အလင်းဝင်

မန္တလေး၊ ဧပြီ ၂၄၊ ၂၀၂၆။

စစ်ကော်မရှင်တပ်ဆီ အလင်းဝင်လာတယ်ဆိုသူတွေထဲ စစ်တပ်လက်အောက် တပ်သတင်းပေး၊ Non-CDM ဝန်ထမ်းတချို့နဲ့ PDF တွေရဲ့ ဆွေမျိုးမိသားစုဝင်တွေပါ PDF ယူနီဖောင်းဝတ်တွေနဲ့ပါဝင်လာတယ်လို့ စဥ်ကူးနဲ့မတ္တရာအခြေစိုက် တော်လှန်ရေးတပ်ဖွဲ့ဝင်နဲ့ ဒေသခံတွေဆီက သိရပါတယ်။

ဒီကနေ့ ဧပြီ ၂၄ ရက်မနက်ပိုင်းမှာ မန္တလေး၊ နန်းတွင်း အလယ်ပိုင်းတိုင်းစစ်ဌာနချုပ်(လပခ)မှာ အလင်းဝင်လာတဲ့ PDF ၅၀၀ ကျော်ကို မိဘတွေဆီပြန်လည်လွှဲပြောင်းတဲ့ အခမ်းအနားပြုလုပ်ခဲ့တယ်ဆိုကာ စစ်တပ်ထောက်တိုင် မီဒီယာတွေနဲ့ တယ်လီဂရမ်ချန်နယ်တွေမှာ ဖော်ပြနေပြီး မှတ်တမ်းတွေအရ PDF ဘက်တံဆိပ်ပါ ပြောက်ကျားယူနီဖောင်းဝတ်လူငယ်အများအပြားကို တွေ့ရပါတယ်။

အဲ့ဒီ PDF ပြောက်ကျားယူနီဖောင်းဝတ်ထားသူတွေထဲမှာ မတ္တရာမြို့က စစ်တပ်သတင်းပေးတချို့နဲ့ Non- CDM ဆည်မြောင်းဝန်ထမ်းတချို့ပါဝင်နေတယ်လို့ ၎င်းတို့ကို သိရှိသူ မတ္တရာမြို့နယ်တော်လှန်ရေးတပ်ဖွဲ့ဝင်တဦးက အခုလို ပြောပါတယ်။

“အဲ့ဒီအထဲက စဉ့်ကူး PDF ဆိုပြီး ဆိုင်းဘုတ်တပ်ထားတဲ့ ဓာတ်ပုံမှာ မန္တလေး PDF(MDY-PDF)ဆိုတဲ့ ယူနီဖောင်းဝတ်ထားတဲ့လူဟာ မန္တလေးတိုင်းက (စစ်တပ်) တပ်ရင်းတခုနဲ့ ရောနှောနေထိုင်ခဲ့သူ စစ်သတင်းပေးတယောက်ဖြစ်ပြီး ဖေဖော်ဝါရီလကအထိ ခင်ဦးနဲ့ ရွှေဘိုမြို့နယ်အစပ်မှာ နေထိုင်ခဲ့တယ် “လို့ သူက ပြောပါတယ်။

မတ္တရာကနေအလင်းဝင်လာတယ်ဆိုသူတွေမှာ ယခင် PDF တပ်ဖွဲ့ဝင်ဟောင်းတွေ ပါဝင်တာမှန်ပေမယ့် စစ်ကော်မရှင်လက်အောက် Non-CDM တွေကို ထည့်သွင်းထားတာပိုများနေတယ်လို့ အဲ့ဒီတော်လှန်ရေးတပ်ဖွဲ့ဝင်က ပြောပါတယ်။

PDF အလင်းဝင်ပွဲအခမ်းအနားမလုပ်ဆောင်မီ ဧပြီ ၁၉ ရက်က မတ္တရာမြောက်ခြမ်း၊ ဆည်တော်ကြီး လမ်းခွဲအနီးက ဥက္ကံ၊ ပွဲစားကုန်း၊ ရှမ်းသမီးလမ်းစုံ၊ ညောင်အုပ်၊ စစ်ကုန်းရွာနဲ့စကျင်ရွာတွေကနေ စစ်ကော်မရှင်တပ်နဲ့ပူးပေါင်းသွားသူ PDF တပ်ဖွဲ့ဝင်တွေရဲ့ဆွေမျိုးမိသားစုတွေကို နန်းတွင်း၊ လပခ ကနေ ခေါ်ဆောင်သွားတယ်လို့ သိရပါတယ်။

အဲ့ဒီနောက် ဘက်ပြောင်း PDF တွေရဲ့မိသားစုဝင်တွေကို ၎င်းတို့ဝတ်ဆင်ဖို့ PDF ဝတ်စုံဝယ်ယူရန်ဆိုကာ တဦးကို ငွေ ၅ သောင်းကျပ်တောင်းခံခဲ့ကြောင်း ဖြစ်စဥ်ကိုသိရှိထားတဲ့ မတ္တရာမြို့ခံတဦးက ပြောပါတယ်။

ပြည်သူ့လွတ်မြောက်ရေးတပ်မတော်(PLA)တပ်ဖွဲ့ဝင်တွေကလည်း အလင်းဝင်တာမှာ PLA တပ်ဖွဲ့ဝင်တွေပါဝင်တယ်လို့ ရေးသားဖော်ပြနေမှုတွေကို မဟုတ်မှန်ကြောင်း လူမှုကွန်ယက်ကနေတဆင့် ငြင်းဆိုရေးသားထားကြပါတယ်။

စစ်ကိုင်းတိုင်း၊ ဝက်လက်မြို့နယ်အခြေစိုက် PDF တပ်ရင်းမှူးတဦးကတော့ အခုလအတွင်း စစ်တပ်နဲ့ပူးပေါင်းသွားတဲ့ စစ်ကိုင်းမြို့နယ်အတွင်းက PDF တချို့ရှိပေမယ့် စစ်တပ်ကအခုဖော်ပြတဲ့ အရေအတွက် ၅၀၀ ကျော်တော့ မရှိနိုင်ဘူးလို့ ဆိုပါတယ်။

သမ္မတရာထူးယူထားသူ စစ်ခေါင်းဆောင်ဟောင်း မင်းအောင်လှိုင်ကတော့ ပြီးခဲ့တဲ့ ဧပြီ ၂၀ ရက်ကနေ ဇူလိုင်လကုန်အထိ ရက် ၁၀၀ အတွင်း PDF တွေလက်နက်ချဖို့နဲ့ တွေ့ဆုံဆွေးနွေးဖို့ဆိုကာ ပြောဆိုထားပြီး အဲ့ဒီလို ပြောဆိုပြီးရက်ပိုင်းအတွင်းမှာပဲ အခုလို PDF ၅၀၀ ကျော် အလင်းဝင်တယ်ဆိုကာ လုပ်ဆောင်လာတာလည်း ဖြစ်ပါတယ်။

စစ်ကိုင်း၊ မေ ၁၆၊ ၂၀၂၃။

စစ်ကိုင်းတိုင်း၊ မြင်းမူမြို့ပေါ်မှာ စစ်အုပ်စုက PDF တွေ အလင်းဝင်ဖို့နဲ့ လက်နက်တွေယူဆောင်လာရင် ပါလာတဲ့ လက်နက်၊ ခဲယမ်းအမျိုးအစားအလိုက် ငွေပေးမယ်လို့ ရေးသားထားတဲ့ ဝါဒဖြန့်ဗီနိုင်းတွေ လိုက်ကပ်နေတယ်လို့ သိရပါတယ်။

မြင်းမူမြို့၊ လူစည်ကားရာ မြို့မဈေးအနီးက သစ်ပင်တွေမှာ မေလ ၁၅ ရက် မနေ့မနက်ပိုင်းက အဲ့ဒီဝါဒဖြန့်ဗီနိုင်းတွေ လိုက်ကပ်နေပေမယ့် လူစိတ်ဝင်စားမှုမရှိဘူးလို့ မြို့ခံတဦးကပြောပါတယ်။

“ဝါဒဖြန့်ဗီနိုင်းကို စျေးတောင်ဘက်က ကုက္ကိုပင်တွေမှာ လာကပ်သွားတာ။ PDF တွေကို ငွေနဲ့မြှူဆွယ်နေတာ။ ဘယ်သူမှစိတ်မဝင်စားလို့ မြင်တဲ့သူတိုင်းကတော့ ဦးနှောက်ထဲတောင် ထည့်တဲ့ပုံမပေါ်ဘူး”လို့ ပြောပါတယ်။

မြင်းမူမြို့နယ်အတွင်း မြို့ပေါ်ရပ်ကွက်စစ်ကောင်စီတပ်စွဲထားတဲ့ နေရာတွေနဲ့ မုံရွာ-မန္တလေးလမ်းပိုင်းမှာ သွားလာနေတဲ့ စစ်ယာဉ်တန်းတွေ မကြာခဏမိုင်းဆွဲပစ်ခတ်တိုက်ခိုက်ခံနေရကာ ဒီအခြေအနေတွေကို မထိန်းချုပ်နိုင်လို့ အခုလိုလုပ်ဆောင်တာလို့ PDF တာဝန်ခံတဦးက တုန့်ပြန်ပြောဆိုပါတယ်။

“စစ်ကိုင်းတိုင်းကို သူတို့(စကစ) မစိုးမိုးနိုင်လို့၊ ကာကွယ်ရေးရဲဘော်တွေကို ရှုံးနေပြီဆိုတာသူတို့သိလို့၊ ဒီအကြောင်းတွေကို ပြည်သူတွေကနေတဆင့် ကျနော်တို့ဆီရောက်အောင်ပို့ခိုင်းပြီး သူတို့(စကစ) ညံ့တာကို ဝန်ခံသလိုပဲလို့ ကျနော်တို့မှတ်ယူပါတယ်” လို့ မြင်းမူအခြေပြု People’s Defense Comrade ပြန်ကြားရေးတာဝန်ခံ ထူးခန့်ဇော်(အမေ့သား)က ပြောပါတယ်။

စစ်ကောင်စီတပ်က ကပ်ထားတဲ့ဗီနိုင်းတွေမှာ PDF တွေလက်နက်နဲ့အလင်းဝင်ပါက ရိုင်ဖယ်တလက် ကျပ် သိန်း ၅၀၊ ပစ္စတိုတလက်ကျပ်သိန်း ၂၀၊ ပြောင်းချောသေနတ်တလက် ကျပ်သိန်း ၃၀၊ စိန်ပြောင်း/ လောင်ချာ၊ RPG တလက် ကျပ်သိန်း ၇၅ သိန်း၊ လက်လုပ်သေနတ်တလက် ကျပ် ၅ သိန်း၊ လက်လုပ် မိုင်း၊လက်ပစ်ဗုံးကျပ် ၃ သိန်း၊ စကားပြောစက်(Icon)တလုံးကျပ် ၂ သိန်းနဲ့ Drone တစီး ကျပ်သိန်း ၅၀ ပေးမယ်လို့ ရေးသားထားပါတယ်။

ဒါ့အပြင် စစ်အုပ်စုဘက်က ရေဦးကနေ မန္တလေးကိုသွားတဲ့ ခရီးသည်တင်ကားပေါ်တွေမှာလည်း အလားတူဝါဒဖြန့်ရေးသားထားတဲ့ လက်ကမ်းစာရွက်တွေကို ယာဉ်ပေါ်ပါခရီးသည်တွေဆီ ဖြန့်ဝေတာတွေ လုပ်ဆောင်နေတယ်လို့လည်း သူကဆက်ပြောပါတယ်။

PDF တွေကို ငွေနဲ့စည်းရုံးတဲ့ အဲ့ဒီဝါဒဖြန့်မှုတွေကို မေလ ၉ ရက်နေ့ကစတင်လို့ စစ်ကောင်စီရဲ့ သတင်းထုတ်ပြန်ရေး မီဒီယာတွေကနေတဆင့် ထုတ်ပြန်လာတာဖြစ်ပြီး လက်ရှိမှာ စစ်ကိုင်းတိုင်းအတွင်းက မြို့နယ်တချို့မှာပါ အခုလိုဗီနိုင်းတွေ လိုက်ကပ်နေတာပါ။

စစ်ကိုင်းတိုင်းဟာ မြို့တော်မုံရွာမြို့အပါအဝင် နယ်မြေဒေသအများအပြားကို စစ်ကောင်စီဘက်က ထိန်းချုပ်ဖို့ခက်ခဲနေတာဖြစ်ပြီး ပြီးခဲ့တဲ့ရက်ပိုင်းအတွင်းကဘဲ စစ်အာဏာသိမ်းခေါင်းဆောင် ဗိုလ်ချုပ်မှူးကြီးမင်းအောင်လှိုင်က သူ့ရဲ့တာချီလိတ်မြို့ခရီးစဉ်အတွင်းမှာ PDF ကို အပြတ်ရှင်းမယ်လို့ ပြောဆိုထားပါသေးတယ်။

စာတည်း- ရင်ငြိမ်း

မကွေး၊ ဇွန် ၁၃၊ ၂၀၂၂။

မကွေးတိုင်း၊ ငဖဲမြို့နယ်အတွင်းက PDF သင်တန်းဆင်း လူငယ် ၉ဦး စစ်ကောင်စီထံမှာ အလင်းဝင်ရောက်လာတယ်လို့ စစ်ကောင်စီ ဝါဒဖြန့်စာမျက်နှာ တခုဖြစ်တဲ့ “သတင်းစုံ” Fcaebook Page က ထုတ်ပြန်လာခဲ့ပါတယ်။

မ‌‌ကွေးတိုင်း ငဖဲမြို့နယ် တဝိုက်လှုပ်ရှားနေတဲ့ PDF တပ်ဖွဲ့ဝင်တွေအနေနဲ့ တယောက်မှ အခုလိုမျိုး အလင်းဝင်သွားတာမျိုး မရှိဘူးလို့ PRA မကွေးရဲ့ စစ်ဦးစီးချုပ် ဟာကျူလီက ပြောပါတယ်။

” စစ်ကောင်စီက ဝါဒဖြန့်ချိတဲ့ ပုံစံမျိုးနဲ့ လုပ်ဆောင်တာ ဖြစ်ပါတယ်၊ ဘယ်လိုလူမျိုးတွေလဲ ဆိုတော့ ၂၀၂၁ခုနှစ် ဖေဖော်ဝါရီလ မတ်လ တွေမှာ ဆန္ဒပြပြီးတော့ ဖမ်းခံရမှာ ကြောက်လို့ တမြို့တရွာတွေမှာ ‌ရှောင်နေတဲ့ သူတွေ၊ သူတို့ကိုယ် သူတို့ အိမ်ပြန်လာချင်တဲ့ အချိန်မှာ စစ်ကောင်စီဆီမှာ ခံဝန်ထိုးပြီးတော့မှ လာတဲ့ လူငယ်တွေ ဖြစ်ပါတယ်၊ ငဖဲမြို့နယ် အတွင်းမှာ လှုပ်ရှားဆောင်ရွက်နေတဲ့ PDF တပ်ဖွဲ့ဝင်တွေ တယောက်မှ မပါဘူးဆိုတာ ခိုင်ခိုင်မာမာ ပြောနိုင်ပါတယ်ခင်ဗျာ” လို့ PRA မကွေးရဲ့ စစ်ဦးစီးချုပ် ဟာကျုလီက ပြောပါတယ်။

စစ်ကောင်စီက ပြီးခဲ့တဲ့ ရက်ပိုင်းအတွင်းမှာ PDF တွေ လက်နက်ချပြီး အလင်းဝင်လာရင် လက်ခံကြိုဆိုသွားမယ်လို့ ထုတ်ပြန်အပြီးမှာ အခုလို ဝါဒဖြန့်တဲ့ သတင်းတခုကို တင်လာတာဖြစ်တယ်လို့ သိရပါတယ်။