ဒိန်းဂျား

ပခုက္ကူ၊ ဧပြီ ၂၇၊ ၂၀၂၃။

မကွေးတိုင်း၊ ပခုက္ကူမြို့နယ်၊ တဲကုန်းရွာမှာ ဖဲရိုက်နေတဲ့ ပျူစောထီးတွေကို ဧပြီလ ၂၅ ရက် ည ၉ နာရီခွဲခန့်မှာ ဒေသကာကွယ်ရေးတပ်ဖွဲ့တွေ ပေါင်းပြီး တိုက်ခိုက်လို့ ထိခိုက်သေဆုံးမှုတွေ များပြားတယ်လို့ မြိုင်မြို့နယ် ပကဖအဖွဲ့ဆီက သိရပါတယ်။

မြို့ခင်းသာရွာ၊ မှိုက်ပင်ကုန်းနဲ့ တဲကုန်းရွာက ပျူစောထီးအင်အား ၃၀ ဦးခန့်ဟာ တဲကုန်း(ပျူ)ရွာမှာ စုပြီးဖဲရိုက်နေစဉ် အလစ်ဝင်ပစ်ခဲ့တာကြောင့် ၁၃ ဦး သေဆုံးကာ ၈ ဦးဒဏ်ရာရရှိခဲ့တယ်လို့ ပြည်သူ့ကာကွယ်ရေးတပ်ဖွဲ့ – မြိုင်မြို့နယ်အဖွဲ့ခေါင်းဆောင် ဗိုလ်လက်ယာက ပြောပါတယ်။

“ပျူစောထီးတွေ ဖဲရိုက်နေတာကို ပထမ လက်ပစ်ဗုံးပစ်လိုက်တယ်။ ဒီကောင်တွေဘက်က ဘာမှမလုပ်နိုင်ဘူး။ မျက်မြင်တွေ့ခဲ့ရတာက ပျူစောထီး ၁၃ ဦး သေဆုံးပြီး ၈ ဦး ဒဏ်ရာရတယ်။ အဲဒီသေဆုံးတဲ့အထဲမှာ တဲကုန်းရွာက ပျူခေါင်းဆောင် တင်ဝင်းက ပွဲချင်းပြီးသေပြီး ပျူ တင်အေးကတော့ ပခုက္ကူဆေးရုံ ပို့ထားရတာ သေမယ်ရှင်မယ် မသိသေးဘူး” လို့ ဗိုလ်လက်ယာက ပြောပါတယ်။

တိုက်ခိုက်မှုအတွင်း ပျူစောထီးတွေဘက်က ပြန်လည်ပစ်ခတ်မှုကြောင့် PDF ရဲဘော်တဦး ကျည်ထိမှန် သေဆုံးသွားခဲ့တယ်လို့ ဆိုပါတယ်။

တဲကုန်းရွာ ပျူစောထီးတွေကို စစ်ကောင်စီတပ်က ကာဘိုင် ၃ လက် နဲ့ တတောင့်ထိုးတွေ ချပေးထားတာဖြစ်ပြီး တိုက်ခိုက်မှုအတွင်း ကာဘိုင် ၁ လက်၊ ခါးချိုးသေနတ် ၄ လက်၊ လက်ပစ်ဗုံး ၃ လုံး၊ ကာဘိုင်ကျည် ၃၂ တောင့်၊ ကျည်ဘောက် ၂ ခု၊ တတောင့်ထိုးကျည် ၂၂ တောင့်တို့ကို သိမ်းဆည်းရမိခဲ့တယ်လို့ သိရပါတယ်။

တိုက်ခိုက်ခံရမှုအပြီးမှာတော့ စစ်အုပ်စုအင်အား ၂၀၀ လောက်နဲ့ကင်းပတ်ပြီး ကန်တော်ရွာက နေအိမ် ၁၂ လုံးကို မီးရှို့သွားခဲ့ပြီး၊ တိုက်ခိုက်မှုကို ပြည်သူ့ကာကွယ်ရေးတပ်ဖွဲ့-မြိုင်မြို့နယ် ပကဖ တပ်ရင်း(၁) ခွဲ (၄) စု(၃) မှ စိတ်(၁/၂) ၊ မြိုင်ပကဖ IO အဖွဲ့ နှင့် Black Cobra တို့က ပူးပေါင်းလုပ်ဆောင်ခဲ့တာလို့ သိရပါတယ်။

စာတည်း – ရင်ငြိမ်း

မတ္တရာ၊ ဧပြီ ၂၆၊ ၂၀၂၃။

မန္တလေးတိုင်း၊ မတ္တရာမြို့နယ်အတွင်းမှာ စစ်တပ်ပိုင် မြန်မာ့စီးပွားရေးကော်ပိုရေးရှင်း – MECရဲ့ ကျောက်ထုတ်လုပ်ရေးလုပ်ငန်း နဲ့ ပူးပေါင်းလုပ်ကိုင်နေသူ အမျိုးသားတဦး ဧပြီလ ၂၅ ရက်မနေ့ကမနက် ၆ နာရီလောက်မှာ ပစ်ခတ်ရှင်းလင်း ခံခဲ့ရတယ်လို့ သိရပါတယ်။

စကျင်ကျေးရွာက စကျင်ကျောက်လုပ်ငန်းလုပ်ကိုင်သူ အသက် ၃၅ နှစ်အရွယ် ကိုစိုးရာဇာကို စကျင်ရွာလမ်းပိုင်းတနေရာမှာ ပစ်ခတ်ရှင်းလင်းခဲ့တာလို့ တောကြီးမြွေပွေး ပျောက်ကြားတပ်ဖွဲ့မှ ဗိုလ်တီက ပြောပါတယ်။

“ဒီဟာကတော့ မထင်မှတ်ပဲဖြစ်သွားတာ၊ အလုပ်ကိစ္စတခုရှိလို့ဝင်တာ၊ သူတို့နဲ့ စကျင်ရွာနားလေးမှာ ထိပ်တိုက်တွေ့တာ၊ ကျောက်လုပ်ငန်းခွင်ထဲကို သွားတာထင်တယ်၊ သူက နာမည်ကြီးပဲ၊ စိုးရာဇာနဲ့ သူတပည့် ၄ ယောက်လောက်ပါသေးတယ်၊ ကျနော်တို့က သူ့ကိုသိတယ်၊ သူ့ကို အနီးကပ်ယူပြီးပစ်လိုက်တော့ သူ့နောက်ကလူတွေကတော့ လွတ်သွားတာရှိတယ်၊‌ ၁၀ ချက်လောက်ထိ ပစ်ထားခဲ့တာ၊ အဓိကတော့ ဦးခေါင်းကိုပစ်ခတ်ခဲ့တာ” လို့ ပြောပါတယ်။

စိုးရာဇာဟာ ဒေသတွင်းပျူစောထီးခေါင်းဆောင်လို့ လူသိများသူတဦးဖြစ်ပြီး၊ သူကြောင့် နေအိမ်မီးရှို့ခံရတာနဲ့ ပြည်သူအသတ်ခံရတာတွေလည်း ရှိခဲ့ကာ အဲ့ဒီအချက်အလက်တွေကို စုံစမ်းထားခဲ့ပြီး ခုလိုဆုံတဲ့အချိန်ကျမှ ရှင်းလင်းခဲ့တာလို့ ဗိုလ်တီက ဆက်ပြောပါတယ်။

“အဲဒီပျူစောထီးခေါင်းဆောင်က မတ္တရာနယ်ဘက်မှာ အနီရောင်စစ်ဆင်ရေး (ဒေသခံပြည်သူတွေကို အကြမ်းဖက်မှု၊ ခိုးမှု၊ သတ်မှု) လုပ်နေတာလည်းရှိတယ်၊ အဲလိုလုပ်တာတွေကြောင့် မတ္တရာမှာ ပြည်သူတွေအသတ်ခံရတာတွေလည်းရှိတယ်၊ သူက MEC နဲ့ပေါင်းပြီး စကျင်လုပ်ငန်းကိုကြာရှည်လုပ်နေတာ၊ ကျောက်တွေကို ပြန်ဖြန့်ပြီးရောင်းချပေးနေတာ”လို့ ပြောပါတယ်။

ဒီတိုက်ခိုက်မှုကို တောကြီးမြွေပွေး ပျောက်ကြားတပ်ဖွဲ့နှင့် ပြည်သူ့ရဲတပ်ဖွဲ့၊ လုံခြုံရေးနှင့် အကြမ်းဖက်နှိမ်နင်းရေးဌာနကြီး အဖွဲ့(၅) မန္တလေးတိုင်းဒေသကြီးအခြေစိုက် တို့က ပူးပေါင်းလုပ်ဆောင်ခဲ့တာဖြစ်ပြီး၊ တိုက်ခိုက်ခဲ့တဲ့နယ်မြေက စစ်တပ်နယ်ဖြစ်တာကြောင့် အမြန်ပြန်ဆုပ်ခွာခဲ့ရတယ်လို့လည်း သိရပါတယ်။

ဧပြီလ ၂၀ ရက်ကမနက်ပိုင်းကလည်း စစ်ကိုင်းမြို့၊ ရှမ်းချက်ရပ်ကွပ် မန္တလေး-မုံရွာ-‌ရွှေဘို ကားလမ်းမကြီးပေါ်မှာ ကင်းလှည့်နေတဲ့ စစ်ကောင်စီတပ်သားတွေကို တောကြီးမြွေပွေး ပျောက်ကြားတပ်ဖွဲ့က မိုင်းဆွဲတိုက်ခိုက်ခဲ့ရာ စစ်သား ၁ ဦး သေဆုံးခဲ့ပါသေးတယ်။

စာတည်း – လင်း

ပုလဲ၊ ဧပြီ ၂၄၊ ၂၀၂၃။

စစ်ကိုင်တိုင်း၊ ပုလဲမြို့နယ်က စစ်ကောင်စီတပ်တွေ မီးရှို့သွားတဲ့ နှောကန်ကျေးရွာကို ဧပြီလ ၂၄ ရက် ဒီကနေ့မနက်ပိုင်းမှာ ပုလဲမြို့နယ် ပြည်သူ့အုပ်ချုပ်ရေးအဖွဲ့ဝင်တွေက ငွေကျပ် ၂၇ သိန်းနဲ့ စားနပ်ရိက္ခာတွေ လှူဒါန်းထောက်ပံ့ပေးခဲ့တယ်လို့ သိရပါတယ်။

ပုလဲမြို့နယ်၊ နှောကန်ကျေးရွာက မီးဘေးသင့်နေတဲ့ အိမ်ထောင်စု ၁၀၄ စုအတွက် သံဃသမဂ္ဂအဖွဲ့ နဲ့ တခြားအလှူရှင်အချို့တို့ ပူးပေါင်းပြီး လှူဒါန်းခဲ့တာလို့ ပုလဲမြို့နယ် ပြည့်သူ့အုပ်ချုပ်ရေးအဖွဲ့ခေါင်းဆောင် ကိုဇော်ထက်က ပြောပါတယ်။

“စစ်ကောင်စီက နှောကန်ကျေးရွာကို ၄ လ ပိုင်း ၂ ရက်နေ့က မီးရှို့သွားတာကို သွားလှူဒါန်းတာ ၊မီးရှို့ခံရတာက ၁၀၄ အိမ်ပေါ့၊ ရွာမှာရှိတာက စုစုပေါင်း အိမ်ထောင်စု ၁၃၆ စုရှိတာ၊ ရွာလုံးကျွတ်လို့‌ ပြောလို့ရတာပေါ့။ သံဃသမဂ္ဂအဖွဲ့ နဲ့ တခြားအလှူရှင်အချို့တို့လှူဒါန်းတဲ့ ငွေ ၂၇ သိန်းကို မြို့နယ်အုပ်ချုပ်ရေးကျနော်တို့အဖွဲ့က ကြားကနေ သွားလှူပေးရတာ၊ စားနပ်ရိက္ခာကတော့ ဆန်တို့ ဆီတို့လည်း ပါတယ်” လို့ ပြောပါတယ်။

လက်ရှိအချိန်ထိ ပုလဲမြို့နယ်အတွင်းမှာ မီးရှို့ခံရတဲ့ ရွာပေါင်း ၃၀ ကျော်ရှိပြီး အိမ်ထောင်စု ၂၃၀၀ ကျော်ရှိကာ ဒေသခံတွေအနေနဲ့ နီးစပ်ရာတောတွေ၊ ကျေးရွာစာသင်ကျောင်းတွေနဲ့ ဘုန်းကြီးကျောင်းတွေမှာ ဖြစ်သလို စုပေါင်းပြီး နေထိုင်ရတယ်လို့ ဆိုပါတယ်။

စာတည်း – လင်း