စစ်ကိုင်း

စစ်ကိုင်း၊ မတ် ၂၆၊ ၂၀၂၃။

စစ်ကိုင်းတိုင်း၊ ရွှေဘိုမြို့နယ်၊ တဂဏန်းကျေးရွာနဲ့ဇီးတောကျေးရွာအကြား မန္တလေး-ရွှေဘိုကားလမ်းမပေါ် မှာ ကား ၃ စီးနဲ့ဆိုင်ကယ် ၁ စီးမိုင်းထိလို့ ရဟန်း ၁ ပါးအပါအဝင် ၇ ဦးဒဏ်ရာရခဲ့တယ်လို့ သိရပါတယ်။

မတ်လ ၂၅ ရက် ညနေ ၃ နာရီခွဲခန့်မှာ မန္တလေးဘက်ကနေ ရွှေဘိုဘက်ကိုမောင်းနှင်လာတဲ့ ခရီးသည်တင်ကား ၂ စီး၊ ကုန်တင်ကား ၁ စီးနဲ့ ဆိုင်ကယ် ၁ စီး မိုင်းထိခဲ့တာလို့ ဒေသခံတဦးက မြေလတ်အသံကိုပြောပါတယ်။

“မိုင်းက တနေရာထဲထိတာတော့ မဟုတ်ဘူး ။ အဲ့ဒီလမ်းပိုင်းပေါ် အကွာအဝေးသိပ်မကွာတဲ့နေရာ ၃ ခုမှာ မိုင်းထိတာ။ လမ်းဘေးမှာရှိနေတဲ့ မိုင်းတွေကနေ ကားတွေ၊ဆိုင်ကယ်တွေဖြတ်တဲ့အချိန် ထကွဲတာဖြစ်ပါတယ်။ စုစုပေါင်းထိတာက ကား ၃ စီးနဲ့ ဆိုင်ကယ် ၁ စီးပါ”လို့ ပြောပါတယ်။

မိုင်းပေါက်ကွဲမှုကြောင့် ဆိုင်ကယ်စီးနင်းသူ အသက် ၆၀ အရွယ် အမျိုးသား ၁ ဦး၊ ဒို့လူပျိုခရီးသည်တင်ကား၊ အောင်ရတနာခရီးသည်တင်ကားတွေနဲ့လိုက်ပါလာတဲ့ သံဃာတော် ၁ ပါး၊ အမျိုးသမီး ၂ ဦး၊ အမျိုးသား ၂ ဦး၊ ကုန်တင်ကားနဲ့လိုက်ပါလာသူအမျိုးသား ၁ ဦး ဒဏ်ရာရရှိခဲ့ပြီး ရွှေဘိုဆေးရုံကြီးကို ပို့ဆောင်ကုသနေကာ စိုးရိမ်ရလူနာ ၂ ဦးကို မန္တလေးဆေးရုံကို လွှဲပြောင်းဖို့လုပ်ဆောင်နေတယ်လို့ သိရပါတယ်။

လမ်းပိုင်းမိုင်းပေါက်ကွဲတာနဲ့ပတ်သက်လို့ ထုတ်ပြန်ပြောဆိုထားတာမျိုးမရှိသလို ဘယ်အဖွဲ့အစည်းရဲ့ လက်ချက်ဖြစ်တယ်ဆိုတာကိုတော့ မသိရသေးပါဘူး။

ဇန်နဝါရီလ ၃၁ ရက်ကလည်း တဂဏန်းကျေးရွာအနီး အဲ့ဒီလမ်းပိုင်းပေါ်မှာဘဲ သားအဖ ၂ ဦး ဆိုင် ကယ်စီးနင်းလာချိန် မိုင်းပေါက်ကွဲခဲ့လို့ ၂ ဦးစလုံးဒဏ်ရာရခဲ့သေးတယ်လို့ သိရပါတယ်။

စစ်ကိုင်း၊ မတ် ၂၆၊ ၂၀၂၃။

စစ်ကိုင်းတိုင်း၊ ဆားလင်းကြီးမြို့နယ်မြောက်ခြမ်း၊ ညောင်ပင်ကြီးရွာနားက Myanmar Wanbao Mining Copper Limited ကို စစ်ကောင်စီနဲ့မပတ်သက်ဖို့ ဒရုန်းနဲ့ ဗုံး ၂ လုံးချကာ သတိပေးတိုက်ခိုက်ခဲ့တယ်လို့ သိရပါတယ်။

ယမန်နေ့ မတ်လ ၂၅ ရက်မနက် ၈ နာရီလောက်က တိုက်ခိုက်ခဲ့တာဖြစ်ပြီး စစ်ကောင်စီနဲ့ဆက်လက်မပတ်သက်ဖို့၊ စစ်ကောင်စီတပ်တွေကိုလက်ခံမထားဖို့၊ စားနပ်ရိက္ခာထောက်ပံ့မှု လုပ်နေတာတွေကို ရပ်တန်းကရပ်ဖို့ သတိပေးတဲ့အနေနဲ့ တိုက်ခိုက်ခဲ့တာဖြစ်တယ်လို့ ဆိုပါတယ်။

“ဝမ်ပေါင်လုပ်ကွက်ထဲကို တခု၊ စစ်သားတွေစောင့်နေတဲ့ဂိတ်ကိုတခု တိုက်ခိုက်ခဲ့တယ်၊ ဝမ်ပေါင်က စစ်သားတွေလက်ခံတယ်၊ စစ်ကြောင်းလာရင် ဝမ်ပေါင်က ကားတွေနဲ့ အကြိုအပို့လုပ်တယ်၊ ရိက္ခာတွေပေးတယ်၊ ဝမ်ပေါင်ထဲကနေ ဘေးနားကရွာတွေကို စစ်ကြောင်းထိုး မီးရှို့တာတွေလုပ်တယ်၊ ကုမ္မဏီက အကြီးကဲတွေအနေနဲ့ ဒါမျိုးတွေဆက်လုပ်နေမယ်ဆို ကျနော်တို့က စပြီးတိုက်ခိုက်တော့မှာပါ” လို့ Salingyi Special Task Force တာဝန်ခံ ကိုဖိုးဇေက ပြောပါတယ်။

မတ်လ ၂၄ ရက်မှာ မုံရွာကနေထွက်လာတဲ့စစ်ကြောင်းကို ဝမ်ပေါင်ကုမ္မဏီထဲမှာရှိတဲ့ စစ်တပ်သုံးကားတွေနဲ့ သွားကြိုတဲ့အပြင် ကုမ္မဏီမှာညအိပ်နားပြီးနောက် မတ်လ ၂၅ ရက်နေ့မှာတော့ ဆားလင်းကြီးမြို့ပေါ်မှာ ၃ နေရာခွဲကာနားပြီး ရွာတွေကို စစ်ကြောင်းထိုးဖို့ ပြင်နေတယ်လို့ သိရပါတယ်။

ဒါ့အပြင် အဆိုပါဝမ်ပေါင်ကြေးနီကုမ္မဏီဟာ စစ်ကောင်စီတပ်တွေ စစ်ကြောင်းထွက်ရင် တပ်သားတွေစားဖို့ ထမင်းဘူးတွေ ထုပ်ပေးလေ့ရှိပြီး ဝမ်ပေါင်ထဲကနေထွက်ပြီး ရွာတွေကို စစ်ကြောင်းထိုးမီးရှို့နေတာ ၄ ကြိမ်ရှိပြီလို့ ဆိုပါတယ်။

“ကုမ္မဏီအနေနဲ့ သီးသန့်ရပ်တည်နေမယ်ဆို တိုက်ခိုက်စရာအကြောင်းမရှိဘူး၊ တိုက်ဖို့ဆန္ဒလည်းမရှိဘူးဗျ၊ စစ်ကောင်စီကို အထောက်ပံ့ဖြစ်စေတဲ့ အရာတွေလုပ်နေလို့ တိုက်ခိုက်ရတာ၊ ဝမ်ပေါင်ထဲကထွက်ပြီးစစ်ကြောင်းထိုးတာ ၄ ခေါက်ရှိပြီ၊ အဲ့စစ်ကြောင်းတွေအတွက် ရိက္ခာလုပ်ပေးတယ်၊ ရှေ့ ၃ ခေါက်‌က ကျောက်ဖြူတိုင်၊ မိုးကြိုးပြင်၊ ဖောင်းကတာ အဲ့ရွာတွေ မီးရှို့ခံရတယ်” လို့ ပြောပါတယ်။

အဆိုပါ Myanmar Wanbao Mining Copper Limitedဟာ စစ်အာဏာသိမ်းတဲ့ ၂၀၂၁ ခုနှစ် ဖေဖော်ဝါရီ လလယ်လောက်ကတည်းက ဝန်ထမ်းတွေ CDM လုပ်လို့ ကုမ္မဏီပိတ်ထားခဲ့တာဖြစ်ပြီး အခုကတော့ စစ်ကောင်စီတပ်တွေ အဝင်ထွက်ပြုလုပ်နေတဲ့နေရာတခုဖြစ်နေပြီလို့ သိရပါတယ်။

ဘုတလင်၊ မတ် ၂၅၊ ၂၀၂၃။

စစ်ကိုင်းတိုင်း၊ ဘုတလင်မြို့နယ် ဆုံကုန်းရွာကို စစ်ကောင်စီတပ်သားတွေ တိုက်ပွဲမရှိပဲ စစ်ကြောင်းထိုးဝင်လာပြီး မသန်စွမ်းအမျိုးသမီးတဦးအပါအဝင် ပြည်သူ ၇ဦးကိုသတ်ပြီး ရွာကိုပါ မီးရှို့သွားခဲ့ပါတယ်။

အင်အား ၅၀ကျော်ပါတဲ့ စစ်ကြောင်းဟာ မတ်လ ၂၅ရက် ဒီနေ့မနက် ၇နာရီခွဲလောက်မှာ ဘုတလင်မြို့ရဲစခန်းကနေ အနောင်တောင်ဘက် ၅မိုင်လောက်အကွာမှာရှိတဲ့ ဆုံကုန်းရွာကို ဝင်လာပြီး အသက် ၅၀ ကျော် ၆၀ဝန်းကျင် အမျိုးသမီး ၅ဦးနဲ့ အမျိုးသား ၂ဦးကို သတ်သွားခဲ့တာဖြစ်တယ်လို့ ဒေသခံတဦးက ပြောပါတယ်။

“စစ်ကြောင်းလာရင် တရွာလုံးထွက်ပြေးနေကြ။ စစ်ကောင်စီတပ်တွေ အကြမ်းဖက်သတ်ဖြတ်သွားတဲ့သူတွေထဲမှာ အမျိုးသမီးနှစ်ဦးက မျက်မမြင်တဦးနဲ့ ကင်ဆာဝေဒနာ တဦးပါ” လို့ ဒေသခံ အမျိုးသားတဦးက ဆိုပါတယ်။

အဲ့ဒီလို့ မီးရှို့ သတ်ဖြတ်တာတွေ လုပ်ခဲ့တဲ့ စစ်ကြောင်းဟာ တနာရီအကြာမှာ ဘုတလင်မြို့ထဲပြန်ဝင်သွားခဲ့ပြီး မီးလောင်ကျန်ခဲ့တဲ့ရွာကိုတော့ ရွာသားတွေက ဝိုင်းဝန်းငြိမ်းသတ်ခဲ့ရတယ်လို့ ဆိုပါတယ်။

အာဏာသိမ်းပြီးချိန်စလို့ လက်ရှိအချိန်ထိ စစ်ကောင်စီတပ်ဟာ ဘုတလင်မြို့နယ်ထဲ ကျေးရွာစုစုပေါင်း ၂၂ရွာနဲ့ ပြည်သူနေအိမ်ပေါင်း ၇၀၀ ကျော်မီးရှို့ခဲ့တယ်လို့ သိရပါတယ်။

ဝက်လက်၊ မတ် ၂၅၊ ၂၀၂၃။

စစ်ကိုင်းတိုင်း၊ ရွှေဘိုခရိုင်၊ ဝက်လက်မြို့နယ်၊ စိုင်နိုင်ကြီးကျေးရွာက ဒေသခံတွေကို စစ်ကောင်စီတပ်သားတွေက မတ်လ ၂၅ ရက် ဒီမနက် ၉ နာရီလောက်မှာ ဖမ်းဆီးခေါ်ဆောင်သွားတယ်လို့ သိရပါတယ်။

အင်အား ၃၀ ကျော်ပါတဲ့ စစ်ကောင်စီစစ်ကြောင်းဟာ ရွာသာကြီးရွာကနေတဆင့် စိုင်နိုင်ကြီးရွာထဲကိုဝင်ရောက်လာပြီး ဒေသခံတွေကိုဖမ်းဆီးသွားတာလို့ ရွှေဘိုမြို့နယ်သတင်းမှန်ပြန်ကြားရေး တာဝန်ရှိသူက ပြောပါတယ်။

“ရွာထဲကိုဝင်လာတဲ့အချိန် လက်နက်ငယ်တွေရော၊ လက်နက်ကြီးတွေရော ပစ်ခတ်ခဲ့တယ်။ ရွာသားတွေကိုလည်း ဘာကြောင့်ဖမ်းခေါ်သွားတာလဲတော့ မသိပါဘူး၊ လူဦးရေအတိအကျတော့ မပြောနိုင်ပေမဲ့ ၁၀ ဦးထက်မနည်း အဖမ်းခံရတာပါ။ အခုချိန်ထိရွာသားတွေလည်း ရွာထဲကို ပြန်ဝင်မရဲသေးဘူး” လို့ ဆိုပါတယ်။

ဖမ်းဆီးခံရသူအရေအတွက်နဲ့ အသေးစိတ်အချက်အလက်တွေကိုတော့ မြေလတ်အသံက ဆက်လက်စုံစမ်းနေဆဲပါ။

အဲ့ဒီစစ်ကြောင်းဟာ လက်ရှိ ရွှေဘိုမြို့နယ်၊ ဘုန်းဘွဲ့ရွာအနီးမှာ ရောက်ရှိနေတာကြောင့် ရွှေဘို − မန္တလေးလမ်းပိုင်းကို အသုံးပြုနေကြတဲ့ ပြည်သူတွေအနေနဲ့ မြေပြင်စစ်ရေးသတင်း နားစွင့်ပြီး အထူးသတိပြု သွားလာကြဖို့နဲ့ ဖြစ်နိုင်မည်ဆိုလျှင် အရေးပေါ် ကျန်းမာရေးကိစ္စကလွဲပြီး လုံးဝဖြတ်သန်းသွားလာ အသုံးမပြုဖို့ ရွှေဘိုမြို့နယ် သတင်းမှန်ပြန်ကြားရေးက ထုတ်ပြန်ထားပါတယ်။

မတ်လ ၃ ရက်ကလည်း စိုင်နိုင်ကြီးရွာဟာ အိမ်ခြေ ၇၀ နီးပါးကို စစ်ကောင်စီတပ်ဖွဲ့က မီးရှို့ဖျက်ဆီးသွားတာကြောင့် စပါးတင်း ၇ ထောင်ကျော် မီးလောင်ပျက်စီးခဲ့ရပါသေးတယ်။

ရွှေဘို၊ မတ် ၂၅၊ ၂၀၂၃။

စစ်ကိုင်းတိုင်း၊ ရွှေဘိုမြို့နယ်၊ မြောင်းကြီးကျေးရွာကို မီတာခတွေ လာကောက်တဲ့စစ်အုပ်စုကို စက်မှုဇုန်အနားမှာ မိုင်းဆွဲတိုက်ခိုက်ခဲ့တယ်လို့ Buffalo Soldiers Freedom Force အဖွဲ့ဆီက သိရပါတယ်။

ယမန်နေ့ မတ်လ ၂၄ ရက်နေ့က လေ့ကျင့်ရေး ၈ ထဲက ကား ၄ စီးနဲ့ထွက်လာပြီး နေ့လည် ၂ နာရီခွဲခန့် စက်မှုဇုန်နားအရောက်မှာ အခုလိုမိုင်းဆွဲတိုက်ခိုက်ခဲ့တာလို့ ဆိုပါတယ်။

“Center ၁ စီး Mark 2 ၁ စီး Pardo ၁ စီးတို့နဲ့ အင်အား ၂၀ လောက်ပါတယ်။ ရှေ့ထိပ်နောက်ထိပ်ကို ပါဆယ်မိုင်း ၃ လုံးစီချတာ။ မိုင်းအထုပ်မြင်လို့ ကားကိုရပ်ပြီး ကားပေါ်ကနေ လက်နက်ကိုင် ၂ ကောင်က ဆင်းလာတဲ့အချိန် ဆွဲလိုက်တာမှာ အဲဒီ ၂ ကောင်က ပွဲချင်းပြီး သေတယ်။ ကျန်တဲ့မိုင်းက ကားကိုခွဲလိုက်တာမှာ ၃ ကောင် ဒဏ်ရာရတယ်လို့ သိရတယ်” လို့ Buffalo Soldiers Freedom Force က ဗိုလ်ကျွဲကြီးက ပြောပါတယ်။

မိုင်းဆွဲခံရပြီး စက်မှုဇုန်အနီးမှာ စစ်ကောင်စီတပ်သားတွေက သေနတ်တွေ ပတ်ဝန်းကျင်ကို ပစ်ခဲ့တယ်လို့ သိရပါတယ်။

အဲဒီမိုင်းဆွဲတိုက်ခိုက်မှုကို Buffalo Soldiers Freedom Force နှင့် SBDF စခန်းခွဲ ၂ တို့က ပူးပေါင်းလုပ်ဆောင်ခဲ့တာလို့ သိရပါတယ်။

ပြီးခဲ့တဲ့ မတ်လ ၃ ရက်ကလည်း ရွှေဘိုခရိုင်၊ ဝက်လက်မြို့နယ်၊ စိုင်နိုင်ကြီး၊ စိုင်နိုင်လေးရွာမှ ပြည်သူပိုင်အိုးအိမ်များကို မီးရှို့ဖျက်ဆီးတဲ့စစ်ကြောင်းကို ရွှေဘိုမုဒ်ပေါက်အနီး ဇီးတောနဲ့ တဂဏန်းရွာအကြားမှာ Buffalo Soldiers Freedom Force အဖွဲ့က မိုင်းဆွဲတိုက်ခိုက်ခဲ့ရာ စစ်သား ၈ ဦး ဒဏ်ရာရခဲ့တယ်လို့ သိရပါတယ်။

တမူး၊ မတ် ၂၄၊ ၂၀၂၃။

စစ်ကိုင်းတိုင်း(အထက်ပိုင်း)၊ တမူးမြို့နယ်၊ စစ်ကောင်စီလက်အောက် ဘုက္ကန်ရွာနယ်မြေရဲစခန်းကို မတ်လ ၂၄ ရက် ဒီကနေ့ မနက်အစောပိုင်းမှာ တမူးအမျိုးသားလွတ်မြောက်ရေးတပ်တော်-NLA က ဝင်ရောက်စီးနင်း တိုက်ခိုက်ခဲ့တယ်လို့ သိရပါတယ်။

ရဲစခန်းစီးနင်းစဉ်မှာ စခန်းအတွင်းမှာရှိတဲ့ စစ်ကောင်စီလက်အောက် ရဲတပ်ဖွဲ့ဝင်တွေက လက်နက်ချအညံ့ခံတာကြောင့် ဘုက္ကန်နယ်မြေရဲစခန်းမှူးအပါ ရဲ ၆ ဦး အရှင်ဖမ်းမိခဲ့သလို စခန်းမှာရှိတဲ့ လက်နက်တွေလည်း သိမ်းဆည်းနိုင်ခဲ့တယ်လို့ တမူး PDF တပ်ရင်းဌာနချုပ်တာဝန်ရှိသူတဦးက မြေလတ်အသံကို ပြောပါတယ်။

“မနက်မိုးမလင်းခင် ဝင်စီးတာ၊ စခန်းသိမ်းနိုင်တယ်။ ရဲ ၂ ယောက် ထွက်ပြေးသွားတယ်။ စခန်းမှူးအပါ ၆ ယောက် အဖမ်းခံတယ်။ သေနတ်တွေ သိမ်းဆည်းရှိခဲ့တယ်။ ဖမ်းမိတဲ့ရဲတွေရဲ့ အဆင့်၊ နာမည်တွေ၊ အသက်တွေ အသေးစိတ်ကိုတော့ မသိရသေးဘူး” လို့ သူက ပြောပါတယ်။

ရဲစခန်းစီးနင်းသိမ်းပိုက်မှုမှာ ရဲတပ်သားတွေ ကိုင်ဆောင်တဲ့ G-3 ၅ လက်၊ အူဇီ ၂ လက်၊ ကာဘိုင် ၂ လက်၊ ခါးချိုးတတောင့်ထိုးတူမီးတွေအပြင် ကျည်ဆံအများအပြား၊ စကားပြောစက်နဲ့ တခြားစစ်ဖက်ဆိုင်ရာပစ္စည်းတွေကိုလည်း သိမ်းဆည်းရရှိခဲ့ကာ ရဲစခန်းကိုလည်း မီးရှို့ဖျက်ဆီးနိုင်ခဲ့တယ်လို့ ဆိုပါတယ်။

တမူးအမျိုးသားလွတ်မြောက်ရေးတပ်တော်- National Liberation Armyဟာ ယခင်က တမူး PDF တပ်ရင်း-၃ အဖြစ် လှုပ်ရှားခဲ့တာဖြစ်ပြီး မတ်လ ၅ရက်နေ့ကစတင်ကာ N.L.A အဖြစ် အမည်ပြောင်းလဲဖွဲ့စည်းခဲ့တာဖြစ်ကာ ဝောာ်လှန်ရေးကိုအရှိန်အဟုန်မြှင့်ပြီး လုပ်ဆောင်သွားမှာ ဖြစ်တယ်လို့ သိရပါတယ်။

စာတည်း- ရင်ငြိမ်း