မြေလတ်အသံ၊ နိုဝင်ဘာ ၁၂၊ ၂၀၂၅။
မန္တလေးတိုင်း၊ ပြင်ဦးလွင်မြို့လယ်ရှိ အောင်စံပယ်ရွှေဆိုင် နိုဝင်ဘာ ၁၂ ရက် ဒီကနေ့မနက်ပိုင်းက ဓားပြတိုက်ခံခဲ့ရပြီး ဆိုင်ကယ်နဲ့မောင်းပြေးဖို့လုပ်နေတဲ့ လက်နက်ကိုင်ဓားပြတွေကို အနီးဝန်းကျင်ပြည်သူတွေက ဝိုင်းဝန်းဖမ်းဆီးနေတဲ့ CCTV မှတ်တမ်းရုပ်သံဖိုင် ဖြစ်ပါတယ်။
ရွှေဆိုင်ဓားပြတိုက်ခံရမှုမှာ သေနတ်ပစ်ခတ်ခံရတာကြောင့် ဆိုင်လုံခြုံရေးဝန်ထမ်းတဦး သေဆုံးခဲ့ပြီး ဓားပြတဦးကို ဖမ်းဆီးနိုင်ခဲ့ပြီး တဦးမှာ လွတ်မြောက်သွားတယ်လို့ သိရပါတယ်။
ပဲခူး၊ စက်တင်ဘာ ၉၊ ၂၀၂၅။
ပဲခူးမြို့၊ ဥဿာမြို့သစ် ၇ ရပ်ကွက် ရန်ကုန်-မန္တလေးလမ်းမကြီးဘေးရှိ “ပွင့်” ကွမ်းယာပစ္စည်းနဲ့အအေးမျိုးစုံဆိုင် ဓားပြတိုက်ခံရလို့ ကျပ်သိန်းရာချီပါသွားပြီး ဓားပြတွေကို KTV မှာ ညတွင်းချင်းပြန်မိတယ်လို့ မြို့ခံတွေထံက သိရပါတယ်။
စက်တင်ဘာ ၈ ရက် ယမန်နေ့ည ၇ နာရီကျော်မှာ ဒေါ်တင်မာချို ပိုင်တဲ့ “ပွင့်” ကွမ်းယာပစ္စည်းနှင့် အအေးမျိုးစုံဆိုင်ကို လူငယ်အမျိုးသား ၃ ဦးက ဝင်ရောက် လာပြီး ဆိုင်ရှင်ရဲ့သား ၂ ဦးကို ဓားနဲ့ထောက်ကာ ဓားပြတိုက်သွားခဲ့တာလို့ ဆိုပါတယ်။
” သူ့လူဟောင်းတွေဘဲ ပြန်တိုက်တာ။ “ပွင့်” က တရုတ်ဘုံကျောင်းရှေ့က။ သူက အိမ်ဆိုင်ဆိုတော့ အိမ်မှာတိုက်သွားတာ။ ၃ ဦးဝင်တိုက်တာ။ ပိုက်ဆံတော်တော်များများပါသွားတယ်။ ပြန်ရသွားပြီလေ အကုန်လုံး။ သူတို့တွေ့လိုက်တာကိုး။ မိုးထက်ဆီဆိုင်ခေါင်းရင်းက KTV မှာပြန်မိတာ”လို့ ဖြစ်စဥ်ကိုသိထားတဲ့မြို့ခံတဦးက မြေလတ်အသံကို ပြောပါတယ်။
ဓားပြတိုက်သူတွေဟာ “ပွင့်”ဆိုင်က ငွေကျပ်သိန်း ၂၃၀၊ ရွှေထည်လက်ဝတ်ရတနာအများအပြားနဲ့ ဖုန်း ၂ လုံးကို ယူဆောင်သွားပြီး ဓားပြတိုက်သူတွေအနက် “ပွင့်” ဆိုင်ဝန်ထမ်းဟောင်းတဦးပါဝင်နေတာကြောင့် စစ်ကော်မရှင်တပ်နဲ့ရဲတွေကလိုက်လံရှာဖွေရာ ည ၁၀ နာရီကျော်မှာ ဥဿာမြို့သစ်ရှိ FIVE STAR KTV မှာ ပစ္စည်းတွေနဲ့အတူ ပြန်လည်ဖမ်းမိခဲ့တယ်လို့ ဆိုပါတယ်။
“ပွင့်” ဆိုင်ကို ဓားပြတိုက်ခဲ့တဲ့ ဘုရားကြီးမြို့နေသူ အသက် ၁၉ နှစ် လမင်း(ခ)ကိုငယ် (ဆိုင်ဝန်ထမ်းဟောင်း)နဲ့ အသက် ၂၃ နှစ် ဇင်ကို (ခ)ကိုဇင်၊ အသက် ၂၂ အရွယ် နိုင်မင်းထွန်း ပဲခူးမြို့နေသူတို့ ၃ ဦးကို ဖမ်းဆီးမိခဲ့တာဖြစ်ပြီး ၎င်းတို့ကို ပဲခူးမြို့ အမှတ် ၃ ရဲစခန်းမှာ ဖမ်းဆီးထိန်းသိမ်းထားတယ်လို့ သိရပါတယ်။
မေ ၂၀ ရက်ကလည်း မဇင်းရပ်ကွက်၊ မဟာစေတီ ၃ လမ်းနေ အသက် ၁၃ နှစ်အရွယ် မောင်သက်မင်းနိုင်ကို တရပ်ကွက်တည်းအတူနေ အမျိုးသား ၂ ဦးကို ဖမ်းဆီးသတ်ဖြတ်ပြီး မိဘတွေထံ ငွေတောင်းယူမှုဖြစ်ပွားခဲ့သေးတယ်လို့ သိရပါတယ်။
စာတည်း – ဟိန်းစံ
ညောင်ဦး၊ ဇူလိုင် ၂၉၊ ၂၀၂၅။
မန္တလေးတိုင်း၊ ညောင်ဦးမြို့ပေါ်က Denko စက်သုံးဆီဆိုင် ဓားပြတိုက်ခံရပြီး ဆီလာထည့်တဲ့ကား၊ ဝန်ထမ်း ဆိုင်ကယ်အချို့နဲ့ ဖုန်း၊ ပိုက်ဆံတွေပါသွားတယ်လို့ ဒေသခံတွေထံက သိရပါတယ်။
ဇူလိုင် ၂၈ ရက် ယမန်နေ့ညနေ ၅ နာရီခန့်မှာ ညောင်ဦး-ကျောက်ပန်းတောင်းကားလမ်းပေါ်ရှိ တောင်ဘကျေးရွာအနီးက Denko ဆီဆိုင်ကို လက်နက်ကိုင်လူတစုက ဝင်ရောက်ဓားပြတိုက်ခဲ့တာလို့ ဆိုပါတယ်။
” ဧည့်သည် (ဆီလာထည့်တဲ့) ကားတစီး၊ ဝန်ထမ်းဆိုင်ကယ်တွေရယ်၊ ဆီရောင်းတဲ့ပိုက်ဆံတွေ၊ ဖုန်းတွေ ပါသွားတယ်လို့တော့ သိရတယ်။ အဲ့ဘက်ခြမ်းက လူတွေကမနေရဲတော့ဘူး။ သူတို့ဆီဆိုင်တွေဘဲရှိတော့တာ။ လမ်းပေါ်မှာ လူပြတ်တယ်”လို့ ညောင်ဦးမြို့ခံတဦးက မြေလတ်အသံကို ပြောပါတယ်။
ဓားပြတိုက်သူတွေဟာ ဆီဆိုင်ဝန်ထမ်းတွေနဲ့ ဆီလာထည့်သူတွေရဲ့ပစ္စည်းတွေကိုသာ ယူဆောင်သွားပြီး လူထိခိုက်မှုမရှိခဲ့ဘူးလို့ သိရပါတယ်။
စစ်အာဏာမသိမ်းခင်က အဲ့ဒီDenko ဆီဆိုင်အနီးဝန်းကျင်မှာ စျေးဆိုင်၊ စားသောက်ဆိုင်တွေနဲ့ စည်ကားခဲ့ပြီးပေမယ့် လက်ရှိအချိန်မှာတော့ အဲ့ဒီဆိုင်တွေမရှိကြတော့ဘဲ လမ်းသွားလမ်းလာနည်းပါးတယ်လို့ ဆိုပါတယ်။
Denko ဆီဆိုင်နဲ့ တမိုင်ကျော်အကွာမှာ ညောင်ဦးခရိုင်ရဲတပ်ဖွဲ့မှူးရုံးနဲ့ တောင်ဇင်းနယ်မြေရဲစခန်းတွေတည်ရှိပြီး ဓားပြတိုက်ခံရပြီးတဲ့နောက် Denko ဆီဆိုင်ကို စစ်ကောင်စီတပ်နဲ့ရဲပူးပေါင်းတပ်ဖွဲ့တွေ လာရောက်စစ်ဆေးသွားခဲ့တယ်လို့ သိရပါတယ်။
ပြီးခဲ့တဲ့နှစ် ဒီဇင်ဘာ ၂၆ ရက်ကလည်း ညောင်ဦးမြို့နယ်၊ ကြအိုရွာတောင်ဘက် ညောင်ဦး-ပုဂံ သွားလမ်းဘေးက ကုန်မာဆိုင်နေအိမ် ဓားပြတိုက်ခံရပြီး အိမ်ပိုင်ရှင်ပါ ၂ ဦးသတ်ခံရသလို စျေးရောင်းရငွေ ကျပ်သိန်း ၁၅၀ ခန့်နဲ့ရွှေ ၁၀ သား ဓားပြတွေက ယူဆောင်သွားတယ်လို့ သိရပါတယ်။
စာတည်း – ဟိန်းစံ
မန္တလေး၊ ဇူလိုင် ၂၅၊ ၂၀၂၅ ။
မန္တလေးမြို့၊ မဟာအောင်မြေမြို့နယ်၊ မန်းမြို့စျေးအနီး၊ ၃၉ လမ်း၊ ၈၄ – ၈၅ ကြား ရှိ ရွှေနန်းသုခရွှေဆိုင် ဓါးပြတိုက်ခံခဲ့ရတယ်လို့ ဒေသခံတွေထံက သိရပါတယ်။
ဇူလိုင် ၂၄ ရက် မနေ့ညနေ ၄ နာရီကျော်မှာ အဲ့ဒီရွှေဆိုင်ကို ကား ၁ စီးနဲ့ရောက်လာတဲ့ အမည်မသိလက်နက်ကိုင် ၆ ဦးလောက်က ဓားပြတိုက်ခဲ့ပြီး ရွှေဆိုင်လုံခြုံရေးဝန်ထမ်းအချို့ကို သေနတ်နဲ့ပစ်ခတ်ခဲ့တယ်လို့ ဆိုပါတယ်။
” ကျနော်တို့သိတာက ဓားပြတိုက်တာလို့ သိရတယ်။ ထိခိုက်တာက ဆိုင်ကဝန်ထမ်းတွေပဲ။ အပြန်အလှန်လည်း ပစ်ခတ်မှုဖြစ်သေးတယ်။ ဝန်ထမ်းတွေထိတာကတော့ စိုးရိမ်စရာတော့မရှိဘူး” လို့ ဖြစ်စဥ်ကိုသိထားတဲ့ မန္တလေးမြို့ခံတဦးက မြေလတ်အသံကို ပြောပါတယ်။
လက်နက်ကိုင်တွေက သေနတ်နဲ့ပစ်ခတ်ခဲ့လို့ ရွှေဆိုင်လုံခြုံရေးဝန်ထမ်း အသက် ၅၅ နှစ်အရွယ် ဦးဝေမျိုးညွန့်၊ အသက် ၂၄ နှစ်အရွယ် ကိုဇော်လင်းနိုင်တို့ လက်နဲ့ခြေထောက်တွေမှာ ကျည်ထိမှန်ဒဏ်ရာတွေရရှိခဲ့တယ်လို့ သိရပါတယ်။
ဆိုင်လုံခြုံရေးတွေကို ပစ်ခတ်ပြီးနောက် ဆိုင်အတွင်းက ရွှေနဲ့စိန်ထည်အများအပြားကို ဓားပြတိုက်သူတွေက ယူဆောင်သွားပြီး ဆုံးရှုံးမှုတန်ဖိုးအသေးစိတ်ကိုတော့ မသိရကြောင်း အထက်ပါမြို့ခံက ပြောပါတယ်။
ရွှေဆိုင်ဓားပြတိုက်ပြီးပြန်အထွက်မှာ ဓားပြတိုက်တဲ့အဖွဲ့တွေနဲ့ ရွှေဆိုင်အနီး မန်းမြို့မစျေးတာဝန်ကျစစ်ကောင်စီလက်အောက်ရဲတပ်ဖွဲ့တွေ အပြန်အလှန်ပစ်ခတ်မှုဖြစ်ခဲ့ပေမယ့် ဓားပြတိုက်သူတွေ ထွက်ပြေးလွတ်မြောက်သွားတယ်လို့ သိရပါတယ်။
ဧပြီ ၂၉ ရက်ကလည်း ချမ်းမြသာစည်မြို့နယ်၊ အောင်ပင်လယ်ရပ်ကွက်၊ ၁၀၃×၁၀၄ လမ်းကြား၊ ၅၅ လမ်းပေါ်ရှိ “ရွှေဇာမဏီ”ရွှေဆိုင်ဓါးပြတိုက်ခံရပြီး ရွှေ ၂၀ ကျပ်သားကျော်ပါသွားတယ်လို့ သိရပါတယ်။
စာတည်း – ဟိန်းစံ
မြေလတ်အသံ၊ ဇန်နဝါရီ ၂၄၊ ၂၀၂၅။
စစ်ကောင်စီလက်အောက် စစ်ကိုင်းတိုင်း တိုင်းရင်းသားစာပေနဲ့ယဥ်ကျေးမှုဦးစီးဌာန နဲ့ တိုင်းရင်းသားများအခွင့်အရေးကာကွယ်စောင့်ရှောက်ရေးဦးစီးဌာနရုံး ဓားပြတိုက်ခံခဲ့ရတယ်လို့ ဒေသခံတွေထံက သိရပါတယ်။
မုံရွာမြို့၊ ချမ်းမြဝတီရပ်ကွက်၊ လမ်းသွယ် ၂၀ မှာရှိတဲ့ အဆိုပါရုံးကို ဇန်နဝါရီ ၂၃ ရက် မနေ့မနက် ၁၁ နာရီခန့်မှာ လက်နက်ကိုင်ဆောင်ထားတဲ့ လူ ၅ ဦးထက်မနည်းက ကား ၁ စီးနဲ့ ဝင်ရောက်စီးနင်းဓားပြတိုက်ခဲ့တာလို့ ဆိုပါတယ်။
” ကျနော်တို့သိရသလောက်က ဌာနပိုင်ကားတွေ ပါသွားတယ်။ လူတော့မပါဘူး။ ငွေနည်းနည်းလောက်ပါသွားတယ်။ ကားနဲ့မောင်းဝင်လာပြီး လက်နက်နဲ့ဝင်ချလာတာဆိုတော့ ဓားပြဝင်တိုက်တာဖြစ်နိုင်တယ်။”လို့ မုံရွာမြို့ဌာနဆိုင်ရာရုံးနဲ့နီးစပ်တဲ့ ဒေသခံတဦးက မြေလတ်အသံကို ပြောပါတယ်။
စီးနင်းခံခဲ့ရတဲ့ စစ်ကိုင်းတိုင်း၊ တိုင်းရင်းသားစာပေနဲ့ယဥ်ကျေးမှုဦးစီးဌာနနဲ့ တိုင်းရင်းသားများအခွင့်အရေးကာကွယ်စောင့်ရှောက်ရေးဦးစီးဌာနရုံးအနီးမှာ တိုင်းရင်းဆေးရုံနဲ့ တိုင်းကြက်ခြေနီရုံးတွေရှိပြီး ရုံးအတွင်းမှာ စစ်ကောင်စီဝန်ထမ်း ၁၅ ဦးထက်မနည်းရှိပေမယ့် စစ်ကောင်စီရဲ့လက်နက်ကိုင်အစောင့်တွေ မရှိတဲ့ရုံးဖြစ်တယ်လို့ ဒေသခံတွေက ဆိုပါတယ်။
စစ်ကောင်စီကို ထောက်ခံရေးသားနေတဲ့ တယ်လီဂရမ်တွေမှာတော့ လက်နက်ကိုင်လူတစုက ဓားပြဝင်တိုက်တာဖြစ်ပြီး Suzuki Swift အပါ အိမ်စီးကား ၃ စီး၊ ဌာနပိုင်ငွေ ၃၄၀,၀၀၀ ကျပ်၊ လက်မ ၄၀ TV ၁ လုံး၊ ကင်မရာ ၁ လုံးနဲ့ ရုံးစာရွက်စာတမ်းတွေယူဆောင်သွားတယ်လို့ ရေးသားဖော်ပြကြပါတယ်။
လက်နက်ကိုင်လူတစုရုံးထဲကနေ ပြန်ထွက်သွားချိန် ကားအချို့နဲ့ငွေအချို့ပါသွားခဲ့ကြောင်းနဲ့ ဌာနဆိုင်ရာရုံးဖြစ်နေတာကြောင့် အတိအကျစုံစမ်းလို့မရဘူးလို့ အထက်ပါမုံရွာမြို့ဌာနဆိုင်ရာနဲ့ နီးစပ်သူက ပြောဆိုထားပြီး စစ်ကောင်စီရဲ့ဌာနဆိုင်ရာပစ္စည်းတွေ ဆုံးရှုံမှုနဲ့ပတ်သက်ပြီး မြေလတ်အသံက သီးခြားအတည်မပြုနိုင်ပါဘူး။
အဆိုပါရုံးဌာနမှာ စစ်ကောင်စီရဲ့ တိုင်းရင်းသားလူမျိုးများရေးရာဝန်ကြီးဌာနလက်အောက် တိုင်းညွှန်ကြားရေးမှူးရုံးဖြစ်ပြီး ပြည်ထောင်စုဝန်ကြီးမှာ ဦးဂျန်ဖန်နော်တောင် ဖြစ်ပါတယ်။
ပြီးခဲ့တဲ့ ဒီဇင်ဘာ ၂၆ ရက်ကလည်း သလ္လာရပ်ကွက်၊ မကျီးပင်စျေးအနီးမှာ ဒေါ်ရွေဝါပိုင် သံတိုသံစရောင်းဝယ်လုပ်ငန်းလုပ်သူရဲ့နေအိမ်ကို ပြန်ပေးသမား ၃ ဦးက ဝင်ရောက်လာပြီး သမီးဖြစ်သူ မမိုးမိုးစံကို ပြန်ပေးဆွဲရာ ရုန်းကန်တာကြောင့် လူကိုပစ်သတ်ပြီး ကားကို ယူဆောင်သွားခဲ့သေးတယ်လို့ သိရပါတယ်။
စာတည်း – ဟိန်းစံ
ရေနံချောင်း၊ ဧပြီ ၇၊ ၂၀၂၃။
မကွေးတိုင်း၊ မကွေးခရိုင်၊ ရေနံချောင်းမြို့နယ်၊ သုံးဆယ့်ခြောက်ကျေးရွာအုပ်စု၊ ဂျုပ်ပင်ရွာမှာ ဧပြီလ ၅ ရက် ညပိုင်းက လူသတ်ပြီး ပစ္စည်းဓားပြတိုက်မှု ဖြစ်ပွားခဲ့တယ်လို့ သိရပါတယ်။
အသတ်ခံရသူမှာ ဂျုပ်ပင်ရွာ မူလတန်းကျောင်းမှာ တာဝန်ကျတဲ့ အသက် ၅၆ နှစ်အရွယ် ဆရာမ ဒေါ်နုနုသီ ဖြစ်ပြီး သူရဲ့နေအိမ်မှာ တဦးတည်းရှိနေချိန် လူကိုသတ်ပြီး နေအိမ်တွင်းပစ္စည်းတွေကို လုယက်သွားခဲ့တာလို့ ဒေသခံတဦးက မြေလတ်အသံကို ပြောပါတယ်။
“သူ့မှာ သား၊သမီး ၂ ယောက် ရှိတယ်။ ဂျုပ်ပင်ရွာ မူပြပဲ။ နေတာက သူတယောက်ထဲနေတာ။ ၅ ရက်နေ့ညပိုင်းမှာ ဓားပြဝင်တိုက်ပြီး လူကိုပါ သတ်သွားတာ။ မနေ့မနက်ပိုင်းမှ ဖြစ်တာကို သိတာ” လို့ ပြောပါတယ်။
ဓားပြတိုက်မှုဖြစ်စဉ်အတွင်း သေဆုံးသူ ကျောင်းဆရာမ ဝတ်ဆင်ထားတဲ့ လက်ဝတ်လက်စားတွေအပြင် သိန်းရာချီတန်ဖိုးရှိ သိမ်းဆည်းထားတဲ့ ရွှေထည်နဲ့ ငွေသားတွေ ပျောက်ဆုံးခဲ့တယ်လို့ သိရပါတယ်။
စာတည်း – ရင်ငြိမ်း
စစ်ကိုင်း၊ ဒီဇင်ဘာ ၂၁၊ ၂၀၂၂။
စစ်ကိုင်းတိုင်းဒေသကြီး၊ မုံရွာမြို့၊ ဗိုလ်ချုပ်လမ်းပေါ်ရှိ ရွှေမုံရွာ ရတနာရွှေဆိုင်ဓားပြတိုက်ခံရပြီး သေနတ်နဲ့ပစ်ခံရလို့ ဆိုင်ရှင်အမျိုးသား ဒဏ်ရာရသွားတယ်လို့ သိရပါတယ်။
ဒီဇင်ဘာလ ၂၀ ရက်နေ့၊ နေ့လည် ၂ နာရီကျော်ခန့်မှာ ရွှေမုံရွာ ရတနာရွှေဆိုင်ရှေ့ကို ကားတစီးနဲ့ အမျိုးသား ၃ ဦးရောက်လာပြီး ရွှေဆိုင်ကိုသေနတ်နဲ့ပစ်ခတ်ခဲ့တယ်လို့ ဒေသခံတဦးက ပြောပါတယ်။
“လာတာက လူလတ်ပိုင်းအမျိုးသား ၃ ယောက်လို့ သိရတယ်။ ရွှေဆိုင်ကို ပစ်ခတ်ပြီးမှ ရွှေလုသွားတာ။ အများကြီးတော့ မပါသွားဘူး။ သူတို့သေနတ်နဲ့ပစ်လို့ ဆိုင်ရှင်အမျိုးသားတော့ ထိသွားတယ်။ ဆိုင်မှာက လင်မယား နှစ်ယောက်တည်းရှိကြတယ်လို့ သိရတယ်” လို့ ပြောပါတယ်။
သေနတ်နဲ့ပစ်ခံရလို့ ဆိုင်ရှင်အမျိုးသားမှာ တင်ပါးဆုံ၊ ခြေသလုံးနဲ့ ခြေကျင်းဝတ်တွေမှာ သေနတ်ဒဏ်ရာ ၅ ချက်ရသွားပြီး စိုးရိမ်ရလို့ မုံရွာပြည်သူ့ဆေးရုံကို ပို့ထားရတယ်လို့ ဆိုပါတယ်။
သေနတ်နဲ့ပစ်ခတ်ပြီးနောက် ဓားပြတိုက်သူတွေဟာ ဆိုင်ကနေ ကမန်းကတန်း ပြန်ထွက်သွားရလို့ ၁ မတ်သားခန့်ရှိ ရွှေလက်စွပ်တကွင်းသာ ယူသွားနိုင်တယ်လို့ သိရပါတယ်။
မြို့လယ်ခေါင်မှာ လူကိုသေနတ်နဲ့ပစ်ခတ်ပြီး ရွှေလုယူသွားသူတွေကို မဖမ်းလိုက်နိုင်ဘဲ လွတ်မြောက်သွားတယ်လို့ ဆိုပါတယ်။
စက်တင်ဘာလ ၁၁ ရက်နေ့ကလည်း မုံရွာမြို့၊ ဘုရားကြီးရပ်ကွက်၊ ဗိုလ်ချုပ်အောင်ဆန်းလမ်းနဲ့တရုတ်တန်းလမ်းထောင်မှာရှိတဲ့ သိန်းတရာရွှေဆိုင် ဓားမြတိုက်ခံရလို့ ကျပ်သိန်းပေါင်း ၃ သောင်းကျော်တန်ဖိုးရှိ ရွှေထည်တွေပါသွားမှုမှာလည်း လက်ရှိအချိန်ထိ ကျူးလွန်သူတွေကို ဖမ်းဆီးရမိခြင်းမရှိသေးဘူးလို့ သိရပါတယ်။