စစ်ကောင်စီ

ပုလဲ၊ မတ် ၁၆၊ ၂၀၂၃။

ပဲခူးမြို့၊ ရွှေမော်ဓောဘုရားပွဲကို လာမယ့်မတ်လ ၂၀ ရက်နေ့ကနေ စတင်ပြီး စစ်ကောင်စီကကျင်းပပြုလုပ်မှာဖြစ်ကာ အဲ့ဒီဘုရားပွဲကို ပြည်သူတွေ အသိဥာဏ်နဲ့ယှဥ်ပြီး သွားလာကြဖို့ ပဲခူး ပကဖ က အသိပေးပြောဆိုလိုက်ပါတယ်။

စစ်ကောင်စီအနေနဲ့ ပဲခူးတိုင်းအတွင်း အေးချမ်းသာယာပြီးထိန်းချုပ်ထားနိုင်တဲ့ အခြေနေရှိပြီဆိုတာ ပြသချင်တာဖြစ်လို့ ဘုရားပွဲအပါအဝင် ပျော်ပွဲရွှင်ပွဲတွေကို ကျင်းပပြုလုပ်ဖို့ စီစဥ်နေတာဖြစ်တယ်လို့ ပဲခူးမြို့ နယ်ပကဖတာဝန်ရှိသူက ပြောပါတယ်။

“ပဲခူးတိုင်း စကစဝန်ကြီးချုပ်က သူ ပဲခူးကို ထိန်းချုပ်ထားနိုင်ပြီဆိုပြီး ပြသချင်တာဖြစ်တယ်။ ခုလည်း ရွှေမော်ဓောဘုရားပွဲလုပ်ဖို့ စီစဥ်နေတယ်။ ပြည်သူတွေထဲမှာ ပဲခူးဘုရားပွဲဆိုတာနဲ့ သွားကြမယ်ဆိုပြီး မြင်နေတယ်။ သွားမယ့်သူတွေကိုလည်း အပြစ်မတင်ဘူး။ ဒီကာလမှာ ကိုယ်စိတ်မွန်းကြပ်နေတာဖြစ်လို့ ခဏတာထွက်ပေါက်ရဖို့ အပျော်အပါးဆို သွားလာကြမှာပဲ။ ဒါပေမယ့် ခုအချိန်မှာ တိုင်းပြည်ဒုက္ခရောက်နေချိန် ပွဲလမ်းသဘင်လုပ်ရမယ့်အချိန်၊ သွားလာရမယ့်အချိန် မဟုတ်ဘူး” လို့ ပြောပါတယ်။

ပဲခူးပြည်သူ့ကာကွယ်ရေးအဖွဲ့တွေအနေနဲ့ အများပြည်သူ သွားလာနေတဲ့နေရာတွေကို ပစ်မှတ်ထား တိုက်ခိုက်မှာမဟုတ်ဘဲ စစ်ကောင်စီထောက်တိုင်တွေနဲ့ စစ်ကောင်စီနေရာတွေကိုသာ တိုက်ခိုက်သွားမှာဖြစ်တယ်လို့ ဆိုပါတယ်။

“ပြည်သူတွေအနေနဲ့က သွားလာမယ်ဆိုရင် ခုအချိန်ဟာ တိုင်းပြည်က ငြိမ်းချမ်းနေရဲ့လား။ အပျော်တွေနဲ့ သွားနေလို့ သင့်တော်ရဲ့လား။ နိုင်ငံရဲ့ပြုပြင်ပြောင်းလဲရေးကို ခုလိုလုပ်နေလို့ ပြောင်းလဲနိုင်ရဲ့လား။ ခုဘုရားပွဲကိုတော့ ကျနော်တို့ဘက်က ထိခိုက်အောင်မလုပ်ဘူး။ တစ်ခုပဲ ကျနော်အမြင်အရပြောမယ်ဆိုရင် ပဲခူးကပြည်သူတွေက အညာကပြည်သူတွေကို အားနာပါလို့ ပြောချင်တယ်” လို့ သူက ဆက်ပြောပါတယ်။

စစ်ကောင်စီက ပဲခူးရွှေမော်ဓောဘုရားပွဲကို လာမယ့် မတ်လ ၂၀ ရက်နေ့ကနေ ဧပြီလ ၁၈ ရက်နေ့ထိ ရက် ၃၀ ကျင်းပသွားမယ်လို့ ကြော်ငြာထားပြီး ဘုရားပွဲအတွင်း ပွဲလမ်းဇာတ်သဘင်တွေကို မတ်လ ၃၀ ရက်နေ့ကနေ ဧပြီလ ၈ ရက်နေ့အထိ ၁၀ ရက် ထည့်သွင်းကျင်းပပြုလုပ်မယ်လို့ ဆိုပါတယ်။

စာတည်း – ရင်ငြိမ်း

မုံရွာ၊ မတ် ၁၅၊ ၂၀၂၃။

စစ်ကိုင်းတိုင်း၊ မုံရွာမြို့နယ်ထဲက ထနောင်းတော(တောင်ရွာ)ကို စစ်သားနဲ့ ပျူစောထီးတပ်ဖွဲ့တွေက မတ်လ ၁၅ ရက်ဒီမနက်ပိုင်းမှာ ဝင်ရောက်မီးရှို့ခဲ့တယ်လို့ ဒေသခံတွေဆီက သိရပါတယ်။

အင်အား ၂၀ ဝန်းကျင်ရှိတဲ့ စစ်သားနဲ့ပျူတွေက ဒီမနက် ၆ နာရီလောက်မှာ ရွာထဲကို လက်နက်တွေ ပစ်ဖောက်ဝင်လာခဲ့ပြီး နေအိမ်တွေကို မီးရှို့ခဲ့တာလို့ မုံရွာ – အမြင့်လမ်းသတင်းမှန်ပြန်ကြားရေးတာဝန်ခံတဦးက ပြောပါတယ်။

“အခုလောလောဆယ်တော့ ဘာမှတိတိကျကျ မသိရသေးဘူး။ စစ်ကြောင်းပြန်မှပဲ သိရမယ်။ နေအိမ်တွေကို မီးရှို့တာ တော်တော်များတယ်လို့ ကြားတယ်။ ရွာသားတွေလည်း ထွက်ပြေးနေရတယ်” လို့ ဆိုပါတယ်။

အခုလက်ရှိအချိန်ထိလည်း ရွာထဲမှာ စစ်ကောင်စီတပ်ဖွဲ့တွေက မီးရှို့နေဆဲ ဖြစ်တာကြောင့် ဒေသခံတွေအနေနဲ့ နီးစပ်ရာကျေးရွာနဲ့ တောတွေထဲမှာ ရှောင်တိမ်းနေရဆဲဖြစ်ကာ နောက်ဆက်တွဲအခြေအနေတွေကိုတော့ မြေလတ်အသံက ဆက်လက်စုံစမ်းနေဆဲ ဖြစ်ပါတယ်။

ခုမီးရှို့နေတဲ့ စစ်အုပ်စုဟာ မုံရွာ-မန္တလေးလမ်းဘေး မြေနဲကျေးရွာအဝင်မှာ တပ်စွဲထားတဲ့ စစ်အုပ်စုဖြစ်တယ်လို့လည်း အထက်ပါဝာာဝန်ခံက ပြောပါတယ်။

ပြီးခဲ့တဲ့ ၂၀၂၂ ခုနှစ်၊ စက်တင်ဘာလ ၂၇ ရက်ကလည်း ထနောင်းတော (မြောက်ရွာ)က နေအိမ် ၄ လုံးကို စစ်ကောင်စီတပ်တွေက မီးရှို့ဖျက်ဆီးခဲ့ပါသေးတယ်။

စာတည်း – လင်း

မုံရွာ၊ မတ် ၁၄၊ ၂၀၂၃။

စစ်ကိုင်းတိုင်း၊ မုံရွာမြို့နယ်၊ သက္ကယ်ကျင်းကျေးရွာမှာ PDF ရှိတယ်ဆိုတဲ့ စွပ်စွဲချက်နဲ့ မတ်လ ၁၃ ရက်မနေ့ကနေ့လယ်ပိုင်းမှာ စစ်ကောင်စီတပ်တွေကဝင်ရောက်လာပြီး နေအိမ်တွေကိုပါ မီးရှို့ဖျက်ဆီးခဲ့တယ်လို့ သိရပါတယ်။

မုံရွာအခြေစိုက် အနောက်မြောက်တိုင်းစစ်ဌာနချုပ်က စစ်သားတွေဟာ မအူဂိတ်ကနေတဆင့် သက္ကယ်ကျင်းရွာကို ပစ်ခတ်တာတွေမလုပ်ပဲ ခြေလျင်ဝင်ရောက်လာကာ နေအိမ် ၁၁ လုံးကိုမီးရှို့ခဲ့ကြတာလို့ သက္ကယ်ကျင်းဒေသခံတဦးက ပြောပါတယ်။

“ရွာထဲမှာဘာမှမရှိပါဘူး၊ အကုန်လုံးရိုးရိုးသားသားလုပ်စားကြတာပါ။ PDF ရှိတယ်ထင်ပြီး မီးရှို့သွားတာပါ။ သူတို့အခုလိုလုပ်လိုက်တဲ့အတွက် ကျနော့်အနေနဲ့ကတော့ ဘာမှပြောစရာမရှိပါဘူး၊ ပြောလည်းမပြောရဲပါဘူး၊ သူတို့လာရင်ပြေးမယ်၊ အဓိက က လူလွတ်အသက်ရှင်ဖို့ပဲ အရေးကြီးတာပါ”လို့ ဆိုပါတယ်။

အိမ်ခြေ ၁၁၀၀ ဝန်းကျင်ရှိတဲ့ သက္ကယ်ကျင်းကျေးရွာဟာ အခုလို မီးရှို့ဖျက်ဆီးခြင်း ခံရတာက ပထမအကြိမ်ဖြစ်တယ်လို့လည်း အထက်ပါဒေသခံက ဆက်ပြောပါတယ်။

“အရင်ကတော့ ရွာထဲကို စစ်ကြောင်းထိုးလာတာမျိုးတော့ရှိတယ်၊ မီးတော့မရှို့ခဲ့ဘူး၊ ဒီတကြိမ်တော့ မီးရှို့ခံလိုက်ရတယ်။ မီးရှို့ခံရတဲ့အိမ်တွေကတော့ ဘယ်လိုနေရမယ်မသိသေးဘူး၊ ရွာကတဲထိုးပေးမယ်လို့ ပြောတယ်”လို့ ဆိုပါတယ်။

အဆိုပါစစ်ကောင်စီတပ်တွေဟာ သက္ကယ်ကျင်းကျေးရွာကိုမီးရှို့ပြီး ညနေ ၄ နာရီလောက်မှာတော့ ရွာကနေထွက်ခွာသွားတဲ့အတွက် တိမ်ရှောင်နေတဲ့ ဒေသခံရွာသားအချို့ကတော့ ညနေ ၅ နာရီလောက်မှ ရွာထဲကိုပြန်ဝင်ခဲ့ကြတယ်လို့ သိရပါတယ်။

စာတည်း – လင်း

ကနီ၊ မတ် ၁၃၊ ၂၀၂၃။

စစ်ကိုင်းတိုင်း၊ ကနီမြို့နယ်မှာ စစ်ကောင်စီက ကျင်းပပြုလုပ်တဲ့ ဆယ်တန်းစာမေးပွဲကို ဝင်ရောက်ဖြေဆိုတဲ့ ကျောင်းသားဦးရေ ၄၀ သာရှိတယ်လို့ သိရပါတယ်။

ကနီမြို့ပေါ်က ကျောင်းသား၊ ကျောင်းသူတချို့နဲ့ ရေလည်ကျွန်း ပျူစောထီးစခန်းက ကျောင်းသားတွေ စုစုပေါင်း ၆၀ ဦး ဖြေမယ်လို့ စာရင်းတင်ထားပေမယ့် ၄၀ ဦးသာ လာရောက်ဖြေဆိုခဲ့ကြတာလို့ ကနီဒေသခံတဦးက ပြောပါတယ်။

“ကနီ အ.ထ.က ကျောင်းမှာ ဖြေနေတယ်။ စစ်အုပ်စုကို ထောက်ခံတဲ့သူနဲ့ ပျူစခန်းက လူတွေပဲ လာဖြေတာ၊ တခြား ဘယ်သူမှမဖြေဘူး။ ခုဖြေတဲ့ပမာဏနဲ့ ကျောင်းသားအရေအတွက် နှိုင်းဆကြည့် ၁၀ ရာခိုင်နှုန်းတောင် မရှိဘူး။ အရင်ကဖြေရင် ထောင်ချီဖြေတာ။ ကနီနယ်တနယ်လုံး အတိုင်းတာနဲ့ဆို ကျောင်းသားတွေရဲ့ CDM၊ ဆရာမတွေရဲ့ CDM ကောင်းနေတယ်လို့ ပြောလို့ရတယ်။ လုံးဝကို အောင်မြင်နေတာ” လို့ ပြောပါတယ်။

ကနီမှာ အာဏာမသိမ်းခင်ကာလ ဆယ်တန်းစာမေးပွဲဖြေဆိုရင် မြို့ပေါ် အ.ထ.ကကျောင်းအပြင်၊ ကျေးရွာဘက်တွေမှာလည်း Center တွေ ဖွင့်လှစ်ကာ ဖြေဆိုကြပြီး၊ အခုကတော့ ဖြေဆိုသူ နည်းပါးတဲ့အတွက် မြို့ပေါ်က အ.ထ.က ကျောင်းတခုထဲမှာပဲ ဖြေဆိုနေကြကာ စစ်ကောင်စီတပ်တွေကလည်း လုံခြုံရေးအပြည့် ယူပေးထားတယ်လို့ သိရပါတယ်။

ဒါ့အပြင် အာဏာမသိမ်းခင်နှစ်တွေကတော့ ကနီမြို့နယ်မှာ စာမေးပွဲဖြေဆိုသူ ကျောင်းသားဦးရေ ၂၅၀၀ ကျော်ရှိပြီး၊ အခုနောက်ပိုင်းမှာတော့ ရာဂဏန်းတောင် မပြည့်ဘူးလို့ ဆိုပါတယ်။

၂၀၂၂ ခုနှစ် မနှစ်က စစ်ကောင်စီကျင်းပတဲ့ ဆယ်တန်းစာမေးပွဲမှာလည်း ဖြေဆိုသူနည်းပါးတဲ့အပြင် ကနီတနယ်လုံးမှာမှ ၁၂ ဦးပဲ အောင်မြင်ခဲ့တယ်လို့ သိရပါတယ်။

ပုံစာ – စစ်ကိုင်းတိုင်းအတွင်းက စာမေးပွဲဖြေဆိုနေသည့် ကျောင်းသားအချို့။

စာတည်း – လင်း

ပေါက်၊ မတ် ၁၂၊ ၂၀၂၃။

မကွေးတိုင်းဒေသကြီး၊ ပေါက်မြို့နယ်မှာရှိတဲ့ အုန်းတောတောင်စုနဲ့ အုန်းတောမြောက်စု ကျေးရွာနှစ်ရွာကို စစ်ကောင်စီတပ်ဖွဲ့ဝင်တွေက ၄ ရက်ဆက်တိုက် ဝင်ရောက် မီးရှို့ခဲ့တယ်လို့ ပေါက်မြောက်ပိုင်းကာကွယ်ရေးတပ်ဖွဲ့ဝင်ထံက သိရပါတယ်။

ပြီးခဲ့တဲ့ မတ်လ ၉ ရက်နေ့ကစတင်က နေ့စဉ်လာရောက် မီးရှို့ခဲ့တာဖြစ်ပြီး စစ်ကောင်စီတပ်သားနဲ့ ပျူစောထီး အင်အား စုစုပေါင်း ၂၀၀ ကျော်နဲ့ လာရောက်နေတာလို့ ဆိုပါတယ်။

“မနက်ပိုင်း ဝင်လာတယ်။ နေ့လယ်ဆို ပြန်သွားတယ်။ ၄ ရက် ဆက်တိုက်လာပြီး မီးရှို့ခဲ့တာပါ။ အိမ်ခြေ ၇၀ ကျော် မီးလောင်ဆုံးရှုံးခဲ့တယ်။ ရွာသားတွေကိုအရင် ကယ်ထုတ်ထားတော့ လူတွေတော့ အထိအခိုက်မရှိပါဘူး။ ရွာသွားနှစ်ဦးကိုတော့ ဖမ်းဆီးခေါ်ဆောင်သွားတယ်” လို့ ဗိုလ်လရောင်က မြေလတ်အသံကို ပြောပါတယ်။

ဖမ်းဆီးခံရသူတွေကတေ့ာ တောင်စုရွာသား ကိုမြင့်သိန်းနဲ့ မြောက်စုရွာသား ကိုရန်နောင် တို့နှစ်ဦးဖြစ်တယ်လို့ ဆိုပါတယ်။

လက်ရှိ အဲဒီကျေးရွာနှစ်ရွာမှာ စစ်ဘေးရှောင်ပြည်သူ ၁၀၀၀ ကျော် ရှိနေပြီး၊ စားနပ်ရိက္ခာအတွက် လုံလောက်မှုမရှိတဲ့အတွက် အကူအညီတွေ လိုအပ်နေတယ်လို့ သိရပါတယ်။

ပခုက္ကူ၊ မတ် ၁၂၊ ၂၀၂၃။

မကွေးတိုင်း၊ ပခုက္ကူမြို့နယ်၊ ကျွန်းချောင်းလျှပ်စစ်ဓာတ်အားထုတ်လုပ်ရေးစက်ရုံအနီးတဝိုက်က ရွာတွေကို စစ်ကောင်စီတပ်က လက်နက်ကြီးနဲ့ပစ်ခတ်နေလို့ ဒေသခံ ၁ သောင်းကျော်ဟာ နေရပ်စွန့်ခွာ ထွက်ပြေးနေရတယ်လို့ သိရပါတယ်။

မတ်လ ၉ ရက်နေ့ညပိုင်းမှာ ကျွန်းချောင်းလျှပ်စစ်ဓာတ်အားပေးစက်ရုံအနီးက စာသင်ကျောင်းမှာ စစ်ကောင်စီတပ်နဲ့ ပျူစောထီးအင်အား ၇၀ကျော် လာရောက်တပ်စွဲပြီး ညအချိန်တွေမှာ ကျေးရွာတွေကို လက်နက်ကြီး၊ လက်နက်ငယ်တွေနဲ့ အချိန်အတော်ကြာ ပစ်ခတ်နေတာကြောင့် အခုလိုထွက်ပြေးနေကြရတာလို့ ဒေသခံတဦးက မြေလတ်အသံကို ပြောပါတယ်။

“ညအချိန်ရောက်ရင် ဒီကောင်တွေက နေ့တိုင်းလိုလို လက်နက်ကြီး၊ လက်နက်ငယ်တွေနဲ့ ပစ်တယ်။ ဘာကြောင့်ပစ်လဲတော့ မသိဘူးပေါ့။ ကျည်တွေက နေအိမ်တွေ၊ဘုန်းကြီးကျောင်းတွေကို လာထိတာတွေရှိတယ်။ အဲဒါကြောင့် ထွက်ပြေးလာခဲ့တာပေါ့။ ဒီကောင်တွေက ယာယီတပ်စွဲတာလား။ အမြဲတမ်း တပ်စွဲ အထိုင်ချမှာလားတော့ မသိရသေးဘူး။ စောင့်ကြည့်ရအုံးမှာ” လို့ ပြောပါတယ်။

ထွက်ပြေးနေရတဲ့သူတွေဟာ ကျွန်းချောင်းလျှပ်စစ်ဓာတ်အားပေးစက်ရုံအနီးက မြို့စိုး၊ ငှက်ပျောတော၊ သီရိလေး၊ ပေါက်တော၊ ကံကြီးစု၊ အိုင်ကြီး၊ ညောင်လှ၊ ညောင်နီပင်၊ သိမ်တော်၊ ဆယ်လံစတဲ့ရွာတွေက ဒေသခံ ၁ သောင်းကျော်အထိ ရှိနေပြီး လက်ရှိမှာ လယ်ကွင်းပြင်တွေထဲ ယာယီတဲထိုး နေထိုင်စစ်ရှောင်နေရတယ်လို့ ဆိုပါတယ်။

“လယ်ကွင်းပြင်တွေထဲမှာ နေကြရတော့ အရမ်းအခက်အခဲ ဖြစ်တာပေါ့။ ဒီနေ့နဲ့ဆို ထွက်ပြေးလာတာ ၄ ရက်ရှိပြီ။ နေ့ဆို အပူဒဏ်ခံရပြီး ညဆိုအအေးဓာတ်ကို အလူးအလိမ့် ခံနေရတယ်။ ရွာကိုလည်း ပြန်မသွားရဲကြသေးဘူး။ စကစတွေက စာသင်ကျောင်းထဲ ရှိနေတုန်းပဲ။ ဒေသခံတွေကတော့ ရွာ ၁၀ ရွာကပါ” လို့ ထွက်ပြေးနေရတဲ့ အမျိုးသားတဦးက ပြောပါတယ်။

အဲ့ဒီစစ်အုပ်စုဟာ မတ်လ ၉ ရက်နေ့က ဆိက္ခဝ ပျူကျေးရွာကနေ တန့်ကြည်တောင်ပေါ်ကို စစ်ကြောင်းထိုးလာခဲ့ပြီး အဲ့ဒီတောင်ပေါ်ကနေတဆင့် ကျွန်းချောင်းလျှပ်စစ်ဓာတ်အားပေးစက်ရုံအနီး အထက စာသင်ကျောင်းကို ရောက်ရှိတပ်စွဲကာ တိုက်ပွဲဖြစ်ပွားတာမရှိဘဲ ကျေးရွာတွေကို လက်နက်ကြီး၊ လက်နက်ငယ်တွေနဲ့ ပစ်ခတ်နေတာလို့ ဒေသခံတွေက ပြောပါတယ်။

ကလေး၊ မတ် ၁၀၊ ၂၀၂၃။

စစ်ကိုင်းတိုင်း၊ ကလေးမြို့ပေါ်က စစ်ကောင်စီတပ်သားတွေဟာ အရပ်သားကား ၂၉ စီးကို ချောဆွဲပြီး ချင်းပြည်နယ်မှာရှိတဲ့ စစ်ကောင်စီတပ်သားတွေဆီကို လက်နက်နဲ့ရိက္ခာ ပို့ဆောင်နေတယ်လို့ သိရပါတယ်။

ကလေးမြို့ဒေသကွပ်ကဲမှုစစ်ဌာနချုပ်(ဒကစ) တပ်မှ စစ်ကောင်စီတပ်သားတွေဟာ အရပ် သားပိုင် ၁၂ ဘီးကား ၁၀ စီး၊ ၆ ဘီးကား ၁၉ စီးတို့နဲ့ မတ်လ ၉ ရက်မနက်ပိုင်းမှာ ချင်းပြည်နယ်၊ ဖလမ်းမြို့ဘက်ကို ထွက်ခွာခဲ့တာ ဖြစ်တယ်လို့ UG တပ်ရင်း ဦးဆောင်သူ ရန်မင်းနိုင်က ပြောပါတယ်။

“ကားပေါ်မှာ ရိက္ခာနဲ့ စကစမိသားစုတွေ ပါတယ်။ အရပ်သား ဓါးစာခံ ၃၀ လောက် ပါမယ်။ ချင်းပြည်နယ်က သူတို့တပ်တွေ ရိက္ခာ၊ ခဲယမ်း အားနည်းနေလို့ပို့တာ။ လေယာဥ်တွေနဲ့လည်း မပို့ရဲတော့ အရပ်သားကားနဲ့ ပို့နေတာပါ။ မတ် ၃ ရက်နေ့က mi 17 တစီး အပစ်ခံရလို့ လေကြောင်းမသုံးတော့တာ” လို့ ဆိုပါတယ်။

ဒီကုန်ကား ၂၀ ကျော်ကို စစ်ကောင်စီအင်အား ၂၀၀ ဝန်းကျင်နဲ့အတူ သံချပ်ကာ ကား ၂ စီး လည်း လုံခြုံရေးလိုက်ပါခဲ့ကြသေးတယ်လို့ သူကဆိုပါတယ်။

ဒီကားတွေထဲမှာ အရပ်သား ၃၀ ဝန်းကျင်ကို စစ်ကောင်စီတပ်သားတွေက ဓားစာခံအဖြစ် ခေါ်ဆောင်သွားတာနဲ့ ပတ်သက်လို့ မြေလတ်အသံအနေနဲ့ သီးခြားအတည်မပြုနိုင်သေးသလို နောက်ဆက်တွဲအခြေအနေကိုလည်း ဆက်လက်စုံစမ်းနေဆဲ ဖြစ်ပါတယ်။

အဆိုပါ ကုန်တင်ကားတွေကို စစ်ကောင်စီတပ်သားတွေက မတ်လ ၆ ရက်နေ့ကတည်းက စီးပွားရေးလုပ်ငန်းရှင်တွေဆီကနေ ချောဆွဲထားတာဖြစ်ပြီး အဲဒီထဲက ကားတချို့ကိုလည်း မတ်လ ၇ ရက်နေ့မှာ ဟားခါးမြို့ကို ဆန်တွေ ပို့ခိုင်းခဲ့သေးတယ်လို့ သိရပါတယ်။

စာတည်း – 007

ယင်းမာပင်၊ မတ် ၉၊ ၂၀၂၃။

စစ်ကိုင်းတိုင်း၊ ယင်းမာပင်မြို့နယ်၊ ကျွန်းတောပြင်ရွာ(ခေါ်) နဘူးတောကျေးရွာမှာ နေထိုင်တဲ့ ထန်းတက်သမား ၂ ဦး မတ်လ ၈ ရက်ညနေ ၃ နာရီလောက်မှာ စစ်ကောင်စီစစ်ကြောင်းနဲ့တွေ့ပြီး သေဆုံးခဲ့တယ်လို့ သိရပါတယ်။

ဘန့်ဘွေးရွာက အင်အား ၃၀ နီးပါးရှိ စစ်သားနဲ့ပျူတွေ စစ်ကြောင်းထိုးလာချိန် နဘူးတောကျေးရွာအရောက်မှာ အသက် ၃၅ နှစ်အရွယ် ထန်းတက်သမား ကိုမင်းဇော် ကို သေနတ်နဲ့ပစ်သတ်ခဲ့တာဖြစ်ပြီး၊ ဦးမြအေး ၅၀ နှစ်ကတော့ ဒီပစ်ခတ်မှုတွေကို ကြောက်လန့်ပြီး ထန်းပင်ပေါ်ကနေ ပြုတ်ကျသေဆုံးခဲ့တာလို့ ယင်းမာပင်မြို့နယ် သတင်းမှန်ပြန်ကြားရေး တာဝန်ခံတဦးက ပြောပါတယ်။

“ကိုမင်းဇော်ကိုတော့ ထန်းပင်ပေါ်က ဆင်းဆင်းချင်း ပစ်သတ်သွားတာပါ။ ဦးမြအေးကတော့ ထန်းပင်ကနေ ပြုတ်ကျပြီး ဆေးကုသမှုခံယူနေရင်း ည ၈ နာရီလောက်မှာ ဆုံးသွားတယ်။ သူတို့ ၂ ယောက်စလုံးက နဘူတောရွာ တောပြင်မှာနေတဲ့ ထန်းတက်သမားတွေပါ” လို့ ဆိုပါတယ်။

ပျူစောထီးတပ်ဖွဲ့တွေဟာ ပစ်ခတ်မှုပြုလုပ်ပြီး ညနေ ၃ နာရီခွဲလောက်မှာ ဘန့်ဘွေးကျေးရွာထဲကို ပြန်ဝင်သွားခဲ့တယ်လို့ သိရပြီး၊ သေဆုံးသွားတဲ့ ကိုမင်းဇော်နဲ့ ဦးမြအေးကိုတော့ ဒီနေ့မနက်မှာပဲ သင်္ဂြိုလ်ပေးလိုက်ပြီလို့ ဆိုပါတယ်။

ဘန့်ဘွေးရွာမှာ စစ်တပ်ကလည်း ပြီးခဲ့တဲ့နှစ် ဇွန်လဝန်းကျင်ကတည်းက ရွာခံပျူစောထီးအဖွဲ့ဝင် အိမ်ထောင်စု ၁၀ စုနဲ့ပေါင်းကာ တပ်စွဲနေတာဖြစ်ပြီး၊ ကျန်တဲ့အိမ်ထောင်စု ၃၀၀ ကျော်ကတော့ ရွာအနီးတောတိုက်တွေထဲမှာပဲ စစ်ရှောင်အနေနဲ့ နေထိုင်ကြတယ်လို့ ဘန့်ဘွေးကျေးရွာသား တဦးက ဆိုပါတယ်။

အဲ့ဒီစစ်သားနဲ့ ပျူတွေဟာ အနီးရွာက ဒေသခံတွေကိုလည်း အကြောင်းမဲ့ဖမ်းဆီးသတ်ဖြတ်တာ၊ စစ်ဆေးပြီး ပစ္စည်းသိမ်းယူတာနဲ့ နေအိမ်တွေကို မီးရှို့တာတွေ ပြုလုပ်နေတာလည်း ဖြစ်ပါတယ်။

မတ်လအတွင်း ယင်းမာပင်မြို့နယ်ထဲက ဒေသခံပြည်သူ ၆ ဦးထိ စစ်ကောင်စီတပ်တွေရဲ့ သတ်ဖြတ်တာကို ခံခဲ့ရတယ်လို့ ယင်းမာပင်မြို့နယ် သတင်းမှန်ပြန်ကြားရေးက ထုတ်ပြန်ရေးသားထားပါတယ်။

စာတည်း – လင်း