ကျေးရွာတာဝန်ခံ

မကွေး၊ ဖေဖော်ဝါရီ ၅၊ ၂၀၂၅။

မကွေးတိုင်း၊ သရက်မြို့နယ်က ကျေးရွာတာဝန်ခံနဲ့ အုပ်ချုပ်ရေးအဖွဲ့ဝင် စုစုပေါင်း ၃ ဦးပစ်သတ်ခံရတယ်လို့ ဒေသခံကာကွယ်ရေးတပ်ဖွဲ့ဝင်တွေနဲ့ နီးစပ်သူဆီက သိရပါတယ်။

သေဆုံးသူတွေဟာ ချင်းကုန်းကျေးရွာတာဝန်ခံ အသက် ၅၃ နှစ်အရွယ် ဦးဌေးအောင်၊ ချင်းကုန်းရွာ အုပ်ချုပ်ရေးအဖွဲ့ဝင် အသက် ၆၅ နှစ်အရွယ် ဦးသန်းမြင့်၊ ဖောင်းကတောကျေးရွာ အုပ်ချုပ်ရေးအဖွဲ့ဝင် အသက် ၄၂ နှစ်အရွယ် ဦးသန်းဇော်တို့ဖြစ်ပါတယ်။

သေဆုံးသူတွေဟာ စစ်ကောင်စီယန္တရားတွေ ကျေးရွာမှာလည်ပတ်နိုင်အောင် ဦးဆောင်လုပ်ကိုင်နေသူတွေဖြစ်တယ်လို့ ဒေသခံကာကွယ်ရေးတပ်ဖွဲ့ဝင်တွေနဲ့နီးစပ်သူက ပြောပါတယ်။

“သူတို့က စစ်ကောင်စီခန့်အုပ်ချုပ်ရေးမှူးနဲ့ အုပ်ချုပ်ရေးအဖွဲ့ဝင်တွေ၊ ရွာကို ဖိနှိပ်မှုယန္တရားလုပ်တဲ့ နေရာမှာဦးဆောင်နေတာ။ တော်လှန်ရေးအဖွဲ့အစည်းတွေက ကြေညာချက်တွေထုတ်တဲ့အခါမှာလည်း သူတို့တွေကမဖြုံဘူး။ ဂရုမစိုက်ဘူး။ စစ်ကောင်စီရဲ့ ယန္တရားတွေကိုလည်း အားပေးအားမြှောက်ပြုပြီးတော့မှ ကျောင်းဖွင့်၊ ဆေးခန်းဖွင့် ဒီသူပုန်တွေကို ဂရုစိုက်စရာမလိုဘူး ပြောနေတဲ့သူတွေ။”လို့ ဒေသခံကာကွယ်ရေးတပ်ဖွဲ့ဝင်တွေနဲ့နီးစပ်သူက ပြောပါတယ်။

အဲ့ဒီပစ်ခတ်မှုကို ဘယ်လက်နက်ကိုင်အဖွဲ့အစည်းက လုပ်ခဲ့တယ်ဆိုတာကိုတော့ ထုတ်ပြန်တာမရှိသေးပါဘူး။

အလောင်းတွေကိုတော့ ဖေဖော်ဝါရီ ၃ ရက်မနက်ပိုင်းမှာ ဒေသခံတွေကတွေ့ရှိခဲ့တာဖြစ်ပြီး အဲ့ဒီနေ့ညနေ ၄ နာရီလောက်မှာ စစ်ကောင်စီတပ်ဖွဲ့ဝင်တွေနဲ့ ရဲတွေက လာသယ်သွားတယ်လို့ သိရပါတယ်။

စာတည်း – လင်း

မတ္တရာ၊ ဖေဖော်ဝါရီ ၂၅၊ ၂၀၂၃။

မန္တလေးတိုင်း၊ မတ္တရာမြို့နယ်၊ ပန်းယျကျေးရွာအုပ်စု၊ ပန်းယျကျေးရွာမှာ စစ်ကောင်စီခန့် ကျေးရွာတာဝန်ခံ သေနတ်နဲ့ ပစ်ခံရပြီး သေဆုံးသွားတယ်လို့ သိရပါတယ်။

ဖေဖော်ဝါရီလ ၂၄ ရက် နေ့လည် ၁၂ နာရီခန့်မှာ ပန်းယျကျေးရွာ တာဝန်ခံ ဦးသောင်းဟန် ၇၁ နှစ်ဟာ ဆိုင်ကယ်နဲ့အပြင်သွားချိန် ပန်းယျ-တုန်ကုန်းကျေးရွာချင်းဆက်လမ်းပေါ်မှာ ပစ်သတ်ခံလိုက်ရတယ်လို့ ဒေသခံတဦးက ပြောပါတယ်။

“သူ့သားကို ထမင်းချိုင့်သွားပို့တယ်လို့ သိရတယ်။ အဲ့ဒါကို သေနတ်သမားတွေက လိုက်လာပြီး ပစ်သွားတာ။ သူက စကစခန့် ကျေးရွာတာဝန်ခံဆိုတော့ လုပ်သွားတာနဲ့ တူတယ်” လို့ပြောပါတယ်။

ဦးသောင်းဟန်ဟာ စစ်ကောင်စီလက်အောက်ခံ အထက်အရာရှိတွေက ခိုင်းတဲ့ ကိစ္စတွေကိုလုပ်ပေးပြီး ကျေးရွာထဲမှာလည်း အနည်းငယ် အာဏာပြတာမျိုးတွေ ရှိပြီး၊ ခုလို ပစ်ခတ်ခံရတာကြောင့် ဝဲဘက်နားထင် ကျည်ဖောက်ဝင်ဒဏ်ရာ ၁ ချက် ရပြီး နေရာမှာပဲ သေဆုံးသွားတယ်လို့ ဆိုပါတယ်။

ဒီပစ်ခတ်မှုကို ဘယ်အဖွဲ့အစည်းက လုပ်ဆောင်လဲဆိုတာ ထုတ်ပြန်ကြေငြာထားတာ မရှိသေးသလို ဦးသောင်းဟန် အလောင်းကိုတော့ ဒေသခံတွေရဲ့အကူအညီနဲ့ မတ္တရာဆေးရုံကို ပို့ထားတယ်လို့ အထက်ပါဒေသခံက ပြောပါတယ်။

အလားတူ ပြီးခဲ့တဲ့နှစ် အောက်တိုဘာလ ၁၇ ရက်ကလည်း မတ္တရာမြို့နယ်၊ တံငါမြောက်ကျေးရွာ အုပ်ချုပ်ရေးမှူး ဦးအောင်မင်းထွန်းဆိုသူလည်း သေနတ်နဲ့ပစ်ခံရပြီး သေဆုံးခဲ့ပါသေးတယ်။