ဒိန်းဂျား

■ သေနတ် ၃ လက်နဲ့ကျည်တွေကိုလည်း ကာကွယ်ရေးအဖွဲ့တွေ သိမ်းဆည်း

မကွေး၊ ဇန်နဝါရီ ၂၈၊ ၂၀၂၅။

မကွေးတိုင်း၊ ပခုက္ကူခရိုင်၊ ရေစကြိုမြို့နယ်နဲ့ မြိုင်မြို့နယ်အတွင်း စစ်ကောင်စီတပ်ဖွဲ့ဝင်တွေကို ဒေသခံကာကွယ်ရေးတပ်ဖွဲ့ဝင်တွေက တိုက်ခိုက်ခဲ့ရာ ၅ ဦးသေဆုံးပြီး လက်နက်ခဲယမ်းတွေလည်း သိမ်းဆည်းရရှိခဲ့တယ်လို့ မြိုင်မြို့နယ်ပြည်သူ့ကာကွယ်ရေးတပ်ဖွဲ့ဆီက သိရပါတယ်။

အင်အား ၂၀ ကျော်ပါတဲ့စစ်ကောင်စီစစ်ကြောင်းဟာ လင်းကတောရွာအနီး မိုင်းထောင်နေချိန် ဇန်နဝါရီ ၂၈ ရက်မနက် ၁၀ နာရီလောက်မှာ ပစ်ခတ်တိုက်ခိုက်ခဲ့တာလို့ ဆိုပါတယ်။

“ရေစကြိုကနေထွက်လာတဲ့ စစ်ကြောင်းပါ၊ လင်းကတောရဲစခန်းထဲကိုဝင်နေတာ၊ ဒီနေ့မနက်ကျ ရွာထဲကို ရိက္ခာလျှောက်ယူရင်းနဲ့ ရွာထဲကိုပြန်တဲ့အချိန် နင်းမိုင်းထောင်နေတာကို ကျနော်တို့ တော်လှန်ရေးအဖွဲ့ ကင်းပုန်းကတွေ့ပြီး မနက် ၁၀ နာရီဝန်းကျင်မှာပစ်ခတ်ခဲ့တာ” လို့ မြိုင်မြို့နယ်ပြည်သူ့ကာကွယ်ရေးတပ်ဖွဲ့တာဝန်ရှိသူက ပြောပါတယ်။

ဒီတိုက်ခိုက်မှုအတွင်း စစ်ကောင်စီတပ်ဖွဲ့ဝင် ၃ ဦးသေဆုံးတာကို မျက်မြင်တွေ့ခဲ့ရပြီး BA 63 သေနတ် ၂ လက်လည်း သိမ်းဆည်းရခဲ့တယ်လို့ ဆိုပါတယ်။

ဒီပစ်ခတ်တိုက်ခိုက်မှုကို မြိုင်မြို့နယ်ပြည်သူ့ကာကွယ်ရေးတပ်ဖွဲ့၊ ဆားလင်းကြီး SSTF တပ်ဖွဲ့၊ မြိုင်ပကဖ-မြောက်ပိုင်းဇုန်၊ ပေါက်-မြိုင်စုဖွဲ့မှုအဖွဲ့တို့ ပူးပေါင်းလုပ်ဆောင်ခဲ့တာဖြစ်ပြီး တိုက်ခိုက်ပြီးနောက် စစ်ကောင်စီတပ်ဖွဲ့ဝင်တွေဟာ လင်းကတောရဲစခန်းထဲကို ပြန်ဆုတ်ခွာသွားကြတယ်လို့ အထက်ပါတာဝန်ရှိသူကပြောပါတယ်။

ဒါ့အပြင် မြိုင်မြို့ပေါ်ရှိ အထွေထွေအုပ်ချုပ်ရေးမှူးရုံးကနေ မန္တလေးဂိတ်ဘက်ကိုထွက်လာတဲ့ စစ်ကောင်စီတပ်ဖွဲ့ဝင် ၂ ဦးကိုလည်း အဲ့ဒီနေ့နေ့လယ် ၁၁ နာရီလောက်မှာ ပစ်ခတ်တိုက်ခိုက်ခဲ့တယ်လို့ မြိုင်မြို့နယ်ပြည်သူ့ကာကွယ်ရေးတပ်ဖွဲ့တာဝန်ရှိသူက ပြောပါတယ်။

မြိုင်ပကဖ၊ ကိုလင်းမြွေတပ်ဖွဲ့နဲ့ ကိုဆံရှည်တပ်ဖွဲ့တို့က ပူးပေါင်းလုပ်ဆောင်ခဲ့တာဖြစ်ပြီး တိုက်ခိုက်မှုအတွင်း စစ်ကောင်စီတပ်ဖွဲ့ဝင် ၂ ဦးသေဆုံးပြီး သေနတ် ၁ လက်နဲ့ ကျည် ၁၇ တောင့် သိမ်းဆည်းခဲ့တယ်လို့ ဆိုပါတယ်။

ဒီတိုက်ခိုက်မှုတွေအတွင်း စစ်ကောင်စီတပ်ဖွဲ့ဝင်တွေဘက်က ထိခိုက်သေဆုံးမှုတွေကိုတော့ မြေလတ်အသံက သီးခြားအတည်မပြုနိုင်သေးပါဘူး။

ပြီးခဲ့တဲ့ ဇန်နဝါရီ ၁၅ ရက်ကလည်း မကွေးတိုင်း၊ ပွင့်ဖြူမြို့နယ်၊ ဆင်လူးကျေးရွာတွင် အထိုင်ချထားတဲ့ စစ်ကောင်စီတပ်ဖွဲ့ဝင်တွေနဲ့ ပျူစောထီးတွေကို မြိုင်မြို့နယ်ပြည်သူ့ကာကွယ်ရေးတပ်ဖွဲ့က ပစ်ခတ်တိုက်ခိုက်ခဲ့ရာ ၁ ဦးသေဆုံးပြီး ထိခိုက်ဒဏ်ရာရသူတွေရှိခဲ့တယ်လို့ သိရပါတယ်။

စာတည်း – လင်း

မကွေး၊ ဇန်နဝါရီ ၂၅၊ ၂၀၂၅။

မကွေးတိုင်း၊ ချောက်မြို့နယ်၊ စလေမြို့၊ ပွင့်လင်းကျေးရွာကိုစစ်ကြောင်းထိုးကာ နေအိမ် ၂ လုံး မီးရှို့ပြီးပြန်လာတဲ့ စစ်ကောင်စီစစ်ကြောင်းကို ဇန်နဝါရီ ၂၃ ရက်က ပွင့်လင်းကျေးရွာထွက်မှာ ပစ်ခတ်တိုက်ခိုက်ခဲ့တယ်လို့ Chauk Guerrilla Force(C.G.F) အဖွဲ့ဆီက သိရပါတယ်။

ဝါဇီတပ်က အင်အား ၆၀ ပါ စစ်ကောင်စီတပ်ဖွဲ့ဟာ ဇန်နဝါရီ ၂၃ ရက် မနက် ၄ နာရီလောက်မှာ ချောက်မြို့နယ်၊ ပွင့်လင်းရွာကို ဖောကားအကြီး၊ အသေး ၂ စီးနဲ့ စစ်ကြောင်းထိုးဝင်ရောက်လာပြီး နေအိမ်တွေကိုမီးရှို့ခဲ့တာကြောင့် နေအိမ် ၂ လုံးမီးလောင်ပျက်စီးခဲ့ပါတယ်။

နေအိမ်တွေကို မီးရှို့ဖျက်ဆီးပြီး ပြန်ထွက်လာတဲ့စစ်ကောင်စီတပ်ဖွဲ့တွေရဲ့ ဖောကား ၂ စီးထဲက နောက်မှာကျန်ခဲ့တဲ့ အင်အား ၄၀ ဝန်းကျင်ပါ ဖောကားအကြီးကို မနက် ၇ နာရီလောက်မှာ ပွင့်လင်းရွာအထွက်ကနေ ကြားဖြတ်တိုက်ခိုက်ခဲ့ပြီး တိုက်ပွဲကြာချိန် ၂ နာရီဝန်းကျင်ကြာခဲ့ကာ အရာရှိ ၂ ဦးသေဆုံးပြီး ၁၅ ဦးထက်မနည်း ထိခိုက်သေဆုံးနိုင်တယ်လို့ Chauk Guerrilla Force(C.G.F) ဒုတာဝန်ခံ ဖြိုးထက်နိုင်က ပြောပါတယ်။

“သူတို့‌ဖောကားပေါ်ကို နာနတ်သီး ၁ လုံးပစ်ထည့်ခဲ့တာ။ရှေ့ကကားကိုတော့ ပစ်မထည့်ဘူး။ နောက်ကလာတဲ့ ဖောကား ၁ စီးပေါ်ကို နာနတ်သီးပစ်ထည့်တာမှာ ပေါက်ကွဲတာ။ တော်တော်ပြင်းထန်လိုက်တယ်ပေါ့နော်။ သူတို့ဘက်ကလည်း ပစ်ခတ်မှုတွေရှိတယ်။ ကျနော်တို့ အပြန်အလှန်ပစ်ခတ်မှုတွေရှိခဲ့တယ်။ ဖောကား ၂ စီးနဲ့ပြန်လာတာ။ ကျနော်တို့သိရတာက ဝါဇီတပ်က စစ်သားတွေပါ။ သေသွားတဲ့ဗိုလ်ကလည်း ဝါဇီတပ်က ဗိုလ်လို့သိရတယ်။ စစ်တပ်ကအ‌ရာရှိ ၂ ဦးက သေဆုံးတဲ့အထဲမှာပါတယ်လို့သိရပါတယ်။ နောက်ပြီးတော့ ၁၅ ယောက်ထက်မနည်း စစ်ကောင်စီတပ်သားတွေက ထိခိုက်သေဆုံးနိုင်တယ်”လို့ ဖြိုးထက်နိုင်က ပြောပါတယ်။

အပြန်အလှန်တိုက်ခိုက်နေချိန် စစ်ကောင်စီတပ်ဖွဲ့ဝင်တွေရဲ့ အရှေ့ကဖောကားတစီးက ပြန်လည်ရောက်ရှိလာပြီး ကာကွယ်ရေးတပ်ဖွဲ့တွေကို တိုက်ခိုက်ခဲ့ရာ လက်နက်အင်အားမမျှတာကြောင့် ပြန်လည်ဆုတ်ခွါခဲ့ရပါတယ်။

စစ်ကောင်စီတပ်ဖွဲ့ဝင်တွေဟာ ဖောကား ၂ စီးနဲ့ ချောင်းပိုက်ရွာကို ဆုတ်ခွါသွားပြီး အဲ့ဒီကမှတဆင့် စလေမြို့ဘက်ကို မောင်းနှင်သွားတယ်လို့ဆိုပါတယ်။

ဒီတိုက်ခိုက်မှုကိုတော့ Chauk Guerrilla Force(C.G.F)၊ ချောက်မြို့နယ် ပြည်သူကာကွယ်ရေးတပ်ဖွဲ့၊ မကွေးခရိုင် တပ်ရင်း ၁၊ မကွေးခရိုင် တပ်ရင်း ၂၊ မကွေးခရိုင် ပကဖ အထူးတိုက်ခိုက်ရေးတပ်ဖွဲ့၊ အာဠာဝက မြို့ပြပြောက်ကျားတပ်ဖွဲ့နဲ့ ချောက်မြို့နယ် တော်လှန်ရေးတပ်ပေါင်းစုတို့က ပူးပေါင်းတိုက်ခိုက်ခဲ့တာလို့ သိရပါတယ်။

ပြီးခဲ့တဲ့ ဇန်နဝါရီ ၁၅ ရက်ကလည်း ချောက်မြို့နယ် ထိန်စမ်းကျေးရွာကို စစ်ကြောင်းထိုးလာတဲ့ စစ်ကောင်စီတပ်ဖွဲ့ဝင်တွေကို Chauk Guerrilla Force(C.G.F) အဖွဲ့က ချောက်မြို့နယ် ကုန်းကြီးကျေးရွာအနီးမှာ တိုက်ခိုက်ခဲ့ပါသေးတယ်။

စာတည်း – ကိုချမ်း

မကွေး၊ ဇန်နဝါရီ ၂၄၊ ၂၀၂၅။

မကွေးတိုင်း၊ ပခုက္ကူခရိုင်၊ ဆိပ်ဖြူမြို့နယ်ရှိ စစ်ကောင်စီတပ်ဖွဲ့ဝင်တွေတပ်စွဲထားတဲ့ ဝါဇီငွေစက္ကူစက်ရုံနဲ့ စက်ရုံအနီးရှိ စစ်ကောင်စီအထိုင်တပ်စခန်းတွေကို ဒေသခံကာကွယ်ရေးပူးပေါင်းတပ်ဖွဲ့ တွေက ဇန်နဝါရီ ၁၉ ရက်မနက် ၆ နာရီခန့်ကနေ ၈ နာရီခန့်ထိ တိုက်ခိုက်ခဲ့ကြတယ်လို့ ဆိပ်ဖြူမြောက်ပိုင်း ပြည်သူ့ကာကွယ်ရေးတပ်ဖွဲ့ဆီက သိရပါတယ်။

ဆိပ်ဖြူမြို့နယ်အနီး ဝါဇီငွေစက္ကူစက်ရုံ၊ ချောင်းမကြီး‌ကျေးရွာက စစ်ကောင်စီအထိုင်တပ်စခန်း၊ ချိုက်ကျေးရွာ အထိုင်တပ်စခန်း၊ မြင်းဇကောကျေးရွာ အထိုင်တပ်စခန်း၊ ပခုက္ကူမြို့နယ် လယ်ကျင်းကျေးရွာအနီးက ဇီးပင်ဂိတ်နဲ့တောဂေါင်းဂိတ်တို့ကို တိုက်ခိုက်ခဲ့တာလို့ ဆိုပါတယ်။

“စစ်ကောင်စီအထိုင်တပ်စခန်း ဂိတ်နဲ့ဝါစီစက်ရုံကို အဓိကတိုက်ခိုက်ရတာက အာဏာသိမ်းစစ်ကောင်စီ မင်းအောင်လှိုင်အလိုကျ ဝါဇီစက်ရုံကနေ ငွေကြေးဖောင်းပွမှုတွေဖြစ်‌အောင် ပိုက်ဆံတွေအဆမတန် ရိုက်ထုတ်နေတာကြောင့် ပစ်ခတ်တိုက်ခိုက်ခဲ့ရတာ။”လို့ ဆိပ်ဖြူမြောက်ပိုင်းပြည်သူ့ကာကွယ်ရေးတပ်ဖွဲ့ သတင်းနဲ့ ပြန်ကြားရေးတာဝန်ခံက ပြောပါတယ်။

အဲ့ဒီနေရာတွေကို ဒရုန်းဗုံးသီး ၂၆ လုံးကြဲချတိုက်ခိုက်ခဲ့တဲ့အပြင် Rocket ၁၇ လုံး၊ ၈၀ မမ ၆ လုံး၊ ၆၀ မမ ၆ လုံးနဲ့ပါ ၂ နာရီအကြာ တပြိုက်နက်တိုက်ခိုက်ခဲ့တာလို့ ဆိုပါတယ်။

“လက်ရှိကျနော်တို့ ကနဦးသတင်းရတာတော့ ဝါဇီစက်ရုံထဲမှာရှိတဲ့ အဆောက်အဦတွေ ထိမှန်ပျက်စီးတယ်၊ အထိုင်တပ်စခန်းတွေ ဒရုန်းနဲ့ဗုံးကြဲချတာတော့ စစ်ကောင်စီတပ်ဖွဲ့ဝင်တွေ အထိအခိုက်ရှိပြီး သေဆုံးမှုလည်းရှိတယ်၊ အရေအတွက်တော့အတိအကျမသိရသေးဘူး။”လို့ ဆိပ်ဖြူမြောက်ပိုင်း ပြည်သူ့ကာကွယ်ရေးတပ်ဖွဲ့ သတင်းနဲ့ ပြန်ကြားရေးတာဝန်ခံက ပြောပါတယ်။

ဒီတိုက်ခိုက်မှုကို ဆိပ်ဖြူမြောက်ပိုင်းပြည်သူ့ကာကွယ်ရေးတပ်ဖွဲ့၊ ပခုက္ကူခရိုင် အမှတ် ၄ တပ်ရင်း၊ တပ်ခွဲ ၃ NSP၊ မကွေးတိုင်း ပကဖ Drone လက်ရုံးတပ်ဖွဲ့၊ သိမ်းငှက်နက်ဆိပ်ဖြူ တော်လှန်ရေးတပ်ဦး B.H.S.R.F၊ ပခုက္ကူခရိုင် အမှတ် ၈ တပ်ရင်း တပ်ခွဲ ၁ တို့က ပူးပေါင်းလုပ်ဆောင်ခဲ့တာလို့ သိရပါတယ်။

တိုက်ခိုက်ခံရတဲ့နေ့ကစလို့ ဝါဇီစက်ရုံထဲကနေ စစ်ကောင်စီတပ်ဖွဲ့ဝင်တွေဟာ ညတိုင်းနီးပါး လက်နက်ကြီးတွေနဲ့ အနီးဝန်းကျင်တွေကိုပစ်ခတ်မှုတွေလုပ်နေတယ်လို့ ဆိပ်ဖြူမြောက်ပိုင်း ပြည်သူ့ကာကွယ်ရေးတပ်ဖွဲ့ သတင်းနဲ့ ပြန်ကြားရေး တာဝန်ခံက ပြောပါတယ်။

စာတည်း – လင်း

မန္တလေး၊ ဇန်နဝါရီ ၂၄၊ ၂၀၂၅။

မန္တလေးတိုင်း၊ ငါန်းဇွန်မြို့နယ်၊ မြို့သာရွာ ရဲစခန်းကထွက်လာတဲ့ စစ်ကောင်စီတပ်သားတွေကို ဇန်နဝါရီ ၂၃ ရက် နေ့လယ် ၁၁ နာရီ ၄၀ မိနစ်လောက်မှာ မိုင်းဆွဲတိုက်ခိုက်ခဲ့တာကြောင့် စစ်သား ၄ ဦး ပြင်းထန်ဒဏ်ရာရခဲ့တယ်လို့ နဂါးနီပြောက်ကျားတပ်ဖွဲ့ မြင်းခြံ အဖွဲ့ဆီက သိရပါတယ်။

အင်အား ၈၀ ခန့်ပါတဲ့ စစ်ကောင်စီ စစ်ကြောင်းကို မြို့သာအ‌ရှေ့ရွာ တောင်ဘက် ရထားသံလမ်းအနီးမှာ နဂါးနီပြောက်ကျားတပ်ဖွဲ့ မြင်းခြံက ပေပါမိုင်း ၁ လုံးဆွဲပြီးတိုက်ခိုက်ခဲ့တာပါ။

အဲဒီစစ်ကြောင်းဟာ တံတားဦးဘက်ကနေ ၁၂ ဘီးမော်တော်ယာဉ်နဲ့ စစ်ကောင်စီတပ်ဖွဲ့ဝင်တွေကို တင်ဆောင်လာပြီး မြို့သာရဲစခန်းထဲမှာ ရပ်တန့်ခဲ့ကြောင်း၊ မြို့သာရဲခန်းကနေ ခြေလျင်စစ်ကြောင်းထိုးပြီး မြို့သာတောင်ဘက်ကို ထွက်လာတဲ့အချိန် တော်လှန်ရေးတပ်ဖွဲ့တွေက မိုင်းဆွဲတိုက်ခိုက်ခဲ့တာဖြစ်တယ်လို့ နဂါးနီပြောက်ကျား တပ်ဖွဲ့ မြင်းခြံတာဝန်ခံက ပြောပါတယ်။

“မိုင်းကွင်းထဲကို ဝင်လာတာက ၄ ကောင်ဝင်လာတယ်။ ၄ ကောင်ကတော့ အတုံးအရုန်းလဲသွားတယ်။ ချက်ခြင်းကြီးတော့ မသေဘူး။ မသေမရှင်ဖြစ်ပြီးတော့ မြို့သာဆေးရုံကို ပို့လိုက်တယ်။ ထိချက်က ပြင်းတော့ သေဖို့က များတယ်” လို့ နဂါးနီပြောက်ကျားတပ်ဖွဲ့ မြင်းခြံ တာဝန်ခံက ပြောပါတယ်။

မိုင်းဆွဲခံရပြီးနောက်မှာ စစ်ကောင်စီတပ်သားတွေဟာ ငါန်းဇွန်မြို့နယ်၊ ညောင်ပင်ကုန်းရွာ၊ တောစောက်ရွာ၊ ထနှောင်ပင်ရွာတို့ကို စစ်ကြောင်းထိုးပြီး ညနေ ၅ နာရီခွဲဝန်းကျင်မှာ မြို့သာရွာဘက်ကိုပြန်ကာ မြို့သာရွာက နေအိမ်တွေကို မီးရှို့ဖျက်ဆီးသွားတယ်လို့ ဆိုပါတယ်။

တော်လှန်ရေးတပ်ဖွဲ့တွေအနေနဲ့ ကျေးရွာအနီးကို မသွားရောက်နိုင်သေးတာကြောင့် လူနေအိမ် ဘယ်လောက် မီးရှို့ခံရတယ်ဆိုတာ မသိရသေးဘူးလို့ ဆိုပါတယ်။

ပြီးခဲ့တဲ့ ဇန်နဝါရီ ၁၅ ရက်ကလည်း တံတားဦးမြို့နယ်၊ တောင်တလုံးကျေးရွာက ပျူစောထီး ၁ ဦးကို နဂါးနီပြောက်ကျားတပ်ဖွဲ့ မြင်းခြံ အဖွဲ့က သေနတ်နဲ့ ပစ်ခတ်ရှင်းလင်းခဲ့ပါသေးတယ်။

စာတည်း – လင်းဇေ