ကနီ၊ စက်တင်ဘာ ၁၂၊ ၂၀၂၅။
စစ်ကိုင်းတိုင်း၊ ယင်းမာပင်နဲ့ ကနီနယ်အစပ်မှာ စစ်ကော်မရှင်တပ်နဲ့ တော်လှန်ရေးတပ်တွေတိုက်ပွဲဖြစ်ပြီးနောက် စစ်ကော်မရှင်တပ်ဘက်က အင်အားဖြည့်ပြီး ဟောင်ဝစ်ဇာတွေနဲ့လည်း ဆက်တိုက်ဆို သလိုပစ်ခတ်နေတယ်လို့ ဒေသခံတွေဆီကသိရပါတယ်။
စက်တင်ဘာ ၁၁ ရက်မနေ့ကနေ့လယ်ပိုင်းက ကနီမြို့နယ်၊ ချောင်းမကျေးရွာအနီးတိုက်ပွဲဖြစ်ပြီးခဲ့ပြီး တိုက်ပွဲအတွင်း စစ်ကော်မရှင်ဘက်က ၁၀ ဦးထက်မနည်းသေဆုံးပြီး တရော်ကျင်းရွာဘက်ကို ပြန်လည်ဆုတ်ခွာသွားတယ်လို့ ဆိုပါတယ်။
ဒါ့အပြင် ကာကွယ်ရေးတပ်ဖွဲ့တွေဘက်က လက်နက်ခဲယမ်းတွေလည်းသိမ်းဆည်းရခဲ့ကြောင်းသိရှိရပေမယ့် သီးခြားအတည်မပြုနိုင်သေးဘဲ တိုက်ပွဲအခြေအနေအသေးစိတ်ကိုလည်း ထုတ်ပြန်တာမရှိသေးပါဘူး။
တိုက်ပွဲဖြစ်တဲ့နေလယ် ၁၂ နာရီလောက်ကစတင်ကာ ကနီ-ယင်းမာပင်နယ်အစပ်၊ ယင်းမာပင်မြို့နယ် အပိုင်၊ အောင်ဇေယျမြို့သစ်၊ ငွေကမ္ဘာမင်းဆီဆိုင်အနီးမှာ စစ်ကော်မရှင်တပ်ကအထိုင်ချပြီး ဟောင်ဝစ်ဇာလက်နက်ကြီးတွေနဲ့ ကနီမြို့နယ်ဘက်က ပစ်ခတ်ခဲ့တယ်လို့ ဒေသခံတဦးကပြောပါတယ်။
“ဟောင်ဝစ်ဇာက မနေ့က နေ့လယ်ကနေ ညနေ ၅ နာရီအထိထုတာပဲ၊ အကြိမ် ၂၀ နီးပါးပစ်ခက်တော့ ပြည်သူတွေလည်း ကြောက်ရွံ့ပြီးထွက်ပြေးကြရတယ်” လို့ ဒေသခံတဦးက မြေလတ်အသံကို ပြောပါတယ်။
ဒါ့အပြင် ဒီနေ့လယ် ၁၂ နာရီလောက်မှာလည်း အောင်ဇေယျာမြို့သစ်ကို စစ်ကော်မရှင်တပ်က သံပြာကာကားတွေနဲ့ အင်အား ၃၀ ဝန်းကျင်လာဖြည့်ထားတယ်လို့ ဒေသခံတွေဆီက သိရပါတယ်။
စက်တင်ဘာ ၃ ရက်ကစတင်ကာ ယင်းမာပင်နဲ့ ကနီမြို့နယ်အစပ်က ကျေးရွာတွေကို စစ်ကော်မရှင်တပ်က လေကြောင်းကဗုံးကြဲတိုက်ခိုက်တာအပြင် အင်အားရာကျော်နဲ့ မြေပြင်ကနေပါ စစ်ကြောင်းထိုးနေတာကြောင့် ဒေသခံ ၁၅,၀၀၀ ကျော်လည်းနေရပ်တိမ်းရှောင်နေကြရပါတယ်။
စက်တင်ဘာ ၅ ရက်မှာ ကနီမြို့နယ် သင့်ဝင်ရွာနဲ့ ချောင်းမအရှေ့ရွာကို မီးရှို့ခဲ့ပြီး စက်တင်ဘာ ၈ ရက်မှာ ချောင်းမအနောက်ရွာကို ဆက်လက်မီးရှို့ခဲ့တာကြောင့် သင့်ဝင်ရွာက နေအိမ် ၇ လုံးမီးလောင်ဆုံးရှုံးထားတယ်လို့ ချောင်းမရွာခံတဦးက မြေလတ်အသံကို ပြောဆိုထားပါတယ်။
စစ်ကြောင်းနဲ့တိုက်ပွဲတွေကြောင့် တိမ်းရှောင်နေရတဲ့ဒေသခံတွေမှာလည်း စစ်ရှောင်ရက်ကြာလာတာကြေင့် ဒေသခံတွေမှာစားနပ်ရိက္ခာလိုအပ်ချက်တွေမြင့်တက်နေတယ်လို့လည်း သိရပါတယ်။
စာတည်း – လင်း
