စစ်ကိုင်း ၊ဇန်နဝါရီ ၁၇၊ ၂၀၂၅။

စစ်ကိုင်းတိုင်း၊ ကနီမြို့နယ်မှာ အမျိုးသားညီညွတ်ရေးအစိုးရ NUG က ခွင့်ပြုထားတဲ့ အခွန်ကောက်ခံဂိတ် ၅ ဂိတ်သာချန်ပြီး တခြားငွေကောက်ခံနေတဲ့ ဂိတ် ၂၀ နီးပါးကို ပိတ်သိမ်းလိုက်ပြီလို့ ကနီမြို့နယ် ပြည်သူ့အုပ်ချုပ်ရေးအဖွဲ့ တာဝန်ရှိသူဆီက သိရပါတယ်။

ဇန်နဝါရီ ၇ ရက်က ကနီမြို့နယ်မှာ ဖွင့်လှစ်ထားတဲ့ အခွန်ကောက်ခံတဲ့ဂိတ်အားလုံးကို ငွေစာရင်း ကွာဟမှုတွေကြောင့် ဒေသခံကာကွယ်ရေးတပ်ဖွဲ့တွေက ပူးပေါင်းထိန်းသိမ်းလိုက်တယ်လို့ မီဒီယာတွေမှာ ဖော််ပြခဲ့ကြပါတယ်။

အဲ့ဒီနောက် ဇန်နဝါရီ ၈ ရက်မှာတော့ NUG ခွင့်ပြုချက်မရှိဘဲ ဖွင့်လှစ်ထားတဲ့ဂိတ်တွေကို ပိတ်သိမ်းဖို့ စတင်လုပ်ဆောင်ခဲ့ပြီး အခုလက်ရှိ ၁၈ ဂိတ်ကို ပိတ်သိမ်းထားကာ ရာနှုန်းပြည့် ပိတ်သိမ်းနိုင်ဖို့လည်း ဆက်လက်လုပ်ဆောင်နေတယ်လို့ ဆိုပါတယ်။

“တရားမဝင် အခွန်ကောက်ဂိတ် ၂၄ ဂိတ်ကို ၁၈ ဂိတ်လောက် ဖြုတ်သိမ်းပြီးပြီမို့ ၈၀% ပြီးပြီလို့ ခန့်မှန်းပြောတာပါ။ ကျန်ရှိနေတဲ့ တရားမဝင်ဂိတ် တာဝန်ရှိသူတွေကိုလည်း အကြောင်းကြားထားပြီး ဖြုတ်သိမ်း‌ပေးမယ်လို့လည်း သိထားရပါတယ်။ ဆက်လက်ဆောင်ရွက်နေပါတယ်။”လို့ ကနီမြို့နယ် ပအဖ တာဝန်ရှိသူက ပြောပါတယ်။

ကနီမြို့နယ်မှာ အမျိုးသားညီညွတ်ရေးအစိုးရ NUG က တရားဝင်ခွင့်ပြုထားတဲ့ အခွန်ကောက်ခံဂိတ် ၄ ဂိတ်နဲ့ လုံခြုံရေး ဂိတ် ၁ ဂိတ်ရှိပြီး ခွင့်ပြုချက်မရှိဘဲ အခွန်ကောက်ခံနေတဲ့ ဂိတ်တွေကတော့ ၂၄ ဂိတ်ရှိတယ်လို့ ဆိုပါတယ်။

အခုလက်ရှိမှာတော့ အမျိုးသားညီညွတ်ရေးအစိုးရ NUG ရဲ့ ခွင့်ပြုချက်နဲ့ ဖွင့်လှစ်မယ့် ကုန်းကြောင်း အခွန်ကောက်ခံဂိတ် ၃ ဂိတ်၊ ရေကြောင်း အခွန်ကောက်ခံဂိတ် ၂ ဂိတ် စုစုပေါင်း ၅ဂိတ်ပဲ ထားရှိတော့မှာ ဖြစ်တယ်လို့ သိရပါတယ်။

“(ရေကြောင်းမှာ)မျောစာပေးတဲ့ ဂိတ် ၁ ဂိတ်နဲ့ မျောစာစစ်တဲ့ ဂိတ် ၁ ဂိတ်ဆိုပြီးတော့ ရေကြောင်းမှာ ၂ ဂိတ်၊ အဲ့တော့ မြို့နယ် ပအဖ အခွန်ကောက်ခံရေးဂိတ် ၅ဂိတ်ပဲရှိမှာပေါ့၊ ကျန်တဲ့ဂိတ်တွေက အားလုံးပိတ်သိမ်းမှာပါ။ ကျန်တဲ့ ဂိတ်တွေဆိုတာ ရပ်ကျေးအဖွဲ့အစည်း အသီးသီးကနေပြီး သူ့နည်းသူ့ဟန် ဖွင့်ထားတဲ့ ဂိတ်တွေဖြစ်ပါတယ်။”လို့ ကနီမြို့နယ် ပကဖ တာဝန်ခံက ပြောပါတယ်။

အဆိုပါ ကိစ္စနဲ့ ပတ်သက်ပြီး အမျိုးသားညီညွတ်ရေးအစိုးရ၊ သယံဇာတနဲ့ သဘာဝပတ်ဝန်းကျင် ထိန်းသိမ်းရေးဝန်ကြီးဌာနကို ဆက်သွယ်မေးမြန်းရာမှာတော့ ကြားကာလ ဗဟိုကော်မတီမှာ ဆွေးနွေးဆဲဖြစ်ပြီး ဆွေးနွေးမှုတွေ ပြီးဆုံးမှသာ ဖြေကြားနိုင်မှာဖြစ်သလို ပြည်ထဲရေးဝန်ကြီးဌာနကလည်း စာထုတ်ပြန်သွားမှာဖြစ်တယ်လို့ ဇန်နဝါရီ ၁၁ ရက်က အကြောင်းပြန်ခဲ့ပါတယ်။

အမျိုးသားညီညွတ်ရေးအစိုးရရဲ့ ခွင့်ပြုချက်နဲ့ ဖွင့်လှစ်ထားတဲ့ အခွန်ကောက်ခံဂိတ်တွေမှာလည်း ကောက်ခံရရှိထားတဲ့ ဘဏ္ဍာငွေတွေကို အလေလွင့်မရှိစေဖို့ ဂိတ် ၁ ဂိတ်ဆီမှာ မြို့နယ်ပအဖ ကိုယ်စားလှယ် ၁ ဦးနဲ့ နယ်မြေခံတပ်ရင်း ၉ ရင်းက ရဲဘော်တွေ ပူးပေါင်း‌လုပ်ဆောင်သွားမှာ ဖြစ်တယ်လို့ သိရပါတယ်။

မြေလတ်အသံ၊ ဇန်နဝါရီ ၁၅၊ ၂၀၂၅။

လူထုနဲ့ တိုက်ရိုက်ထိတွေ့ဆက်ဆံနေရတဲ့ ပ ၃ လုံးအဖွဲ့တွေအနေနဲ့ လူထုယုံကြည်မှုရဖို့၊ ဖြောင့်မတ်မှန်ကန်ဖို့ အရေးကြီးပြီး ပ ၃ လုံးယန္တရားကို ပြုပြင်ပြောင်းလဲရာမှာလည်း မနှောင့်နှေးဖို့နဲ့ အလုပ်ဖြစ်ရုံလောက်ပဲ ပြုပြင်ပြောင်းလဲတာမျိုး မလုပ်ဖို့လိုတယ်လို့ အမျိုးသားညီညွတ်ရေးအစိုးရ NUG ရဲ့ ယာယီသမ္မတ ဒူဝါလရှီးလက ဇန်နဝါရီ ၁၄ ရက်နေ့က ကျင်းပခဲ့တဲ့ ၂/၂၀၂၅ အစိုးရအဖွဲ့ အစည်းအဝေးမှာ ပြောကြားခဲ့ပါတယ်။

“ပ ၃ လုံးအဖွဲ့တွေရဲ့ စွမ်းရည်နဲ့ ကျင့်ဝတ်ဟာ အထူးအရေးကြီးတဲ့ ကိစ္စဖြစ်ပါတယ်။ ဒါ့ကြောင့် ပ ၃ လုံး ယန္တရားဖြစ်တဲ့ ပြည်သူ့ကာကွယ်ရေး၊ ပြည်သူ့အုပ်ချုပ်ရေးနဲ့ ပြည်သူ့လုံခြုံရေးအဖွဲ့တွေ တော်တည့်ဖြောင့်မတ်ရေးဟာ အင်မတန်အရေးကြီးတယ်လို့ ပြောနိုင်ပါတယ်။ ကျနော်တို့ဟာ ပ ၃ လုံး ပြုပြင်ပြောင်းလဲရေးကို အကောင်အထည်ဖော်ရာမှာ လက်လည်းမနှေးသင့်သလို၊ အလုပ်ဖြစ်ရုံမျှ ပြုပြင်ပြောင်းလဲရေး ဆိုတာထက်လည်း ပိုသင့်တယ်လို့ ထင်ပါတယ်။” လို့ ပြောပါတယ်။

ဒါ့အပြင် မဟာမိတ်အင်အားစုတွေထဲက ဦးဆောင်နိုင်စွမ်းရှိသူတွေ၊ ထက်မြက်သူတွေကို အစိုးရအဖွဲ့ထဲမှာ အင်အားသစ်တခုအနေနဲ့ ဖြည့်ဆည်းပြီး ပိုကျယ်ပြန့်တဲ့ တော်လှန်ရေး လုပ်ငန်းစဥ်တွေ အကောင်အထည်ဖော်နိုင်ဖို့ ယုံကြည်တယ်လို့ ဆိုပါတယ်။

ပြည်ထောင်စုဝန်ကြီးချုပ် မန်းဝင်းခိုင်သန်းကလည်း အစိုးရရဲ့ ကဏ္ဍပေါင်းစုံထဲကမှ အုပ်ချုပ်ရေးကဏ္ဍနဲ့ အခွန်ဘဏ္ဍာဆိုင်ရာကဏ္ဍမှာ အသံတွေထွက်ပေါ်နေသလို တော်လှန်ရေး လမ်းကြောင်းပေါ်ကနေ သွေဖည်နေတဲ့ မြို့နယ်တချို့က တာဝန်ရှိသူတွေကိုလည်း ဖြေရှင်းဆောင်ရွက်ဖို့ လိုအပ်တယ်လို့ အဆိုပါ အစည်းအဝေးမှာ ပြောကြားခဲ့ပါတယ်။

“ဘယ်ကဏ္ဍမှာ ပြဿနာတွေ၊ အခက်အခဲတွေ ရှိနေသလဲ၊ ဘယ်ကဏ္ဍကို ဦးစားပေးဖြေရှင်းကြမလဲ ဆိုတာကိုတော့ အားစိုက်ဆောင်ရွက်ကြဖို့ လိုပါတယ်။ အခုဆိုရင် အုပ်ချုပ်ရေးကဏ္ဍဘက်နဲ့ အခွန်ဘဏ္ဍာဆိုင်ရာကဏ္ဍတွေဘက်မှာ အသံတွေ အတော်ထွက်ပြီး တချို့မြို့နယ်တာဝန်ရှိသူတွေအနေနဲ့ တော်လှန်ရေးလမ်းကြောင်းကို သွေဖည်လာတာမျိုးတွေလည်း ရှိတာမို့ တင်းတင်းကြပ်ကြပ် စီမံဆောင်ရွက်သွားကြဖို့လည်း မှာကြားရင်း နိဂုံးချုပ်ပါတယ်။”

ပြီးခဲ့တဲ့ ဇန်နဝါရီ ၁ ရက်နေ့ကလည်း ပြည်ထောင်စုဝန်ကြီးချုပ် မန်းဝင်းခိုင်သန်းက ပြည်သူကို မျက်နှာမမူတဲ့ လုပ်ရပ်တွေ၊ ဥပဒေချိုးဖောက်တာတွေ၊ တော်လှန်ရေးထက် မိမိအကျိုးစီးပွားပဲ ကြည့်သူတွေကို အရေးယူနိုင်ဖို့ လုပ်ဆောင်နေပြီး အုပ်ချုပ်ရေးဆိုင်ရာ၊ စစ်ရေးဆိုင်ရာ အားနည်းချက်တွေကိုလည်း ပြင်ဆင်ဖို့ အသင့်ဖြစ်နေပြီလို့ နှစ်သစ်မိန့်ခွန်း ပြောခဲ့ပါသေးတယ်။

စစ်ကိုင်း၊ ဇွန် ၁၂၊ ၂၀၂၃။

စစ်ကိုင်းတိုင်း၊ မြောင်မြို့နယ်၊ ပြည်သူ့ကာကွယ်ရေးတပ်ဖွဲ့(ပကဖ)အဖွဲ့မှ ကိုနွေဦး(မြောင်)ကို စစ်ကိုင်းဖိုရမ်မှာ ပါဝင်ခဲ့လိုဆိုပြီး ပကဖ တာဝန်ကနေ ယာယီရပ်ဆိုင်း လိုက်တယ်လို့ သိရပါတယ်။

ကိုနွေဦး(မြောင်) ဟာ မြောင်မြို့နယ် ပကဖ အင်အားစုဆောင်းရေး၊ လေ့ကျင့်ရေးနဲ့ စစ်ရေးတာဝန်ခံတဦးဖြစ်သလို မကြာသေးခင်က ကျင်းပခဲ့တဲ့ စစ်ကိုင်းဖိုရမ်မှာလည်း ဖြစ်မြောက်ရေးအဖွဲ့ရဲ့ ပြောရေးဆိုခွင့်ရှိသူများ စာရင်းမှာ ပါဝင်ခဲ့တာပါ။

“လက်ရှိအခြေအနေကတော့ ကြားတဲ့အတိုင်းပဲပေါ့ဗျာ။ ကျနော်ကခရီးသွားနေတာ မနေ့ကမှ ပြန်ရောက်တာ။ ပြန်ရောက်တော့ လိုင်းလည်းရတယ်။ အင်တာနက်လည်းရတယ်။ ဒါပေမယ့် သတင်းတွေက ပျံ့နေတယ်။ ကျနော့်လာပြောကြတာပေါ့။ အဲ့အချိန်ကျမှ သိရတာ။ ဖိုရမ်မှာပါဝင်တဲ့အတွက်ကြောင့် ပကဖ တာဝန်ကနေ ရပ်ဆိုင်းလိုက်တယ်ဆိုတာကို တိုင်းတာဝန်ခံက လက်မှတ်ထိုးထုတ်တယ်” လို့ ကိုနွေဦး(မြောင်) ကပြောပါတယ်။

မေလ ၃၁ ရက်နေ့မှာ စစ်ကိုင်းဖိုရမ်အစည်းဝေးပြီးသွားခဲ့ပြီး ဇွန်လ ၂ ရက်နေ့မှာတော့ မြို့နယ်ပကဖတာဝန်ခံက ဖုန်းဆက်သွယ်လာကာ ဖိုရမ်မှာပါဝင်ခဲ့တဲ့ ကိုနွေဦးကို တိုင်းတာဝန်ခံက နှုတ်ထွက်စာ တင်ခိုင်းနေကြောင်း အသိပေးခဲ့ပြီး မြို့နယ်တာဝန်ခံက လက်မခံခဲ့တဲ့အတွက် ၃ ရက်နေ့မှာတော့ တိုင်းပကဖတာဝန်ခံ ကိုသြဇာ ကိုယ်တိုင် လက်မှတ်ထိုးပြီး တာဝန်ရပ်ဆိုင်းစာ ထုတ်လိုက်တာ ဖြစ်တယ်လို့ ဆိုပါတယ်။

“တခြားသူတွေကတော့ ဒီကိစ္စအပေါ် အယူခံဝင်မယ်ပေါ့၊ အယူခံဝင်ရအောင် ကျနော်က ပြစ်မှုလုပ်ထားတဲ့သူလည်းမဟုတ်ဘူး၊ ဒီရာထူးချတာတွေနဲ့ ပတ်သက်ပြီး စိတ်လည်းမဝင်စားဘူး၊ ကျ​နော့်အတွက်က တော်လှန်ရေးနဲ့ပတ်သက်ပြီး ဘယ်လောက်လုပ်နိုင်မလဲဆိုတာပဲ အရေးကြီးတာ။” လို့ ကိုနွေဦး(မြောင်) က ပြောပါတယ်။

ပဇီကြီး လေကြောင်းပစ်ခတ်မှုဖြစ်ပြီး နောက်ပိုင်းမှာတော့ ပကဖအဖွဲ့အစည်းတွေအနေနဲ့ ပွဲတွေမတက်ဖို့ စာထွက်ထားတာရှိပေမယ့် တခြားအဖွဲ့အစည်းတွေနဲ့ အစည်းဝေးတက်ရင် ခွင့်ပြုချက်အဆင့်ဆင့် တောင်းခံရမယ်ဆိုတဲ့ စာကတော့ ဖိုရမ်အစည်းအဝေးပြီးတဲ့ ၃၁ ရက်နေ့ နောက်ပိုင်းမှသာ ရောက်လာတာဖြစ်တယ်လို့ သိရပါတယ်။

စစ်ကိုင်းဖိုရမ်ဖြစ်မြောက်ရေးတာဝန်ခံတဦးက အခုကိစ္စနဲ့ပတ်သက်ပြီး NUG ဘက်က သက်ဆိုင်ရာ တာဝန်ရှိသူတွေနဲ့ တွေ့ဆုံကာ ဖြေရှင်းဆွေးနွေးဖို့ ရှိတယ်လို့ဆိုပါတယ်။

ကိုနွေဦးကတော့ ဖိုရမ်တက်ရောက်ခဲ့တာဟာ စစ်ကိုင်းတိုင်းအတွင်းက ပျံ့ကြဲနေတဲ့အင်အားစုတွေကို စုစည်းဖို့၊ ပဋိပက္ခတွေကိုထိန်းညှိဖို့၊ ဖက်ဒရယ်ယူနစ်တခုတည်ဆောက်ဖို့၊ NUG ကို အစိုးရအဖြစ်သတ်မှတ်ကာ တဖက်တလမ်းက အထောက်အကူပြုပြီး စစ်အာဏာရှင်ကို ချေမှုန်းဖို့ စတဲ့ရည်ရွယ်ချက်တွေနဲ့ တက်ရောက်ခဲ့တာဖြစ်ပြီး နောက်ပိုင်းမှာလည်း ဖိုရမ်ရဲ့ ပြောရေးဆိုခွင့်ရှိသူတဦးအနေနဲ့ ဆက်လက်ရှိနေဦးမှာဖြစ်တယ်လို့ ဆိုပါတယ်။

ပထမဆုံးအကြိမ် စစ်ကိုင်းဖိုရမ်ကို ၂၀၂၃ ခုနှစ်၊ မေလ ၃၀ ရက်နဲ့ ၃၁ ရက်နေ့တွေမှာ ကျင်းပပြုလုပ်ခဲ့ပြီး တိုင်းဒေသကြီးအတွင်းရှိ မြို့နယ်ပေါင်း ၂၈ မြို့နယ် အခြေစိုက် တော်လှန်ရေးအဖွဲ့အစည်း(၁၇၃)ဖွဲ့နဲ့ လေ့လာသူ ၃၁ ဦးတို့ တက်ရောက်ဆွေးနွေးခဲ့ရာ ဖိုရမ်အတွင်း နိုင်ငံရေး၊ စစ်ရေး၊ ဒေသန္တရအုပ်ချုပ်ရေး၊ အထွေထွေ ဟူ၍ ကဏ္ဍ ၄ ရပ်ခွဲကာ ဆွေးနွေးခဲ့ကြသလို KNU အပါအဝင် လက်နက်ကိုင်တော်လှန်ရေးအင်အားစုတွေနဲ့ အဖွဲ့အစည်းအများအပြားက ထောက်ခံကြိုဆိုကြောင်းကို သဝဏ်လွှာအသီးသီး ပေးပို့ခဲ့ကြပါတယ်။

အလားတူ အမျိုးသားညီညွတ်ရေးအစိုးရ(NUG) ကိုယ်တိုင်လည်း သဝဏ်လွှာတစောင် ပေးပို့ခဲ့ပြီး သဝဏ်လွှာပါ “ဆွေးနွေးပွဲသည်လည်း ပြင်ပ ပယောဂ မပါဘဲ မိမိတို့ ဒေသအခြေအနေနဲ့ကိုက်ညီသော ရလာဒ်များကို ဆွေးနွေးအဖြေရှာနိုင်ကြပါစေလို့ ဆန္ဒပြု” ဆိုတဲ့ ရေးသားမှုမှာလည်း တော်လှန်ရေးအင်အားစုများအကြား ဝေဖန်မှုများမြင့်တက်ခဲ့ပါတယ်။

စာတည်း – 007