မြေလတ်အသံ

အင်းတော်၊ ဇူလိုင် ၁၀၊ ၂၀၂၆။

စစ်ကိုင်းတိုင်း၊ အင်းတော်မြိုနဲ့ ကသာမြို့အကြား နဘား-ကသာလမ်းပိုင်းမှာ တိုက်ပွဲကြောင့် လမ်းပိတ်တာရက်ကြာလာလို့ ခရီးသွားတွေ အခက်ကြုံနေရပြီး သီးနှံ ကုန်သည်တွေ အရှုံးပေါ်နေတယ်လို့ ကုန်သည်တွေဆီက သိရပါတယ်။

ပြီးခဲ့တဲ့ဇွန်လ ၂၉ ရက်နေ့လောက်ကစတင်ပြီး နဘားလမ်းဆုံနဲ့ စီပိန်းရွာတဝိုက်မှာ တိုက်ပွဲတွေ နေ့စဥ်နီးပါးဖြစ်နေပြီး ဇူလိုင်လ ၁၀ ရက်နေ့အထိ ဖြစ်ပွားနေတာကြောင့် ခရီးသွားကားတွေနဲ့ ကုန်ကားတွေပိတ်နေကြကာ နေထိုင်စားသောက်မှုတွေအခက်ခဲဖြစ်နေကြသလို ပါလာတဲ့ သီးနှံကုန်တွေလည်း ပုတ်ကုန်လို့ စွန့်ပစ်နေရတယ်လို့ ဆိုပါတယ်။

“ပုတ်ကုန်ပြီးလေ ကွမ်းရွက်၊ ခရမ်းချဥ်သီး၊ ကြက်ဥ၊ မုန်လာထုပ်တို့ ပုတ်ကုန် မှန်သမျှက အကုန်လုံး ပုတ်ကုန်ပြီ။ ငရုတ်သီးစိမ်းတွေ သရက်သီး အသီးအနှံတွေအကုန်ပုတ်လို့ စွန့်ပစ်နေရတယ်။ အခက်ခဲတွေအရမ်းဖြစ်နေကြတော့ ဘယ်သူမှ မကူညီနိုင်ကြဘူး”လို့ ကုန်သည်တဦးက ပြောပါတယ်။

အသီးအနှံတွေ ပုတ်ကုန်တာကြောင့် ကုန်သည်တွေမှာ ဆုံးရှုံးနစ်နာမှုတွေများပြီး၊ ဖားကန့်ဘက်မှာလည်း ကုန်ပစ္စည်းပြတ်လပ်ကာ စျေးနှုန်း မြင့်တက်တာတွေရှိတယ်လို့ ဆိုပါတယ်။

နဘား-ကသာလမ်းပိုင်းကို အသုံးပြုပြီး မန္တလေးဘက်ကထွက်တဲ့ သီးနှံတွေနဲ့ကုန်စည်တွေကို ဖားကန့်၊ မြစ်ကြီးနားဘက်ကို တင်ပို့ရောင်းချတာတွေရှိသလို ဖားကန့်-မြစ်ကြီးနားဘက်ကထွက်တဲ့ ကုန်စည်တွေကိုလည်း မန္တလေးဘက်ကို တင်ပို့ရောင်းချ နေကြတာဖြစ်ပါတယ်။

တိုက်ပွဲကြောင့် လမ်းပိတ်နေတာ ၁၂ ရက်ရှိလာပြီဖြစ်လို့ ခရီးသည်တင်ကားနဲ့ ကုန်တင်ကား ၁၀၀၀ ဝန်းကျင်လောက် ပိတ်မိနေသလို ခရီးသွားပြည်သူတွေလည်း ထောင်ချီပိတ်မိနေပြီး စားသောက်စရာတွေနဲ့ သောက်ရေကအစ အခက်ခဲဖြစ်လာနေတယ်လို့ ဆိုပါတယ်။

“အခုတော့ အစားအသောက်တွေကော၊ သောက်သုံးရေကော အကုန်အခက်ခဲကြုံသွားပြီး။ အိပ်ဖို့၊ နားဖို့နေရာတွေကအစ အကုန်အခက်ခဲဖြစ်သွားပြီ။ ရွာနဲ့နီးတဲ့နေရာတွေမှာ နားမိတဲ့သူတွေကတော့ ရွာထဲကရှိတဲ့အိမ်တွေမှာ ဝင်နားကြတယ်။ အခုက ကားတွေကော လူတွေကောအရမ်းများတာဖြစ်လို့ အိပ်ရမယ့်နေရာကော စားတာသောက်တာကော အဆင်မပြေဘူး။ အခုက အခက်ခဲဆုံးကသောက်ရေဖြစ်သွားပြီ”လို့ အထက်ပါကုန်သည်အမျိုးသမီးက ဆက်ပြောပါတယ်။

တိုက်ပွဲကြောင့် နဘားလမ်းဆုံဘက်ကနေ စစ်တပ်က ပိတ်ထားသလို အင်းတော်ကွေ့လမ်းပိုင်းကိုလည်း PDF တွေဘက်က ပိတ်ထားလို့ လမ်းပိုင်းမှာ ပိတ်မိနေတဲ့ကားတွေက နောက်​ပြန်လှည့်သွားလို့ မရဖြစ်နေကြပါတယ်။

တော်လှန်ရေးအဖွဲ့တွေ ၂ နှစ်ကျော်ကြာ သိမ်းယူထားတဲ့ အင်းတော်မြို့နဲ့ မော်လူးမြို့ကို စစ်ကော်မရှင်ဘက်က မေလဆန်းပိုင်းမှာ ပြန်လည်သိမ်းယူနိင်ခဲ့ပြီးနောက် တော်လှန်ရေးအဖွဲ့တွေဘက်က မြို့တွေကိုပြန်ရဖို့ တိုက်ပွဲတွေဖော်ဆောင်လာခဲ့ရာမှ ဇွန်လကုန်ကစပြီး တိုက်ပွဲတွေပြန်လည်ပြင်းထန်လာတာလို့ သိရပါတယ်။

စဉ့်ကူး၊ ဇူလိုင် ၉၊ ၂၀၂၆။

မန္တလေးတိုင်း၊ စဉ့်ကူးမြို့နယ်၊ ရွာတော်ကျေးရွာမှာ စစ်တပ်ပစ်တဲ့လက်နက်ကြီးထိမှန်လို့ ပြည်သူ ၅ ဥဦးဒဏ်ရာရခဲ့တယ်လို့ ဒေသကာကွယ်ရေးအဖွဲ့ဝင်တွေထံက သိရပါတယ်။

ဇူလိုင်လ ၉ ရက်နေ့ မနက် ၇ နာရီမိနစ် ၃၀ ခန့်မှာ လက်ပန်လှရွာမှာ တပ်စွဲထားတဲ့ စစ်ကော်မရှင်ဘက်ကနေ လက်နက်ကြီး ၃ လုံးကို ဆင်သေရွာနဲ့ ရွာတော်ရွာဘက်ကို ပစ်ခတ်ခဲ့တာလို့ ဆိုပါတယ်။

“လက်နက်ကြီးက ၃ လုံးပဲပစ်တာ။ ဆင်သေရွာ ဒေါင့်ကြီးကျောင်း အနောက်ဘက် ၂ လုံးနဲ့ ရွာတော်ရွာမြောက်ဖျားပိုင်း ၁ လုံး ကျရောက် ပေါက်ကွဲခဲ့တာ။ ရွာတော်ရွာမှာ ရွာခံတွေထိတာ”လို့ ဒေသကာကွယ်ရေးအဖွဲ့ဝင်တဦးက ပြောပါတယ်။

လက်နက်ကြီးထိမှန်တာကြောင့် အသက် ၆၂ နှစ်အရွယ် ဦးထွန်းငြိမ်း၊ ၅၉ နှစ်အရွယ် ဦးဝင်းရွှေ၊ ၃၁ နှစ်အရွယ် ကိုဖိုးတုတ်၊ ၂၈ နှစ်အရွယ် ကိုဝေလင်းထွန်းနဲ့ အသက် ၅၀ ကျော်အရွယ် အမျိုးသမီးကြီးတဦးတို့ ဒဏ်ရာခဲ့ပါတယ်။

ဒါ့အပြင် နေအိမ် ၂ လုံးခန့်ပျက်စီးမှုရှိခဲ့ပြီး၊ ထိခိုက်ဒဏ်ရာရသူတွေကို နီးစပ်ရာဆေးခန်းကို ပို့ဆောင်ကာ ဆေးကုသမှုတွေ ပေးခဲ့ရတယ်လို့ ဆိုပါတယ်။

ပြီးခဲ့တဲ့ ဇွန်လ ၂၈ ရက်နေ့ကလည်း စဉ့်ကူးမြို့နယ်၊ ထုံးကြီးရွာမှာ တပ်စွဲထားတဲ့ စစ်ကော်မရှင်အဖွဲ့က ပစ်ခတ်တဲ့ လက်နက်ကြီးဟာ ကျွန်းဥဦးရွာထဲကျရောက်ခဲ့ပြီး အမျိုးသမီး ၁ ဦးသေဆုံးခဲ့တယ်လို့ သိရပါတယ်။

ရွှေတောင်၊ ဇူလိုင် ၉၊ ၂၀၂၆။

ပဲခူးတိုင်းအနောက်ခြမ်း၊ ပြည်ခရိုင်၊ ရွှေတောင်မြို့နယ်၊ ရွှေနတ်တောင်စေတီ သာသနာ့နယ်မြေအတွင်းက ဗိုလ်ချုပ်ရုပ်တု ဖျက်ဆီးခံရကြောင်း ဒေသခံတွေဆီက သိရပါတယ်။

ရွှေတောင်မြို့နယ်၊ မယားမာန်ကျေးရွာရှိ ရွှေ​နတ်တောင်စေတီ (ဒေသအခေါ် ရွှေနတ်တောင်ဘုရား) သာသနာ့နယ်မြေ စေတီရဲ့ တောင်ဘက်ကက်လျှက်ရှိ ဖက်ဆစ်တော်လှန်ရေးကာလ ဗိုလ်ချုပ် နားခိုခဲ့တဲ့ ဦးချစ်+ဒေါ်ဧရှင်(မူလစာသား) ဆောက်လုပ်လှူဒါန်းခဲ့တဲ့ ဇရပ်ထဲက ဗိုလ်ချုပ်အမှတ်တရ ဂုဏ်ပြုထားရှိတဲ့ ဗိုလ်ချုပ်အောင်ဆန်းကြေးရုပ်ထုကို ဇူလိုင် ၅ ရက်ည ၁၀ နာရီလောက်က ဖျက်ဆီးခံခဲ့ရတာလို့ သိရပါတယ်။

“အောက်က ဘိလပ်လောင်းထားတဲ့ ဟာတွေပါ ထုခွဲပြီး အပျောက်ရှင်းသွားတာ၊ အဲဇရပ်က အရင်ဆန္ဒပြလှုပ်ရှားမှုတွေ ဝင်လုပ်တုန်းကတည်းက ပိတ်ထားတာ”လို့ မြို့ခံတဦးကပြောပါတယ်။

အဆိုပါ ရုပ်ထုကို တပ်မ ၆၆ လက်အောက်ခံ စစ်သားတွေ၊ ဒေသခံပြည်သူ့စစ်တွေနဲ့ ကျေးရွာအုပ်ချုပ်ရေးမှူးအဖွဲ့တွေက လာရောက်ဖျက်ဆီးသွားနာဖြစ်ပြီး၊ ဖောကားနဲ့မြို့ပေါ်သယ်ဆောင်သွားတယ်လို့ ပြည်ခရိုင် ပကဖရဲ့ သတင်းထုတ်ပြန်ချက်မှာ ဖေါ်ပြထားပါတယ်။

အဆိုပါ ဗိုလ်ချုပ်အောင်ဆန်းကြေးရုပ် ဖျက်ဆီးခံရတဲ့ညမှာဘဲ ပဲခူးတိုင်းအနောက်ခြမ်း၊ ဇီးကုန်းမြို့က ဗိုလ်ချုပ်အောင်ဆန်း ကြေးရုထုလည်းဖျက်ဆီးခံခဲ့ရတာ ဖြစ်ပါတယ်။

နိုင်ငံတဝန်းမှာ ဗိုလ်ချုပ်အောင်ဆန်း ရုပ်ထုတွေနဲ့ အာဇာနည်ခေါင်းဆောင်ကြီးတွေရဲ့ ရုပ်ထုတွေဖျက်ဆီးခံရမှုဟာ လက်ရှိအချိန်အထိ ၁၇ ရုပ်ထက်မနည်းရှိခဲ့ပြီလို့ သိရပါတယ်။

မြေလတ်အသံ၊ ဇူလိုင် ၈၊ ၂၀၂၆။

ဗမာနိုင်ငံလုံးဆိုင်ရာ လူငယ်ကဗျာဆရာများသမဂ္ဂ (ဗလကသ)နဲ့ ဗကသကျောင်းသားဟောင်းတွေပူးပေါင်းပြီး ၆၄ နှစ်ပြည့် ဆဲဗင်းဂျူလိုင်အထိမ်းအမှတ် အခမ်းအနား ပြုလုပ်ခဲ့ကြပါတယ်။

ဇူလိုင် ၇ ရက်နေ့က ကျရောက်ခဲ့တဲ့ ဆဲဗင်းဂျူလိုင်နေ့ကို ဗလကသနဲ့ ဗကသကျောင်းသားဟောင်းတွေ ပူးပေါင်းပြီး လွတ်မြောက်တဲ့ ယောဒေသတနေရာမှာ အခမ်းအနား ကျင်းပခဲ့တာလို့ ဆိုပါတယ်။

“အခမ်းအနားမှာတော့ ကျောင်းသားလူငယ်၊ ကလေးတွေလည်း ပါတာဖြစ်တဲ့အတွက်ကြောင့် ဆဲဗင်းဂျူလိုင်ရဲ့ သမိုင်းကြောင်းအကျဉ်းကို ဖတ်ပြတာတွေ လုပ်ခဲ့တယ်။ ဆွေးနွေးတာတွေ လုပ်ခဲ့တယ်။ မြန်မာနိုင်ငံမှာရှိတဲ့ တော်လှန်ရေးတွေမှာ ကျောင်းသားတွေရဲ့ ဦးဆောင်မှုကဏ္ဍတွေအကြောင်း ဆွေးနွေးခဲ့တာ ရှိတယ်။ ကျောင်းသားတွေကို တော်လှန်ရေးအသိရှိဖို့ ပြောခဲ့တာတွေ ရှိတယ်။” လို့ ကိုတမျိုးနီက ပြောပါတယ်။

ဒီအခမ်းအနားအကို ကျောင်းသားလူငယ်တွေအပါ ဒေသခံ ၃၀ ကျော်နဲ့ စာဖတ်စွမ်းရည် မြှင့်တင်ရေး ဆွေးနွေးတာတွေလည်း ပြုလုပ်ခဲ့တယ်လို့ သိရပါတယ်။

■ ကျန်းမာရေး ပြန်ကောင်းလာပါက အရေးယူသွားရန် ဆောင်ရွက်ထား

စစ်ကိုင်း၊ ဇူလိုင် ၈၊ ၂၀၂၆။

စစ်ကိုင်းတိုင်း၊ စစ်ကိုင်းမြို့နယ်အတွင်းရှိ
စစ်ကိုင်းခရိုင် တပ်ရင်း ၂၊ ခွဲ ၄ စခန်းမှာ ဘဏ္ဍာရေးမှူး ဒေါင်းနီကို တပ်ခွဲမှူးက ပစ်သတ်ခဲ့ပြီးနောက် တပ်ခွဲမှူးကလည်း ကိုယ်ကိုကိုယ် ပြန်ပစ်ခဲ့လို့ ဆေးကုသနေရတယ်လို့ တပ်ရင်းတာဝန်ရှိသူတွေထံက သိရပါတယ်။

ဇူလိုင်လ ၃ ရက်နေ့ မနက် ၃ နာရီခန့်မှာ တပ်ခွဲ ၄ စခန်းအတွင်းရှိ နေအိမ်တလုံးမှာ ဘဏ္ဍာရေးမှူး ဒေါင်းနီနဲ့ တပ်ခွဲမှူး ညိုချောတို့ စကားပြောနေခဲ့ပြီးနောက် ညိုချောက ဒေါင်းနီရဲ့ ဦးခေါင်းကို ပစ္စတိုနဲ့တချက် ပစ်သတ်ခဲ့တာလို့ ဆိုပါတယ်။

“ဒေါင်းနီက တော်လှန်ရေးကို သစ္စာဖောက်တဲ့ အလုပ်တွေ လုပ်လာတာကို ညိုချောက မိသွားတယ်။ အဲဒီအချိန်မှာ အဆုံးစီရင် ပစ်လိုက်တယ်။ ညိုချောကလည်း သူကိုယ်သူ ပြန်ပစ်တဲ့အချိန် ရဲဘော်တွေက သေနတ်သံကြားလို့သွားတဲ့အချိန် ညိုချောက သူခေါင်းကိုသူပစ်တဲ့အချိန် ရဲဘော်တွေက တားလိုက်လို့ ကျည်ကခေါင်းထည်မဝင်သွားပဲ ဒဏ်ရာက သေဖို့ရှင်ဖို့ ၅၀/၅၀ ပါပဲ”လို့ တပ်ရင်း တာဝန်ရှိသူတဦးက ပြောပါတယ်။

ဒေါင်းနီနဲ့ ညိုချောတို့ဟာ လူမှုရေးကိစ္စအချို့လည်း ပတ်သက်မှုရှိနေပြီး ဒေါင်းနီက တော်လှန်ရေးသစ္စာဖောက်တယ်ဆိုတာနဲ့ ပတ်သက်ပြီး အသေးစိတ်ကိုတော့ ထုတ်ဖော်ပြောလို့ မရသေးဘူးလို့ ဆိုပါတယ်။

ဦးခေါင်းကျည်ထိမှန်တာကြောင့် ဒေါင်းနီမှာနေရာမှာပင် သေဆုံးသွားပြီး သူရဲ့နာရေးကိုတော့ အသတ်ခံရပြီးနောက်နေ့ ဇူလိုင်လ ၄ ရက်နေ့မှာဘဲ ပြုလုပ်ခဲ့ကြတယ်လို့ သိရပါတယ်။

ဒေါင်းနီဟာ တော်လှန်ရေးသစ္စာဖောက်သူလို့ ပြောဆိုကာ ညိုချောက ပစ်ခတ်ခဲ့တဲ့ကိစ္စဟာ မဖြစ်သင့်တဲ့ကိစ္စဖြစ်ပြီး၊ သက်ဆိုင်ရာတပ်ရင်းတာဝန်ရှိသူ အဆင့်ဆင့်ကိုအကြောင်းကြားပြီးမှ ဥပဒေအတိုင်းသာ အရေးယူ ဆောင်ရွက်ရမှာဖြစ်တယ်လို့ သူကဆက်ပြောပါတယ်။

“သူလည်း(ဒေါင်းနီ) တော်လှန်ရေးအပေါ်မှာ အများကြီးကောင်းခဲ့တာရှိတယ်။ တော်လှန်ရေးကို ဝင်လာပြီဆိုကတည်းက လုပ်ချင်စိတ်ရှိလို့ အိမ်မှာမနေပဲ ပုန်ကန်လာသူတွေပါ။ နောက်ပိုင်းကာလ တော်လှန်ရေးကြာလာတဲ့အခါမှာ စိတ်ပြောင်းသွားကြသူတွေ ရှိတယ်။ ကျနော်တို့ဟာ စစ်ကောင်စီ မဟုတ်ဘူး။ စိတ်ရှိတိုင်း လုပ်လို့မရဘူး။ လက်ထဲသေနတ်ရှိပေမယ့်လည်း အကြမ်းဖက်တဲ့ပုံစံမျိုးတွေ အရပ်သားတွေလို့ လုပ်လို့မရဘူး။ သူကို ထိန်းသိမ်းထားပြီး သက်ဆိုင်ရာကို သတင်းပို့သင့်တယ်”လို့ အထက်ပါတပ်ရင်း တာဝန်ရှိသူက ဆက်ပြောပါတယ်။

လက်ရှိအချိန်မှာတော့ တပ်ခွဲမှူး ညိုချောဟာ ဒဏ်ရာရကြောင့် ဆေးကုသနေရတာကြောင့် အခြေနေစောင့်ကြည့်နေပြီး သူကိုတော့ တပ်ဖွဲ့ဝင်တဦးကို သတ်ဖြတ်မှုနဲ့ အရေးယူသွားဖို့ရှိနေတယ်လို့ ဆိုပါတယ်။

အဆိုပါကိစ္စနဲ့ပတ်သက်ပြီး သေဆုံးသူ ဒေါင်းနီရဲ့မိသားစုဝင်တွေဘက်ကို ပြန်လည်ပြောဆိုချက်ရနိုင်ဖို့ မြေလတ်အသံက ကြိုးစားဆက်သွယ်နေပေမယ့် အဆက်အသွယ်မရသေးပါဘူး။

ရေတာရှည်၊ ဇူလိုင် ၇၊ ၂၀၂၆

ပဲခူးတိုင်း၊ ရေတာရှည်မြို့နယ်၊ နဂျပ်ကျေးရွာရှိ ဂူတောင်ဘုန်းကြီးကျောင်းကို လေကြောင်းကနေ
ဗုံးကြဲသွားလို့ ဘုရားစေတီတွေပျက်စီးခဲ့တယ်လို့ ရေတာရှည်မြို့နယ် ပကဖတာဝန်ရှိသူထံက သိရပါတယ်။

ဇူလိုင်လ ၇ ရက်နေ့မနက် ၁၀ နာရီ မိနစ် ၅၀ ခန့်မှာ တောင်ငူလေတပ်ကနေ တက်လာတဲ့ ဂျက်ဖိုက်တာတစီးဟာ ကျေးရွာထဲကို နှစ်ကြိမ်ဗုံးကြဲခဲ့တာလို့ဆိုပါတယ်။

“ဘာတိုက်ပွဲမှာ မရှိပဲလာကြဲတာ။ ဘုရားစေတီနဲ့ ဘုန်းကြီးကျောင်းပါမကျန် လေကြောင်း တိုက်ခိုက်နေတာ။ ရွာမှာက လူတွေကအနည်းအကျဥ်းလောက်ပဲရှိတာ။ အများစုက စစ်ရှောင်နေတာ။ ဒါကြောင့်လူထိခိုက်မှုတော့မရှိဘူး”လို့ ရေတာရှည်မြို့နယ်ပကဖတာဝန်ရှိသူတဦးကပြောပါတယ်။

လေကြောင်းတိုက်ခိုက်မှုကြောင့် ဘုန်းကြီးကျောင်းဝင်းအတွင်းရှိ ဘုရားစေတီတွေနဲ့ ဓမ္မာရုံပျက်စီးသွားကာ နွားတကောင်လည်းသေဆုံးသွားပါတယ်။

နဂျပ်ကျေးရွာဟာ ပြီးခဲ့တဲ့ ဇွန်လဆန်းပိုင်းကတည်းက ဒီကနေ့အထိ လေကြောင်းကနေ ဗုံးကြဲမှု ၄ ကြိမ်ခံထားရပြီး ရွာခံတွေက ထွက်ပြေးတိမ်းရှောင် နေကြရပါတယ်။

ပြီးခဲ့တဲ့ ဇွန်လ ၆ ရက်နေ့ကလည်း နဂျပ်ကျေးရွာကို စစ်ကော်မရှင်ဘက်က Y 12 နဲ့ ဗုံးကြဲခဲ့လို့ သက်ကြီးအမျိုးသား ၁ ဦးသေဆုံးခဲ့သေးတယ်လို့ သိရပါတယ်။

ဇွန်လ ၃ ရက်နေ့လောက်ကစတင်ပြီး စစ်ကော်မရှင်အင်အား ၁၀၀၀ ခန့်ဟာ ရေတာရှည်မြို့နယ်အတွင်း ကျေးရွာတွေကို
စစ်ကြောင်းထိုးနေပြီး ဒရုန်းနဲ့ ဗုံးကြဲတာ၊ ဂျက်ဖိုက်တာ၊ Y 12 တွေနဲ့ ဗုံးကြဲတာတွေလည်းရှိနေပါတယ်။

အဆိုပါ စစ်ကြောင်းဟာ ဇူလိုင်လ ၇ ရက်နေ့အထိ ဆယ်ဝါးတော၊ ကျွန်းကုန်း၊ ပိတောက်ကုန်း၊ အုတ်မြေတူး၊ ရွာသစ်၊ ဆွာမကြီးကျေးရွာတွေမှာ အင်အားဖြန့်ခွဲတပ်စွဲထားတယ်လို့ သိရပါတယ်။

စစ်ကြောင်းထိုးနေတာကြောင့် ပိတောက်ကုန်း၊ အုတ်မြေလူး၊ ဆီဆိုင်၊ အေးရွာလေး၊ ကျွန်းကုန်း၊ ရေတာရှည်လေး၊ ရေငံ၊ အင်းကြီးပေါက်၊ ခင်တန်းရွာသစ်၊ ကံလှ၊ ဂွေးသဲ၊ တောင်အင်းကုန်း၊ ကြာအင်းကုန်း၊ ကြိတ်ပုတီး၊ နဂျပ်၊ အင်းကြီး၊ စည်ပိုင်းရွာတွေအပါအဝင်ကျေးရွာပေါင်း ၂၀ ခန့်က ပြည်သူ ၁၀၀၀၀ ကျော်ထွက်ပြေးနေရပါတယ်။

မန္တလေး၊ ဇူလိုင် ၇၊ ၂၀၂၆။

မန္တလေးမြို့မှာ ဆက်တိုက် ပေါ်တာဆွဲမှု တွေဖြစ် နေပြီးမေလအတွင်း အမျိုးသား ၁၅၀ ကျော် ပေါ်တာဆွဲခံရကာ၂၀ ခန့်သာ ပိုက်ဆံ ပေးပြီးပြန်လွတ်ခဲ့တာလို့ မြို့ခံတွေက ပြောပါတယ်။

“၅ လပိုင်း ၁ လအတွင်းကို လူအယောက် ၁၅၀ ကျော် ပါတယ်။ ပြန်လိုက်ရွေးနိုင်တာက ၂၀ လောက်ပဲ ရှိတာ။ အခုဆွဲနေတာက တရားဝင်ပေါ်တာ မဟုတ်ဘူး။ ပြန်ရွေးလို့ အထက်လူကြီးနဲ့ဆို (ကျပ်သိန်း) ၅၀ လောက်ဆို ရတယ်။ တချို့ကတော့ ပေးရတာတွေရောဆို ၇၀ လောက်တော့ ကုန်တယ်။” လို့ မြို့ခံတဦးက ဆိုပါတယ်။

မန္တလေးမြို့မှာ ပျူစောထီးအုပ်စုများစွာရှိပြီး ပျူတွေက ပေါ်တာဆွဲကာ လူရောင်းချမှုရှိသလို စစ်မှုထမ်းကြေး လစဉ်ငွေကောက်ခံတဲ့ ရပ်ကွက်တွေက ဒီလူ တွေကို အစားထိုး ဝယ်ယူတာ တွေရှိပြီး တရားဝင် လူကုန်ကူး ဈေးကွက်တခုလိုဖြစ်နေတာလို့ မြို့ခံတွေက ပြောပါတယ်။

မေလ ၁၈ ရက်နေ့ ၊ နေ့လည် ၁၂ နာရီခွဲမှာ မန္တလေးမြို့မှာ ပေါ်တာဆွဲမှုနာမည်ကြီးတဲ့ စက်မှုထဲမှာအမျိုးသားတဦး ပေါ်တာဆွဲခံခဲ့ရပြီး မတ္တရာမြို့နယ်၊ စစ်သားစုဆောင်းရေးတပ် (ထီးတော်မိုး)ထဲကို ရောင်းစားခံခဲ့ရတယ်လို့မိသားစုဝင်တဦးက ပြောပါတယ်။

“တံတားဦးဘက်က စစ်သားနဲ့ လူမိုက်ပေါင်းပြီး စက်မှုထဲကို ကားနဲ့ PDF လားဆိုပြီး တခါတည်းဆွဲတင်ပြီး မတ္တရာနားက ထီးတော်မိုးတပ်ထဲ ရောင်းစားတာ၊ လူပြတ်တဲ့လမ်းမှာ ကားနဲ့အသင့်စောင့်ပြီး တခါတည်းခေါ်ပြီး ရောင်းစားတာ။” လို့ မိသားစုဝင်က ပြောပါတယ်။

ပြီးခဲ့တဲ့ ဖေဖော်ဝါရီလအတွင်းမှာလည်း ထီး တော်မိုးတပ်က စစ်သား ၂ ဦးနဲ့ မန္တလေးမြို့ခံ ပျူစောထီး တွေပေါင်းပြီး နည်းပညာကျောင်းသားတဦးကို ပေါ်တာဆွဲကာ ငွေညစ်ခဲ့တာမို့ ရဲတွေဖမ်းမိတဲ့ဖြစ်စဉ် ရှိခဲ့သေးတယ်လို့ မြို့ခံ တဦးကလည်း ပြောပါတယ်။

ဒါ့အပြင်ပျူစောထီးတွေနဲ့ စစ်သားတွေပေါင်းပြီး လမ်းသွားလမ်းလာပြည်သူတွေကို ပေါ်တာဆွဲဖမ်းဆီးနေတာကြောင့် မြို့နေပြည်သူတွေ အထိတ်တလန့်ဖြစ်နေတယ်လို့ မြို့ခံတွေက ပြောပါတယ်။

အခုလို ပေါ်တာဆွဲ ဖမ်းဆီးရောင်းစားတာတွေကြောင့် ဆိုင်ကယ် ကယ်ရီသမား၊ လမ်းမတွေပေါ်မှာ လိုက်ပြင်ပေးရတဲ့ ကားပြင်သမား စတဲ့ လမ်းမပေါ်မှာ အလုပ်လုပ်နေရတဲ့ အမျိုးသားတွေအတွက် အခက်တွေ့နေပြီး အလုပ်လုပ်ဖို့တောင် ကြောက်လန့်နေရတယ်လို့ ဆိုပါတယ်။

မန္တလေးမြို့၊ ပြည်ကြီးတံခွန်မြို့နယ်ထဲက စက်မှုဇုန်မှာ ပေါ်တာဆွဲဖမ်းဆီးမှုတွေကို အများဆုံးကြုံနေရပြီး ပေါက်ကိုယ် တော်ရဲ့ ပျူစောထီး အဖွဲ့ရှိသလို လူမိုက်ဂိုဏ်းအများဆုံးရှိတဲ့နေရာ ဖြစ်တယ်လို့လည်း မြို့ခံတွေက ခန့်မှန်းပါတယ်။

“တချို့က စက်မှုနယ်ဘက် တဝိုက်လူမိုက်တွေကခေါ်ပြီး စစ်မှုထမ်းအတွက် ရောင်းစားတာ၊ ကားအမျိုးအစားက Honda Insight၊ Honda Fit၊ Mark II (ကားတွေနဲ့) လူမိုက်တွေက (စစ်သားတွေ)ပေါင်းပြီး စောင့်တာ။” လို့ ပြောပါတယ်။

ဒါ့အပြင် နေအိမ်ပေါ်အထိတက်ကာ ပေါ်တာဆွဲမှု တွေရှိပေမယ့် ယနေ့အထိ စစ်တပ်က အရေးယူတာမျိုးလည်း မရှိဘူးလို့သိရပါတယ်။

၂၀၂၆ ခုနှစ် ဇွန်လနောက်ဆုံးပတ်နဲ့ ဇူလိုင်လထဲမှာတော့ စစ်ကော်မရှင်တပ်ရဲ့ ရပ်ကွက်အုပ်ချုပ်ရေးမှူး၊ ဆယ်အိမ်မှူး၊ ရာအိမ်မှူး စတဲ့ လူကြီးရွေးပွဲတွေရှိတာကြောင့် ပေါ်တာဆွဲတာ အနည်းငယ် လျော့နေပေမယ့် မြို့ခံတွေရဲ့ စိတ်မလုံခြုံတာတွေ၊ အထိတ်တလန့်ဖြစ်နေတာတွေကတော့ လျော့မသွားဘဲ ဆက်ဖြစ်နေတယ်လို့ သိရပါတယ်။

စာတည်း – နိုင်းဝမ်း

ဝက်လက်၊ ဇူလိုင် ၇၊ ၂၀၂၆။

ဆဲဗင်းဂျူလိုင်အရေးတော်ပုံ ၆၄ နှစ်မြောက် အထိမ်းအမှတ် ချီတက်ပွဲကို ဝက်လက်မြို့နယ်အတွင်းက ကျေးရွာတရွာမှာ ပြုလုပ်ခဲ့တယ်လို့ ဝက်လက်မြို့နယ် ကျောင်းသားသမဂ္ဂဆီက သိရပါတယ်။

အဆိုပါ ချီတက်ပွဲကို ဇူလိုင်လ ၆ ရက်နေ့က ပြုလုပ်ခဲ့တာဖြစ်ပြီး ကျောင်းသားတွေနဲ့ ပြည်သူ ၁၀၀ ကျော် ပါဝင်လှုပ်ရှားခဲ့တယ်လို့ ဝက်လက်မြို့နယ် ကျောင်းသားများသမဂ္ဂ ဥက္ကဌကိုဟန်မင်းစိုးက မြေလတ်အသံကို ပြောပါတယ်။

“စစ်အာဏာရှင်စနစ်၊ စစ်အစိုးရဆီကနေ ရစရာအကြွေးတွေ မရသေးတဲ့အတွက် ကျနော်တို့ ပြန်ပြီး လှုံဆော်သတိချပ်တာပေါ့၊ အဓိကက လက်ရှိ ၂၀၂၁ နွေဦးတော်လှန်ရေးမှာ စစ်အစိုးရဆီက ရစရာအကြွေးတွေကို ကျနော်တို့ ပြန်လည်တောင်းဆိုမယ်၊ နောက်ပြီး လူထုလွတ်မြောက်ရေးခရီးကြမ်းမှာ တိုက်ပွဲဝင်သွားမယ်။” လို့ ကိုဟန်မင်းစိုးက ပြောပါတယ်။

ချီတက်ပွဲမှာ ဝက်လက်မြို့နယ်ကျောင်းသားများသမဂ္ဂ(ဗကသများအဖွဲ့ချုပ်)၊ အခြေခံပညာကျောင်းသားများသမဂ္ဂ(ဗကသများအဖွဲ့ချုပ်)နဲ့ ဒေသခံပြည်သူတွေ ပူးပေါင်းပြုလုပ်ခဲ့ကြတာလို့ သူကဆိုပါတယ်။

ဆဲဗင်းဂျူလိုင် အထိမ်းအမှတ်နေ့ အခမ်းအနားတွေကို ကျောင်းသားသမဂ္ဂတွေ၊ နိုင်ငံရေးတက်ကြွလှုပ်ရှားသူတွေနဲ့ ဖြစ်စဉ်သိ ပြည်သူတွေက နှစ်စဉ်ပြုလုပ်လာခဲ့ကြတာလည်း ဖြစ်ပါတယ်။

၁၉၆၂ ခုနှစ် ဇူလိုင်လ ၇ ရက်နေ့ဟာ ရန်ကုန်တက္ကသိုလ်ဝင်းအတွင်းရှိ သမဂ္ဂအဆောက်အဦကို ဗိုလ်နေဝင်းဦးဆောင်တဲ့ အာဏာသိမ်းစစ်တပ်က ဖြိုခွင်းပြီး ကျောင်းသားပေါင်း ၂၀၀ ကျော်ကို G-3 ရီးမောင်းပြန်တွေနဲ့ ပစ်ခတ်သတ်ဖြတ်ခဲ့တဲ့နေ့လည်း ဖြစ်ပါတယ်။