ပျူခေါင်းဆောင်

ကြို့ပင်ကောက်၊ ဇွန် ၉၊ ၂၀၂၅။

ပဲခူးတိုင်း၊ သာယာဝတီခရိုင်၊ ကြို့ပင်ကောက်မြို့နယ်၊ ဗောဓိကုန်းကျေးရွာက ပျူစောထီးခေါင်းဆောင် အုပ်ချုပ်ရေးမှူးကိုပစ်ခတ်ရာ သေဆုံးခဲ့ပြီး သူ့ဆီကနေ လက်ပစ်ဗုံးပါသိမ်းဆည်းရရှိခဲ့တယ်လို့ BTZM GBK – PDF ပဲခူးရိုးမအခြေပြုတပ်ဖွဲ့ဆီက သိရပါတယ်။

ပစ်ခတ်ခံရသူဟာ အသက် ၅၀ နှစ်အရွယ် မောင်ညိမ်းဆိုသူဖြစ်ပြီး ဇွန် ၈ ရက် ညနေ ၅ နာရီခွဲခန့်မှာ လယ်ကွင်းထဲ စပါးပက်နေတဲ့အချိန် ပစ်ခတ်ခဲ့တာလို့ဆိုပါတယ်။

“မောင်ညိမ်းက ကုန်းရွာ(အနီးက)ကွင်းချောင်းမှာ တပ်အထိုင်ချထားတဲ့ စစ်ကောင်စီ(တပ်ဖွဲ့ဝင်တွေ)ကို အပြည့်အဝထောက်ပံ့တာတွေအပြင် အနီးဝန်းကျင်ပြည်သူတွေကို ဒုက္ခပေးနေတဲ့အတွက် ခုလိုသုတ်သင်ရှင်းလင်းခဲ့တာ”လို့ BTZM GBK – PDF ပဲခူးရိုးမအခြေပြုတပ်ဖွဲ့ တပ်ခွဲမှူး တေဇမင်းက ပြောပါတယ်။

ဒါ့အပြင်သူဟာ စစ်မှုထမ်းဟောင်းတဦးလည်းဖြစ်ပြီး ကျေးရွာဒေသခံလူငယ်တွေကို စစ်မှုထမ်းဖို့ဆိုကာ ငွေတောင်းတာတွေရှိတယ်လို့ ဆိုပါတယ်။

“စစ်မှုထမ်းဖို့ဆိုပြီး ရွာတွေကလူငယ်ပိုင်းတွေကို အကုန်ဆွဲတယ်၊ ဆွဲပြီးလို့ ပိုက်ဆံရှိတဲ့သူတိုင်းကို သိန်း ၂၀၀ တတ်နိုင်တဲ့သူတိုင်းကို သူကိုယ်တိုင်လိုက်နုတ်(ထုတ်)ပေးတယ်၊ သူအတွက်သီးသန့်တောင်းတာလည်းရှိတယ်၊ သူ့အတွက် သိန်း ၃၀ တောင်းတယ်၊ တော်လှန်ရေးအဖွဲ့တွေက ၂၀၂၂ ခုနှစ်လောက်ကတည်က သူ့ကိုရှင်းလင်းဖို့ဆိုပြီး ပြင်ဆင်ခဲ့ကြတာ၊ သူကပါးနပ်တော့ ကျနော်တို့တော်လှန်ရေးအဖွဲ့တွေက မရှင်းလင်းနိုင်ခဲ့ဘူး၊ အခုမှရှင်းလင်းနိုင်တာ။” လို့ တပ်ခွဲမှူး တေဇမင်းကဆက်ပြောပါတယ်။

ပစ်ခတ်ပြီးနောက် သူ့ရဲ့ လွယ်အိတ်ထဲက လက်ပစ်ဗုံး ၂ လုံး သိမ်းဆည်းရခဲ့ပြီး အလောင်းကိုတော့ပစ်ခတ်တဲ့နေရာမှာပဲ ထားခဲ့တယ်လို့ ဆိုပါတယ်။

ပြီးခဲ့တဲ့ ဇွန် ၂ ရက်ကလည်း ပဲခူးတိုင်း၊ သာယာဝတီခရိုင်၊ ကြို့ပင်ကောက်မြို့နယ်၊ ဘော်ဘင်ဆယ် ရေလွှတ်မြောင်းပေါင်(ဘောင်)ပေါ်ကို စစ်ကြောင်းထိုးလာတဲ့ စစ်ကောင်စီတပ်ဖွဲ့ဝင်တွေကို BTZM GBK PDF က မိုင်းဆွဲတိုက်ခိုက်ခဲ့ရာ ၆ ဦးသေပြီး ၁ ဦးဒဏ်ရာရခဲ့ပါသေးတယ်။

စာတည်း – လင်း

ပဲခူး၊ မတ် ၁၁၊ ၂၀၂၃။

ပဲခူးတိုင်း၊ ပဲခူးခရိုင်၊ ကဝမြို့နယ်၊ သရက်ကုန်းကျေးရွာမှာ စစ်ကောင်စီအတွက် ဆက်ကြေးကောက်ပေးနေတဲ့ ပျူစောထီးခေါင်းဆောင်ဆိုသူ သေနတ်နဲ့ပစ်ခံရပြီး သေဆုံးသွားတယ်လို့ သိရပါတယ်။

အသက် ၅၅ နှစ်အရွယ် သရက်ကုန်းရွာသား ဦးတင်မြင့်ဖြစ်ပြီး မတ်လ ၁၀ ရက်မနေ့ကမနက် ၇ နာရီ ၃၀ မိနစ်လောက်က သရက်ကုန်းစျေးထဲမှာ ပစ်ခတ်ရှင်းလင်းခဲ့တာလို့ ကဝမြို့နယ် ပကဖ တာဝန်ရှိသူက ပြောပါတယ်။

“ကျနော်တို့ဘက်က စကစ ဘက်ကလူတွေကို ရှင်းတော့မယ်ဆိုရင် သေချာစိစစ်ပြီးမှ ရှင်းတာဖြစ်တယ်။ နံပါတ်စဥ်ပြီးမှ ဘယ်သူကို အရင်ရှင်းရမလဲဆိုတာ လုပ်ပါတယ်။ ခုက တင်မြင့်က ရှင်းရမယ့် သူတွေထဲက တယောက်ဖြစ်လို့ နန်းထိုက်အောင်စစ်ဆင်ရေးအနေနဲ့ ရှင်းလင်းလိုက်တာ ဖြစ်ပါတယ်” လို့ ပြောပါတယ်။

သေနတ်နဲ့ပစ်ခတ်ခံရလို့ ဦးတင်မြင့်ရဲ့ ဦးခေါင်းနဲ့ခန္ဓာကိုယ်မှာ ကျည်ထိဒဏ်ရာနဲ့ နေရာမှာပဲ သေဆုံးသွားခဲ့တာဖြစ်ပြီး၊ ပစ်သတ်ခံရပြီးနောက်မှာ စစ်ကောင်စီအဖွဲ့တွေ ရောက်လာကာ လမ်းပိတ်ဆို့ စစ်ဆေးရှာဖွေတာတွေ လုပ်ဆောင်ခဲ့တယ်လို့ သိရပါတယ်။

သရက်ကုန်းကျေးရွာမှာ စစ်ကောင်စီတပ်ဖွဲ့ဝင် ၁၀ ဦးခန့် အမြဲတမ်းတပ်စွဲထားပြီး အုပ်ချုပ်‌ရေးမှူး၊ ပျူစောထီးတွေနဲ့ ပူးပေါင်းကာ ပြည်သူလူထုကို ဒုက္ခမျိုးစုံပေးလျက်ရှိတယ်လို့လည်း ဆိုပါတယ်။

ဦးတင်မြင့်ဟာ သရက်ကုန်းရွာမှာ တပ်စွဲထားတဲ့ စစ်ကောင်စီတပ်ဖွဲ့ဝင်တွေနဲ့ အခြားကျေးရွာတွေကို ဆိုင်ကယ်နဲ့လှည့်လည်ရာမှာ ကိုယ်တိုင်သေနတ်လွယ် ဆိုင်ကယ်မောင်းပြီး နေ့ရောညပါ သတင်းပေး လမ်းပြပြုလုပ်နေသူဖြစ်တယ်လို့လည်း သိရပါတယ်။

ဒါ့အပြင် သူဟာ သရက်ကုန်းကျေးရွာ ဈေးနဲ့ လောင်းကစားဒိုင်ဆီကနေ ဆက်ကြေးကောက်ခံပြီး စစ်ကောင်စီတပ်တွေနဲ့ အုပ်ချုပ်ရေးမှူးဆီကို ဆက်ကြေးပေးသွင်းတာ၊ စစ်ကောင်စီတပ်ဖွဲ့ဝင်တွေနဲ့ ပူးပေါင်းပြီး သေနတ်ပစ်ဖောက် လေ့ကျင့်တာ၊ ပြည်သူတွေကို ခြိမ်းခြောက်ဖိနှိပ်ငွေညှစ်တာ၊ မတရားစွပ်စွဲပြီး ဖမ်းဆီးထောင်ချခိုင်းတာ၊ တော်လှန်ရေးတပ်ဖွဲ့တွေရဲ့သတင်းကို စုံစမ်းပေးပို့တာတွေ ကျူးလွန်ဆောင်ရွက်နေသူ ဖြစ်တယ်လို့ ဆိုပါတယ်။

၂၀၂၂ ခုနှစ်၊ ဧပြီလ ၂၈ ရက်ကလည်း ကဝမြို့၊ အမှတ် ၃ ရပ်ကွက် လဝကရုံးအနီးမှာ ကဝမြို့နယ် ရဲတပ်ဖွဲ့မှူး ရဲမှူးဝင်းနိုင်ဆိုသူ သေနတ်နဲ့ပစ်သတ်ခံခဲ့ရပါသေးတယ်။

ပခုက္ကူ၊ မတ် ၈၊ ၂၀၂၃။

မကွေးတိုင်း၊ ပခုက္ကူမြို့နယ်၊ မန်ကျည်းပင်ပုအုပ်စု၊ ကျွန်းအိုကျေးရွာရှိ ပျူစောထီးခေါင်းဆောင်ဆိုသူကို မတ်လ ၇ ရက်မ‌နေ့က ည ၁၀ နာရီ ၄၅ မိနစ်မှာ ပစ်ခတ်ရှင်းလင်းခံခဲ့ရတယ်လို့ သိရပါတယ်။

အသက် ၄၀ နှစ်အရွယ် ကိုစိုးမြင့်သန်းဖြစ်ပြီး၊ စစ်တပ်ကို ငွေကြေးကောက်ခံပေးနေတာအပြင် ပြည်သူတွေကိုလည်း အနိုင်ကျင့်ပြောဆိုတာတွေရှိတဲ့အတွက် နေအိမ်မှာပဲ ပစ်ခတ်ခဲ့တာလို့ Young Force – UG တာဝန်ခံက ပြောပါတယ်။

“သူက ကျေးရွာပြည်သူတွေကို ခြိမ်းခြောက်တယ်။ စစ်ကောင်စီကို လစဉ်ဆပ်ကြေးကောက်ပေးတယ်။ ပြည်သူတွေကို အနိုင်ကျင့်ဗိုလ်ကျနေတာ။ အဲဒါကြောင့် ကျနော်တို့ဝင်ရောက်ရှင်းလင်းတာ။ အစကတော့ အရှင်ဖမ်းဖို့ပါ။ သူ့ကိုရှင်းတဲ့အချိန် လက်နက်ချဖို့ ပြောတဲ့အခါမှာ လက်နက်မချဘဲ ပြန်ခုခံပြီးထွက်ပြေးလို့ အဲဒီမှာပဲ သေနတ်နဲ့ ပစ်ရှင်းလင်းလိုက်တာ” လို့ ပြောပါတယ်။

ရှင်းလင်းပြီးနောက် ကိုစိုးမြင့်သန်းဆီက 5.56 ကပစထုတ် ကျည် ၁၀ တောင့်၊ လက်ပစ်ဗုံး ၁ လုံး၊ မှတ်ပုံတင်နဲ့ ကီးပတ်ဖုန်း ၂ လုံးကို သိမ်းဆည်းရခဲ့တယ်လို့ ဆိုပါတယ်။

ဒီလုပ်ဆောင်မှုကို Young Force -UG၊ ညီနောင်သုံးဖော်ပြည်သူ့ကာကွယ်‌ရေးတပ်ဖွဲ့ – ရေစကြိုနဲ့ Taung Latt PDF-YSO တို့ ပူးပေါင်းလုပ်ဆောင်ခဲ့တာလည်း ဖြစ်ပါတယ်။

ပြီးခဲ့တဲ့ ဖေဖော်ဝါရီလ ၁၈ ရက်ကလည်း ပခုက္ကူမြို့နယ်၊ အနောက်ဘုန်းကံရွာမှာ တပ်စွဲထားတဲ့ စစ်အုပ်စုကို Young Force -UG အဖွဲ့က ပစ်ခတ်တိုက်ခိုက်ခဲ့ပါသေးတယ်။

စာတည်း – လင်း

ပဲခူး၊ ဖေဖော်ဝါရီ ၁၆၊ ၂၀၂၃။

ပဲခူးတိုင်းဒေသကြီး၊ လက်ပံတန်းမြို့နယ်၊ ရွှေကြိုပင်ကျေးရွာ လယ်ကွင်းထဲက လောင်းကစားဝိုင်းမှာရှိနေတဲ့ ကျေးရွာပျူစောထီးခေါင်းဆောင် လောင်းကစားဒိုင်ဆိုသူဟာ သေနတ်နဲ့ပစ်ခံရလို့ ပြင်းထန်ဒဏ်ရာရသွားတယ်လို့ သိရပါတယ်။

ဖေဖော်ဝါရီလ ၁၄ ရက်နေ့ ည ၁၀ နာရီကျော်ခန့်မှာ ရွှေကြိုပင်ကျေးရွာ ပျူခေါင်းဆောင် ကြီးမြင့် (ခေါ်) ကတုံး အသက် ၆၇ နှစ်ဟာ လောင်းကစားဝိုင်းမှာ ရှိနေချိန် သေနတ်နဲ့ ၃ ချက်ပစ်ခတ်ခဲ့တယ်လို့ သာယာဝတီခရိုင်၊ ဂဠုန်တပ်ဖွဲ့တာဝန်ရှိသူက ပြောပါတယ်။

“သူက ၂၀၂၀ ရွေးကောက်ပွဲကတည်းက ကြံ့ခိုင်ရေးပါတီအတွက် မဲဆွယ်တဲ့သူ။ အာဏာသိမ်းပြီးတော့လည်း ဆန္ဒပြလူငယ်တွေကို ဖမ်းဖို့ စကစကို သတင်းပေးတဲ့သူ။ ခုလည်း စကစတွေနဲ့ပေါင်းပြီး ရွာစဥ်လှည့်လောင်းကစားဝိုင်းတွေ လုပ်နေသူဖြစ်တယ်။ လောင်းကစားဝိုင်းတွေကြောင့် ရွာကသူတွေလည်း ဘဝပျက်သူတွေ များနေပြီ” လို့ ပြောပါတယ်။

သေနတ်နဲ့ပစ်ခတ်ခံရလို့ ကြီးမြင့်မှာ နောက်ကျောနဲ့ပေါင်မှာ သေနတ်ဒဏ်ရာရပြီး သာယာဝတီဆေးရုံကနေ ရန်ကုန်ဆေးရုံကိုပို့ထားရတယ်လို့ ဆိုပါတယ်။

အဲဒီပစ်ခတ်မှုကိုတော့ လက်ပံတန်းမြို့နယ် ရွှေတန်းမြေပြည်သူ့ကာကွယ်ရေးအဖွဲ့(ဒေါင်းလေးတပ်ဖွဲ့) နဲ့ သာယာဝတီခရိုင် ဂဠုန်တပ်ဖွဲ့ အဖွဲ့ ၄ တို့က လုပ်ဆောင်ခဲ့တာဖြစ်တယ်လို့ သိရပါတယ်။

အဲဒီနေ့မှာပဲ သာယာဝတီမြို့နယ်၊ ချမ်းသာကုန်းနဲ့ညောင်လေးပင်ရွာကြားမှာ လောင်းကစားဝိုင်းကို PDF တွေက မိုင်းခွဲသတိပေးချိန် PDF တွေကို စကေဘာနဲ့ ပြေးထိုးတဲ့ ပျူစောထီး ဘိုကျောက်ဆိုသူ သေနတ်နဲ့ပစ်ခံရလို့ ဒဏ်ရာပြင်းထန်ရခဲ့သေးတယ်လို့ သိရပါတယ်။

ပျူစောထီးအဖွဲ့တွေဟာ ကျေးရွာတွေမှာ လောင်းကစားဝိုင်းတွေကို အနည်းဆုံး ၃ ရက်မှ အများဆုံး ၇ ရက်ထိ အာဝါဒေးသဘောမျိုး​ပြုလုပ်နေကြတယ်လို့ ဆိုပါတယ်။

လောင်းကစားဝိုင်းတွေ ပြုလုပ်ခွင့်ရဖို့ သက်ဆိုင်ရာ ကျေးရွာအုပ်ချုပ်ရေးမှူး၊ ရဲနဲ့စစ်တပ်ကို အနည်းဆုံးကျပ် ၁ သိန်းမှ ကျပ် ၁၀ သိန်းထိပေးပြီး လုပ်ကြရပြီး လောင်းကစားဝိုင်းတွေမှာ ကြက်ဝိုင်း၊ ဂျင်ဝိုင်း၊ ဖဲဝိုင်း၊ အန်စာတုံးဝိုင်းတွေ ပါဝင်ပြီး ကျပ်သိန်း ဆယ်ဂဏာန်းထိ လောင်းကစားပြုလုပ်ကြတယ်လို့ ဆိုပါတယ်။

လောင်းကစားဝိုင်းတွေ ပေါလာတာကြောင့် ဒေသခံတွေဟာ အလုပ်အကိုင် ပုံမှန်လုပ်သူနည်းလာပြီး ခိုးဆိုးလုနှိုက်တွေလည်း ပေါလာတယ်လို့ သိရပါတယ်။

ပဲခူး၊ ဖေဖော်ဝါရီ ၁၃၊ ၂၀၂၃။

ပဲခူးတိုင်းဒေသကြီး၊ ကျောက်တံခါးမြို့နယ်၊ ကညင်ကျိုးကျေးရွာအနီး တာလမ်းပေါ်မှာ ကျေးရွာ ပျူစောထီးခေါင်းဆောင် ဆိုသူ ပစ်ခတ်ရှင်းလင်းခံရတယ်လို့ သိရပါတယ်။

ဖေဖော်ဝါရီလ ၁၂ ရက်နေ့ ညနေ ၅ နာရီကျော်ခန့်မှာ လယ်ထဲကနေ ဆိုင်ကယ်နဲ့ပြန်လာတဲ့ ပျူစောထီးခေါင်းဆောင် ကျော်ဦး ၅၀ နှစ်ခန့်ကို ပစ်ခတ်ရှင်းလင်းခဲ့တယ်လို့ ကျောက်တံခါးမြို့နယ် ပကဖ တာဝန်ရှိသူက ပြောပါတယ်။

“သူက ဆိုင်ကယ်နဲ့သွားနေတုန်း အနားကပ်ပြီး ၃ ချက် ပစ်ခတ်ရှင်းလင်းခဲ့တာ ဖြစ်တယ်။ သူက စကစ ကပေးတဲ့ ပျူသင်တန်းဆင်း ဖြစ်တယ်။ ခမရ ၃၀၇ မှာ သင်တန်းတက်ထားသူ ဖြစ်တယ်” လို့ ပြောပါတယ်။

ကျော်ဦးဟာ ပျူခေါင်းဆောင်ဖြစ်သလို PDF တွေရဲ့ လှုပ်ရှားမှုတွေကို စစ်ကောင်စီတပ်ထံ သတင်းပေးနေသလို ကျေးရွာထဲက NLD ပါတီဝင်တွေကို ဖမ်းဆီးခိုင်းတာ စစ်ကောင်စီက ပြုလုပ်မယ့် ရွေးကောက်ပွဲဖြစ်မြောက်အောင် အားတက်သရောပါဝင်ကူညီနေတာတွေကြောင့် ရှင်းလင်းခဲ့တာဖြစ်တယ်လို့ ဆိုပါတယ်။

သေနတ်နဲ့အနီးကပ် ပစ်ခတ်ခံရလို့ ဦးကျော်ဦးဟာ မျက်လုံး၊ နားထင်၊ ရင်ဘတ်တွေမှာ ကျည်ဖောက်ဝင်ဒဏ်ရာရပြီး နေရာမှာပဲ သေဆုံးသွားတယ်လို့ သိရပါတယ်။

ပျူခေါင်းဆောင် ပစ်သတ်ခံရပြီးနောက် စစ်ကောင်စီအဖွဲ့တွေ လာရောက်စစ်ဆေးခဲ့ပြီး အလောင်းကို ကျောက်တံခါးပြည်သူ့ဆေးရုံကို ယူသွားတယ်လို့ သိရပါတယ်။

ဇန်နဝါရီလ ၃၁ ရက်နေ့က ကျောက်တံခါးမြို့နယ် ပြည်သူ့ကာကွယ်ရေးတပ်ဖွဲ့ဝင်တွေက ကျောက်တံခါးမြို့နယ်၊ ပဲနွယ်ကုန်းမြို့နဲ့ အောင်မြင်မြို့ (တောကျွဲအင်းမြို့) ကြားရှိ ခမရ ( ၃၀၇ ) တပ် လက်နက်တိုက်၊ ဗဟိုကင်းနဲ့ ဧည့်ရိပ်သာဘက်ကို လက်နက်ကြီးနဲ့ ၃ ချက် သွားရောက်ပစ်ခတ်ခဲ့လို့ စစ်ကောင်စီဘက်က ထိခိုက်သေဆုံးတာရှိခဲ့သေးတယ်လို့ သိရပါတယ်။

မန္တလေး၊ ဇန်နဝါရီ ၂၃၊ ၂၀၂၃။

မန္တလေးတိုင်း၊ မတ္တရာမြို့နယ်၊ လွန်တောင်းကျေးရွာက ပျူခေါင်းဆောင်တဦး ဇန်နဝါရီ ၂၁ ရက် မနက်ပိုင်းမှာ အသတ်ခံလိုက်ရပြီးနောက် စစ်ကောင်စီက ဒေသခံ ၃ ဦးကို ဖမ်းဆီး သတ်ဖြတ်လိုက်တယ်လို့ သိရပါတယ်။

အသတ်ခံရသူ ပျူခေါင်းဆောင်ဆိုသူက ဦးမြင့်ဝင်း ၅၀ နှစ်ဖြစ်ပြီး၊ သူက တောင်ယာထဲမှာ ရှိနေချိန် မြို့ပြပြောက်ကျားအဖွဲ့က ပစ်ခတ်ရှင်းလင်းခဲ့တာဖြစ်တယ်လို့ အဖွဲ့ဝင်ရဲဘော်တဦးက ပြောပါတယ်။

“သေနတ် ၂ ချက် ပစ်ခတ်ရှင်းလင်းခဲ့တာပါ။ သူအသတ်ခံရတဲ့နေ့မှာပဲ စကစတွေက ရွာထဲကို ရောက်လာပြီးတော့ အိမ်ထောင်စုစာရင်းကောက်တယ်။ ပြီးတော့ ကောင်လေး ၂ ယောက်ကို ဖမ်းသွားတယ်။ နောက်ပြီးတော့ တခြားရွာက ကောင်လေးတယောက်ကိုလည်း ဖမ်းသွားတယ်” လို့ ဆိုပါတယ်။

ဖမ်းဆီးခံလိုက်ရတဲ့ လူငယ် ၃ ဦးဟာ အသက် ၂၀ အရွယ် ရှိကြပြီး လွန်တောင်းကျေးရွာက ၂ ဦး၊ ကျူံးကျေးရွာက ၁ ဦးတို့ဖြစ်ကာ ဇန်နဝါရီ ၂၂ ရက် မနက်ပိုင်းမှာ စစ်ကောင်စီက သူတို့ရဲ့ရုပ်အလောင်းကို လာယူဖို့ ကျေးရွာအုပ်ချုပ်ရေးမှူးကို အကြောင်းကြားလာခဲ့တယ်လို့ ဒေသခံတဦးက ပြောပါတယ်။

“ဒီကလေး ၃ ယောက်က PDF အဖွဲ့ဝင်တွေဗျ။ ဘယ်အဖွဲ့ရဲ့ အဖွဲ့ဝင်ဆိုတာကိုတော့ မသိရဘူး။ စကစက ဒီကောင်လေးတွေကို သတ်ပြီးတော့ ရွာကအုပ်ချုပ်ရေးမှူးကို အလောင်းလာယူဖို့ ဖုန်းဆက်ပြောလာတယ်ဗျ။ မတ္တရာမြို့ထဲကို ဖမ်းခေါ်သွားပြီးတော့ သတ်လိုက်တာ” လို့ ဆိုပါ တယ်။

အခုလို ဖမ်းဆီးအသတ်ခံလိုက်ရသူ ၃ ဦးထဲမှ ကျူံးရွာသားရဲ့အမည်မှာ ဒင်ကြီး ၂၁ နှစ်ဖြစ်ပြီး သူတို့တွေဟာ PDF အဖွဲ့ဝင်တွေ ဟုတ်၊မဟုတ်ကိုတော့ မြေလတ်အသံအနေနဲ့ သီးခြားအတည်မပြုနိုင်သေးပါ။

ဒါ့အပြင် သူတို့ ၃ ဦးကို သတ်ဖြတ်လိုက်တဲ့ စစ်ကောင်စီတပ်သားတွေကတော့ (၉၅) တပ်ရင်းနဲ့ မန္တလေးနန်းတွင်းတပ်ရင်းတွေက ဖြစ်နိုင်တယ်လို့ ဒေသခံတွေက ခန့်မှန်းပြောဆိုကြပါတယ်။

စစ်ကိုင်း၊ ဒီဇင်ဘာ ၂၉၊ ၂၀၂၂။

စစ်ကိုင်းတိုင်း ၊ တောပုရွာက ပျူစောထီးခေါင်းဆောင်တဦး နဲ့ တပ်ဖွဲ့ဝင် ၂ ဦး ဒီဇင်ဘာ ၂၉ ရက်ဒီနေ့ နေ့လယ် ၂ နာရီ ၂၀ လောက်မှာ PDF-South Monywa-V2 ပူးပေါင်းတပ်ဖွဲ့က ပစ်ခတ်ခဲ့လို့ ခေါင်းဆောင်အပါ ၃ဦး သေဆုံးခဲ့တယ်လို့ သိရပါတယ်။

တောပုရွာက ပျူစောထီး ၃ ဦးနဲ့ အမျိုးသမီးတဦးတို့ဟာ အိမ်စီးကားနဲ့ မုံရွာဘက်ကိုထွက်လာချိန် ဒေသကာကွယ်ရေးပူးပေါင်းတပ်ဖွဲ့က မုံရွာ−ချောင်းဦးလမ်းပိုင်းတောပုရွာအထွက်တောပုဆိုင်းဘုတ်နား အရောက်မှာ ပစ်ခတ်ခဲ့တာလို့ Monywa-V2 တပ်ဖွဲ့ဝင်တဦးကဆိုပါတယ်။

“ပျူတွေထွက်မယ်လို့သတင်းအတိအကျရတဲ့အတွက်ရွာအထွက်မှာသွားရောက်စောင့်ဆိုင်းပြီး ပစ်ခတ်တိုက်ခိုက်ခဲ့တာပါ။ အဲဒီပျူတွေထဲမှာတောပုပျူခေါင်းဆောင်တဦးဖြစ်တဲ့အရင်ကစစ်မှုထမ်းဟောင်း(အခုတော့ပျုအဖွဲ့ဝင်)ပါ။ သူတို့နဲ့အတူပါလာတဲ့အမျိုးသမီးကိုတော့အေးအေးဆေးဆေးပြန်လွှတ်ပေးလိုက်ပါတယ်။ ဘာရိုက်နက်မှုမှမပြုလုပ်ခဲ့ပါဘူး” လို့ဆိုပါတယ်။

ပစ်ခတ်မှုဖြစ်ခဲ့တဲ့နေရာမှာ ကားကတော့အခုချိန်ထိ ရှိနေတုန်းဖြစ်ကာ အနီးနားပတ်ဝန်းကျင်မှာတော့ ပျူစောထီးတပ်ဖွဲ့တွေက ကင်းပုန်းတွေများစွာချထားတယ်လို့ပြောပါတယ်။

People’s Defence Force – South Monywa နဲ့အတူ Anyar Defense Force / Garuda King Monywa တပ်ဖွဲ့တို့က ပူးပေါင်းတိုက်ခိုက်ခဲ့ကြတယ်လို့ဆိုပါတယ်။

ဒီဇင်ဘာ ၂၈ ရက်နေ့ကလည်း South Monywa -V2 တပ်ဖွဲ့က မုံရွာ−ချောင်းဦးလမ်းပိုင်းဘေးက ဘက်စုံမွေးမြူရေးခြံထဲမှာတပ်စွဲနေတဲ့ စစ်ကောင်စီတပ်ကိုသွားရောက်ပစ်ခတ်ခဲ့ပါသေးတယ်။