ကန့်ဘလူ၊ စက်တင်ဘာ ၂၆၊ ၂၀၂၆။

စစ်ကိုင်းတိုင်း၊ ကန့်ဘလူမြို့နယ်၊ ထန်းတပင်ကျေးရွာမှာ နာရေးနှစ်ပတ်လည်လုပ်နေတဲ့ ဘုန်းကြီးကျောင်းဒရုန်းဗုံးကျပြီး ကျောင်းထိုင်ဆရာတော်အပါ ၂ ဦးဒဏ်ရာရတယ်လို့ ကန့်ဘလူမြို့နယ်ပကဖတာဝန်ရှိသူတွေထံက သိရပါတယ်။

စက်တင်ဘာလ ၂၆ ရက် မနက် ၉ နာရီ မိနစ် ၂၀ ခန့်မှာ ဇီးကုန်းသကြားစက်မှာ တပ်စွဲထားတဲ့ စစ်တပ်ကနေ ဒရုန်းနဲ့ ဘုန်းကြီးကျောင်းပေါ်ကို ဗုံးတလုံးချခဲ့တာလို့ ဆိုပါတယ်။

“မနှစ်က ရွာကအမျိုးသမီးတယောက် စစ်တပ်ကဖမ်းပြီး သတ်ဖြတ်လိုက်တာရှိတယ်။ အဲဒါကို ဒီနေ့ နှစ်ပတ်လည် ဆွမ်းကျွေး၊ ကုသိုလ်အမျှတမ်းပေးဝေတာ လုပ်နေတာ။ လုပ်နေတာက ကျောင်းမှာလုပ်နေတာကိုး။ ဗုံးက ကျောင်းပေါ်တည့်တည့်ကျတာ”လို့ ကန့်ဘလူမြို့နယ်ပကဖတာဝန်ရှိသူက ပြောပါတယ်။

ဗုံးထိမှန်တာကြောင့် သက်တော် ၅၀ အရွယ်ကျောင်းထိုင်ဆရာတော်နဲ့ အမျိုးသမီး ၁ ဦး ဗုံးစထိမှန်ဒဏ်ရာရပြီး ဘုန်းကြီး
ကျောင်းလည်းပျက်စီးမှု ရှိခဲ့ပါတယ်။

ဘုန်းကြီးကျောင်းပေါ် ဗုံးကျရောက်ပေါက်ကွဲတာကြောင့် တရားနာ ရောက်နေသူတွေလည်း ကျောင်းပေါ်ကနေ ထွက်ပြေးတိမ်းရှောင်ကြရတယ်လို့ ဆိုပါတယ်။

စစ်တပ်ဘက်က ဗုံးလာကြဲချိန်မှာ ကျေးရွာအနီးဝန်းကျင်မှာ တိုက်ပွဲဖြစ်တာမျိုးမဟုတ်ဘဲ ကျေးရွာဘုန်းကြီးကျောင်းကိုသာ ဦးတည်ပြီး ဗုံးချခဲ့တာလို့ သိရပါတယ်။

ဩဂုတ်လ ၂၀ ရက်ကလည်း ကန့်ဘလူမြို့နယ်၊ ရင်ခတ်ကုန်းကျေးရွာရှိ စတားလင့်သုံးနေတဲ့နေရာနဲ့ ရင်ခပ်ကုန်း၊ သပြေသာကျေးရွာကြားရှိ စစ်ရှောင်တွေနေတဲ့ ဘုန်းကြီးကျောင်း ဗုံးကြဲခံရလို့ သံဃာတပါးအပါအဝင် ၂ ဦးသေပြီး ၁ ဦးဒဏ်ရာရခဲ့တယ်လို့ သိရပါတယ်။

အမျိုးသားဖြစ်သူ ဒဏ်ရာတွေနဲ့ထွက်ပြေးလွတ်မြောက်လာ

မြေလတ်အသံ၊ အောက်တိုဘာ ၁၇၊ ၂၀၂၅။

စစ်ကိုင်းတိုင်း၊ ကန့်ဘလူမြို့နယ်ရှိ ပျူစောထီးဂိတ်မှာ ဖမ်းဆီးခံလိုက်ရတဲ့ လင်မယား ၂ ဦးထဲက အမျိုးသမီးကို ပျူစောထီးတွေက အဓမ္မပြုပြီး ပစ်ခတ်ခဲ့တာကြောင့် သေဆုံးခဲ့ပြီး အမျိုးသားဖြစ်သူကတော့ ထွက်ပြေးလွတ်မြောက်လာခဲ့တယ်လို့ ကန့်ဘလူခရိုင်အမှတ် ၃ တပ်ရင်းကပြောပါတယ်။

အဆိုပါလင်မယား ၂ ဦးမှာ ကောလင်းမြို့နယ်၊ ညောင်ကုန်းကျေးရွာမှ ၃၈ နှစ်အရွယ် ကိုကျော်မျိုးနဲ့ ၃၃ နှစ်အရွယ် မအေးမာဦး တို့ဖြစ်ပြီး ၎င်းတို့ဟာ ရွှေဘို-မြစ်ကြီးနားလမ်းပိုင်းပေါ်ရှိ စံပယ်နံ့သာ ပျူစောထီးအထိုင်စခန်းဂိတ်မှာ အောက်တိုဘာ ၁၆ ရက်မနက် ၉ နာရီကျော်က ဖမ်းဆီးခံလိုက်ရတာလို့ ဆိုပါတယ်။

“သူတို့က ကထိန်ခင်းဖို့အတွက် တန့်ဆည်ကိုသွားတာ။ ဆိုင်ကယ်နဲ့ပေါ့။ စံပယ်နံ့သာ အရောက်မှာ ဖမ်းခံရတာ။ ကိုကျော်မျိုးနဲ့ မအေးမာဦးကို ဝါးနှစ်ပြန်အကွာ တယောက် တနေရာစီခွဲထားတယ်။ မအေးမာဦးကို ပျူတွေက တကောင်ပြီးတကောင် မုဒိမ်းကျင့် ကြတယ်။ အော်ဟစ်သံတွေတောင်ကြားရတယ်တဲ့။ ပြီးတော့ ပစ်သတ်လိုက်တာ”လို့ ကိုကျော်မျိုးရဲ့ပြောဆိုချက်ကို ကိုးကားပြီး ကန့်ဘလူခရိုင်အမှတ် ၃ တပ်ရင်းမှတာဝန်ရှိ သူတဦးက ပြောပါတယ်။

အဲ့ဒီနေ့ညနေ ၅ နာရီကျော်မှာ အရက်မူးနေတဲ့ ပျူစောထီး ၃ ဦးက ကိုကျော်မျိုးကို ရိုက်နှက်နှိပ်စက်ပြီး လက်ပြန်ကြိုးတုပ်ကာ ချောင်းကမ်းစပ်အနီးမှာ ပစ်သတ်ဖို့ရာ ဒူးထောက်ခိုင်းထားချိန် ချောင်းထဲကို ခုန်ချပြီး ထွက်ပြေးခဲ့တာလို့ပြောဆိုကြောင်း အထက်ပါတာဝန်ရှိသူကဆိုပါတယ်။

ကိုကျော်မျိုးမှာ ရိုက်နှက်နှိပ်စက်ခံခဲ့ရတာကြောင့် မျက်နှာပြင်တခုလုံး ညိုမဲစွာ ဖူးရောင်နေသလို လက်ကောက်ဝတ်နှစ်ခုစလုံးမှာလည်း မီးလောင်ဒဏ်ရာတွေ၊ ဦးခေါင်းမှာ ပေါက်ပြဲဒဏ်ရာ၊ ကျောကုန်းမှာ ညိုမဲစွဲ ဒဏ်ရာတွေနဲ့ အောက်တိုဘာ ၁၇ ရက်မနက် ၇ နာရီခန့်မှာ ကန့်ဘလူခရိုင်အမှတ် ၃ တပ်ရင်းဆီကို ရောက်ရှိလာခဲ့တာလို့ အထက်ပါတာဝန်ရှိသူက ဆိုပါတယ်။

ဒါ့အပြင် ဖမ်းဆီးခံရချိန်မှာတော့ ပျူစောထီးတွေက ဆွဲသီးပါ ရွှေဆွဲကြိုး ၂ ကုံး၊ ၁ ကျပ်သားရွှေအခဲ ၁ ခဲ၊ နားကပ် ၁ ရံ၊ လက်ကောက် ၁ ကွင်းအပါအဝင် စုစုပေါင်း ရွှေ ၃ ကျပ်သားနဲ့ ငွေသား ၇ သိန်း၊ ဖုန်း ၃ လုံး၊ ဆိုင်ကယ် ၁ စီး ယူဆောင်ထားတယ်လို့ သိရပါတယ်။

ပြီးခဲ့တဲ့အောက်တိုဘာ ၁၃ ရက်ကလည်း ရွှေဘိုကနေ တနိုင်းဘက်ကိုထွက်ခွာလာတဲ့ ကား ၁ စီးပေါ်ကနေ လူငယ်အမျိုးသား ၉ ဦးကို စံပယ်နံ့သာ ပျူစောထီးဂိတ်ကနေ ဖမ်းဆီးခဲ့တာကြောင့် ခရီးသွားပြည်သူတွေအနေနဲ့ ခရီးသွားလာချိန် စကမတပ်စခန်းတွေရှိရာနေရာတွေကို သတိပြုရှောင်ရှားသွားလာကြဖို့ ကန့်ဘလူခရိုင် အမှတ် ၃ PDF တပ်ရင်းက အသိပေးထားပါတယ်။

စာတည်း – လင်း

အောင်စိုး၊ ကျော်ကြီး

မြေလတ်အသံ၊ စက်တင်ဘာ ၂၂၊ ၂၀၂၅။

စစ်ကိုင်းတိုင်း၊ ကန့်ဘလူမြို့နယ်က လူနေအိမ်ရာနဲ့ချီမီးရှို့ခံထားရတဲ့ ကျီစုကျေးရွာကို စစ်ကော်မရှင်တပ်က စက်တင်ဘာ ၂၂ ရက်ဒီမနက် ၁ နာရီကျော်မှာ ဗုံးကြဲတိုက်ခိုက်ခဲ့တာကြောင့် အမျိုးသမီး ၁ ဦးသေဆုံး ပြီး ၁၇ ဦးဒဏ်ရာရရှိခဲ့တယ်လို့ ဒေသခံတွေ ဆီကသိရပါတယ်။

တိုက်ခိုက်ရေးလေယာဥ် ၁ စီးနဲ့ ကျီစုရွာကိုပေါင် ၅၀၀ ဗုံးသီး ၂ လုံးကြဲချခဲ့ရာ အသက် ၆၄ နှစ်အရွယ် ဒေါ်သန်းအေး သေဆုံးပြီး နောက်ထပ်ဒေသခံ ၁၇ ဦးထိခိုက်ဒဏ်ရာရရှိခဲ့ကာ လူနေအိမ် ၂ လုံး နဲ့ စာသင်ဆောင်တို့ ပျက်စီးခဲ့တယ်လို့ သိရပါတယ်။

“ဒဏ်ရာရတဲ့ ပြည်သူ ၁၇ ယောက်မှာ ၅ ယောက်က ဒဏ်ရာပြင်းထန်လို့ အသက်အန္တရာယ်စိုးရိမ်ရတယ်ဗျ။ ကျန်တဲ့ ၁၂ ယောက်ကတော့ အသက်အန္တရာယ်မစိုးရိမ်ရဘူး။ အဲဒီ ၁၂ ယောက်ထဲမှာ ၇ ယောက်က တခြားရွာကနေ စစ်ရှောင်လာနေကြတာ”လို့ ကျွန်းလှ ကန့်ဘလူတက်ကြွလှုပ်ရှားသူများအဖွဲ့-ကန့်ဘလူခရိုင်မှ တာဝန်ရှိသူတဦးက ပြောပါတယ်။

ဒါ့အပြင် ခင်ဦးမြို့နယ်က စစ်ဘေးတိမ်းရှောင်လာသူတွေနဲ့ ကျီစုရွာခံတွေဖြစ်တဲ့ အသက် ၈ နှစ်ကနေ ၆၄ ကျော် အရွယ်ရှိ အမျိုးသား ၁၀ ဦး၊ အမျိုးသမီး ၇ ဦးတို့ထိခိုက်ဒဏ်ရာရသွားတယ်လို့ ကန့်ဘလူမြို့နယ်ပြည်သူ့ကာကွယ်ရေးအဖွဲ့ က ရရှိထားတဲ့အချက်အလက်တွေအရ သိရပါတယ်။

ဒီတိုက်ခိုက်မှုနဲ့ပတ်သက်ပြီး ရေဦးအခြေစိုက် People’s Defense Comradeက တာဝန်ရှိသူတဦးကလည်း “ကျီစုရွာတောင်ပိုင်း ဘုန်းကြီးကျောင်းအပြင်ဘက် ၁ လုံး၊ ရွာမြောက်ပိုင်း စာသင်ကျောင်းအနီးတစ်လုံး ကျရောက်ပေါက်ကွဲခဲ့တယ်လို့ သိရတယ်။ စစ်ကြောင်းထိုးနေတာလည်းမရှိဘူး တိုက်ပွဲဖြစ်ထားတာလည်း မရှိပါဘူး။” လို့ ပြောပါတယ်။

အိမ်ခြေ ၈၇၀ ကျော်ရှိတဲ့ ကျီစုကျေးရွာကို စစ်ကော်မရှင်တပ်က ပြီးခဲ့တဲ့ ၂၀၂၂၊ ဇူလိုင်နဲ့ နိုဝင်ဘာလ တို့မှာ ၂ ကြိမ်တိုင်တိုင် ဝင်ရောက်မီးရှို့ခဲ့တာကြောင့် လူနေအိမ် ၇၀၀ ခန့် ပြာကျပျက်စီးခဲ့တယ်လို့ သိရပါတယ်။

ဒါ့အပြင် ၂၀၂၂၊ ဇူလိုင်လအတွင်းမှာလည်း စစ်ကော်မရှင်တပ်တွေက နေအိမ်အဆောက်အဦတွေကို မီးရှို့ဖျက်ဆီးခဲ့တဲ့အပြင် ကျီစုရွာထဲမှာ အစ္စလာမ်ဘာသာဝင်လူငယ် ၁၀ ဦး၊ ဗုဒ္ဓဘာသာဝင်လူငယ် ၁၅ ဦးထက်မနည်းကို အစုလိုက်အပြုံလိုက်သတ်ဖြတ်ခဲ့တယ်လို့ ရေဦးအခြေစိုက် People’s Defense Comradeက တာဝန်ရှိသူတဦးက ပြောပါတယ်။

မီးရှို့ခံရပြီးနောက် ၁ နှစ်ကျော်ကြာ စစ်ဘေးရှောင်နေခဲ့ကြတဲ့ကျီစုရွာမှ ဒေသခံတွေဟာ ၂၀၂၄ မှာ ကျေးရွာအတွင်း ပြန်လည်ဝင်ရောက်ကာ ပျက်စီးနေအိမ်အစား တပိုင်တနိုင် တဲအိမ်တွေ ဆောက်လုပ်ကာ ပြန်လည်နေထိုင်ခဲ့ကြတာလို့ သိရပါတယ်။

ကျီစုကျေးရွာဟာ ကန့်ဘလူမြို့နယ်အနောက်တောင်ဘက်ခြမ်းမှာရှိပြီး ရေဦး-ခင်ဦး-ကန့်ဘလူ ၃ မြို့နယ်ချုပ်စပ်မှာရှိတဲ့ ရွာကြီးတစ်ရွာဖြစ်ကာ ဗုဒ္ဓဘာသာဝင်တွေနဲ့ အစ္စလာမ်ဘာသာဝင်တွေ စုပေါင်းနေထိုင်ကြတဲ့ ကျေးရွာဖြစ်ပါတယ်။

ပြီးခဲ့တဲ့ စက်တင်ဘာ ၂ ရက်ကလည်း ကန့်ဘလူမြို့နယ်၊ ကျွန်းလှမြို့နယ်၊ ကုန်းကြီးကျေးရွာအနီးရှိ တောအတွင်းတွေကို တိုက်ခိုက်ရေးလေယာဥ် ၁ စီးနဲ့ ပေါင် ၅၀၀ ဗုံးသီး ၂ လုံး၊ Y-12 နဲ့ ဗုံးသီး ၂၈လုံး အသီးသီးကြဲချတိုက်ခိုက်ခဲ့ပါသေးတယ်။

စာတည်း – လင်း

ကန့်ဘလူ၊ စက်တင်ဘာ ၁၆၊ ၂၀၂၅။

စစ်ကိုင်းတိုင်း၊ ကန့်ဘလူမြို့နယ်၊ ဘူးကုန်းလမ်းခွဲမှာ အထိုင်ချထားတဲ့ စစ်ကော်မရှင်တပ်ဖွဲ့တွေနဲ့ ပျူစောထီးအဖွဲ့တွေက ပြည်သူ ၇ ဦးကို ဖမ်းဆီးပြီးနောက် ၆ ဦးကိုမီးရှို့သတ်ခဲ့ကာ ၁ ဦးကတော့ ထွက်ပြေးလွတ်မြောက်လာတယ်လို့ ကျွန်းလှ ကန့်ဘလူတက်ကြွလှုပ်ရှားသူများအဖွဲ့-ကန့်ဘလူခရိုင် တာဝန်ရှိသူတွေဆီက သိရပါတယ်။

သတ်ဖြတ်ခံရသူတွေက ငှက်ပျောတိုင်ရွာဟောင်းသားတွေဖြစ်တဲ့ ၄၅ နှစ်အရွယ် ဦးစိုးတင့်၊ ၂၃ နှစ်အရွယ် ကိုချစ်သဲမောင်၊ ကိုသန်းဇော်ထွန်း၊ ၁၈ နှစ်အရွယ် ကိုရီဝေမိုး၊ ၁၆ နှစ်အရွယ်မိုးသက်ခ၊ ၁၅ နှစ်အရွယ်အမျိုးသား ၁ ဦးနဲ့ ၁၄ နှစ်အရွယ် ချမ်းဖြိုးဝေတို့ဟာ ဖမ်းဆီးခံခဲ့ရတာပါ။

အဲ့ဒီထဲက ၆ ဦးကတော့ စက်တင်ဘာ ၁၂ ရက်မှာ ဘူကုန်းကျေးရွာဘုန်းကြီးကျောင်းဝင်းအတွင်း မီးရှို့သတ်ဖြတ်ခံခဲ့ရပြီး ၁၅ နှစ်အရွယ်ကလေး ကတော့ ထွက်ပြေးလွတ်မြောက်လာခဲ့တယ်လို့ ဆိုပါတယ်။

“သတ်မယ့်ညနေကျမှ တာယာပုံကြီးပေါ်တက်ခိုင်းတာ လက်တွေကလည်း လက်ပြန်ကြိုးတွေ တုပ်ထားတာ။ တက်ခိုင်းပြီးမှ ခေါင်းတွေထပ်ရိုက်တော့ တချို့ကျလည်းသတိလစ်သွားတယ်။ မျောသွားပြီး မရုန်းနိုင်မထနိုင်တော့ဘူးဆိုပြီး မီးတင်ရှို့တာ။ ကလေးကကျတော့ သတိမလစ်ဘဲနေတာမှ ရုန်းပြီးမှ ထွက်ပြေးလာနိုင်တာ။ သူတို့(စကစ)က မပြေးနိုင်တော့ဘူးဆိုတော့ စောင့်ကြည့်မနေတော့ဘဲ မီးရှို့တဲ့ ဟာကို ပစ်ချထားတာပေါ့” လို့ ကျွန်းလှ ကန့်ဘလူ တက်ကြွလှုပ်ရှားသူများအဖွဲ့-ကန့်ဘလူခရိုင် တာဝန်ရှိသူကပြောပါတယ်။

ဒီအခြေအနေတွေကို ထွက်ပြေးလွတ်မြောက်လာသူရဲ့ပြောပြချက်အရ ပြန်သိရတာဖြစ်ပြီး အဲ့ဒီကလေးကိုတော့ စက်တင်ဘာ ၁၂ ရက်ညပိုင်းမှာ ပြန်တွေ့ရလို့ ခေါ်ယူစောင့်ရှောက်ထားရပြီး ဒဏ်ရာတွေကို ဆေးကုသပေးနေတယ်လို့ ဆိုပါတယ်။

ထွက်ပြေးလွတ်မြောက်လာသူ ကလေးမှာလည်း စစ်ကော်မရှင်တပ်သားနဲ့ ပျူစောထီးအဖွဲ့တွေရဲ့ နှိပ်စက်မှုဒဏ်ကြောင့် ကျော၊ ပေါင်၊ ခန္ဓာကိုယ်တွေမှာ ရိုက်နှက်ခံရလို့ အရေပြားတွေကွာကျနေပြီး မျက်နှာမှာဆိုရင်လည်း ထိုးကြိတ်ခံထားရတဲ့ ဒဏ်ရာတွေကြောင့် ညိုမဲစွဲဖူးယောင်နေတယ်လို့ သိရပါတယ်။

လက်ရှိမှာတော့ ထွက်ပြေးလာတဲ့ကောင်လေးရဲ့လုံခြုံရေးအရ သူနေထိုင်ရာကျေးရွာကို ပေးမပြန်ဘဲ စိတ်ချရတဲ့နေရာတခုမှာ စောင့်ရှောက်ပေးထားတယ်လို့ ဆိုပါတယ်။

စက်တင်ဘာ ၉ ရက်မှာ ဦးစိုးတင့်ပါ အထက်ပါ အမျိုသား ၇ ဦးဟာ ဆိုင်ကယ် ၃ စီးနဲ့အတူ စဥ့်ကူးမြို့နယ်အတွင်းရှိ ရွှေမှော်တခုကနေ အလုပ်အကိုင်အဆင်မပြေတာကြောင့် ကန့်ဘလူ၊ ငှက်ပျောတိုင်းကျေးရွာ ကို ရွှေဘို-မြစ်ကြီးနားဗျူဟာလမ်းပိုင်းအတိုင်း ပြန်လာချိန် ဘူကုန်းကျေးရွာ လမ်းခွဲ ဇရပ်အရောက်မှာ အင်အား ၃၀ ကျော်လောက်ရှိတဲ့ စစ်ကော်မရှင်တပ်ဖွဲ့ဝင်တွေနဲ့ ပျူစောထီးအဖွဲ့တွေရဲ့ ဖမ်းဆီးတာကို ခံလိုက်ရတာပါ။

အဲဒီနောက် ဘူကုန်းကျေးရွာဘုန်းကြီးကျောင်းအတွင်းကို ခေါ်ဆောင်သွားပြီးနောက် အင်္ကျီတွေချွတ်ခိုင်းကာ ဝါးအစိုချောင်းတွေနဲ့ ရိုက်နှက်နှိပ်စက်မှုတွေပြုလုပ်ခဲ့ပြီး စက်တင်ဘာ ၁၂ ရက်နေ့ မီးမရှို့ခင်အချိန်အထိ ထမင်းမကျွေးဘဲ နှိပ်စက်နေခဲ့တာလို့ သိရပါတယ်။

ဩဂုတ် ၁၆ ရက်ဝန်းကျင်ကစပြီး စစ်ကော်မရှင်တပ်တွေနဲ့ ပျူစောထီးပူးပေါင်းစစ်ကြောင်းတွေဟာ ကန့်ဘလူမြို့နယ်အတွင်း အင်အားအများအပြားနဲ့စစ်ကြောင်းထိုးပြီးနောက် ရွှေဘို-မြစ်ကြီးနားဗျူဟာ လမ်းပိုင်းကို စိုးမိုးမှုအလုံးစုံရရှိရန်ကြိုးပမ်းလျက်ရှိကာ ရေကြည်ဦး၊ ဘူးကုန်းရွာလမ်းခွဲ၊ ဇီးကုန်း-မလယ်လမ်းဆုံတို့မှာ ပြန်လည်အထိုင်ချနေရာယူထားတယ်လို့ သိရပါတယ်။

စာတည်း – လင်း

ကန့်ဘလူ၊ ဩဂုတ် ၅၊ ၂၀၂၅။

စစ်ကိုင်းတိုင်း၊ ကန့်ဘလူမြို့နယ်ပကဖရဲ့ တိုက်ခိုက်ရေးတပ်ဖွဲ့ဝင် ၁ ဦး အချုပ်ကျနေချိန် ထွက်ပြေးလွတ်မြောက်သွားတယ်လို့ မြေပြင်တပ်ဖွဲ့ဝင်တွေထံက သိရပါတယ်။

ထွက်ပြေးသွားသူဟာ အသက် ၂၅ နှစ်ကျော်ရှိ ရဲဘော် Error ဆိုသူဖြစ်ပြီး အမျိုးသမီးကိစ္စကြောင့် အချုပ်ချထားချိန် ဩဂုတ် ၂ ရက်မှာ ဆေးခန်းပြသမယ် ဆိုကာ ထွက်ပြေးသွားတာလို့ ဆိုပါတယ်။

” လူမှုရေးပြဿနာနဲ့မို့ အချုပ်ခဏချထားတာ။ ကျန်းမာရေးလိုလိုဘာလိုလိုနဲ့ ဆေးဘဲမှားသောက်သလို ဝမ်းနုတ်ဆေးဘဲမှားသောက်သလိုနဲ့ ကျန်းမာရေးဖောက်တဲ့အခါ ဆေးပြဆိုပြီး ရဲဘော်တယောက်နဲ့ထည့်လိုက်တာ အဲ့ကနေလစ်သွားတာ။ အဲ့ကောင်မလေးကိုခေါ်ပြီးတော့” လို့ ထွက်ပြေးသွားတဲ့တပ်ဖွဲ့ဝင် Error နဲ့ နီးစပ်သူတဦးက မြေလတ်အသံကို ပြောပါတယ်။

ထွက်ပြေးသွားသူ Error ဟာ အိမ်ထောင်ရှိသူဖြစ်ပြီး နောက်ထပ်အမျိုးသမီးငယ်တဦးနဲ့ လူမှုရေးကိစ္စတွေဖြစ်ပေါ်နေတာကြောင့် ပကဖစခန်းအချုပ်မှာ ဖမ်းဆီးထိန်းသိမ်းထားပြီး အရေးယူဆောင်ရွက်မှုတွေလုပ်ဆောင်နေစဥ် အခုလိုထွက်ပြေးလွတ်မြောက်သွားတာဖြစ်ပြီး လက်နက်နဲ့စာရွက်စာတမ်းတွေတော့ ဆုံးရှုံးမှု မရှိဘူးလို့ သိရပါတယ်။

၎င်းဟာ ကန့်ဘလူအခြေစိုက် အမှတ် ၆၀၀၆ တင့်ကားတပ်ကို ဘက်ပြောင်းခိုလှုံသွားကြောင်း သတင်းတွေထွက်ပေါ်နေပြီး ပြန်လည်ဖမ်းမိနိုင်ရေး မြို့နယ်ပကဖအဖွဲ့ဝင်တွေနဲ့ နယ်မြေအတွင်းက ဒေသကာကွယ်ရေးအဖွဲ့ဝင်တွေက လိုက်လံရှာဖွေနေတယ်လို့ သိရပါတယ်။

ပြီးခဲ့တဲ့ ဇွန် ၂၄ ရက်ကလည် သီရိမွန်ကျေးရွာအနီးရှိ ကန့်ဘလူခရိုင်ပကဖလှုပ်ရှားစခန်းပကဖအဖွဲ့ဝင် ၁ ဦးအပါ ၂ ဦး စစ်ကောင်စီဘက်ကို ဘက်ပြောင်းခိုလှုံသွားပြီးနောက် ၁၀ ရက်အကြာ ဇူလိုင် ၄ ရက်မှာ အဆိုပါခရိုင်ပကဖစခန်း လေကြောင်းကနေဗုံးကြဲခံခဲ့ရလို့ တပ်ဖွဲ့ဝင် ၄ ဦး ပြင်းထန်ဒဏ်ရာတွေရရှိခဲ့ပါတယ်။

ပကဖတပ်ဖွဲ့ဝင် Error ထွက်ပြေးသွားပြီးနောက် ပကဖစခန်းနဲ့ ကျန်ရှိတပ်ဖွဲ့ဝင်တွေရဲ့ လုံခြုံရေးအရ ကြိုတင်ရွှေ့ပြောင်းတာတွေပြုလုပ်ပြီးဖြစ်သလို စစ်ကောင်စီတပ်ရဲ့ မြေပြင်ထိုးစစ်ထက် စခန်းတည်နေရာတွေကို လေကြောင်းကနေ ဗုံးလာကြဲနိုင်တဲ့အခြေအနေကို ပိုမိုစိုးရိမ်ရတာမျိုးရှိနေတယ်လို့ ၎င်းက ဆိုပါတယ်။

စာတည်း – ဟိန်းစံ