နေအိမ်

မကွေး၊ စက်တင်ဘာ ၅၊ ၂၀၂၂။

မကွေးတိုင်း၊ နတ်မောက်မြို့နယ် ကျောက်အိုးကျေးရွာက အိမ်တအိမ်အတွင်းက ရှိသမျှ အိမ်အသုံးအဆောင် အကုန်ယူပြီးမှ စစ်တပ်က အကြောင်းမဲ့ မီးရှို့သွားခဲ့ပါတယ်။

စက်တင်ဘာ၄ရက် မနေ့က မနက်ပိုင်းမှာ စစ်ကောင်စီတပ်သား ၈ယောက်က အရပ်သားပြည်သူတွေရဲ့ ဆိုင်ကယ် ၄စီးကို ချောဆွဲလာပြီး ပစ္စည်းတွေသယ်အပြီးမှာ မီးရှို့ခဲ့တာဖြစ်တယ်လို့ ဒေသခံတဦးက ပြောပါတယ်။

” တရွာလုံးက ပြည်သူတွေ ရွာလုံးကျွတ်လောင်မှာကို စိုးရိမ်ခဲ့ရပါတယ်၊ တချို့ဆို ရှော့ခ်ရပြီး ဆေးကုလိုက်ရတာတွေတောင်ရှိတယ်” လို့ ပြောပါတယ်။

မီးမရှို့ခင်မှာ ပြည်သူတွေဆီက ဖုန်းအားလုံးသိမ်းထားပြီး မီးရှို့ပြီးမှ ပြန်ပေးခဲ့တာလို့ ဆိုပါတယ်၊ မီးမရှို့ခင် တရက်အလိုမှာလည်း ကျောက်အိုးရွာတကျော ပြည်သူတွေဆီက ကြက်နဲ့ အစားအသောက်တွေ အတင်းတောင်းယူတာမျိုးတွေလည်း ရှိခဲ့ပါသေးတယ်။

” စစ်ကြောင်းလာတိုင်း သယ်နိုင်တဲ့ ပစ္စည်းတွေ ဝင်ယူတာမျိုးတွေ ရှိပါတယ်၊ လက်ရှိလည်း စက်တင်ဘာ ၄ရက် ညပိုင်းမှာ ဒီနေ့မီးရှိခံရတဲ့နေအိမ်က ပစ္စည်းတွေ ကားပေါ်မှာတင်ထားပြီး စစ်ဘက်သုံးကားအကြီးတစ်စီးအင်အား ၁၅ ယောက်ဝန်းကျင်လောက်နဲ့ သပွတ်ပင်ကျေးရွာမှာ တပ်စွဲနေထိုင်နေတာပါ” လို့ ပြောပါတယ်။

အဲ့ဒီအိမ်ကို စစ်တပ်က PDF နဲ့ ဆက်စက်တယ်ဆိုကာ အကြောင်းမဲ့ မီးရှို့သွားခဲ့တာဖြစ်ပြီး အဲ့ဒီအိမ်ရှင်တွေက အိမ်မှာမနေတာ ၃နှစ်ဝန်းကျင်လောက်ရှိပြီလို့ ဒေသခံတဦးက ပြောပါတယ်။

အဲ့ဒီနေအိမ်ကို မီးမရှို့ခင်မှာလည်း ကျောက်အိုးရွာမှာ တပတ်လောက်တပ်စွဲနေထိုင်ပြီး ပြည်သူတွေကို ဖမ်းဆီးနှိပ်စက်တာတွေ လုပ်တဲ့အပြင် အတင်းအကြပ်ငွေကြေးတောင်းတာတွေလည်း လုပ်ခဲ့သေးတယ်လို့ ဒေသခံတဦးကပြောပါတယ်။

” ကျောက်အိုးကျေးရွာရဲ့ မီးရှိပြာချ ခံရတဲ့ နေအိမ်မှာ တပ်စွဲတုန်းကလည်း ကျေးရွာတွင်းမှ ပြည်သူများထံမှ အိမ်ထောင်ပရိဘောဂသုံးဖို့ အရံထားတဲ့ ပျဥ်ချပ်သစ်များသိုလှောင်ထားသည်ဟု ဆိုကာ ငွေကျပ် ရှစ်သိန်းလောက် အတင်းအဓမ္မ တောင်းယူသွားကြပါသေးတယ်” လို့ ဆိုပါတယ်။

အိမ်ခြေ၃၀၀ ဝန်းကျင်ရှိတဲ့ နတ်မောက်မြို့ အ‌ရှေ့ခြမ်းက ကျောက်အိုးရွာကို PDF မလာနိုင်အောင် နယ်မြေရှင်းလင်းရေးပုံစံနဲ့ ခဏခဏ စစ်ကြောင်းထိုးခံနေရတဲ့ ရွာတခုဖြစ်ပြီး အဲ့ရွာက ပြည်သူတွေအနေနဲ့ စိုးရိမ်ထိတ်လန့်နေကြရတယ်လို့ သိရပါတယ်။

မကွေး၊ သြဂုတ် ၂၂၊ ၂၀၂၂။

မကွေးတိုင်း၊ ဆောမြို့၊ အထက ၁ အနီးက နေအိမ်လုံးမှာ သြဂုတ်လ ၂၁ ရက်မနေ့ည ၈ နာရီခန့်က အသက် ၁၃ နှစ်အရွယ်မိန်းကလေး ၁ ဦးအပါအဝင် ဒေသခံ ၆ ဦး သေနတ်နဲ့ ပစ်ခတ်သတ်ဖြတ်ခံခဲ့ရတယ်လို့ ဒေသခံတွေဆီက သိရပါတယ်။

ပစ်ခတ်သတ်ဖြတ်ခံရတဲ့နေအိမ်ဟာ ဦးခင်မောင်လင်းဆိုသူရဲ့နေအိမ်ဖြစ်ပြီး အမည်မသိလက်နက်ကိုင်လူတစုက ဝင်ရောက်ပစ်ခတ်ခဲ့လို့ ၎င်းအပါအဝင် နေအိမ်အတွင်းမှာရှိတဲ့ သူရဲ့မိသားစုဝင်တွေထဲက ဇနီးဖြစ်သူ ဒေါ်ယဥ်ငွေ၊ ချွေးမဖြစ်သူ ဒေါ်ခင်မာသက်၊ အသက် ၁၃ နှစ်အရွယ် မြေးဖြစ်သူ မသက်အေးငြိမ်း၊ ညီဖြစ်သူ ဦးဇော်ဌေးတို့နဲ့ TV လာကြည့်တဲ့ ဧည်သည့်တွေဖြစ်တဲ့ ဦးအောင်သိန်းဝင်းတို့ ၆ ဦးသေဆုံးခဲ့ပြီး တခြားဒေသခံ ၂ ဦးဒဏ်ရာရရှိခဲ့တယ်လို့ ဒေသခံတဦးကပြောပါတယ်။

“ည ၈ နာရီလောက်ကြီး ဝင်ပစ်သွားတာ။ သေသွားတာက ဦးခင်မောင်လင်းရယ်၊ သူ့မိန်းမ၊ သူ့ညီ၊ သူ့ချွေးမ၊ သူ့မြေးမလေးရယ် ကလေးမလေးက ၁၃ နှစ်ဘဲရှိသေးတယ်။ နောက်တယောက်က သူတို့အိမ်ကို TV လာကြည့်တဲ့တယောက်။ အားလုံး ၆ ယောက်သေတယ် ဘေးအိမ်အနီးအနားက ၂ ယောက်ဒဏ် ရာရတယ်” ဆောမြို့ခံတဦးက မြေလတ်အသံကို ပြောပါတယ်။

ဦးခင်မောင်လင်းဟာ အုတ်သဲကျောက်ရောင်းဝယ်ရေးလုပ်ကိုင်သူဖြစ်ပြီး စစ်တပ်သတင်းပေး ၁ ဦးလို့စွပ်စွဲကာ မိသားစုလိုက်ပစ်ခတ်သွားခြင်းဖြစ်တယ်လို့ ဆောမြို့နယ်ပြည်သူ့အုပ်ချုပ်ရေးအဖွဲ့တာဝန်ခံက မြေလတ်အသံကို ပြောပါတယ်။

“အခုကအခြေအနေတွေကရှုပ်ထွေးနေတယ်။ အဲ့ဒီဖြစ်စဥ်ကို စုံစမ်းနေတုန်းဘဲ ရှိသေးတယ်။ မျက်မြင်တွေ့သူတွေပြောကြားချက်အရ ဆော PDF အဖွဲ့တခုဖြစ်တယ်လို့ သိရတယ်။ ဒီကျနော်တို့တပ်ဖွဲ့ဝင်တွေကို ဒလန်ရှင်းမယ်ဆိုရင်တောင် ဒလန်လို့ကျော်ဇောနေရင်တောင် ဘယ်အရာတွေလုပ်ဆောင်လို့ ဒလန်လို့သတ်မှတ်တာလဲဆိုတာတွေ အသေးစိတ်စုံစမ်းပြီးမှ ရှင်းလင်းတာတွေလုပ်ဆောင်ဖို့ မှာကြားထားပြီးသားဖြစ်တယ်။ အခုက သူကဒလန်လည်းမဟုတ်ဘူး။ နောက်ပြီးတော့မိသားစုဝင် ခလေးတွေပါအကုန်သတ်သွားပြီး ပစ္စည်းယူသွားတာ” လို့ ဆောမြို့နယ်ပြည်သူ့အုပ် ချုပ်ရေးအဖွဲ့တာဝန်ခံက ပြောပါတယ်။

ဒါ့အပြင် လာရောက်ပစ်ခတ်သွားသူတွေဟာ ကား ၂ စီး၊ ရွှေထည်၊ ငွေသားနဲ့ အခြားအဖိုးတန်ပစ္စည်းတွေကိုလည်း ယူဆောင်ထွက်ပြေးသွားတယ်လို့ ဒေသခံတွေဆီက သိရပါတယ်။

ဒီဖြစ်စဥ်နဲ့ပတ်သက်လို့ YDF(Saw) အဖွဲ့ဝင်တွေက ဒလန်အကြောင်းပြပစ်ခတ်သတ်ဖြတ်ခဲ့တာဖြစ်ပြီး၊ ဒီလုပ်ဆောင်မှုကိုရှုတ်ချတယ်လို့ ဆောမြို့နယ်ပြည်သူ့အုပ်ချုပ်ရေးအဖွဲ့၊ လောင်းရှည်ဒေသပြည်သူ့ကာကွယ်ရေးတပ်ဖွဲ့-LSRPDF၊ ဆောပြည်သူ့ကာကွယ်ရေးတပ်ဖွဲ့ (PDF Saw)၊ The Youth Force (Saw&Kyaukhtu)၊ ကျောက်ထုဒေသပြည်သူ့ကာကွယ်ရေးတပ်ဖွဲ့ (KTU Region)နဲ့ ကိုရီးယားရောက်ယောသူ၊ ယောသားများအဖွဲ့စတဲ့ ဒေသတွင်း PDF တွေနဲ့ တော်လှန်ရေးအင်အားစုတွေဘက်က ထုတ်ပြန်ထားပါတယ်။

ဒေသတွင်း PDF တွေရဲ့ YDF(Saw)အပေါ် ပူးပေါင်းထုတ်ပြန်ချက်နဲ့ပတ်သက်လို့ မြေလတ်အသံအနေနဲ့ YDF(Saw) အဖွဲ့ထံ အဆက်မပြတ်ဆက်သွယ်ခဲ့ပေမယ့် ဒီညနေပိုင်းအထိ ဆက်သွယ်လို့မရခဲ့ပါဘူး။

မကွေး၊ သြဂုတ် ၁၇၊ ၂၀၂၂။

မကွေးတိုင်း၊ မြို့သစ်မြို့မှာ စစ်ကောင်စီက သားဖြစ်သူကို ရှာမတွေ့လို့ အသက် ၇၄ နှစ်အရွယ် အဖေဖြစ်သူကို ဖမ်းသွားပြီး နေအိမ်ကို ချိတ်ပိတ်လိုက်ပါတယ်။

ပြီးခဲ့တဲ့ သြဂုတ်လ ၁၅ရက် ညနေပိုင်းမှာ မြို့သစ်မြို့ လယ်ပြင်ရပ်ကွက်က အိမ်တလုံးနဲ့ ပြင်လယ်တော မှာရှိတဲ့ နေအိမ်ကိုပါချိတ်ပိတ်ခဲ့တာဖြစ်တယ်လို့ ဒေသခံတဦးက ပြောပါတယ်။

” သူတို့က သားဖြစ်သူကို PDF အဖွဲ့ထဲကဆိုပြီး စွပ်စွဲပြီး ဖမ်းသွားတာ၊ မြို့သစ်ရဲစခန်းကို ဖမ်းသွားတယ်လို့ပဲ သိရတယ် ကျန်တာတော့ ဘာမှမသိရသေးဘူး” လို့ ဒေသခံတဦးက ပြောပါတယ်။

ဖမ်းခံလိုက်ရတဲ့ အသက် ၇၄ နှစ်အရွယ် ဦးတင်ရွှေဟာ စီးပွားစီမံလက်ထောက်ညွှန်ကြားရေးမှူး( ငြိမ်း) ဖြစ်သလို တစည ပါတီရဲ့ ၂၀၂၀ မှာ ရွေးကောက်ခံအမျိုးသားလွှတ်တော်ကိုယ်စားလှယ်လည်းဖြစ်ပါတယ်။

ဖမ်းဆီးခံရပြီး ၃ရက်မြောက်တဲ့ အထိ အဆက်အသွယ်မရသေးတဲ့ ဦးတင်ရွှေဟာ အသက်ရွယ်အားဖြင့် ကြီးရင့်နေသူဖြစ်တာကြောင့် ကျန်းမာရေးအခြေ အနေကို မိသားစုဝင်တွေက စိုးရိမ်နေကြတယ်လို့ သိရပါတယ်။

ပဲခူး၊‌ မတ် ၂၉၊ ၂၀၂၂။

ပဲခူးတိုင်း ပြည်မြို့နယ် တမ္မကောက်အုပ်စု တီတွတ်စံပြရွာက တိုင်းဒေသကြီးလွှတ်တော်ကိုယ်စားလှယ် အမှတ်(၁) ဦးသက်ဝင်းလှိုင်ရဲ့ နေအိမ်ကို စစ်ကောင်စီက ဒီနေ့ ညနေပိုင်းမှာ ချိတ်ပိတ်သွားခဲ့တယ်လို့ သိရပါတယ်။

ချိတ်ပိတ်ခံရတဲ့ လွှတ်တော်ကိုယ်စားလှယ်ဟာ ပြီးခဲ့တဲ့ နှစ် မေလ ၃ရက်က တော်လှန်‌ရေးလုပ်ငန်းဆောင်ရွက်နေစဥ် မတော်တဆမှုတခုကြောင့် ကျဆုံးသွားခဲ့သူဖြစ်ပြီး ဒီနေ့မှာ နေအိမ်ကို စစ်ကောင်စီက ချိတ်ပိတ်လိုက်တာကြောင့် ကျန်ခဲ့တဲ့ မိသားစုတွေဟာ အိမ်ငှားပြီး နေနေရတယ်လို့ ဒေသခံတဦးက ပြောပါတယ်။

” သူ့မိသားစုက လက်ရှိအိမ်ငှားပြီး နေနေရတယ် သားလေးရယ် သမီးလေးရယ် အမျိုးသမီးရယ်ပေါ့၊ သူတို့က အရမ်းကြောက်နေကြတယ်” လို့ ‌မိသားစုနီးစပ်သူ တဦးက ပြောပါတယ်။

ဥပဒေမဲ့ အာဏာသိမ်းပြီး ဥပဒေမဲ့ လုပ်ရပ်တွေကို လုပ်နေတဲ့ စစ်ကောင်စီကိုတော့ ပြောစရာ စကားမရှိပေမယ့် ကျန်နေခဲ့တဲ့ မိသားစုအတွက် ဒီလုပ်ရပ်ဟာ လူမဆန်တဲ့ လုပ်ရပ်တခုဖြစ်တယ်လို့ လုပ်ဖော်ကိုင်ဖက် သူငယ်ချင်းဖြစ်သူ လွှတ်တော်ကိုယ်စားလှယ် ဦးကျော်ဇေယျက ပြောပါတယ်။

” ဖခင်တယောက် ‌သေဆုံးထားလို့ ပူဆွေးသောကရောက်နေရတဲ့ သားသမီးတွေနဲ့ ခင်ပွန်းကို ဆုံးရှုံးထားလို့ သောကရောက်နေရတဲ့ ဇနီးသည်တွေ အတွက်ကို တော်တော်လူမဆန်တဲ့ လုပ်ရပ်ပေါ့ “လို့ ပြောပါတယ်။

ပြီးခဲ့တဲ့ ရက်ပိုင်းအတွင်းကလည်း ပြည်မြို့ ခေတ္တရာမြို့သစ် ၁လမ်းထိပ်က မိုဘိုင်းကမ္ဘာ ဖုန်းဆိုင်ကိုလည်း စစ်ကောင်စီက ချိတ်ပိတ်ခဲ့ပြီး ကပိုင်ရှင်ဖြစ်သူကို ဖမ်းဆီးသွားခဲ့တယ်လို့ သိရပါတယ်။

မကွေး၊ မတ် ၂၃၊ ၂၀၂၂။

ပဲခူးတိုင်း၊ ပြည်မြို့နယ်၊ တီတွတ်ရွာ အောင်လံ-ပြည်ကားလမ်းမဘေး နေအိမ်တွေကို စစ်ကောင်စီက ယမန်နေ့ညနေပိုင်းကစတင်ပြီး ဖယ်ရှားခိုင်းနေတယ်လို့ ဒေသခံတွေဆီက သိရပါတယ်။

အဲ့ဒီလမ်းမဘေးတလျှောက်က နေအိမ်တွေကို ဖယ်ရှားပေးဖို့ စစ်ကောင်စီတပ်အမိန့်ထုတ်ထားတာဖြစ်ပြီး တီတွတ်ရွာကစတင်လို့ ဖယ်ရှားပေးနေရတာလို့ ဒေသခံတွေက ပြောပါတယ်။

“ဖျက်ပေးနေကြရတာ နှစ်ရက်သုံးရက်ရှိပြီ၊ ပြည်နဲ့ အောင်လံကြား လမ်းမဘေးက အိမ်တွေအကုန်ပါတယ်။ ဒီနေရာတွေမှာဘဲနေ လာခဲ့တာဟိုးအရင်က တည်းကကြာနေပြီ။ ခုမှဆောက်ပြီးနေတာမဟုတ်ဘူး။ လမ်းနဲ့မလွတ်လို့ ဖယ်ခိုင်းတာတဲ့။ စစ်တပ်ထောက်ခံသူတွေရဲ့ နေအိမ်တွေလဲပါတယ်” လို့ ဒေသခံတဦးက ပြောပါတယ်။

အဲ့ဒီ လမ်းမဘေးမှာရှိတဲ့ နတ်တလင်း၊ ဇီးအုပ်၊ ထန်းပေါက်၊ တီတွဒ်၊ အောင်လံမြို့နယ်ထဲက ကျေးရွာတွေအပါအဝင် လမ်းမတလျှောက်က နေအိမ်တွေကို မတ်လ ၂၆ ရက်နေ့ကို နောက်ဆုံးထားဖယ်ရှားပေးရမှာဖြစ်ပြီး မလိုက်နာရင် ဖမ်းဆီးထောင်ချခံရမှာလို့ ဒေသခံတွေက ပြောပါတယ်။

“မတ်လ ၂၆ ဒီနေ့ အပြီးဖျက်ပေးပါလို့ ပြောတယ်။ မဖျက်ရင် အရေးယူထောင်ချခံရမယ်။ ကုန်စျေးနှုန်းကြီးနေ လို့အဆင်မပြေပါဘူးဆို ရှိတဲ့အိမ်လေးပါ ဖျက်ခိုင်းနေတော့ ဒုက္ခဘဲ” လို့ သူက ဆက်လက် ပြောပါတယ်။

အဆိုပါလမ်းမကြီးဘေးက နေအိမ်တွေထဲက စစ်ကောင်စီလက်အောက်ခံ အစိုးရဘဏ်တွေကိုပေါင်နှံထားတဲ့ အိမ်တွေဆိုရင် ဖျက်ပေးဖို့မလိုဘူးလို့ စစ်ကောင်စီဘက်ကပြောဆိုတယ်လို့ ဒေသခံများ ပြော ဆိုချက်အရသိရပါတယ်။

လမ်းမကြီးဘေးက နေအိမ်တွေအကုန်လုံးကို လမ်းနဲ့ ၇၅ ပေအကွာထိ ဖယ်ရှားခိုင်းတာဖြစ်ပြီး၊ လမ်းတလျှောက် အိမ်ခြေရာနဲ့ချီဖျက်ပေးရမှာလို့ ဒေသခံတွေက ပြောပါတယ်။

ဒါ့အပြင် နေအိမ်ဖျက်ဆီးတဲ့နေရာမှာ စစ်ကောင်စီအပိုင် ဘက်ဟိုးနဲ့ဖျက်ပေးရမယ်ဆိုပါက ဖျက်ပေးခ ၁ နာရီကို ကျပ် ၂ သိန်း ပေးဆောင်ရမယ်လို့ ဒေသခံတွေကို ပြောဆိုတယ်လို့ သိရပါတယ်။

ပဲခူး၊ မတ် ၁၀၊ ၂၀၂၂။

ပဲခူးတိုင်းအနောက်ခြမ်း၊ သာယာဝတီခရိုင်၊ နတ်တလင်းမြို့နယ် NLD ပါတီက ၂၀၂၀ ရွေးကောက်ပွဲအနိုင်ရ တိုင်းလွတ်တော်ကိုယ်စားလှယ်နှစ်ဦးရဲ့ နေအိမ်တွေကို စစ်ကောင်စီက ဒီကနေ့ မတ်လ ၁၀ ရက်နေ့ နေ့လည်ပိုင်းက ချိတ်ပိတ်ခဲ့ကြပါတယ်။

နတ်တလင်းမြို့က ဦးမောင်မောင်ဦးရဲ့ တာပွန်လမ်းက နေအိမ်နဲ့ အရှေ့ခြမ်း ပဲဲမခမ်းရွာက ဦးကျော်ကျော်နိုင်တို့ရဲ့ နေအိမ်တွေကိုချိတ်ပိတ်ခဲ့တာလို့ သိရပါတယ်။

“နတ်တလင်းအနောက်ခြမ်းတိုင်း ၁ ကိုယ်စားလှယ် ဦးမောင်မောင်ဦးရဲ့ တာပွန်လမ်းအိမ်နဲ့ တိုင်း ၂ က နတ်တလင်းအရှေ့ခြမ်း၊ ပဲမခမ်းရွာက ဦးကျော်ကျော်နိုင်ရဲ့ အိမ်တွေကို ဒီနေ့နေ့လည် ၂ နာရီလောက်မှာ စစ်ကောင်စီက ချိတ်ပိတ်လိုက်ပါတယ်” လို့ မြို့ခံတဦးက ပြောပါတယ်။

ပြီးခဲ့တဲ့ရက်တွေက စစ်ကောင်စီက တရားစွဲဆိုထားတဲ့ ကိုမောင်မောင်ဦးနေအိမ်အပါအဝင်၊ တရားစွဲခံရတဲ့ အခြားအိမ်တွေကိုလည်း ဝရမ်းတွေ လိုက်ကပ်ခဲ့တယ်လို့ ဒေသခံတဦးဆီက သိရပါတယ်။

ဒါ့အပြင် စစ်ကောင်စီဟာ ပဲခူးတိုင်းအနောက်ခြမ်း သာယာဝတီခရိုင် သာယာဝတီမြို့က NLD ရွေးချယ်ခံကိုယ်စားလှယ် ဦးကျော်ကိုကိုစိန်ကို ပုဒ်မ ၅၀၅(က)နဲ့ အမူဖွင့်ဖမ်းဆီးပြီး ရွေးကောက်ပွဲမှာမဲလိမ်ခဲ့ကြောင်း လက်မှတ်ရေးထိုးဖို့ညှိနိူင်းခဲ့ပေမယ့် ငြင်းဆန်ခဲ့တာကြောင့် မတ်လ ၈ ရက်နေ့ကထောင် ၃ နှစ်ချမှတ်ခဲ့ပါသေးတယ်။

မြေလတ်အသံ၊‌ ဖေဖော်ဝါရီ ၁၇၊ ၂၀၂၂။

Naymin(အညတရစစ်သားအို) Telegram Join Channel ကမှတ်တမ်းဓါတ်ပုံများဖော်ပြသတင်းပေးတိုင်တန်းမှုကြောင့် မြိုင်မြို့ပေါ်ရပ်ကွက်များရှိ ရှစ်တန်းကျောင်းသူအပါအဝင်လူ ၂၀ ကျော်ဖမ်းဆီးခံရပြီး နေအိမ် ၅ လုံးကိုလည်း ချိတ်ပိတ်သွားကြောင်းသိရသည်။

ပြီးခဲ့သည့်နှစ် အာဏာသိမ်းစက မှတ်တမ်းဓါတ်ပုံများကို ဒလန်များကိုဖော်ပြတိုင်တန်းခဲ့ခြင်းဖြစ်ပြီး ဆန္ဒပြရာတွင်ပါဝင်သူများ၊ ထမင်းထုပ်ဝေငှခဲ့သူများ၊ NLD ပါတီနှင့်စပ်ဆက်သည်ဟု ဖော်ပြခံခဲ့ရသူများကို ဖေဖော်ဝါရီလ ၁၄ ရက်နေ့ကစတင်ဖမ်းဆီးခဲ့ခြင်းဖြစ်သည်။

“မြိုင်မြို့ပေါ်မှာ နေ့စဉ်ရက်ဆက် မတရားသဖြင့်နှိပ်စက်ဖမ်းဆီးနေတယ်။ ၁၂ ရက်နေ့က မြိုင်မြို့ပေါ် ကို နေပြည်တော်က အထူးတပ်ဖွဲ့ကဆိုပြီး စစ်ကောင်စီတပ်သား ၃၀ ခန့်လာတပ်စွဲပြီး ပုံထဲမှာပါတဲ့သူတွေကို အကုန်လိုက်ဖမ်းတာပဲ အာဏာသိမ်းကာစက Gz ဆိုပြီး ဂီတာတွေတီးနေကြတော့ CDM တွေထောက်ပံ့တယ်ဆိုပြီး ကောင်မလေးနှစ်ယောက် ဖမ်းတော့ကြတော့ အိမ်က အသက်မပြည့်သေးတဲ့ ၈ တန်းကျောင်းသူကိုပါ ခေါ်သွားတာ အဲတာ ၁၄ ရက်နေ့ညက နောက်တယောက်ကိုကြတော့ သူ့အကိုပါခေါ်သွားတာ သူတို့က တက္ကသိုလ်ကျောင်းသူတွေပါ။ တညထဲ ၄ ယောက်ပေါ့” ဟု မြိုင်မြို့ခံတဦးကပြောသည်။

ယင်းနေ့မတိုင်ခင် ဖေဖော်ဝါရီလ ၁၂ ရက်နေ့နှင့် ၁၃ ရက်နေ့များတွင် ဆန္ဒပြသူများကို ထမင်းထုပ်များဝေငှသူများနှင့် ထောက်ပံ့သူများ သပိတ်ခေါင်းဆောင်ကျောင်းဆရာနေအိမ် အပါအဝင် နေအိမ်နှင့်ဆိုင် ၅ လုံးကို ချိတ်ပိတ်ကာ ၎င်းတို့အထဲမှ ပိုင်ရှင်တဦးမှာ အဖမ်းခံရပြီး အခြားအလုပ်သမား ၄ ဦးခန့်ကိုလည်း ဖမ်းဆီးသွားကြောင်း မြို့ခံများထံကသိရသည်။

“တချို့ဖမ်းဆီးတဲ့အိမ်တွေက ပစ္စည်းတွေယူတယ်။ ချိတ်ပိတ်တဲ့အိမ်တွေက ပစ္စည်းတွေလည်းယူပါတယ်။ ဒီနေ့လည်းဆန္ဒပြတုန်းကပါတယ်ဆိုတဲ့လူတွေကိုဖမ်းတယ်။ မနေ့ကဆို တရက်တည်း ၁၂ ဦးဖမ်းတာ။ ဒလန်ချန်နယ်ကတင်သမျှအကုန်ဖမ်းတာ အခုလည်းဖမ်းခံရတဲ့သူတွေအိမ်တွေကို ထပ်ချိတ်ပိတ်မယ်လုပ်နေတယ် အတော်ကို ဒုက္ခပေးနေတာပါ” ဟု မြို့ခံတဦးကဖေဖော်ဝါရီလ ၁၆ ရက်နေ့နေ့လည်က ထပ်မံပြောသည်။

အလားတူ ဖေဖော်ဝါရီလ ၁၅ ရက်နေ့ကလည်း NLD ပါတီလွှတ်တော်ကိုယ်စားလှယ်၏အမျိုးသမီး ညီမမိသားစုများနှင့်အခြားသူများကိုလည်း ဖမ်းဆီးသွားပြီး ယနေ့တွင်လည်း ထပ်မံဖမ်းဆီးနေကာ ယခင်ဖမ်းဆီးထားသည့်တက္ကသိုလ်ကျောင်းသူများကို ပခုက္ကူသို့ပို့ဆောင်ခဲ့ပြီး မိဘများဖြင့်တွေ့ခွင့်မပေးသေးကြောင်း မြို့ခံများထံကသိရသည်။

မြေလတ်အသံ၊ ဇန်နဝါရီ ၉၊ ၂၀၂၂။

ပြည်သူ့လွှတ်တော်ကိုယ်စားလှယ် ဒေါက်တာခင်စိုးစိုးကြည် ရဲ့ သက်ကြီးရွယ်အို အိပ်ယာထဲလဲနေတဲ့ အဖေနဲ့ အဒေါ်ဖြစ်သူကို အားချင်း နှင်ချပြီး နေအိမ်နဲ့ လုပ်ငန်းကို ဇန်နဝါရီ ၁ရက်က ချိတ်ပိတ်သွားခဲ့တာဖြစ်တယ်လို့ ကာယကံရှင်တွေဆီက သိရပါတယ်။

အဲ့ဒီ သက်ကြီးပိုင်း နှစ်ဦးဟာ မဖြစ်မနေ ဘေးမှာနေပြီး စောင့်ရှောက်ပေးဖို့ လိုအပ်နေသူတွေ ဖြစ်ပြီး အဲ့ဒီလူတွေကိုပါ ချက်ချင်းနှင်ချခဲ့ပြီး ချိတ်ပိတ်သွားခဲ့တာဖြစ်တယ်လို့ ပြောပါတယ်။

” အိမ်က ဆရာမ အမည်ပေါက် ဟုတ်တယ်၊ မိသားစုပိုင်နေအိမ်ပေါ့ ၊ အဲ့ဒီမှာ ဆရာမ ရဲ့ အဖေက အသက် ၉၀ပေါ့၊ လေဖြတ်ထားလို့ အိပ်ယာထဲမှာ လှဲနေရတာဖြစ်တယ်၊ ဆရာမရဲ့ အဒေါ်ကလည်း အသက် ၈၀ အရိုးကျည်းပေါင်းကြောင့် ပက်လက်ပဲ ဖြစ်တယ်၊ သူတို့ကို ပြုစုစောင့်ရှောက်ရတဲ့ ဆရာမရဲ့ တူတွေလည်းရှိတယ်” လို့ ပြောပါတယ်။

စစ်ကောင်စီကချိတ်ပိတ်ခဲ့တဲ့ KS2K ရေသန့်စက်ရုံဟာလည်း ဒေါ်ခင်စိုးစိုးကြည်ရဲ့ အစုရှယ်ရာ မပါဝင်တော့ပဲ မောင်ဖြစ်သူနဲ့ အများပိုင် လုပ်ငန်းကို ချိတ်ပိတ်သွားခဲ့တာဖြစ်တယ်လို့ ပြောပါတယ်။

” စီးပွားရေးအရ နောက်နောင် ဘယ်သူမှ မပတ်သက်ရဲအောင် ရည်ရွယ်ချက်ရှိရှိနဲ့ ၊ ဆရာမ မပိုင်တော့မှန်းသိသိနဲ့ အများပိုင်းမှန်း သိရဲ့နဲ့ အိမ်ကို ချိတ်ပိတ်ရင်းနဲ့ ရောပြီးချိတ်ပိတ်ခဲ့တာဖြစ်တယ်” လို့ ‌ဒေါ်ခင်စိုးစိုးကြည်နဲ့ နီးစပ်သူ တဦးက ပြောပါတယ်။

ရေသန့်စက်ရုံက ဝန်ထမ်း ၃၀ နီးပါး အလုပ်လက်မဲ့ ဖြစ်ခဲ့သလို နေအိမ်ချိတ်ပိတ်ခံခဲ့ရတဲ့ မိသားဝင်တွေကတော့ ဆွေးမျိုးအိမ်မှာ သွားနေခဲ့ရပြီး လုပ်ငန်းပိုင်ရှင်တွေကတော့ ဥပဒေကြောင်းအရ ဖြေရှင်းနေတယ်လို့ သိရပါတယ်။

ပဲခူး၊ ဇန်နဝါရီ ၄၊ ၂၀၂၂။

ပဲခူးတိုင်း၊ ပဲခူးမြို့ရှိ ဗကသခေါင်းဆောင်တဦးဖြစ်တဲ့ ကိုမျိုးကိုရဲ့နေအိမ်ကို စစ်ကောင်စီတပ်တွေက ဇန်နဝါရီ ၃ ရက်နေ့ ဒီကနေ့မှာ ချိတ်ပိတ်ခဲ့တယ်လို့ ဒေသခံတွေဆီက သိရပါတယ်။

“နှစ်သစ်မှာတော့ အိမ်ကိုသော့ခတ်တာကနေ ချိတ်ပိတ်တဲ့အဆင့်ကို တဆင့်တိုးသွားတယ်။ တော်လှန်ရေးမှာပါဝင်နေတဲ့သူတိုင်းဟာ ပေးဆပ်မှုပေါင်းစုံနဲ့ ပေးဆပ်ပြီး၊ ဒီပွဲကိုတိုက်ယူနေကြတာပါ။ အောင်ပွဲကိုလည်းတန်းတူခံစားချင်မိပါတယ်” လို့ ကိုမျိုးကိုကိုက သူရဲ့လူမူ့ကွန်ယက်စာမျက်နှာမှာရေးသားဖော်ပြထားပါတယ်။

ပြီးခဲ့တဲ့ ဧပြီလ ၁၀ ရက်နေ့ကစတင်ပြီး သူရဲ့နေအိမ်ကို စစ်ကောင်စီတပ်တွေက အင်အား ၁၀၀ ကျော်နဲ့ လာရောက်ရှာဖွေပြီး အိမ်ထဲမှာရှိတဲ့ ရွှေထည်ပစ္စည်းတချို့နဲ့ အိမ်ထဲက တန်ဖိုးကြီးတဲ့အရာတွေကို သိမ်းယူသွားခဲ့တယ်လို့လည်း သိရပါတယ်။

မကြာခဏဆိုသလို စစ်ကောင်စီတပ်တွေက နေအိမ်ကို လာရာက်စစ်ဆေးမှု‌တွေ ၁၀ ကြိမ်ထက်မနည်း ပြုလုပ်လေ့ခဲ့ပြီး၊ အိမ်ကိုသော့ခတ်ခဲ့တယ်လို့လည်း မိသားစုနဲ နီးစပ်သူတွေ
ကပြောပါတယ်။

ကိုမျိုးကိုကိုဟာ မြန်မာအစ္စလာရ် လူငယ်တဦးဖြစ်ပြီး သူရဲ့အကိုဝမ်းကွဲတဦးမှာလည်း ဧပြီလ ၉ ရက်နေ့က သူတို့အိမ်ရဲ့ လမ်းထိပ်မှာပဲစစ်တပ်ရဲ့အနီးကပ်ပစ်သတ်ခြင်းကြောင့် ကျဆုံးခဲ့ရပါတယ်။