စစ်ကောင်စီ

ပဲခူး၊ ဖေဖော်ဝါရီ ၁၉၊၂၀၂၂။

ပဲခူးတိုင်းအနောက်ခြမ်း၊ နတ်တလင်းမြို့မှာ စစ်ကောင်စီက အခုရက်ပိုင်းအတွင်း အသက်မပြည့်သေးတဲ့ အပြစ်မဲ့ မိန်းခလေးတွေနဲ့ လူငယ်တွေကို အဖမ်းအဆီးကြမ်းနေသလို ဖေဖေါ်ဝါရီ ၁၈ ရက် မနေ့ကလည်း ဖမ်းဆီးမူတွေပြုလုပ်ရာမှာလည်း အသက်မပြည့်သေးတဲ့ ကလေးငယ် ၄ ဦး ပါဝင်တယ်လို့ မြို့ခံတွေက ပြောပါတယ်။

မနေ့က ဖမ်းဆီးခံရသူ ၆ ဦးဖြစ်ပြီး ၄ ဦးဟာ အသက် ၁၈ နှစ်အောက် ကလေးငယ်တွေဖြစ်တယ်လို့ သိရပါတယ်။

“ခလေးသူငယ်အခွင့်အရေး ချိုးဖောက်တာဖြစ်တယ်။ လူငယ်တွေကြား မလုံခြုံမူတွေဖြစ်နေတယ်။ တိမ်းရှောင်ကြတာတွေ မိဘတွေ စိတ်ပူကြတာတွေ ဖြစ်နေတယ်” လို့ မြို့ခံတဦးက ပြောပါတယ်။

၁၈ နှစ်အောက် ဖမ်းဆီးခံသူတွေကတော့ မမှူးမြတ်ကိုကို ၁၄ နှစ် သရက်တောလမ်း၊ မခင်ငြိမ်းချမ်း ၁၄ နှစ် ရိပ်သာ၂လမ်း၊ မအေးပြည်စုံ ၁၇ နှစ် ဇေယျဝတီကျောင်းအနီး၊ မောင်အာကာဖုန်းမြတ် ၁၅ နှစ် မြန်မာဆွေလမ်းနေသူတို့ ဖြစ်တယ်လို့ သိရပါတယ်။

ယခင်ရက်ကလည်း ဖမ်းဆီးမူတွေရှိခဲ့တာကြောင့် မြို့နယ်အတွင်းဖမ်းဆီးခံထားရတဲ့ လူငယ်ဦးရေဟာ ဒီထက်ပိုများနိုင်​တယ်လို့ မြို့ခံတွေဆီက သိရပါတယ်။

“တချို့မိဘတွေက သူတို့သားသမီးတွေကို နှိပ်စက်ခံရမှာစိုးလို့ ဘယ်ကိုမှမဆက်သွယ်ကြဘူး။ ဖမ်းဆီးခံ လူငယ်ဦးရေဟာ ဆယ်ဂဏန်းကျော်ရှိတယ်။ မိန်းကလေးငယ်တွေလည်း ပါတယ်” လို့ မြို့ခံတဦးက ပြောပါတယ်။

ယခင်ရက်ကလည်း ဖမ်းဆီးမူတွေရှိခဲ့တာကြောင့် မြို့နယ်အတွင်း ဖမ်းဆီးခံထားရတဲ့ လူငယ်ဦးရေဟာ ဒီထက်ပိုများနိုင်​သလို နှိပ်စက်စစ်ဆေးမူတွေအတွက်လည်း စိုးရိမ်နေကြတယ်လို့ မြို့ခံတွေဆီက သိရပါတယ်။

ပဲခူး၊ ဖေဖော်ဝါရီ ၆၊၂၀၂၂။

ပဲခူးတိုင်း၊ ကြို့ပင်ကောက်မြို့မှာ ဖေဖော်ဝါရီ ၅ရက် ညနေ ၄နာရီဝန်းကျင်က လူငယ်တဦးကို စစ်ကောင်စီက သေနတ်နဲ့ ပစ်လို့ သေဆုံးသွားခဲ့တယ်လို့ ဒေသခံတွေဆီက သိရပါတယ်။

သေဆုံးသွားသူလူငယ်နဲ့ သူငယ်ချင်းဖြစ်သူတို့ ၂ဦးက ကြို့ပင်ကောက်မြို့နယ်ဆိုင်ကောင်းရွာကဖြစ်ပြီး ညောင်ပင်အိုင်ရွာကို ဆိုင်ကယ်နဲ့ ဖိတ်စာသွား‌ဝေချိန်မှာ စစ်ကောင်စီက တားဆီးစစ်ဆေးမှုတွေလုပ်ခဲ့တယ်လို့ ဒေသခံတဦးက ပြောပါတယ်။

“ အဲ့လိုစစ်တဲ့ အချိန်မှာ အနောက်က ကလေးကတော့ ထွက်ပြေးတယ်ပေါ့ ကျန်တဲ့ တယောက်က မိသွားတဲ့ အခါကျတော့ ဖုန်းကို ယူစစ်တော့ ( သေဆုံးသူ)ဖုန်းမှာ က NUG Profile လေးချိန်းထားတာရှိတယ်၊ ကျန်တာတော့ ဘာမှမရှိဘူးပေါ့နော်၊ သူတို့က ဖုန်းကို သိမ်းထားလိုက်ပြီးတော့ မင်းသွားတော့လို့ ပြောလို့ ကလေးက ဆိုင်ကယ်မောင်းပြီးအထွက်မှာ နောက်ကနေပြီး‌တော့ ပစ်သတ်တာပါ” လို့ ဒေသခံတဦးက ပြောပါတယ်။

စစ်ကောင်စီတပ်စခန်းချထားတဲ့ ကြို့ပင်ကောက်မြို့ရဲ့ အရှေ့ဘက် ဝိုင်းရွာအနီးက ညောင်ပင်အိုင်ရွာမှာ ဖြစ်ခဲ့တာလို့ ပြောပါတယ်။

သေဆုံးသွားသူ လူငယ်ဟာ အသက် ၂၁နှစ်အရွယ် ဖြိုးကျော်ဟန်နဲ့ သူငယ်ချင်းဖြစ်သူ အသက် ၂၀ အရွယ် ရှိုင်းဝဏ္ဏထက် ဆိုသူလူငယ်လည်း ဖမ်းဆီးခံလိုက်ရတယ်လို့ ‌အဲ့ဒီဒေသခံက ပြောပါတယ်။

” အဲ့ကလေးက ရွာထဲကို ဝင်ပြီးတော့ ပုန်းနေတယ်ပေါ့၊ ပုန်းနေတဲ့ အိမ်ကပဲ ဟိုဘက်ကဖြစ်တဲ့အတွက် အုပ်ကြီးကို သတင်းပေးလိုက်တော့ အုပ်ကြီးကိုယ်တိုင်ပဲ လာဖမ်းသွားပြီး စစ်တပ်ကို အပ်လိုက်တယ်လို့ သိရပါတယ်” လို့ ပြောပါတယ်။

စစ်ကောင်စီရဲ့ သေနတ်နဲ့ ပစ်ခံရလို့ သေဆုံးသွားတဲ့ ဖြိုးကျော်ဟန်ရဲ့ ရုပ်အလောင်းကို အခုအချိန်အထိ မိဘတွေက ပြန်မရသေးဘူးပဲ ပြန်ပေးမဲ့ အချိန်ကို အမျိုးမျိုးရွှေ့ဆိုင်းနေပြီး ဖမ်းခံရသူ ရှိုင်းဝဏ္ဏထက်ကတော့ စစ်ကောင်စီစခန်းချထားတဲ့ ဝိုင်းရွာမှာ ဖြစ်နိုင်တယ်လို့ သိရပါတယ်။

မကွေး၊ ဇန်နဝါရီ ၂၇၊၂၀၂၂။

မကွေးတိုင်း၊ ပေါက်မြို့နယ်က ကျေးရွာတခုက အသက် ၄၀ဝန်းကျင် အမျိုးသားတဦးကို စစ်ကောင်စီက သူတို့ကို လိုက်ကြည့်လို့ဆိုတဲ့ အချက်နဲ့ သတ်ပြီး သုဿန်မှာ ပစ်ထားခဲ့တယ်လို့ ဒေသခံတဦးဆီက သိရပါတယ်။

ဇန်နဝါရီ ၂၆ရက် မနေ့က နေ့လယ် ၂နာရီဝန်းကျင်က သတ်ခံလိုက်ရတာဖြစ်ပြီး အမျိုးသား ၂ဦးကို လည်း အကြောင်းမဲ့ဖမ်းသွားတယ်လို့ ပေါက်မြို့နယ် ကုက္ကိုစုကျေးရွာ ဒေသခံတဦးက ပြောပါတယ်။

” ဘာကြောင့်လဲဆိုရင် သူကတဲ့ သူတို့နောက်ကို လိုက်ကြည့်လို့ဆိုပြီးမှ သတ်သွားတာ၊ ၂နာရီဝန်းကျင်လောက်မှာ သတ်ပစ်ခဲ့ပြီး ၆နာရီဝန်းကျင်လောက်မှာ အလောင်းကို ဒီတိုင်း သုဿန်မှာ ပစ်ခဲ့တာ၊ အခုအထိရွာထဲကို ဘယ်သူမှ မဝင်ရဲလို့ မမြှုပ်ရသေးဘူး” လို့ ပြောပါတယ်။

အဲ့ဒီမတိုင်ခင် ဇန်နဝါရီ ၂၃၊၂၄ ‌ရက်တွေကတည်းက ပေါက်မြို့နယ်ထဲက ရွာတွေကို တရွာပြီးတရွာ စစ်ကြောင်းထိုးဝင်လာခဲ့တဲ့ စစ်ကောင်စီတပ်သားတွေဟာ ဒေသခံတွေကို ခြိမ်းခြောက်ပြောဆိုတာတွေလုပ်ပြီး ပျူစောထီးတွေက NLD အမာခံအိမ်တွေကို ဖျက်ဆီးသွားခဲ့တယ်လို့ ဆိုပါတယ်။

“ပျူတွေပေါင်းပြီးတော့ ည ၁၁ နာရီဝန်းကျင်မှာ FAW ကား ၁ စီးနဲ့ဝင်လာပြီး အမျိုးသားတွေမှန်သမျှပစ်သတ်မယ်လို့ခြိမ်းခြောက်တယ်၊ ရွာကိုလာတဲ့ ပျူ ၂၀ နှင့်ရွာမှာရှိတဲ့ပျူ ၃၀ ရယ်ဆို ၅၀ ဝန်းကျင်လောက်ရှိတယ်” လို့ ပြောပါတယ်။

အသက် ၄၀ အရွယ် ဦးစန်းမြိုင်အသတ်ခံရတဲ့ အပြင်၊ NLD အမာခံ အိမ် ၁၀အိမ်ကိုပါ ဖျက်ဆီးခံခဲ့ရတဲ့ ပေါက်မြို့နယ် ကုက္ကိုစုကျေးရွာမှာ လူဦးရေ ၅၀၀ နီးပါးနေထိုင်ပြီး ပျူစေထီးတွေရွာထဲမှာ ရှိနေသေးလို့ ၂၀၀ ကျော်‌လောက်က ရွာထဲမှာ မနေရဲကြပဲ ရှောင်နေကြရတယ်လို့ သိရပါတယ်။

မကွေး၊ ဇန်နဝါရီ ၂၀၊၂၀၂၂။

မကွေးတိုင်း၊ မင်းဘူးမြို့နယ်မှာရှိတဲ့ မန်းရွှေစက်တော်ဘုရားပွဲကို လာမယ့်တပိုတွဲလဆန်း ၅ ရက်နေ့မှာ (ဖေဖေါ်ဝါရီ ၅) စစ်ကောင်စီက ပြန်ပြီးဖွင့်လှစ်သွားမယ်လို့ ဒေသခံတွေဆီက သိရပါတယ်။

အရင်နှစ်တွေကလို အကြီးအကျယ်မဟုတ်ပဲ အကျဥ်းချုံးသဘောမျိုးနဲ့သာ ဖွင့်လှစ်သွားမှာဖြစ်သလို စျေးဆိုင်ခန်းတွေနဲ့ တဲကျောင်းတွေဆောက်ဖြစ်၊ မဖြစ်ကတော့ ခုချိန်ထိ အတိအကျမသိရသေးဘူးလို့ ဒေသခံတဦးက ပြောပါတယ်။

“ကျနော်ကြားသိရသ‌လောက်တော့ ခါတိုင်းနှစ်လိုမဟုတ်ပဲ အကျဥ်းချုံးပြီးလုပ်သွားမယ်။ အောက်ခြေ ပင်မခြေ‌တော်ရာ တံခါးတွေကိုလည်း ဖွင့်လှစ်သွားမယ်။ နှစ်စဥ်ထုံးတန်းစဥ်လာ အစီအစဥ်တိုင်း လုပ်ဆောင်သွားမယ်။ ရပ်ဝေးကလာတဲ့ သူတွေအတွက်တော့ အခမဲ့ဓမ္မာရုံကြီးတွေမှာ တည်းခိုလို့ရမယ်လို့ ကျနော်တို့သိရတယ်။” လို့ သူကပြောပါတယ်။

လက်ရှိချိန်ဟာ မြန်မာနိုင်ငံမှာ ကိုဗစ်-၁၉ ရောဂါကူစက်နှုန်း မြင့်တက်နေသလို စစ်ရေးခြေအနေလည်း တင်းမာနေတဲ့ကာလဖြစ်တာကြောင့် ခုလိုဘုရားပွဲဖွင့်လှစ်မယ့်အပေါ်မှာ ဒေသခံတွေအနေနဲ့ အမျိုးမျိုးဝေဖန်မှုတွေရှိနေပါတယ်။

“ခုကရောဂါတွေကလည်း ဖြစ်နေတာဆိုတော့ ဒါတွေကို ထည့်စဥ်းစားဖို့လိုတာပေါ့။ ကျန်းမာရေးဝန်ကြီးဌာနရဲ့ ခွင့်ပြုချက်တို့ လိုမယ်ထင်တယ်။ ဘုရားပွဲဆိုတာကတော့ အဓိက စီးပွားရေးပါပဲ၊ လူတွေစီးပွားရေးအဆင်မပြေတော့လည်း ဘုရားပွဲလည်း အဆင်မပြေဘူးလို့ထင်ပါတယ်၊” လို့ မကွေးမြို့ခံတဦးက ပြောပါတယ်။

ခုကာလမှာ ဘုရားတွေဖွင့်ပြီး ပျော်ပွဲရွှင်ပွဲတွေလုပ်တာဟာ စစ်ကောင်စီအနေနဲ့ ပြည်သူတွေရဲ့ အသက်အန္တရာယ်ကိုကာကွယ်မပေးပဲ အန္တရာယ်တောထဲကို တွန်းပို့နေတာသာဖြစ်တယ်လို့ မကွေးလူထုတိုက်ပွဲကော်မတီအဖွဲ့ဝင် ကိုချစ်ဝင်းမောင်က မြေလတ်အသံကို ပြောပါတယ်။

“အခုလို ရောဂါကပ်ဘေးကလည်း အကြီးအကျယ်ဖြစ်ပွားနေချိန်၊ စစ်‌ရေးကလည်း အင်မတင်တင်းမာနေတဲ့အချိန် မန်းရွှေစက်တော်ဘုရားပွဲကို ဖွင့်ဖို့ကြိုးစားတယ်ဆိုတာကတော့ ပြည်သူတွေရဲ့ အသက်အိုးအိမ်စည်းစိမ်တွေနဲ့ ရောဂါကူးစက်မှုကို အလေးမထားတာ၊ ပြည်သူကိုကာကွယ်မပေးချင်တာ၊ ပြည်သူကို အန္တရာယ်တောထဲကို တွန်းပို့တာလို့မြင်ပါတယ်၊”လို့ သူကပြောပါတယ်။

ဒါ့အပြင် စစ်ကောင်စီက အာဏာသိမ်းပြီးနောက်ပိုင်းမှာ တန်ခိုးကြီးဘုရားအများစုက အလှူငွေတွေကို ကိုယ်ကျိုးအတွက်အသုံးပြုခဲ့တာကြောင့် ခုလိုဖွင့်လှစ်ရင်လည်း ဘုရားအတွက်ရရှိလာမယ့် အလှူငွေတွေကို ယူပြီး အသုံးပြုနိုင်တယ်လို့ ကိုချစ်ဝင်မောင်က ဆက်ပြောပါတယ်။

“အာဏာသိမ်းပြီးစကာလမှာ ပြည်သူအားလုံးသိကြတဲ့အတိုင်းပဲ တနိုင်ငံလုံးမှာရှိတဲ့ ဘုရားတွေကအလှူငွေတွေကို သူတို့ ရဲ့ ကိုယ်ကျိုးစီးပွားအတွက် ရယူသုံးစွဲတာတွေရှိပါတယ်။ ခုကော ဘုရားပွဲမှာ ရရှိလာနိုင်တဲ့ အလှူငွေတွေကို သူတို့ရဲ့ ကိုယ်ကျိုးစီးပွားအတွက် အသုံးချနိုင်ပါတယ်။ ဒဲ့ပြောရင်တော့ ဘုရားပွဲကို ဗန်းပြလုပ်တဲ့သဘောမျိုးနဲ့ ဘုရာပွဲကရမဲ့ ငွေတွေကို ပြည်သူကိုသတ်ဖို့အတွက်အသုံးချမယ်လို့ပဲ ယူဆမိပါတယ်။” လို့ သူကပြောပါတယ်။

မန်းရွှေစက်တော်ဘုရားပွဲကို ဗဟိုကိုဗစ်ကော်မတီရဲ့ ဆုံးဖြတ်ချက်အရ NLD အစိုးရလက်ထပ် ၂၀၂၀ ခုနှစ်၊ မတ်လ ၁၃ ရက်ကစပြီး ပိတ်သိမ်းခဲ့တာလည်းဖြစ်ပါတယ်။

စစ်ကိုင်း၊ ဇန်နဝါရီ ၁၄၊၂၀၂၂။

စစ်ကိုင်းတိုင်း၊ ခန္တီးခရိုင်၊ ဟုမ္မလင်းမြို့နယ်အတွင်းမှာ ရှိတဲ့ ဥရုချောင်းအတွင်းမှာ စစ်ကောင်စီနဲ့ ရှမ်းနီတပ်မတော် တို့ရဲ့ ခွင့်ပြုချက်နဲ့ မျောတိုက်(ရွှေတူး) လုပ်ငန်းတွေ အလွန်အကျွံလုပ်ကိုင်နေလို့ ဥရုချောင်း တိမ်ကော ပျက်စီးနေပြီလို့ ဒေသခံတွေဆီက သိရပါတယ်။

စစ်အာဏာသိမ်းပြီး ၃လနီးပါအကြာကတည်းက စပြီးတူးနေခဲ့တာ မိုင်ပေါင်း ၄၀၀ နီးပါး တူးခဲ့ပြီးဖြစ်သလို လှေဖြတ်လို့မရတော့တဲ့ အထိရေကတိမ်လာသလို တဖက်ကမ်းနဲ့ တဖက်က အများဆုံး ၇ကိုက်နဲ့ အနည်းဆုံး ၄ကိုက် နီးပါးအထိ ကျဉ်းမြောင်းလာနေပြီလို့ ဒေသခံလူငယ်တဦးက ပြောပါတယ်။

” ချောင်းက ကျဉ်းပြီး တော်တော်လေးကို ကောပြီးတော့ လှေကလေးတွေ ဘာ‌လေးတွေက အစသွားလာလို့မရအောင် ဖြစ်လာတော့တာ” လို့ ‌ဒေသခံလူငယ် တဦးက ချောင်းရဲ့ အခြေအနေကို ပြောပါတယ်။

အဲ့ဒီဥရုချောင်းက ဟုမ္မလင်းမြို့နယ်နဲ့ ချောင်းကမ်းဘေးတဖက်ဆီက ရွာပေါင်း ၂၀၀ နီးပါးရဲ့ ကုန်သွယ်ရေးကို အားထားရတဲ့ ဆက်သွယ်ရေးလမ်းကြောင်းဖြစ်သလို စိုက်ပျိုးရေးလုပ်ငန်းတွေကိုလည်း အဲ့ဒီချောင်းကိုပဲ မှီခိုပြီးလုပ်ကိုင်စားသောက်နေရတာဖြစ်လို့ ချောင်း‌တိမ်ကော သွားခဲ့ရင် ‌ဒေသခံတွေ ဒုက္ခရောက်ကုန်မှာကို စိုးရိမ်နေကြပါတယ်။

” ကျနော်တို့ မာလုံရွာဘက်မှာတုန်းက တခါသွားတားသေးတယ် ၊ သူတို့က မင်းတို့ကျည်ဆံယူမလား ရွာအတွက်ရန်ပုံငွေယူမလားဆိုပြီး အဲ့လောက်ထိအောင် ပြောတာပေါ့၊ ခြိမ်းခြောက်တာပေါ့” လို့ ဒေသခံတွေကို ရှမ်းနီတပ်မတော် SNA က ခြိမ်းခြောက်ခဲ့ပုံကို ‌ပြန်ပြောပြပါတယ်။

အဲ့ဒီဒေသမှာ ရှမ်းနီလူမျိုး အများစုနေထိုင်ကြပြီး ရှမ်းနီလက်နက်ကိုင်အဖွဲ့ ကြီးဆိုးထားတဲ့ နေရာ ဒေသဖြစ်ပေမယ့်
ရှမ်းနီးတပ်မတော် ကိုယ်တိုင်က စစ်ကောင်စီနဲ့ ပူးပေါင်းပြီး မျောတိုက်တဲ့ လုပ်ကွက်တွေကို အခကြေးငွေယူပြီး လုပ်ခွင့်ပေးထားတာကြောင့် ဒေသခံရှမ်းနီလူမျိုးတွေပါ စိုးရိမ်နေကြပါတယ်။

အဲ့ဒီဒေသရဲ့ အသက်သွေးကြောလို့ ‌ဆိုရတဲ့ ဥရုချောင်းမှာ မျောတိုက်ထားတဲ့ မျောမြှီး(သဲပုံ) တွေဟာ အိမ်ထက်တောင်မြင့်တက်နေပြီး စိုက်ခင်းတွေကိုပါပိနေတဲ့ အခြေအနေအထိ ဖြစ်နေပြီလို့ ရှမ်းနီလူမျိုး ဒေသခံတဦးကလည်း ပြောပါတယ်။

” မြောသမား‌တွေရော ရှမ်းနီလက်နက်ကိုင်တွေရောက စစ်ကောင်စီရဲ့ ထောက်တိုင်လိုဖြစ်နေတော့တာပေါ့ ၊ ဘာလို့လဲဆိုတော့ ဥရုချေင်းမှာ မောင်းနေတဲ့ မြောတွေကို စစ်အာဏာရှင်က တမြောကို အနည်ဆုံး ၅ သိန်းလောက် ကောက်တာကိုး၊ အခုက ဘယ်သူမှ ကာကွယ်မဲ့သူကလည်း မရှိ” လို့ ရှမ်းနီဒေသခံ အမျိုးသားတဦးက ပြောပါတယ်။

တစ်နှစ်နီးပါး မျောတိုက်လာခဲ့တာကြောင့် ကုန်သွယ်ရေးလမ်းကြောင်းပြတ်‌တောက်ခဲ့ပြီး ကုန်းလမ်းကိုပဲ အားပြုနေရလို့ ကုန်စျေးနှုန်းတွေပိုပြီးမြင့်တက်လာခဲ့တယ်လို့ ဒေသခံ လူငယ်တဦးက ဆိုပါတယ်။

” အစက ဖလပ်ခွန်( ဇာတ်သင်္ဘော) တစ်စီးကို ၁၂ဘီးကား ၁၀စီး ၁၅စီးလောက်ပါတယ်၊ အဲ့ဒီကုန်းလမ်းနဲ့ကြတော့ ၁၂ဘီးကကား ၁စီးရောက်ဖို့က ဆီလည်းကုန်မယ်၊ ပစ္စည်းကလည်း နည်းနည်းပဲ ပါတာ၊ အဲ့ဒီအားနည်းချက်တွေရှိသွားတာပေါ့၊ အစကဆို ကုန်ပစ္စည်းကို အောတိုက်ပြီး အများပြီးမှာလို့ရတယ်” လို့ ပြောပါတယ်။

မန္တလေး၊ မုံရွာ မြို့ကြီးတွေကနေ ဟုမ္မလင်းမြို့နယ်ကို အဓိကကုန်သွယ်နေတဲ့ ရေလမ်းကြောင်းက အခုချိန်မှာ အသုံးပြုလို့မရတော့ပဲ မျောတိုက်တဲ့ လုပ်ငန်းတွေနဲ့ ပြည်နှက်နေခဲ့တာဖြစ်ပါတယ်။

ဥရုချောင်းဘေးက စိုက်ပျိုးမြေတွေနဲ့ စိုက်ခင်းတွေကိုလည်း မျောမြှီး( သဲပုံ) ပုံဖို့အတွက် မျောလုပ်ငန်းရှင်တွေက စျေးအဆမတန်ပေးဝယ်ပြီး စိုက်ခင်းတွေပေါ်ကို ပုံထားတဲ့ သဲပုံတွေက မိုးတွင်းရေကြီး ရေလျှံဖြစ်လာရင် အန္တရယ်ဖြစ်လာမှာကို ဒေသခံတွေက စိုးရိမ်နေကြပါတယ်။

လက်နက်ကိုင် နှစ်ဖွဲ့နဲ့ လုပ်ငန်းရှင်တွေကြားမှာ ‌ဒေသခံရှမ်းနီလူမျိုးတွေအပြင် ဥရုချောင်းဘေးက ပြည်သူတွေအတွက်
အားကိုးစရာမရှိသလို ‌ကျရောက်လာမဲ့ အန္တရာယ်တွေအတွက် ပူပန်နေရုံကလွဲပြီး မတတ်နိုင်တဲ့ အခြေနေတွေနဲ့ ရင်ဆိုင်နေရတယ်လို့ သိရပါတယ်။

မြေလတ်အသံ၊ ဇန်နဝါရီ ၉၊ ၂၀၂၂။

ပြည်သူ့လွှတ်တော်ကိုယ်စားလှယ် ဒေါက်တာခင်စိုးစိုးကြည် ရဲ့ သက်ကြီးရွယ်အို အိပ်ယာထဲလဲနေတဲ့ အဖေနဲ့ အဒေါ်ဖြစ်သူကို အားချင်း နှင်ချပြီး နေအိမ်နဲ့ လုပ်ငန်းကို ဇန်နဝါရီ ၁ရက်က ချိတ်ပိတ်သွားခဲ့တာဖြစ်တယ်လို့ ကာယကံရှင်တွေဆီက သိရပါတယ်။

အဲ့ဒီ သက်ကြီးပိုင်း နှစ်ဦးဟာ မဖြစ်မနေ ဘေးမှာနေပြီး စောင့်ရှောက်ပေးဖို့ လိုအပ်နေသူတွေ ဖြစ်ပြီး အဲ့ဒီလူတွေကိုပါ ချက်ချင်းနှင်ချခဲ့ပြီး ချိတ်ပိတ်သွားခဲ့တာဖြစ်တယ်လို့ ပြောပါတယ်။

” အိမ်က ဆရာမ အမည်ပေါက် ဟုတ်တယ်၊ မိသားစုပိုင်နေအိမ်ပေါ့ ၊ အဲ့ဒီမှာ ဆရာမ ရဲ့ အဖေက အသက် ၉၀ပေါ့၊ လေဖြတ်ထားလို့ အိပ်ယာထဲမှာ လှဲနေရတာဖြစ်တယ်၊ ဆရာမရဲ့ အဒေါ်ကလည်း အသက် ၈၀ အရိုးကျည်းပေါင်းကြောင့် ပက်လက်ပဲ ဖြစ်တယ်၊ သူတို့ကို ပြုစုစောင့်ရှောက်ရတဲ့ ဆရာမရဲ့ တူတွေလည်းရှိတယ်” လို့ ပြောပါတယ်။

စစ်ကောင်စီကချိတ်ပိတ်ခဲ့တဲ့ KS2K ရေသန့်စက်ရုံဟာလည်း ဒေါ်ခင်စိုးစိုးကြည်ရဲ့ အစုရှယ်ရာ မပါဝင်တော့ပဲ မောင်ဖြစ်သူနဲ့ အများပိုင် လုပ်ငန်းကို ချိတ်ပိတ်သွားခဲ့တာဖြစ်တယ်လို့ ပြောပါတယ်။

” စီးပွားရေးအရ နောက်နောင် ဘယ်သူမှ မပတ်သက်ရဲအောင် ရည်ရွယ်ချက်ရှိရှိနဲ့ ၊ ဆရာမ မပိုင်တော့မှန်းသိသိနဲ့ အများပိုင်းမှန်း သိရဲ့နဲ့ အိမ်ကို ချိတ်ပိတ်ရင်းနဲ့ ရောပြီးချိတ်ပိတ်ခဲ့တာဖြစ်တယ်” လို့ ‌ဒေါ်ခင်စိုးစိုးကြည်နဲ့ နီးစပ်သူ တဦးက ပြောပါတယ်။

ရေသန့်စက်ရုံက ဝန်ထမ်း ၃၀ နီးပါး အလုပ်လက်မဲ့ ဖြစ်ခဲ့သလို နေအိမ်ချိတ်ပိတ်ခံခဲ့ရတဲ့ မိသားဝင်တွေကတော့ ဆွေးမျိုးအိမ်မှာ သွားနေခဲ့ရပြီး လုပ်ငန်းပိုင်ရှင်တွေကတော့ ဥပဒေကြောင်းအရ ဖြေရှင်းနေတယ်လို့ သိရပါတယ်။