စစ်ကောင်စီ

မြင်းခြံ၊ မတ် ၂၄၊ ၂၀၂၃။

မန္တလေးတိုင်း၊ မြင်းခြံခရိုင်၊ တောင်သာမြို့နယ်၊ တမန်ကြီးကျေးရွာမှာ ကင်းပုန်းဝပ်နေတဲ့ စစ်ကောင်စီအဖွဲ့ ဒရုန်းဗုံးထိလို့ ၃ ဦးထက်မနည်း ထိခိုက်နိုင်တယ်လို့ သိရပါတယ်။

တမန်ကြီးရွာထိပ်မှာ ကင်းပုန်းဝပ်နေတဲ့ တောင်သာစစ်ကောင်စီတပ်နဲ့ ရဲတပ်ဖွဲ့ အင်အား ၂၀ ခန့်ကို မတ်လ ၂၃ ရက် မနေ့ နေ့လည် ၂ နာရီကျော်မှာ ဒရုန်းဗုံးချတိုက်ခိုက်ခဲ့တာလို့ Myingyan District Drone strike အဖွဲ့တာဝန်ရှိသူက မြေလတ်အသံကို ပြောပါတယ်။

“စကစကင်းပုန်းက ဒရုန်းဗုံးထိတာနဲ့ ရွာထဲထွက်ပြေးကြတာ၊ ပြန်တောင် မပစ်ကြဘူး။ ဒရုန်းနဲ့ထိပြီး နည်းနည်းလေးထပ်ကြာမှ နောက်တစ်လုံး မကျတော့ဘူးဆိုမှ သူတို့အဖွဲ့က ဒဏ်ရာရသူတွေကို ကောက်သွားကြတာ” လို့ ပြောပါတယ်။

ဒရုန်းနဲ့တိုက်ခိုက်ခံရလို့ ကင်းပုန်းဝပ်နေတဲ့ စစ်ကောင်စီတပ်ဖွဲ့ဝင် ၃ ဦးထက်မနည်း ထိခိုက်ဒဏ်ရာရသွားတယ်လို့ ဆိုပါတယ်။

တိုက်ခိုက်မှုကို Myingyan District Drone strike အဖွဲ့၊ မြင်းခြံခရိုင်အမှတ် ၁ တပ်ရင်း၊ မြင်းခြံခရိုင် အမှတ် ၃၊ အမှတ် ၄ တပ်ရင်းတို့က ပူးပေါင်းတိုက်ခိုက်ခဲ့တာလို့ သိရပါတယ်။

မတ်လ ၂၁ ရက်နေ့မှာလည်း နွားထိုးကြီးရဲစခန်းနဲ့ မင်းရွာကို စစ်ကြောင်းထိုးလာတဲ့ စစ်ကောင်စီတပ်တွေကို ဒရုန်းဗုံး ၁၀ လုံးနဲ့ တိုက်ခိုက်ခဲ့လို့ စစ်ကောင်စီတပ်ဖွဲ့ဝင် ၄ ဦးထက်မနည်း ထိခိုက်မှုတွေရှိတယ်လို့ သိရပါတယ်။

စာတည်း – ရင်ငြိမ်း

ဝေါ၊ မတ် ၂၄၊ ၂၀၂၃။

ပဲခူးတိုင်း၊ ပဲခူးခရိုင်၊ ဝေါမြို့နယ်အတွင်းက စစ်ကောင်စီလက်အောက် ရပ်ကွက်၊ ကျေးရွာ အုပ်ချုပ်ရေးအဖွဲ့ တွေ အမြန်ဆုံးနုတ်ထွက်ကြဖို့နဲ့ မလိုက်နာရင် စစ်ရေးပစ်မှတ်အနေနဲ့ တိုက်ခိုက်သွားမယ်လို့ ဝေါမြို့နယ်ပြည်သူ့ကာကွယ်ရေးတပ်ဖွဲ့က မတ်လ ၂၄ ရက် ဒီကနေ့မှာ ထုတ်ပြန်ပါတယ်။

စစ်ကောင်စီခန့် ရပ်ကွက်၊ကျေးရွာအုပ်စု အုပ်ချုပ်ရေးမှူး၊ ရာအိမ်မှူး၊ ဆယ်အိမ်မှူး အားလုံးပါဝင်မှာဖြစ်ပြီး မတ်လ ၃၁ ရက်နေ့ နောက်ဆုံးထားနုတ်ထွက်ရမယ်လို့ ဝေါပကဖ တာဝန်ရှိသူက ပြောပါတယ်။

“ခုကာလက နောက်ဆုံးအခြေနေကို ရောက်နေပြီ။ တချို့အုပ်ကြီးတွေက အရင်လက်ထက်ကတည်းက အုပ်ကြီးတွေကို အတင်းပြန်ခန့်ထားတာဆိုတော့ သူတို့ကမလုပ်ချင်ပေမယ့် လုပ်နေရတာ ရှိတယ်။ ဒီလိုလူတွေအတွက် အခွင့်အရေးပေးပြီး နောက်ဆုံးစာထုတ်တာပါ။ စကစလက်ထက်မှာ လိုလိုချင်ချင်နဲ့ အုပ်ကြီးလုပ်ထားတဲ့သူတွေကတော့ သူတို့သဘောပါ” လို့ ပြောပါတယ်။

နောက်ဆုံးသတ်မှတ်ပေးထားတဲ့ ရက်အတွင်း နုတ်ထွက်တာမရှိတဲ့သူတွေကို စစ်ကောင်စီနဲ့ ပူပေါင်းဆောင်ရွက်သူတွေအဖြစ် သတ်မှတ်ရှင်းလင်းသွားမှာဖြစ်ပြီး အခုလအတွင်းမှာပဲ စစ်ကောင်စီက သူတို့ လက်အောက် အုပ်ကြီးနဲ့ပျူစောထီးတွေကို လက်နက်တပ်ဆင်ပေးထားကြောင်း သတင်းရရှိထားတယ်လို့ ဆိုပါတယ်။

စစ်အာဏာသိမ်းပြီးတဲ့နောက် ဝေါမြို့နယ်အတွင်းက စစ်ကောင်စီရပ်/ကျေးအုပ်ချုပ်ရေးအဖွဲ့တွေကို ပစ်မှတ်ထား ရှင်းလင်းတာမျိုးမရှိသေးဘဲ ကြံခိုင်ရေးစည်းရုံးရေးမှူး ၁ ဦး၊ စစ်ကောင်စီသတင်းပေး ၁ ဦးနဲ့ ဒုရဲအုပ် ၁ ဦးကိုသာ ရှင်းလင်းခဲ့တာဖြစ်ပြီး၊ ဝေါမြို့နယ်မှာ ရပ်ကွက်/ကျေးရွာအုပ်စု အုပ်ချုပ်ရေးမှူး ၆၁ ဦးနဲ့ ရာအိမ်မှူး၊ ဆယ်အိမ်မှူး ၁၀၀ ကျော် ရှိတယ်လို့ ဝေါပကဖဆီက သိရပါတယ်။

စာတည်း – ရင်ငြိမ်း

ပေါင်းတည်၊ မတ် ၂၄၊ ၂၀၂၃။

ပဲခူးတိုင်း၊ ပြည်ခရိုင်၊ ပေါင်းတည်မြို့မှာ စစ်ကောင်စီက လယ်သမား ၇ ဦးကို ဖမ်းဆီးကာ စိုက်ပျိုးစရိတ်ချေးငွေ အဓမ္မဆပ်ခိုင်းခဲ့တယ်လို့ ဒေသခံတွေဆီက သိရပါတယ်။

ပေါင်းတည်မြို့နယ်၊ ထန်းသုံးခွအုပ်စု ထန်းသုံးခွရွာက ဒေသခံလယ်သမားတွေဖြစ်ပြီး ၁၉ ရက်ညက ပေါင်းတည်ရဲစခန်းအချုပ်ထဲထည့်ကာ ချေးငွေဆပ်ပြီးမှ ပြန်လွှတ်ပေးတာလို့ အုပ်ချုပ်ရေးမှူးနဲ့ နီးစပ်သူဆီက သိပါတယ်။

“ညနေပိုင်းဖမ်းသွားတာ ချေးငွေမဆပ်ရင် ပြန်မလွှတ်ဘူးဆိုလို့ အကုန်လုံးချေးငွေဆပ်ပြီး ပေါင်းတည်အချုပ်ထဲ တညအိပ်စေပြီး ချေးငွေဆပ်မှ ပြန်လွှတ်ပေးတာ” လို့ ပြောပါတယ်။

ပေါင်းတည်မြို့နယ်၊ မဲခေါင်းအုပ်စု၊ ကြို့ပင်သာအုပ်စုနဲ့သပြေကြီးစုအုပ်စုက လယ်သမားတွေကိုလည်း လာမယ့်မတ်လ ၂၇ ရက်နေ့ ပေးဆပ်ရန် ခြိမ်းခြောက်တောင်းဆိုတယ်လို့လည်း ဆိုပါတယ်။

“ချေးငွေတွေ ပြန်ဆပ်ရမယ်ဆိုပြီး လယ်သမားတွေကို ရဲနဲ့လိုက်ခေါ်ပြီး အခုလာမဲ့ မတ်လ ၂၇ ရက်နေ့အပြီး ဆပ်ရမယ်ဆိုပြီး လက်မှတ်ထိုးခိုင်းတယ်။ အဓမ္မတောင်းခံတာပေါ့ဗျာ။ ပေးစရာကတော့ မရှိဘူး” လို့ ဒေသခံလယ်သမားတဦးက ပြောပါတယ်။

လက်ရှိမှာ ရပ်ကျေးစိုက်ဘဏ် အချို့ ကျေးရွာအတွင်း ဖိအားပေးတောင်းခံမှုတွေရှိနေပြီး ခြိမ်းခြောက်မှုတွေလည်း ရှိတယ်လို့ သူကဆက်ပြောပါတယ်။

” မြန်မာ့လယ်ယာဖွံ့ဖြိုးရေးဘဏ်က စိုက်ပျိုးစရိတ်ချေးငွေအတွက် တဧကကျပ် ၁ သိန်းခွဲနှုန်းနဲ့ ကိုဗစ်ချေးငွေအတွက် တဧကကျပ် ၅ သောင်း ထုတ်ချေးထားပြီး ကျသင့်ဒဏ်တိုးကျပ် ၄ သောင်းခွဲနဲ့ပေါင်းပါက စုစုပေါင်း ၁ ဧကကို ကျပ် ၂ သိန်းခွဲဝန်းကျင် ပေးဆောင်ခိုင်းတာ” လို့ ​ဆိုပါတယ်။

စိုက်ပျိုးစရိတ်ချေးငွေကို လယ် ၁ ဧကကနေ ၁၀ ဧကအထိ လုပ်ကိုင်သူတွေကို ထုတ်ချေးပေးတာဖြစ်တဲ့အတွက် ပေးဆပ်ရမယ့်သူတွေအနေနဲ့လည်း ကျပ် ၂ သိန်းခွဲကနေ ကျပ် ၂၅ သိန်းအထိ ဖြစ်တယ်လို့ သိရပါတယ်။

ဒါ့အပြင် ပဲခူးတိုင်းအနောက်ခြမ်းက နတ်တလင်း၊ ကြို့ပင်ကောက်၊ မိုးညိုနဲ့ သာယာဝတီမြို့နယ်တွေမှာလည်း စိုက်ပျိုးစရိတ်ချေးငွေကို အဓမ္မတောင်းခံမှုတွေ ရှိနေတယ်လို့ ဒေသခံတွေဆီက သိရပါတယ်။

စာတည်း – 007

မကွေး၊ မတ် ၂၂၊ ၂၀၂၃။

မကွေးတိုင်း၊ မကွေးမြို့နယ်၊ ညောင်ကန်ရဲစခန်းနယ်မြေအပိုင် ကြာကန်ရွာအနီးမှာ စစ်ကောင်စီကိုလိုင်းကြေးပေးပြီး အပတ်စဥ် လောင်းကစားဝိုင်း ပြုလုပ်နေတယ်လို့ ဒေသခံတွေဆီက သိရပါတယ်။

ပြီးခဲ့တဲ့ ဖေဖေါ်ဝါရီလဆန်းပိုင်းလောက်က စတင်ကာ ကြာကန်ရွာက စစ်တပ်သတင်းပေးဆိုသူ ကိုနေလင်းနဲ့ တပည့်ဖြစ်သူ ကိုပိုင်တို့ဦးဆောင်ကာ အပတ်စဥ် တနင်္လာနဲ့အင်္ဂါနေ့တွေမှာ ပြုလုပ်နေတာလို့ ဒေသခံတဦးက ပြောပါတယ်။

“လိုင်းကြေးယူထားတော့ ဖမ်းမယ့်သူမရှိဘူး။ ရွာထဲမှာ ဒိုးဇက်ဆော့တာ ဇယ်တောက်ကစားတာကြတော့ ဖမ်းတယ်။ လောင်းကစားဝိုင်းကြောင့် ယာမြေပေါင်သူတွေ၊ နွားရောင်းသူတွေအထိ ရှိလာတယ်။ လုပ်ငန်းခွင်ဝင်ရင် မြေမရှိနွားမရှိဖြစ်ပြီ။ အခုဆိုသူခိုးသူဝှက်တောင် ရှိလာပြီ” လို့ ပြောပါတယ်။

ညောင်ကန်ရဲစခန်းနဲ့ မကွေးစစ်ကောင်စီတပ်ဖွဲ့ဝင်တို့ကို လိုင်းကြေးပေးကာ အပတ်စဥ်မနက် ၉ နာရီလောက်ကနေ ညနေအထိ ကြက်ဝိုင်း၊ ခြောက်ကောင်ခုံအပါအဝင် လောင်းကစားမျိုးစုံကို ပြုလုပ်နေတာဖြစ်ပြီး၊ ငွေပမာဏ ဘယ်လောက်ပေးရလဲဆိုတာကိုတော့ မသိရဘူးလို့ သူကဆက်ပြောပါတယ်။

အဲ့ဒီလောင်းကစားဝိုင်းကို အနီးဝန်ကျင်ကျေးရွာပေါင်း ၃၀ ကျော်က လူဦးရေ ၁၅၀ လောက် လာရောက်ကစားနေကြပြီး၊ အဲ့ဒီနေရာမှာ အအေးဆိုင်၊ ထမင်းဆိုင်နဲ့ ဘီယာရောင်းချသူတွေပါ ရှိတယ်လို့ ဆိုပါတယ်။

စစ်တပ်က အာဏာသိမ်းပြီးနောက်ပိုင်းမှာ နိုင်ငံတဝှမ်း လောင်းကစားဝိုင်းတွေကို သက်ဆိုင်ရာမြို့နယ်အလိုက် စစ်ကောင်စီလက်အောက်ခံတပ်ဖွဲ့ဝင်တွေက လိုင်းကြေးယူကာ ပိုမိုပြုလုပ်ခွင့်ပေးထားပြီး စစ်တပ်သတင်းပေးတွေကို မွေးမြူထားတာလို့လည်း ဒေသခံတဦးက သုံးသပ်ပြောဆိုပါတယ်။

ဒါ့အပြင် ပဲခူးတိုင်းအတွင်းက မြို့နယ်အချို့မှာလည်း အလားတူ လိုင်းကြေးပေးပြီး လောင်းကစားဝိုင်းတွေ ပြုလုပ်လျှက်ရှိရာ ပြီးခဲ့တဲ့ မတ်လ ၁၇ ရက်ကတော့ မိုးညိုမြို့နယ်၊ ရေကင်းနယ်မြေရဲစခန်း အနောက်ဘက် ၄ ဖာလုံအကွာမှာ ပြုလုပ်နေတဲ့ လောင်းကစားဝိုင်းကို မိုးညိုပြည်သူ့ကာကွယ်ရေးတပ်ဖွဲ့က လက်ပစ်ဗုံး ၂ လုံးနဲ့ ပစ်ခတ်သတိပေးခဲ့ပါသေးတယ်။

စာတည်း – လင်း

မန္တလေး၊ မတ် ၂၀၊ ၂၀၂၃။

မန္တလေးတိုင်း၊ ချမ်းအေးသာစံမြို့နယ်မှာရှိတဲ့ စစ်ကောင်စီလက်အောက် တိုင်းပို့ဆောင်၊ဆက်သွယ်ရေးရုံး မတ်လ ၂၀ ရက် ဒီကနေ့ မနက် ၁၁ နာရီလောက်မှာ ဗုံးပစ်တိုက်ခိုက်ခံရလို့ ရုံးတွင်းမှာရှိတဲ့ ဝန်ထမ်း ၄ ဦး ဒဏ်ရာရရှိခဲ့တယ်လို့ သိရပါတယ်။

အောင်နန်းရိပ်သာအရှေ့ရပ်ကွက်၊ ၈၃လမ်း၊ ၃၄×၃၅ လမ်းကြားမှာရှိတဲ့ တိုင်းပို့ဆောင်ရေးစီမံကိန်းဦးစီးဌာနရုံးအတွင်းထဲကို အမည်မသိအမျိုးသား ၁ ဦး ဝင်ရောက်လာပြီး ဗုံးပစ်ထွက်ပြေးသွားခဲ့တာလို့ ဒေသခံတဦးက မြေလတ်အသံကို ပြောပါတယ်။

“တိုင်းပို့၊ဆက်ရုံး ဗုံးပေါက်တာ ဟုတ်တယ်။ သိရသလောက်က ရုံးထဲလာပစ်ထည့်သွားတာတဲ့။ ထိခိုက်ဒဏ်ရာရသူတွေကလည်း ဝန်ထမ်းတွေပဲလို့ သိရတယ်။ သေတာတော့မရှိဘူး” လို့ ပြောပါတယ်။

ရုံးအတွင်းဗုံးပေါက်ကွဲခဲ့တာကြောင့် စစ်ကောင်စီ ပို့၊ဆက်ဝန်ထမ်း ၄ ဦး ဒဏ်ရာရရှိသွားပြီး မန္တလေးပြည်သူ့ဆေးရုံကို တင်ပို့ထားရတယ်လို့ ဆိုပါတယ်။

အဲဒီ ဗုံးပစ်တိုက်ခိုက်မှုနဲ့ပတ်သက်လို့ မန္တလေးမြို့ပြပြောက်ကျားတပ်ဖွဲ့တွေဘက်က တစုံတရာ သတင်းထုတ်ပြန်ထားတာမျိုး မရှိသေးပါဘူး။

စစ်ကောင်စီထောက်ခံတဲ့ တယ်လီဂရမ်ချန်နယ်တွေမှာတော့ မန္တလေးတိုင်း ပို့၊ဆက်ရုံး ဗုံးပစ်ခံရလို့ ဒု-ဦးစီးမှူး ဦးလွှမ်းမိုး၊ အကြီးတန်းစာရေး ဦးဇော်မြင့်၊ အငယ်တန်းစာရေး မသူသူအောင်နဲ့ မလှစံပယ်ကျော်တို့မှာ မစိုးရိမ်ရဒဏ်ရာတွေရရှိခဲ့တယ်လို့ ရေးသားထားပါတယ်။

ဖေဖော်ဝါရီလ ၁၀ ရက်နေ့ကလည် ချမ်းမြသာစည်မြို့နယ်၊ မန္တလာသီရိအားကစားကွင်း အရှေ့ဘက်ဝင်ပေါက်မှာရှိတဲ့ ရဲလုံခြုံရေးဂိတ် ဗုံးပစ်ခံရပြီး ဒုရဲအုပ်အပါအဝင် ၃ ဦး ဒဏ်ရာရခဲ့သေးတယ်လို့ သိရပါတယ်။

စာတည်း – ရင်ငြိမ်း

ပေါင်းတည်၊ မတ် ၂၀၊ ၂၀၂၃။

ပဲခူးတိုင်း(အနောက်ခြမ်း)၊ ပြည်ခရိုင်၊ ပေါင်းတည်မြို့နယ် သမဝါယမဦးစီးဌာနက ဒေသခံတွေကို ထုတ်ချေထားတဲ့ သမချေးငွေကို စစ်တပ်ခေါ်ပြီး ခြိမ်းခြောက်တောင်းခံနေတယ်လို့ သိရပါတယ်။

မတ်လ ၁၇ ရက်ကစတင်လို့ စစ်ကောင်စီလက်အောက် မြို့နယ်သမဝါယမဦးစီးဌာန ဦးစီးအရာရှိ ဒေါ်အေးအေးခိုင် ဦးဆောင်ပြီး စစ်ကောင်စီတပ်ဖွဲ့ဝင်တွေနဲ့အတူ ကျေးရွာတွေအထိ ချေးငွေပေးဆပ်ဖို့ တအိမ်တက်ဆင်း လိုက်လံတောင်းခံနေတာဖြစ်ပြီး မပေးရင် ဖမ်းဆီးအရေးယူမယ်ဆိုကာ ခြိမ်းခြောက်တောင်းခံနေတာလို့ သိရပါတယ်။

“ကျနော်တို့ဆီကိုလာပြီး သမက ကြွေးဆပ်ဖို့ လာပြောတယ်။ မဆပ်နိုင်ရင် ဖမ်းချုပ်မယ်။ ငွေကြေမှ ပြန်လွှတ်ပေးမယ်ဆိုပြီး ခြိမ်းခြောက်သွားတာ။ တချို့လည်း ကြောက်လန့်ပြီး ရှာကြံပေးလိုက်တာမျိုးတော့ ရှိတယ်။ ခုအချိန်က အလုပ်အကိုင်ကအစ မကောင်းတော့ စားဖို့တောင် အနိုင်နိုင်ဖြစ်နေတာ” လို့ သမအသင်းသားတဦးက မြေလတ်အသံကို ပြောပါတယ်။

သမချေးငွေတွေ လိုက်လံတောင်းခံရာမှာ စစ်ကောင်စီသမဝန်ထမ်းတွေနဲ့ စစ်ကောင်စီတပ်သားတွေက ရက်ချိန်းကြိုတင်ပြောဆိုတာမျိုးမရှိဘဲ နာရီပိုင်းသာကြိုပြီး အသိပေးတယ်လို့ ဒေသခံတဦးက ပြောပါတယ်။

“သမကလူတွေက သူတို့လာတဲ့လမ်းမှာ ချောင်းပြီးအလုပ်ခံရမှာစိုးလို့ ထင်တယ်။ စစ်တပ်ပါတာတောင် ကြွေးတောင်းလာမယ့်နေ့နဲ့ အချိန်ကိုလည်း ကြိုမပြောဘူး။ နာရီပိုင်းအလိုကျမှ ရွာသားက သိရတာ။ ကြိုမပြောတော့ ရှာရဖွေရ ပိုခက်ခဲတယ်” လို့ ပြောပါတယ်။

ပေါင်းတည်မြို့နယ် သမဝါယမဦးစီးအရာရှိ ဒေါ်အေးအေးခိုင်ဟာ စစ်တပ်အာဏာသိမ်းတာကို ထောက်ခံခဲ့သူဖြစ်ပြီး သူ့ရဲ့အမျိုးသားဖြစ်သူဟာလည်း ဒေသကာကွယ်ရေးတပ်ဖွဲ့ဝင်တွေကို ဆဲဆိုနေသူဖြစ်ကာ လက်ရှိမှာ စစ်ကောင်စီလက်အောက် ပေါင်းတည်မြို့နယ် ရွေးကောက်ပွဲကော်မရှင်မှာ ဝင်ရောက်လုပ်ကိုင်နေသူဖြစ်တယ်လို့ ဒေသခံတွေက ပြောပါတယ်။

ပေါင်းတည်မြို့နယ်အတွင်းက သမချေးငွေပေးဆပ်ရန် ကျန်ဒေသခံ အသင်းဝင်တွေဟာ ယခင်အရပ်သားအစိုးရလက်ထက်က သမချေးငွေတွေ ရယူထားတာဖြစ်ပြီး အများစုဟာပေးဆပ်ရန် ကျန်ချေးငွေ အနည်းဆုံး ၅ သောင်းကနေ အများဆုံး ၂ သိန်းကျပ်အထိ ရှိကြတယ်လို့ သိရပါတယ်။

စာတည်း – ရင်ငြိမ်း