ပေါက်၊ ဇူလှိုင် ၂၇၊ ၂၀၂၅။

မကွေးတိုင်း၊ ပေါက်မြို့နယ်၊ စံဖဲကျေးရွာကို စစ်ကောင်စီတပ်က လေကြောင်းကနေ ဗုံးကြဲတိုက်ခိုက်ခဲ့တာကြောင့် အမျိုးသား ၂ ဦးသေဆုံးပြီး ၇ ဦး ထိခိုက်ဒဏ်ရာရရှိခဲ့တယ်လို့ မြို့နယ်လူသားစာနာတာဝန်ရှိသူဆီက သိရပါတယ်။

ဇူလိုင် ၂၆ ရက် မနေ့ညနေ ၄ နာရီခန့်မှာ စံဖဲရွာ ကျေးလက်ဆေးပေးခန်းကို စစ်ကောင်စီတပ်တိုက်လေယာဥ် ၁ စင်းက ဗုံး ၂ လုံးကြဲချတိုက်ခိုက်ခဲ့ရာ ဆေးပေးခန်းနဲ့ နေအိမ်တွေအနီး ကျရောက်ပေါက်ကွဲခဲ့တာလို့ ဆိုပါတယ်။

” ပေါက်တောင်ပိုင်းကိုဖြတ်ပြီးမှ ထီးလင်းဘက်ကို ခပ်နိမ့်နိမ့်လေးပြန်သန်းပြီးတော့မှ ထီးလင်းဘက်ကနေအပြန်မှာ ပစ်(ချ)တာတော့ဆေးခန်းလို့ ယူဆရတာ ဆေးခန်းကိုမကျဘဲ ဆေးခန်းအရှေ့နားက အိမ်နားကိုသွားကျတာ” လို့ လူသားစာနာတာဝန်ရှိသူတဦးက မြေလတ်အသံကို ပြောပါတယ်။

ဗုံးကြဲခံရတာကြောင့် ကျေးရွာဆေးပေးခန်းမှာရှိနေတဲ့ လူနာစောင့်အမျိုးသား ၁ ဦးနဲ့ ဆေးပေးခန်းအနီးရှိနေတဲ့ နောက်ထပ်အမျိုးသား ၁ ဦး သေဆုံးခဲ့ကာ အမျိုးသား ၃ ဦး၊ အသက် ၁၃ နှစ်အရွယ် မိန်းကလေး ၁ ဦးအပါ အမျိုးသမီး ၄ ဦး စုစုပေါင်း ၇ ဦး ဒဏ်ရာရခဲ့တယ်လို့ သိရပါတယ်။

” ဆေးခန်းကိုလာပြတဲ့ အမျိုးသမီးရဲ့ လူနာစောင့်အမျိုးသားကတော့ လည်ပင်းမှထိပြီးတော့ဆုံးသွားတယ်။ ကျန်တဲ့ ထိခိုက် ၈ ဦးကတော့ အချိန်မီဆေးရုံကို ပို့တယ်။ ဆေးရုံအသွားလမ်းမှာ အမျိုးသား ၁ ဦးက လမ်းမှာဆုံးတယ်။ ကျန်တဲ့(ဒဏ်ရာရ) ၇ ဦးကတော့ ဆေးကုသမှုခံယူနေပါတယ်” လို့ အထက်ပါတာဝန်ရှိသူက ပြောပါတယ်။

ပြီးခဲ့တဲ့ ဇူလိုင် ၁၅ ရက်ကလည်း ပေါက်မြို့နယ်၊ နယ်သတ်ရွာကို စစ်ကောင်စီတပ်က ဂျက်ဖိုက်တာနဲ့ ဗုံး ၁ လုံး ကြဲချခဲ့တာကြောင့် နယ်သတ်ရွာကအမျိုးသမီး ၁ ဦးသေဆုံးပြီး ၁ ဦး ထိခိုက်ဒဏ်ရာရခဲ့ပါတယ်။

ပေါက်နဲ့ပခုက္ကူနယ်အစပ်မှာ ရောက်ရှိနေတဲ့ အင်အား ၁,၀၀၀ ကျော်ရှိ စစ်ကောင်စီစစ်ကြောင်းဟာ ၂ လကျော်ကြာရှိနေပြီဖြစ်ပြီး စစ်ကောင်စီတပ်က စစ်ကြောင်းအနီးနားကကျေးရွာတွေကို လေကြောင်းတိုက်ခိုက်မှုတွေ မကြာခဏပြုလုပ်နေတယ်လို့ ဒေသခံပြည်သူတွေက ပြောပါတယ်။

စာတည်း – ဟိန်းစံ

ပေါက်၊ ဇူလိုင် ၁၆၊ ၂၀၂၅။

မကွေးတိုင်း၊ ပေါက်မြို့နယ်၊ နယ်သတ်ကျေးရွာကို စစ်ကောင်စီတပ်က ဗုံးကြဲတိုက်ခိုက်ခဲ့တာကြောင့် အမျိုးသမီး ၁ ဦးသေဆုံးခဲ့တယ်လို့ ဒေသခံတွေဆီက သိရပါတယ်။

ဇူလိုင် ၁၅ ရက် မနေ့ညနေ ၄ နာရီခန့်မှာ နယ်သတ်ကျေးရွာကို စစ်ကောင်စီရဲ့ဂျက်ဖိုက်တာ ၁ စင်းပေါ်ကနေ ဗုံး ၁ လုံးကြဲချခဲ့ရာ အသက် ၄၀ အရွယ်အမျိုးသမီး ၁ ဦးသေဆုံးပြီး အသက် ၃၀ အရွယ် အမျိုးသမီး ၁ ဦးထိခိုက်ဒဏ်ရာရခဲ့တယ်လို့ ဆိုပါတယ်။

“ပေါက်နယ်နဲ့ မြိုင်နယ်အစပ်တည့်တည့်ကရွာ၊ ရေနံမှော်တွေရှိတယ်။ ဘာတိုက်ပွဲမှမရှိ အကြောင်းမဲ့သပ်သပ်လေကြောင်းတိုက်ခိုက်မှုလုပ်သွားတာပါ၊ ရွာအရှေ့ထိပ်က ၁ ဦးသေပြီး ၁ ဦးထိခိုက်ဒဏ်ရာရတယ်၊ နေအိမ် ၁ လုံးတော့ပျက်စီးတယ်။”လို့ဒေသခံတဦးကပြောပါတယ်။

နယ်သတ်ကျေးရွာဟာ အိမ်ခြေ ၂၀၀ ခန့်ရှိတဲ့ကျေးရွာဖြစ်ပြီး ဒေသခံတွေအနေနဲ့လည်း လေကြောင်းရန်ကို သတိပြုနေထိုင်နေကြရတယ်လို့ ဆိုပါတယ်။

ပြီးခဲ့တဲ့မေ ၂၄ ရက်ကလည်း နယ်သတ်ကျေးရွာနဲ့ ဆုံကုန်းကျေးရွာကြားအနီးတဝိုက်ကို စစ်ကောင်စီတပ်က ဂျက်ဖိုက်တာလေယာဥ် ၂ စီးနဲ့ မီးလောင်ဗုံး ၃ လုံးထက်မနည်းကြဲခဲ့တာကြောင့် နယ်သတ်ရွာက ဒေသခံ ၂ ဦး ထိခိုက်ဒဏ်ရာရပြီး နေအိမ် ၂ လုံးမီးလောင်ပျက်စီးခဲ့ပါသေးတယ်။

မြိုင်မြို့နယ်နဲ့ ပေါက်မြို့နယ်ကို စစ်ကောင်စီတပ်က လေကြောင်းတိုက်ခိုက်မှုတွေ မကြာခဏပြုလုပ်နေတာကြောင့် ဒေသခံတွေအနေနဲ့ စိုးရိမ်စိတ်အရမ်းမပြင်းထန်ကြဘဲ သတိထားပုန်းရှောင်ကြဖို့ အညာမြေအရပ်ဖက်အဖွဲ့အစည်း (မြိုင်)မှ ထုတ်ပြန်သတိပေးထားပါတယ်။

ဇူလိုင် ၉ ရက် ည ၈ နာရီလောက်မှာ မြိုင်မြို့နယ်အနောက်မြောက်ခြမ်းက သနပ်ရင်းကျေးရွာကို စစ်ကောင်စီဘက်က ဂျက်ဖိုက်တာ ၁ စင်းပေါ်ကနေ ပေါင်၃၀၀ ဗုံး ၂လုံး ကြဲချခဲ့ရာ အသက် ၄၀ ကျော် အမျိုးသား ၁ ဦးနဲ့ အသက် ၂ နှစ်အရွယ်ယေက်ျားလေး ၁ ဦး သေဆုံးခဲ့ပါသေးတယ်။

စာတည်း – လင်း

ပေါက်၊ ဇွန် ၂၅၊ ၂၀၂၅။

မကွေးတိုင်း၊ ပခုက္ကူခရိုင်၊ ပေါက်မြို့နယ်ထဲကို စစ်ကောင်စီတပ်က လေကြောင်းကနေ ဗုံးကြဲတိုက်ခိုက်ခဲ့တာကြောင့် ပြည်သူ့လုံခြုံရေးတပ်ဖွဲ့ဝင်အပါ ၅ ဦးသေဆုံးခဲ့တယ်လို့ ပေါက်မြို့ခံတွေဆီက သိရပါတယ်။

ဇွန် ၂၃ ရက်မနက် ၈ နာရီလောက်မှာ ပေါက်မြို့နယ်ထဲကကျေးရွာကို စစ်ကောင်စီတပ်ရဲ့ Y12 လေယာဥ်နဲ့ အနည်းဆုံး ၁၀ ကြိမ်၊ ဗုံး ၃၅ လုံးထပ်မနည်းကြဲချတိုက်ခိုက်ခဲ့တာလို့ ဆိုပါတယ်။

“ဒီနောက်ပိုင်းမှာ ကျနော်တို့ကြားသိရတာကတော့ ပေါက်မြို့နယ်ရဲ့ လူစုလူဝေးရှိတဲ့နေရာကို စစ်ကောင်စီကပစ်မှတ်ထားပြီး တိုက်ခိုက်နေတာ၊ သတင်းအချက်အလက်တွေလည်း သူတို့ဘက်က ရရှိသွားတာတွေလည်းရှိပုံရတယ်၊” လို့ ပေါက်မြို့နယ်ဒေသခံတဦးကပြောပါတယ်။

ဘို့မယ်၊ တစူး၊ ကျောက်ခွက်၊ သက္ကယ်ကျင်း၊ ကင်းမ စတဲ့ကျေးရွာတွေကို ဗုံးကြဲချတိုက်ခိုက်ခဲ့တာဖြစ်ပြီး တိုက်ခိုက်မှုကြောင့် ထိခိုက်သေဆုံးခဲ့ကြတာပါ။

သက္ကယ်ကျင်းရွာက အမျိုးသား ၁ ဦး၊ အသက် ၅၇ အရွယ်ဒေါ်မြို့တင်၊ ၅၅ နှစ်အရွယ် ဦးခင်မောင်ညွန့်၊ တုတ်စုရွာကိုရောက်နေတဲ့ သက္ကယ်ကျင်းရွာသား ၃၈ နှစ်အရွယ် ဦးကျော်သူထွေး၊ အသက် ၄၀ အရွယ် ပေါက်မြို့နယ် ပလဖ ဒုတာဝန်ခံနဲ့ ဇနီးဖြစ်သူတို့ စုစုပေါင်း ၆ ဦးသေဆုံးခဲ့တာလို့ ဆိုပါတယ်။

ဗုံးကြဲမှုကြောင့် သက္ကယ်ကျင်းရွာက အိမ် ၁ လုံး၊ အုတ်ကန်ဝိုင်း ၂ လုံး၊ ဆိုလာပြား ၁ ချပ်၊ သွပ်ဒယ် ၁ လုံးပျက်စီးပြီး ခိုင်းနွား ၁ ကောင် သေဆုံးခဲ့တယ်လို့ သိရပါတယ်။

သက္ကယ်ကျင်းရွာက အသက် ၁၅ နှစ်အရွယ် မဇွန်မိုးသူ မျက်စိထိခိုက်၊ အသက် ၅၁ နှစ် အရွယ် ‌ဒေါ်ခင်လှဆန်းခြေထောက်ထိခိုက်ဒဏ်ရာအပါအဝင် ဗုံးကြဲခံရတဲ့ရွာတွေက ဒေသခံစုစုပေါင်း ၁၀ ဦးကျော် ထိခိုက်ခဲ့တယ်လို့ သိရပါတယ်။

ဇွန် ၂၅ ရက်ဒီမနက်ပိုင်းမှာလည်း ပေါက်မြို့နယ်အတွင်းကို စစ်ကောင်စီတပ်က ထပ်မံဗုံးကြဲခဲ့ပြီး သေဆုံးထိခိုက်မှုအခြေအနေတွေကိုတော့ အတည်မပြုနိုင်သေးဘူးလို့ ဆိုပါတယ်။

“ဒီကနေ့ကတော့ ပေါက်မြို့နယ်ထဲကို ၅ လပိုင်း ၂၇ ရက်ကတည်းကရောက်နေတဲ့ စစ်ကြောင်းကရှိတော့ လေယာဉ်တွေ ဝဲနေတာတော့ရှိတယ်၊ Y12 နဲ့ လာကြဲသွားတယ်၊ မုံရွာဘက်ကတက်လာတဲ့ Y12 နဲ့ ချသွားတာက ၆ ကြိမ်လောက်ရှိပြီ၊ ဒီနေ့အတိုင်းအတာမှာ ထိခိုက်သေဆုံးတော့ မသိရသေးဘူး”လို့ သူက ဆက်ပြောပါတယ်။

ခုလိုတိုက်ခိုက်မှုတွေကြောင့် ဘို့မယ်ရွာ၊ သက္ကယ်ကျင်းရွာ၊ တစူးရွာ၊ လက်ပံလှရွာ၊ လယ်ယာရွာ၊ ဘိုကုန်းရွာ၊ ကင်းမရွာ၊ ခင်ရှည်ရွာ၊ ကျောက်ခွက်ရွာ တို့ကဒေသခံ ၆,၀၀၀ လောက် တိမ်းရှောင်နေရတယ်လို့ သိရပါတယ်။

စာတည်း – လင်း

ပေါက်၊ မေ ၂၇၊ ၂၀၂၅။

မကွေးတိုင်း၊ ပေါက်မြို့နယ်အတွင်း ရွာ ၂ ရွာက စစ်ရှောင်အိမ်ထောင်စု ၃၇၅ စုကို မေ ၂၆ ရက်နဲ့ ၂၇ ရက်မှာ ငွေကြေးထောက်ပံ့ပေးခဲ့တယ်လို့ ပေါက်မြို့လူသားချင်းစာနာထောက်ထားရေးနဲ့ ဘေးအန္တရာယ်ဆိုင်ရာ စီမံခန့်ခွဲရေးဝန်ကြီးဌာနဆီက သိရပါတယ်။

မေ ၂၆ ရက်မှာ ဖိုးဖြူးလုံးကန်ကျေးရွာက အိမ်ထောင်စု ၂၃၀ ကိုတကြိမ်၊ မေ ၂၇ ရက်မှာ အိုင့်ကိုင်း ကျေးရွာက အိမ်ထောင်စု ၁၄၅ စုကိုတကြိမ် တအိမ်ထောင်ကို ငွေကျပ် ၄ သိန်း ၁ သောင်း ၅ ထောင်နှုန်းနဲ့ စုစုပေါင်းသိန်း ၁,၅၀၀ ကျော်ထောက်ပံ့ပေးခဲ့တာလို့ ဆိုပါတယ်။

“ကျနော်တို့အနေနဲ့ မိုးအဆက်မပျက် ရွာသွန်းနေတဲ့ကြားထဲက လမ်းလျှောက်လိုက် ဆိုင်ကယ်စီးလိုက် စက်လှေစီးလိုက်နဲ့ လမ်းပမ်းဆက်သွယ်ရေးအခက်အခဲကြားထဲကသွားရောက်ခဲ့ရတာပါ”လို့ သူက ဆက်ပြောပါတယ်။

ဖိုးဖြူးလုံးကန်ကျေးရွာက ဒေသခံတွေဟာ ၂၀၂၄ နှစ်ကုန်ပိုင်းမှာ စတင်စစ်ရှောင်နေရတာဖြစ်ပြီး အိုင့်ကိုင်းရွာက ဒေသခံတွေကတော့ ၂၀၂၃ ခုနှစ်အတွင်းကတည်းက စစ်ရှောင်နေကြရတာလို့ ပေါက်မြို့လူသားချင်းစာနာထောက်ထားရေးနဲ့ ဘေးအန္တရာယ်ဆိုင်ရာစီမံခန့်ခွဲရေးဝန်ကြီးဌာန တာဝန်ရှိသူတဦးက ပြောပါတယ်။

အဆိုပါကျေးရွာ ၂ ရွာက စုစုပေါင်းလူဦးရေ ၁,၆၀၀ ကျော်စစ်ရှောင်နေကြရတာဖြစ်ပြီး မြို့နယ်အတွင်းကအလှူရှင်တွေရဲ့လှူဒါန်းထောက်ပံ့မှုနဲ့ ရပ်တည်နေထိုင်နေကြရတယ်လို့ သိရပါတယ်။

စာတည်း – လင်း