နင်းမိုင်း

စလင်း၊ မေ ၃၀၊ ၂၀၂၆။

မကွေးတိုင်း၊ စလင်းမြို့နယ်၊ ထန်းပင်ကုန်းရွာမှာ ကောက်ရတဲ့ M 14 နင်းမိုင်းကို တံစဥ်နဲ့ဖွင့်ရာမှ မိုင်းပေါက်မှုဖြစ်ပြီး ဒေသခံ ၂ ဦးသေဆုံးခဲ့တယ်လို့ ဒေသကာကွယ်ရေးအဖွဲ့တာဝန်ရှိသူတွေဆီက သိရပါတယ်။

မေ ၂၈ ရက်မနက်ပိုင်းမှာ ထန်းပင်ကုန်းရွာနေ အသက် ၁၈ နှစ်အရွယ် အမျိုးသမီးငယ်ဟာ စမ်းကလေး မြောက်ကျေးရွာအနီးမှာတွေ့တဲ့မိုင်းကို အိမ်ကိုယူဆောင်လာချိန် ဖခင်ဖြစ်သူက ဖွင့်ကြည့်ရာမှာ ပေါက်ကွဲခဲ့တာလို့ ဆိုပါတယ်။

“သူအဖေက တံစဥ်နဲ့ကလော်ဖွင့်လိုက်တာ။ မိုင်းကွဲပြီး မျက်နှာတွေဆို မဲသဲကုန်တာ။ စမ်းကလေးနားက ဓာတ်တိုင်နားက ကောက်လာတာ။ **တွေထောင်ထားတဲ့မိုင်း။ ကျွန်မတို့တောင် ထင်တဲ့နေရာလေး လိုက်လိုက်ဖော်တာ ၅၈ လုံးရထားတယ်။ ကျန်တဲ့ဟာတွေနေမှာ။ “လို့ ဒေသကာကွယ်ရေးအဖွဲ့ဝင်တဦး ကပြောပါတယ်။

ပေါက်ကွဲမှုဖြစ်ပြီး အသက် ၄၀ ကျော်အရွယ် ဖခင်ဖြစ်သူမှာလက်နှစ်ဖက်ပြတ်၊ မျက်နှာမိုင်းစမှန်ကာ အသက် ၁၈ နှစ်အရွယ် သမီးဖြစ်သူမှတော့ ခြေထောက်နဲ့လက်တွေမှာမိုင်းစထိတဲ့အပြင် အသက် ၄၅ နှစ်အရွယ် ဦးလေးဖြစ်သူရဲ့ မျက်နှာမိုင်းစမှန်ဒဏ်ရာတွေရခဲ့တယ်လို့ ဆိုပါတယ်။

အဲ့ဒီနောက် ပွင့်ဖြူဆေးရုံကိုတင်ပို့ကုသရမှာ အမျိုးသား ၂ ဦးကသေဆုံးခဲ့ပြီး သမီးဖြစ်သူမှာတော့ ဆေးကုသမှုဆက်လက်ခံယူနေကာ ဒဏ်ရာသက်သာတယ်လို့ သိရပါတယ်။

ဖေဖော်ဝါရီ ၂၆ ရက်ကလည်း စလင်းမြို့နယ်၊ မြောင်းဘောင်ကျေးရွာအနီး တောစပ်မှာ မိုင်းထိလို့ လင်မယား ၂ ဦးဒဏ်ရာရခဲ့တယ်လို့ သိရပါတယ်။

စာတည်း- လင်း

စလင်း၊ ဧပြီ ၂၄၊ ၂၀၂၆။

မကွေးတိုင်း၊ စလင်းမြို့နယ်၊ စိဇွဲကျေးရွာအနီးမှာ မန်ကျည်းရွက်သွားခူးတဲ့ အမျိုးသမီး ၁ ဦးမိုင်းထိပြီး ခြေထောက်ပြတ်သွားတယ်လို့ ဒေသခံတွေဆီက သိရပါတယ်။

မိုင်းထိသူဟာ အသက် ၅၀ ကျော်အရွယ်ရှိသူ ဒေါ်မြင့်မြင့်ဝေ ဆိုသူဖြစ်ပြီး ဧပြီ ၂၂ ရက်မနက် ၁၀ နာရီခန့်မှာ ကျေးရွာအနောက်ဘက်ခြမ်းကိုသွားချိန် မိုင်းနင်းမိခဲ့တာလို့ဆိုပါတယ်။

“သူက မန်ကျည်းရွက်ခူးဖို့ ရွာအနောက်ဘက်ကိုသွားရင်းထိတာလို့တော့ သိရတယ်။ ဘယ်ဘက် ခြေကျင်းဝတ်အောက်ဘက်ကတော့ တော်တော်ဒဏ်ရာများတယ်”လို့ ကူညီဆောင်ရွက်ပေးခဲ့သူတဦးက ပြောပါတယ်။

လက်ရှိမှာ ဆင်ဖြူကျွန်းဆေးရုံကို ပို့ဆောင်ပေးခဲ့ရပြီး ဘယ်ခြေကျင်းဝတ်အောက်ပိုင်း ဒဏ်ရာပြင်းထန်လို့ ဖြတ်လိုက်ထားရကာ ဧပြီ ၂၄ ရက် ဒီမနက်ပိုင်းအထိ ဆေးကုသမှုဆက်လက်ခံယူနေရတယ်လို့ ဆိုပါတယ်။

စလင်းမြို့နယ်အတွင်းမှာ စစ်ကော်မရှင်တပ်တွေနဲ့ဒေသကာကွယ်ရေးတပ်တွေအကြား မကြာခဏ တိုက်ပွဲဖြစ်ပြီး နှစ်ဖက်စလုံးက မိုင်းတွေလည်းထောင်ကြတာကြောင့် အခုနင်းမိတဲ့မိုင်းဟာ ဘယ်အဖွဲ့အစည်းဘက်ကထောင်တဲ့မိုင်းလဲဆိုတာ မသိရဘူးလို့ အထက်ပါ ကူညီဆောင်ရွက်ပေးခဲ့သူကပြောပါတယ်။

ပြီးခဲ့တဲ့ ဖေဖော်ဝါရီ ၂၆ ရက်ကလည်း စလင်းမြို့နယ်၊ မြောင်းဘောင်ကျေးရွာအနီး တောစပ်မှာ ပျားဖွတ်သွားတဲ့ လင်မယား ၂ ဦး မိုင်းထိပြီး ဒဏ်ရာရခဲ့သေးတယ်လို့သိရပါတယ်။

စာတည်း – လင်း