မြေလတ်အသံ၊ ဒီဇင်ဘာ ၂၊ ၂၀၂၅။

စစ်ကိုင်းတိုင်း၊ ချောင်းဦးမြို့နယ်ကို စစ်ကြောင်းထိုးနေတဲ့ စစ်ကော်မရှင်တပ်ဖွဲ့ဝင်တွေက ဒေသခံအမျိုးသား ၁ ဦးကို ပစ်သတ်ခဲ့တာကြောင့် သေဆုံးသွားခဲ့တယ်လို့ ဒေသခံတွေကပြောပါတယ်။

သေဆုံးသူမှာ ကျီးကုန်းရွာမှ အသက် ၄၃ နှစ်အရွယ် ကိုမင်းနိုင် ဖြစ်ပြီး ချောင်းဦးမြို့ပေါ်ကနေ အင်အား ၁၀၀ ခန့်ပါတဲ့စစ်ကြောင်းက ကျီးကုန်းရွာကိုဝင်ရောက်လာချိန် နိုဝင်ဘာ ၃၀ ရက်ညနေ ၅ နာရီကျော်မှာ ပစ်ခံခဲ့ရတာလို့ ဆိုပါတယ်။

“တိုက်ပွဲမရှိဘူးဗျ။ ချောင်းဦးဘက်က **ကားနှစ်စီးနဲ့ လာတာပါဗျာ။ ခင်မွန်ရွာကိုဖြတ်ပြီး ကျီးကုန်းဝင်တာ။ ရွာကလူတွေကတော့ ထွက်ပြေးကြတာပေါ့။ စစ်ကြောင်းက ရွာကိုဝင်ပြီး ခဏအကြာမှာတော့ ပြန်ထွက်သွားတာ။ အလောင်းကို ရွာထဲရှင်းလင်းရေးပြန်ဝင်ရင် တွေ့တာပါ”လို့ ဒေသခံတော်လှန်ရေးတပ်ဖွဲ့ဝင်တဦးကပြောပါတယ်။

ကျီးကုန်းရွာကိုဝင်ခဲ့စစ်ကြောင်းဟာ ညတွင်းချင်းရွာကပြန်ထွက်သွားတာကြောင့် တော်လှန်ရေးတပ်ဖွဲ့တွေက ဒီဇင်ဘာ ၁ ရက်မနက်ပိုင်းမှာ ရှင်းလင်းရေးဝင်ချိန် ကိုမင်းနိုင်ရဲ့ ရုပ်အလောင်းကို ရွာလယ်ရှိလမ်းမပေါ်မှာ ဦးခေါင်းပွင့်ထွက်ဒဏ်ရာနဲ့တွေ့ရှိခဲ့ပြီး မြေမြှုပ်သင်္ဂြိုဟ်ပေးခဲ့တယ်လို့ သူက ဆိုပါတယ်။

အဆိုပါအင်အား ၁၀၀ ခန့်ပါစစ်ကြောင်းဟာ ကျီးကုန်းကျေးရွာကို ဒီဇင်ဘာ ၂ ရက်ဒီမနက် ပိုင်းမှာ ထပ်မံဝင်ရောက်လာပြီးနောက် လူနေအိမ်တွေကိုမီးရှို့ဖျက်ဆီးပြီး ရွာမှာတပ်စွဲထားတယ်လို့ အထက်ပါတပ်ဖွဲ့ဝင်က ပြောပါတယ်။

ပြီးခဲ့တဲ့ဇူလိုင် ၂၉ ရက်ကလည်း ကျီးကုန်းကျေးရွာအတွင်းကို မြပုလဲဂိတ်ကနေပစ်ခတ်လိုက်တဲ့ လက်နက်ကြီးကျည် ကျရောက်ပေါက်ကွဲခဲ့တာကြောင့် ၁၀ နှစ်ကလေး ၁ ဦးနဲ့ ၃၀ နှစ်အမျိုးသမီး ၁ ဦးသေဆုံးခဲ့တယ်လို့ သိရပါတယ်။

စာတည်း – လင်း

အင်အားအလုံးအရင်းဖြန့်တပ်စွဲထားလို့ ဒေသခံ ၄,၀၀၀ ကျော်တိမ်းရှောင်နေရ

ဖြူး၊ နိုဝင်ဘာ ၁၁၊ ၂၀၂၅။

ပဲခူးတိုင်း၊ ဖြူးမြို့နယ်အတွင်းကို စစ်ကြောင်းထိုးမီးရှို့နေတဲ့စစ်ကော်မရှင်စစ်ကြောင်းက အမျိုးသား ၁ ဦးကိုပစ်သတ်ပြီး ကျေးရွာတွေမှာတပ်ဖြန့်နေတယ်လို့ ပဲခူးတိုင်းစစ်ဌာနတာဝန်ရှိသူတွေဆီက သိရပါတယ်။

နိုဝင်ဘာ ၉ ရက် နေ့လယ် ၁၁ နာရီကျော်မှာ ခမရ ၅၉၀၊ ခမရ ၅၉၉ တပ်ရင်းနဲ့ အုတ်ဖြတ်ရဲစခန်းမှရဲတွေအပါ စုစုပေါင်း အင်အား ၂၀၀ ခန့်ပူးပေါင်းစစ်ကြောင်းဟာ ကျောင်းကုန်းကျေးရွာကို ရောက်ရှိလာပြီးနောက်မှာ ထွက်မပြေးနိုင်တဲ့ အမျိုးသား ၁ ဦးကို ပစ်သတ်ခဲ့တာလို့ ဆိုပါတယ်။

” ဒရုန်း၊ ပွိုင့်ဖိုက်၊ လက်နက်ကြီး၊ လက်နက်ငယ်တွေနဲ့ ပစ်ဖောက်ပြီး စစ်ကြောင်းဝင်ရောက်လာခဲ့လို့ တိုက်ပွဲဖြစ်ခဲ့သေးတယ်။ ပြီးတော့ ထွက်မပြေးနိုင်ပဲကျန်နေခဲ့တဲ့ ကပ္ပိယကို PDF ဆိုပြီး ပစ်သတ်တယ်။ ဒီနေ့ထိရွာမှာဆက်ရှိနေသေးတယ်။ ရင်းတိုက်စိန်၊ သောင်းပုရွာတွေမှာလည်း တပ်စွဲထားတယ်”လို့ ပဲခူးတိုင်းစစ်ဌာနတာဝန်ရှိသူက ပြောပါတယ်။

စစ်ကော်မရှင်အဖွဲ့က ပစ်သတ်လို့ အသက် ၅၀ အရွယ်ကျောင်းကုန်းရွာကျောင်း ကပ္ပိယ ၁ ဦးသေဆုံးပြီး နေအိမ် ၄ လုံးထက်မနည်းကိုလည်း မီးရှို့ထားတယ်လို့ ဆိုပါတယ်။

အဆိုပါ စစ်ကော်မရှင်စစ်ကြောင်းဟာ နိုဝင်ဘာ ၁၁ ရက် ဒီမနက်ပိုင်းထိ ကျောင်းကုန်း၊ ရင်းတိုက်စိန်၊ သောင်းပုရွာတွေမှာ အင်အားဖြန့်ခွဲထားပြီးကျေးရွာတွေထဲက ဆိုင်ကယ်၊ မီးစက်၊ အိမ်သုံးပစ္စည်း၊ အိမ်ထောင်ပရိဘောဂတွေကအစ သိမ်းယူနေတယ်လို့ သိရပါတယ်။

စစ်ကော်မရှင်စစ်ကြောင်းတွေ ကျေးရွာတွေမှာ တပ်စွဲထားတာကြောင့် အိမ်ခြေ ၁၅၀ ကနေ ၃၀၀ ကြားရှိတဲ့ ကျောင်းကုန်း၊ ရင်းတိုက်စိန်၊ သောင်းပု၊ အင်ကြင်းကုန်း၊ အိုဘိုကုန်း၊ အထက်ကြာ‌အင်းရွာ အပါအဝင် ကျေးရွာ ၇ ရွာလောက်ကပြည်သူ ၄,၀၀၀ ကျော်လောက်ဟာဘေးလွတ်ရာမှာ တိမ်းရှောင်နေရပြီး ယနေ့အထိနေရပ်မပြန်ကြရသေးဘူးလို့ သိရပါတယ်။

နိုဝင်ဘာ ၆ ရက်ကလည်း ဖြူးမြို့နယ်၊ မန်ကျည်းကုန်းတောင်ကျေးရွာက ပြည်သူ ၁ ဦးကို ဗုံးကြဲသတ်ဖြတ်ခဲ့တဲ့ ဂျိုင်ရိုကော်ပတာ ပျက်ကျပြီး စစ်ကော်မရှင်တပ်သား ၂ ဦးသေဆုံး ခဲ့သေးတယ်လို့ သိရပါတယ်။

စာတည်း – လင်း

မြေလတ်အသံ၊ နိုဝင်ဘာ ၇၊ ၂၀၂၅။

စစ်ကိုင်းတိုင်း၊ ချောင်းဦးမြို့နယ်၊ အမြင့်ကျေးရွာရှိ နယ်မြေရဲစခန်းမှ နယ်ထိန်း နဲ့ တပ်သားတို့ကို ပစ်သတ်ပြီး သေနတ် ၁ လက်နဲ့ ကျည်ဆံတွေကို သိမ်းဆည်းရရှိခဲ့တယ်လို့ မုံရွာခရိုင်ပြည်သူ့ကာကွယ်ရေးအဖွဲ့ဆီက သိရပါတယ်။

အောက်တိုဘာ ၄ ရက်နေ့လယ် ၂ နာရီကျော်မှာ နယ်ထိန်းနိုင်ထက်ဇော် နဲ့ တပ်သား မိုးဇော်အောင် တို့ဟာ ရဲစခန်းကနေ ဆိုင်ကယ် ၁ စီးနဲ့ ထွက်ခွာလာချိန် စခန်းအနီးရှိ ချင်းတွင်းမြစ်ဆိပ်ကမ်းအနီးမှာ ပစ်ခတ်ခဲ့တာလို့ ဆိုပါတယ်။

“ပွဲချင်းပြီးသေတယ်။ သေနတ်ကတော့ တပ်သားဆီကပဲရခဲ့တာ။ နယ်ထိန်းမှာပါ မလာဘူး။ သေနတ်က။ ပစ်ခတ်ခံရပြီး သိပ်မကြာဘူး။ ရဲစခန်းကအလောင်းတွေကို လာကောက်သွားတယ်”လို့ မုံရွာခရိုင်ပကဖ တာဝန်ရှိသူတဦးက ပြောပါတယ်။

ပစ်ခတ်ပြီးနောက် ၎င်းတို့ ၂ ဦးဆီက G-3 သေနတ် ၁ လက်၊ ကျည်ဘောက် ၁ ခု၊ ကျည်ဆံ ၁၂ တောင့်၊ လက်ကိုင်ဖုန်း ၂ လုံးတို့ကို သိမ်းဆည်းရရှိခဲ့တယ်လို့ သူကဆိုပါတယ်။

ပစ်ခတ်မှုဖြစ်ပြီးနောက်ပိုင်းမှာတော့ အမြင့်နယ်မြေရဲစခန်းကနေ လက်နက်ကြီးတွေနဲ့ ပစ်ခတ်ခဲ့ပေမယ့် ပကဖတပ်ဖွဲ့ဝင်တွေနဲ့ ပြည်သူတွေထိခိုက်မှုတစုံတရာမရှိခဲ့ဘူးလို့လည်း အထက်ပါတာဝန်ရှိသူက ဆိုပါတယ်။

အမြင့်ကျေးရွာဟာ မုံရွာမြို့အခြေစိုက် နမခ နဲ့ ၁၄ မိုင်ကွာဝေးပြီ ချောင်းဦးမြို့နဲ့ ၂၂ မိုင်ဝေးတဲ့ ကျေးရွာ ဖြစ်ပါတယ်။

ပြီးခဲ့တဲ့ ၂၀၂၁၊ ဒီဇင်ဘာ ၁၆ ရက်ကလည်း အမြင့်ကျေးရွာရဲ့ ဈေးထိပ်နေရာမှာ ရဲတပ်သားတဦးကို ပကဖတပ်ဖွဲ့ဝင်တွေက အနီးကပ် သေနတ်နဲ့ ပစ်ခတ်ခဲ့တာကြောင့် သေဆုံးခဲ့တယ်လို့သိရပါတယ်။

စာတည်း – လင်း

နွားထိုးကြီး၊ အောက်တိုဘာ ၂၇၊ ၂၀၂၅။

မန္တလေးတိုင်း၊ နွားထိုးကြီးမြို့နယ်၊ ထနောင်းပင်လဲကျေးရွာကို စစ်ကော်မရှင်စစ်ကြောင်းထိုးပြီးနောက် ဒေသခံ ၃ ဦးပစ်သတ်ခံခဲ့ကာ နေအိမ် ၁၅ လုံးကိုမီးရှိုခဲ့တယ်လို့ ရွာခံတွေဆီက သိရပါတယ်။

အောက်တိုဘာ ၂၆ ရက်မနက် ၉ နာရီခန့်မှာ နွားထိုးကြီးမြို့ပေါ်ကနေ အင်အား ၁၂၀ ပါစစ်ကြောင်းက ကျေးရွာထဲကို အဖွဲ့ ၃ ဖွဲ့ခွဲဝင်ရောက်လာပြီးနောက် ထွက်ပြေးတဲ့ဒေသခံ ၃ ဦးကိုပစ်သတ်ပြီး နေအိမ်တွေကိုမီးရှို့ခဲ့တာလို့ ဆိုပါတယ်။

“ကျနော်ယောက်ဖတယောက်ရယ်။ တူတော်မောင်တယောက်ရယ်ပါသွားတယ်။ တိုက်ပွဲမဖြစ်ဘူး။ အလွတ်ဖောက်ပြီးဝင်လာတယ်။ ရွာထဲက ပြည်သူတွေတွေ့တဲ့ဟာကို ဖမ်းပြီး သတ်ပစ်တာ။ ဘာအပြစ်မှမရှိပါဘူးဗျာ။ ပြီးတော့ရွာကို မီးရှို့တာ။” လို့ ရွာခံတဦးကပြောပါတယ်။

သေဆုံးသူတွေဟာ အသက် ၁၄ နှစ်အရွယ် မောင်ကောင်းကောင်း၊ အသက် ၅၀ ဝန်းကျင်အရွယ် ဦးကျော်လှိုင်နဲ့အသက် ၂၀ ကျော်အရွယ် လူငယ်အမျိုးသား ၁ ဦးတို့ဖြစ်ပြီး စစ်ကော်မရှင်အဖွဲ့တွေက ဖမ်းမိပြီးနောက် ဦးခေါင်းကိုသေနတ်နဲ့တော့ပစ်ခတ်ခဲ့တာလို့ သူကဆက်ပြောပါတယ်။

ထနောင်းပင်လဲရွာမှာ အိမ်ခြေ ၁,၀၀၀ ကျော် လူဦးရေ ၄,၀၀၀ ကျော်ရှိပြီး စစ်ကြောင်းကမီးရှို့လို့ နေအိမ် ၁၅ လုံးကျော်မီးလောင်ပျက်စီးခဲ့ကာ ဒေသခံတွေလည်းရွာကတိမ်းရှောင်နေကြတယ်လို့ ဆိုပါတယ်။

အဆိုပါစစ်ကြောင်း ရွာကိုမီးရှို့ပြီးနောက် ပြန်လည်ဆုတ်ခွာသွားပြီး အောက်တိုဘာ ၂၇ ရက်မနက်မှာ ကျေးရွာထဲကိုပြန်ရောက်လာတဲ့အတွက် ရွာခံတွေလည်း ရွာထဲပြန်မဝင်ရဲကြသေးဘူးလို့ သိရပါတယ်။

အဆိုပါ ကျေးရွာမှာ MDY-PDF အဖွဲ့တွေအပါအဝင် PDF အင်အား ၅၀ ထက်မနည်းကျေးရွာထဲ ခိုအောင်းနေတဲ့အတွက် နယ်မြေရှင်းလင်းရေးလုပ်ပေးဖို့ဆိုကာ စစ်ကော်မရှင်ထောက်ခံတယ်လီဂရမ်ချန်နယ်တွေမှာ အောက်တိုဘာလ ဒုတိယအပတ်လောက်ကတည်းက ရေးသားဖော်ပြခဲ့ပြီးနောက်မှာ ခုလို စစ်ကြောင်းလာခဲ့တာလည်းဖြစ်ပါတယ်။

အောက်တိုဘာ ၁၉ ရက်ကလည်း နွားထိုးကြီးမြို့နယ်၊ ပဲချက်ကျေးရွာကို စက်တပ်လေထီးနဲ့ ဗုံးချခံရလို့ ပြည်သူ ၄ ဦးသေဆုံးပြီး ၂ ဦးဒဏ်ရာရခဲ့တယ်လို့ သိရပါတယ်။

စာတည်း – လင်း

အုတ်ဖို၊ အောက်တိုဘာ ၂၀၊ ၂၀၂၅။

ပဲခူးတိုင်း၊ အုတ်ဖိုမြို့နယ်အတွင်းကို စစ်ကော်မရှင်တပ်တွေစစ်ကြောင်းထိုးဝင်ရောက်ပြီးနောက် ပြည်သူ ၂ ဦးအပါအဝင် ၄ ဦးပစ်သတ်ခံရပြီး ဖမ်းဆီးသွားတဲ့ ပြည်သူ ၁၄ ဦးလည်း အောက်တိုဘာ ၂၀ ရက် ဒီကနေ့အထိ ပြန်မလွတ်သေးဘူးလို့ ဒေသခံတွေဆီက သိရပါတယ်။

အောက်တိုဘာ ၉ ရက်မှာ အလယ်ကုန်းစစ်ကော်မရှင်အထိုင်စခန်းကလာတဲ့ အင်အား ၁၀၀ ကျော်ပါ စစ်ကြောင်းဟာ ရေငံကျေးရွာကိုဝင်ပြီး ရွာအနီးကင်းစောင့်နေတဲ့ အသက် ၂၀ ကျော်အရွယ် PDF တပ်ဖွဲ့ဝင် ၂ ဦးကို ပစ်သတ်ပြီး ရွာထဲကိုဝင်ကာ အသက် ၆၀ ကျော်အရွယ် ဦးလှဦး ကို ထပ်မံ ပစ်သတ်ပြီး ရွာမှာအထိုင်ချနေထိုင်ခဲ့တယ်လို့ ဆိုပါတယ်။

“အဲ့နေ့က ရွာကိုဝင်လာပြီး ၃ ယောက်ပစ်သတ်တယ်။ ရွာက အိမ်ခြေ ၆ အိမ် မီးရှို့တယ်။ ပြီးတော့ရွာတွေမှာပတ်မွှေပြီးတော့ မထွက်ဘဲ ပေါ်တာပတ်ဆွဲခဲ့တာ။ ရွာသားတွေကို လူသားဒိုင်းတွေ လုပ်တယ်။ ရေဒါ၊ သရက်တောက ရွာခံတွေပါတယ်။ အမျိုးသမီးတွေပါ ဖမ်းထားတာ။ ပေါ်တာဆွဲတာတွေရှိတယ်”လို့ ဖြစ်စဥ်ကိုသိထားတဲ့ ဒေသခံတဦးကပြောပါတယ်။

ဒါ့အပြင် အဲ့ဒီစစ်ကြောင်းကတပ်ဖွဲ့ဝင်တွေဟာ ရေငံရွာမှာတပ်စွဲနေစဥ်အတွင်း အနီးတဝိုက်ဒေသတွေမှာ ပေါ်တာဆွဲဖမ်းဆီးမှုတွေလုပ်ခဲ့တယ်လို့ ဆိုပါတယ်။

အောက်တိုဘာ ၁၂ ရက်နေ့လယ်မှာ မအူတန်းရွာနဲ့ ကြိုးကိုးပင်ရွာကြားမှာ ပေါ်တာဆွဲနေစဥ် ရွာစဥ်လှည့်ဝက်သားရောင်းဖို့လာတဲ့ ရေဒါကျေးရွာသား အသက် ၄၀ ကျော်အရွယ် ကိုအောင်နိုင်စိုးကိုလည်းပစ်သတ်ခဲ့တယ်လို့ ဒေသခံကပြောပါတယ်။

“သူကရွာစဥ်လှည့်ဝက်သားရောင်းတာ။ သူကလာတဲ့အချိန် ပေါ်တာဆွဲတာမြင်တော့လှည့်ပြေးတာကို ပစ်သတ်လိုက်တာ။ **တွေက အဲ့နားရှိနေတော့ ဘယ်သူမှသွားမကောက်ရဲဘူး။ ၃ ရက်မြောက်နေ့ ပုပ်ပွနေမှ **တွေကမရှိတော့မှသွားကောက်ပြီး သင်္ဂြိုဟ်ရတာ”လို့ ဆိုပါတယ်။

စစ်ကော်မရှင်စစ်ကြောင်းဟာ အောက်တိုဘာ ၁၅ ရက်မှာ ရေငံရွာကနေ ပြန်ထွက်ချိန်ဖမ်းဆီးထား သူ ၄၀ ကျော်အနက်ကအချို့ကို ပြန်လွှတ်ပေးခဲ့ပြီး အဲ့ဒီအထဲက အသက် ၂၀ ကနေ ၄၀ ကြား ကြို့ကိုးပင်ရွာသား ၈ ဦး၊ မအူတန်းကျေးရွာသား ၆ ဦးစုစုပေါင်း ၁၄ ဦးကို အလယ်ကုန်းစခန်းဘက်ကို ခေါ်သွားပြီး ဒီကနေ့အထိပြန်မလွတ်သေးတာလို့ ဆိုပါတယ်။

စစ်ကြောင်းဝင်ပြီး ဒေသခံတွေကိုသတ်ဖြတ်၊ ပေါ်တာဆွဲတာတွေကြောင့် အိမ်ခြေ ၃၀၀ ကနေ ၅၀၀ ကြားရှိ ထွက်တိုး၊ စံပြ၊ ကိုင်းကြီး၊ ရေငံ၊ သရက်တော၊ ကြို့ကိုးပင်၊ မအူတန်းရွာတွေက ဒေသခံပြည်သူ ၇,၀၀၀ ခန့်ဟာ အုတ်ဖိုမြို့ပေါ်နဲ့ နီးစပ်ရာကျေးရွာတွေကို ထွက်ပြေးတိမ်းရှောင်ခဲ့ကြရတယ်လို့ သိရပါတယ်။

စာတည်း – လင်း

ဖြူး၊ စက်တင်ဘာ ၉၊ ၂၀၂၅။

ပဲခူးတိုင်း၊ ကညွတ်ကွင်းမြို့မှာ ကားနဲ့ကင်းလှည့်ကာ ပေါ်တာဆွဲဖမ်းဆီးမှုတွေလုပ်နေတဲ့ စစ်ကော်မရှင်တပ်က ဆိုင်ကယ်စီးလာတဲ့ ညီအကို ၂ ဦးကို သေနတ်နဲ့ ပစ်သတ်ခဲ့တယ်လို့ မြို့ခံတွေထံက သိရပါတယ်။

သေဆုံးသူတွေဟာ ကညွတ်ကွင်းမြို့၊ စက်တောင်ရပ်ကွက်နေ အသက် ၂၈ နှစ် စည်လင်းထက်နဲ့ ညီဖြစ်သူ အသက် ၂၄ နှစ် ညီလင်းထက်တို့ ဖြစ်ပြီး စက်တင်ဘာ ၆ ရက် ည ၉ နာရီခန့်မှာ နေအိမ်ကနေ မြို့တွင်းကိုသွားရောက်စဥ် လျှပ်စစ်ရုံးအနီးအရောက်မှာ စစ်ကော်မရှင်တပ်ဖွဲ့နဲ့တိုးပြီး ပစ်ခတ်ခံခဲ့ရတာလို့ ဆိုပါတယ်။

” ညီအကိုနှစ်ယောက် ထမင်းကြော်သွားဝယ်စားတာကို ပေါ်တာဆွဲတဲ့ကားနဲ့တိုးပြီး “ဟေ့ကောင်တွေမင်းတို့လာအုန်း” ဆိုတော့ သူတို့က ကြောက်ပြီး အရှေ့ကိုမောင်းပြေးတာမှာ ကားက သူတို့ကိုကျော်ရပ်ပြီး ပစ်လိုက်တာ”လို့ ဖြစ်စဥ်ကိုသိထားတဲ့ ဖြူးမြို့ခံတဦးက မြေလတ်အသံကို ပြောပါတယ်။

ကညွတ်ကွင်းမြို့စစ်ကော်မရှင်တပ်က ညဘက်ကင်းလှည့်ချိန်တွေမှာ လမ်းပေါ်တွေ့ရှိတဲ့ လူငယ်တွေကို ပေါ်တာဆွဲဖမ်းဆီးပြီး စစ်မှုထမ်းဖို့ ပို့ဆောင်လေ့ရှိတယ်လို့ မြို့ခံတွေထံက သိရပါတယ်။

ကနဦးပစ်ခတ်ခံရအချိန်မှာ ဆိုင်ကယ်မောင်းသူ စည်လင်းထက် ကျည်ထိမှန်သွားတာကြောင့် ဆိုင်ကယ်မှောက်သွားချိန် ညီဖြစ်သူကိုပါ စစ်ကော်မရှင်တပ်က ထပ်မံပစ်ခတ်ခဲ့တာလို့ဆိုပါတယ်။

“အကြီးကောင်ကို ၃ ချက်ပစ်ခံရလို့ ဆိုင်ကယ်မှောက်ပြီးလဲချိန် ညီဖြစ်သူက သွားထူတဲ့အချိန် ညီဖြစ်သူကိုပါ ၇ ချက်လောက်ပစ်သွားတာ”လို့ သူက ​ပြောပါတယ်။

ပစ်ခတ်ခံရလို့ စည်လင်းထက်နဲ့ ညီလင်းထက်မှာ ရင်ဘတ်၊ ဦးခေါင်းနဲ့ လက်တွေမှာ ကျည်ထိဒဏ်ရာတွေနဲ့နေရာမှာ သေဆုံးသွားခဲ့ပြီး ၎င်းတို့ရုပ်အလောင်းတွေကို စစ်ကော်မရှင်တပ်ဖွဲ့တွေက ဖြူးမြို့ဆေးရုံကိုပို့ဆောင်ခဲ့တာပါ။

အဲ့ဒီနောက် ရုပ်အလောင်းတွေကိုနေအိမ်ဆီသယ်ဆောင်ခွင့်မပေးဘဲ စက်တင်ဘာ ၇ ရက်မှာ မိသားစုအနည်းငယ်နဲ့ ဖြူးမြို့မှာပဲ သင်္ဂြိုဟ်ခွင့်ပြုခဲ့ကာ သေဆုံးသူ ညီအကို ဟာ PDF တပ်ဖွဲ့ဝင်ဆိုပြီး စစ်ကော်မရှင်ဘက်က သတင်းလွှင့်ထားတယ်လို့ အထက်ပါမြို့ခံက ပြောပါတယ်။

စက်တင်ဘာ ၁ ရက်မှာလည်း ဖြူးမြို့နယ်၊ မြို့ချောင်းရွာတံတားအပေါ်မှာ အောင်စည်ယွန်းကျေးရွာက ဒေသခံလူငယ် ၂ ဦးကို စစ်တပ်က သေနတ်နဲ့ ပစ်သတ်ခဲ့လို့သေဆုံးခဲ့ပါသေးတယ်။

စာတည်း – မြတ်

◼ ပုလဲမှာလည်း လေယာဥ်နဲ့ဗုံးကြဲခံရလို့ အမျိုးသမီး ၁ ဦး သေဆုံး

သိုက်ထွန်း၊ ဟယ်သာ

မြေလတ်အသံ၊ စက်တင်ဘာ ၄၊ ၂၀၂၅။

စစ်ကိုင်းတိုင်း၊ ဘုတလင်မြို့နယ်မှာ စစ်ကော်မရှင်တပ်စစ်ကြောင်းက ရွာခံအမျိုးသမီး ၂ ဦးကို သေနတ်နဲ့ပစ်သတ်ခဲ့ပြီး ပုလဲမြို့နယ်မှာလည်း လေကြောင်းကနေ ဗုံးကြဲခံရလို့ အမျိုးသမီး ၁ ဦး သေဆုံးခဲ့တယ်လို့ ဒေသခံတွေထံက သိရပါတယ်။

ဘုတလင်မြို့မှာ တပ်စွဲထားတဲ့ စစ်ကော်မရှင်တပ်အင်အား ၉၀ ခန့်ဟာ စက်တင်ဘာလ ၄ ရက် ဒီကနေ့ နေ့လယ် ၂ နာရီလောက်မှာ ဘုတလင်-ရေဦးလမ်းပိုင်းကို စစ်ကြောင်းထိုးလာပြီးနောက် ရှမ်းတဲရွာကို စစ်ကြောင်း ၂ ကြောင်းခွဲဝင်ရောက်လာကာ အမျိုးသမီး ၂ ဦးကို သေနတ်နဲ့ပစ်သတ်သွားခဲ့တာလို့ ဆိုပါတယ်။

” ရှမ်းတဲရွာက အမျိုးသမီး ၂ ဦးက **တွေပြန်ထွက်ပြီဆိုပြီး ရွာထဲပြန်ဝင်တဲ့အချိန်သတ်ခံရတာ။ ၁ ယောက်က ၄ လသားရဲ့မိခင်၊ ကလေးတော့မမှန်ပဲ အသက်ရှင်ကျန်ရစ်တယ်” လို့ ဘုတလင်ရပ်ကျေးပအဖအဖွဲ့ဝင်တဦးက မြေလတ်အသံကို ပြောပါတယ်။

သေဆုံးသူတွေမှာ ရှမ်းတဲရွာနေ အသက် ၄၀ အရွယ် မဖြူနဲ့ အသက် ၃၀ အရွယ် မအေးသီတို့ဖြစ်ပြီး မအေးသီမှာ သားဖြစ်သူ ၄ လသားလေးကို ပွေ့ချီထားရင်း ပစ်ခတ်ခံခဲ့ရတာလို့ ဆိုပါတယ်။

ဒါ့အပြင် စစ်ကြောင်းတွေဟာ တက်လှိုင်းရွာလမ်းခွဲအနီး မြေပဲခင်းတွေမှာ မြေပဲနှုတ်နေတဲ့ မြောက်ကျည်ရွာခံ ၁၅ ဦးကိုဖမ်းဆီးသွားခဲ့ပြီး ညနေ ၅ နာရီခန့် ဘုတလင်မြို့တွင်းပြန်လည်ဝင်ရောက်ချိန်မှာ ၁၄ ဦးကို ပြန်လွှတ်ပေးခဲ့ကာ အသက် ၃၅ နှစ်ဝန်းကျင် ကိုဖိုးဇေ ကို ဆက်လက်ဖမ်းဆီး ခေါ် ဆောင်သွားတယ်လို့ သိရပါတယ်။

အလားတူ စစ်ကိုင်းတိုင်း၊ ပုလဲမြို့နယ်၊ တနယ်ကျေးရွာကို စစ်ကော်မရှင်တပ်က လေကြောင်းကနေ ဗုံးကြဲတိုက်ခိုက်ခဲ့တာကြောင့် အမျိုးသမီး ၁ ဦးသေဆုံးခဲ့ပါတယ်။

စက်တင်ဘာ ၄ ရက်နေ့လယ် ၁ နာရီခန့်မှာ စစ်ကော်မရှင်တိုက်လေယာဥ်က ဗုံး ၂ လုံးကြဲချခဲ့ရာ တနယ်ကျေးရွာအနောက်တောင်ဘက်ရှိ နေအိမ်အတွင်း ကျရောက်ပေါက်ကွဲခဲ့ပြီး အသက် ၄၀ ဝန်းကျင်အမျိုးသမီးမှာ ဗုံးစထိမှန်ကာ ခါးပြတ်သေဆုံးခဲ့တာလို့ ဒေသခံတဦးက ပြောပါတယ်။

တနယ်ကျေးရွာဟာ အိမ်ခြေ ၁,၈၀၀ ခန့်ရှိ ကျေးရွာကြီးတရွာဖြစ်ပြီး ဩဂုတ်လကုန်ပိုင်းမှာလည်း ကျေးရွာအနောက်မြောက်ဘက်ဘုန်းကြီးကျောင်းပေါ်ကို လေယာဥ်နဲ့ဗုံးကြဲခံခဲ့ရပြီး အဲ့ဒီဗုံးကြဲခံရမှုမှာ လူထိခိုက်မှုမရှိခဲ့ဘူးလို့ သိရပါတယ်။

စာတည်း – ဟိန်းစံ

မကွေး၊ မေ ၂၇၊ ၂၀၂၅။

မကွေးအကျဥ်းထောင်မှာ နိုင်ငံရေးအကျဥ်းသား ၂ ဦး သေနတ်ပစ်ခံရပြီးသေဆုံးခဲ့အပြင် နောက်ထပ် နိုင်/ကျဥ်း ၂၀၀ ကျော်ကိုလည်း တိုက်ပိတ်ထားတယ်လို့ မေ ၂၇ ရက်မှာ မြန်မာနိုင်ငံလုံးဆိုင်ရာ နိုင်ငံရေးအကျဥ်းသားများကွန်ရက် – PPNM က ထုတ်ပြန်ပါတယ်။

ပြီးခဲ့တဲ့ဧပြီ ၁၃ ရက်ညနေ ၆ နာရီအချိန်က ထောင်ပြင်ပမှာ စစ်ကောင်စီတပ်နဲ့ တော်လှန်တပ်ဖွဲ့တွေ တိုက်ပွဲဖြစ်ပွားခဲ့ပြီးနောက် ထောင်အာဏာပိုင်တွေနဲ့ နိုင်ငံရေးအကျဥ်းသားတွေကြား အချင်းများပြီး နှစ်ဘက်ထိတွေ့မှုဖြစ်ပွားချိန် အာဏာပိုင်တွေကသေနတ်နဲ့ပစ်ခတ်ခဲ့ရာ နိုင်/ကျဥ်း စောရွှေအောင် အပါအဝင် ၂ ဦးသေဆုံးခဲ့ပြီး ဦးဝင်းဝင်းနဲ့ ကိုဖြိုးအပါအဝင် ၂၀၀ ဦးကျော်ကိုလည်း မေ ၂၇ ရက်ဒီနေ့အထိ တိုက်ပိတ်ဒဏ်ခတ်ထားတာလို့ ဆိုပါတယ်။

“သေဆုံးမှုအပေါ် ကျူးလွန်ခဲ့တဲ့သူတွေကို အခုအချိန်ထိ အရေးယူမှုမရှိသေးဘူး။ နောက်ဆက်တွဲအနေနဲ့ ဒီလိုမျိုးဖြစ်စဥ်မှာ ပါဝင်ခဲ့တယ်လို့ သူတို့သတ်မှတ်ထားတဲ့သူတွေကို ခေါ်ယူစစ်ဆေးမေးမြန်းတာ၊ တိုက်ပိတ်အပြစ်ဒဏ်ပေးတာ”လို့ PPNM ဦးဆောင်ကော်မတီဝင် ကိုသိုက်ထွန်းဦးက ပြောပါတယ်။

ဒါ့အပြင် အခန်း ၁ ခန်းမှာ ၃ ဦးကနေ ၇ ဦးလောက်ထိ တိုက်ပိတ်ပြီး ပြစ်ဒဏ်ပေးတာတွေလည်းရှိတယ်လို့ သူကဆက်ပြောပါတယ်။

“အဲလိုအခန်းတွေမှာ လူ ၃ ယောက်ကနေ ၅ ယောက်လောက်ထိတိုက်ပိတ်လို့ရတယ်။ တကယ်တော့ လူ ၃ယောက်လာက်ဆိုရင် ကျပ်ကျပ်ညပ်ညပ်ဖြစ်နေပေမယ့် တိုက်ပိတ်ပြစ်ဒဏ်ပေးတဲ့အခါမှာ တခန်းကို ၃ ဦး ကနေ ၅ ဦးအထိ အခန်းတခန်းတည်းမှာ ပိတ်လှောင်ထားတာရှိတယ်။ပြီးတော့ တခန်းမှာ ၅ ဦးကနေ ၇ ဦးအထိလည်း တိုက်ပိတ်လေ့ရှိပါတယ်”လို့ သူကဆိုပါတယ်။

ထောင်အာဏာပိုင်တွေက အဆိုပါတိုက်ပွဲဖြစ်ပွားတဲ့ကိစ္စမှာ နိုင်ငံရေးအကျဉ်းသားတွေပါဝင်ကြောင်း စွပ်စွဲပြီး နိုင်ငံရေးအကျဉ်းသား ၄၀၀ ကျော်ကို မြေမြင်ပေါ်မှာ ဝမ်းလျားမှောက်ခိုင်းကာ ရိုက်နှက်ခဲ့တာကြောင့် နိုင်/ကျဥ်းတွေမှာ ခါး၊ ခြေထောက်နဲ့ တင်ပါးတွေမှာ ရိုက်နှက်ခံရတဲ့ ဒဏ်ရာတွေနဲ့ သေနတ်ဒဏ်ရာတွေရရှိခဲ့ကြတယ်လို့ ကိုသိုက်ထွန်းဦးကဆိုပါတယ်။

ဒါ့အပြင် သေနတ်ပစ်ပြီး ရိုက်နှက်မှုပြုလုပ်မှုကြောင့် ဒဏ်ရာရရှိခဲ့တဲ့ နိုင်/ကျဥ်းတွေကို တိုက်ပိတ်ထားတဲ့အပြင် ဆေးကုသခွင့်၊ မိသားစုဝင်တွေက ထောင်ဝင်စာတွေ့ခွင့်၊ ထောင်ဝင်စာပါဆယ်ပို့ခွင့်တို့ကိုပါ တပြိုင်နက် ပိတ်ပင်ခဲ့တယ်လို့ ကိုသိုက်ထွန်းဦးက ဆက်ပြောပါတယ်။

မကွေးထောင်ပြင်ပတိုက်ပွဲဖြစ်စဉ်ဖြစ်ပွားခဲ့တဲ့ ဧပြီ ၁၃ ရက်ကစတင်ပြီး မေ ၂၇ ရက်လက်ရှိအချိန်အထိ အကျဉ်းထောင်ရှိ နိုင်ငံရေးအကျဉ်းသားတွေမှာ ရေသန့်တွေမရရှိဘဲ သောက်ရေတွေကိုသာ ဈေးကြီးပေးဝယ်နေကြရကာ အခန်းတွင်းမှ အိမ်သာရေတွေနဲ့သာ ရေချိုးနေကြရတယ်လို့ PPNM ရဲ့ ထုတ်ပြန်ချက်မှာဖော်ပြပါတယ်။

မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက် – PPNM အနေနဲ့ အထက်ပါဖြစ်စဥ်ကို စုံစမ်းမှုများပြုလုပ်ကာ ကျူးလွန်သူတွေကို ဖော်ထုတ်သွားမှာဖြစ်ပြီး၊ အရေးယူမှုတွေကိုလည်း လူ့အခွင့်အရေးအဖွဲ့အစည်းတွေနဲ့ ပူးပေါင်းဆောင်ရွက်သွားမှာဖြစ်တယ်လို့ အသိပေးလိုက်ပါတယ်။

စာတည်း – လင်း