မြေလတ်အသံ

ချောင်းဦး၊ ဇူလိုင် ၁၀၊ ၂၀၂၅။

စစ်ကိုင်းတိုင်း၊ ချောင်းဦးမြို့နယ်ထဲက ကျေးရွာတွေကို စစ်ကောင်စီစစ်ကြောင်းက လက်နက်ကြီးနဲ့ ပစ်ခတ်ခဲ့တာကြောင့် အရပ်သား ၂ ဦးသေဆုံးပြီး ၁၁ ဦး ထိခိုက်ဒဏ်ရာရရှိခဲ့တယ်လို့ ချောင်းဦးမြို့နယ် ပြည်သူ့ကာကွယ်ရေးအဖွဲ့ဆီက သိရပါတယ်။

ဇူလိုင် ၁၀ ရက် ဒီကနေ့မနက်ပိုင်း ၆ နာရီကျော်လောက်က ချောင်းဦးထွေအုပ်ရုံးကနေ ထွက်လာတဲ့ စစ်ကောင်စီစစ်ကြောင်းဟာ အနီးနားဝန်းကျင်က အရပ်သားတွေနေထိုင်တဲ့ ကျေးရွာတွေကို ၈၁ မမ၊ ၆၀ မမ လက်နက်ကြီးတွေနဲ့ပစ်ခတ်ခဲ့တယ်လို့ ဆိုပါတယ်။

“သူတို့စစ်ကြောင်းထွက်တော့ လက်နက်ကြီးထုပြီး ရန်ရှင်းတဲ့သဘောဗျ။ ပစ်ခတ်တဲ့အကြိမ်ရေ ကတော့များတယ်။ ရွာတော်လေးရွာထဲကိုတော့ လက်နက်ကြီးက ၁ လုံးပဲကျတာဗျ။ အဲ့တလုံးကနေ သေဆုံးထိခိုက်တာ။ ထူးနီရွာကတော့ ၃ ယောက်မဟုတ်ဘူး ၁ ယောက်ပဲသေတာပါဗျ။”လို့ ချောင်းဦး မြို့နယ်ပကဖ သတင်းတာဝန်ခံ ကိုသန့်က မြေလတ်အသံကို ပြောပါတယ်။

လက်နက်ကြီးထိမှန်လို့ ချောင်းဦးမြို့နယ် ရွာတော်လေးရွာက အရပ်သား ၁ ဦးသေဆုံးပြီး ၆ ဦးဒဏ်ရာရကာ ထူးနီရွာက အရပ်သား ၁ ဦးသေဆုံးကာ ၅ ဦးဒဏ်ရာရခဲ့တယ်လို့သိရပြီး စစ်ကြောင်းက အဲ့ဒီဒေသတဝိုက်မှုရှိနေသေးတာကြောင့် သေဆုံးသူတွေနဲ့ပတ်သက်တဲ့ အချက်အလက်တွေကိုတော့ အတည်မပြုနိုင်သေးဘူးလို့ ဆိုပါတယ်။

ရွာတော်လေးရွာဟာ ချောင်းဦးမြို့နဲ့ ကပ်လျက်အနေအထားမှာရှိပြီး ထူးနီရွာကတော့ မြို့နဲ့ ၃ မိုင်ကျော်လောက်ကွာဝေးတယ်လို့ ကိုသန့်ကပြောပါတယ်။

“မနေ့ကတည်းက စစ်ကြောင်းထွက်လာနိုင်ခြေရှိလို့ ပြည်သူတွေကို သတိနဲ့နေဖို့ မှာကြားထားပါသေးတယ်။ ဒီထူးနီရွာက နည်းနည်းပေါ့သွားတာလည်းပါတာပေါ့ဗျာ။ စစ်ကြောင်းက ကင်မွန်းတော်ကို ဆက်ထိုးမယ် ထင်တယ်ဗျ။”လို့ ကိုသန့်က ပြောပါတယ်။

လက်ရှိအချိန်မှာလည်း စစ်ကောင်စီစစ်ကြောင်းက ချောင်းဦးမြို့နဲ့ ကင်မွန်းတော်ရွာအကြားမှာဘဲရှိနေပြီး အနီးနားဝန်းကျင်ကျေးရွာတွေက ပြည်သူတွေအနေနဲ့လည်း ဘေးလွတ်ရာတွေဆီ တိမ်းရှောင်နေဖို့ သူကဆက်ပြောပါတယ်။

ပြီးခဲ့တဲ့ မေ ၂၉ ရက်ကလည်း ချောင်းဦးနယ် ငါးယှန်ကျေးရွာမှာ အထိုင်ချထားတဲ့ စစ်ဂိတ်စခန်းက လက်နက်ကြီးနဲ့ ပစ်ခတ်လို့ သန်မင်းကန်ရွာက အရပ်သား ၁ ဦး လက်နက်ထိမှန်သေဆုံးခဲ့တယ်လို့ သိရပါတယ်။

စာတည်း – လင်း

ပခုက္ကူ၊ ဇူလိုင် ၁၀၊ ၂၀၂၅။

မကွေးတိုင်း၊ ပခုက္ကူခရိုင်၊ ပခုက္ကူမြို့နယ်၊ နံဂါတ်အရှေ့ရွာနဲ့ အနောက်ရွာကို ဇူလိုင် ၇ ရက်‌မှာ စစ်ကောင်စီတပ်ဖွဲ့ဝင်တွေ မီးရှို့သွားတယ်လို့ ဒေသခံတွေဆီက သိရပါတယ်။

ပခုက္ကူတပ်မ ၁၀၁ က အင်အား ၅၀ ဝန်းကျင်ပါစစ်ကောင်စီစစ်ကြောင်းဟာ မနက် ၇ နာရီကျော်မှာ အနောက်နံဂါတ်ရွာကိုမီးရှို့ပြီး မနက် ၈ နာရီခွဲလောက်မှာ အရှေ့နံဂါတ်ရွာကို ဆက်လက်မီးရှို့တာလို့ ဆိုပါတယ်။

“၂ ရွာလုံးပေါင်း အိမ်ခြေ ၄၀ ကျော်လောက် ပါသွားတယ်။ သူက အရှေ့နံဂါတ်ရွာနဲ့ အနောက်နံဂါတ်ရွာဆိုပြီး ရှိတာ။ အရှေ့နံဂါတ်ရွာကတော့ ရွာအသေးလေးပါ။ (မီးရှို့ခံရပြီးတဲ့နောက်) အိမ် ၂ လုံးပဲကျန်တာ။ အနောက်နံဂါတ်ရွာကတော့ နေအိမ် ၁၀ လုံးမီးလောင်သွားတယ်။ ပြီးတော့ စာကြည့်တိုက်၊ စာသင်ကျောင်း လောင်သွားတယ်။ တိုက်ပွဲမဖြစ်ပါဘူး။ ပထမဦးဆုံးမီးရှို့ခံရတာ”လို့ ပခုက္ကူမြို့ခံတဦးက ပြောပါတယ်။

အဲဒီ စစ်ကြောင်းဟာ ပခုက္ကူတပ်မ ၁၀၁ က စစ်ကောင်စီတပ်ဖွဲ့ဝင်တွေနဲ့ အနီးနားက ပျူစောထီးတွေပေါင်းပြီးလာတာလို့ သိရတယ်။

ဒါ့အပြင် အဲဒီ ညနေပိုင်းမှာပဲ အောင်သာပျူစောထီးရွာကို အထိုင်ချထားတဲ့ စစ်ကောင်စီတပ်တွေက နံဂါတ်ရွာကို လက်နက်ကြီးတွေနဲ့ ပစ်ခတ်ခဲ့သေးတယ်လို့ သိရပါတယ်။

နံဂါတ် အရှေ့ရွာနဲ့ အနောက်ရွာမှာ အိမ်ခြေ ၄၅၀ လုံး၊ အိမ်ထောင်စု ၄၅၀ ကျော်နဲ့ လူဦးရေ ၂,၀၀၀ ဝန်းကျင်ရှိပြီး ၂ ရွာပေါင်း နေအိမ် ၄၀ ကျော်ပျက်စီးဆုံးရှုံးကာ ဒေသခံတွေကတော့ နီးစပ်ရာကျေးရွာတွေကို တိမ်းရှောင်နေရတယ်လို့ ဆိုပါတယ်။

စာတည်း- မြတ်

ညောင်ဦး၊ ဇူလိုင် ၁၀၊ ၂၀၂၅။

မန္တလေးတိုင်း၊ ညောင်ဦးမြို့နယ်ထဲက ကျေးရွာ ၆ ရွာကို စစ်ကောင်စီစစ်ကြောင်းက မီးရှို့ပြီး နေအိမ်တွေကိုဖျက်ဆီးနေတာကြောင့် ဒေသခံ ၂ သောင်းကျော် ထွက်ပြေးနေရတယ်လို့ ဒေသခံတွေဆီက သိရပါတယ်။

ဇူလိုင် ၈ ရက်မနက် ၉ နာရီကျော်မှာ တောင်ဇင်းကျေးရွာရဲစခန်းကနေ အင်အား ၁၅၀ ခန့်ပါ စစ်ကြောင်းက ချောင်းရှည်၊ အနောက်အုံ၊ ယာတောကြီးကျေးရွာတွေကို မီးရှို့ခဲ့ပြီး ယာတောကြီးရွာမှာ စခန်းချညအိပ်ခဲ့တယ်လို့ ဆိုပါတယ်။

အဲဒီနောက် ဇူလိုင် ၉ ရက်မနက်မှာ ကျောက်ပြင်ကန်၊ ဇီးစမြင်၊ မြောင်ကျေးရွာတွေကို ဆက်လက်မီးရှို့ခဲ့ပြီး မြောင်ကျေးရွာမှာတပ်စွဲထားကာ ဇူလိုင် ၁၀ ရက်မနက် ၈ နာရီခန့်မှာ မြောင်ကနေတဆင့် ကန်သာရွာဘက်ကို ဆက်လက်ထွက်ခွာသွားတယ်လို့ ဆိုပါတယ်။

“ဒီနားမှာက ဆိုးဆိုးဝါးဝါး တိုက်ပွဲကြီးဘာညာဆိုတာလည်း မရှိဘူး။ အဲဒီရွာဘက်တွေမှာ သူတို့(စကစ) ရဲဘော်တွေ အများကြီးကျတာမရှိဘူး။ ပစ်ပြေးနဲ့ မိုင်းဆွဲတာလောက်ပဲ ရှိတာ။ အဲဒါကို သက်သက်လာ ရှို့တာ”လို့ ဒေသခံတဦးက ပြောပါတယ်။

မီးရှို့ခံရလို့ ချောင်းရှည်ရွာက နေအိမ် ၁၂ လုံးနဲ့ စာသင်ကျောင်း ၂ ကျောင်း၊ အနောက်အုံရွာက နေအိမ် ၁ လုံး၊ ကျောက်ပြင်ကန်ရွာက အိမ် ၁၀ လုံး၊ ယာတောကြီးရွာက အိမ် ၁၀ လုံးခန့်၊ ဇီးစမြင်ရွာက ၁၅ လုံးခန်နဲ့ မြောင်ရွာက အခြေနေကိုတော့ စုံစမ်းနေဆဲဖြစ်တယ်လို့ ဆိုပါတယ်။

စစ်ကြောင်းဝင်မီးရှို့နေလို့ အိမ်ခြေ ၁၀၀ ကျော်ကနေ ၅၀၀ ခန့်ရှိတဲ့ ရွာတွေဖြစ်တဲ့ ချောင်းရှည်၊ ယာတောကြီး၊ ဇီးစမြင်၊ ကျောက်ပြင်ကန်၊ ဂျိုးကန်၊ စခါး၊ မြောင်၊ ရွှေကဖြူ၊ ကြအို၊ မြေသန့်တောင်၊ မအူပင်၊ ပျော်ဘွယ်၊ ရွာသာ၊ ညောင်လှ၊ ပြင်းချောင်း၊ လယ်ကန်၊ ကန်သာ၊ ကံကြီးကုန်းရွာတွေအပါအဝင် ဒေသခံ ၂ သောင်းကျော်လောက် ထွက်ပြေးနေရတယ်လို့ သိရပါတယ်။

ပြီးခဲ့တဲ့ ဇူလိုင် ၁ ရက်ကလည်း စစ်ကောင်စီစစ်ကြောင်းက မောင်းဂွက်တောနဲ့ ရွာပုလဲ ကျေးရွာတို့ကိုမီးရှို့ခဲ့ရာ နေအိမ် ၃၀ ကျော်မီးလောင်ပျက်စီးခဲ့ပြီး ဒေသခံ ၁,၅၀၀၀ ကျော် ထွက်ပြေးခဲ့ရပါသေးတယ်။

စာတည်း – လင်း

မြိုင်၊ ဇူလိုင် ၁၀၊ ၂၀၂၅။

မကွေးတိုင်း၊ မြိုင်မြို့နယ်၊ သနပ်ရင်းကျေးရွာကို စစ်ကောင်စီတပ်က လေကြောင်းကနေ ဗုံးကြဲတိုက်ခိုက်ခဲ့တာကြောင့် အသက် ၂ နှစ်ကလေး ၁ ဦးအပါ ၂ ဦးသေဆုံးပြီး ၄ ဦးဒဏ်ရာရခဲ့တယ်လို့ ဒေသခံတွေထံက သိရပါတယ်။

ဇူလိုင် ၉ ရက် ယမန်နေ့ည ၈ နာရီခန့်မှာ မြိုင်မြို့နယ် အနောက်မြောက်ခြမ်းရှိ သနပ်ရင်းကျေးရွာကို တိုက်လေယာဥ် ၁ စင်း က ပေါင် ၃၀၀ ဗုံး ၂ လုံး ကြဲချခဲ့ရာ ရွာထိပ်က စျေးဆိုင်ဖွင့်ထားတဲ့ လူနေအိမ်ပေါ်ကျရောက်ပေါက်ကွဲခဲ့တာလို့ ဆိုပါတယ်။

“သူ့(ကလေး)မိသားစုက အပြင်ရောက်နေတာ မထိဘူး(သေဆုံးအမျိုးသားက)ညီအကို ဝမ်းကွဲတော်တာ ဖအေနဲ့က” လို့ ဒေသခံတဦးက မြေလတ်အသံကို ပြောပါတယ်။

ဗုံးကျရောက်ပေါက်ကွဲတာကြောင့် စျေးဆိုင်နေအိမ်မှာရှိနေတဲ့ အသက် ၂ နှစ်အရွယ်ယောကျာ်းလေး ၁ ဦးနဲ့ ၎င်းရဲ့ ဦးလေးဖြစ်သူ အသက် ၄၀ ကျော် အမျိုး သားသေဆုံးခဲ့ပြီး နောက်ထပ်ရွာခံ ၅ ဦး ဒဏ်ရာရရှိ ခဲ့တယ်လို့ သိရပါတယ်။

ဗုံးကြဲခံရတဲ့နေအိမ်က မိသားစုတွေဟာ မြိုင်မြို့ပေါ်က စစ်ရှောင်ရင်း သနပ်ရင်းကျေးရွာမှာ စျေးဆိုင်ဖွင့်ထားတာဖြစ်ပြီး စစ်ကောင်စီတပ်က ရွာထိပ်မှာ သီးခြားရှိနေတဲ့ စျေးဆိုင်နေအိမ်ကို တိုက်ခိုက်ခဲ့တာဖြစ်ကာ ၎င်းရွာဟာ အရင်က လေကြောင်းတိုက်ခိုက်မှုမျိုးမရှိခဲ့ဘဲ ပထမဆုံးတိုက်ခိုက်ခံရတာလို့ ဆိုပါတယ်။

သနပ်ရင်းကျေးရွာနဲ့ ဗဟင်းကျေးရွာဟာ ၁ မိုင်ခန့်သာကွာဝေးပြီး ဗဟင်းရွာဟာ ယခုနှစ်အတွင်း လေကြောင်းကနေ ၃ ကြိမ်ထက်မနည်းဗုံးကြဲခံထားရကာ ဇူ လိုင် ၂ ရက် ညနေ ၅ နာရီခန့်ကလည်း ဗဟင်းကျေးရွာကို ဂျက်ဖိုက်တာနဲ့ ဗုံးကြဲချခဲ့လို့ အမျိုးသား ၁ ဦး သေဆုံးခဲ့ပါသေးတယ်။

စာတည်း – ဟိန်းစံ

ဆားလင်းကြီး၊ ဇူလိုင် ၉၊ ၂၀၂၅။

စစ်ကိုင်းတိုင်း၊ ဆားလင်းကြီးမြို့နယ်၊ ကျေးရွာတခုက အသက် ၄ နှစ်နဲ့ ၆ နှစ်အရွယ် မိန်းကလေးငယ် ၂ ဦးကို အဓမ္မပြုကျင့်ဖို့ကြံစည်ခဲ့သူကို ဆားလင်းကြီးမြို့နယ်ပြည်သူ့လုံခြုံရေးအဖွဲ့က ဖမ်းဆီးထိန်းသိမ်းထားတယ်လို့ ဆားလင်းကြီးမြို့နယ်ဥပဒေတာဝန်ခံက ပြောပါတယ်။

ဆားလင်းကြီးမြို့နယ်၊ ကျေးရွာတခုက အသက် ၄၀ အရွယ် ဦးအောင်မျိုးဝင်းဟာ သူရဲ့အိမ်နီးချင်းဖြစ်တဲ့ အထက်ပါကလေးငယ်တွေကို ဇွန်လနောက်ဆုံးအပတ်မှာ လိင်ပိုင်းဆိုင်ရာထိတွေ့မှုတွေပြုလုပ်ခဲ့ကြောင်းကို မိဘတွေကသိရှိတိုင်ကြားခဲ့တယ်လို့ ဆိုပါတယ်။

အဲ့ဒီနောက်မှာ ဆားလင်းကြီးမြို့နယ်ပြည်သူ့လုံခြုံရေးအဖွဲ့ရဲ့ ညွှန်ကြားချက်အရ B7 တိုက်နယ်ပြည်သူ့ ကာကွယ်ရေးအဖွဲ့က ဇူလိုင် ၆ ရက်မှာ ဦးအောင်မျိုးဝင်းကို သူ့ရွာမှာဖမ်းဆီးခဲ့ပြီး အမှုဖွင့်တရားစွဲဖို့ ပြင်ဆင်ထားတယ်လို့ ဆားလင်းကြီးမြို့နယ် ဥပဒေတာဝန်ခံကမြေလတ်အသံကို ပြောပါတယ်။

“ကျနော်တို့အခု ဒီဟာကိုသက်ငယ်လည်း ဖြစ်တယ်။ ၃၇၆၊ ၅၁၁ မုဒိမ်းကြံစည်မှုနဲ့ တရားစွဲဖို့ ပြင်ဆင်ထားတယ်၊ မုဒိမ်းမှုကျတော့လည်း မုဒိမ်းမှုရဲ့ ဖွင့်ဆိုချက်နဲ့ မကိုက်ညီတော့လေ၊ ဒါပေမယ့် မုဒိမ်းကြံစည်တာတော့ ပေါ်လွင်နေတာလေ၊ ဒီကလေးလေးတွေဆိုတာ ဘာမှအရွယ်မရောက်သေးတဲ့ ဆော့မယ်၊ စားမယ်အရွယ် ဒီလိုလုပ်တဲ့အတွက် ဥပဒေအရအရေးယူဖို့ စာတင်ထားပါတယ်။” လို့ သူကပြောပါတယ်။

ဒီဖြစ်စဥ်နဲ့ပတ်သက်ပြီး တင်သွင်းထားတဲ့ သက်သေခံပစ္စည်းတွေကိုလည်းရရှိထားကာ နစ်နာသူ ကလေးတွေရဲ့ ပြောဆိုချက်တွေအရ လိင်ပိုင်းဆိုင်ရာထိပါးမှုကို ၂ ကြိမ်ကျူးလွန်ထားတယ်လို့ သိရကြောင်း သူက ဆက်ပြောပါတယ်။

“သက်သေခံပစ္စည်းအဖြစ် ၆ နှစ်သမီးလေးရဲ့ ဘောင်းဘီမှာ သူ့ရဲ့သုတ်ရည်သုတ်ပိုးပါတဲ့ဟာကို သက်သေခံအဖြစ် သွင်းတယ်မိသားစုကပေါ့၊ အဲဒီကလေး ၂ ယောက်က အိမ်နီးနားချင်းဆိုတော့ တတွဲတွဲနေတဲ့ ကလေး ၂ ယောက်လုံးကို ခေါ်ခေါ်ပြီး အမြဲတမ်းလုပ်တာ၊ သူတို့မိသားစုရဲ့ ပြောကြားချက်အရ ကလေးတွေရဲ့ အသံဖိုင်အရ ၂ ကြိမ်ကျူးလွန်တယ်လို့ သိရတယ်၊ ဒုတိယအကြိမ်မှာ အကြီးမလေးရဲ့ ဘောင်းဘီမှာ သုတ်ပိုးတွေ့ရာကနေပြဿနာတတ်တာ။” လို့ ဆားလင်းကြီးမြို့နယ် ဥပဒေတာဝန်ခံကမြေလတ်အသံကို ပြောပါတယ်။

ကလေးငယ်တွေရဲ့မိဘတွေအနေနဲ့ အရေးယူဖို့ ဥပဒေအကြံပေးတာ၊ ဥပဒေအရတိုင်ချက်ဖွင့်ဖို့ မြို့နယ်ပလဖ ကကူညီမှုပေးခဲ့ပြီး လိမ်ပိုင်းဆိုင်ရာထိတွေ့မှုအပြင် အခြားကျူးလွန်ခဲ့တာတွေ ရှိ၊ မရှိကိုတော့ ဆရာဝန်ဆေးစစ်ချက်စောင့်နေရတယ်လို့ B7 တိုက်နယ်ပြည်သူ့ကာကွယ်ရေးအဖွဲ့ဆီက သိရပါတယ်။

ဦးအေင်မျိုးဝင်းကလည်း ဒီဖြစ်စဥ်နဲ့ပတ်သက်လို့ ရပ်ကျေးပြည်သူ့အုပ်ချုပ်ရေးအဖွဲ့ကို ဝန်ခံထားတယ်လို့သိရပြီး ယခင်ကလည်း အရွယ်ရောက်စမိန်းကလေးတဦးကို ပုဆိုးလှန်ပြတာမျိုးလုပ်ခဲ့ဖူးသေးတယ်လို့ ဒေသခံတွေဆီကသိရပါတယ်။

အဆိုပါ ဖြစ်စဉ်ပြီးနောက်ကျူးလွန်သူတွေကို ထိုက်တန်တဲ့ အရေးယူမှုပြုလုပ်ဖို့ ဥပဒေအရ တရားစွဲတာတွေ၊ တင်ပြတာတွေပြုလုပ်ဖို့၊ ငွေကြေးကြောင့် အမှုမဖွင့်နိုင်တာမျိုး မဖြစ်စေဖို့ တိုက်တွန်းနှိုးဆော်ထားတယ်လို့ ဆားလင်းကြီးမြို့နယ်ဥပဒေတာဝန်ခံဆီက သိရပါတယ်။

စာတည်း – လင်း

ရွေးကောက်ပွဲအတွက် ကြိုတင်မဲလုပ်မှာကို စိုးရိမ်နေ

မြတ်

မန္တလေး၊ ဇူလိုင် ၉၊ ၂၀၂၅။

မန္တလေးမြို့၊ အိုးဘိုအကျဉ်းထောင်မှာ အကျဉ်းသားတွေရဲ့ မှတ်ပုံတင်နံပါတ်တွေကိုအတည်ပြုကောက်ခံပြီး လက်မှတ်ထိုးခိုင်းခဲ့တယ်လို့ နိုင်ငံရေးအကျဉ်းသားတွေရဲ့ မိသားစုဝင်တွေဆီက သိရပါတယ်။

ဇွန်လနောက်ဆုံးပတ်အတွင်းကစပြီး အကျဥ်းသားတွေအားလုံးကို ဘာကိစ္စဆိုတာမပြောဘဲ လက်မှတ်ထိုးခိုင်းခဲ့တာဖြစ်ပြီး ခုလိုလုပ်တာဟာ ရွေးကောက်ပွဲအတွက် ကြိုတင်မဲလုပ်လိုက်မှာကို စိုးရိမ်မှုတွေလည်း ရှိနေကြတယ်လို့ ဆိုပါတယ်။

“ဘာလုပ်ဖို့ကောက်ခိုင်းတာလဲဆိုတာ မပြောဘူးတဲ့။ အကုန်လက်မှတ်ထိုးခိုင်းတယ်။ အကုန်လုံးက စစ်ကောင်စီကလုပ်မယ့် ရွေးကောက်ပွဲမှာ ကြိုတင်မဲတွေလုပ်ပစ်မှာကို စိုးရိမ်နေကြတယ်”လို့ နိုင်ငံ ရေးအကျဉ်းသူရဲ့မိသားစုဝင်တဦးက ပြောပါတယ်။

အိုးဘိုထောင်တွင်းရှိ အမျိုးသားအကျဉ်းထောင်ဘက်မှာတော့ ပြီးခဲ့တဲ့ ၂၀၂၄ ခုနှစ်အတွင်းမှာ မှတ်ပုံတင်နံပါတ်၊ ဖခင်အမည်၊ အသက်၊ အရပ်နဲ့ ရောဂါရှိမရှိကိုပါစစ်ဆေးထားခဲ့တာရှိခဲ့ပြီး အခုနှစ် ဇွန်လမှာ ထပ်မံ မှတ်ပုံတင်နံပါတ်တွေအတည်ပြုပြီး လက်မှတ်ထိုးခိုင်းခဲ့တာလို့ သိရပါတယ်။

“အရင်ကစစ်မှုထမ်းအတွက် အရပ်တွေပါတိုင်းတယ်ထင်တာပဲ။ ညှိပြီးလွတ်သွားတဲ့သူတွေရှိတယ်လဲသတင်းကြားတယ်။ အခုကဘာမှမေးမရဘဲ လက်မှတ်ထိုးခိုင်းတာလို့ ပြောတယ်”လို့ နိုင်ငံရေးအကျဥ်းသားဟောင်းတဦးကပြောပါတယ်။

စစ်ခေါင်းဆောင်မင်းအောင်လှိုင်ကတော့ ရွေးကောက်ပွဲကို လာမယ့် ၂၀၂၅၊ ဒီဇင်ဘာလနဲ့ ဇန်နဝါရီလ တို့မှာ မဖြစ်မနေပြုလုပ်သွားမယ်လို့ ပြီးခဲ့တဲ့ ဇွန်လထဲမှာ ပြောကြားခဲ့ပါတယ်။

သိုက်ထွန်း

မြေလတ်အသံ၊ ဇူလိုင် ၉၊ ၂၀၂၅။

စစ်ကိုင်းတိုင်း၊ ယင်းမာပင်ခရိုင်အတွင်းမှာရှိတဲ့ သမိုင်းဝင်ဖိုလ်ဝင်တောင်ဘုရားကို ဘုရားဖူးလာရောက်လည်ပတ်သူများတာကြောင့် ဖိုလ်ဝင်တောင်ရှိ မျောက်တွေ အစာအတွက် တဒင်္ဂပြေလည်ခဲ့တယ်လို့ ဒေသခံတွေထံက သိရပါတယ်။

ဒီကနေ့ ဇူလိုင် ၉ ရက်ဟာ ဝါဆိုလပြည့်နေ့ဖြစ်တာကြောင့် ဖိုလ်ဝင်တောင်နဲ့ ရွှေဘတောင်တွေကို ဘုရားဖူးလာရောက်သူ ထောင်နဲ့ချီတဲ့အထိအများအပြားရှိနေပြီး ဘုရားဖူးလာရောက်သူတွေက မျောက်တွေကို အစာကျွေးကုသိုလ်ယူကြတာကြောင့် မျောက်စာအတွက်ခဏတာအဆင်ပြေတယ်လို့ ဆိုပါတယ်။

” မျောက်အကောင်ရေ ၁,၀၀၀ နီးပါးရှိတာ၊၊ အခါကြီးရက်ကြီးမှသာ ဘုရားဖူးပြည်သူတွေပေါလို့ အဆင်ပြေတာ၊ ပုံမှန်ရက်ဆို မျောက်တွေအတွက် အစာ ရေစာသိပ်ရှားပါးတာ”လို့ ဖိုလ်ဝင်တောင်ဒေသခံအမျိုးသမီးတဦးက မြေလတ်အသံကို ပြောပါတယ်။

ဖိုလ်ဝင်တောင်နဲ့ ရွှေဘတောင်ဟာ ၁ ဖာလုံသာကွာဝေးပြီး ဘုရားဖူးပြည်သူတွေက နွားသိုးတောင်၊ ရွှေဘတောင်၊ ဖန်းခါးတောင်စတဲ့နေရာတွေအထိလာရောက်ကာ မျောက်စာကိုယူဆောင်ကျွေးကျသလို တောင်ပေါ်ရောက်မှ ဝယ်ကျွေးကြသူတွေလည်းများပြားတယ်လို့ ဆိုပါတယ်။

၂၀၁၉ ကိုဗစ်ကပ်ရောဂါစတင်ဖြစ်ပွားချိန်ကစပြီး စစ်အာဏာသိမ်းပြီးနောက် ၂၀၂၅ ယခုနှစ် အစောပိုင်းကာလတွေအထိ ဖိုလ်ဝင်တောင်၊ ရွှေဘတောင်တွေကို ဘုရားဖူးလာရောက်သူမရှိတာကြောင့် အထက်ပါတောင်တွေမှာနေထိုင်နေတဲ့ မျောက်တွေအတွက် ကာလရှည်ကြာ အစာရေစာရှားပါးခဲ့တယ်လို့ သိရပါတယ်။

ဘုရားဖူးလာရောက်မှုမရှိတဲ့ကာလတွေမှာ မျောက်တွေဟာ အစာရေစာရှားပါးလာလို့ ဖိုလ်ဝင်တောင်ရွာနဲ့အနီးတဝိုက်က လူနေအိမ်တွေအတွင်းအထိ ဝင်ရောက် အစာရှာဖွေတာတွေလုပ်ဆောင်လာတာကြောင့် အခက်ကြုံတွေ့ရမှုတွေရှိခဲ့တယ်လို့ ဒေသခံတွေက ပြောပါတယ်။

ယနေ့ ဝါဆိုလပြည့်နေ့မှာ ဒေသတွင်းကပြည်သူထောင်နဲ့ချီ ဘုရားဖူးလာကြပေမယ့် အာဏာမသိမ်းမီကာလတွေနဲ့ နှိုင်းယှဥ်ပါက ၃ ပုံ ၁ ပုံခန့်သာ ဘုရားဖူးလာရောက်မှုရှိတယ်လို့ ဒေသခံတွေနဲ့ ဖိုလ်ဝင်တောင်နေထိုင်သူတွေက သုံးသပ်ပြောဆိုပါတယ်။

စစ်အာဏာသိမ်းပြီးချိန်ကစပြီး လက်ရှိကာလအထိ အခါကြီးရက်ကြီးတွေဖြစ်တဲ့ ဝါဆိုလပြည့်၊ သီတင်းကျွတ်လပြည့်၊ တန်ဆောင်မုန်းလပြည့်နဲ့ တန်ခူးလသင်္ကြန်ကာလအတွင်းသာ ဘုရားဖူးလာရောက်သူတွေရှိတာကြောင့် အဆိုပါနေ့ရက်တွေမှာ မျောက်စာအတွက်အဆင်ပြေကြပေမယ့် ဘုရားဖူးလာရောက်မှု မရှိတဲ့ ကျန်ရက်အများစုမှာတော့ မျောက်တွေအတွက် အစားအစာရှားပါးနေဆဲဖြစ်တာကြောင့် မျောက်စာလှူဒါန်းမယ့် ကုသိုလ်ရှင်၊ စေတနာရှင်တွေ လိုအပ်နေဆဲဖြစ်ပါတယ်။

စာတည်း – ဟိန်းစံ