ကျော်ကြီး

ပေါင်းတည်၊ ဇူလိုင် ၁၊ ၂၀၂၆

ပဲခူးတိုင်း၊ ပေါင်းတည်မြို့နယ်၊ တောင်ခမောက်ရွာနဲ့ လက်ပံခုန်ရွာကြားကို လေကြောင်းကနေ ဗုံးကြဲတာကြောင့် အသက် ၅၀ ကျော် အမျိုးသား ၁ ဦးသေဆုံးခဲ့ရတယ်လို့ ပြည်ခရိုင်တပ်ရင်း(၁) စစ်ထောက်လှမ်းရေးနှင့် သတင်းပြန်ကြားတာဝန်ခံရဲဘော် Shadow ထံက သိရပါတယ်။

ဇူလိုင်လ ၁ ရက်နေ့ နေ့လယ် ၁၂ နာရီ ၄၅ မိနစ်ခန့်အချိန် နေပြည်တော်ကနေ တက်လာတဲ့ ဂျက်ဖိုက်တာ ၂ စီးက ကျေးရွာ ၂ ရွာကြားရှိ လမ်းပိုင်းကို ဗုံး ၄ လုံးကြဲချသွားတယ်လို့ ဆိုပါတယ်။

“အဲနေရာမှာ ဘာတိုက်ပွဲမှမရှိဘူး။ သူက အဲနေရာက တဲမှာနေတာ။ နွားတွေမွေးပြီးတော့ နို့ညှစ်ရောင်းတာ။ သူတဲနားကို ဗုံးကျပြီး အစမှန်ပြီးသေတာ။ သူတဲမှာ သူအမေနဲ့ သူနဲ့နှစ်ယောက်တည်းရှိတာ”လို့ ပြည်ခရိုင်တပ်ရင်း(၁)စစ်ထောက်လှမ်းရေးနှင့်သတင်းပြန်ကြားတာဝန်ခံရဲဘော် Shadow က ပြောပါတယ်။

ဗုံးစမှန်တာကြောင့် တောင်ခမောက်ရွာသား အသက် ၅၀ ကျော်ရှိ ဦးဆန်းမြင့်မှာ ကျောနဲ့တင်ပါးကို အစဖောက်ဝင်ပြီး၊ ရင်ဘက်မှ ဖေါက်ထွက်ကာ နေရာမှာတင် သေဆုံးသွားပါတယ်။

ဒါ့အပြင် တဲအိမ်လည်းပျက်စီးမှုအနည်းငယ်ရှိခဲ့ပြီး အသက် ၇၈ နှစ်အရွယ် မိခင်ဖြစ်သူမှာတော့ ထိခိုက်တာမရှိဘူးလို့သိရကာ ဗုံးကြဲချချိန် ကျေးရွာနှစ်ရွာက ပြည်သူအချို့ကတော့စိုးရိမ်ပြီး တိမ်းရှောင်သွားကြတာရှိတယ်လို့ သိရပါတယ်။

ပဲခူးတိုင်းအတွင်း ပြီးခဲ့တဲ့ ဇွန်လ ၆ ရက်နေ့ကလည်း ရေတာရှည်မြို့နယ်၊ နဂျပ်ကျေးရွာမှာ လေကြောင်းကနေ ဗုံးကြဲလို့ သက်ကြီးအမျိုးသား ၁ ဦးသေဆုံးခဲ့တယ် သိရပါတယ်။

စလင်း၊ ဇူလိုင် ၁၊ ၂၀၂၆။

မကွေးတိုင်း၊ စလင်းမြို့နယ်၊ ဆင်ဖြုုကျွန်းမြို့၊ အေးစုဖိုစု ရပ်ကွက်မှာ အမျိုးသမီး ၁ ဦးကို စစ်ကော်မရှင် တပ်သားတဦးက နေအိမ်ပေါ်တက်သေနတ်နဲ့ ပစ်သတ်သွားတယ်လို့မြို့ခံတွေထံက သိရပါတယ်။

ဇွန်လ ၃၀ ရက်နေ့ညနေ ၄ နာရီခန့်မှာ သရက်ချဥ်ကျေးရွာမှာ အထိုင်ချတပ်စွဲထားတဲ့ စစ်ကော်မရှင်တပ်သား သန့်ဇင်ဆိုသူဟာ အသက် ၄၀ ကျော်အရွယ် မနွယ်နီဦး နေအိမ်ကိုရောက်လာပြီးနောက် စကားများရန်ဖြစ်ကာ သေနတ်နဲ့ပစ်သတ်ခဲ့တာလို့ဆိုပါတယ်။

“သေသွားတဲ့မိန်းမက အဲစစ်သားတွေကို ထမင်းချက်ပြုတ်ကျွေးနေတဲ့သူလို့ သိရတယ်။ စစ်သားက ထမင်းချိုင့် လာယူချိန် ဘယ်လိုဖြစ်လဲမသိဘူး ပစ်သတ်သွားတယ်။ ဆေးလည်းကြောင်နေတယ်ပြောတယ်။ ထမင်းအချိန်မှီမရလို့ဖြစ်မယ်”လို့ မြို့ခံတဦးကပြောပါတယ်။

စစ်ကော်မရှင်တပ်သားက ပစ်တဲ့ ကျည်ထိမှန်လို့ အမျိုးသမီးမှာ ဦးခေါင်းပွင့်ထွက်ကာ ဦးနှောက်ထွက်ပြီး နေရာမှာတင် သေဆုံးသွားခဲ့တာ ဖြစ်ပါတယ်။

စစ်ကော်မရှင်ဘက်ကတော့ အဆိုပါ အမျိုးသမီးသေဆုံးမှုမှာ PDF တွေဘက် လာရောက်ပစ်သတ်သွားတယ်ဆိုပြီး သတင်းလွှင့်ထားတယ်လို့ ဆိုပါတယ်။

သေနတ်ပစ်ခတ်ခဲ့တဲ့ စစ်သားကိုတော့ စစ်ကော်မရှင်အဖွဲ့က ပြန်ဖမ်းသွားပြီး စလင်းတပ်နယ်ထဲကို ခေါ်ဆောင်သွားတယ်လို့ သိရပါတယ်။

ဇွန်လ ၂ ရက်နေ့ကလည်း ပွင့်ဖြူမြို့နယ်၊ မုန်းဇလဲကျေးရွာက NLD ရပ်ကျေးအလုပ်အမှုဆောင် ၁ ဦး ကျေးရွာအနီး စိုက်ခင်းထဲရှိနေချိန် ပျူစောထီးအဖွဲ့တွေက ဝင်ရောက်ပစ်ခတ်လို့ သေဆုံးသွားသေးတယ်လို့ သိရပါတယ်။

စစ်ကိုင်း၊ ဇွန် ၂၉၊ ၂၀၂၆

စစ်ကိုင်းတိုင်း၊ စစ်ကိုင်းမြို့နယ်၊ တလိုင်းကျေးရွာကို လေကြောင်းဗုံးကြဲခံရလို့ ကလေးငယ် ၃ ဦးအပါအဝင် ၈ ဦးသေဆုံးတယ်လို့ ဒေသကာကွယ်ရေးအဖွဲ့ဝင်တွေထံက သိရပါတယ်။

ဇွန်လ ၂၈ ရက်နေ့ နေ့လည် ၂ နာရီကျော်ခန့်မှာ ကျေးရွာအရှေ့ပိုင်း လူနေအိမ်တွေကြားကို တံတားဦးကနေ တက်လာတဲ့ ဂျက်ဖိုက်တာ ၁ စီး၊ MI 35 ၁ စီးတို့နဲ့ ဗုံးကြဲတိုက်ခိုက်ခဲ့တာလို့ သိရပါတယ်။

“အဲနားမှာ တိုက်ပွဲဖြစ်နေတာမျိုးတော့မရှိဘူး။ ဂေါဝိန်ဆိပ်ကနေ သူတို့ထောက်ပို့သင်္ဘောတွေတက်နေတာဆိုတော့ ရွာထဲမကြဲခင် စဉ့်ကိုင်နဲ့ တလိုင်းကြား လမ်းဆုံကို MI 35 နဲ့ အရင်ပစ်သေးတယ်။ ပြီးမှ ဖိုက်တာနဲ့ ပေါင် ၂၀၀၊ ၃၀၀ ဗုံးတွေကြဲတာ။ ရွာအရှေ့ဖျားလူနေအိမ်ပေါ်တွေကျတာ”လို့ ဒေသကာကွယ်ရေးအဖွဲ့ဝင်တဦးကပြောပါတယ်။

ဗုံးထိမှန်တာကြောင့် သေဆုံးသွားတဲ့ ကလေးငယ် ၃ ဦးမှာ အသက် ၅ နှစ်အရွယ် ယောင်္ကျားလေး ၁ ဦး၊ ၆ နှစ်အရွယ် မဂျူးဂျူး နဲ့ ၈ နှစ်အရွယ်မိန်းကလေး ၁ ဦးတို့ဖြစ်ပြီး၊ ဆယ်ကျော်သက်အရွယ် မောင်ဟန်လင်းထက် (၁၄) နှစ်နဲ့ ၂၀ အရွယ် မောင်နိုးနိုးတို့အပြင်၊ အသက် ၄၀ နှစ်အရွယ် မသန်းသန်းစိုး၊ ၅၀ နှစ်ခန့်အရွယ် ဒေါ်သင်းနဲ့ဒေါ်ဝင်းတို့ နေရာမှာတင် ပွဲချင်းပြီးသေဆုံးသွားပါတယ်။

ဒါ့အပြင် နောက်ထပ် ၅ ဦးထက်မနည်း ကျား/မ စိစစ်ဆဲဒဏ်ရာရရှိထားသူတွေလည်းရှိပြီး နေအိမ် ၁၀ လုံးကျော် ပျက်စီးသွားတယ်လို့ သိရပါတယ်။

လေယာဥ်ဗုံးကြောင့် ထိခိုက်သေဆုံးသွားသူတွေကိုတော့ ရွာခံတွေက နေ့ချင်းသဂြိုလ်လိုက်ကြပြီး ဒဏ်ရာရသူတွေကိုတော့ နီးစပ်ရာဆေးရုံဆေးခန်းတွေမှာ ဆေးကုသမှုပြုလုပ်ပေးနေကြကာ ရွာခံတွေကတော့ ထွက်ပြေးတိမ်းရှောင်နေကြရတာမျိုးမရှိဘူးလို့ သိရပါတယ်။

ပြီးခဲ့တဲ့ ဇွန်လ ၁၇ ရက်နေ့ကလည်း စစ်ကိုင်းတိုင်း၊ ဝက်လက်မြို့နယ်၊ ညောင်ပင်ကြီးတောကျေးရွာမှာ လေကြောင်းတိုက်ခိုက်ခံရလို့ကိုယ်ဝန်ဆောင်မိခင် ၁ ဦးအပါအဝင် ပြည်သူ ၄ ဦး သေဆုံးခဲ့သေးတယ်လို့သိရပါတယ်။

သတင်း-ကျော်ကြီး

■ အမျိုးသမီး ၁ ဦးသာ လွှတ်ပေးပြီး အသက် ၅၀ ကျော် အမျိုးသမီးနဲ့ အမျိုးသားတို့ ငွေပေးထားသော်လည်း ပြန်မလွှတ်သေး

ညောင်ဦး၊ ဇွန် ၂၉၊ ၂၀၂၆ ။

မန္တလေးတိုင်း၊ ညောင်ဦးမြို့နယ်၊ မြေသင်းတွင်းကျေးရွာအုပ်စု၊ လက်ပန်တဲကျေးရွာက ဒေသခံ စီးပွါးရေးလုပ်ငန်ရှင် ၃ ဦးကို လက်နက်ကိုင်အဖွဲ့တခုက ဖမ်းဆီးသွားပြီးနောက် ငွေကျပ်သိန်းရာချီတောင်းခံနေရတယ်လို့ နစ်နာသူတွေနဲ့ နီးစပ်သူတဦးထံက သိရပါတယ်။

ပြီးခဲ့တဲ့ ဇွန်လ ၂၃ ရက်က လက်ပန်တဲကျေးရွာနေအိမ်မှာရှိနေတဲ့ အသက် ၅၅ နှစ်အရွယ် ဒေါ်ဘိုရီကို လက်နက်ကိုင်အဖွဲ့က ဝင်ရောက်ဖမ်းဆီးသွားပြီးနောက် ငွေကျပ်သိန်း ၆၀၀ တောင်းခံခဲ့ကာ မိသားစုဝင်တွေက ဇွန်လ ၂၆ ရက်နေ့မှာ ငွေသွားပေးခဲ့ပေမယ့် ပိုက်ဆံကိုသာယူသွားပြီး ဇွန်လ ၂၉ ရက်နေ့အထိ ပြန်လွှတ်မပေးသေးဘူးလို့ ဆိုပါတယ်။

“အခုက (ဖမ်းခံရသူတွေက) စီးပွားရေးသမားတွေများတယ်။ ပိုက်ဆံရှိလို့ လုပ်သွားတဲ့ပုံစံရှိတယ်။ ဖမ်းဖမ်းပြီးပိုက်ဆံတောင်းတာကြီးက မကောင်းဘူး။ အခုက ပြည်သူတွေမို့လို့ပြောရတာ။ ငွေကိုတော့ မိသားစုဝင်တွေက သွားပေးရတယ်။ သူတို့ကသေနတ်နဲ့ထောက် ပိုက်ဆံယူတယ်။ ငွေလာပို့သူကိုတော့ပြန်လွှတ်တယ်” လို့ ဖမ်းဆီးငွေညှစ်ခံရသူတွေနဲ့နီးစပ်သူတဦးက မြေလတ်အသံကို ပြောပါတယ်။

အလားတူ ပြီးခဲ့တဲ့ဧပြီလ ၁၂ ရက်ည ၁၁ နာရီခန့်မှာ လက်ပန်တဲကျေးရွာနေ အသက် ၅၂ နှစ်အရွယ် လုပ်ငန်းရှင် ဦးသန်းဌေးဦးနဲ့ အသက် ၃၀ နှစ်အရွယ် စျေးရောင်းလုပ်ငန်းလုပ်ကိုင်သူ မသန်းသန်းတို့ ၂ ဦးကို အရပ်ဝတ်တွေနဲ့ လက်နက်ကိုင်အဖွဲ့ဝင် ၆ ဦးက နေအိမ်တွေကနေ အသီးသီး လာရောက်ဖမ်းဆီးခဲ့တာပါ။

ဖမ်းဆီးပြီးနောက် ဦးသန်းဌေးဦးရဲ့မိသားစုဝင်တွေက ဧပြီလ ၂၁ ရက်မှာ ဖမ်းဆီးထားတဲ့အဖွဲ့ထံ ငွေကျပ်သိန်း ၅၀၀ ပေးခဲ့ပေမယ့် ယနေ့အထိ ပြန်လည်လွတ်မြောက်မလာသေးသလို ၂ လကျော်အကြာ လက်ရှိမှာ သေဆုံးသွားပြီးလို့လည်း သတင်းတွေထွက်ပေါ်နေတယ်လို့ သိရပါတယ်။

ဦးသန်းဌေးဦးဟာ NLD အရပ်သားအစိုးရလက်ထက်က လက်ပန်တဲရွာအုပ်ချုပ်ရေးမှူးလုပ်ခဲ့သူဖြစ်ကာ စစ်အာဏာသိမ်းပြီးနောက် အုပ်ချုပ်ရေးမှူးအဖြစ်ကနေ နှုတ်ထွက်ပြီး လက်ပန်တဲရွာနဲ့ညောင်ဦးမြို့ကို လိုင်းကားပြေးဆွဲတဲ့လုပ်ငန်းလုပ်ကိုင်နေသူလည်း ဖြစ်ပါတယ်။

နောက်ထပ်ဖမ်းဆီးခံရသူ မသန်းသန်းအတွက် ဧပြီလ ၃၀ ရက်မှာ မိသားစုဝင်တွေက ဖမ်းဆီးထားသူတွေထံ ငွေကျပ်သိန်း ၂၀၀ ပေးဆောင်ခဲ့ရပြီး အဲ့ဒီနေ့မှာပဲ ပြန်လည်လွတ်မြောက်လာတယ်လို့ သိရပါတယ်။

“သူတို့ကို ဆက်သွယ်တဲ့ဖုန်း (ငွေတောင်းခံချိန်သုံးတဲ့ဖုန်းနံပါတ်)ကို တခြားတဖက်လှည့်နဲ့စုံစမ်းတော့ ဘယ်သူ့ဖုန်းဆိုတာ သိရတယ်။ ပါသွားတဲ့သူ (အဖမ်းခံရသူ) တယောက်ရဲ့ဖုန်းကိုသုံးနေတာ၊ ဘက်တံဆိပ်တွေပါနေတယ်။ သူတို့လည်းစောင့်ကြည့်နေတယ်။ သူတို့ကိုဆက်သွယ်လာတဲ့ဖုန်းတွေကို တယ်လီဂရမ်၊ viber တွေမှာ ပုံတွေပါနေတော့ တဖွဲ့တည်းဆိုတာသိရတယ်”လို့ သူကဆက်ပြောပါတယ်။

လက်ပန်တဲကျေးရွာဟာ ညောင်ဦးမြို့ရဲ့ ရှေ့ဘက် ၇ မိုင်ခန့်မှာတည်ရှိပြီး၊ အဖမ်းခံရသူ ၃ ဦးကို အရပ်ဝတ်တွေနဲ့ လက်နက်ကိုင်ဆောင်ထားတဲ့အဖွဲ့တွေက မနက်ပိုင်းတွေနဲ့ ညပိုင်းတွေမှာ လာရောက်ဖမ်းဆီးသွားတာဖြစ်တယ်လို့ သိရပါတယ်။

သူတို့ ၃ ဦးထဲက ဧပြီလ ၃၀ ရက်နေ့က ဖမ်းခံရသူ မသန်းသန်း ၁ ဦးထဲသာလွတ်မြောက်သေးပါတယ်။

လက်ပန်တဲကျေးရွာဟာ ညောင်ဦးမြို့နယ်အတွင်းက တော်လှန်ရေးတပ်တွေ ထိန်းချုပ်ထားတဲ့ နယ်မြေအတွင်းမှာတည်ရှိပြီး ကျေးရွာဒေသခံတွေ မကြာခဏဆိုသလို ဖမ်းဆီးငွေညှစ်ခံရတာနဲ့ ခြိမ်းခြောက်မှုတွေကြောင့် ရွာခံတွေကြောက်လန့်နေကြရတယ်လို့ ဆိုပါတယ်။

မြေလတ်အသံအနေနဲ့ ဖမ်းဆီးပြန်ပေးဆွဲမှုတွေနဲ့ ပတ်သက်လို့ ဘယ်အဖွဲ့အစည်းက လုပ်တယ်ဆိုတာကို သီးခြားအတည်ပြုနိုင်ခြင်း မရှိသေးပါဘူး။

အထက်ပါဖြစ်စဥ်တွေနဲ့ပတ်သက်ပြီး အခြေအနေတွေကို အသေးစိတ်မေးမြန်းနိုင်ဖို့ ညောင်ဦးမြို့နယ်ပကဖတာဝန်ရှိသူထံ မြေလတ်အသံက ဆက်သွယ်မေးမြန်းပေမယ့် ဖုန်းကိုင်ဖြေဆိုတာမျိုးမရှိသေးပါဘူး။

ညောင်ဦးနယ်တဝိုက်မှာ မကြာခဏဆိုသလို ခရီးသွားတွေ၊ ပုဂံဘုရားဖူးလာသူတွေနဲ့ ဒေသခံလုပ်ငန်းရှင်တွေ ဖမ်းဆီးငွေညှစ်တာတွေရှိနေပေမယ့်၊ ဘယ်အဖွဲ့အစည်းတွေက လုပ်နေတယ်ဆိုတာကို ဖမ်းဆီးငွေညှစ်ခံရသူတွေက ထုတ်ဖော်ပြောကြားကြတာမျိုး မရှိကြပါဘူး။

စစ်ကိုင်း၊ ဇွန် ၂၇၊ ၂၀၂၆။

စစ်ကိုင်းတိုင်း၊ ဝက်လက်မြို့နယ်နဲ့ ရွှေဘိုမြို့နယ်တို့က ကျေးရွာ ၃ ရွာမှာ စစ်ကော်မရှင်တပ်က လေကြောင်းကနေဗုံးကြဲခဲ့တာကြောင့် နေအိမ် ၁၀ လုံးပျက်စီးတယ်လို့ သက်ဆိုင်ရာမြို့နယ်ပကဖတွေနဲ့ တိုက်နယ်ပကဖ တာဝန်ရှိသူတွေဆီက သိရပါတယ်။

ဇွန် ၂၆ ရက်မနက် ၅ နာရီကျော်မှာ Y12 လေယာဥ်က ဝက်လက်မြို့နယ်၊ မြင်းသည်ကျေးရွာအနီး တောစပ်ကို ဗုံး ၆ လုံးကြဲချရာ ထိခိုက်ပျက်စီးမှုမရှိခဲ့ဘူးလို့ ဝက်လက်မြို့နယ်ပကဖတာဝန်ရှိသူဆီက သိရပါတယ်။

အဲဒီနောက်တဆက်တည်းဆိုသလို ရွှေဘိုမြို့နယ်၊ ရေတော်မူကျေးရွာကို ဗုံး ၄ လုံး ကြဲချရာ ၂ လုံးပေါက်ကွဲခဲ့သလို တက်တူကျေးရွာကို ၆ လုံးကြဲချခဲ့ရာ ၆ လုံးစလုံးပေါက်ကွဲခဲ့တာလို့လည်း ရွာခံကာကွယ်ရေးအဖွဲ့ဝင်တဦးက ပြောပါတယ်။

“မြင်သည်ဘက်က လေကြောင်းတိုက်ခိုက်မှုလုပ်တယ်လို့ သိသိချင်း ဗုံးခိုကျင်းတွေထဲ ဝင်ခိုင်းလိုက်တော့ လူထိခိုက်မရှိလိုက်ဘူး။ အိမ်တွေကြားကိုချတာဆိုတော့ အိမ်ထိခိုက်ပျက်စီးတော့ရှိတယ်။ “လို့ ရွာခံကာကွယ်ရေးအဖွဲ့ဝင်တဦးက ပြောပါတယ်။

တက်တူးရွာဗုံးကြဲခံရမှုမှာ နေအိမ် ၈ လုံး၊ ယက္ကန်းစင် ၂ ခု၊ ထော်လာဂျီ ၁ စီးပျက်စီးမှုရှိခဲ့ပြီး ရေတော်မူကျေးရွာမှာတော့ လူနေအိမ် ၂ လုံးပျက်စီးခဲ့တယ်လို့ ဆိုပါတယ်။

ဗုံးကြဲမှုကြောင့် မြင်းသည်နဲ့ရေတော်မူရွာတွေက ပြည်သူတွေက နေရပ်တိမ်းရှောင်တာ မရှိပေမယ့် တက်တူးရွာခံတွေကတော့ ဘေးလွတ်ရာတိမ်းရှောင်နေကြရပါတယ်။

မေ ၂၇ ရက်ကလည်း ရွှေဘိုမြို့နယ်၊ ရေတော်မူကျေးရွာကို စစ်ကော်မရှင်ရဲ့ ဒရုန်းကျရောက်ပေါက်ကွဲပြီး လင်မယား ၂ ဦးသေဆုံးကာ အမျိုးသမီး ၂ ဦးဒဏ်ရာရခဲ့ပါသေးတယ်။

စာတည်း – လင်း

နတ်မောက်၊ ဇွန် ၂၆၊ ၂၀၂၆။

မကွေးတိုင်း၊ နတ်မောက်မြို့နယ်၊ သမုန်းကုန်းကျေးရွာကို စစ်ကော်မရှင်တပ်က လေကြောင်းကနေဗုံးကြဲ၊ ပစ်ခတ်ခဲ့တာကြောင့် ပြည်သူ ၅ ဦးသေဆုံးတယ်လို့ နတ်မောက်မြို့နယ် ပကဖတာဝန်ရှိသူတွေဆီ သိရပါတယ်။

ဇွန် ၂၅ ရက်ညနေ ၄ နာရီကျော်မှာ ရွာထဲကို စစ်ကော်မရှင်ရဲ့ဂျက်ဖိုက်တာ ၂ စီးကနေ ဗုံး ၄ လုံးကြဲချခဲ့တဲ့အပြင် စက်သေနတ်တွေနဲ့ပါ ပစ်ခတ်ခဲ့တာလို့ ဆိုပါတယ်။

“ရွာလယ်ပေ ၅၀ လမ်းရဲ့တဖက်က နေအိမ်တွေနားရယ် ရွာမြောက်ဘက်ခြမ်းက လူနေအိမ်ကြားတွေထဲကို ကျတာ။ တိုက်ပွဲတွေဖြစ်နေတာမျိုးလည်းမရှိဘူး”လို့ နတ်မောက်မြို့နယ်ပကဖတာဝန်ရှိသူက ပြောပါတယ်။

ဗုံးပေါက်ကွဲစထိမှန်တာကြောင့် အသက် ၃၃ နှစ်အရွယ်မသန်းသန်းမော်၊ သားဖြစ်သူ အသက် ၁၂ နှစ်အရွယ် မောင်အောင်ဘုန်းခန့်၊ အသက် ၈ နှစ်အရွယ် ညီဘုန်းခန့်၊ အသက် ၃၉ နှစ်အရွယ် ကိုချစ်ဦး၊ အသက် ၆၉ နှစ်အရွယ် ဒေါ်ရီသက်တို့ သေဆုံးခဲ့တယ်လို့ ဆိုပါတယ်။

ဒါ့အပြင် အသက် ၁၀ အရွယ် မိန်းကလေးငယ် ၁ ဦး၊ အသက် ၃၀ ကနေ ၄၀ ကြားရှိ အမျိုးသမီး ၁ ဦးနဲ့အမျိုးသား ၁ ဦးတို့ ထိခိုက်ဒဏ်ရာရပြီး နေအိမ် ၁၀ လုံးလည်း ပျက်စီးသွားတယ်လို့ နတ်မောက်မြို့နယ်ပကဖတာဝန်ရှိသူက ပြောပါတယ်။

ဗုံးကြဲခံရပြီးနောက် ရွာခံအချို့ဟာ ဘေးလွတ်ရာကို တိမ်းရှောင်သွားကြရတယ်လို့ ဆိုပါတယ်။

မတ် ၁ ရက်ကလည်း မကွေးတိုင်း၊ မင်းတုန်းမြို့နယ်၊ ပြောင်းကျေးရွာအနီးကို စစ်ကော်မရှင်ဘက်က လေကြောင်းကနေ ဗုံးကြဲတာကြောင့် ပြည်သူ ၂၅ ဦးသေဆုံးကာ ၂၀ ကျော်ဒဏ်ရာရခဲ့ပါသေးတယ်။

စာတည်း – လင်း

စစ်ကိုင်း၊ ဇွန် ၂၆၊ ၂၀၂၆။

စစ်ကိုင်းတိုင်း၊ ရွှေဘိုမြို့နယ်နဲ့ မြောင်မြို့နယ်တို့မှာ အသေခံဒရုန်းနဲ့တိုက်ခိုက်ခံရလို့ ပြည်သူ ၁ ဦး ဒဏ်ရာရပြီး နေအိမ် ၆ လုံး မီးလောင်ခဲ့တယ်လို့ ဒေသကာကွယ်ရေးအဖွဲ့ဝင်တွေဆီက သိရပါတယ်။

ဇွန် ၂၅ ရက်မနက် ၁၁ နာရီကျော်မှာ ရွှေဘိုမြို့နယ်၊ ဘိုတဲကုန်းကျေးရွာကို ရွှေဘိုလေ့ကျင့်ရေး ၈ က လွှတ်တင်လိုက်တဲ့ အသေခံဒရုန်း ၂ စီးက ကျရောက်ပေါက်ကွဲခဲ့တာလို့ ဆိုပါတယ်။

“ရွာထိပ် သံတိုသံစရောင်းဝယ်ရေးလုပ်တဲ့ ဆိုင်ပေါ်ကျတယ်။ ပြီးတော့ စိုက်ပျိုးရေးရုံးထဲ တစီးကျတယ်။ သံတိုသံစဆိုင်ကို ဒရုန်းကျချိန်တော့လူထိတာရှိတယ်”လို့ ရွှေဘိုမြို့နယ်ပကဖတာဝန်ရှိသူက ပြောပါတယ်။

ဒရုန်းထိမှန်တာကြောင့် အသက် ၄၀ ကျော်အရွယ် အမျိုးသမီး ၁ ဦးလက်မောင်းထိခိုက်ဒဏ်ရာရပြီး ဆိုင်နဲ့ ရုံးအဆောက်အဦ: ပျက်စီးမှုရှိခဲ့တယ်လို့ ဆိုပါတယ်။

အလားတူ ည ၇ နာရီကျော်မှာ နမခကနေ လွှတ်တင်လိုက်တဲ့ အသေခံဒရုန်း ၄ စီးဟာ မြောင်မြို့နယ်၊ နဘတ်ကျေးရွာထဲက ပြည်သူနေအိမ်တွေပေါ်ကို ကျရောက်ပေါက်ကွဲခဲ့တယ်လို့ နဘတ်တိုက်နယ် တာဝန်ခံက ပြောပါတယ်။

“၆ နာရီလောက်ကတည်းက မိုက်နဲ့လိုက်အော်ပြီး လူတွေကိုရွာပြင်ထုတ်လိုက်နိုင်တယ်။ သတင်းကြိုရလို့ပါ။ အိမ်တွေတော့ မီးလောင်ပျက်စီးတာရှိတယ်”လို့ ဆိုပါတယ်။

ဒီတိုက်ခိုက်မှုကြောင့် နေအိမ် ၆ လုံးမီးလောင်ပျက်စီးခဲ့ပြီး ဒေသခံတွေကတော့ ဘေးလွတ်ရာမှာ တိမ်းရှောင်နေကြရတယ်လို့ ဆိုပါတယ်။

ဧပြီ ၃ ရက်နေ့ကလည်း မြောင်မြို့နယ်၊ နဘက်ကျေးရွာကို ဗုံးကြဲခံရလို့ မိန်းကလေးငယ် ၁ ဦး သေဆုံးပြီး မိဘနှစ်ဦးဒဏ်ရာရခဲ့ပါသေးတယ်။

စာတည်း – လင်း