ရဲတပ်ဖွဲ့ဝင်

အုတ်ဖို၊‌ ဇွန် ၂၊ ၂၀၂၆။

ပဲခူးတိုင်းအ‌နောက်ခြမ်း၊ သာယာဝတီခရိုင်၊ အုတ်ဖိုမြို့နယ်၊ ချောင်းခွ (ကေ) ကျေးရွာမှာ တပ်စွဲထားတဲ့ စစ်ကော်မရှင်စစ်ကြောင်းအတွက် ရိက္ခာယူပြန်လာတဲ့ ရဲ ၁ ဦးကိုဖမ်းဆီးပြီး သူနဲ့အတူပါလာတဲ့ ပေါ်တာဆွဲခံရသူကိုပါ ကယ်တင်နိုင်ခဲ့တယ်လို့ ၃၈၀၂ တပ်ရင်း၊ တပ်ခွဲ ၄ ဆီကသိရပါတယ်။

မေ ၃၁ ရက် မနက် ၆ နာရီဝန်းကျင်မှာ နေပြည်တော် ရဲတပ်ရင်း ၁၇ မှ ရဲကွန်မန်ဒိုသင်တန်းဆင်း ရဲတပ်ဖွဲ့၀င် မင်းမင်းထွန်းကို ချောင်းခွ (ကေ) ကျေးရွာအနီးမှာ လက်နက်ခဲယမ်းတွေနဲ့ဖမ်းမိပြီး အုတ်ဖိုမြို့နယ်၊ အောက်ကိုင်းကလေးကျေးရွာအုပ်စု၊ သရက်တောကျေးရွာက ပေါ်တာဆွဲဖမ်းစီးခံထားရတဲ့ ကိုပိုင်(ခ)အောင်ပိုင်စိုး ကယ်နိုင်ခဲ့တာလို့ ဆိုပါတယ်။

“ဒီနယ်မြေ မအေးချမ်းတဲ့နေရာမှာ ဆိုင်ကယ်မောင်းပြီးသွားနေတာကို ဘာလဲဆိုတာသိချင်လို့ လမ်းပေါ်တက်ပြီး ကင်းပုန်း၀ပ်ပြီး စောင့်ကြည့်တဲ့အခါမျိုးမှာ သူတို့ ၂ ယောက်က ရိက္ခာခြောက်တွေ ယူပြီးတော့ ပြန်လာတာတွေ့တာ။ ပြန်လာတာတွေ့လို့ ကျနော်တို့က ဖမ်းလိုက်တာပါ။ သူက နေပြည်တော် ရဲတပ်ရင်း ၁၇ သာ၀တ္ထိကလို့ပြောတယ်”လို့ တပ်ခွဲ ၄ မှ တာ၀န်ခံ ဗိုလ်တောက်တဲ့က မြေလတ်အသံကို ပြောပါတယ်။

ဖမ်းဆီးခံရတဲ့ ရဲတပ်ဖွဲ့၀င်ဟာ ကိုအောင်ပိုင်စိုးကို ခေါ်ပြီး ဆိုင်ကယ်နဲ့ ရိက္ခာခြောက်တွေယူပြီး ပြန်လာချိန်မှာ တော်လှန်ရေးတပ်ဖွဲ့‌၀င်တွေက စောင့်ဖမ်းခဲ့တာဖြစ်ပြီး MA 13‌ သေနတ် ၁ လက်၊ ကျည် ၄၂ တောင့်၊ ဖုန်း ၁ လုံး၊ ဆိုင်ကယ် ၁ စီး၊ ရိက္ခာခြောက်တွေနဲ့အတူ ဖမ်းမိခဲ့တာလို့ ဆိုပါတယ်။

“ရိက္ခာသွားယူတာတော့ ဘယ်ကိုသွားယူလဲ‌တော့ ကျနော်လည်းမသိဘူးဗျ။ ပို့မှာကတော့ ချောင်းခွမှာတပ်ဆွဲထားတဲ့ သူတို့စစ်ကြောင်းဆီကို ပြန်ပို့တာဗျ။ ဘယ်လိုရိက္ခာခြောက်ထုတ်တွေပါလဲဆိုရင် မားမားခြောက်ထုတ်တို့ ကြက်ဥဖာတို့ ငါးပိကြော်ဗူးတို့ ငါးကြော်နှပ်ဗူးတို့ ပါတာတော့တွေ့တယ်”လို့ အထက်ပါတာ၀န်ခံကပြောပါတယ်။

ချောင်းခွ (ကေ) ကျေးရွာမှာ စစ်ကော်မရှင်တပ်ဘက်က အင်အား ၈၀ နီးပါးနဲ့ တပ်စွဲထားပြီး စစ်ကြောင်း ၃ ကြောင်းခွဲကာ အနီး၀န်းကျင်ရွာတွေမှာတပ်ဖြန့်ထားသလို စုစုပေါင်းအင်းအား ၃၀၀ ၀န်းကျင်ရှိတယ် ဆိုတာကို ဖမ်းဆီးခံရသူရဲ့ပြောပြချအရ သိရတယ်လို့ ဆိုပါတယ်။

ဖမ်းဆီးရမိတဲ့ ရဲတပ်ဖွဲ့၀င်နဲ့ ကယ်တင်နိုင်ခဲ့တဲ့ ပြည်သူ ၁ ဦးကို လိုအပ်တဲ့ စစ်ဆေးမေးမြန်းမှုတွေနဲ့ လူသားချင်းစာနာထောက်ထားမှုဆိုင်ရာ စောင့်ရှောက်မှုတွေကို လုပ်ထုံးလုပ်နည်းနဲ့အညီ ဆက်လက် လုပ်ဆောင်နေတယ်လို့ ၃၈၀၂ တပ်ရင်း၊ တပ်ခွဲ ၄ ဆီကသိရပါတယ်။

စာတည်း – လင်း

မြေလတ်အသံ၊ စက်တင်ဘာ ၂၃၊ ၂၀၂၅။

ပဲခူးတိုင်း၊ နတ်တလင်းမြို့နယ်မှာ စစ်မှုထမ်းဖို့ ဖမ်းဆီးခံထားရသူလူငယ်က အစောင့်ရဲတပ်ဖွဲ့ဝင်တဦးကိုသတ်ပြီး လက်နက်ခဲယမ်းတွေယူဆောင်ထွက်ပြေးလာတယ်လို့ သာယာဝတီခရိုင် အမှတ် ၁ တပ်ရင်း ၃၈၀၁ ဆီက သိရပါတယ်။

ထွက်ပြေးလွတ်မြောက်လာသူဟာ တောင်ညိုကွက်သစ်ရဲစခန်းမှာ စစ်မှုထမ်းအဖြစ်ပို့ဆောင်ဖို့ဖမ်းဆီးခံထားရသူ အသက် ၁၈ နှစ်အရွယ် စိုင်းမြတ်ကို ဖြစ်ပြီး စက်တင်ဘာ ၂၁ ရက် ညပိုင်းမှာ အစောင့်ရဲတပ်သားကို ဓားနဲ့ထိုးသတ်ပြီး လက်နက်ခဲယမ်းတွေယူဆောင်ထွက်ပြေးလာပြီးနောက် PDF တွေဆီ ရောက်ရှိလာတာလို့ ဆိုပါတယ်။

” သူကလည်း စစ်မှုထမ်းအဖြစ် ဆွဲခံရတာ ၁၀ ရက်လောက်ပဲ ရှိသေးတယ်။ သူက သူတို့(ရဲတပ်ဖွဲ့) ယုံကြည်မှုကို ရအောင်ယူတယ်။ သူ့ကို တောင်ညိုရဲစခန်းမှာ လွတ်လပ်စွာထားတယ်၊ သူနဲ့အတူရှိနေတဲ့ ရဲတဦးကို အဲ့ဒီရဲရဲ့ဓါးနဲ့လည်ပင်းကို ထိုးဖောက်ပြီး လက်နက်ခဲယမ်းတွေကို တိတ်ဆိတ်စွာယူဆောင်နိုင်ခဲ့တယ်။ တိတ်ဆိတ်စွာယူဆောင်နိုင်ခဲ့တာလည်း သူတို့တန်းစီနေတဲ့အချိန် ဖြစ်ပါတယ်။ သူ့မှာထွက်ပေါက်ရာ လမ်းတခုရသွားတာပေါ့။ ဘန်ကာကင်းထဲမှာ သူနဲ့အတူရှိနေတဲ့ ရဲ** ၁ ကောင်ကို သူသုတ်သင်ရှင်းခဲ့ပြီးတော့ သူထွက်ပြေးတိမ်းရှောင်လာခဲ့တာ” လို့ သာယာဝတီခရိုင်အမှတ် ၁ တပ်ရင်း ၃၈၀၁ တပ်ရင်းမှူး ဗိုလ်မိုးကြိုး က မြေလတ်အသံကို ပြောပါတယ်။

စိုင်းမြတ်ကိုဟာ ပြီးခဲ့တဲ့ စက်တင်ဘာဒုတိယပတ်အတွင်းက တောင်ညိုကွက်သစ်ဈေးတန်းမှာ စစ်ကော်မရှင်တပ်နဲ့ ရဲတပ်ဖွဲ့ဝင်တွေရဲ့ လူ၊ ဆိုင်ကယ်တွေကို စစ်ဆေးဖမ်းဆီးချိန် စစ်မှုထမ်းဖို့ ဖမ်းဆီးခံခဲ့ရတာဖြစ်ပြီး စစ်သင်တန်းပို့ဆောင်ဖို့ တောင်ညိုရဲစခန်းထဲ ထိန်းသိမ်းထားစဥ် အခုလိုထွက်ပြေးလွတ်မြောက်လာခဲ့တာလို့ သိရပါတယ်။

ကိုစိုင်းမြတ်ကိုနဲ့ အတူ သေဆုံးရဲတပ်သားရဲ့ G-3 သေနက် ၁ လက်၊ ၇.၆၂ မမ ကျည် ၁၀ တောင့်၊ ကျည်ဘောက် ၁ ခု ယူဆောင်လာနိုင်လို့ ၎င်းကို သိန်း ၂၀ ဆုချီးမြှင့်ထားတယ်လို့ တပ်ရင်းမှူးက ပြောပါတယ်။

စာတည်း – ဟိန်းစံ

ချောက်၊ ဧပြီ ၁၄၊ ၂၀၂၃။

မကွေးတိုင်း၊ ချောက်မြို့နယ်၊ အမှတ် ၇ အုတ်ဖိုရပ်ကွက် သင်္ကြန်မဏ္ဍပ်မှာ ဧပြီလ ၁၄ ရက် ဒီနေ့မနက်ပိုင်းမှာ ဗုံးတလုံးတွေ့ပြီး ရဲတွေက ဝါးလုံးနဲ့ထိုးဆွလို့ ကွဲသွားတယ်လို့ ချောက်မြို့ခံတွေဆီက သိရပါတယ်။

“မနက်က ဗုံးတွေ့တာလည်း ဟုတ်တယ်။ ဗုံးကွဲတာလည်း ဟုတ်တယ်။ အထုပ်တွေ့လို့ဆိုပြီးတော့ ရဲတွေကို လှမ်းခေါ်တာ။ အထုပ်တွေ့တော့ လမ်းကိုရှင်းထားပြီး စခန်းလှမ်းခေါ်တာ။ ရဲ ၅ ယောက် ၆ ယောက်လောက် လာတယ်။ ပထမ ရဲတွေက သေနက်နဲ့ဖောက်မယ်ဆိုပြီး လုပ်တာ။ ရဲတွေက ဗုံးကိုဝါးလုံးနဲ့ဆွတာမှာ ဗုံးကထကွဲတာ။ ဘယ်သူ့မှမရှိတဲ့အချိန်ကွဲတာ၊ထိခိုက်ဒဏ်ရာရရှိသူတော့မရှိဘူး။ အဲဒီပတ်ဝန်းကျင်က ဆိုင်ခန်းတံခါးတွေ မှန်တာတော့ရှိတယ်” လို့ ချောက်မြို့ခံ အမျိုးသမီးတဦးက ပြောပါတယ်။

ဗုံးတွေ့ခဲ့တဲ့ မဏ္ဍပ်မှာ မဏ္ဍပ်ကြီးတခုဖြစ်ပြီး ယခင်နှစ်တွေက ယိမ်းတွေပါ ထည့်သွင်းခဲ့တယ်လို့ မြို့ခံတွေဆီက သိရပါတယ်။

ချောက်မြို့မှာ ရေကစားသူတွေမရှိသလောက် ဖြစ်နေပြီး ဗိုလ်အိမ်နံပါတ် ၆၀ မှာ မဏ္ဍပ်တခု အမှတ် ၈ ထဲမှာ ဗဟိုမဏ္ဍပ်တို့ရှိပြီး ဗဟိုမဏ္ဍပ်ထိပ်မှာ ဟိုဘက်ဒီဘက်ပိတ်ထားသလို ဆိုင်ကယ် အမျိုးသား ၂ ယောက်စီးတာတွေကို လိုက်ဖမ်းနေတယ်လို့ သိရပါတယ်။

စာတည်း – 007

မြေလတ်အသံ၊ ဧပြီ ၁၁၊ ၂၀၂၃။

ညောင်ခါးရှည် X-ray ဂိတ်မှာ အစစ်အဆေးခံ၊ ဂိတ်ကြေးပေးဆောင်ပြီးသား ခရီးသည်တင်နဲ့ ကုန်တင်ကားတွေကို စစ်ကောင်စီလက်အောက်ခံ နယ်ထိန်းရဲဦးဆောင်တဲ့ ရဲတပ်ဖွဲ့ဝင်တွေက စစ်ဆေးရေးအကြောင်းပြကာ အတင်းအဓမ္မ ပိုက်ဆံတောင်းခံနေတယ်လို့ ရန်ကုန်-မြဝတီကို အသွားအပြန်လုပ်နေကြတဲ့ ယာဥ်မောင်းတွေက ပြောပါတယ်။

စစ်ဆေးပြီးသား မော်တော်ယာဥ်တွေကို ဘုရားကြီးမြို့ပေါ်မှာ ထပ်မံတားဆီးစစ်ဆေးပြီး ငွေတောင်းခံတာဖြစ်လို့ ယာဥ်မောင်းတွေက မပေး‌ဆောင်လိုကြောင်း ပြောတဲ့အခါ ယာဥ်မောင်းတွေကို ဖမ်းဆီးခေါ်ဆောင်ကာ ရဲစခန်းတွင် အမှုဖွင့်အရေးယူမယ့်အထိ ခြိမ်းခြောက်တာလို့ ကိုယ်တိုင်ကြုံတွေ့ခဲ့ရတဲ့ ယာဉ်မောင်းတဦးက မြေလတ်အသံကို ပြောပါတယ်။

“ပတ်ကင်းကားပုံစံနဲ့ လာသမျှကားတွေကို ငွေညစ်နေတာ၊ အဲ့ဒီဘက်မှာ စစ်တပ်ကတောင် အဲ့လောက်မဟုတ်တော့ဘူး။ သူတို့ရဲတွေပဲ တော်တော်ဆိုးဆိုးဖြစ်နေတာ၊ စကားအပြောဆိုမတတ်တဲ့သူတွေဆို စခန်းထဲအထိ ခေါ်သွားပြီး ငွေညစ်တယ်။ ကျနော်တို့မှာ ဟိုလည်းပေးရ ဒီလည်းပေးရ၊ လုံခြုံရေးကို အကြောင်းပြပြီး ကုန်တင်ကားတွေ Express တွေကို ပြဿနာမရှိ၊ ပြဿနာရှာ သေနတ်ပြပြီး ဓားပြတိုက်နေသလိုပါပဲ” လို့ ပြောပါတယ်။

အဲ့ဒီ နယ်ထိန်းရဲဦးဆောင်တဲ့အဖွဲ့ဟာ ရန်ကုန်-မော်လမြိုင်လမ်း၊ ရန်ကုန်-မန္တလေး(လမ်းဟောင်း) ကားလမ်းပိုင်းတွေမှာ အဓိကထား မတရားငွေကောက်ခံတာတွေ လုပ်နေပြီး ကားအဝင်များတဲ့ လမ်းတွေကိုပဲ ဦးစားပေးစစ်ဆေးပြီး ပိုက်ဆံတောင်းနေတာ ဖြစ်တယ်လို့ ဆိုပါတယ်။

“တဂိတ်ကို အနည်းဆုံးက ၅၀၀၊ ၁၀၀၀ပဲ။ တ‌ခါကားထွက်ရင် မြဝတီအထိဆို ဂိတ်ပေါင်းက ၂၀ နဲ့အထက်ပဲ မရေတွက်နိုင်ဘူး၊ ကြာတော့ မကိုက်တော့ဘူးလေ။ ရှာသမျှက သူတို့ဂိတ်ကြေးပေးရတာနဲ့ပဲ ကုန်သွားတယ်” လို့ ပဲခူးမြို့အခြေပြုပြီး ကုန်ကားမောင်းနှင်နေသူတဦးက ပြောပါတယ်။

ဘုရားကြီးမြို့မှာရှိတဲ့ ရွှေသံလွင်စစ်ဆေးရေးဂိတ်ဟာ ပြည်သူတွေ တိုင်ကြားတာကြောင့် ပြီးခဲ့တဲ့နှစ် ဖေဖော်ဝါရီလထဲက ဖျက်သိမ်းလိုက်တာဖြစ်ပြီး၊ အဲ့ဒီနောက်မှာတော့ ဂိတ်မထိုင်တော့ဘဲ ကားနဲ့လှည့်ကာ ငွေတောင်းခံတာတွေ လုပ်နေတာဖြစ်တယ်လို့ ဆိုပါတယ်။

စာတည်း – ရင်ငြိမ်း

ပဲခူး၊ ဧပြီ ၃၊ ၂၀၂၃။

ပဲခူးတိုင်းအနောက်ခြမ်း၊ ပြည်ခရိုင်၊ ပေါင်းတည်မြို့နယ်၊ တောင်ပို့လှအုပ်စု သရက်ချဥ်ရွာ ဘုရားထီးတင်ပွဲကနေ ပြန်လာတဲ့ရဲတွေကို ဧပြီလ ၂ ရက်မနေ့ညက မိုင်းဆွဲတိုက်ခိုက်ခဲ့တယ်လို့ ပေါင်းတည်မြို့နယ် ပြည်သူ့ကာကွယ်ရေးတပ်ဖွဲ့ဝင် တဦးဆီက သိရပါတယ်။

သရက်ချဥ်ရွာနဲ့ နတ်ပုတီးရွာကြားမှာ ဆိုင်ကယ် ၅ စီးနဲ့ ပေါင်းတည်မြို့ဘက်ကို ပြန်လာတဲ့ ပေါင်းတည်ရဲစခန်းက ရဲ ၇ ဦးလောက်ကို ည ၉ နာရီခွဲခန့်မှာ နန်းထိုက်အောင်စစ်ဆင်ရေးအဖြစ် မိုင်းဆွဲခဲ့တာလို့ ဆိုပါတယ်။

“သူတို့ပြန်လာတဲ့အချိန်မှာ နောက်ဆုံးက ဆိုင်ကယ် ၂ စီးကို ရိုးမြောင်းကူးတံတားနား မိုင်းဆွဲခဲ့တာပါ။ ထိခိုက်မှုတော့ မသိရသေးပေမယ့် ထိခိုက်မှုတော့ ရှိနိုင်တယ်” လို့ ပေါင်းတည်ပြည်သူ့ကာကွယ်ရေးတပ်ဖွဲ့ဝင် တဦးက ပြောပါတယ်။

ဒီတိုက်ခိုက်မှုကြောင့် ရဲ ၁ ဦးထိခိုက်ဒဏ်ရာရခဲ့ပြီး အဲ့ဒီရဲကို ကားနဲ့လာသယ်သွားတယ်လို့ သိရကြောင်း ဒေသခံတဦးက ဆိုပါတယ်။

“ဘုရားပွဲမှာက လောင်းကစားဝိုင်းရှိတယ်။ ဘုရားပွဲကနေ တောင်ပို့လှရွာက သူတို့အသိအိမ်မှာ ဘီယာသောက်ပြီးအပြန် လမ်းမှာ မိုင်းဆွဲခံရတာ။ ရဲ ၁ ဦး ထိခိုက်ဒဏ်ရာရသွားပြီး ဒဏ်ရာရသူကို ကားနဲ့လာသယ်သွားတယ်” လို့ ပြောပါတယ်။

ဒီစစ်ဆင်ရေးကို ပေါင်းတည်မြို့နယ် ပြည်သူ့ကာကွယ်ရေးတပ်ဖွဲ့ တပ်ခွဲ ၃၊ တပ်ခွဲ ၄ က ပူးပေါင်းလုပ်ဆောင်ခဲ့တာဖြစ်ပြီး၊ ရဲတွေဘက်က ထိခိုက်မှုအခြေအနေနဲ့ပတ်သက်ပြီး မြေလတ်အသံက သီးခြားအတည်မပြုနိုင်သေးပါဘူး။

ပြီးခဲ့တဲ့ မတ်လ ၁၄ ရက်ကလည်း ပေါင်းတည်မြို့နယ်၊ လက်ပံပါးပျဥ်းရွာက စစ်တပ်သတင်းပေးလို့ လူသိများသူ အမျိုးသားတဦးကို အဲ့ဒီရွာအနီးမှာပဲ နန်းထိုက်အောင်စစ်ဆင်ရေးအဖြစ် ပေါင်းတည်ပြည်သူ့ကာကွယ်ရေးတပ်ဖွဲ့က ရှင်းလင်းခဲ့ပါသေးတယ်။

ပေါင်းတည်မြို့နယ်ကို စစ်ကောင်စီက အခုနှစ်ဖေဖေါ်ဝါရီလ ၂ ရက်ကစတင်ကာ မာရှယ်လော ထုတ်ပြန်ထားတာဖြစ်ပြီး မြို့နယ်အတွင်းမှာတော့ မြို့ပြပြောက်ကျားအဖွဲ့တွေနဲ့ စစ်ကောင်စီတပ်တို့ မကြာခဏဆိုသလို ထိတွေ့တိုက်ခိုက်မှုတွေ ဖြစ်ပွားလျှက်ရှိနေတာလည်း ဖြစ်ပါတယ်။

စာတည်း – လင်း

ပဲခူး၊ မတ် ၂၈၊ ၂၀၂၃။

ပဲခူးတိုင်း၊ ပဲခူးခရိုင်၊ ကဝမြို့နယ်၊ အုန်းနှဲကျေးရွာ ဘီယာဆိုင်မှာထိုင်နေတဲ့ ရဲတပ်ဖွဲ့ဝင် ၈ ဦး မတ်လ ၂၆ ရက် ည ၁၀ နာရီခွဲဝန်းကျင်က သေနတ်နဲ့ပစ်ခတ်ခံရလို့ ၁ ဦး သေဆုံးကာ ၄ ဦး ဒဏ်ရာရရှိသွားတယ်လို့ သိရပါတယ်။

ပစ်ခတ်ခံရတဲ့ရဲတွေဟာ စစ်ကောင်စီလက်အောက် အုန်းနှဲရွာနယ်မြေရဲစခန်းက ဖြစ်ပြီး ညကင်းပတ်ပြီးပြန်လာချိန် စစ်ကောင်စီခန့် အုန်းနှဲကျေးရွာအုပ်ချုပ်ရေးမှူး ဦးစန်းမြင့်ပိုင် အာကာမိုးဘီယာဆိုင်မှာ နားနေချိန် တိုက်ခိုက်ခဲ့တာဖြစ်ပြီး နယ်ထိန်းရဲ နိုင်ဦး (ခ) ပြောင်ကြီးနေရာမှာ သေဆုံးပြီး စခန်းမှူးအပါ ၄ ဦး ထိခိုက်ဒဏ်ရာရရှိခဲ့တယ်လို့ ကဝမြို့နယ် ပကဖအဖွဲ့တာဝန်ရှိသူတဦးက မြေလတ်အသံကို ပြောပါတယ်။

“ညဘက်ကင်းပတ်ပြီး အဲ့ဒီအချိန်လောက်ဆို အုပ်ကြီးဘီယာဆိုင်မှာ ထိုင်နားနေကြ။ သူတို့ဘက်ကလည်း လက်ပစ်ဗုံးနဲ့ ပြန်ပစ်တာရှိပေမယ့် ပြန်လှန်ပစ်ခတ်ရင်း ကျနော်တို့ဘက်က လက်ဦးသွားလို့ ရဲတွေဘက်က ၁ ယောက် သေတယ်။ သေတာက နယ်ထိန်းရဲ။ စခန်းမှူးအပါ ၄ ယောက် ထိခိုက်ဒဏ်ရာ ရသွားတာ။ စခန်းမှူးကတော့ ခါးရိုးထဲမှာ ကျည်စိုက်ဝင်တယ်လို့ ပြန်ကြားရတယ်” လို့ ပြောပါတယ်။

တချိန်တည်းမှာ ပစ်ခတ်မှုဖြစ်ပွားတဲ့ဆီ ကဝမြို့နယ်၊ သက္ကလရဲစခန်းက ရဲတပ်ဖွဲ့ဝင်တွေ စစ်ကူလာရောက်မယ့်လမ်းကြောင်းကို စောင့်ကြိုမိုင်းခွဲနိုင်ခဲ့လို့ သက္ကလရဲတွေ စစ်ကူမသွားရောက်နိုင်ဘဲ စခန်းအတွင်းကနေသာ ပစ်ခတ်တာတွေ ပြုလုပ်ခဲ့တယ်လို့ သူကဆက်ပြောပါတယ်။

သေဆုံးတဲ့ရဲနဲ့ ဒဏ်ရာရရဲတွေကို အုန်းနှဲတိုက်နယ်ဆေးရုံကို ပို့ဆောင်ထားတယ်လို့သိရပြီး နောက်ဆက်တွဲသတင်းကိုတော့ မသိရသေးပါဘူး။

ပြီးခဲ့တဲ့ မတ်လ ၁၀ ရက်ညကလည်း ကဝမြို့နယ်၊ သရက်ကုန်းရွာက ပျူစောထီးလို့ သတင်းထွက်ပေါ်နေသူ ကိုတင်မြင့်ကိုလည်း ကဝ ပကဖက သုတ်သင်ခဲ့ပါသေးတယ်။

စာတည်း – ရင်ငြိမ်း