ယင်းမာပင်

စစ်ကိုင်း၊ မေ ၁၀၊ ၂၀၂၃။

စစ်ကိုင်းတိုင်း၊ ယင်းမာပင်ခရိုင်၊ ယင်းမာပင်မြို့နယ်အတွင်းမှာ စစ်ကောင်စီတပ်ရဲ့ မီးရှို့ဖျက်ဆီးတာကို ခံခဲ့ရတဲ့ကျေးရွာက အသက်ကြီး အဘိုး၊ အဘွားတွေအတွက် အညာပစ်တိုင်းထောင်လေးများအဖွဲ့က ပုဆိုးနဲ့ ထမီတွေကို မေလ ၉ ရက်မှာ လှူဒါန်းခဲ့ပါတယ်။

မီးရှို့ခံခဲ့ရတဲ့ ကျေးရွာက အဘိုး၊ အဘွား ၁၁၇ ဦးကို လုံချည် တယောက်တထည် ဂါရဝပြုလှူဒါန်းခဲ့တယ်လို့ အညာပစ်တိုင်းထောင်လေးများအဖွဲ့မှ မဖူးပွင့်ဝေက ဆိုပါတယ်။

စာတည်း – လင်းဇေ

ယင်းမာပင်၊ ဧပြီ ၂၇၊ ၂၀၂၃။

စိုက်ပျိုးစရိတ်တွေကြီးမြင့်လာမှုနဲ့ စစ်ကောင်စီတပ်တွေ စစ်ကြောင်းထိုးတာတွေကြောင့် စစ်ကိုင်းတိုင်း၊ ယင်းမာပင်မြို့နယ်အတွင်းက ကြက်သွန်စိုက်ပျိုးကြတဲ့တောင်သူတွေဟာ ကြက်သွန်ပေါ်ချိန်မှာ အရှုံးနဲ့ရင်ဆိုင် နေကြရတယ်လို့ ဒေသခံတွေက ဆိုပါတယ်။

ကြက်သွန်နီတပိဿာကို ကျပ် ၂၀၀၀ လောက်ရမှ အမြတ်ကျန်နိုင်မှာဖြစ်သော်လည်း အခုလက်ရှိမှာ ကြက်သွန်နီ တပိဿာကို ၈၀၀ ကျပ်၊ ၈၅၀ ကျပ်လောက်သာရတာကြောင့် တောင်သူတွေဟာ သိန်းချီကာ ဆုံးရှုံးနေကြရပါ တယ်။

လက်ရှိ ရန်ကုန်ဘုရင့်နောင် ပေါက်ဈေးကတော့ ကြက်သွန်နီ တပိသာကို ၁၃၅၀ ကျပ်မှ ၁၆၀၀ ကျပ်အထိ ဈေးပေါက်နေပါတယ်။

ပုံမှန်ဆိုရင် ကြက်သွန်စိုက်တောင်သူတွေဟာ ကြက်သွန်ကို ဆောင်းရာသီမှာစိုက်ပျိုးကာ တန်ခူးလမှာ နှုတ်ကြပါ တယ်။ အဲဒီအချိန်ဟာ ကြက်သွန်ပေါ်တဲ့အချိန်ဖြစ်လို့ ဈေးကျတတ်တာကြောင့် တောင်သူအများစုက ဈေးကောင်းရတတ်တဲ့ ဝါဆို၊ ဝါခေါင်လအထိ သိုလှောင်ပြီး ရောင်းချလေ့ရှိပါတယ်။

“မီးရှို့ခံရတာတွေ ကြောက်ကြတော့ ဈေးမမျှော်တော့ဘဲ အရင်းလေးရရင်ဆိုပြီး ရောင်းပစ်ရတာ၊ လုံးလုံးဆုံးရှုံး မှာထက်စာရင် ရသလောက်လေးဆိုပြီး လက်လွှတ်လိုက်ရတာပေါ့။ မနှစ်က‌ဆို ကြက်သွန်တွေ စင်လိုက်ထားကြ တယ်။ မီးထဲပါသွားတယ်။ တလုံးမှ ရောင်းမစားလိုက်ရတဲ့အဖြစ်မျိုးထိရှိတယ်။ အဲ့လိုအတွေ့ကြုံတွေရှိခဲ့တော့ ကြာကြာမထားရဲဘူး”လို့ တောင်သူ အမျိုးသမီးတဦးက ပြောပါတယ်။

အာဏာသိမ်းစကာလတုန်းက ပုလဲမြေဆီတအိတ်ကို ကျပ် ၇သောင်း၊ ပိုးသတ်ဆေး တဘူး ကျပ် ၃၀၀၀၊ ဓာတ်ဆီ တဂါလံ ကျပ် ၄၅၀၀၊ အလုပ်သမားငှားခ အမျိုးသား ကျပ် ၆၀၀၀၊ အမျိုးသမီး ကျပ် ၃၀၀၀ရှိပြီး အခုနှစ်မှာတော့ မြေဆီတအိတ် ကျပ် ၁သိန်းခွဲ၊ ပိုးသတ်ဆေးတဘူး ကျပ် ၁၂၀၀၀၊ ဓာတ်ဆီတဂါလံ ကျပ် ၁၂၀၀၀၊ အလုပ်သမားငှားက အမျိုးသား ၈၀၀၀ ကျပ်၊ အမျိုးသမီး ကျပ် ၄၀၀၀ထိ ‌မြင့်တက်လာခဲ့တယ်လို့ သိရပါတယ်။

ဒီလို ဓာတ်မြေဩဇာစရိတ်တွေ မြင့်တက်လာလို့ ဝယ်ယူမသုံးနိုင်တဲ့အခါ အရင်က တဧကကို သွန်ကြက်နီ ပိဿာ ၃၀၀၀ နီးပါးရာထွက်ရာမှ အခုကတော့ တဧကကို ပိဿာ ၁၀၀၀ လောက်သာထွက်တော့တယ်လို့လည်း တောင်သူတွေက ပြောပါတယ်။

ကြက်သွန်တရာသီကို မြေအမျိုးစားပေါ်မူတည်ပြီး သဲမြေဆိုရင် ၁၀ကြိမ်၊ နုံးမြေဆိုရင် ၅ကြိမ် မဖြစ်မနေ ရေသွင်းပေးရပေမယ့် ဓာတ်ဆီဈေးတွေက အဆမတန်တက်လာတဲ့အတွက် တရာသီကို ၃ ခါလောက်သာ ရေသွင်းစိုက်ပျိုးနိုင်တာကြောင့် အထွက်နှုန်း ထပ်ဝက်ကျော်ကျကာ အလုံးလည်း မလှတော့တဲ့အတွက် ဈေးအနှိမ်ခံရတာလည်း ဖြစ်ပါတယ်။

ဒါ့အပြင် မကြာခဏ စစ်ကောင်စီရဲ့ စစ်ကြောင်းတွေ ထိုးနေတာကြောင့် အရင်က အလုပ်သမား ၁၀ယောက်နဲ့ လုပ်ရမယ့်နေရာမှာ အမြန်ပြီးလိုတဲ့အတွက် အလုပ်သမား အယောက် ၂၀ လောက်ခေါ်ကာ လုပ်နေရလို့ စိုက်ပျိုးစရိတ်တွေ ပိုကုန်ချတယ်လို့ ဆိုပါတယ်။

“စိုက်ပျိုးရေးကို ပြေးရင်းလွှားရင်းလုပ်နေရတော့ မြေဆီမြေဩဇာတွေမထည့်နိုင်တော့ မှန်းသလောက်မထွက် ဘူး။ မစိုက်လို့ရှိရင်လည်း စားစရာမရှိမှာစိုးလို့။ ရှုံးတယ်၊ မြတ်တယ်မတွက်ဘဲ ကံစွန့်ပြီးလုပ်ကြရတာ”လို့ တောင်သူတဦးက ပြောပါတယ်။

တောင်သူတချို့ကတော့ အရင်က ကိုယ်တိုင်စိုက်ပျိုးပါက တနှစ်ကို ကျပ်သိန်း ၃၀ လောက်ဝင်ငွေရနိုင်တဲ့ လယ်ယာမြေတွေကို အခုအခါ စိုက်ပျိုးစရိတ်အရင်းအနှီးမတတ်နိုင်တော့တဲ့အတွက် ၃ နှစ်ကို ကျပ် ၁၀ သိန်းလောက်နဲ့ လယ်ယာတွေကို နှစ်ချုပ်သဘောမျိုး အငှားချကာ စားသောက်နေရတယ်လို့ ဆိုပါတယ်။

“အာဏာသိမ်းပြီးကတည်းက ကြက်သွန်မစိုက်နိုင်တော့တာ၊ မင်းဆိုးမင်းညစ်ကြားထဲမှာနေရတာဆိုတော့ ကျန်းမာရေးအတွက် ရတဲ့ဈေးလေးနဲ့တင်းတိမ်ပြီး နေရ‌တာပေါ့ရှင်။ အရင်ကတော့ ကိုယ်ကယာပိုင်ဆိုတော့ အလုပ်သမားတွေ ငှားပြီးလုပ်တာ၊ အခုကျ ကိုယ်တိုင်သူများဆီမှာ အလုပ်သမားလိုက်လုပ်နေရတဲ့ ဘဝရောက် သွားတယ်။ တနေ့လုံးလုပ်တာ ညီမ ၂ ယောက် ၈၀၀၀ ရတယ်။ အဲတာလေးနဲ့ပဲ ဒီတော်လှန်ရေးကာလမှာ ဖြစ်သလိုနေနေရတယ်”လို့ လယ်ထဲမှာ နေ့စားလုပ်နေရတဲ့ တောင်သူအမျိုးသမီးတဦးက ပြောပါတယ်။

စစ်အာဏာသိမ်းပြီးနောက်ပိုင်း တောင်သူအများစုဟာ စိုက်ပျိုးစရိတ်တွေ အဆမတန်တက်နေတဲ့အပြင် စစ်ရှောင်ရတာတွေလည်းရှိနေတဲ့အတွက် စိုက်ပျိုးရေးကို တစိုက်မတ်မတ်မလုပ်နိုင်ကြတော့ဘူးလို့ ဆိုပါတယ်။

စာတည်း – လင်းဇေ

ယင်းမာပင်၊ ဧပြီ ၁၉၊ ၂၀၂၃။

စစ်ကိုင်းတိုင်းဒေသကြီး၊ ယင်းမာပင်မြို့နယ်နဲ့ ဆားလင်းကြီးမြို့နယ်ထဲမှာ အပူရှိန်ပြင်းလာလို့ ​ဒေသကာကွယ်​ရေးအဖွဲ့တွေအနေနဲ့ သောက်သုံးရေရဖို့နဲ့ လက်နက်ခဲယမ်းတွေ သိုလှောင်ထုတ်လုပ်ဖို့ အခက်ကြုံလာနေရတယ်လို့ ဒေသကာကွယ်ရေးအဖွဲ့ဆီက သိရပါတယ်။

ဆားလင်းကြီးမြိုနယ်ထဲမှာ ဧပြီလလယ် အပူရှိန်က ၄၃ ဒီဂရီထိရှိလာပြီး အပူရှိန်မြင့်လာလို့ အခြားနေရာတွေကနေ ရေသယ်နေရသလို ကိုယ့်အားကိုယ်ကိုးထုတ်လုပ်ထားတဲ့ လက်နက်ခဲယမ်းတွေ အပူရှိန်ကြောင့် အန္တရာယ်မဖြစ်ဖို့ သတိထားနေရတယ်လို့ Salingyi Border Task Force တာဝန်ရှိသူက ပြောပါတယ်။

“ရေရဖို့အတွက် ရဲဘော်တွေကို သီးသန့်တာဝန်ပေးပြီး ခိုင်းနေရသလို စခန်းနားမှာ ရေမရှိတော့ ရေရမယ့် တော်တော်လှမ်းတဲ့နေရာထိ သွားယူနေရတော့ ပင်မအလုပ်တွေပျက်တာရှိတယ်။ နောက်တခုက လက်နက်ခဲယမ်းတွေထုတ်ဖို့ စက်တွေမောင်းပြီးလုပ်ရတဲ့အခါ အပူရှိန်​ကြောင့် အချိန်ပြည့်မလုပ်နိုင်ဘူး နားနားပြီး လုပ်နေရတယ်။ ထုတ်လုပ်ပြီးသားတွေဆိုလည်း ရာသီဥတုကြောင့် တခုခုမ​ဖြစ်သွားအောင်ဂရုစိုက်နေရတယ်” လို့ ပြောပါတယ်။

အပူရှိန်ထပ်မံမြင့်တက်လာပါက သောက်သုံးရေအခက်အခဲပိုဖြစ်လာနိုင်ပြီး လက်နက်ခဲယမ်းတွေ ထုတ်လုပ်ဖို့အချိန်ယူလုပ်ကိုင်ရမယ့် အခြေနေဖြစ်လာနိုင်တယ်လို့ ဆိုပါတယ်။

“သောက်ရေအတွက်က စခန်းနဲ့တမိုင်လောက်သွားပြီး ခပ်နေရတယ်။ သုံးရေကတော့ နီးစပ်ရာကနေ အဆင်ပြေသလိုယူနေရတယ်။ လက်နက်တွေ ထားသိုတာကတော့ ရဲဘော်တွေနဲ့ ခပ်လှမ်းလှမ်းနေရာမှာ မြေကျွင်းတူးပြီး ဘန်ကာစနစ်တကျဆောက်ပြီး ထားထားရတာ။ မြေပေါ်မှာထားလို့က ခုလိုအပူရှိန်နဲ့ဆို ဘယ်လွယ်မလဲ။ ပေါက်ကွဲကုန်မှာပေါ့” လို့ ယင်းမာပင်ခရိုင် အမှတ် ၁၀ တပ်ရင်း တာဝန်ရှိသူတဦးကပြောပါတယ်။

အပူရှိန်ကြောင့် ဒေသခံတွေမှာလည်း သောက်သုံးရေပြသနာကို ရင်ဆိုင်နေရပြီး လွန်ခဲ့တဲ့ ၃ ရက်လောက်က ကျေးရွာတရွာက အသက် ၈၀ ကျော်အဖွဲ့အိုတဦးဟာ အပူရှိန်ကြောင့် ကွယ်လွန်သွားခဲ့ရတယ်လို့ သိရပါတယ်။

ဒါ့အပြင် စစ်ကောင်စီ ထိုးစစ်ကြောင့် တောတောင်ထဲ ထွက်ပြေးနေရတဲ့ ဆားလင်းကြီးနယ်က စစ်ဘေးရှောင် ၆၀၀၀ ခန့်မှာလည်း သောက်သုံးရေပြသနာနဲ့ အပူဒဏ်ခံရတဲ့ဒဏ်တွေကို ခံစားနေရတယ်လို့ သိရပါတယ်။

စစ်ကောင်စီလက်အောက်ခံ မိုးလေဝသနဲ့ ဇလဗေဒညွှန်ကြားမှုဦးစီးဌာနကတော့ စစ်ကိုင်းတိုင်းနဲ့ မကွေးတိုင်းထဲမှာ အမြင့်ဆုံးနေ့အပူချိန် ၄၃ ဒီဂရီစင်တီဂရိတ် နဲ့ ၄၅ ဒီဂရီစင်တီဂရိတ် တို့ ရှိနိုင်တယ်လို့ ခန့်မှန်းထားပါတယ်။

စာတည်း-007

ယင်းမာပင်၊ ဧပြီ ၁၄၊ ၂၀၂၃။

စစ်ကိုင်းတိုင်း၊ ယင်းမာပင်မြို့နယ်မှာ ဧပြီလ ၁၄ ရက် ဒီကနေ့သင်္ကြန်အကျနေ့မနက် ၉ နာရီလောက်မှာ တော်လှန်ရေးအင်အားစုအဖွဲ့ဝင်တွေက စစ်အာဏာရှင် ဆန့်ကျင်ရေးသပိတ်ပြုလုပ်ရင်း တော်လှန်သံချပ်တွေနဲ့ ဖျော်ဖြေခဲ့တယ်လို့ သိရပါတယ်။

“စစ်တပ်စီးပွား ဒို့ငြင်းဆန် တော်လှန်သင်္ကြန် ပြည်သူ့အသံ” စာတန်းနဲ့အတူ ယင်းမာပင် – ဆားလင်းကြီးရွာပေါင်းစုံသပိတ်စစ်ကြောင်းရဲ့ ၇၆၄ ရက်မြောက်နေ့အဖြစ် ပြုလုပ်ခဲ့ရာ မြို့နယ်တွင်းက သပိတ်အင်အားစုတွေက လာရောက်ပူးပေါင်းခဲ့တယ်”လို့ သပိတ်ကော်မတီဝင်တဦးက ပြောပါတယ်။

ဆန္ဒပြအဖွဲ့နဲ့အတူ ရွာပေါင်းစုံသံချပ်အဖွဲ့၊ ရွှေရေကြည်သံချပ်အဖွဲ့နဲ့ ကယ်တင်ရှင်မရှာ တို့ကျေးရွာ သံချပ်အဖွဲ့တို့က တော်လှန်သံချပ်တွေနဲ့ ဖျော်ဖြေပြီး၊ ယင်းမာပင်မြောက်ခြမ်းသပိတ်အင်အားစုက တော်လှန်သီချင်းနဲ့ ဖျော်ဖြေခဲ့တယ်လို့ သိရပါတယ်။

ယင်းမာပင်၊ ဧပြီ ၁၄၊ ၂၀၂၃။

စစ်ကိုင်းတိုင်း၊ ယင်းမာပင်မြို့နယ်မှာ ဧပြီ ၁၃ ရက် သင်္ကြန်အကြိုနေ့ကစပြီး ယင်းမာပင် – ဆားလင်းကြီး ရွာပေါင်းစုံသပိတ်ကော်မတီက ဦးဆောင်ကာ တော်လှန်သံချပ်ဖျော်ဖြေရင်း ရရှိလာတဲ့ အလှူငွေတွေကို စစ်တပ်က ဗုံးကြဲ တိုက်ခိုက်ခဲ့တဲ့ ကန့်ဘလူမြို့နယ်၊ ပဇီကြီးကျေးရွာကို လှူဒါန်းသွားမယ်လို့ သိရပါတယ်။

ယင်းမာပင်မြို့နယ်ရှိ ကျေးရွာတွေမှာ သင်္ကြန်အကြိုနေ့ကနေ အတက်နေ့အထိ လှည့်လည် ဖျော်ဖြေသွားမှာ ဖြစ်ပြီး၊ ရရှိလာတဲ့ အလှူငွေတွေကို လူသားချင်းစာနာ ထောက်ထားတဲ့အနေနဲ့ ခုလို လှူဒါန်းသွားမှာ ဖြစ်တယ်လို့ တော်လှန်သံချပ်အဖွဲ့ ဦးဆောင်သူက ပြောပါတယ်။

“စစ်ကောင်စီက သူအာဏာတည်မြဲဖို့ ဘာမဆိုလုပ်တော့မယ့် အခြေအနေမှာ ရှိတယ်။ အသက်ပေးလိုက်ရတဲ့ ပြည်သူတွေအတွက် စိတ်မကောင်းဖြစ်မိတယ်။ တော်လှန်ရေးက သွေးအေးသွားရင် ရက်စက်ယုတ်မာတာ။ လူအခွင့်အရေး ချိုးဖောက်တာတွေ ဒီထက်ပိုများနိုင်တယ်။ တတ်နိုင်သလောက် ပါဝင်ကူညီ လှူပေးဖို့လည်း တိုက်တွန်းချင်ပါတယ်” လို့ ပြောပါတယ်။

ယင်းမာပင် – ဆားလင်းကြီး ရွာပေါင်းစုံသပိတ်အင်အားစုတွေက စစ်ကောင်စီလုပ်တဲ့ သင်္ကြန်မှာမပါဝင်ကြဖို့ သံချပ်ထိုးလှုံဆော်တာဖြစ်ပြီး၊ စစ်ဘေးရှောင်ပြည်သူတွေနဲ့ နေအိမ်မီးရှို့ခံရခဲ့ရသူတွေကို ကျန်းမာရေးစောင့်ရှောက်ပေးတာ၊ တတ်နိုင်တဲ့ဘက်က ပံ့ပိုးကူညီတာတွေကိုပါ လုပ်ဆောင်ပေးနေတယ်လို့ သိရပါတယ်။

စာတည်း – လင်း

ယင်းမာပင်၊ ဧပြီ ၁၃၊ ၂၀၂၃။

စစ်ကိုင်းတိုင်း၊ ယင်းမာပင်မြို့နယ်ထဲက ကျေးရွာတရွာမှာ သင်္ကြန်အကြိုနေ့ အထိမ်းမှတ်အဖြစ် ရွာပေါင်းစုံသပိတ် လှုပ်ရှားမှု ကော်မတီဝင်တွေနဲ့ ဒေသခံပြည်သူတွေ ပူးပေါင်းပြီး စစ်အာဏာရှင်ကို ဆန့်ကျင်တဲ့ သပိတ်လှုပ်ရှားမှုတခု ပြုလုပ်ခဲ့ကြပါတယ်။

ဧပြီလ ၁‌၃ ရက်ဒီကနေ့ မနက် ၉ နာရီခွဲခန့်က ပြုလုပ်ခဲ့တာဖြစ်ပြီး “စစ်တပ်စီးပွားတို့ ငြင်းဆန်၊ တော်လှန်သင်္ကြန် ပြည်သူ့အသံ” ဆိုတဲ့ ဘန်နာတွေကိုင်စွဲပြီး ပြုလုပ်ခဲ့တာပါ။

ရွာပေါင်းစုံသပိတ်လှုပ်ရှားမှုကော်မတီရဲ့ ၇၆၃ ရက်မြောက် သပိတ်လှုပ်ရှားမှုဖြစ်ပြီး တော်လှန်ရေးကြွေးကြော်သံတွေ အော်ဟစ်ကာ ဆန္ဒပြခဲ့ကြတာလည်း ဖြစ်ပါတယ်။

ယင်းမာပင်၊ ဧပြီ ၁၂၊ ၂၀၂၃။

စစ်ကိုင်းတိုင်း၊ ယင်းမာပင်မြို့နယ်၊ ရွှေပေကုန်းရွာက နေအိမ်တလုံးပေါ်ကို ဧပြီလ ၁၂ ရက် ဒီမနက်အစောပိုင်းက စစ်ကောင်စီလက်အောက်ခံ ရဲတပ်ရင်းကပစ်တဲ့ လက်နက်ကြီးကျည် ကျရောက်ခဲ့လို့ အသက် ၁၂ အရွယ် မိန်းကလေးငယ် ၁ ဦး သေဆုံးပြီး အဖွားဖြစ်သူလည်း ဒဏ်ရာရရှိခဲ့တယ်လို့ သိရပါတယ်။

မုံရွာ-ပုသိမ်ကားမကြီးဘေးမှာရှိတဲ့ ကြေးနီထုတ်တရုတ်ကုမ္မဏီတွေကို ကင်းစောင့်ပေးနေတဲ့ အမှတ် ၂၈ ရဲတပ်ရင်းက ဒီနေ့မနက် ၁ နာရီလောက်မှာ ပစ်ခတ်တဲ့ကျည် ကျရောက်ခဲ့တာလို့ ဆိုပါတယ်။

“ရဲတွေဘက်က လက်နက်ကြီး ၄ လုံးပစ်တာကို ရွာထဲကျတဲ့ ၂ လုံးထဲက ၁ လုံးက လူနေအိမ်ပေါ်ကိုကျပြီး ကလေးမလေးပွဲချင်းပြီး သေတာ၊ သူရဲ့အဘွားလည်း ဒဏ်ရာရသွားတယ်” လို့ အာဏာရှင်တော်လှန်ရေး ပြည်သူ့တပ်မတော် (DRPA-Anti-Dictatorship Revolution People’s Army) အဖွဲ့တာဝန်ရှိသူက ပြောပါတယ်။

DRPAအဖွဲ့က ကန့်ဘလူအတွက် လက်စားချေတဲ့အနေနဲ့ ဧပြီလ ၁၁ ရက်ညအချိန်မှာ တရုတ်ကုမ္ပဏီစောင့် အမှတ် ၂၈ ရဲတပ်ရင်းကို လက်နက်ကြီး အသုံးပြု တိုက်ခိုက်ရာမှာ ရဲတပ်ရင်းကနေ ၆၀ မမ၊ ၁၂၀ မမ လက်နက်ကြီးနဲ့ ၄ ချက် ပြန်ပစ်ခဲ့တာ ဖြစ်ပါတယ်။

စစ်ကောင်စီတွေပစ်လိုက်တဲ့ လက်နက်ကြီးကျည်ဟာ ရွှေပေကုန်းရွာထဲ ကျရောက်တဲ့အတွက် အသက် ၈၀ အရွယ်အဘွား ဒေါ်သိန်းညွှန့်ဒဏ်ရာရကာ မြေးဖြစ်သူ အသက်၁၂ နှစ်အရွယ် မပီတီ သေဆုံးသွားခဲ့ပါတယ်။

သေဆုံးသွားခဲ့တဲ့ မပီတီ ရုပ်အလောင်းကို ဒီနေ့မနက်မှာပဲ သဂြိုဟ်ခဲ့တယ်လို့ ယင်းမာပင် သတင်းမှန်ပြန်ကြားရေးရဲ့ တာဝန်ရှိသူက ပြောပါတယ်။

“အိမ်ထဲမှာ သူတို့မြေးဖွား ၃ ယောက် အိမ်နေတယ်။ လက်နက်ကြီး သူတို့အိမ်ထဲကျတော့ အလတ်မက အူထွက်ပြီး ဆုံးသွားတယ်။ သူ့အဖွားက ဒဏ်ရာရသွားတယ်။ ဆေးရုံတင်ထားရတယ်။ အခုချိန်ထိတော့ ဘာမှမကြားရသေးဘူး။ အကြီးမတော့ ဘာမှမဖြစ်ဘူး။ သူတို့အိမ်မီးဖိုချောင်ကတော့ လုံးဝကို ပျက်စီးသွားတယ်” လို့ ဒေသခံတဦးက ဆိုပါတယ်။

တရုတ်ကုမ္ပဏီစောင့် အမှတ် ၂၈ ရဲတပ်ရင်းဟာ ဒေသတွင်းသွားလာနေတဲ့ လုပ်ငန်းသုံးကာ၊ လူစီးဧည့်သည်ကားတွေဆီကနေ ငွေကြေးတောင်းခံတာမျိုးတွေလည်း ရှိပြီး ဧပြီလ ၁၁ ရက် မနေ့ ည ၇ နာရီလောက်ကလည်း မုံရွာ-ပုသိမ်ကားလမ်းပေါ်မှာ ဆိုင်ကယ်စီးလာတဲ့ လူငယ်တဦးကို အကြောင်းမဲ့ သေနတ်နဲ့ပစ်ခဲ့လို့ ယာဘက်ပေါင်ကျည်ထိမှန်ပြီး ပြင်းထန်ဒါဏ်ရာ ရရှိခဲ့တယ်လို့လည်း ယင်းမာပင်သတင်းမှန် ပြန်ကြားရေးထုတ်ပြန်ချက်က ဆိုပါတယ်။

အဲဒီရဲတပ်ရင်းဟာ အမည်ခံသာဖြစ်ပြီး စစ်သားတွေ၊ ပျူစောထီးတွေနဲ့ ရဲတွေစုပေါင်းထားတဲ့ စုပေါင်းစခန်းသာဖြစ်တယ်လို့ ဒေသခံတဦးဆီက သိရပါတယ်။

စာတည်း – လင်းဇေ