ ရွာကျော်ကို စစ်ကောင်စီတပ်က ဗုံး ၅၀ ကျော်ကြဲချတာကြောင့် ကလေးအပါအဝင် ၅ ဦး သေဆုံးခဲ့ပါသေးတယ်။

စာတည်း – လင်း

ပေါက်၊ ဩဂုတ် ၁၂၊ ၂၀၂၅။

မကွေးတိုင်း၊ ပေါက်မြို့နယ် အရှေ့ပိုင်းရှိ ကျေးရွာ ၁၂ ရွာထက်မနည်းကို စစ်ကော်မရှင်တပ်က လေယာဥ်နဲ့ ဗုံးကြဲချခဲ့လို့ ကလေး ၁ ဦးအပါ အရပ်သား ၄ ဦး သေဆုံးခဲ့တယ်လို့ ဒေသခံတွေဆီက သိရပါတယ်။

ဩဂုတ် ၁၀ ရက် မနက် ၉ နာရီကျော်မှာ စစ်ကော်မရှင်လေတပ် သယ်ယူပို့ဆောင်ရေးလေယာဥ် Y-12 နဲ့ ပေါက်မြို့နယ် ရေပြာ၊ ရှခွလေး၊ မုန်တော၊ ကမ်းပျို၊ သနပ္ပင်ဇင်း၊ တင်ငုတ်ပြင်၊ ညောင်ပင်တိုက်၊ ရွှေလှံ၊ မြင်းခြံကုန်း၊ ကျွန်းပင်စု၊ ဆင်သေ၊ ငမိုးကြီး၊ ငမိုးလေး၊ ကမ်းတောကုန်း၊ ပြင်းချောင်း၊ ဆယ်ဝ စတဲ့ ရွာတွေကို ဗုံးအလုံးရေ ၅၀ ကျော် ကြဲချခဲ့တဲ့အပြင် ပေါက်အခြေစိုက် ကပစ ၂၄ တပ် ကလည်း ဟောင်ဝစ်ဇာလက်နက်ကြီးတွေနဲ့ ပစ်ခတ်ခဲ့တယ်လို့ ဆိုပါတယ်။

“ တိုက်ပွဲကမဖြစ်ဖူး၊ ပေါက် ကပစ ၂၄ ကနေ ပထမ ဟောင်ဝစ်စာနဲ့ လှမ်းထု(ပစ်)တာ။ ၃ လုံးတွဲ ၂ ခါ ထုပြီး Y 12 က တခါတည်း ‌အပေါ်ကနဲ့ ဗုံးကြဲချတာ။ ရှခွလေးရွာကိုတော့ ၃ လုံးချတယ်၊ ၁ လုံးကွဲတယ်၊ ကမ်းပျိုရွာမှာတော့ ၅ လုံးတွဲချတာ၊ တခါချရင် ၄၊ ၅ လုံးချတာ” လို့ ဗုံးကြဲခံရတဲ့ရွာတွေက စစ်ရှောင်တွေကို ကူညီပေးနေသူတဦးက မြေလတ်အသံကို ပြောပါတယ်။

ဗုံးကြဲခံရမှုကြောင့် ရှခွလေးကျေးရွာက အသက် ၃ နှစ်ကျော်မိန်းကလေး ၁ ဦးနဲ့ အမျိုးသား ၁ ဦး၊ ကမ်းပျိုရွာက အမျိုးသား ၁ ဦး၊ တင်ငုတ်ပြင်ရွာက အသက် ၄၀ ကျော်အမျိုးသား ၁ ဦးနဲ့ ညောင်ပင်တိုက်ရွာက ၁ ဦး စုစုပေါင်း ၅ ဦးသေဆုံးခဲ့ပြီး ကျေးရွာ ၆ ရွာထက်မနည်းက အရပ်သား ၃၀ ခန့် ထိခိုက်ဒဏ်ရာရရှိခဲ့တယ်လို့ သိရပါတယ်။

သေဆုံး၊ ဒဏ်ရာရသူတွေရဲ့ အသေးစိတ်အချက်အလက်တွေကို မြေလတ်အသံက ဆက်လက်စုံစမ်းနေဆဲဖြစ်ပါတယ်။

ဗုံးကြဲခံရပြီးနောက် စစ်ကော်မရှင်ရဲ့လေကြောင်းအန္တရာယ်ကြောင့် ပေါက်မြို့နယ်အရှေ့ပိုင်းက ကျေးရွာ ၁၆ ရွာက ဒေသခံတွေ ကျေးရွာပြင်ပကို တိမ်းရှောင်နေထိုင်နေရတယ်လို့ သိရပါတယ်။

ဇူလိုင် ၂၇ ရက်ကလည်း ပေါက်မြို့နယ်၊ စဖဲကျေးရွာဆေးပေးခန်းကို စစ်ကော်မရှင်တပ်က တိုက်ခိုက်ရေးဗုံးကြဲလေယာဥ်နဲ့ ဗုံးကြဲချခဲ့တာကြောင့် ဆေးခန်းလာပြသူ အရပ်သား ၂ ဦးသေဆုံးခဲ့သေးတယ်လို့ သိရပါတယ်။

စာတည်း – ဟိန်းစံ

ပခုက္ကူ၊ ဇူလိုင် ၂၉၊ ၂၀၂၅။

မကွေးတိုင်း၊ ပေါက်မြို့နယ်တောင်းပိုင်းရှိ ပျူစောထီးအင်အားကောင်းတဲ့ ပင်တောင်ရွာက ပျူစောထီး တပ်ဖွဲ့ဝင် ၂ ဦးကို ဖမ်းဆီးခဲ့တယ်လို့ ပခုက္ကူခရိုင်အခြေစိုက် Rocket Fighter ပြည်သူ့ကာကွယ်ရေး တပ်ဖွဲ့က ပြောပါတယ်။

ဖမ်းဆီးခံရသူတွေဟာ အသက် ၁၈ ဝန်းကျင် ထွန်းဇော်မင်းနဲ့ ကျော်သူဝင်းတို့ ဖြစ်ပြီး ပျူစောထီးအင်အားရာချီရှိတဲ့ ပင်တောင်ရွာကနေ ပခုက္ကူမြို့နယ်အတွင်းကို ရိက္ခာသယ်ဖို့ထွက်လာချိန် ပခုက္ကူမြို့နယ် တနေရာမှာ ဇူလိုင် ၁၇ ရက် မနက် ၁၀ နာရီလောက်က ဖမ်းမိခဲ့တာလို့ ဆိုပါတယ်။

“ အဲ့ဒီရွာက ပျူစောထီးအင်အားက များတယ်၊ သူတို့ကို ကျနော်တို့ ရိက္ခာဖြတ်‌တောက်ထားတယ်၊ သူတို့ ရွာမှာ အခက်အခဲတွေ့နေတာတော့ အမှန်ပဲ၊ ရှေ့လျှောက်လည်း ဒီလိုမျိုး ရိက္ခာဖြတ်တောက် တာတွေ လုပ်နေမှာပါ” လို့ Rocket Fighter ပြည်သူ့ကာကွယ်ရေးတပ်တာဝန်ခံက ပြောပါတယ်။

ဖမ်းမိထားသူ ၂ ဦးကို စစ်ဆေးမေးမြန်းတာတွေလုပ်ဆောင်နေပြီး တရားဥပဒေအတိုင်း ဆက်လက်လုပ်ဆောင်သွားမယ်လို့ သူက ဆက်ပြောပါတယ်။

အိမ်ခြေ ၅၀၀ ကျော်ရှိတဲ့ ပင်တောင်ရွာမှာ ပျူစောထီး အင်အား ၁၀၀ ဝန်းကျင်လောက်ရှိပြီး ပျူစောထီးတွေကြောင့် ကျန်ဒေသခံတွေဟာ နေရပ်စွန့်ခွာ ထွက်ပြေးနေရတယ်လို့ သိရပါတယ်။

ဖမ်းဆီးမှုကို နယ်မြေခံ Freedom Fighter အဖွဲ့က ဦးဆောင်ပြီးတော့ Rocket Fighter နဲ့ နယ်မြေခံမဟာမိတ်အဖွဲ့တွေ ပူးပေါင်းလုပ်ဆောင်ခဲ့တာဖြစ်ပါတယ်။

စာတည်း – ဟိန်းစံ

ပေါက်၊ ဇူလှိုင် ၂၇၊ ၂၀၂၅။

မကွေးတိုင်း၊ ပေါက်မြို့နယ်၊ စံဖဲကျေးရွာကို စစ်ကောင်စီတပ်က လေကြောင်းကနေ ဗုံးကြဲတိုက်ခိုက်ခဲ့တာကြောင့် အမျိုးသား ၂ ဦးသေဆုံးပြီး ၇ ဦး ထိခိုက်ဒဏ်ရာရရှိခဲ့တယ်လို့ မြို့နယ်လူသားစာနာတာဝန်ရှိသူဆီက သိရပါတယ်။

ဇူလိုင် ၂၆ ရက် မနေ့ညနေ ၄ နာရီခန့်မှာ စံဖဲရွာ ကျေးလက်ဆေးပေးခန်းကို စစ်ကောင်စီတပ်တိုက်လေယာဥ် ၁ စင်းက ဗုံး ၂ လုံးကြဲချတိုက်ခိုက်ခဲ့ရာ ဆေးပေးခန်းနဲ့ နေအိမ်တွေအနီး ကျရောက်ပေါက်ကွဲခဲ့တာလို့ ဆိုပါတယ်။

” ပေါက်တောင်ပိုင်းကိုဖြတ်ပြီးမှ ထီးလင်းဘက်ကို ခပ်နိမ့်နိမ့်လေးပြန်သန်းပြီးတော့မှ ထီးလင်းဘက်ကနေအပြန်မှာ ပစ်(ချ)တာတော့ဆေးခန်းလို့ ယူဆရတာ ဆေးခန်းကိုမကျဘဲ ဆေးခန်းအရှေ့နားက အိမ်နားကိုသွားကျတာ” လို့ လူသားစာနာတာဝန်ရှိသူတဦးက မြေလတ်အသံကို ပြောပါတယ်။

ဗုံးကြဲခံရတာကြောင့် ကျေးရွာဆေးပေးခန်းမှာရှိနေတဲ့ လူနာစောင့်အမျိုးသား ၁ ဦးနဲ့ ဆေးပေးခန်းအနီးရှိနေတဲ့ နောက်ထပ်အမျိုးသား ၁ ဦး သေဆုံးခဲ့ကာ အမျိုးသား ၃ ဦး၊ အသက် ၁၃ နှစ်အရွယ် မိန်းကလေး ၁ ဦးအပါ အမျိုးသမီး ၄ ဦး စုစုပေါင်း ၇ ဦး ဒဏ်ရာရခဲ့တယ်လို့ သိရပါတယ်။

” ဆေးခန်းကိုလာပြတဲ့ အမျိုးသမီးရဲ့ လူနာစောင့်အမျိုးသားကတော့ လည်ပင်းမှထိပြီးတော့ဆုံးသွားတယ်။ ကျန်တဲ့ ထိခိုက် ၈ ဦးကတော့ အချိန်မီဆေးရုံကို ပို့တယ်။ ဆေးရုံအသွားလမ်းမှာ အမျိုးသား ၁ ဦးက လမ်းမှာဆုံးတယ်။ ကျန်တဲ့(ဒဏ်ရာရ) ၇ ဦးကတော့ ဆေးကုသမှုခံယူနေပါတယ်” လို့ အထက်ပါတာဝန်ရှိသူက ပြောပါတယ်။

ပြီးခဲ့တဲ့ ဇူလိုင် ၁၅ ရက်ကလည်း ပေါက်မြို့နယ်၊ နယ်သတ်ရွာကို စစ်ကောင်စီတပ်က ဂျက်ဖိုက်တာနဲ့ ဗုံး ၁ လုံး ကြဲချခဲ့တာကြောင့် နယ်သတ်ရွာကအမျိုးသမီး ၁ ဦးသေဆုံးပြီး ၁ ဦး ထိခိုက်ဒဏ်ရာရခဲ့ပါတယ်။

ပေါက်နဲ့ပခုက္ကူနယ်အစပ်မှာ ရောက်ရှိနေတဲ့ အင်အား ၁,၀၀၀ ကျော်ရှိ စစ်ကောင်စီစစ်ကြောင်းဟာ ၂ လကျော်ကြာရှိနေပြီဖြစ်ပြီး စစ်ကောင်စီတပ်က စစ်ကြောင်းအနီးနားကကျေးရွာတွေကို လေကြောင်းတိုက်ခိုက်မှုတွေ မကြာခဏပြုလုပ်နေတယ်လို့ ဒေသခံပြည်သူတွေက ပြောပါတယ်။

စာတည်း – ဟိန်းစံ